ដោយៈជេស៊ីកា

កោះកុងៈ រដ្ឋលេខាធិការក្រសួងបរិស្ថាន លោកសៅ សុភាពបានលើកឡើងថា ឧទ្យានជាតិជួរភ្នំក្រវាញកណ្តាល ត្រូវបានយកចិត្តទុកដាក់ខ្ពស់ដោយក្រសួងបរិស្ថាន។

ក្នុងនោះ ក្រសួងបានណែនាំ និងផ្តល់ការងារចាំបាច់ឱ្យមន្ទីរបរិស្ថានខេត្តទាំងបី (កោះកុង កំពង់ស្ពឺ និងពោធិ៍សាត់) និងមន្រ្តីឧទ្យានុរក្ស សហការជិតស្និទ្ធជាមួយអង្គការដៃគូ ក្នុងការគ្រប់គ្រងឧទ្យានជាតិជួរភ្នំក្រវាញកណ្តាលប្រកបដោយប្រសិទ្ធភាព។

ការថ្លែងបែបនេះ របស់លោក សៅ សុភាព រដ្ឋលេខាធិការក្រសួងបរិស្ថាន ធ្វើឡើងនារសៀលថ្ងៃទី២ ខែមីនា ឆ្នាំ២០២៣ នៅក្នុងឱកាសអញ្ជើញជាអធិបតីភាព បើកសិក្ខាសាលាបូកសរុបលទ្ធផលការងារឆ្នាំ២០២២ និងលើកទិសដៅអនុវត្តបន្តឆ្នាំ២០២៣ របស់គម្រោងអភិរក្សឧទ្យានជាតិ ជួរភ្នំក្រវាញកណ្តាល ដែលប្រារព្ធធ្វើឡើងដោយក្រសយងបរិស្ថាន សហការជាមួយអង្គការអភិរក្សអន្តរជាតិCI នៅសាលាស្រុកថ្មបាំងខេត្តកោះកុង ដោយមានការចូលរួមពីថ្នាក់ដឹកនាំនិងមន្រ្តីក្រសួងបរិស្ថាន តំណាងក្រសួង ស្ថាប័នពាក់ព័ន្ធ រដ្ឋបាលខេត្តកោះកុង មន្ទីរបរិស្ថានខេត្តពោធិ៍សាត់ កំពង់ស្ពឺ និងកោះកុង អាជ្ញាធរមូលដ្ឋាន មន្រ្តីឧទ្យានុរក្ស និងដៃគូអភិវឌ្ឍន៍ជាច្រើននាក់។

លោកសៅ សុភាព បន្ថែមថា ក្រសួងបរិស្ថានបានយកចិត្តទុកដាក់ក្នុងការផ្តល់ជាសម្ភារល្បាត មធ្យោបាយធ្វើដំណើរ វគ្គបណ្តុះបណ្តាលជំនាញ បច្ចេកទេសល្បាត ចំណេះដឹងច្បាប់តំបន់ការពារធម្មជាតិ នីតិវិធីនៃការចាប់និងកសាងសំណុំរឿង កម្មវិធី SMART និងការប្រើប្រាស់ GPS ដើម្បីបំរើឱ្យការអនុវត្តការងារគ្រប់គ្រង និងអភិរក្សតំបន់ឧទ្យានជាតិជួរភ្នំក្រវាញកណ្តាល និងតំបន់ការពារធម្មជាតិទូទាំងប្រទេសផងដែរ។

ជាមួយគ្នានេះ លោកអន សុធារិទ្ធ អភិបាលរងខេត្តកោះកុង បានថ្លែងថា តំបន់ឧទ្យានជាតិជួរភ្នំក្រវាញកណ្តាលនេះ មានសក្តានុពលជាច្រើន សម្រាប់ចូលរួមបំរើដល់វិស័យអភិវឌ្ឍន៍សេដ្ឋកិច្ច សង្គមបរិស្ថាន និងវប្បធម៌។ ក្រៅពីតំបន់ដែលតភ្ជាប់នឹងតំបន់ការពារធម្មជាតិសំខាន់ៗ នៃតំបន់ទេសភាពជួរភ្នំក្រវាញ ឧទ្យានជាតិនេះ ក៏ជាតំបន់ដែលរក្សាបាននូវប្រភពទឹក ដ៏សំខាន់សម្រាប់ការអភិរក្សវិស័យថាមពល និងជាផ្ទៃរងទឹកភ្លៀងចម្បង សម្រាប់រក្សាចរន្តទឹកបឹងទន្លេសាប។

