សុខុម

វៀងចន្ទន៍: ខេត្តក្វាងទ្រី (Quang Tri) ប្រទេសវៀតណាម ភាគកណ្តាល បានដាក់ចេញនូវផែនការសាងសង់ខ្សែក្រវាត់បញ្ជូនទំនិញស្វ័យប្រវត្តិ (Conveyor Belt) ប្រវែង១៦០គីឡូម៉ែត្រសម្រាប់ការបញ្ជូនធ្យូងថ្មពីប្រទេសឡាវ។

សារព័ត៌មានវៀតណាម Vn Express បានចុះផ្សាយថា តម្រូវការធ្យូងថ្មរបស់វៀតណាម កំពុងកើនឡើងជាលំដាប់ដែលនាំឱ្យមានការរាំងស្ទះ និងការបាត់បង់ឱកាសអាជីវកម្មនៅច្រកព្រំដែនឡាឡាយ (La Lay) ក្នុងស្រុកដាក្រុង (Dakrong) ប្រទេសវៀតណាម ដែលហេដ្ឋារចនាសម្ព័ន្ធដឹកជញ្ជូនមិនអាចទប់ទល់នឹងតម្រូវការបាន។ នេះបើយោងតាមសារព័ត៌មាន Laotian Times ចុះផ្សាយនៅថ្ងៃអង្គារ ទី១៣ ខែមិថុនានេះ។

ដើម្បីដោះស្រាយបញ្ហានេះ ខេត្តក្វាងទ្រី បានដាក់ចេញនូវផែនការសាងសង់ខ្សែក្រវាត់បញ្ជូនទំនិញស្វ័យប្រវត្តិដែលនឹងដឹកជញ្ជូនធ្យូងថ្មពីខេត្តសេកុង និងខេត្តសាឡាវ៉ាន់ (Salavanh) របស់ឡាវទៅកាន់ផែសមុទ្រ My Thuy ក្នុងស្រុកហៃឡាង (Hai Lang) ប្រទេសវៀតណាម។ខ្សែក្រវាត់បញ្ជូនទំនិញស្វ័យប្រវត្តិនេះ នឹងមានសមត្ថភាពបញ្ជូនធ្យូងថ្មពី១.៥០០ទៅ១.៦០០តោនក្នុងមួយម៉ោងដែលអនុញ្ញាតឱ្យវៀតណាម នាំចូលធ្យូងថ្មពី១៥ទៅ២០លានតោនក្នុងមួយឆ្នាំៗ។

នៅក្នុងប្រទេសឡាវ ខ្សែក្រវាត់បញ្ជូនទំនិញស្វ័យប្រវត្តិនេះនឹងលាតសន្ធឹងប្រវែង៨៥គីឡូម៉ែត្រពីអណ្តូងរ៉ែធ្យូងថ្មទៅកាន់ច្រកព្រំដែនឡាឡាយ ហើយ៧៥គីឡូម៉ែត្រទៀតនឹងត្រូវគ្របដណ្តប់ពីច្រកព្រំដែនទៅកាន់កំពង់ផែ My Thuy របស់វៀតណាម។តាមការប៉ាន់ប្រមាណ ការដំឡើងខ្សែក្រវាត់បញ្ជូនដឹកទំនិញស្វ័យប្រវត្តិខាងទឹកដីវៀតណាម គ្រោងចំណាយអស់ប្រមាណ៤៦០លានដុល្លារអាមេរិក។

នៅពេលដំណើរការ ខ្សែក្រវាត់បញ្ជូនទំនិញស្វ័យប្រវត្តិនេះនឹងវ៉ាឈ្នះខ្សែក្រវាត់បញ្ជូនទំនិញស្វ័យប្រវត្តិវែងបំផុតរបស់ពិភពលោកនាពេលបច្ចុប្បន្ន ដែលលាតសន្ធឹងប្រវែងជិត១០០គីឡូម៉ែត្រនៅវាលខ្សាច់ Western Sahara Desert តភ្ជាប់អណ្ដូងរ៉ែផូស្វាត Bou Craa ឆ្ពោះទៅកាន់ទីក្រុងឆ្នេរ El Marsa៕ Laotian Times៕

