ដោយ ៖ រ៉ាណេត
ភ្នំពេញ ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានសម្រេចចេញបញ្ជាឱ្យបិទកាស៊ីណូទាំងអស់នៅទូទាំងប្រទេស ដើម្បីជាការទប់ស្កាត់ជំងឺ Covid-19 ដែលកំពុងតែរីករាយដាលនៅពេលបច្ចុប្បន្ន។
សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានចេញបញ្ជារបន្ទាន់នៅក្នុងពិធីសន្និសីទសារព័ត៌មានស្ដីពីការតែងតាំង និងកែសម្រួលសមាសភាពសមាជិករដ្ឋាភិបាលកាលពីព្រឹកថ្ងៃទី៣០ ខែមីនា ឆ្នាំ២០២០ នេះថា ដើម្បីទប់ស្កាត់នូវភាពប្រឈមនៃការរីករាលដាលជំងឺ Covid-19 នៅពេលបច្ចុប្បន្ននេះ បានសម្រេចបញ្ជារឱ្យបិទកាស៊ីណូទាំងអស់នៅទាំងប្រទេស។
សម្ដេចតេជោ បានមានប្រសាសន៍ថា “គ្រប់កាស៊ីណូទាំងអស់ នឹងត្រូវបិទនៅត្រឹមថ្ងៃទី១ ខែមេសា ឆ្នាំ២០២០ខាងមុខនេះ ដោយគ្រប់ម្ចាស់កាស៊ីណូត្រូវដោះស្រាយជាមួយបុគ្គលិករបស់ខ្លួន។ ការបិទនេះ គឺគ្រាន់តែជាបិទបណ្តោះអាសន្នតែប៉ុណ្ណោះ ហើយពេលណាមានភាពស្រាកស្រាន្តនឹងអនុញ្ញាតឱ្យមានការធ្វើអាជីវកម្មជាធម្មតាឡើងវិញ”។
នៅក្នុងឱកាសនេះ សម្ដេចតេជោ ក៏បានបញ្ជាក់សាជាថ្មីផងដែរថា រដ្ឋាភិបាលមិនមានគម្រោងបិទប្រទេស បិតទក្រុង បិទផ្សារ ឬហាងកាហ្វេ ដូចពាក្យចចាមអារាម ដែលកំពុងផ្សព្វផ្សាយដោយគ្មានប្រភពច្បាស់លាស់ពីជនបំពុលសង្គមមួយក្រុមនោះទេ៕