ជាងនេះទៅទៀត គម្របនៃព្រៃឧទ្យានជាតិនេះ ភាគច្រើនគ្របដណ្តប់ដោយព្រៃស្រោង ពាក់កណ្តាលស្រោង ជាឃ្លាំងដ៏សំខាន់សម្រា​ប់ផ្ទុកកាបូន និងជាព្រៃល្បោះ សម្បូរដោយប្រភេទកម្រ ដែលធ្វើឱ្យឧទ្យានជាតិនេះ កាន់តែមានតម្លៃសម្រាប់ការអភិរក្ស និងការអភិវឌ្ឍ សេដ្ឋកិច្ចជាតិ តាមការអភិវឌ្ឍវិស័យថាមពល ការលក់ឥណទានកាបូន និងវិស័យទេសចរណ៍ធម្មជាតិ ដែលយុទ្ធសាស្រ្តប្រកបដោយនិរន្តរភាព នៃធនធានធម្មជាតិ និងបរិស្ថាន។

ក្នុងឆ្នាំ២០១៦ រាជរដ្ឋាភិបាលបានសម្រេចបង្កើតឧទ្យានជាតិជួរភ្នំក្រវាញកណ្តាលនេះឡើង តាមរយៈអនុក្រិត្យលេខ ៨១ អនក្រ.បក ចុះថ្ងៃទី០៩ ខែឧសភា ឆ្នាំ២០១៦ ឧទ្យានជាតិជួរភ្នំក្រវាញកណ្តាល នៅក្នុងខេត្តចំនួន៣រួមមាន ខេត្តកោះកុង (ស្រុកថ្មបាំង) ខេត្តកំពង់ស្ពឺ(ស្រុកឱរ៉ាល់) និងខេត្តពោធិ៍សាត់ (ស្រុកវាលវែង និងស្រុកភ្នំក្រវាញ) ដែលជាទីជម្រកនៃពពួក ប្រភេទទទួលរងការគម្រាមកំហែង និងប្រភេទមានដោយកម្រជាសកល ដែលមានរហូតជាង៥០ប្រភេទ ជាតំបន់ដែលរក្សាបានប្រភពទឹកដ៏សំខាន់ និងជាផ្ទៃរងទឹកភ្លៀងសម្រាប់បន្តនិរន្តរភាពទឹកបឹងទន្លេសាប។

ប្រភេទសត្វទាំងនោះរួមមានៈ ដំរីអាស៊ី ខ្លាពពក ក្រពើភ្នំ ខ្លាឃ្មុំធំ ខ្លាឃ្មុំតូច កែះ ទោចម្ពុជ អណ្តើកភ្នំ មាន់ក្រិច ក្ងោក និងប្រភេទឈើកម្រផ្សេងៗទៀត ដូចជាស្រល់ជាដើម

ទេសភាពជួរភ្នំក្រវាញ ជាពិសេសឧទ្យានជាតិជួរភ្នំក្រវាញកណ្តាល គឺជាតំបន់ដ៏សំខាន់មួយសម្រាប់ប្រទេសកម្ពុជា និងពិភពលោក។ព្រៃឈើដ៏ធំនេះមានសារៈសំខាន់ខ្លាំងណាស់សម្រាប់ការកាត់បន្ថយការប្រែប្រួលអាកាសធាតុ។

ព្រៃឈើក្នុងតមបន់ជួរភ្នំក្រវាញ ជួយគ្រប់គ្រងសីតុណ្ហភាព និងទឹកភ្លៀង ដូច្នេះហើយវាមានសារៈសំខាន់ខ្លាំងណាស់សម្រាប់ការថែរក្សាសន្តិសុខទឹកសាបសម្រាប់ប្រជាជនមួយចំនួនធំ។ ដោយមានការគាំទ្រពីរាជរដ្ឋាភិបាល ក្រសួងបរិស្ថាន កំពុងសហការជាមួយភាគីពាក់ព័ន្ធ ក្នុងនោះរដ្ឋបាលខេត្តទាំង៣ មានខេត្តកោះកុង ពោធិ៍សាត់ និងកមពង់ស្ពឺ និងអង្គការអភិរក្សអន្តរជាតិ CI ដើម្បីពង្រីកការងារគ្រប់គ្រងធនធានធម្មជាតិនៅក្នុងតំបន់កាន់តែប្រសើរ៕

