ដោយៈ រ៉ាណេត
ភ្នំពេញៈ រដ្ឋាភិបាលកម្ពុជា បានគ្រោងរៀបចំគោលនយោបាយ និងកម្មវិធីជំនួយសង្គម ក្នុងអំឡុងពេលប្រយុទ្ធប្រឆាំងនឹងជំងឺ Covid-19 គឺផ្អែកលើផែនការមេសម្រាប់ទប់ស្កាត់ និងឆ្លើយតបទៅនឹងការគំរាមកំហែងពីជំងឺ Covid-19 និងក្របខណ្ឌយុទ្ធសាស្ត្រ សម្រាប់គ្រប់គ្រងសភាពការណ៍ ប្រយុទ្ធនឹងជំងឺ Covid-19 ដែលគ្រោងចំណាយសរុបប្រមាណ៤៥០លានដុល្លារ។
រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានមានប្រសាសន៍នៅក្នុងកិច្ចប្រជុំពិភាក្សា ពិគ្រោះយោបល់ តាមរយៈ Video Conference អំពីគោលនយោបាយ និងកម្មវិធីជំនួយសង្គម ក្នុងអំឡុងពេលប្រយុទ្ធប្រឆាំង នឹងជំងឺ Covid-19 ជាមួយបណ្តាដៃគូអភិវឌ្ឍន៍ចំនួន២៣ កាលពីថ្ងៃទី២១ ខែមេសា ឆ្នាំ២០២០ថា ការរៀបចំគោលនយោបាយ និងកម្មវិធីជំនួយសង្គម ក្នុងអំឡុងពេលប្រយុទ្ធប្រឆាំងនឹងជំងឺCovid-19 គឺផ្អែកលើផែនការមេសម្រាប់ទប់ស្កាត់ និងឆ្លើយតបទៅនឹងការគំរាមកំហែងពីជំងឺ Covid-19 ។
ក្រៅពីនេះ រដ្ឋាភិបាលក៏មានក្របខណ្ឌយុទ្ធសាស្ត្រ សម្រាប់គ្រប់គ្រងសភាពការណ៍ប្រយុទ្ធនឹងជំងឺ Covid-19 ដែលបានដាក់ចេញ។ គោលនយោបាយ និងកម្មវិធីជំនួយសង្គមនេះ នឹងត្រូវដាក់ឆ្លងការពិនិត្យអនុម័ត ពីគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ក្នុងពេលខាងមុខនេះផងដែរ។
លោក វង្សី វិស្សុត ក៏បានលើកឡើងផងដែរថា “ការរីករាលដាលនៃជំងឺ Covid-19 បានក្លាយជាវិបត្តិសកលលោក និងជាករណីមិនធ្លាប់មានពីមុនមក ហើយទំហំនៃផលប៉ះពាល់ និងវិធានការឆ្លើយតប របស់ប្រទេសនីមួយៗក៏មិនដូចគ្នាដែរ។ លោកបានបន្តថា “ ទោះបីកម្ពុជាជាប្រទេសតូច ហើយធនធានមានកម្រិតក្តី តែរហូតមកទល់នឹងពេលនេះ, កម្ពុជា បាននិងកំពុងគ្រប់គ្រងស្ថានភាពនៃជំងឺនេះបានល្អប្រសើរ។
ទន្ទឹមនឹងនេះ មជ្ឍដ្ឋានប្រជាពលពលរដ្ឋទូទៅ មិនថាតែមន្ត្រីរដ្ឋការសាធារណៈឡើយ បានចូលរួមចំណែកប្រយុទ្ធប្រឆាំង នឹងជំងឺនេះជាមួយនឹងរដ្ឋាភិបាលយ៉ាងសស្រាក់សស្រាំ និងថែមទាំងបានជួយរែកពន់នូវបន្ទុក និងការលំបាកនេះ ក្នុងស្មារតីចែករំលែកទៀត។ ក៏ប៉ុន្តែទោះបីជាយ៉ាងនេះក្តី រាជរដ្ឋាភិបាល នឹងនៅតែបន្តតាមដាន ស្ថានភាពវិវត្តន៍នៃជំងឺនេះ ប្រកបដោយការយកចិត្តទុកដាក់ និងប្រុងប្រយ័ត្នខ្ពស់ ដើម្បីបញ្ចៀសឲ្យបាននូវការរីករាលដាលធ្ងន់ធ្ងរ នៃជំងឺដ៏កាចសាហាវនេះ។
