ដោយៈ រ៉ាណេត
ព្រះសីហនុៈ ជាមួយនឹងកំណើននៃការផ្គត់ផ្គង់ ក្នុងវិស័យបដិសណ្ឋារកិច្ចនៅតាមបណ្តាខេត្តនានា ដែលកំពុងមានចំនួនលើសតម្រូវការនោះ ប្រធានសមាគមសណ្ឋាគារកម្ពុជា បានធ្វើការព្រមានទៅលើគម្រោងវិនិយោគថ្មីៗ បន្ថែមនៅក្នុងកំឡុងពេលនេះអាចនឹងជួបហានិភ័យខ្ពស់។
ប្រធានសមាគមសណ្ឋាគារកម្ពុជា លោកស្រី ក្លេខៃ ចិន្តា បានមានប្រសាសន៍នៅក្នុងកិច្ចប្រជុំបូកសរុបលទ្ធផលការងារប្រចាំខែ នាថ្ងៃទី២៧ ខែសីហា ឆ្នាំ២០២០កន្លងមក ថា រាល់ការអភិវឌ្ឍ និងវិនិយោគលើសណ្ឋាគារនានានៅពេលបច្ចុប្បន្ននេះ វិនិយោគិនគួរតែមានការប្រុងប្រយ័ត្ន និងត្រូវរកទីតាំងណាដែលប្រាកដថា ការផ្គត់ផ្គង់នៅមានកម្រិតជៀសរាងប្រឈម នឹងហានិភ័យដែលអាចកើតមានឡើង។
លោកស្រីបញ្ជាក់ថា “នាពេលនេះការផ្គត់ផ្គង់សណ្ឋាគារនៅកម្ពុជា ជាពិសេសតំបន់សក្តានុពល ដូចជា ខេត្តសៀមរាប រាជធានីភ្នំពេញ និងខេត្តព្រះសីហនុ ដែលជាគោលដៅទេសចរណ៍ដ៏មមាញឹក កំពុងមានការផ្គត់ផ្គង់លើសតម្រូវការ” ។ លោកស្រីបញ្ជាក់ថា “ជាការល្អ គួរកុំទាន់សាងសង់សណ្ឋាគារអី សម្រាប់អ្នកមានគម្រោងនឹងសាងសង់។ ក្នុងន័យនេះ យើងមិនបានហាមឃាត់ការវិនិយោគទេ ប៉ុន្តែការសាងសង់សណ្ឋាគារក្នុងដំណាក់កាលនេះ គឺបើសង់ទៅអាចនឹងលើសពីតម្រូវការ” ។
ប្រធានសមាគមសណ្ឋាគារកម្ពុជា រូបនេះបានឱ្យដឹងថែមទៀតថា បច្ចុប្បន្ននេះ សណ្ឋាគារខ្លះ មិនមានភ្ញៀវស្នាក់នៅពេញផង ដោយសារតែភ្ញៀវរាងថយចុះបន្តិច។ ភ្ញៀវទេសចរដែលត្រូវការបន្ទប់ស្នាក់នៅ គឺភាគច្រើន ក្រុមហ៊ុនភ្នាក់ងារទេសចរណ៍ផ្គត់ផ្គង់ជូន វាខុសពីមុនដែលភ្ញៀវបរទេសត្រូវរកសណ្ឋាគារ និងកក់ដោយខ្លួនឯង។
