ដោយវុត្ថា
សៀមរាប៖ រដ្ឋបាលខេត្តសៀមរាប បានប្រកាសបន្តការរៀបចំហេដ្ឋារចនាសម្ព័ន្ធផ្លូវថ្នល់ឆ្នាំ ២០២០ ក្នុងក្រុងសៀមរាប ឱ្យកាន់តែប្រសើរឡើង ដើម្បីសម្រួលដល់ការធ្វើដំណើររបស់ប្រជាពលរដ្ឋ និងភ្ញៀវទេសចរណ៍ជាតិ និងអន្តរជាតិ។
តាមសេចក្តីជូនដំណឹងរបស់រដ្ឋបាលខេត្តៀមរាបដែលត្រូវបានផ្សព្វផ្សាយនៅថ្ងៃទី ១៦ ខែមេសា ឆ្នាំ ២០២០ នេះ ឱ្យដឹងថា ស្របជាមួយគ្នានេះ រដ្ឋបាលខេត្តនឹងនឹងបន្តធ្វើការជួសជុល កែលម្អផ្លូវផ្សារក្រោមចាប់ពីចំណុចបំបែកផ្លូវបៀលប្រាយដល់ផ្លូវក្រវ៉ាត់ក្រុង ។
សេចក្តីជូនដំណឹងដដែលបន្ថែមថា ដោយឡែកចំពោះនៅមុខផ្សារក្រោមកែលម្អជាចំណតរថយន្តធុនតូច និងសួនព្រមទាំងគម្រោងសាងសង់ផ្លូវក្រាលកៅស៊ូចាប់ពីផ្លូវក្រវ៉ាត់ក្រុងដល់កកែងច្រមុះជ្រូកផ្លូវជាតិលេខ ៦៣ ទៅភ្នំក្រោម កាត់តាមភូមិត្រៀក និងភូមិក្រសាំងរលើង សង្កាត់សៀមរាប។
ជាមួយគ្នានេះ ដើម្បីឱ្យដំណើរការអនុវត្តគម្រោងខាងលើមានប្រសិទ្ធភាពនិងមានភាពរលូន រដ្ឋបាលខេត្តសៀមរាបស្នើដល់អ្នកពាក់ព័ន្ធទាំងអស់ត្រូវធ្វើការរុះរើសំណង់តូប សំយាប ខឿន ខ្សាច់ ថ្ម ការ៉ូឡា ឥដ្ឋ បណ្តាញខ្សែភ្លើងដែលធ្លាក់រាយប៉ាយ សួនច្បារ សម្ភារ និងសំណង់ផ្សេងៗទាំងអស់ ព្រមទាំងបញ្ឈប់ការលក់ដូរនៅលើសួនច្បារ និងផ្លូវសាធារណៈខាងលើឱ្យអស់ក្នុងរយៈពេល ១៥ថ្ងៃ គិតចាប់ពីថ្ងៃចុះហត្ថលេខានេះជាកំហិត៕
