ដោយ ប៊ី
ភ្នំពេញ៖ កិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) នៅតែដំណើរការតាមការគ្រោងទុក ដែលត្រូវបានរំពឹងទុកថា នឹងចុះហត្ថលេខានៅចុងឆ្នាំ ២០២០ ។
នេះជាលើកឡើងរបស់ លោក Chan Chun Sing រដ្ឋមន្ត្រីក្រសួងពាណិជ្ជកម្ម និងឧស្សាហកម្មសឹង្ហបូរី ដែលបាននិយាយទៅកាន់អ្នកសារព័ត៌មានកាលពីថ្ងៃអាទិត្យដើម្បីគូសបញ្ជាក់ពីផែនការចាប់ផ្តើមសកម្មភាពសេដ្ឋកិច្ចរបស់ប្រទេសសឹង្ហបូរីឡើងវិញ បន្ទាប់ពីការដាក់បំរាម ដើម្បីបញ្ឈប់ការរីករាលដាលនៃមេរោគឆ្លង។
លោក Chan Chun Sing បានប្រាប់អ្នកយកព័ត៌មានថា “ប្រសិនបើឥណ្ឌាមិនអាចចូលរួមកិច្ចពិភាក្សាឡើងវិញនៅពេលខាងមុខនេះទេ នោះផែនការនឹងបន្តធ្វើការពង្រឹងច្បាប់សម្រាប់ការរៀបចំសម្រាប់ការចុះហត្ថលេខានៅចុងឆ្នាំនេះ” ។
លោកបានបន្ថែមថា “នៅក្នុងពេលនេះ យើងនៅតែស្ថិតនៅលើផ្លូវសម្រាប់ការចុះហត្ថលេខាដោយប្រទេសជាសមាជិក RCEP នៅដំណាច់ឆ្នាំនេះ” ។
កិច្ចព្រមព្រៀងពាណិជ្ជកម្ម RCEP នាំមកនូវភាពជាដៃគូរវាងសមាគមអាស៊ានដែលមានសមាជិក ១០ ប្រទេស និងចិន ជប៉ុន កូរ៉េខាងត្បូង អូស្ត្រាលី និងនូវែលហ្សេឡង់។ RCEP បានជូនដំណឹងដល់ឥណ្ឌា ដែលបានដកខ្លួនចេញពីកិច្ចពិភាក្សាកាលពីខែវិច្ឆិកា ដើម្បីចង់ដឹងថាតើឥណ្ឌាបានត្រៀមខ្លួនចូលរួមក្នុងកិច្ចពិភាក្សាឡើងវិញ ឬយ៉ាងណា។
ប្រទេសចំនួន ១៥ទៀត ដែលនៅសេសសល់បានសន្យាថា នឹងចុះហត្ថលេខាលើកិច្ចព្រមព្រៀងមួយនៅឆ្នាំ២០២០ ប៉ុន្តែប្រទេសជប៉ុនចង់ឱ្យប្រទេសឥណ្ឌា ស្ថិតនៅក្នុងការចរចានេះមួយផ្នែក ដោយសារតែការព្រួយបារម្ភរបស់ខ្លួនដែលថា ឥទ្ធិពលរបស់ចិននៅក្នុងតំបន់នឹងកាន់តែធំជាងនេះទៅទៀត។ ប្រទេសជប៉ុនបានជួយឥណ្ឌាដោះស្រាយ បញ្ហាចំពោះមុខ។
មន្ត្រីក្រសួងពាណិជ្ជកម្ម និងឧស្សាហកម្មឥណ្ឌា បានប្រាប់សារព័ត៌មានក្យូដូថា ប្រទេសឥណ្ឌា បានទទួលការអញ្ជើញឱ្យចូលរួមកិច្ចប្រជុំបាលី “ប៉ុន្តែឥណ្ឌាមិនបានចូលរួម” ដោយមិនផ្តល់ហេតុផលអ្វីឡើយ។
លោក Iman Pambagyo អគ្គនាយកនៃកិច្ចចរចាពាណិជ្ជកម្មអន្តរជាតិនៅក្រសួងពាណិជ្ជកម្មឥណ្ឌូនេស៊ីបានឱ្យដឹងថា កិច្ចពិភាក្សានៅកោះបាលី បានផ្តោតលើបញ្ហាយុទ្ធសាស្ត្រ និងបញ្ហាចំពោះមុខ ដូចជាការស្វែងរកដំណោះស្រាយលើបញ្ហាឥណ្ឌា និង ការចូលទៅកាន់ទីផ្សារក្នុងពាណិជ្ជកម្ម និងសេវាកម្មពាណិជ្ជកម្ម និងសេវាកម្មល្អ ។
លោកបានបន្ថែមថា លទ្ធផលនៃកិច្ចប្រជុំកោះបាលី នឹងត្រូវរាយការណ៍ទៅកិច្ចប្រជុំរដ្ឋមន្ត្រីអន្តរក្រសួងរបស់រដ្ឋមន្ត្រីសេដ្ឋកិច្ច RCEP នៅទីក្រុងដាណាងប្រទេសវៀតណាមនាពេលខាងមុខ។
មន្ត្រីនៃក្រសួងសេដ្ឋកិច្ចពាណិជ្ជកម្ម និងឧស្សាហកម្មរបស់ជប៉ុនបានចែករំលែកទស្សនៈស្រដៀងគ្នាដោយនិយាយថា “មិនមានការផ្លាស់ប្តូរ នៅក្នុងគោលនយោបាយរបស់ជប៉ុន ក្នុងការចុះហត្ថលេខា RCEP នៅឆ្នាំ២០២០នោះទេ” ។
កិច្ចព្រមព្រៀងពាណិជ្ជកម្ម មានទំហំស្មើនឹងប្រមាណ ៣០ភាគរយនៃសេដ្ឋកិច្ច និង ៥០ភាគរយនៃប្រជាជនសរុបលើពិភពលោក៕
