ដោយៈ សុខុម

ប៉េកាំង: ទិន្នន័យបានបង្ហាញកាលពីថ្ងៃពុធ ទី០១ ខែមីនា ថា តម្លៃលំនៅដ្ឋានថ្មីក្នុងទីក្រុងចំនួន១០០នៃប្រទេសចិន បាននៅទ្រឹង ឬហក់ឡើងខ្លះក្នុងខែកុម្ភៈ ក្រោយពីធ្លាក់ថ្លៃរយៈពេល៧ខែជាប់គ្នា ខណៈវិធានការបន្ធូរបន្ថយសម្ពាធ ក្នុងទីផ្សារអចលនទ្រព្យ បានធ្វើឱ្យអ្នកទិញមានទំនុកចិត្តជាងមុន។

ទិន្នន័យពី China Index Academy (CIA) ដែលជាស្ថាប័នសិក្សាស្រាវជ្រាវអចលនទ្រព្យឯករាជ្យ ដ៏ធំបំផុតមួយរបស់ប្រទេសចិន បានបង្ហា​ញថា ការទ្រឹងតម្លៃនេះកើតមានឡើង ក្រោយពីតម្លៃធ្លាក់ចុះ០,០២%ក្នុងខែមករា បើធៀបនឹងខែធ្នូ ចុងឆ្នាំ២០២២។

ទិន្នន័យនេះបង្ហាញពីភាពប្រសើរឡើង នៅក្នុងវិស័យអចលនទ្រព្យ ដែលទទួលរងគ្រោះ ពីបញ្ហាបំណុលដ៏ធំរបស់បណ្ដា ក្រុមហ៊ុនអភិវឌ្ឍន៍អចលនទ្រព្យធំៗ បន្ទាប់ពីរដ្ឋាភិបាលចិន បានអនុម័តវិធានការជួយគាំទ្រយ៉ាងច្រើន។

ស្ថាប័ន China Index Academy លើកឡើងថា នៅក្នុងខែកុម្ភៈ ទីក្រុងចំនួន២៦ បានរាយការណ៍ពីការឡើងថ្លៃនៃលំនៅដ្ឋានថ្មី បើធៀបនឹង១២ទីក្រុងក្នុងខែមករា។

ទីក្រុងចំនួន១៤ រួមទាំងទីក្រុងភាគខាងកើតណានជីង (Nanjing) និងទីក្រុងភាគខាងត្បួងសានយ៉ា (Sanya) ផងដែរនោះ បានរាយការណ៍ពីការហក់ឡើងថ្លៃនៃលំនៅដ្ឋានថ្មី បើធៀបនឹងខែមករា ដែលមានតែទីក្រុងចំនួន៦ខែ បានរាយការណ៍ពីការឡើងថ្លៃនៃផ្ទះថ្មី។

ស្ថាប័ន China Index Academy លើកឡើងថា សកម្មភាពទីផ្សារកំពុងមានភាពប្រសើរឡើង នៅក្នុងទីក្រុងមួយចំនួន ដែលជាធម្មតាមានតម្រូវការខ្ពស់ ប៉ុន្តែទីផ្សារអចលនទ្រព្យជាតិ ឬទូទាំងប្រទេសនៅមិនទាន់បង្ហាញសញ្ញាច្បាស់លាស់ នៃការងើបឡើងវិញពីការធ្លាក់ចុះ បច្ចុប្បន្ននៅឡើយទេ។

ស្ថាប័ននេះនិយាយទៀតថា បរិយាកាសគោលនយោបាយអចលនទ្រព្យទំនង ជានៅតែមានលក្ខណៈសមស្របនៅឡើយ ជាមួយនឹងកំណើននៃការគាំទ្រគោលនយោបាយទាំងផ្នែកផ្គត់ផ្គង់ និងតម្រូវការ៕ Reuters៕

ដោយៈ គង់ សូរិយា

       ភ្នំពេញៈ ថ្នាក់ដឹកនាំក្រុមហ៊ុន BooYong Group អញ្ជើញចូលជួបសម្តែងការគួរសម និងពិភាក្សាការងារ ដើម្បីសិក្សាស្វែងយល់ពីឱកាសក្នុងការវិនិយោគលើវិស័យហេដ្ឋារចនាសម្ព័ន្ធ និងដឹកជញ្ជូន ក្នុងប្រទេសកម្ពុជា។

