ដោយ គង់ សូរិយា
ភ្នំពេញ៖ ជារឿងកម្រមួយ ត្រឹមតែមួយថ្ងៃប៉ុណ្ណោះមានភោជនីយដ្ឋានចំនួនបួនបានបើកដំណើរការដំណាលគ្នា នៅក្នុងផ្សារទំនើបលំដាប់អន្តរជាតិ AEON MALL2 ដែលមានទីតាំងស្ថិតក្នុងខ័ណ្ឌសែនសុខរាជធានីភ្នំពេញ។
ភោជនីយដ្ឋានទាំងនោះបានបើកដំណើរការកាលពីថ្ងៃទី៤ កក្កដាកន្លងមកនេះ។ ភោជនីយដ្ឋានទាំងនោះរួមមាន ភោជនីយដ្ឋាន On The Table, Master Suki Soup ដែលផ្តោតសំខាន់លើស៊ុប ភោជនីយដ្ឋាន The Ming Room ជាភោជណីយដ្ឋាន បែបម្ហូបអាហារចិន និងភោជណីយដ្ឋាន Looney Tunes ជាភោជណីដ្ឋានបែបយុវវ័យផងដែរ។
លោក សាម សួហារ៉ូ ជា CEO នៃក្រុមហ៊ុន Global Restaurant បានលើកឡើងក្នុងឱកាសដាក់សម្ពោធជាផ្លូវការថា ការនាំមកនូវភោជណីយដ្ឋាន On The Table នេះ គឺដោយសារជីវភាពប្រជាជនកាន់តែមានភាពប្រសើរ ជាមួយតម្រូវការកាន់តែខ្ពស់។
តម្រូវការភោជនីយដ្ឋាននៅកម្ពុជា មានតម្រូវការកើនឡើងខ្ពស់ដោយសារកំនើនភ្ញៀវទេសចរណ៍អន្តរជាតិ កំណើនប្រជាពលរដ្ឋក្នុងស្រុក និងកំនើនប្រាក់ចំណូលរបស់ប្រជាពលរដ្ឋកម្ពុជា។
លោក លូ ម៉េង សហប្រធានក្រុមការងារឯកជនផ្នែកវិស័យទេសចរណ៍ និងជាប្រធានសមាគមចុងភៅកម្ពុជាបានថ្លែងថា ទីផ្សារភោជនីយដ្ឋានកម្ពុជានៅតែមានភាពទូលំទូលាយ និងបន្តមានតម្រូវការកើនឡើង ដោយសារកំនើនភ្ញៀវទេសចរណ៍អន្តរជាតិនានាមកទស្សនាកម្ពុជា។លោកបន្តថា គុណភាពភោជនីយដ្ឋាន និងម្ហូបអាហាររបស់កម្ពុជាកាន់តែមានភាពប្រសើរឡើង ប៉ុន្តែស្តង់ដាអនាម័យនៅតាមកម្រិតសំរាប់ភោជនីយដ្ឋានខ្លះនៅតាមបណ្តាខេត្តមួយចំនួន។
លោកបន្តថា “រហូតមកទល់ពេលនេះ បើគិតតែនៅរាជធានីភ្នំពេញយើងមានភោជនីយដ្ឋានសំបូរបែប និងអាហារសម្បូរបែប ដោយភ្ញៀវអាចកុំម៉ង់ម្ហូបប្លែកៗពីគ្នាបានលើសពីមួយសប្តាហ៍ ដែលយើងអាចរៀបចំជូនបាន”៕
