ដោយៈ សុផារី
ភ្នំពេញៈ សណ្ឋាគារលំដាប់ពិភពលោកដ៏ទំនើប TRIBE គ្រោងនឹងបើកដំណើរការបណ្តោះអាសន្ន សាខាដំបូងរបស់ខ្លួននៅទីក្រុងភ្នំពេញ នៅចុងខែឧសភា ឆ្នាំ២០២២នេះ។
សាខា TRIBE ភ្នំពេញនេះគឺជាសាខាដំបូងគេបង្អស់ នៅក្នុងទ្វីបអាស៊ី ដែលសព្វថ្ងៃនេះគ្រប់គ្រងដោយក្រុមហ៊ុនមេ TRIBE Bali Kuta Beach ប្រទេសឥណ្ឌូនេស៊ី។
ម៉ាកយីហោសណ្ឋាគារ TRIBE ត្រូវបានបង្កើតឡើងនៅក្នុងឆ្នាំ២០១៧ ផ្តោតទៅលើក្រុមអ្នកធ្វើដំណើរបរទេស ដោយផ្តល់នូវបទពិសោធន៍ការស្នាក់នៅសណ្ឋាគារលំដាប់ខ្ពស់ ប៉ុន្តែមានតម្លៃសមរម្យ មានគ្រប់បរិក្ខារសំខាន់ៗ។
TRIBE ត្រូវបានគ្រប់គ្រងដោយក្រុមហ៊ុន Accor ដែលជាសណ្ឋាគារយក្សសញ្ជាតិបារាំង ដែលបាននិយាយថា ខ្លួនកំពុងចរចារ ដើម្បីអភិវឌ្ឍសណ្ឋាគារជាង៥០ជុំវិញពិភពលោក។
លោក Roxana Gheorghe នាយកគ្រប់គ្រងទូទៅសណ្ឋាគារ មានប្រសាសន៍ថា “បច្ចុប្បន្នយើងកំពុងពង្រីកទៅកាន់ទីក្រុងធំៗទាំងអស់នៅអាស៊ីអាគ្នេយ៍ ដូច្នេះការបើកសាខានៅភ្នំពេញ មានសារៈសំខាន់ខ្លាំងណាស់សម្រាប់យើង”។ លោកបន្តថា “យើងឃើញថាអតិថិជនរបស់យើងមានការគាំទ្រ ចំពោះម៉ាកយីហោខ្លាំង ដូច្នេះយើងចង់ឱ្យពួកគេអាចស្នាក់នៅក្នុងសណ្ឋាគារ TRIBE ភ្នំពេញ នៅពេលដែលពួកគេឆ្លងកាត់អាស៊ីអាគ្នេយ៍”។
លោក Posma Silitonga ប្រធានគ្រប់គ្រងសណ្ឋាគារ បានមានប្រសាសន៍នៅក្នុងសប្តាហ៍នេះថា សណ្ឋាគារបានទទួលបានការគាំទ្រ និងការកក់យ៉ាងច្រើនពីសំណាក់អតិថិជន។
TRIBE សាខាភ្នំពេញប្រមូលផ្តុំនូវភោជនីយដ្ឋាន មជ្ឈមណ្ឌលកំសាន្ត កន្លែងហាត់ប្រាណ និងអាងហែលទឹកនៅខាងក្រៅ ដែលអាចមើលឃើញទេសភាពទន្លេមេគង្គ៣៦០ដឺក្រេ។ ជាពិសេស សណ្ឋាគារនេះក៏មាន “កន្លែងធ្វើការរួមគ្នា” បង្កើតឱកាស ទំនាក់ទំនង និងក្លាយជាសហគ្រិន៕
