ដោយៈ វឌ្ឍនៈ

ភ្នំពេញៈ ការបើកដំណើរការផ្លូវល្បឿនលឿនភ្នំពេញ ពិតជាបានជួយសម្រួលច្រើនណាស់ ដល់ការធ្វើដំណើររបស់ពលរដ្ឋ និងនិងភ្ញៀវទេសចរទៅកាន់ខេត្តព្រះសីហនុ និងពីខេត្តព្រះសីហនុមកកាន់រាជធានីភ្នំពេញ។

តែយ៉ាងណាក្ដីអាជីវករ ដែលធ្លាប់ទទួលផលពីអ្នកដំណើរ នៅតាមផ្លូវជាតិលេខ៤រួមមានអាហារដ្ឋាន កន្លែងលក់ផ្លែឈើ និងសូម្បីតែយាយម៉ៅ ដែលជាទីសក្ការបូជានោះ ក៏មានសភាពស្ងប់ស្ងាត់បណ្ដើរៗផងដែរ។

បើយើងមើលថយក្រោយបន្តិច ពោលគឺមុនពេលផ្លូវល្បឿនលឿនបើកដំណើរ ប្រជាពលរដ្ឋពីខេត្តព្រះសីហនុ និងមកកាន់រាជធានីភ្នំពេញ និងពីភ្នំពេញទៅកាន់ខេត្តព្រះសីហនុ មានតែផ្លូវមួយប៉ុណ្ណោះ ដែលត្រូវឆ្លងកាត់គឺផ្លូវជាតិលេខ៤ ហើយជាទូទៅពួកគាត់ត្រូវការឈប់សម្រាក ទទួលទានអាហារ និងទិញអីវ៉ាន់នៅតាមដងផ្លូវ។

ប៉ុន្តែក្រោយពីផ្លូវល្បឿនលឿនសង់រួច និងដាក់ដំណើរការ ប្រជាពល​រដ្ឋភាគច្រើន ឬស្ទើរតែទាំងអស់បានឡើងលើផ្លូវល្បឿនលឿន ពីព្រោះចំណា​យពេលខ្លី និងស្រួលបើកបរ ដូច្នេះអាជីវកម្មនៅផ្លូវជាតិលេខ៤ក៏បានបិទទ្វារបន្តបន្ទាប់ជាពិសេសអាហារដ្ឋាន និងកន្លែងលក់ទំនិញសម្រាប់ភ្ញៀវ ។

សូម្បីតែលោកខៀវ កាញារីទ្ធ រដ្ឋមន្ត្រីក្រសួងព័ត៌មានដែលធ្វើដំណើរត្រលប់មកពីខេត្តកោះកុង និងធ្វើដំណើរតាមផ្លូវជាតិលេខ៤នោះ ក៏បានសរសេរបង្ហោះ លើបណ្ដាញសង្គមរបស់លោកថា ចង់បានម្ហូបឆ្ងាញ់ ច្រើន ហើយ ថោក ពិតជាមិនងាយមែន។

លោកបន្តថា “ចុះពីផ្លូវល្បឿនលឿនប្រុងចូលហាងល្បីៗ មួយចំនួននៅក្នុងទីរួមខេត្តកំពង់ស្ពឺ តែហាងទាំងនោះបានបិទទ្វារអស់ហើយ ដោយផ្លូវល្បឿនលឿនបានស្រូបអ្នកដំណើរអស់”។

បុគ្គលិកបម្រើការក្នុងហាងមួយកន្លែងម្ដុំពេជ្រនិល ក៏បាននិយាយថា ចាប់តាំងផ្លូវល្បឿនលឿន បានដាក់ដំណើរការ អាហារដ្ឋានដែលខ្លួនកំពុងបម្រើការនេះ មានភ្ញៀវតិចតួចណាស់បានចូលទទួល។ ខុសពីមុនមានភ្ញៀវច្រើនណាស់ចូលពីសាអាហារ និងទិញទំនិញដែលដាក់លក់នៅមុខហាង។

