ដោយ ប៊ី
ភ្នំពញ៖ រដ្ឋាភិបាលរំពឹងថានឹងចុះហត្ថលេខាលើកិច្ចព្រមព្រៀងជាមួយក្រុមហ៊ុន Blue Circle ដែលគ្រប់គ្រងដោយប្រទេសបារាំងដើម្បីអភិវឌ្ឍគម្រោងផលិតអគ្គិសនីដោយថាមពលខ្យល់នៅក្នុងឆមាសទីមួយនៃឆ្នាំនេះ។ នេះបើតាមយោងតាមក្រសួងរ៉ែ និងថាមពល។
អគ្គិសនីកម្ពុជា (EdC) កំពុងចរចាជាមួយក្រុមហ៊ុន ហើយភាគីទាំងពីរគ្រោងនឹងចុះហត្ថលេខាលើកិច្ចព្រមព្រៀងក្នុងពេលឆាប់ៗនេះ។
ការវិនិយោគរបស់ក្រុមហ៊ុនគឺឆ្លើយតបទៅនឹងការកើនឡើងនៃតម្រូវការអគ្គិសនី និងស្របតាមគោលដៅរបស់រដ្ឋាភិបាលក្នុងការកាត់បន្ថយថ្លៃដើមសម្រាប់ទាំងអ្នកប្រើប្រាស់ ពាណិជ្ជកម្ម និងអ្នករស់នៅ។
បច្ចុប្បន្ននេះការចរចាគឺផ្តោតលើពន្ធគយរវាងក្រុមហ៊ុន និងEdC ដែលមានបំណងផ្គត់ផ្គង់ប្រភពថាមពលក្នុងតម្លៃទាប។
ក្រុមហ៊ុន Blue Circle គ្រោងនឹងសាងសង់ទួរប៊ីនខ្យល់យ៉ាងហោចណាស់ ១០ ដែលមានកម្លាំង ៨០ មេហ្គាវ៉ាត់នៅលើកំពូលភ្នំបូកគោក្នុងឃុំកោះតូច ស្រុកទឹកឈូ។ តម្លៃនៃការវិនិយោគលើថាមពលខ្យល់គឺស្ថិតនៅចន្លោះពី ២ ទៅ ៣ លានដុល្លារក្នុងមួយមេហ្គាវ៉ាត់។
ក្រុមហ៊ុន Blue Circle បាននិងកំពុងសិក្សាលទ្ធភាពនៅខេត្តមណ្ឌលគីរី និងកំពតចាប់តាំងពីឆ្នាំ ២០១៨ ហើយក្នុងខែ មីនា ក្រុមហ៊ុនបានបង្ហាញថា ប្រទេសកម្ពុជាមានសក្តានុពលក្នុងការវិនិយោគថាមពលខ្យល់។
ក្រុមហ៊ុននេះបានឱ្យដឹងថា ប្រទេសកម្ពុជាអាចបង្កើតថាមពលបាន ៥០០ មេហ្គាវ៉ាត់ពីថាមពលខ្យល់។ បច្ចុប្បន្នក្រុមហ៊ុននេះវិនិយោគលើថាមពលខ្យល់នៅប្រទេសថៃ និងវៀតណាម។
របាយការណ៍របស់ក្រសួងបានឱ្យដឹងថា ប្រទេសកម្ពុជាបានផលិតថាមពលសរុបចំនួន ១១ ២៦១ ជីហ្គាវ៉ាត់ក្នុងមួយឆ្នាំកាលពីឆ្នាំមុន កើនឡើង ២១ ភាគរយពីចំនួន ៩ ៤២៧ ជីហ្គាវ៉ាត់ឆ្នាំ ២០១៨៕