កាលពីដើមសប្តាហ៍នេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានទទួលជួបជាមួយគណៈប្រតិភូក្រុមហ៊ុន BooYong Group ដឹកនាំដោយលោកបណ្ឌិត LEE JOONG KEUN ស្ថាបនិកក្រុមហ៊ុន ដោយមានការចូលរួមផងដែរពីថ្នាក់ដឹកនាំ និងមន្ត្រីជំនាញពាក់ព័ន្ធ។

ដោយមើលឃើញពីសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យនៅក្នុងប្រទេសកម្ពុជា ជាពិសេសលើវិស័យហេដ្ឋារចនាសម្ព័ន្ធ និងដឹកជញ្ជូន ដែលកំពុងតែមានការរីកចម្រើនឥតឈប់ឈរ ពីមួយថ្ងៃទៅមួយថ្ងៃ ជាហេតុនាំឱ្យវិស័យឯកជនជាច្រើន បានងាកមកចូលរួមវិនិយោគជាមួយរាជរដ្ឋាភិបាលកម្ពុជា។

ទន្ទឹមនឹងនោះដែរ ក្រុមហ៊ុន BooYong Group ក៏បានបង្ហាញនូវចំណាប់អារម្មណ៍ខ្ពស់ដូចគ្នា ក្នុងការចូលមកបណ្តាក់ទុន ហើយតាមរយៈជំនួបនាពេលនេះ គឺជាឱកាសសម្រាប់ក្រុមហ៊ុន ក្នុងការពិភាក្សា និងសិក្សាស្វែងយល់បន្ថែមពីឱកាសក្នុងការវិនិយោគ លើវិស័យហេដ្ឋារចនាសម្ព័ន្ធ និងដឹកជញ្ជូននៅក្នុងប្រទេសកម្ពុជា។

លោកទេសរដ្ឋមន្ត្រី ក៏បានជម្រាបជូនពីសមិទ្ធផលសំខាន់ៗ ដែលក្រសួងសម្រេចបាន និងគម្រោងធំៗផ្សេងទៀត ដែលជាទិសដៅអាទិភាពក្នុងការលើកកម្ពស់វិស័យហេដ្ឋារចនាសម្ព័ន្ធ និងដឹកជញ្ជូនរួមមាន ផ្លូវល្បឿ​នលឿនភ្នំពេញ-ក្រុងព្រះសីហនុ ដែលបានសម្រេចបើកឱ្យប្រជាពលរដ្ឋប្រើប្រាស់ជាផ្លូវការ កាលពីពេលថ្មីៗកន្លងទៅ។

គម្រោងសិក្សាផ្លូវរថភ្លើងល្បឿនលឿន ភាគខាងជើង ភ្នំពេញ-ប៉ោយប៉ែត គម្រោងសាង់សង់ផ្លូវល្បឿនលឿនភ្នំពេញ -បាវិត និងគម្រោងសិក្សាប្រព័ន្ធផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ ដែលសុទ្ធសឹងតែជាគម្រោងធំសំខាន់ៗរបស់ក្រសួង ដែលបានបញ្ចប់ការសិក្សាសមិទ្ធិលទ្ធភាព និងកំពុងស្ថិតក្នុងការស្វែងរកដៃគូវិនិយោគផងដែរ៕

លោកបណ្ឌិត ហ៊ុន ម៉ាណែត បានលើកទឹកចិត្តបន្ថែមទៀតដល់ក្រុមហ៊ុនអាមេរិកទាំងអស់ឱ្យបន្តវិនិយោគ និងធ្វើធុរកិច្ច នៅកម្ពុជា​ដែលជាប្រទេសកំពុងអភិវឌ្ឍន៍ក្នុងល្បឿនយ៉ាងលឿនស្ទើរគ្រប់វិស័យ។

ការលើកទឹកចិត្តបែបនេះ របស់លោកបណ្ឌិត ហ៊ុន ម៉ាណែត បានធ្វើឡើងនៅក្នុងឱកាសលោកបានអនុញ្ញាតឱ្យគណៈប្រតិភូ ក្រុមប្រឹក្សាធុរកិច្ចអាមេរិកអាស៊ាន ដឹកនាំដោយលោក Michael Malacka ឯកអគ្គរដ្ឋទូត ជាអនុប្រធាន និងនាយកប្រតិបត្តិប្រចាំតំបន់ ចូលជួបពិភាក្សាការងារធុរកិច្ច​ និងវិនិយោគ នៅសណ្ឋាគារ Hyatt Regency រាជធានីភ្នំពេញ នៅដើមសប្តាហ៍នេះ។