បុគ្គលិករូបនេះនិយាយថា មិនមែនតែហាងដែលខ្លួនធ្វើការទេ ដែលស្ងាត់ គឺគ្រប់ហាងទាំងអស់ នៅតាមបណ្ដោយផ្លូវជាតិលេខ៤ ពីព្រោះថាអ្នកដំណើរដែលចង់ទៅកំពង់សោម ឬអ្នកកំពង់សោមចង់ទៅភ្នំពេញ គេប្រើប្រាស់ផ្លូវល្បឿនលឿន ស្ទើរតែទាំងអស់គ្នាទៅហើយ ដូច្នេះក៏អត់មានភ្ញៀវត្រូវឆ្លងកាត់លេខ៤តទៅទៀត”។

ផ្លូវល្បឿនលឿនទី១របស់កម្ពុជា ពីភ្នំពេញទៅក្រុងព្រះសីហនុ បានដាក់ដំណើរការសាកល្បង ដោយឥតគិតកម្រៃនៅថ្ងៃទី១ ខែតុលា ឆ្នាំ ២០២២ និងចាប់ផ្ដើមយកកម្រៃសេវា ពីអ្នកដំណើរចាប់ពីថ្ងៃទី១ ខែវិច្ឆិកា ឆ្នាំ២០២២ ដោយបានបញ្ចុះតម្លៃមួយចំនួនជូនផងដែរ ។

បើតាមលោកស៊ុន ចាន់ថុលផ្លូវល្បឿនលឿន នេះនឹងត្រូវយកកម្រៃសេវាសម្រាប់ រថយន្តឆ្លងកាត់រហូតដល់៥០ឆ្នាំ និងប្រគល់ជូនរដ្ឋាភិបាលវិញសម្រាប់ថែទាំបន្ត ហើយនៅពេលនោះ រដ្ឋាភិបាលយកកម្រៃសេវា ឬក៏អត់នោះ អាស្រ័យលើរដ្ឋាភិបាលពេលនោះហើយ ពីព្រោះថានៅពេលនោះលោកក៏លែងនៅមានវត្តមានសម្រាប់ទទួលផ្លូវនេះដែរ៕

ដោយៈ សុផារី

ព្រះសីហនុ: ព្រលានយន្តហោះអន្តរជាតិមួយទៀតរបស់កម្ពុជា ដែលមានតម្លៃ រហូតដល់៣០០លានដុល្លារអាមេរិក ត្រូវបានចុះហត្ថលេខាលើផែនការមេរួចរាល់ហើយ។

ការអភិវឌ្ឍព្រលានយន្តហោះអន្តរជាតិនេះ ស្ថិតក្រោមការសហការគ្នារវាង រដ្ឋលេខាធិការដ្ឋានអាកាសចរស៊ីវិល និងក្រុមហ៊ុន រ៉ូយ៉ាល់ គ្រុប កោះរ៉ុង ឌីវេឡបមេន ខមភេនី ដោយបានរៀបចំពិធីចុះហត្ថលេខា លើអនុស្សរណៈ នៃកិច្ចព្រមព្រៀង និងទទួលស្គាល់ផែនការមេ (Acceptance of Master Plan) លើគម្រោងសាងសង់អាកាស យានដ្ឋានអន្តរជាតិអេកូទេសចរណ៍កោះរ៉ុង នៅលើតំបន់អភិវឌ្ឍន៍កោះរ៉ុង ក្រុងកោះរ៉ុង ខេត្តព្រះសីហនុ នៅថ្ងៃទី១៨ ខែមករា ឆ្នាំ២០២៣នេះ។

យោងតាមសេចក្តីប្រកាសព័ត៌មាន របស់ក្រុមហ៊ុន រ៉ូយ៉ាល់ គ្រុប បានឱ្យដឹងថា តាមកិច្ចព្រមព្រៀងគម្រោងសាងសង់ អាកាសយានដ្ឋានអន្តរជាតិកោះរ៉ុង (លំដាប់ 4C) នៅលើតំបន់អភិវឌ្ឍន៍កោះរ៉ុងនេះ ត្រូវចំណាយថវិកាប្រមាណ៣០០លានដុល្លារ នឹងត្រូវបញ្ចប់ការសាងសង់ក្នុងរយៈពេល៥ឆ្នាំ៕

