ដោយ រ៉ាណេត
ព្រះសីហនុ៖ តំបន់សេដ្ឋកិច្ចពិសេសប្រចាំនៅក្នុងក្រុងព្រះសីហនុ ដែលជាទីតាំងដ៏សំខាន់ក្នុងការបម្រើដល់វិស័យពាណិជ្ជកម្ម និងឧស្សាហកម្មសម្រាប់ធ្វើការនាំចេញ ត្រូវបានរដ្ឋាភិបាលចិនយកចិត្តទុកដាក់ខ្ពស់បំផុត ហើយថែមទាំងបានបញ្ជូនក្រុមអ្នកជំនាញប្រចាំប្រទេសមួយក្រុម ដើម្បីជួយបណ្តុះបណ្តាលឱ្យកាន់តែច្បាស់លាស់ ពីការទប់ស្កាត់បញ្ហាដែលបង្កឡើងដោយជំងឺ Covid-19 ។
ជាគំរូកិច្ចសហប្រតិបត្តិការជាក់ស្តែងរវាងចិន និងកម្ពុជា កាលពីចុងសប្ដាហ៍កន្លងទៅនេះ រដ្ឋាភិបាលចិនតាមរយៈស្ថានទូតចិនប្រចាំនៅកម្ពុជា បានបញ្ជូនក្រុមអ្នកជំនាញផ្នែកខ្ពស់ប្រចាំប្រទេសផ្នែកវេជ្ជសាស្ត្រ មកកាន់កម្ពុជាដើម្បីជួយបណ្តុះបបណ្តាល និងបំពេញបន្ថែមនូវភាពខ្វះខាតលើការគ្រប់គ្រង និងទប់ស្កាត់ជំងឺ Covid-19 ដោយផ្ដោតសំខាន់ ចំពោះតំបន់សេដ្ឋកិច្ចពិសេសខេត្តព្រះសីហនុ។
ប្រធានគ្រប់គ្រងទូទៅ នៃក្រុមហ៊ុនសេដ្ឋកិច្ចពិសេសខេត្តព្រះសីហនុ បានតំណាងឱ្យតំបន់សេដ្ឋកិច្ចពិសេសខេត្ត លោក Cao Jianjiang បានស្វាគមន៍យ៉ាងកក់ក្តៅដល់វត្តមានរបស់ក្រុមអ្នកជំនាញវេជ្ជសាស្ត្រចិន ដែលដឹកនាំដោយលោក Ai Xiang ប្រធានក្រុមអ្នកជំនាញវេជ្ជសាស្ត្រ និងជាអនុប្រធាននាយកដ្ឋានការពារសុខភាព នៃគណៈកម្មាធិការសុខាភិបាល និងសុខភាពក្នុងតំបន់ស្វយ័តជនជាតិ Zhuang នៃខេត្ត Guangxi ប្រទេសចិន។
លោកក៏បានថ្លែងអំណរគុណចំពោះរដ្ឋាភិបាល និងប្រជាពលរដ្ឋចិន និងព្រមទាំងរាជរដ្ឋាភិបាលកម្ពុជា ដែលបានផ្តល់ការយកចិត្តទុកដាក់យ៉ាងពិសេស ជូនដល់តំបន់សេដ្ឋកិច្ចពិសេសខេត្តព្រះសីហនុ។ លោកក៏បានណែនាំពីវិធានការទាំង៥ជាចម្បង ក្នុងការទប់ស្កាត់នឹងជម្ងឺវីរុស COVID-19 ដែលបានកំណត់ដោយតំបន់សេដ្ឋកិច្ចពិសេសខេត្ត ជូនដល់ក្រុមអ្នកជំនាញវេជ្ជសាស្ត្រចិនឱ្យបានជ្រាប ក៏សង្ឃឹមថាក្រុមអ្នកជំនាញអាចផ្តល់មតិណែនាំពីដំណាក់កាល បន្ទាប់ស្តីអំពីការទប់ស្កាត់នឹងជម្ងឺវីរុស ប្រភេទថ្មីនេះ ជូនដល់តំបន់សេដ្ឋកិច្ចពិសេសខេត្ត។
លោក Ai Xiang បានបង្ហាញការគាំទ្រចំពោះវិធានការបច្ចុប្បន្ន ដែលបានកំណត់ដោយតំបន់សេដ្ឋកិច្ចពិសេសនៃខេត្តព្រះសីហនុ។ ចំពោះកិច្ចទប់ស្កាត់ដំណាក់កាលបន្ទាប់ លោកក៏បានផ្តល់ជាមតិណែនាំចំនួន២ ដូចជាទី១ ការបន្តពង្រឹងកម្លាំងផ្សព្វផ្សាយបន្ថែម ដើម្បីឱ្យអ្នកក្នុងតំបន់យល់កាន់តែច្បាស់ អំពីចំណុចសំខាន់ៗនៃការទប់ស្កាត់នឹងជម្ងឺវីរុស បង្កើនចំណេះដឹងការពារដោយខ្លួនឯង និងទី២ ការទប់ស្កាត់ហានិភ័យយ៉ាងម៉ឺងម៉ាត់។
បច្ចុប្បន្ននេះកម្ពុជា ពុំទាន់មានការឆ្លងរីករាលដាលជំងឺ Covid19 នៅក្នុងសហគមន៍ តែក្នុងឱកាសចូលឆ្នាំប្រពៃណីខ្មែរ ដែលនឹងខិតជិតមកដល់នាពេលខាងមុខនេះ នឹងជួបបញ្ហាជាមួយនឹងការលំហូរនៃមនុស្ស ដែលត្រូវតែសហការជាមួយរាជរដ្ឋាភិបាលប្រចាំតំបន់ ដើម្បីពង្រឹងការតាមដាន និងគ្រប់គ្រងក្នុងកិច្ចការកាត់បន្ថយលំហូរនៃមនុស្ស និងការជួបជុំគ្នា ត្រូវតែពិនិត្យឱ្យឃើញពីជម្ងឺយ៉ាងទាន់ពេលវេលា ខណ្ឌរស់នៅដាច់ដោយឡែកយ៉ាងទាន់វេលា និងព្យាបាលយ៉ាងទាន់ពេលវេលា៕