នាឱកាសនោះ លោកបណ្ឌិត ហ៊ុន ម៉ាណែត បានសម្ដែងនូវការស្វាគមន៍យ៉ាងកក់ក្តៅដល់គណៈប្រតិភូក្រុមប្រឹក្សាធុរកិច្ចអាមេរិកអាស៊ាន ដែលបានដឹកនាំក្រុមការងារ ដែលជាក្រុមហ៊ុនរបស់សហរដ្ឋអាមេរិកមកទស្សនកិច្ចជារៀងរាល់ឆ្នាំនៅកម្ពុជា ដើម្បីផ្តល់ដំណោះស្រាយធុរកិច្ច និងបង្កើនឱកាសវិនិយោគពីអាមេរិកមកកម្ពុជា។

ក្នុងឱកាសជាមួយគ្នានោះដែរ ឯកអគ្គរដ្ឋទូត Michael Malacka ក៏បានថ្លែងអំណរគុណយ៉ាងជ្រាលជ្រៅដល់លោកបណ្ឌិត ហ៊ុន ម៉ាណែត ដែលបានផ្តល់ឱកាសលើកដំបូងបំផុតដល់គណៈប្រតិភូក្រុមប្រឹក្សាធុរកិច្ចបានជួបសំដែងការគួរសម និងពិភាក្សាការងារ បន្ទាប់ពីលោកត្រូវបានគណៈកម្មាធិការកណ្តាល នៃគណបក្សប្រជាជនកម្ពុជាផ្តល់សេចក្តីទុកចិត្ត ជ្រើសតាំងជាបេក្ខភាពនាយករដ្ឋមន្ត្រីបន្តវេន នាពេលអនាគត។

លោកឯកអគ្គរដ្ឋទូត ក៏បានអបអរសាទរកម្ពុជាដែលបានទទួលជោគជ័យយ៉ាងធំធេងជាប្រវត្តិសាស្ត្រ ក្នុងការរៀបចំកិច្ចប្រជុំកំពូលអាស៊ាន កិច្ចប្រជុំកំពូលអាស៊ាន-អាមេរិក និងកិច្ចប្រជុំពាក់ពន្ធ័ផ្សេងៗទៀតកាលពីឆ្នាំ២០២២ កន្លងទៅ ដែលនេះបាននាំកិច្ចទំនាក់ទំនងអាមេរិក-កម្ពុជាឱយ កាន់តែជិតស្និទ្ធទ្វេឡើងថែមទៀត។

ជាមួយគ្នានោះ លោក ម៉ៃឃើល មីឆាឡាក់ ក៏បានគោរពជូនពរកម្ពុជា ឱ្យទទួលបានជោគជ័យ ក្នុងការធ្វើជាម្ចាស់ផ្ទះស៊ីហ្គេម និង ការបោះឆ្នោតជាសកលនៅក្នុងខែកក្កដាខាងមុខ។

ឯកអគ្គរដ្ឋទូតក៏បានរាយការណ៍ជូនលោកបណ្ឌិត ហ៊ុន ម៉ាណែត ផង ដែរថា៖ ក្រុមប្រឹក្សាធុរកិច្ចអាមេរិក-អាស៊ាន មានអាយុកាលជាង ៣៧ឆ្នាំហើយ និងមានសមាជិកដែលជាក្រុមហ៊ុនយក្សអាមេរិកជាង ១៨០ក្រុមហ៊ុន (Fortune 500 Companies) បានទទួលការសម្របសម្រួល និងជួយជ្រោមជ្រែងដល់ការធ្វើធុរកិច្ច និងវិនិយោគនៅអាស៊ាន ហើយនាពេលនេះ ក្រុមហ៊ុនជាងដប់ បានចូលរួមជាមួយគណៈប្រតិភូ ដើម្បីពង្រីកការធ្វើធុរកិច្ច និងវិនិយោគនៅកម្ពុជា ជាពិសេសជួយដល់ផែនការងើបឡើងវិញនៃសេដ្ឋកិច្ចកម្ពុជា, បច្ចេកវិទ្យា និងនវានុវត្តន៍, លទ្ធភាពទទួលហិរញ្ញប្បទាន របស់ SME, ថាមពល និងហេដ្ឋារចនាសម្ព៍ន្ធ, ផលិតផលដែលមានតម្លៃបន្ថែមខ្ពស់, និងការបណ្តុះបណ្តាលធនធានមនុស្ស, យុវជននិង SME ។ល។