ដោយ: គង់ លាងហួរ

ភ្នំពេញ: វិស័យឧស្សាហកម្ម​ទេសចរណ៍ និង​លំនៅដ្ឋាន​ក្នុង​ប្រទេស​កម្ពុជា​ កំពុង​បង្ហាញ​សញ្ញា​នៃ​ការ​ស្ទុះ​ងើប​ឡើង​វិញ ​នៅ​ឆ្នាំ​២០២៣នេះ។ នេះ​បើ​តាម​ទស្សនវិស័យ​សេដ្ឋកិច្ច​តំបន់​អាស៊ាន+៣។

លោក Hoe Ee Khor ប្រធានសេដ្ឋវិទូរបស់អង្គការឃ្លាំមើលម៉ាក្រូសេដ្ឋកិច្ចក្នុងតំបន់(AMRO) បានមានប្រសាសន៍ថា ឧស្សាហកម្មកាត់ដេររបស់ប្រទេសកម្ពុជា ទំនងជាប្រឈមមុខនឹងការធ្លាក់ចុះ ដោយសារតែការធ្លាក់ចុះនៃទីផ្សារនាំចេញសំខាន់ៗរបស់ខ្លួន។

លោកបានអះអាងថា “កម្ពុជា​ជា​ប្រទេស​នាំ​ចេញ​សម្លៀក​បំពាក់​ដ៏​សំខាន់ ទៅ​កាន់អាមេរិក និង​អឺរ៉ុប។  ទោះ​ជា​យ៉ាង​ណាក្តី ដោយ​សារ​មានការ​ធ្លាក់​ចុះ​នៅ​តំបន់​ទាំង​នោះ ឧស្សាហកម្ម​កាត់​ដេរ​របស់​កម្ពុជា ​នឹង​ទទួល​រង​ផល​ប៉ះពាល់ផងដែរ”។

លោកបានចង្អុលបង្ហាញថា “ទោះជាយ៉ាងនេះក្តី កម្ពុជាត្រូវបានគេរំពឹងថា នឹងអាចទូទាត់បញ្ហាទាំងនេះ ដោយសារតែការស្ទុះងើបឡើងវិញនៃឧស្សាហកម្មទេសចរណ៍ និងលំនៅដ្ឋាន”។លោក​បន្ត​ថា​“ដោយ​សារ​ការ​ស្ទុះ​ងើប​ឡើង​វិញ​នៅ​ក្នុងប្រទេស​ចិន វិស័យ​ទេសចរណ៍​នៅ​កម្ពុជា ​កំពុង​ទទួល​បាន​ការ​ជំរុញ​យ៉ាង​ខ្លាំង”។

យើងរំពឹងថាវិស័យទេសចរណ៍នឹងងើបឡើងវិញ នៅក្នុងប្រទេសកម្ពុជានៅឆ្នាំ២០២៣នេះ ហើយវានឹងជួយទូទាត់ការធ្លាក់ចុះ នៃឧស្សាហកម្មកាត់ដេរ។

លោកបន្ថែមថា “យើងមានក្តីសង្ឃឹម ចំពោះឧស្សាហកម្មលំនៅដ្ឋាន ដែលកំពុងវិលត្រលប់មកវិញម្តងទៀត ក្រោយពីរងផលប៉ះពាល់ដោយសារវិបត្តិជំងឺកូវីដ”។

យោងតាមការសិក្សារបស់ក្រសួងរៀបំដែនដី នគរូបនីយកម្ម និងសំណង់បានបង្ហាញថា កម្ពុជាត្រូវការលំនៅដ្ឋានប្រមាណ៨០ម៉ឺនខ្នង ននៅចន្លោះឆ្នាំ២០១៥ ២០៣០ ខណៈអ្នកជំនាញនានាមើលឃើញថា កំណើនប្រជាជនវ័យក្មេងកំពុងជួយដល់វិស័យនេះ៕

