រាជរដ្ឋាភិបាលបន្តជួយសម្របសម្រួលបញ្ចុះតម្លៃប្រេងនៅទូទាំងប្រទេស

ដោយ ៖ រ៉ាណេត

ភ្នំពេញ ៖ ប្រមុខរាជរដ្ឋាភិបាល សម្ដេចតេជោ ហ៊ុន សែន នាយករដ្ឋមន្ត្រីកម្ពុជា
បានបន្តសម្របសម្រួលក្នុងការជួយបញ្ចុះតម្លៃប្រេងឥន្ធនៈនៅទូទាំងប្រទេសក្នុងរយៈពេល១៥ថ្ងៃបន្តទៀត ដោយរាប់ចាប់គិតពីថ្ងៃទី១-១៥ ខែឧសភា ឆ្នាំ២០២០ ខាងមុខនេះ។

តាមរយៈសេចក្ដីជូនដំណឹងដែលចេញដោយក្រសួងពាណិជ្ជកម្មស្ដីពីការកំណត់តម្លៃប្រេងឥន្ធនៈ ដែលត្រូវលក់រាយនៅតាមបណ្តាស្ថានីយ៍ចែកចាយនៅទូទាំងប្រទេសកម្ពុជា នៅព្រឹកថ្ងៃទី៤ ខែឧសភា ឆ្នាំ២០២០ នេះបានបញ្ជាក់ថារដ្ឋាភិបាលបានជួយសម្រួលទម្លាក់តម្លៃប្រេងប្រមាណ៤សេនដុល្លារក្នុងមួយលីត្រ ស្មើនឹងប្រមាណ១៦០រៀល។

នៅក្នុងសេចក្ដីជូនដំណឹងដដែលនេះបានបញ្ជាក់ថា សម្រាប់ការចែកចាយប្រេងឥន្ធនៈនៅតាមបណ្តាស្ថានីយ៍នានាទូទាំងប្រទេសត្រូវបានកំណត់ចាប់ពីថ្ងៃទី១-១៥ ខែឧសភា ឆ្នាំ២០២០ ដោយសាំងធម្មតាត្រូវលក់តម្លៃ២,២៥០រៀល ក្នុងមួយលីត្រ និងម៉ាស៊ូតលក់ ក្នុងតម្លៃ ២,១៥០រៀលក្នុង១លីត្រ៕