(ភ្នំពេញ)៖ អគ្គនាយកគេហទំព័រ Property Area Asia និង Cambodia Financial Times លោកយិន លាងគង់ បានប្រកាសគាំទ្រទាំងស្រុងនូវការផ្តួចផ្តើមរបស់ សម្តេចតេជោ ហ៊ុន សែន ក្នុងការធ្វើវិសោធនកម្មច្បាប់បោះឆ្នោត ដើម្បីកែទម្រង់ «សិទ្ធិក្នុងការឈរឈ្មោះឱ្យគេបោះឆ្នោត» ដោយចាត់ទុកថា ការកែទម្រង់នេះ គឺដើម្បីពង្រឹង និងលើកកម្ពស់ដំណើរការប្រជាធិបតេយ្យនៅកម្ពុជា ជាពិសេស ដើម្បីឱ្យអនាគតអ្នកដឹកនាំ ទាំងនៅថ្នាក់ជាតិ ទាំងនៅថ្នាក់ក្រោមជាតិ ដែលត្រូវជ្រើសរើសតាមរយៈការបោះឆ្នោត ត្រូវមានការទទួលខុសត្រូវខ្ពស់ចំពោះជាតិ និងប្រជាជន ហើយការទទួលខុសត្រូវនេះ ត្រូវចាប់ផ្តើមពីការអនុវត្តឱ្យបានខ្ជាប់ខ្ជួននូវសិទ្ធិបោះឆ្នោត ដែលជាករណីកិច្ចរបស់ប្រជាពលរដ្ឋគ្រប់រូបចំពោះប្រទេសជាតិ នៅក្នុងសង្គមប្រជាធិបតេយ្យ។សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅយប់ថ្ងៃទី១២ ខែមិថុនា ឆ្នាំ២០២៣ បានស្នើឱ្យសិក្សាធ្វើវិសោធនកម្មច្បាប់ស្តីពីការបោះឆ្នោត ដើម្បីដកសិទ្ធិឈរឈ្មោះឱ្យគេបោះឆ្នោត សម្រាប់ជនណាដែលមិនទៅបោះឆ្នោត។ «អ្នកដែលមានបំណងចង់ឈរឈ្មោះឱ្យគេបោះឆ្នោត ត្រូវមានការទទួលខុសត្រូវ ក្នុងនាមជាពលរដ្ឋល្អរបស់ជាតិ ក្នុងសង្គមប្រជាធិបតេយ្យ ដោយចាប់ផ្តើមពីការអនុវត្ត ឱ្យបានខ្ជាប់ខ្ជួននូវសិទ្ធិបោះឆ្នោត ក្នុងន័យនេះអ្នកដែលមិនបានបោះឆ្នោត ដោយគ្មានមូលហេតុសមរម្យតាមផ្លូវច្បាប់ នឹងត្រូវចាត់ទុកថា បានបាត់បង់នូវលក្ខខណ្ឌក្នុងការឈរឈ្មោះឱ្យគេបោះឆ្នោត ប៉ុន្តែអ្នកទាំងនោះនៅតែមានសិទ្ធិទៅបោះឆ្នោតក្នុងនាមជាពលរដ្ឋដដែល ដោយមិនមានផលប៉ះពាល់អ្វីឡើយ»។
សម្តេចតេជោ ហ៊ុន សែន បានបន្ថែមថា ប្រសិនបើជននោះ មិនបានទៅបោះឆ្នោតលើកទី១ទេ រូបគេក៏មិនអាចទៅឈរឈ្មោះឱ្យគេបោះឆ្នោតឱ្យដែរ ក្នុងនោះមានទាំងការបោះឆ្នោតជ្រើសរើសក្រុមប្រឹក្សាឃុំសង្កាត់ ការបោះឆ្នោតជ្រើសរើសសមាជិកក្រុមប្រឹក្សាក្រុងស្រុកខណ្ឌ ក្រុមប្រឹក្សាខេត្ត ទាំងសមាជិកព្រឹទ្ធសភា និងសមាជិករដ្ឋសភា។

សម្តេចតេជោ ហ៊ុន សែន បានលើកឡើងទៀតថា ការធ្វើវិសោធនកម្មច្បាប់នេះ គឺជារឿងចាំបាច់ ដើម្បីចៀសវាងការនិយាយចុះឡើង ប៉ុន្តែត្រូវតែនិយាយអំពីបញ្ហាផ្លូវច្បាប់។
សម្តេចបានបន្ថែមថា ការធ្វើវិសោធនកម្មនេះ នឹងធ្វើឱ្យស្របតាមមាត្រា៣៤ថ្មី នៃរដ្ឋធម្មនុញ្ញកម្ពុជា ហើយគ្មានអ្វីដែលផ្ទុយនឹងរដ្ឋធម្មនុញ្ញនោះឡើយ។ សម្តេចបានបន្តថា ក៏អាចធ្វើដូចថៃពេលនេះ ប៉ុន្តែនឹងមិនធ្វើឱ្យប៉ះពាល់ដល់សិទ្ធិប្រជាពលរដ្ឋទៅបោះឆ្នោត ឬមិនបោះឆ្នោតនោះទេ៕

