ដោយ ប៊ី
ភ្នំពេញ៖ ទំហំនាំចូល និងនាំចេញសរុបរបស់កម្ពុជាមានតម្លៃ ៣៦,៧ ពាន់លានដុល្លារ (១៤៩,៦ ពាន់ពាន់លានរៀល) កាលពីឆ្នាំមុន។ នេះបើយោងតាមតួលេខពីធនាគារជាតិនៃកម្ពុជា។
តួលេខបានបង្ហាញថា ព្រះរាជាណាចក្រកម្ពុជាបាននាំចេញផលិតផលមានតម្លៃ ១៤,៥៣ ពាន់លានដុល្លារ (៥៩,២ ពាន់ពាន់លានរៀល)ក្នុងឆ្នាំ២០១៩ កើនឡើង ១២,៧ ភាគរយហើយការនាំចូលរបស់ខ្លួនមានចំនួន ២២,១៩ ពាន់លានដុល្លារ (៩០,៤ ពាន់ពាន់លានរៀល) កើនឡើង ១៨,៦ ភាគរយ។
តួរលេខបានបន្ថែមថា ឱនភាពពាណិជ្ជកម្មមានចំនួន ៧,៦៦ ពាន់លានដុល្លារ (៣១,២ ពាន់ពាន់លានរៀល) ដែលជាការកើនឡើង ៣១,៦ ភាគរយបើប្រៀបធៀបនឹងឆ្នាំ ២០១៨ ។
ផលិតផលនាំចេញសំខាន់ៗរបស់កម្ពុជារួមមានសម្លៀកបំពាក់ និងផលិតផលវាយនភ័ណ្ឌ ស្បែកជើង អង្ករ និងកង់ទៅកាន់ទីផ្សារសំខាន់ៗដូចជាសហរដ្ឋអាមេរិក ជប៉ុន អាល្លឺម៉ង់ ចិន និងចក្រភពអង់គ្លេស។
ទន្ទឹមនឹងនេះដែរប្រទេសកម្ពុជាបាននាំចូលវត្ថុធាតុដើមសម្រាប់វិស័យកាត់ដេរ រថយន្ត ប្រេង គ្រឿងសំណង់ និងផលិតផលប្រើប្រាស់ប្រចាំថ្ងៃដែលភាគច្រើនមកពីប្រទេសចិន ថៃ វៀតណាម ជប៉ុន និងកូរ៉េខាងត្បូង៕