#MoE

#តំបន់ការពារធម្មជាតិ

#តំបន់អារ៉ែង

#ឧទ្យានជាតិជួរភ្នំក្រវាញកណ្តាល

#ខេត្តកោះកុង

ដោយ៖ វឌ្ឍនៈ

ភ្នំពេញ ៖ការវិនិយោគលើរោងចក្រ សហគ្រាសទាំងធុនតូច និងមធ្យមនៅក្នុងខេត្តតាកែវ បាននិងកំពុងផ្ដល់អត្ថប្រយោជន៍ជាច្រើនដល់ប្រជាពលរដ្ឋក្នុងខេត្តនេះផ្ទាល់ ដោយក្នុងមួយឆ្នាំប្រជាពលរដ្ឋធ្វើការនៅតាមរោងចក្រសហគ្រាស ក្នុងខេត្តតាកែវ ទទួលបានប្រាក់ចំណូលប្រមាណ១៨០លានដុល្លារអាមេរិក។

នេះបើតាមលោកអ៊ូច ភា អភិបាលខេត្តតាកែវ ថ្លែងក្នុងសន្និសីទសារព័ត៌មានស្ដីពី ជោគជ័យក្នុងរយៈពេល៥ឆ្នាំ របស់ខេត្តតាកែវនៅព្រឹកថ្ងៃទី២ មីនា ២០២៣នៅទីស្ដីការគណរដ្ឋមន្ត្រី។

លោកបន្តថា បងប្អូនប្រជាពលរដ្ឋរស់នៅខេត្តតាកែវប្រមាណជាង៦ម៉ឺន៦ពាន់នាក់ បាននិងកំពុងធ្វើការ នៅតាមបណ្ដារោងចក្រ សហគ្រាស សិប្បកម្ម ស្ថាប័នមីក្រូហិរញ្ញវត្ថុ ធនាគារ ទទួលបានប្រាក់ចំណូលសរុបជាង១៨០លានដុល្លារអាមេរិកក្នុងមួយឆ្នាំៗ។ លោកបន្តថា “គិតជាមធ្យមក្នុងម្នាក់មានប្រាក់ខែ២៥០ដុល្លារ ដូច្នេះសរុបទៅឃើញថាមានចំនួនច្រើន សម្រាប់ជួយបងប្អូននៅក្នុងខេត្តតាកែវ ” ។

ការវិនិយោគរោងចក្រ សហគ្រាសក្នុងវិស័យឧស្សាហកម្ម នៅក្នុងខេត្តតាកែវភាគច្រើនគេឃើញថា នៅតាមបណ្ដោយផ្លូវជាតិលេខ២ និងផ្លូវជាតិលេខ៣ ហើយនៅពេលដែលរាជរដ្ឋាភិបាលអភិវឌ្ឍន៍ផ្លូវជាតិលេខ២ និងលេខ៣បានរួចរាល់ កំណើនរោងចក្រសហគ្រាសនឹងបន្តចូលទៅកាន់តំបន់នោះជាបន្តបន្ទាប់ទៀត ។

លោកអ៊ូច ភា ក៏បានថ្លែងថា ទីតាំងភូមិសាស្ត្រនៃខេត្តតាកែវ មានផ្លូវជាតិសំខាន់ៗ ដែលប្រជាពលរដ្ឋធ្វើដំណើរឆ្លងកាត់ទៅកាន់ខេត្តផ្សេងៗទៀត ដូចជាផ្លូវជាតិលេខ២ ផ្លូវជាតិលេខ៣ និងផ្លូវលេខ៤១ ដែលកំពុងជួសជុលលើកកម្រិតគុណភាព។ ផ្លូវទាំងនេះនឹងជួយសម្រួលដល់ការធ្វើដំណើរ របស់ប្រជាពលរដ្ឋក្នុងខេត្ត និងពលរដ្ឋពីតំបន់ផ្សេងៗផងដែរ ។