លោកស្រីក្លេខៃ ចិន្តាបានណែនាំថា “ក្នុងកាលៈទេសៈនេះ ដែលវិនិយោគិនមានដើមទុនច្រើន និងចង់សាងសង់សណ្ឋាគារ សម្រាប់បម្រើនៅពេលអនាគតនោះ គួរតែរកទីតាំងណា ដែលមិនទាន់មានបន្ទប់សណ្ឋាគារគ្រប់គ្រាន់ និងជាគោលដៅទេសចរណ៍របស់ភ្ញៀវបរទេស ដូចជា ខេត្តកែប កំពត បាត់ដំបង មណ្ឌលគិរី រតនគិរី ជាដើម ដោយឡែកខេត្តព្រះសីហនុ មានបន្ទប់ផ្ទះសំណាក់ និងសណ្ឋាគារជាច្រើន មានភ្ញៀវស្នាក់នៅដែរ ប៉ុន្តែមានតិចដោយសារតែបច្ចុប្បន្នជំងឺកូវីដ-១៩ កំពុងរាតត្បាតពាសពេញពិភពលោក” ។
លោកគួច ចំរើន អភិបាលខេត្តព្រះសីហនុ បានបង្ហាញពីកិច្ចស្វាគមន៍ និងគាំទ្រវិស័យឯកជន ដែលបានមកបណ្ដាក់ទុនវិនិយោគ នៅក្នុងទឹកដីខេត្តព្រះសីហនុ ជាពិសេសរយៈពេលកន្លងមកប៉ុន្មានឆ្នាំចុងក្រោយនេះ រាជរដ្ឋាភិបាលបាន និងខិតខំកសាងផ្លូវ និងហេដ្ឋារចនាសម្ព័ន្ធនានានៅក្នុងក្រុងព្រះសីហនុ ដើម្បីឱ្យមានការរីកចម្រើន។
លោកបន្ថែមទៀតថា ហេដ្ឋារចនាសម្ព័ន្ធក្នុងក្រុងនៃខេត្តព្រះសីហនុ ត្រូវបានស្ថាបនាឡើងវិញទាំងស្រុង បន្ទាប់ពីទទួលរងការខូចខាត ដោយសារកំណើននៃការអភិវឌ្ឍយ៉ាងគំហុក និងគ្រោះទឹកជំនន់នាពេលកន្លងមក ក្នុងរយៈពេលប៉ុន្មានឆ្នាំចុងក្រោយនេះ នេះជាការបើកទំព័រប្រវត្តិសាស្ត្រថ្មីមួយទៀត នៃខេត្តព្រះសីហនុដែលមិនធ្លាប់មានពីមុនមកក្នុងការស្ថាបនាផ្លូវទូទាំងក្រុងបែបនេះ។
ការស្តារឡើងវិញនូវហេដ្ឋារចនាសម្ព័ន្ធទាំងនេះ ធ្វើឡើងក្រោមការយកចិត្តទកដាក់ពីប្រមុខរាជរដ្ឋាភិបាល ដែលធ្វើឱ្យខេត្តជាប់ឆ្នេរ សមុទ្រមួយនេះមានភាពស៊ីវិល័យទាក់ទាញការវិនិយោគបន្ថែមទៀត ស្របទៅនឹងគោលនយោបាយអភិវឌ្ឍន៍ឧស្សាហកម្មរបស់រាជរដ្ឋាភិបា លក្នុងការប្រែក្លាយឱ្យទៅជាខេត្ត ឧស្សាហកម្មគំរូពហុបំណងតែមួយគត់ និងជាខេត្តបំពង់ករសេដ្ឋកិច្ចរបស់កម្ពុជាផងដែរ។
ហេតុដូច្នេះហើយ រាជដ្ឋាភិបាលបានសម្រេចបញ្ចេញថវិកា សាងសង់ហេដ្ឋារចនាសម្ព័ន្ធ ផ្លូវទាំងនេះក្រុងក្នុងខេត្តព្រះសីហនុ ក្នុងគោលដៅប្រែក្លាយក្រុងព្រះសីហនុឱ្យក្លាយជាទីក្រុងដ៏ទំនើប ពោរពេញដោយសោភ័ណភាព បរិស្ថានល្អ សម្រាប់ការរស់នៅទេសចរណ៍ និងធុរកិច្ចជាពិសេស ធានានូវបានគុណភាពរឹងមាំ អាចប្រើប្រាស់បានយូរអ ង្វែង៕
