ដោយ ៖ រ៉ាណេត
បាត់ដំបង ៖ អជ្ញាធរថៃ និងកម្ពុជា បានព្រមព្រៀងក្នុងការបន្តបិទច្រកព្រំដែនមួយចំនួនទៀត ដែលស្ថិតនៅក្នុងខេត្តបាត់ដំបង ក្នុងគោលបំណងទប់ស្កាត់ការរាតត្បាតនៃមេរោគ Covid-19 ដែលកំពុងកើតមាននៅក្នុងប្រទេសទាំងពីរ។
បន្ទាប់ពីប្រកាសបិទព្រំដែនច្រកចេញចូលអូរស្មាច់រវាងខេត្តសូរិន្ទប្រទេសថៃ និងខេត្តឧត្តរមានជ័យប្រទេសកម្ពុជា នៅត្រឹមព្រឹកថ្ងៃទី២១ ខែមីនា ឆ្នាំ២០២០នេះ អជ្ញាធរប្រទេសទាំង២បានព្រមព្រៀងគ្នាក្នុងការបិទច្រកព្រំដែនព្រំ និងច្រកអូររំដួល ស្ថិតនៅក្នុងស្រុកភ្នំព្រឹក ខេត្តបាត់ដំបង និងខេត្តចាន់បូរីប្រទេសថៃ ជាបណ្តោះអាសន្ន។
ជាបឋមពាក់ព័ន្ធទៅនឹងការបិទច្រកព្រំដែនអូររំដួលនេះ ភាគីខាងថៃ បានស្នើដល់អាជីវករខ្មែរដែលប្រកបអាជីវកម្ម និងរស់នៅលើទឹកដីថៃទាំងអស់ឱ្យរើមកកាន់ទឹកដីកម្ពុជាជាបណ្តោះអាសន្នដោយមិនមានការបណ្តេញនោះទេ។ ការជូនដំណឹងនេះ ត្រូវបានចាប់អនុវត្តចាប់ពីម៉ោង ០០៖០០ នាទី ឈានចូលថ្ងៃទី២១ ខែមីនា ឆ្នាំ២០២០ យប់មិញនេះ៕