ដោយៈ រ៉ាណេត
កោះកុងៈ រោងចក្រផលិតដែកដ៏ធំ ដែលវិនិយោគជាច្រើនលានដុល្លារ នឹងបង្ហាញវត្តមាននៅក្នុងភូមិសាស្ត្រឃុំព្រែកខ្សាច់ ស្រុកគីរីសាគរ ខេត្តកោះកុង ខណៈដែលតំណាងក្រុមហ៊ុនវិនិយោគ និងអជ្ញាធរក្នុងតំបន់បាន និងកំពុងចុះពិនិត្យមើលទីតាំងសាងសង់។
រោងចក្រផលិតដែកដ៏ធំមួយនឹងបង្ហាញខ្លួននៅក្នុងស្រុកគីរីសាគរ ខេត្តកោះកុង
លោក ណឹម ភិរម្យ អភិបាលរងស្រុកគិរីសាគរ កាលពីរសៀលថ្ងៃទី១៣ ខែមីនា ឆ្នាំ២០២០ បានដឹកនាំក្រុមកាងារថ្នាក់ស្រុក និងមន្ត្រីដែលពាក់ព័ន្ធឧទ្យានជាតិបុទុមសាគរ ព្រមទាំងអ្នកតំណាងក្រុមហ៊ុន Celestial ចុះពិនិត្យរកទីតាំង សម្រាប់គម្រោងវិនិយោគសាងសង់រោងចក្រផលិតដែក ភូមិសាស្ត្រឃុំព្រែកខ្សាច់ ស្រុកគិរីសាគរ។
អភិបាលរងស្រុករូបនេះ បានចូលរួមចុះពិនិត្យវាស់វែង និងកំណត់ទីតាំងដីទំហំ ៨៣៦ហិកតា ស្ថិតក្នុងឃុំព្រែកខ្សាច់ និងទីតាំងមួយកន្លែងទៀត ស្ថិតនៅតំបន់អតីតក្រុមហ៊ុនឋានសួគ៌ សម្រាប់សាងសង់រោងចក្រផលិតដែក និងរោងចក្រអគ្គិសនី ព្រមទាំងទីតាំងដីទំហំ៤០០ហិចតា ដែលស្ថិតនៅក្នុងតំបន់សេដ្ឋកិច្ចពិសេ សរបស់អ្នកឧកញ៉ាលី យ៉ុងផាត់ សម្រាប់សាងសង់កំពង់ផែទឹកជ្រៅ របស់ក្រុមហ៊ុន CELESTIAL STARS LIMITED COMPANY ស្ថិតក្នុងតំបន់ឧទ្យានជាតិបុទុមសាគរ ភូមិសាស្រ្តស្រុកគីរីសាគរ ខេត្តកោះកុង។
សម្រាប់ខេត្តកោះកុង រាជរដ្ឋាភិបាលកម្ពុជានៅតែធានាបន្តអភិវឌ្ឍសេដ្ឋកិច្ច និងសង្គមលើគ្រប់វិស័យ ដោយផ្តោតអាទិភាពទៅលើការកែទម្រង់អភិបាលកិច្ច សំដៅពង្រឹងស្ថាប័នសាធារណៈ បង្កើនប្រសិទ្ធភាព និងលើកកម្ពស់គុណភាពសេវាសាធារណៈ ពង្រឹងបរិស្ថានម៉ាក្រូសេដ្ឋកិច្ចឱ្យមានស្ថិរភាពរឹងមាំ ធន់នឹងវិបត្តិនិងទ្រទ្រង់កម្តៅខ្ពស់ ប្រកបដោយចីរភាព បរិយាប័ន្ន និងសមធម៌ ដោយជំរុញការវិនិយោគសាធារណៈ និងវិនិយោគឯកជន ដើម្បីបង្កើនភាពទាក់ទាញ និងគាំទ្រដល់សកម្មភាពសេដ្ឋកិច្ច៕