លោកប៉ូ អ៊ាវគង់ អគ្គនាយកក្រុមហ៊ុន Advance បានមានប្រសាសន៍ថា ផ្លូវជាតិលេខ២និងលេខ៣ ជាតំបន់ដែលនឹងទាក់ទាញលើការវិនិយោគរោងចក្រ ឧស្សាហកម្មកាន់តែច្រើនឡើងនៅពេលអនាគតឆាប់ៗ ជាពិសេសនៅពេលគម្រោង សាងសង់មជ្ឈមណ្ឌលភស្តុភារ និងកំពង់ផែទឹកជ្រៅនៅខេត្តកំពតសាងសង់រួច ដោយសារតែតំបន់ទាំងនេះ មានការងាយស្រួល ក្នុងការដឹកជញ្ជូនទំនិញពីកំពង់ផែទៅកាន់តំបន់រោងចក្រផលិត និងដឹកពីរោងចក្រទៅកាន់កំពង់ផែវិញ ។

ទីតាំងភូមិសាស្ត្រខេត្តតាកែវនេះដែរ ក៏បាននិងកំពុងទាក់ទាញលើការអភិវឌ្ឍ ជាលំនៅឋានលំហែរកាយផងដែរ ជាពិសេសនៅតំបន់ជុំវិញសួនសត្វភ្នំតាម៉ៅ ស្របនឹងអាកាសយានដ្ឋានអន្តរជាតិថ្មីក៏បានសាងសង់ជិតរួចរាល់ នៅក្នុងភូមិក្បែរទឹកដីខេត្តតាកែវផងដែរ៕

ដោយ: គង់ លាងហួរ
ភ្នំពេញ: លោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា បានមានប្រសាសន៍កាលពីថ្ងៃពុធម្សិលមិញនេះថា ប្រទេសចិនគឺជាដៃគូសេដ្ឋកិច្ច និងពាណិជ្ជកម្មដ៏សំខាន់បំផុតសម្រាប់បណ្តាប្រទេសនៅក្នុងតំបន់អាស៊ី។

លោក ប្រាក់ សុខុន បានធ្វើការកត់សម្គាល់បែបនេះនៅក្នុងសន្និសីទប្រចាំឆ្នាំរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ដែលមានការចូលរួមពីសំណាក់ថ្នាក់ដឹកនាំ និងមន្ត្រីរបស់ក្រសួង ព្រមទាំងប្រមុខបេសកកម្មនៅក្រៅប្រទេសរបស់កម្ពុជាផងដែរ។

លោកបានបន្តថា “ដោយសារតែកំណើនសេដ្ឋកិច្ចខ្ពស់ និងស្ថិរភាពអស់រយៈពេលជាច្រើនទសវត្សរ៍មកហើយ ប្រទេសចិនបានដើរទន្ទឹមល្បឿនជាមួយសហរដ្ឋអាមេរិកស្ទើរតែគ្រប់វិស័យ”។

លោក ប្រាក់ សុខុន បានមានប្រសាសន៍ថា “ឥទ្ធិពលសេដ្ឋកិច្ចរបស់ប្រទេសចិននៅក្នុងផ្នែកជាច្រើននៃពិភពលោកគឺទូលំទូលាយ និងរីកចម្រើនឥតឈប់ឈរ ហើយចិនគឺជាដៃគូដ៏សំខាន់បំផុតនៅក្នុងផ្នែកសេដ្ឋកិច្ច និងពាណិជ្ជកម្មសម្រាប់ប្រទេសស្ទើរតែទាំងអស់នៅក្នុងតំបន់អាស៊ី”។

អ្នកការទូតកំពូលកម្ពុជារូបនេះក៏បានលើកឡើងពីការរួមចំណែករបស់ប្រទេសចិនចំពោះពិភពលោក តាមរយៈគំនិតផ្តួចផ្តើមរបស់ខ្លួនដូចជា គំនិតផ្តួចផ្តើមខ្សែក្រវ៉ាត់ និងផ្លូវ (BRI) គំនិតផ្តួចផ្តើមអភិវឌ្ឍន៍សកល (GDI) និងគំនិតផ្តួចផ្តើមសន្តិសុខសកល (GSI)ផងដែរ។

