ដោយ ហ្សូលី
ភ្នំពេញៈ យោងតាមធនាគារអភិវឌ្ឍន៍អាស៊ី (ADB) សេដ្ឋកិច្ចរបស់ប្រទេសវៀតណាមបានបង្ហាញពីកំណើនយ៉ាងខ្លាំងនៅឆ្នាំ ២០១៩ ដែលជាលទ្ធផលនៃតម្រូវការក្នុងស្រុកខ្ពស់ឧស្សាហកម្មផលិតកម្ម និងកែច្នៃនិងវិនិយោគផ្ទាល់ពីបរទេសខ្ពស់ (FDI)។
យោងតាមការិយាល័យស្ថិតិទូទៅរបស់វៀតណាម(GSO)បានឱ្យដឹងថា ការរីករាលដាលនៃជំងឺ Covid-19 ក្នុងខែមីនាបានចាប់ផ្តើមដំណាក់កាលថ្មី ក្នុងការប្រយុទ្ធប្រឆាំងនឹងរោគរាតត្បាត ដែលជះឥទ្ធិពលយ៉ាងធ្ងន់ធ្ងរ ដល់ដៃគូពាណិជ្ជកម្មនិងវិនិយោគធំៗ ទាំងអស់របស់វៀតណាម។ ជាលទ្ធផលទិន្នផលសរុប ក្នុងស្រុករបស់វៀតណាម បានធ្លាក់ចុះមកនៅត្រឹម៣,៨ ភាគរយនៅក្នុងត្រីមាសទី១ នៃឆ្នាំ ២០២០ បើប្រៀបធៀបនឹង ៦,៨ ភាគរយក្នុងរយៈពេលដូចគ្នាក្នុងឆ្នាំ ២០១៩ ។
ដោយមិនគិតពីផលប៉ះពាល់ នៃការរីករាលដាលនៃជំងឺរាតត្បាត Covid-19 ប្រ ទេ សវៀតណាមត្រូវបានគេព្យាករណ៍ថា ជាប្រទេសមួយក្នុងចំណោមប្រទេស ដែលមានសេដ្ឋកិច្ចរីកលូតលាស់លឿនបំផុតនៅអាស៊ីអាគ្នេយ៍។
បើតាមរបាយការណ៍ទស្សនវិស័យអភិវឌ្ឍន៍អាស៊ីឆ្នាំ២០២០ របស់ធនាគារអភិវឌ្ឍន៍អាស៊ី ADB ដែលចេញផ្សាយនៅកាលពីដើម ខែមេសាឆ្នាំនេះបានបង្ហាញថា កំណើនសេដ្ឋកិច្ចរបស់វៀតណាម នឹងធ្លាក់ចុះយ៉ាងខ្លាំងដល់៤,៨ភាគរយ នៅឆ្នាំ២០២០ ប៉ុន្តែលោតឡើងដល់៦,៨ភាគរយ នៅឆ្នាំ២០២១ បើទោះជាមានការរីករាលដាលនៃជំងឺរាត ត្បាតក៏ដោយ។
យុទ្ធសាស្ត្ររបស់រដ្ឋាភិបាលដើម្បីគាំទ្រសកម្មភាពអាជីវកម្ម
តាមការស្ទង់មតិរបស់សភាពាណិជ្ជកម្ម និងឧស្សាហកម្មវៀតណាម(VCCI) បានឱ្យដឹងថា ជំងឺរាតត្បាតបានជះឥទ្ធិពលយ៉ាងខ្លាំង ទៅលើសកម្មភាពផលិតកម្ម និងអាជីវកម្ម៨៥ភាគរយនៃក្រុមហ៊ុនជឿជាក់ថា ជំងឺនេះបានរឹតបន្តឹងទីផ្សារអ្នកប្រើប្រាស់របស់ពួកគេ ខណៈដែលជិត៦០ភាគរយនៃក្រុមហ៊ុនទាំងនោះ ខ្វះដើមទុនហើយត្រូវកាត់បន្ថយលំហូរសាច់ប្រាក់។
ក្នុងរយៈពេល៣ខែដំបូងនៃឆ្នាំនេះ ក្រុមហ៊ុនចំនួន៣៥.០០០បានក្ស័យធន។ នេះជាលើកទីមួយក្នុងទសវត្សរ៍ ដែលចំនួនក្រុមហ៊ុនដែលបិទទ្វារ គឺខ្ពស់ជាងចំនួនក្រុមហ៊ុនដែលបានចុះបញ្ជីថ្មី។