ដោយ: គង់ លាងហួរ

អន្តរជាតិ:អង្គការសហប្រជាជាតិ(UN)បានឱ្យដឹងថា ប្រទេសឥណ្ឌានឹងវ៉ាដាច់ប្រទេសចិន ក្លាយជាប្រទេស ដែលមានប្រជាជនច្រើនជាងគេលើពិភពលោកនៅឆ្នាំ២០២៣នេះ ទោះជាកំណើនប្រជាជនរបស់ឥណ្ឌាបាននឹងកំពុងធ្លាក់ចុះក៏ដោយ។

កាលពីឆ្នាំ២០២២កន្លងទៅ ចំនួនប្រជាជនចិនបានធ្លាក់ចុះ ជាលើកដំបូង ក្នុងរយៈពេល៦ទសវត្សរ៍ ហើយនេះជាវេនប្រវត្តិសាស្ត្រមួយ ដែលនឹងបង្ហាញពីការចាប់ផ្តើម នៃការថយចុះរយៈពេលវែង នៃចំនួនប្រជាជនចិន ជាមួយនឹងផលប៉ះពាល់យ៉ាងជ្រាលជ្រៅ សម្រាប់សេដ្ឋកិច្ចរបស់ខ្លួន និងពិភពលោក។

ប្រទេសឥណ្ឌាប៉ាន់ស្មានចំនួនប្រជាជនរបស់ខ្លួន មានចំនួន១,៣៨ពាន់លាននាក់ ធៀបនឹងប្រជាជនចិន១,៤ពាន់លានរបស់ចិន។

នៅមន្ទីរពេទ្យកុមារក្នុងរដ្ឋធានីញូវដេលី នៃប្រទេសឥណ្ឌា ទារកទើបនឹងកើតកំពុងត្រូវបានរក្សា នៅក្រោមការសង្កេតនៅឯអង្គភាព ថែរទាំទារករបស់ខ្លួន។

លោកវេជ្ជបណ្ឌិត Rinku Sengupta Dhar ទីប្រឹក្សាជាន់ខ្ពស់នៅមន្ទីរពេទ្យកុមារ Rainbow បានមានប្រសាសន៍ថា ទោះបីជាចំនួនប្រជាជនដ៏ខ្ពស់ផ្តល់គុណសម្បត្តិ ដូចជា កម្លាំងពលកម្មវ័យក្មេងយ៉ាងណាក្តី ប៉ុន្តែវាក៏បង្ហាញពីបញ្ហាប្រឈមចំពោះកំណើនសេដ្ឋកិច្ច និងធនធានផងដែរ។

នៅតាមដងផ្លូវនៃរដ្ឋធានីប្រទេសឥណ្ឌា ប្រជាជនយល់ថា រដ្ឋាភិបាលចាំបាច់ត្រូវចាត់វិធានការ ដើម្បីទប់ទល់កំណើនប្រជាជនរបស់ខ្លួន ដែលតាមពិតទៅកំពុងតែធ្លាក់ចុះ។

កំណើនប្រជាជនប្រចាំឆ្នាំរបស់ប្រទេសអាស៊ី ខាងត្បូងមួយនេះមានជាមធ្យម១,២ភាគរយ ចាប់តាំងពីឆ្នាំ២០១១ ពោលគឺធ្លាក់ចុះពី១,៧ភាគរយក្នុងរយៈពេល១០ឆ្នាំមុន។

លោក Azhar Khan ពលរដ្ឋក្នុងក្រុងញូវដេលី បានមានប្រសាសន៍ថា “រដ្ឋាភិបាលគួរតែបញ្ចេញនូវច្បាប់ និងបទប្បញ្ញត្តិមួយចំនួន ដែលជួយក្នុងការគ្រប់គ្រងចំនួនប្រជាជននៃប្រទេសរបស់យើង”។