លោក Joseph Matthews សាស្ត្រាចារ្យជាន់ខ្ពស់នៅសាកលវិទ្យាល័យ ប៊ែលធី អន្តរជាតិ នៅទីក្រុងភ្នំពេញ បានមានប្រសាសន៍ថា “ BRI បានផ្តល់នូវអត្ថប្រយោជន៍ជាក់ស្តែងជាច្រើនដល់ប្រទេស ដែលចូលរួមទាំងអស់ ហើយ GDI និង GSI មានសារៈសំខាន់សម្រាប់ការកសាងប្រព័ន្ធអភិបាលកិច្ចសកលកាន់តែត្រឹមត្រូវ និងយុត្តិធម៌”។

លោកបានបញ្ជាក់ប្រាប់សារពត៌មាន Xinhua ថា “BRI កំពុងក្លាយជាក្បាលម៉ាស៊ីនថ្មីនៃកំណើនសេដ្ឋកិច្ចពិភពលោក ខណៈដែល GDI និង GSI មានសារៈសំខាន់ ក្នុងការធានាសន្តិភាពពិភពលោក និងការអភិវឌ្ឍន៍ប្រកបដោយចីរភាពសម្រាប់ទាំងអស់គ្នា និងការខិតខំប្រឹងប្រែងឆ្ពោះទៅរកសហគមន៍អនាគតរួមគ្នាសម្រាប់មនុស្សជាតិ”៕

ដោយ: គង់ លាងហួរ
ហុងកុង: លោក Li Qiang បានត្រៀមខ្លួនរួចជាស្រេចដើម្បីគ្រងតំណែងនាយករដ្ឋមន្ត្រី ដែលនឹងធ្វើឱ្យលោកដើរលើផ្លូវយ៉ាងរុឹងមាំដើម្បីដំណើរការសេដ្ឋកិច្ចរបស់ប្រទេសចិន។

ក្រុមមនុស្សជាច្រើនក៏កំពុងជជែកពិភាក្សា និងវិភាគយ៉ាងល្អិតល្អន់លើសំណួរធំៗជាច្រើនអំពីតួនាទី រចនាប័ទ្មការងារ គោលនយោបាយ និងអាទិភាពរបស់លោកផងដែរ។

លោក Li Qiang ជាអ្នកនយោបាយគាំទ្រផ្នែកធុរកិច្ចបំផុតនៅក្នុងរង្វង់ខាងក្នុងរបស់ប្រធានាធិបតីចិនលោក សុី ជីនពីង នឹងទទួលខុសត្រូវ ក្នុងការជំរុញសេដ្ឋកិច្ចចិនឱ្យដល់កម្រិតនៃកំណើនពីមុន លុបបំបាត់ហានិភ័យភ្លាមៗ ចាប់យកសក្តានុពលកំណើនរយៈពេលវែង និងលើក​កំពស់ប្រទេស​ចិន​ឲ្យ​ក្លាយ​ជា​សេដ្ឋកិច្ច​ ដែល​មាន​ប្រាក់​ចំណូល​ខ្ពស់​ក្នុង​អំឡុង​ពេល​កាន់​តំណែង​របស់​លោក។

ក្រុមអ្នកវិភាគនៅក្រៅប្រទេសជាច្រើនជឿជាក់ថា លោក Li នឹងដើរតួយ៉ាងសំខាន់ជាអ្នកអនុវត្ត ជាជាងទទួលភារកិច្ចក្នុងការកែប្រែផ្លូវអភិវឌ្ឍន៍របស់ប្រទេសចិន។

លោក Andrew Collier អ្នកវិភាគប្រចាំនៅក្រុមហ៊ុន Global Source Partners បានមានប្រសាសន៍ថា “ចំណុចខ្លាំងចម្បងរបស់លោក Li គឺការងារដ៏យូររបស់លោកក្នុងនាមជាទីប្រឹក្សាដ៏ជិតស្និទ្ធរបស់លោកប្រធានាធិបតីសុី ជីនពីង” ។

អ្នកសិក្សាក្នុងស្រុកជឿជាក់ថា ការរក្សាការទុកចិត្តរបស់លោកសុី នឹងផ្តល់ឱ្យលោក Li នូវកម្រិតស្វ័យភាពខ្ពស់ក្នុងកិច្ចការសេដ្ឋកិច្ច ដែលអនុញ្ញាតឱ្យលោកអាចចាត់វិធានការយ៉ាងម៉ឺងម៉ាត់ដើម្បីដោះស្រាយបញ្ហា ដែលចាំបាច់បំផុត ដូចជាការបង្កើនទំនុកចិត្តឯកជន។

