ដោយ ៖ រ៉ាណេត
ភ្នំពេញ ៖ បច្ចុប្បន្ននេះ ទោះជាស្ថិតនៅក្នុងភាពប្រឈមនៃការរីករាលដាលនៃជំងឺឆ្លង Covid-19 ក្ដី ប៉ុន្តែសម្រាប់ពាណិជ្ជកម្មលើវិស័យឯកជននៅកម្ពុជា ហាក់នៅមិនទាន់រងផលប៉ះពាល់ធ្ងន់ធ្ងរនៅឡើយនោះទេ ខណៈដែលរាជរដ្ឋាភិបាលកំពុងតែយកចិត្តទុកដាក់ និងមានវិធានការដើម្បីការពារនឹងវិបត្តិដែលអាចកើតមាន។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍ប្រាប់តាមទូរស័ព្ទនៅល្ងាចថ្ងៃទី១ ខែមេសា ឆ្នាំ២០២០ថា ស្ថិតនៅក្នុងបរិបថនៃការគំរាមពីជំងឺឆ្លងជាសាកលត្រឹមរយៈពេលខ្លីនេះ សម្រាប់ការធ្វើពាណិជ្ជកម្មលើវិស័យឯកជននៅកម្ពុជា ហាក់នៅមិនទាន់បង្ហាញពីសញ្ញាដែលទទួលរងនូវផលប៉ះពាល់ធ្ងន់ធ្ងរនោះទេ។
លោកឧកញ៉ាបានមានប្រសាសន៍បញ្ជាក់ថា “យើងទទួលស្គាល់ថា ការរីករាលដាលនៃជំងឺ Covid-19 នេះ បានក្លាយជាវិបត្តិសេដ្ឋកិច្ចជាសាកល ដែលក្នុងនោះប្រទេសកម្ពុជាក៏ទទួលរងនូវឥទ្ធិពលមួយនេះដែរ។ លោកឧកញ៉ាបន្តថា “រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជាប្រមុខដឹកនាំ បាននិងកំពុងយកចិត្តទុកដាក់យ៉ាងខ្លាំងទៅលើបញ្ហានេះ រួមជាមួយនឹងការដាក់ចេញនូវវិធានការនានាដើម្បីអាចធានាបាននូវការទប់ស្កាត់ការរីករាលដាលនៅក្នុងប្រទេសកម្ពុជា។
លោកឧកញ៉ា លឹម ហេង បានមានប្រសាសន៍ថា “ជាការទប់ស្កាត់នូវការរីករាលដាលនៃជំងឺនេះ រដ្ឋាភិបាលកម្ពុជា បានសម្រេចយល់ព្រមបិទច្រកព្រំដែនជាមួយបណ្តាប្រទេសជិតខាង ដូចជាប្រទេសវៀតណាម និងថៃជាដើម ប៉ុន្តែសម្រាប់ការដឹកជញ្ជូនទំនិញពាណិជ្ជកម្មគឺនៅរក្សាដដែល។ ដូច្នេះ សម្រាប់ការធ្វើពាណិជ្ជកម្មវិស័យឯកជននៅកម្ពុជា ហាក់នៅមិនទាន់ទទួលរងផលប៉ះពាល់ធ្ងន់ធ្ងរនោះទេ ជាពិសេសពេលនេះ ទីផ្សារនៅប្រទេសចិនក៏ចាប់ផ្តើមមានកម្រើកឡើងវិញជាបណ្ដើរៗវិញផងដែរ។
ជាមួយនឹងការលើកឡើងខាងលើនេះ លោកឧកញ៉ាក៏បានបង្ហាញពីក្ដីព្រួយបារម្ភផងដែរថា ប្រសិនបើការរាតត្បាតនៃជំងឺ Covid-19 ត្រូវបានបញ្ចប់ក្នុងរយៈពេលខ្លី ភាពប៉ះពាល់មានភាពប្រឈមតិចតួច ប៉ុន្តែក្នុងលក្ខខណ្ឌវិបត្តិមួយនេះនៅតែបន្តក្នុងរយៈពេលវែង វាពិតនឹងជះឥទ្ធិពលអាក្រក់ជាសាកល ដែលក្នុងវិស័យពាណិជ្ជកម្ពុជា ក៏ជួបបញ្ហាដោយសារទីផ្សារធំៗ ដូចជាទីផ្សារនៅសហរដ្ឋអាមេរិក និងទីផ្សារអឺរ៉ុប ផ្អាកការបញ្ជាទិញ៕