ក្រុមហ៊ុនទាំងអស់ក៏បានគោរពរាយការណ៍ជូន លោកបណ្ឌិត ហ៊ុន ម៉ាណែត និងថ្នាក់ដឹកនាំ នូវបទពិសោធន៍ បច្ចុប្បន្នភាពការងារ និងសំណូមពរមួយចំនួន ដើម្បីឯកឧត្តមបណ្ឌិតបានជ្រាបពីស្ថានភាពជាក់ស្តែងរបស់ការធ្វើធុរកិច្ច និងវិនិយោគរបស់ក្រុមហ៊ុនទាំងអស់៕

ដោយៈ សហការី

ភ្នំពេញៈ ទីផ្សារខុនដូត្រូវបានអភិវឌ្ឍន៏ នៅរាជធានីភ្នំពេញតាំងពីឆ្នាំ ២០០៨ ហើយបានបន្តការរីកចម្រើនឥតឈប់ឈរ។ ចំនួនផ្គត់ផ្គង់សរុបនៅត្រីមាសទីបួនឆ្នាំ២០២ គឺមានប្រមាណ៥៤,០០០យូនីត។

ឆ្នាំ​ ២០២២នេះផងដែរ ក៏ជាឆ្នាំនៃការធ្លាក់ចុះ នៃប្រតិបត្តិការទិញលក់ ភាពតានតឹង ជាមួយនឹងតម្រូវការដ៏ទាបនៅលើទីផ្សារ។ លើសពីនេះ អច​លនទ្រព្យលក់បន្តមួយចំនួនធំ ត្រូវបានលក់ក្នុងតម្លៃទាបជាងតម្លៃទីផ្សារ ចន្លោះពី១០ ទៅ២០ភាគរយ ដោយសារតែការលក់ចេញ ត្រូវចំណាយរយះពេលយូរ ហើយការថយចុះនៃតម្រូវការ បានធ្វើឱ្យវិស័យខុនដូកាន់តែមានសភាពលំបាកក្នុងការប្តូរពី   អចលនទ្រព្យឲ្យទៅជាសាច់ប្រាក់។

ការផ្គត់ផ្គង់យូនីតខុនដូសាងសង់រួចរាល់ តាមប្រភេទនិមួយៗ និងឆ្នាំ (២០០៨ ដល់ ២០២២)

ទីផ្សារខុនដូត្រូវបានបន្តផ្គត់ផ្គង់ឥតឈប់ឈរ ជាមួយនិងតម្រូវការដ៏ច្រើន ដែលភាគច្រើនគឺជាអ្នកវិនិយោគក្រៅស្រុក ដោយសារតែវិស័យមួយនេះ បានផ្តល់នូវអត្រាចំណូលពីការជួលខ្ពស់ បើធៀបនិងប្រទេសផ្សេងៗក្នុងតំបន់។ ទោះបីជាយ៉ាងណាក៏ដោយ ក្នុងអំឡុងពេលបីបួនឆ្នាំចុងក្រោយនៃវិបត្តកូវីដ១៩នេះ វិស័យខុនដូបានជួបប្រទះនូវបញ្ហាប្រឈមដ៏លំបាក។

ជនបរទេសដែលធ្លាប់ជាអតិថិជនធំ ក្នុងការទិញខុនដូ នៅក្នុងរាជធានីភ្នំពេញ មានការថយចុះយ៉ាងខ្លាំង ​ដោយសារតែវិបត្តិហិរញ្ញវត្ថុពិភពលោក និង កំណើនអត្រាអតិផរណាក្នុងឆ្នាំ​២០២២ ដែលបានជំរុញឲ្យមានការផ្អាករាល់ការវិនិយោគរបស់ពួកគេ​។​​

