ដោយៈ ជេស៊ីកា
ភ្នំពេញៈ មហាសេដ្ឋីលំដាប់ Top Ten នៅកម្ពុជា អ្នកឧកញ៉ាពុង ឃាវសែបាននិយាយទៅកាន់យុវជនកម្ពុជាថា ការចាប់យកឱកាសដើម្បីសិក្សាបន្ត និងបង្កើនសមត្ថភាពជាប់ជាប្រចាំប៉ុណ្ណោះ ទើបអាចសម្រេចបាននូវគោលដៅជោគជ័យ។
អ្នកឧកញ៉ាបានមានប្រសាសន៍កាលពីសប្តាហ៍មុន ប្រាប់សារព៌តមានក្នុងស្រុកមួយថា អនាគតរបស់ពិភពលោក គឺជាកម្មសិទ្ធិរបស់យុវជនជំនាន់ក្រោយ។ ខណៈពេលវេលាវិវឌ្ឍទៅមុខ រួមជាមួយការអភិវឌ្ឍវិទ្យាសាស្ត្រ និងបច្ចេកវិទ្យា របៀបនៃការអនុវត្តការងាររបស់យើង ក៏ត្រូវឆ្លងកាត់ការផ្លាស់ប្តូរផងដែរ។
លោកបន្តថា “ទោះបីជាអ្វីៗជាច្រើន អាចត្រូវបានជំនួសដោយទូរស័ព្ទដៃ និងកុំព្យូទ័រ ដូចពេលបច្ចុប្បន្ននេះក្តី ក៏គោលការណ៍នៃការអនុវត្តការងាររបស់យើង គឺមិនបានផ្លាស់ប្តូរទេ”។ លោកបន្តថា “ភាពស្មោះត្រង់ និងការជឿទុកចិត្ត គឺជាគោលការណ៍ចម្បងរបស់ខ្ញុំសម្រាប់អ្វីៗគ្រប់យ៉ាង”។
ជាមួយនឹងកេរ្តិ៍ឈ្មោះដែលមានភាពបើកចំហ តម្លាភាព និងភាពស្មោះត្រង់ យើងបានទទួលការជឿទុកចិត្តពីអតិថិជន សាធារណជន និងដៃគូអាជីវកម្មជាច្រើន ដូច្នេះហើយទើបយើងទទួលបានភាពជោគជ័យដូចពេលបច្ចុប្បន្ននេះ។
អ្នកឧកញ៉ាពុង ឃាវសែបានបន្តថា ស្រដៀងគ្នានេះដែរ ភាពស្មោះត្រង់ក្នុងការបំពេញកាតព្វកិច្ចរបស់ពួកគេ គឺជាគុណភាពនៃជំនាញវិជ្ជាជីវៈរបស់បុគ្គលិកគ្រប់រូប ដូច្នេះខ្ញុំសង្ឃឹមថា យុវជនជំនាន់ក្រោយអាចទទួលមរតក និងបង្កើតគុណធម៌ ក្នុងការបំពេញការងារដោយឧស្សាហ៍ព្យាយាម។ គន្លឹះមួយទៀត ដើម្បីភាពជោគជ័យ គឺការរៀនសូត្រតាមរយៈបទពិសោធ។ មានតែតាមរយៈ ។
អ្នកឧកញ៉ាពុង ឃាវសែបានផ្តល់អនុសាសន៍ដ៏សំខាន់មួយ សម្រាប់យុវជនជំនាន់ក្រោយ សូមកុំមើលស្រាលសក្តានុពលរបស់អ្នក ហើយសូមកុំមើលស្រាលអនាគតរបស់អ្នក។ មនុស្សគ្រប់រូបអាចសម្រេចក្តីសុបិនរបស់ពួកគេបាន តាមរយៈការខិតខំប្រឹងប្រែង។ គ្រាន់តែមានការប្តេជ្ញាចិត្ត និងការខិតខំប្រឹងប្រែង នោះអ្នកបានដើរលើផ្លូវទៅកាន់ភាពជោគជ័យរួចទៅហើយ។
អ្នកឧកញ៉ាបន្ថែមថា “សម្លឹងឆ្ពោះទៅថ្ងៃអនាគត ក្មេងៗជំនាន់ក្រោយប្រាកដជាមានអនាគតកាន់តែភ្លឺស្វាង ជាមួយនឹងភាពជោគជ័យដ៏អស្ចារ្យ”៕
