ដោយៈគង់ សូរិយា
ភ្នំពេញៈ ការចុះបញ្ជីដីធ្លីដាច់ដោយដុំ ត្រូវធ្វើបែបណា និងត្រូវបង់ពន្ឋប្រថាប់ត្រាដែរឬទេ? វាជាចម្ងល់របស់មិត្តអ្នកអាន ដែលបានចោទសួរមកកាន់គេហទំព័ររបស់យើង។
ចូរសិក្សាតាមនិតិវិធីចំនួន៤នេះ ដែលជាមូលដ្ឋាននៃទិដ្ឋភាពច្បាប់នៃព្រះរាជាណាចក្រកម្ពុជា។
និតិវិធីទាំងបួននោះរួមមាន ដួចជា ទី១ ពន្ឋប្រថាប់ត្រាចំនួន៤%ត្រូវអនុវត្តចំពោះការស្នើសុំចុះបញ្ជីមានលក្ខណៈដាច់ដោយដុំ។ ហើយពន្ធ៤%នេះ ត្រូវបានអនុវត្តរាល់ប្រតិបត្តិការផ្ទេរកម្មសិទ្ធិ ពីម្ចាស់មួយទៅម្ចាស់មួយផ្សេងទៀត។ ទី២ ទោះយ៉ាងណាជាក់ស្តែងគេមើលឃើញថា ការទិញលក់មួយចំនួន ត្រូវធ្វើឡើងត្រឹមថ្នាក់មូលដ្ឋាន ហើយម្ចាស់ដីមួយចំនួនមិនទាន់ចុះបញ្ជីដីនៅឡើយ។ តាមច្បាប់រាល់ការទិញលក់ច្រើនដង ហើយមិនមានការបង់ពន្ធប្រថាប់ត្រា នោះម្ចាស់ចុងក្រោយ ជាអ្នកទទួលខុសត្រូវបង់ពន្ធទាំងអស់។
ទី៣ ប៉ុន្តែដោយពិនិត្យឃើញថាប្រជាពលរដ្ឋ ដែលជាអ្នកទទួលសិទ្ធិកាន់កាប់អចលនទ្រព្យចុងក្រោយ (អ្នកទិញ) ដែលត្រូវតម្រូវឲ្យមានការបង់ពន្ធប្រថាប់ត្រាច្រើនតំណ នៅមានចំនួនច្រើននៅឡើយ។ ក្រសួងសេដ្ឋកិច្ច និងហិរញ្ញវត្ថុ បានសម្រេចបន្តអនុវត្តន៍គោលការណ៍ បង់ពន្ធប្រថាប់ត្រាចំនួនមួយដង នៅក្នុងឆ្នាំ ២០១៩ ចំពោះការផ្ទេរកម្មសិទ្ធិ ឬកម្មសិទ្ធិកាន់កាប់អចលនទ្រព្យពុំបានចុះបញ្ជី (គ្មានប័ណ្ណកម្មសិទ្ធិ) និងកម្មសិទ្ធិបានចុះបញ្ជី (មានប័ណ្ណកម្មសិទ្ធិ)។
ទី៤ នៅពេលបច្ចុប្បន្ននេះ ក្រសួងបានប្រកាសផ្លាស់ប្តូរប័ណ្ណកម្មសិទ្ធិអចលនវត្ថុថ្មី និងបន្ថែម QR កូដ នៅលើសន្លឹកវិញ្ញាបនបត្រម្ចាស់អចលនវត្ថុ ដែលអាចចូលទៅមើលព័ត៌មានទាំងស្រុង នៃអចលនវត្ថុបានពោលគឺព័ត៌មាន ដែលទាក់ទងនឹងម្ចាស់ដី ក្បាលដី ផែនទីនៃដី និងអត្តសញ្ញាណនៃម្ចាស់អចលនវត្ថុនោះ៕
