ដោយ រ៉ាណេត
ព្រះវិហារៈ ក្រុមហ៊ុនជប៉ុនធំមួយ ដែលមានជំនាញខ្ពស់ក្នុងការកែច្នៃផលិតផលកសិផលសម្រាប់ការនាំចេញ បានសម្រេចសហការជាមួយសហគមន៍កសិកម្មចំនួន៩ ក្នុងខេត្តព្រះវិហារ ដើម្បីបង្កើនផលិតភាពក្នុងការផលិត និងផ្គត់ផ្គង់តម្រូវការទីផ្សារជប៉ុន និងទីផ្សារប្រទេសដទៃទៀត។
លោកពឹង ទ្រីដា ប្រធានមន្ទីរកសិកម្ម រុក្ខាប្រមាញ់និងនេសាទខេត្តព្រះវិហារបានប្រាប់ឱ្យដឹងនៅថ្ងៃទី២២ ខែមេសា ឆ្នាំ២០២១ថា នៅក្នុងឆ្នាំ២០២១នេះ សហគមន៍កសិកម្មក្នុងខេត្តព្រះវិហារចំនួន៩ មានសមាជិកសរុប៣៩៥គ្រួសារ បានចុះកិច្ចសន្យាផលិត និងផ្គត់ផ្គង់ស្វាយចន្ទីសរីរាង្គ លក់ជូនក្រុមហ៊ុនជប៉ុនសម្រាប់ផ្គត់ផ្គងដៃគូ ក្នុងស្រុក និងធ្វើការនាំចេញទៅកាន់ទីផ្សារក្រៅប្រទេស។
លោកបានបន្តថា តាមរយៈការធ្វើកិច្ចសន្យាកសិកម្ម រវាងប្រជាសហគមន៍ និងក្រុមហ៊ុនឯកជនជប៉ុននេះ គឺនឹងធ្វើឲ្យសហគមន៍ ទទួលបានផលប្រយោជន៍ជាច្រើន ដោយការផលិតឆ្លើយតប ទៅនឹងតម្រូវការចង់បានរបស់ក្រុមហ៊ុន ហើយអាចរក្សាតម្លៃបានល្អថែមទៀតផង ដែលអាចធ្វើឲ្យកសិករមានផលចំណេញក្នុងការធ្វើកសិកម្មរបស់ខ្លួន។
លោកបានបញ្ជាក់ថា “នេះជាគោលដៅរបស់ក្រសួងកសិកម្ម ធ្វើម៉េចឲ្យបងប្អូនផលិត សម្រាប់ដោះស្រាយបញ្ហាទីផ្សារ ជូនគាត់គឺធ្វើម៉េចឲ្យគាត់ដាំដុះបង្កើនផលិតផលរបស់គាត់ ដើម្បីទទួលបានប្រាក់ចំណូលបន្ថែម ជាគោលដៅសំខាន់មួយរបស់ក្រសួងកសិកម្ម ក្នុងគោលដៅជាច្រើនផ្សេងទៀត” ។
លោកបន្តថា “តាមរយៈក្រុមហ៊ុននេះ ពួកគាត់បានជួយយើងច្រើន បើយើងបានចុះកិច្ចសន្យាជាមួយក្រុមហ៊ុន ចឹងដូចខ្ញុំបញ្ជាក់មុននេះចឹងកិច្ចសន្យាហ្នឹងវាសំខាន់មែនទែន យើងមានទីផ្សារច្បាស់លាស់ បើយើងធៀបជាមួយទីផ្សារខាងក្រៅ យើងបានទីផ្សារល្អ ហើយបងប្អូនកសិករមិនមានក្តីបារម្ភថា ប្រមូលកសិផលទៅគេទម្លាក់ថ្លៃ ទម្លាក់គុណភាពការថ្លឹងមិនត្រឹមត្រូវ រកស៊ីមិនមានភាពស្មោះត្រង់ ដល់ពេលចុះកិច្ចសន្យាជាមួយក្រុមទៅគេស្មោះត្រង់” ។
ជាមួយគ្នានេះដែរ លោកប្រធានមន្ទីរបានជំរុញ ឲ្យតំណាងសហគមន៍ទាំងអស់បន្ទាប់ពីបានចុះកិច្ចសន្យា ទួលសហការក្នុងការផលិត និងទិញរួចរាល់ហើយ ធ្វើយ៉ាងណាត្រូវណែនាំទៅដល់ប្រជាកសិករ ជាអ្នកផលិតត្រូវគោរពតាមកិច្ចសន្យា ដែលបានចុះកិច្ចព្រមព្រៀងជាមួយក្រុមហ៊ុន ហើយកសិករត្រូវមានភាពស្មោះត្រង់ ជាមួយក្រុមហ៊ុន ដោយជៀសវាងការក្លែងបន្លំផលិផល ដែលប្រើប្រាស់ជីគីមីជាដើម៕