យោងតាមសេដ្ឋវិទូចិនឯករាជ្យម្នាក់ ដែលបដិសេធមិនបញ្ចេញឈ្មោះបានមានប្រសាសន៍ថា “ លោក Li មានឱកាសដើម្បីធ្វើអ្វីមួយដែលអស្ចារ្យ ប៉ុន្តែអ្វីៗទាំងអស់នេះត្រូវធ្វើក្រោមគំនិតរបស់លោក សុី ជីនពីង”។

ការផ្លាស់ប្តូរមួយចំនួនត្រូវបានបង្ហាញឱ្យឃើញរួចទៅហើយ ខណៈពេលដែលលោក Li Qiang ធ្លាប់ត្រូវបានគេសន្មត់ថា “លោកឈរនៅពីក្រោយការផ្លាស់ប្តូរគោលនយោបាយជាច្រើន រួមទាំងការបោះបង់ចោលគោលនយោបាយសូន្យកូវីដរបស់ទីក្រុងប៉េកាំង និងការបន្តប្តេជ្ញាកម្រិតខ្ពស់ដើម្បីផ្តល់ការគាំទ្រឥតងាករេសម្រាប់សេដ្ឋកិច្ចឯកជន”។

បន្ថែមពីលើការឈឺក្បាលផ្នែកសេដ្ឋកិច្ចដូចជាកម្រិតខ្ពស់នៃបំណុលរដ្ឋាភិបាលកម្រិតមូលដ្ឋាន វិបត្តិអចលនទ្រព្យ និងភាពមិនសុខស្រួលរបស់អ្នកវិនិយោគ និងអ្នកប្រើប្រាស់ លោក Li នឹងប្រឈមមុខនឹងតម្រូវការបន្ទាន់ដើម្បីការពារការបញ្ជាទិញពីក្រៅប្រទេសមិនឱ្យធ្លាក់ចុះ។

លោក Wang Feng ប្រធានក្រុមហ៊ុនសេវាកម្មហិរញ្ញវត្ថុ Ye Lang ដែលមានមូលដ្ឋាននៅទីក្រុងសៀងហៃ បានមានប្រសាសន៍ថា “លោក Li ជាអ្នកតស៊ូមតិដ៏រុឹងមាំសម្រាប់ការបើកទីផ្សារបន្ថែមទៀតដល់វិនិយោគិនបរទេស និងបានជំរុញឱ្យការិយាធិបតេយ្យក្នុងស្រុកបង្កើតបរិយាកាសងាយស្រួលសម្រាប់អាជីវកម្មផងដែរ”។

លោក Wang Feng បានបន្តថា “លោក Li Qiang ទំនងជាផ្តល់ឱ្យអាជីវកម្មពីក្នុងស្រុក ឬក្រៅប្រទេសមានសេរីភាពកាន់តែច្រើនក្នុងការធ្វើពាណិជ្ជកម្មឆ្លងព្រំដែន និងតម្រូវឱ្យមន្ត្រីរដ្ឋាភិបាលកាត់បន្ថយច្បាប់ទម្លាប់មិនចាំបាច់ដើម្បីបម្រើដល់ក្រុមហ៊ុននានា”។

ក្រុមអ្នកវិភាគលើកឡើងថា ការស្ទុះងើបឡើងវិញនៃសេដ្ឋកិច្ចចិនពីការបើកប្រទេសឡើងវិញ នឹងជួយសម្រាលសម្ពាធលើលោក Li ដើម្បីធ្វើស្ថិរភាពសេដ្ឋកិច្ច ដែលអនុញ្ញាតឱ្យគណៈរដ្ឋមន្ត្រីរបស់លោកលះបង់ការខិតខំប្រឹងប្រែងបន្ថែមទៀត ដើម្បីដោះស្រាយបញ្ហាសំខាន់ៗដូចជា ការលើកទំនុកចិត្តវិនិយោគិន ទប់ស្កាត់អត្រាគ្មានការងារធ្វើខ្ពស់ក្នុងចំណោមយុវជន និងជំរុញការចំណាយឯកជន៕

ដោយ: គង់ លាងហួរ
ភ្នំពេញ: រោងចក្រ ដែលវិនិយោគដោយក្រុមហ៊ុនចិនមួយគ្រោងចាប់ផ្តើមសង្វាក់ផលិតកម្មសំបកកង់របស់ខ្លួនឆាប់ៗនេះនៅខេត្តក្រចេះភាគឦសាន ដែលជាខេត្តមួយក្នុងចំណោមខេត្តដែលមានចម្ការកៅស៊ូច្រើនជាងគេ។