លោកវង្សី វិស្សុត ក៏បានគូសបញ្ជាក់ផងដែរថា រដ្ឋាភិបាលបានគិតគូរនិងត្រៀមសម្រាប់ស្ថានភាពអាក្រក់បំផុត ។
លោកបានបន្តថា ក្នុងការប្រយុទ្ធប្រឆាំងនឹងជំងឺ Covid-19 និងការទប់ទល់ផលប៉ះពាល់ លើសេដ្ឋកិច្ច-សង្គម រាជរដ្ឋាភិបាលបានគ្រោងថវិកាចំនួន១០០លានដុល្លារ សម្រាប់អនុវត្តផែនការមេ សម្រាប់ប្រយុទ្ធប្រឆាំងនឹងជំងឺ Covid-19។ ក្នុងនោះប្រភពពីថវិកាជាតិប្រមាណ៦០លានដុល្លារអាមេរិក និងការកៀរគរពីដៃគូ អភិវឌ្ឍន៍ប្រមាណ៤០លាន ដុល្លារអាមេរិក និងថវិកាជាតិចំនួន៣៥០លានដុល្លារអាមេរិកទៀត សម្រាប់ធ្វើអន្តរាគមន៍ ដើម្បីរក្សាលំនឹងជីវភាពប្រជាជនក្រីក្រ ងាយរងគ្រោះ និងសម្រាប់ឧបត្ថម្ភដល់កម្មករ នៅពេលដែលរោងចក្រព្យួរអាជីវកម្ម។
ទំហំទឹកប្រាក់ត្រៀម សម្រាប់អន្តរាគមន៍ មុខសញ្ញាខាងលើនេះ អាចនឹងមិនគ្រប់គ្រាន់ ក្នុងករណីប្រសិនបើស្ថានភាពនៃជំងឺ Covid-19 ត្រូវអូសបន្លាយយូរ ឬករណីមានការរីករាលដាលខ្លាំង។
លោកវង្សី វិស្សុតបានបន្តថា ក្រៅពីការផ្តល់ការអនុគ្រោះ និងការបន្ធូរបន្ថយផ្នែកពន្ធដារ និងវិធានការដែលដាក់ចេញដោយធនាគារជាតិនៃកម្ពុជា ដើម្បីជួយដល់វិស័យធុរកិច្ច ដែលទទួលរងផលប៉ះពាល់ពីជំងឺ Covid-19, រាជរដ្ឋាភិបាលក៏បានបង្កើនការផ្តល់ទុនកម្ចី ដល់សហគ្រាសធុនតូច និងមធ្យមចំនួន៥០លានដុល្លារអាមេរិក តាមរយៈធនាគារអភិវឌ្ឍជនបទ និងកសិកម្ម ចំពោះវិស័យកសិកម្ម និងកសិ-ឧស្សាហកម្ម និងវិស័យផ្សេងទៀត ចំនួន១០០លានដុល្លារអាមេរិកបន្ថែមទៀត តាមរយៈធនាគារ សហគ្រាសធុនតូច និងមធ្យមចំនួន៥០លានដុល្លារអាមេរិក និងធនាគារពាណិជ្ជកម្មចំនួន៥០លានដុល្លារអាមេរិក។
តាមរយៈកិច្ចប្រជុំពិគ្រោះយោបល់នេះ បណ្តាដៃគូទាំង២៣ បានវាយតម្លៃខ្ពស់ ចំពោះគោលនយោបាយ និងកម្មវិធីជំនួយសង្គម ដែលបានរៀបចំដោយក្រុមការងារ ចំពោះកិច្ច និងសន្យាផ្តល់ការគាំទ្រ ចំពោះកម្មវិធីជំនួយសង្គមនេះ ទៅតាមលទ្ធភាពរបស់ខ្លួន៕