ជាលទ្ធផល អ្នកអភិវឌ្ឍន៍ខុនដូជាច្រើនបានផ្លាស់ប្តូរ គោលដៅលក់របស់ខ្លួន ពីការលក់សម្រាប់ជនបរទេស មកអ្នកប្រជាជនក្នុងស្រុកវិញ ដោយ​បានផ្តល់ជូននូវការបញ្ចុះតម្លៃ និងជម្រើសនៃការបង់ប្រាក់ ដែលមានភាពបន់បែននិងងាយស្រួល ធ្វើឲ្យការបង់រំលស់មានភាពធូរស្រាល។

យុទ្ធសាស្រ្តនៃលក់បែបនេះ បានបង្ហាញពីការវិលត្រឡប់មកវិញនៃតម្លៃខុនដូ ប្រហែលជា១០ភាគរយ តាមរយះភាគរយនៃការបញ្ចុះតម្លៃ។

ខុនដូ ផ្គត់ផ្គង់តាមខណ្ឌនៅឆ្នាំ ២០២២

ទោះបីជាអតិថិជនបរទេស បានជួយជំរុញសេដ្ឋកិច្ចជាតិ   ផ្តល់ការងារ និងជំរុញឲ្យមានការផ្គត់ផ្គង់ខុនដូថ្មីៗក៏ដោយ ក៏ពូកគេគឺជាកត្តាចំបងមួយដែលនាំឱ្យមានការកំណត់តម្លៃខុនដូ ដ៏ខ្ពស់តាំងពីដើមមក​​​​​ ដែលជាហេតុធ្វើអោយវិស័យមួយនេះ ជាទូទៅមានតម្លៃថ្លៃសម្រាប់ប្រជាជនកម្ពុជា។

លើសពីនេះទៅទៀត ប្រជាជនកម្ពុជា ក៏មិនមែនជាអតិថិជនចម្បងនោះទេ ចាប់តាំងពីមានការអភិវឌ្ឍន៍ ខុនដូនៅលើទីផ្សារមកម្ល៉េះ។ ការឲ្យតម្លៃនៃការរស់នៅក្នុងបុរី នៅតែជាជម្រើសទីមួយ ដោយសារតែភាពធំទូលា​យ ឯកជនភាព និងផ្នត់គំនិតនៃការកាន់កាប់អចលនទ្រព្យ ដាច់ដោយឡែក។

អាស្រ័យហេតុនេះ ការថយចុះនៃចំនួនអ្នកទិញបរទេស តម្លៃខុនដូដ៏ខ្ពស់ និងកម្រិតនៃការឲ្យតម្លៃរបស់ប្រជាជនកម្ពុជា បានធ្វើឱ្យវិស័យមួយនេះជួបប្រទះ នឹងបញ្ហាប្រឈមដ៏ខ្លាំងនៅឆ្នាំ ២០២២។​ ជាបទពិសោធសម្រាប់ឆ្នាំ២០២២នេះដែរ ការដែលអ្នកអភិវឌ្ឍន៍ បានផ្លាស់គោលដៅលក់របស់ខ្លួន​ មកកាន់ប្រជាជនកម្ពុជាវិញ គឺជាសញ្ញាវិជ្ជមានមួយ ដែលនឹងធ្វើឲ្យទីផ្សារមួយនេះមានភាពរឹងមាំនាពេលអនាគត។

តម្លៃខុនដូជាមធ្យមក្នុងមួយម៉ែត្រការ៉េ  និងអត្រាលក់ចេញតាមកម្រិត   និមួយៗ

ប្រភព៖ ព្រណិកស៍ ខេមបូឌា៕

default  

ដោយៈ សុខុម

ប៉េកាំង: ថ្វីបើផុសឡើងជាថ្មី នូវចិត្តគំនិតសង្គ្រាមត្រជាក់ក្នុងប្រទេសមួយចំនួននៅអឺរ៉ុបយ៉ាងណាក្ដី ក៏ថ្នាក់ដឹកនាំ និងអ្នកជំនាញធុរកិច្ចទូទាំងពិភពលោក បានអំពាវនាវឱ្យមានការពង្រឹង កិច្ចសហប្រតិបត្តិការរវាងប្រទេសចិន និងពិភពលោកទាំងមូលដើម្បីវិបុលភាពសកល។ នេះបើយោងតាមទីភ្នាក់ងារព័ត៌មាន Xinhua ចុះផ្សាយនៅថ្ងៃពុធ ទី០១ ខែមីនា។