ការប្រើប្រាស់វិធីសាស្រ្តរៀបចំផែនការគ្រួសារ នៅក្នុងប្រទេសឥណ្ឌាបានកើនឡើងដល់៦៦,៦៧ភាគរយ ក្នុងឆ្នាំ២០១៩-២០២១ ដោយកើនឡើងពី៥៣,៥ភាគរយ ក្នុងឆ្នាំ២០១៥-២០១៦៕

  ដោយៈ ជេស៊ីកា

       បាងកកៈ ក្រុមអាវក្រហមត្រូវបានបង្កើតឡើង ហើយជាលទ្ឋផលបានប្រឈមមុខយ៉ាងចលាចល នៅកណ្តាលទីក្រុងបាងកក បន្ទាប់ពីការធ្វើរដ្ឋប្រហារទម្លាក់នាយករដ្ឋមន្រ្តី លោកថាក់ស៊ីន ស៊ីណាវ៉ាត្រា ដ៏មានប្រជា​ប្រិយភាព។

ប៉ុន្តែរដ្ឋប្រហារចុងក្រោយ ដែលដឹកនាំដោយលោកប្រាយុទ្ឋ ចាន់អូរចា បានធ្វើឲ្យប្រទេសថៃ ជួបភាពនឹងនរខាងនយោបាយឡើងវិញ បន្ទាប់ពីមេ​យោធាដ៏មានឥទ្ឋិពលរូបនេះ បានកែរដ្ឋធម្មនុញ្ញ ដែលអនុញ្ញាត្តឲ្យយោធា​មានសិទ្ឋស្ទើរគ្រប់យ៉ាង ក្នុងការកំណត់ជោគវាសនាប្រទេសថៃ ហើយជាលទ្ឋផល លោកបានក្លាយជានាយករដ្ឋមន្រ្តី ប៉ុន្តែជានាយករដ្ឋមន្រ្តីមិនសូវមាន​ប្រជាប្រិយភាព។

កូនស្រីរបស់អតីតនាយករដ្ឋមន្ត្រីថៃ លោក ថាក់ស៊ីន ស៊ីនណាវ៉ាត់ (Thaksin Shinawatra) បានប្រកាសថា អ្នកនាងបានត្រៀមខ្លួនរួចរាល់ហើយ ដើម្បីឈរឈ្មោះជាបេក្ខភាពនាយករដ្ឋមន្ត្រី នៃគណបក្សភឿថៃ សម្រាប់ការបោះឆ្នោតនៅឆ្នាំ២០២៣នេះ ខណៈគណបក្សប្រឆាំងដ៏ធំរបស់ថៃមួយនេះ កំពុងព្យាយាមដណ្ដើមអំណាចមកវិញ ក្រោយត្រូវបានយោធាធ្វើរដ្ឋប្រហារកាលពីជាង៨ឆ្នាំមុន។

ការបញ្ជាក់របស់អ្នកនាង ផែថងថាន ស៊ីនណាវ៉ាត់ (Paetongtarn Shinawatra) ធ្វើឡើងនៅចំពោះមុខអ្នកសារព័ត៌មាន កាលពីថ្ងៃអាទិត្យ ទី១៥ ខែមករានេះ នៅឯ តំបន់ភាគឦសាននៃប្រទេសថៃ ជាមូលដ្ឋានជនបទដ៏រឹងមាំមួយ ដែលតែងតែផ្ដល់នូវជ័យជម្នះ សំឡេងភាគច្រើននៅក្នុងការបោះឆ្នោតចំនួន៥លើក ពោលគឺចាប់តាំងពី ឆ្នាំ២០០១មក សម្រាប់គ្រួសារត្រកូលស៊ីនណាវ៉ាត់។

អ្នកនាង ផែថនថាន បានគូសបញ្ជាក់ដោយផ្ទាល់ នៅពេលត្រូវបានអ្នកសារព័ត៌មានសាកសួរពីការឈរឈ្មោះជា បេក្ខភាពនាយករដ្ឋមន្ត្រី យ៉ាងដូច្នេះថា “ពិតមែនហើយ ខ្ញុំបានត្រៀនខ្លួនរួចរាល់ហើយ…យើងចង់ឱ្យគណបក្សទទួលបានជ័យជម្នះភ្លូកទឹកភ្លូកដី ដើម្បីអាចបំពេញតាមពាក្យសន្យាដែលយើងបានសន្យាទៅកាន់ប្រជាជន”។

