ដោយ ប៊ី
ភ្នំពេញ៖ ក្រុមហ៊ុនជប៉ុនបាននិងកំពុងសិក្សាលើលទ្ធភាពវិនិយោគក្នុងការចិញ្ចឹមត្រីទីឡាប៉្យាដែលជាប្រភេទត្រីទឹកសាបនៅកម្ពុជា ខណៈការវិនិយោគនេះផ្តោតសំខាន់លើការកែច្នៃផលិតផលត្រីសម្រាប់នាំចេញទៅទីផ្សារជប៉ុន។ នេះបើយោងតាមការលើកឡើងរបស់អង្គការ JICA។
ព័ត៌មាននេះត្រូវបានចែករំលែកដោយតំណាងអង្គការ JICA ប្រចាំនៅកម្ពុជាក្នុងជំនួបជាមួយលោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ។
តំណាងអង្គការ JICA បានលើកឡើងថា ការិនិវយោគនេះនឹងផ្តោតលើកែច្នៃផលិតផលត្រីសម្រាប់នាំចេញទីផ្សារជប៉ុន។
លោកវេង សាខុន បានស្វាគមន៍ចំពោះការវិនិយោគនេះដោយនិយាយថា ការវិនិយោគនេះនឹងបង្កើតការងារថ្មី និងរួមចំណែកកាត់បន្ថយការចាប់ត្រីពីបឹងធម្មជាតិ និងទន្លេ។
នៅក្នុងកិច្ចប្រជុំនេះ JICA ក៏បានជម្រាបជូនលោករដ្ឋមន្រ្តីអំពីគម្រោងដែលទទួលបានជោគជ័យក្នុងការកែច្នៃវត្ថុធាតុដើមសូត្រ និងសាប៊ូដែលត្រូវបានគេរាយការណ៍ថាកំពុងពេញនិយមនៅប្រទេសជប៉ុន៕