លោក ជា វុទ្ធី អគ្គលេខាធិការរងនៃក្រុមប្រឹក្សាវិនិយោគកម្ពុជាបានមានប្រសាសន៍ថា រោងចក្រនេះមានទីតាំងនៅតំបន់សេដ្ឋកិច្ចពិសេស UBE ក្នុងស្រុកស្នួល ខេត្តក្រចេះ។

លោក ជា វុទ្ធី បានថ្លែងនៅក្នុងបទបង្ហាញក្នុងកិច្ចប្រជុំប្រចាំឆ្នាំរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កាលពីពេលថ្មីៗនេះថា “កម្ពុជានឹងទទួលបានរោងចក្រផលិតសំបកកង់ថ្មីមួយនៅតំបន់សេដ្ឋកិច្ចពិសេស UBE ក្នុងស្រុកស្នួល ខេត្តក្រចេះ ហើយរោងចក្រនេះនឹងក្លាយទៅជារោងចក្រផលិតសំបកកង់ទី៣នៅក្នុងប្រទេសកម្ពុជា”។

បច្ចុប្បន្ននេះ ប្រទេសកម្ពុជាមានរោងចក្រផលិតសំបកកង់ចំនួន២ ដែល​រោងចក្រមួយ​កំពុង​ដំណើរការ ហើយ​ស្ថិត​នៅ​ក្រុង​បាវិត ខេត្ត​ស្វាយរៀង ឯរោងចក្រមួយ​ទៀត​ស្ថិតនៅ​ក្នុងខេត្ត​ព្រះសីហនុ​កំពុង​ត្រូវបានសាងសង់។

ដោយវិនិយោគពីក្រុមហ៊ុន General Tires Technology (Cambodia) Co., Ltd ក្រោមទំហំទុន៣០០លានដុល្លារ ការងារសាងសង់រោងចក្រផលិតសំបកកង់ដ៏ធំនៅក្នុងតំបន់សេដ្ឋកិច្ចពិសេសក្រុងព្រះសីហនុ (SSEZ) រំពឹងថានឹងបញ្ចប់នៅខែឧសភា ។នេះបើយោងតាមរដ្ឋបាលខេត្តព្រះសីហនុ។

រោងចក្រថ្មីទី៣ត្រូវបានវិនិយោគដោយក្រុមហ៊ុនផលិតសំបកកង់រថយន្តដែលមានមូលដ្ឋាននៅខេត្ត Shandong របស់ប្រទេសចិន Qingdao Double ជាមួយនឹងទំហំទុនវិនិយោគចំនួន១,៤ពាន់លាន CNY (ប្រហែល២១០លានដុល្លារ)។ នៅពេលដំណើរការ រោងចក្រថ្មីនេះនឹងផលិតសំបកកង់រ៉ាឌីកាល់ដែលមានប្រសិទ្ធភាពខ្ពស់ចំនួន៨,៥លានគ្រាប់ក្នុងមួយឆ្នាំ។

យោងតាមលោក ជា វុទ្ធី បានឱ្យដឹងថា បច្ចុប្បន្ន កម្ពុជាពឹងផ្អែកលើការនាំចូលវត្ថុធាតុដើមសម្រាប់ផលិតសំបកកង់ ហើយថ្មីៗនេះក្រុមប្រឹក្សាអភិវឌ្ឍន៍កម្ពុជាបានស្នើឱ្យគិតគូរពីក្រុមហ៊ុនដែលអាចផលិតនៅកម្ពុជាដោយប្រើកៅស៊ូក្នុងស្រុក។

លោក​បានបន្ថែមថា​ “បច្ចុប្បន្ន​ម្ចាស់​រោងចក្រ​ផលិត​សំបក​កង់​រថយន្ត​ជាច្រើនបាន​ចុះ​កិច្ចសន្យា​ជាមួយ​ក្រុមហ៊ុន​ផ្គត់ផ្គង់​កៅស៊ូ​ក្នុង​ស្រុក​ចំនួន១០កន្លែង​សម្រាប់​ទិញវត្ថុធាតុដើម​ផងដែរ”៕