មែនទែនទៅ ចេតនាចង់ឈរឈ្មោះ ជាបេក្ខភាពនាយករដ្ឋមន្ត្រីរបស់អ្នកនាង ផែថងថាន ត្រូវបានគេលើកយកជជែកដេញ នៅបន្ទាប់ពីអ្នកនាងបានបង្ហាញខ្លួនជារឿយៗ នៅតាមវេទិកាជួបជុំរបស់គណបក្សភឿថៃ កាលពីឆ្នាំ២០២២ រហូតដល់មានការចោទសួរផងដែរ ឡើងពីលទ្ធភាពដែលគ្រួ​សារស៊ីនណាវ៉ាត់ ត្រឡប់មកកាន់អំណាចវិញ សាជាថ្មីនៅក្នុងនយោបាយថៃ?។

គណបក្សភឿថៃ មិនទាន់ប្រកាសតែងតាំងបេក្ខភាព នាយករដ្ឋមន្ត្រីរបស់ខ្លួនជាផ្លូវការនៅឡើយទេ តែអ្នកនាង ផែថងថាន​ត្រូវបានគេមើកឃើញ ថាមានលទ្ធភាពខ្ពស់ជាងគេនៅក្នុងបក្ស។

* តើអ្នកនាង ផែថងថានជានរណា?

កើតនៅឆ្នាំ១៩៨៦ អ្នកនាង Paetongtarn Shinawatra គឺជាកូនស្រីពៅ នៅក្នុងចំណោមកូន៣នាក់របស់លោក ថាក់ស៊ីន ស៊ីនណាវ៉ាត់ អតី​ត​នាយករដ្ឋមន្ត្រីថៃ ពីឆ្នាំ២០០១ ដល់ឆ្នាំ២០០៦ និងដែលត្រូវបានបណ្ដេញចេញពីអំណាច ដោយរដ្ឋប្រហារយោធាកាលពីឆ្នាំ២០០៦។ អ្នកនាងបានបញ្ចប់ការសិក្សា ផ្នែកសង្គមវិទ្យា (sociology) នៅឯសាកលវិទ្យាល័យជូឡាឡុងកន (Chulalongkorn University) មុននឹងបន្ត ហើយបញ្ចប់ការសិក្សា ផ្នែកអនុបណ្ឌិតផ្នែកគ្រប់គ្រង សណ្ឋារគារអន្តរជាតិ មកពីសាកលវិទ្យាល័យ Surrey (Surrey University) មានមូលដ្ឋាននៅក្នុងចក្រភពអង់គ្លេស។

អ្នកនាង ផែថងថាន ត្រូវបានគេចាត់ទុកជា សហគ្រិនស្ត្រីដ៏ជោគជ័យម្នាក់ និងជានាយកប្រតិបត្តិ CEO ក្រុមហ៊ុន Rende Development។

* ឧបសគ្គដ៏ធំរបស់គណបក្សភឿថៃ និងអ្នកនាង ផែថងថាន

ការស្ទង់មតិមួយធ្វើឡើងដោយវិទ្យាស្ថានថៃ National Institute of development Administration ចេញផ្សាយដោយកាសែតបាងកកប៉ុស្តិ៍កាលពីថ្ងៃទី២៥ ខែធ្នូ ឆ្នាំ២០២២ កន្លងទៅបានបង្ហាញថា អ្នកនាង ផែថងថាន គឺជាជម្រើសទី១ នៃអ្នកបោះឆ្នោត ដែលពួកគេចង់ឱ្យក្លាយជានាយករដ្ឋមន្ត្រីថ្មីរបស់ថៃ នៅក្នុងអាណត្តិនេះ ដោយទទួលបានសំឡេងគាំទ្រ ៣៤.០០ភាគរយ ខណៈនាយករដ្ឋមន្ត្រីបច្ចុប្បន្នលោក បា្រយុទ្ធ ចាន់អូចា ទទួលបានសំឡេងគាំទ្រ ១៤.៥ភាគរយ។