ដោយៈ សុខុម

ប៉េកាំងៈ ប្រទេសចិន កាលពីថ្ងៃអាទិត្យ ចុងសប្ដាហ៍កន្លងទៅបានចាប់ផ្តើមសាងសង់ ខ្សែបញ្ជូនចរន្តផ្ទាល់តង់ស្យុងខ្ពស់ ដែលតភ្ជាប់តំបន់ថ្នាក់ខេត្តចំនួន២។ នេះបើយោងតាមក្រុមហ៊ុនអគ្គិនសី The State Grid Corporation of China (SGCC)។

ដោយលាតសន្ធឹងប្រវែងសរុប១.៦៣៤គីឡូម៉ែត្រ គម្រោងបញ្ជូ​នអគ្គិសនីនេះ ចាប់ផ្តើមពីចំណុចតំបន់ស្វយ័ត Ningxia Hui ភាគពាយព្យនៃប្រទេសចិន និងបញ្ចប់នៅខេត្តហ៊ូណាន (Hunan) ភាគកណ្តាល។ គម្រោងនេះរត់ឆ្លងកាត់តំបន់ថ្នាក់ខេត្តចំនួន៦ នៅទូទាំងប្រទេសចិន។ក្រុមហ៊ុនខាងលើនិយាយថា គម្រោងនេះមានសមត្ថភាពបញ្ជូនចរន្តអគ្គសនី៨លានគីឡូវ៉ាត់ (KW) ជាមួយនឹងទំហំទុនវិនិយោគសរុបរហូតដល់ ប្រមាណ៣,៩៥ពាន់លានដុល្លារអាមេរិក។

ក្រុមហ៊ុនបញ្ជាក់ថា នៅពេលការសាងសង់បញ្ចប់ជាស្ថាពរ ខ្សែបញ្ជូននេះ ត្រូវបានប៉ាន់ប្រមាណថា នឹងផ្គត់ផ្គង់ថាមពលអគ្គិសនីបានជាង៣៦ពាន់លានគីឡូវ៉ាត់ម៉ោង (kWh) ក្នុងមួយឆ្នាំដល់ខេត្តហ៊ូណាន ជាខេត្តមួយដែលមានតម្រូវការថាមពលខ្លាំង សម្រាប់ទ្រទ្រង់កំណើ​​នសេដ្ឋកិច្ចរបស់ខ្លួន។គម្រោងនេះគឺជាផ្នែកមួយ នៃផែនការជាតិដែលមហាយក្សចិន បានបង្ហាញកាលពីឆ្នាំមុន ដើម្បីអភិវឌ្ឍថាមពលស្អាត រួមទាំងថាមព​លខ្យល់ និងថាមពលសូឡាផងដែរនៅតំបន់វាលខ្សាច់ និងតំបន់ស្ងួតហែងនៃប្រទេសចិន ដែលភាគច្រើនមានទីតាំង នៅភាគពាយ័ព្យនៃប្រទេសនេះ។

ប្រទេសចិន បានប្រកាសថា ខ្លួននឹងឈានដល់ការបំភាយកាបូន ឌីអុកស៊ីតខ្ពស់បំផុតនៅឆ្នាំ២០៣០ និងសម្រេចបាននូវអព្យាក្រឹតភាពកាបូននៅឆ្នាំ២០៦០៕ Xinhua៕

ដោយៈ គង់ សូរិយា

        ភ្នំពេញៈ សមាគមអ្នកអភិវឌ្ឍន៍ដីឡូត៍កម្ពុជា(CLDA) បានរៀប​ចំវេទិកា ប្រឹក្សាយោបល់ និងផ្តល់ដំណោះស្រាយអាជីវកម្មអចលនវត្ថុ ក្រោមប្រធានបទ “នីតិវិធី និងគោលការណ៍នៃការវាយតម្លៃអចលនទ្រព្យ”។

កម្មវិធីនេះមានការអញ្ជើញចូលរួមពីឧកញ៉ា ចេង ខេង ទីប្រឹក្សាកិត្តិយសសមាគម និងជាអគ្គនាយក ក្រុមហ៊ុនស៊ី ភី អែល (ខេបូឌា) ប្រផឹធី ឯ.ក ជាវាគ្មិនកិត្តិយស និងលោក ជា សំអាន។ អគ្គលេខាធិការសមាគម និងជាអគ្គនាយកក្រុមហ៊ុន ហ្គោល 7ឌីប្រផឹធី ជាអ្នកសម្របសម្រួល ក្រោមវត្តមានដ៏ខ្ពង់ខ្ពស់របស់ឧកញ៉ា ម៉ន សុខា ប្រធានសមាគមអ្នកអភិវឌ្ឍន៍ដីឡូត៍កម្ពុជា។សិក្ខាសាលានេះ ធ្វើឡើងក្នុងគោលបំណង ដើម្បីចូលរួមចែករំលែកចំណេះដឹង និងបទពិសោធន៍ក្នុងនាមជាអ្នកអភិវឌ្ឍ និងអ្នកវិនិយោគក្នុងវិស័យអចលនទ្រព្យ ដើម្បីឲ្យសិក្ខាកាមចូលរួមយល់កាន់តែច្បាស់ពី