លោក Stephen Perry ប្រធានអង្គការលើកកម្ពស់ពាណិជ្ជកម្មរបស់អង់គ្លេស48 Group Club បានលើកឡើងថា “បញ្ហាប្រឈមសម្រាប់អង់គ្លេស និងលោកខាងលិច គឺត្រូវចែករំលែកកំណើនសេដ្ឋកិច្ច របស់មហាយក្សចិន។ ដូចនេះ យើងនឹងត្រូវខិតខំប្រឹងប្រែងយ៉ាងខ្លាំង ដើម្បីទទួលបានចំណែកនៃកំណើននោះដែលយើងធ្លាប់មាន”។

លោកបន្ថែមទៀតថា “ខ្ញុំបានធ្វើជំនួញជាមួយប្រទេសចិន រយៈពេលជាង៥០ឆ្នាំមកនេះ ។ យើងបានជួបការលំបាកលើសពីម្ដង តែយើងនៅតែអាចជម្នះបាន ពីព្រោះកាលណាមានពាណិជ្ជកម្មកាន់តែច្រើន គឺឱកាសសន្តិភាពក៏មានកាន់តែច្រើន”។

ចំណែកលោក David Roth នាយកប្រតិបត្តិ The Store ដែលជាបុត្រសម្ព័ន្ធ នៃក្រុមហ៊ុនទូរគមនាគមន៍អង់គ្លេសWPP បានថ្លែងថា “ខ្ញុំយល់ថា ផលិតផលរបស់អង់គ្លេស ប្រហែលជាមានតម្រូវការច្រើននៅក្នុងប្រទេ​សចិន ហើយខ្ញុំគិតថា បណ្ដាក្រុមហ៊ុនអង់គ្លេស មានឱកាសដ៏ល្អដើម្បីទាក់ទាញអតិថិជនចិន ក្នុងកម្រិតច្រើនជាងមុនឆ្ងាយ”។

លោកបានបន្តថា “ខ្ញុំពិតជាអន្ទះសារង់ចាំភ្ញៀវទេសចរចិន កាន់តែច្រើនចូលមកប្រទេសអង់គ្លេស។ ដូចនេះយើងនឹងមើលឃើញអត្ថប្រយោ​ជន៍បន្ថែមជាច្រើន នៅពេលការធ្វើដំណើរទៅមករវាងប្រទេសចិន និងអង់គ្លេ​ស វិលទៅរកភាពប្រសើរជាងមុនច្រើន”។

ជាមួយគ្នានេះ លោក Karim Adel ប្រធានមជ្ឈមណ្ឌល Al Adl ដើម្បីការសិក្សាសេដ្ឋកិច្ច និងយុទ្ធសាស្ត្រ (Al Adl Center for Economic and Strategic Studies) ដែលមានមូលដ្ឋាននៅទីក្រុងគែរ ប្រទេសអេ ហ្ស៊ីបបានថ្លែងថា ក្នុងនាមជាសេដ្ឋកិច្ចធំបំផុតទី២ របស់ពិភពលោក មហាយក្សចិន ជួយគាំទ្រសេដ្ឋកិច្ចពិភពលោក តាមរយៈមធ្យោបាយជាច្រើន។ ប្រទេសចិន បានធ្វើពិពិធកម្មវិស័យសេដ្ឋកិច្ចដូចជាអចលនទ្រព្យ ថាមពល អគ្គិសនី បច្ចេកវិទ្យា និងផលិតកម្មជាដើម”។

លោកបានបន្ថែមទៀតថា “ទាំងអស់នេះ សុទ្ធតែជាវិស័យសំខាន់ៗដែលជួយគាំទ្រដល់បរិយាកាសជំនួញ និងការវិនិយោគ”។

រីឯលោក Paul Frimpong នាយកប្រតិបត្តិមជ្ឈមណ្ឌលអាហ្វ្រិក-ចិន សម្រាប់គោលនយោបាយ និងការប្រឹក្សាយោបល់ (Africa-China Center for Policy and Advisory) បានលើកឡើងថា “ចូរក្រឡេកមើលអ្វីដែលប្រទេសចិន កំពុងធ្វើសព្វថ្ងៃ គឺក្រឡេកមើល “គំនិតផ្ដួចផ្ដើមខ្សែក្រ​វាត់ និងផ្លូវ” (Belt & Road Initiative) ដើម្បីសាងសង់ និងតភ្ជាប់ទ្វីប និងប្រទេស ឬ តំបន់ជាច្រើនក្រោមគម្រោង និងកម្មវិធីតែមួយ”។

