ដោយៈគង់ សូរិយា
ភ្នំពេញៈ ការសាងសង់សសំណង់តូច ធំ មាននិតិវិធីផ្សេងៗគ្នា អាស្រ័យលើទំហំ និងប្រភេទសំណង់និមួយៗ ដែលតម្រូវឲ្យអ្នកសាងសង់ ឬក្រុមហ៊ុនសំណង់គោរពតាមនូវនិតិវិធីមួយចំនួន។
តើបទបញ្ញត្តិសាងសង់តម្រួវឲ្យអ្នកសាងសង់មានឯកសារអ្វីខ្លះ?
យោងតាមមាត្រា១៨ នៃអនុក្រឹត្យលេខ ២២៤ អនក្រ.បក ចុះថ្ងៃទី ៣០ ខែធ្នូ ឆ្នាំ ២០២០ ស្ដីពី “លិខិអនុញ្ញាតសាងសង់ ” ដើម្បីអាចស្នើសុំការអនុញ្ញាតបាន ម្ចាស់អចលនទ្រព្យត្រូវភ្ជាប់មកជាមួយ នឹងសំណុំឯកសារដូចខាងក្រោម៖
• វិញ្ញាបនបត្រសម្គាល់ម្ចាស់អចលនវត្ថុ ឬប័ណ្ណសម្គាល់សិទ្ធិកាន់កាប់ប្រើប្រាស់ អចលនវត្ថុ ឬលិខិតកាន់កាប់ដីជាបណ្ដោះអាសន្ន។
• សលាកបត្រក្បាលដី និងប្លង់ទីតាំងអគារនៅក្នុងដីឡូត៍
• គម្រោង ប្លង់ស្ថាបត្យកម្ម វិស្វកម្ម
• អត្តសញ្ញាណប័ណ្ណសម្គាល់ជាជនជាតិខ្មែររបស់អ្នកស្នើសុំ
• ពាក្យសុំលិខិតអនុញ្ញាតសាងសង់
• ឯកសារបច្ចេកទេសផ្សេងៗទៀតសម្រាប់បម្រើឲ្យការសាងសង់។
តើលិខិតអនុញ្ញាតសាងសង់មានប៉ុន្មានប្រភេទ?
លិខិតអនុញ្ញាតសាងសង់ចែកចេញជា៣ថ្នាក់ផ្សេងគ្នា ទៅតាមទំហំនៃការសាងសង់ គម្រោងនីមួយៗ។
• ទី១ គឺថ្នាក់ក្រុង ស្រុក ខណ្ឌៈ ចំពោះសំណង់ដែលមានផ្ទៃក្រឡាកម្រាលសំណង់សរុបតូចជាង ឬស្មើ ៥០០ ម៉ែត្រការ៉េ និងមានកម្ពស់ទាបជាង ឬស្មើ៤ជាន់ (គិតទាំងជាន់ផ្ទាល់ដី និងគ្មានជាន់ក្រោមដី)។
• ទី២ គឺថ្នាក់រាជធានី ខេត្តៈ ចំពោះសំណង់ ដែលមានផ្ទៃក្រឡាកម្រាលសំណង់ធំជាង៥០០ម៉ែត្រការ៉េ ដល់៣,០០០ ម៉ែត្រការ៉េ ទាបជាងឬស្មើ១១ជាន់ (គិតទាំងជាន់ផ្ទាល់ដី និងគ្មានជាន់ក្រោមដី)។
• ទី៣ គម្រោងសាងសង់ណា ដែលមានផ្ទៃក្រឡាកម្រាលសំណង់ធំជាង៣,០០០ម៉ែត្រការ៉េ ត្រូវមកសុំការអនុញ្ញាតសាងសង់ នៅក្រសួងរៀបចំដែនដី នគរូបនីយកម្ម និងសំណង់ផ្ទាល់តែម្តង។
រយៈពេលនៃការស្នើសុំ
បើយោងតាមអនុក្រឹត្យខាងលើនេះដដែល
• សម្រាប់លិខិតអនុញ្ញាតសាងសង់ ដែលត្រូវការអនុញ្ញាតពីរដ្ឋមន្រ្តីក្រសួងដែនដី ត្រូវចំណាយពេលអតិបរមា៤៥ថ្ងៃ នៃថ្ងៃធ្វើការ។
• សម្រាប់លិខិតអនុញ្ញាតសាងសង់ ដែលត្រូវការអនុញ្ញាតពីអភិបាលរាជធានី-ខេត្ត ត្រូវចំណាយពេលអតិបរមា២៥ថ្ងៃ នៃថ្ងៃធ្វើការ។
• សម្រាប់លិខិតអនុញ្ញាតសាងសង់ ដែលត្រូវការអនុញ្ញាតពីអភិបាលក្រុង-ស្រុក-ខណ្ឌ ត្រូវចំណាយពេលអតិបរមា ១៥ថ្ងៃ នៃថ្ងៃធ្វើការ។
⦁ តើមានបញ្ហាអ្វីកើតឡើង បើសាងសង់ដោយមិនសុំការអនុញ្ញាត?
រាល់សំណង់ដែលសាងសង់ ដោយគ្មានលិខិតអនុញ្ញាត សំណង់នោះនឹងនឹងត្រូវចាត់ទុកជាសំណង់ ខុសច្បាប់ ហើយការដ្ឋានសាងសង់នឹងត្រូវបានបញ្ឈប់ជាបន្ទាន់។
តើក្នុងលក្ខខណ្ឌណាខ្លះ ដែលពុំចាំបាច់ស្នើសុំលិខិតសាងសង់ដែរទេ?
ពិតជាមាន! គឺសំណង់លំនៅដ្ឋានរបស់ប្រជាពលរដ្ឋ ដែលស្ថិតនៅទីជនបទឬតំបន់ឆ្ងាយពីផ្លូវជាតិ ឆ្ងាយពីផ្លូវដែក និងឆ្ងាយពីតំបន់រមណីយដ្ឋានទេសចរណ៍ តំបន់បេតិកភណ្ឌជាតិ ឬតំបន់អភិរក្សជាដើម គឺមិនតម្រូវឲ្យមានលិខិតអនុញ្ញាតសាងសង់នោះឡើយ៕