ទី១. នីតិវិធី និងគោលការណ៍នៃការវាយតម្លៃអចលនវត្ថុ។

ទី២. ការកំណត់តម្លៃលក់ និងងាយស្រួលសម្រេចចិត្តទិញ។

ទី៣. ការបង្កើនទំនុកចិត្តរវាងអ្នកលក់ និងអ្នកទិញ។

ទី៤. របៀបក្នុងការកំណត់តម្លៃអចលនទ្រព្យឲ្យត្រូវនឹងតម្លៃទីផ្សារជាដើម៕

ដោយ: គង់ លាងហួរ

ឌូបៃ: ទីភ្នាក់ងារសារព័ត៌មានរដ្ឋអារ៉ាប៊ីសាអូឌីត បានឱ្យដឹងនៅក្នុងសេចក្តីថ្លែងការណ៍មួយថា ក្រសួងវិនិយោគរបស់ប្រទេសអារ៉ាប៊ីសាអូឌីត បានចុះហត្ថលេខាលើកិច្ចព្រមព្រៀង តម្លៃ៥,៦ពាន់លានដុល្លារ ជាមួយក្រុមហ៊ុនផលិតរថយន្តអគ្គិសនីរបស់ចិន Human Horizons ដើម្បីសហការលើការអភិវឌ្ឍន៍ ផលិត និងលក់រថយន្ត។

ខណៈទំនាក់ទំនងរវាងអារ៉ាប៊ីសាអូឌីត ដែលជាប្រទេសនាំចេញប្រេងកំពូលរបស់ពិភពលោក និងប្រទេសចិននៅតែមានស្អិតរមួត ប្រទេសទាំងពីរកំពុងជំរុញវិស័យមួយទៀត ដើម្បីជំរុញការវិនិយោគក្នុងវិស័យមិនមែនប្រេង ដែលជាផ្នែកមួយនៃការធ្វើពិពិធកម្មរបស់ប្រទេសអារ៉ាប៊ីសាអូឌីត។កិច្ចព្រមព្រៀងនេះ គ្របដណ្តប់ជាងពាក់កណ្តាលនៃទុនវិនិយោគជាង១០ពាន់លានដុល្លារ ដែលបានចុះហត្ថលេខានៅថ្ងៃដំបូងនៃសន្និសីទធុរកិច្ចអារ៉ាប់ -ចិននៅទីក្រុងរីយ៉ាដ កាលពីថ្ងៃអាទិត្យក្នុងវិស័យនានា ដែលលាតសន្ធឹងលើបច្ចេកវិទ្យា ថាមពលកកើតឡើងវិញ កសិកម្ម អចលនទ្រព្យ លោហៈ ទេសចរណ៍ និងការថែទាំសុខភាព។

ផ្នែកមួយនៃផែនការរបស់អារ៉ាប៊ីសាអូឌីត គឺដើម្បីអភិវឌ្ឍឧស្សា​ហកម្មផលិតរថយន្តអគ្គិសនី (EV) នៅក្នុងស្រុក ខណៈដែលក្រុមហ៊ុន Human Horizons ផលិតរថយន្តអគ្គិសនីក្រោមម៉ាក HiPhi នៅក្នុងប្រទេសចិន។

យោងតាមសេចក្តីថ្លែងការណ៍ របស់អារ៉ាប៊ីសាអូឌីតបានឱ្យដឹងថា លំហូរវិនិយោគផ្ទាល់ពីបរទេសរបស់ចិន ហូរចូលទីផ្សារអារ៉ាប់មានទំហំទឹកប្រាក់ ចំនួន២៣ពាន់លានដុល្លារក្នុងឆ្នាំ២០២១ ដែលក្នុងនោះមានទឹកប្រាក់៣,៥ពាន់លានដុល្លារ ហូរចូលក្នុងប្រទេសអារ៉ាប៊ីសាអូឌីត

ក្រុមហ៊ុន Human Horizons បានឱ្យដឹងកាលពីខែមីនាថា ខ្លួននឹងចាប់ផ្តើមលក់ម៉ាករថយន្តHiPhi លំដាប់ថ្នាក់ខ្ពស់នៅក្នុងទីផ្សារអឺរ៉ុបមួយចំនួន នៅឆ្នាំ២០២៣នេះ ខណៈក្រុមហ៊ុនគ្រោងពង្រីកខ្លួនទៅក្រៅប្រទេស៕