ដោយ ហ្សូលី
ភ្នំពេញៈ ផ្លូវល្បឿនលឿនពីភ្នំពេញ-ព្រះសីហនុ នឹងចាប់បើកដំណើរការនៅចុងក្នុងខែកញ្ញា ឆ្នាំ២០២២ ដោយបច្ចុប្បន្នបាននឹងសាងសង់ប្រមាណ២០ភាគរយហើយ។នេះបើតាមការលើកឡើងរបស់លោក Zhang Zhongqi អគ្គនាយកនៃការិយាល័យគម្រោងផ្លូវល្បឿនលឿនភ្នំពេញ-ក្រុងព្រះសីហនុ។
លោកបានមានប្រសាសន៍ ក្នុងជំនួបជាមួយប្រតិភូក្រសួងសាធារណៈការ និងដឹកជញ្ជូនកាលពីថ្ងៃទី២ មិនាកន្លងមកថា គម្រោងហេដ្ឋារចនាសម្ព័ន្ធផ្លូវល្បឿនលឿនមួយខ្សែនេះគឺតភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ដែលមានប្រវែងសរុបដល់ទៅ១៩០គីឡូម៉ែត្រ។
លោកគង់ សារាជ ប្រធានគណៈកម្មការទី៤ នៃព្រឹទ្ធសភាបានមានប្រសាសន៍ថា ខេត្តព្រះសីហនុ គឺជាច្រកប៉ូលសេដ្ឋកិច្ចដ៏សំខាន់របស់ប្រទេសកម្ពុជា ហើយការសាងសង់ផ្លូវល្បឿនលឿននេះ ដើម្បីធ្វើការឱ្យដឹកជញ្ជូនទំនិញបានលឿន ជួយឱ្យសេដ្ឋកិច្ចកម្ពុជាកាន់តែរីកចំរើន។ ផ្លូវល្បឿនលឿននេះជំរុញឱ្យខេត្តព្រះសីហនុ មានកំពង់ផែកាន់តែល្អប្រសើរ មានកំពង់ផែទឹកជ្រៅកាន់តែឆាប់រហ័ស ដែលអាចឱ្យកប៉ាល់ដឹកជំនិញធំៗ អាចចូលមកបានផងដែរ។
លោកបន្តថា រដ្ឋាភិបាលមិនសាងសង់់តែផ្លូវល្បឿនលឿនភ្នំពេញ-ព្រះសីហនុមួយនេះនោះទេ គឺនៅមានការធ្វើផ្លូវល្បឿនលឿនផ្សេងៗទៀត ដោយសារនៅលើពិភពលោកនេះ ការដឹកជញ្ជូនមានសារៈសំខាន់ណាស់ បើសិនជាការដឹកជញ្ជូន មិនបានលឿននោះទេ កម្ពុជាមិនអាចដើរទាន់ការរីកចំរើន នៃសកលលោកបាននោះទេ ដូចនេះហើយទាំងផ្លូវគោក ផ្លូវទឹក និងផ្លូវអាកាស ត្រូវតែធ្វើយ៉ាងសម្រួលឱ្យការដឹកជញ្ជូនបានលឿន៕
