ដោយវុត្ថា
ភ្នំពេញៈ រដ្ឋមន្ត្រីក្រសួងសកិកម្មរុក្ឋាប្រមាញ់ និងនេសាទ លោកវេង សាខុនបានអះអាងថា ទោះរដ្ឋាភិបាល ផ្អាកនាំចេញស្រូវ អង្ករសចេញទៅក្រៅប្រទេស ប៉ុន្តែតំលៃស្រូវបច្ចុប្បន្នខ្ពស់ជាងឆ្នាំមុន ព្រោះមានឈ្មួញមកប្រមូលទិញគ្រប់គ្រាន់។
លោក វេង សាខុន បានមានប្រសាសន៍ឲ្យដឹងក្នុងពេលចុះពិនិត្យស្រូវប្រាំង ស្ថិតក្នុងភូមិរវៀង ឃុំសំបូរ ស្រុកទ្រាំង ខេត្តតាកែវនៅថ្ងៃទី១៣មេសាកន្លងមកងថា ប្រជាពលរដ្ឋពិតជាមានចិត្តសប្បាយរីករាយជាខ្លាំង ព្រោះមានក្រុមឈ្មួញបានមកចុះប្រមូលទិញស្រូវដល់ស្រែ មានថ្លៃល្អដែលមានតម្លៃ៨២០ រៀលក្នុងមួយគីឡូក្រាម (លើសពីឆ្នាំទៅ១២០ រៀលក្នុងមួយគីឡូក្រាម) បើទោះបីប្រមុខរាជរដ្ឋាភិបាល បានប្រកាសជាផ្លូវការក្នុងការផ្អាកនាំចេញស្រូវ និងអង្ករសទៅក្រៅប្រទេសនាពេលថ្មីៗនេះ យ៉ាងណាក៏ដោយ។
សម្តេចតេជោហ៊ុន សែន ប្រមុខនៃរាជរដ្ឋាភិបាលកម្ពុជា បានបញ្ជាឱ្យមានការផ្អាកនៃនាំចាប់ពីថ្ងៃទី៥ ខែមេសា ឆ្នាំ២០២០តទៅ រហូតដល់មានការជូនដំណឹងថ្មី ដើម្បីធានានូវសន្តិសុខស្បៀងរបស់កម្ពុជា នៅគ្រាដែលកំពុងរងនូវវិបត្តិនៃជំងឺកូវីដ១៩។
សម្តេចថ្លែងថា “ខ្ញុំចេញបញ្ជាឲ្យផ្អាកនាំចេញអង្ករស និងស្រូវ តែអនុញ្ញាតឲ្យនាំចេញអង្ករក្រអូប រហូតដល់មានបទបញ្ជាជាថ្មី ដើម្បីរក្សាទុកផ្គត់ផ្គង់ក្នុងស្រុក ហើយចាប់អនុវត្តន៍ពីថ្ងៃទី៥ ខែមេសា ឆ្នាំ២០២០តទៅ”។
សម្តេចតេជោហ៊ុន សែនបានបញ្ជាក់ថា ការហាមឃាត់ការនាំចេញអង្ករនេះ គឺហាមឃាត់តែអង្ករស និងស្រូវប៉ុណ្ណោះ ចំពោះអង្ករក្រអូប ត្រូវបានអនុញ្ញាតឲ្យនាំចេញធម្មតា៕