លោកគូសបញ្ជាក់ថា “ពីមុនមក មិនធ្លាប់មានអ្វីបែបនេះឡើយ ហើយប្រទេសចិន កំពុងតែដឹកនាំគំនិតផ្ដួចផ្ដើមនេះ។ ដូច្នេះសម្រាប់ខ្ញុំយល់ឃើញថា ប្រទេសចិន បានក្លាយជាផ្នែកដ៏ចាំបាច់មួយ នៃប្រព័ន្ធពាណិជ្ជកម្ម និងខ្សែសង្វាក់ផ្គត់ផ្គង់ពិភពលោក”។

លោកបន្ថែមទៀតថា “បណ្ដាអ្នកជំនាញជឿថា ដើម្បីឱ្យសេដ្ឋកិច្ចពិភពលោកងើបផុតពីស្ថានភាពដ៏អាក្រក់ ដែលបង្កឡើងដោយវិបត្តិកូវីដ-១៩ ប្រទេសនានាចាំបាច់ ត្រូវធ្វើការជាមួយគ្នា ដោយឈរលើមូលដ្ឋានគោរពគ្នាទៅវិញទៅមក ហើយគិតគូរពីផលប្រយោជន៍របស់គ្នាទៅវញទៅមក”។

លោក Moatasem Rashed អ្នកប្រឹក្សាផ្នែកសេដ្ឋកិច្ចនៅសហព័ន្ធសមាគមវិនិយោគិនអេហ្ស៊ីប (EFIA) ថ្លែងថា “ប្រទេសចិន ធ្វើពាណិជ្ជកម្មជាមួយគ្រប់ប្រទេសទាំងនៃនៃពិភពលោក”។

លោកបន្តថា “បក្សកុម្មុយនីស្តចិនអះអាងថា ពិភពលោកទាំងមូលរស់នៅក្នុងកន្លែងតែមួយ ពិភពលោកទាំងមូលគឺជាទីក្រុងរួមតែមួយ ហើយនោះជាអ្វីដែលយើងសម្លឹងចង់បាន ដើម្បីផលប្រយោជន៍របស់យើង។ យើងត្រូវតែពិចារណា ពីផលប្រយោជន៍របស់គ្នាទៅវិញទៅមក”។

ជាមួយគ្នានេះ លោកស្រី Rose Rono អ្នកប្រឹក្សាយោបល់ឯករាជ្យនៅតំបន់ពាណិជ្ជកម្មសេរីទ្វីបអាហ្វ្រិក (AFCTA) ដែលមានមូលដ្ឋាននៅកេនយ៉ា បានលើកឡើងថា “ខ្ញុំយល់ថា ប្រទេសចិន ជាដៃគូបើកចំហបំផុតមួយ ជាពិសេសសម្រាប់អាហ្វ្រិក។ ខ្ញុំចង់និយាយថា ពួកគេបានបើកចំហទីផ្សារសម្រាប់ពួកយើងដើម្បីឱ្យពួកយើងមានលទ្ធភាពនាំចេញផលិតផលរបស់យើងទៅកាន់ប្រទេសចិន”។

លោកស្រីបន្តថា “ប្រទេសចិន បានផ្ដល់ការគាំទ្រផ្នែកបច្ចេកទេស ហើយពួកគេជាដៃគូ ដែលផ្ដល់ផលប្រយោជន៍ ដល់គ្នាទៅវិញទៅមកដែរ”។

លោកស្រីបន្ថែមទៀតថា ប្រទេសចិន មិនត្រឹមតែជាដៃគូដែលនាំចូលផលិតផលរបស់យើងប៉ុណ្ណោះទេ ប៉ុន្តែក៏ជាដៃគូដែលផ្ដល់ជំនួយបច្ចេកទេ​សផងដែរ ពាក់ព័ន្ធនឹងការសម្របសម្រួលពាណិជ្ជកម្ម និងមានការពិគ្រោះយោបល់គ្នា ដើម្បីស្វែងយល់ពីតម្រូវការមួយចំនួន ដែលយើងមានក្នុងនាមជាសហគមន៍ជំនួញ”៕ Xinhua៕