ដោយ: ម៉ាលីស
ភ្នំពេញ: គម្រោងមន្ទីរពេទ្យមិត្តភាពកម្ពុជា-ចិនព្រះកុសុមៈ នឹងសម្ពោធដាក់ឲ្យប្រើប្រាស់ជាផ្លូវការ នាព្រឹកថ្ងៃទី២១ មីនា ២០២២ ក្រោមអធិបតីភាព សម្តេច ហ៊ុន សែន នាយករដ្ឋមន្ត្រីនៃកម្ពុជា និងលោក វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា។
មន្ទីរពេទ្យមិត្តភាពកម្ពុជា-ចិនព្រះកុសុមៈ ដែលជាជំនួយរបស់ រដ្ឋាភិបាលចិន មានទីតាំងនៅក្នុងជធានីភ្នំពេញ គឺជាអគារពេទ្យចម្រុះដែលអាចដាក់គ្រែព្យាបាលបានដល់ ៤០០គ្រែ និងបែងចែកជាផ្នែកពិនិត្យជំងឺ សង្គ្រោះបន្ទាន់ សម្រាកព្យាបាល និងភស្តុភារជាដើមដែលឯកទេសលើផ្នែកវះកាត់។
គម្រោងខាងលើនេះ សាងសង់លើផ្ទៃដីប្រមាណ១.៥ម៉ឺនម៉ែត្រការ៉េ និងផ្ទៃដីសំណង់សរុបប្រមាណ៣.៣ម៉ឺនម៉ែត្រការ៉េ។ គម្រោងនេះត្រូវបានចាប់ផ្តើមសាងសង់ កាលពីខែតុលាឆ្នាំ២០១៨ និងបានបញ្ចប់ កាលពីខែធ្នូឆ្នាំ២០២១៕