ដើម្បីប្រយុទ្ធប្រឆាំងនឹងវិបត្តិរដ្ឋាភិបាល បានដាក់ចេញកញ្ចប់គាំទ្រឥណទានចំនួន ១០,៨ពាន់លានដុល្លារអាមេរិក (ប្រហែល០,៤ ភាគរយនៃទិន្នផលសរុបក្នុងស្រុក) នៅដើមខែមីនា ដែលរួមបញ្ចូលទាំងគោលនយោបាយរៀបចំ លក្ខខណ្ឌប្រាក់កម្ចីឡើងវិញនិងកាត់បន្ថយអត្រាការប្រាក់និងថ្លៃសេវា។ លើសពីនេះរដ្ឋាភិបាល ក៏បានផ្តល់កញ្ចប់ជំនួយថវិកាចំនួនពីរកញ្ចប់ចំនួន១,៣ពាន់លានដុល្លារ ដែលរួមមានការកាត់បន្ថយពន្ធនិងថ្លៃសេវាដល់ក្រុមហ៊ុន ដែលរងផលប៉ះពាល់ និងការពន្យារពេលកំណត់នៃការបង់ពន្ធ។
ធនាគារកណ្តាលវៀតណាម (អេសប៊ីអេស) ក៏បានទម្លាក់អត្រាការប្រាក់សំខាន់ៗពី ០.៥ ភាគរយទៅ១ភាគរយផងដែរ។ ធនាគារកណ្តាលបានកាត់បន្ថយអត្រាការប្រាក់អតិបរិមាសម្រាប់ប្រាក់បញ្ញើជាប្រាក់តម្កល់(ដុង) ដែលមានកាលកំណត់តិចជាង៦ខែនិងអត្រាការប្រាក់អតិបរមា សម្រាប់ប្រាក់កម្ចីរយៈពេលខ្លីសម្រាប់តំបន់អាទិភាព។
សេដ្ឋកិច្ចរបស់ប្រទេសវៀតណាមនឹងស្ទុះងើបឡើងវិញបន្ទាប់ពី Covid-19
នាយកធនាគារអភិវឌ្ឍន៍អាស៊ីប្រចាំ នៅប្រទេសវៀតណាមលោក Eric Sidgwick បានមានប្រសាសន៍ថា ទោះបីកំណើនសេដ្ឋកិច្ចកំពុងថយចុះ ហើយហានិភ័យពីជំងឺរាតត្បាតរីករាលដាលនៅតែមានក៏ដោយ ក៏ប្រទេសវៀតណាម នៅតែមានអត្រាកំណើនសេដ្ឋកិច្ចលឿនបំផុតមួយនៅអាស៊ីអាគ្នេយ៍។ កត្តាជំរុញសម្រាប់កំណើនសេដ្ឋកិច្ចនៅប្រទេសវៀតណាម គឺជាវណ្ណៈកណ្តាលដែលកំពុងរីកចម្រើន ហើយចំនួនគ្រួសារនិងអាជីវកម្មកំពុងកើនឡើង។
ដូច្នេះបរិយាកាសអាជីវកម្មក្នុងស្រុកត្រូវបានគេរំពឹងថា នឹងមានភាពប្រសើរឡើងយ៉ាងឆាប់រហ័ស។ ការចំណាយរបស់រដ្ឋាភិបាល ដែលត្រូវបានអនុវត្តជាការឆ្លើយតបទៅនឹងការរីករាលដាល នៃរោគរាតត្បាតបានកើនឡើងយ៉ាងខ្លាំង ក្នុងរយៈពេលបីខែដំបូងនៃឆ្នាំ២០២។ គេជឿជាក់ថាកិច្ចព្រមព្រៀងពាណិជ្ជកម្មទ្វេភាគី និងពហុភាគីមួយចំនួនធំដែលវៀតណាមចូលរួម នឹងជួយពង្រីកការចូលទីផ្សារនិងជំរុញសេដ្ឋកិច្ចជាតិផងដែរ៕