ការស្ទង់មតិដដែលដែល បានធ្វើឡើងពីថ្ងៃទី១៧ ដល់ថ្ងៃទី២២ ខែធ្នូ ឆ្នាំ២០២២ ក៏បានឱ្យដឹងដែរថា នៅពេលសាកសួរពីគណបក្សវិញ អ្នកដែលត្រូវបានសម្ភាសន៍៤២.៩៥ភាគរយបាននិយាយថា ពួកគេនឹងបោះឆ្នោតឱ្យគណបក្សភឿថៃទៀតផង។

ក្រុមយោធានៅក្នុងប្រទេសថៃ បានប្រើប្រាស់គ្រប់មធ្យោបាយ ដើម្បីកម្ចាត់ឥទ្ធិពល និងប្រជាប្រិយភាពនៃគ្រួសារស៉ីនណាវ៉ាត់។

ជាការពិតណាស់ យោធាថៃមិនអាចបន្សាប ប្រជាប្រិយភាពរបស់គ្រួសារស៊ីនណាវ៉ាត់ នៅក្នុងចំណោមប្រជាជនថៃ ជាពិសេសប្រជាជនរស់នៅតាមទីជនបទបានឡើយ ប៉ុន្តែយ៉ាងហោចណាស់ ពួកគេបានប្រើប្រាស់ ច្បាប់ ដើម្បីរារាំងការវិលត្រឡប់ មកកាន់អំណាចសាជាថ្មី របស់គ្រួសារស៊ីនណាវ៉ាត់ តាមរយៈការធ្វើវិសោធនកម្មរដ្ឋធម្មនុញ្ញ។

ក្រុមអ្នកវិភាគជាច្រើនយល់ស្របដូចគ្នាថា ជ័យជម្នះរបស់គណបក្សភឿថៃ និងអ្នកនាង ផែថងថាន អាចនឹងក្លាយជាការត្រួសត្រាយផ្លូវឱ្យលោក ថាក់ស៊ីន ត្រឡប់ចូលមកក្នុង ប្រទេសថៃវិញ ហើយលោកថាក់ស៊ីនខ្លួនឯង កំពុងរស់នៅនិរទេសខ្លួននៅឯបរទេស ជាមួយប្អូនស្រីបង្កើតគឺ លោកស្រី យ៉ីងឡាក់ ក៏ធ្លាប់បានសន្យាកាលពីឆ្នាំ២០២១ដែរថា លោកនឹងត្រឡប់ចូលស្រុកតាមផ្លូវមុខ។

ក៏ប៉ុន្តែទោះជាមានប្រ៊េនប្រជាប្រិយភាព នៃគ្រួសារស៊ីនណាវ៉ាត់ ក៏ពិតមែន ក៏គណបក្សភឿថៃ និងអ្នកនាង ផែថងថាន នឹងត្រូវប្រឈមមុខនឹងឧបសគ្គដ៏ធំមួយ នោះគឺរដ្ឋធម្មនុញ្ញរបស់យោធាថៃ​។ ដើម្បីអាចជាប់ ឆ្នោតជានាយករដ្ឋមន្ត្រី បេក្ខជននីមួយៗ ចាំបាច់ត្រួវតែប្រមូលឱ្យបាននូវការគាំទ្រសំឡេងភាគច្រើន នៅក្នុងសភាជាន់ទាប ដែលមានអាសនៈចំនួន៥០០ និងក្នុងព្រឹទ្ធសភា ដែលមានអាសនៈចំនួន២៥០។

តែនៅក្រោមរដ្ឋធម្មនុញ្ញដែលត្រូវបានព្រាង និងធ្វើវិសោធនកម្មដោយយោធាថៃកាលពីឆ្នាំ២០១៧ ព្រឹទ្ធសភាថៃសព្វថ្ងៃ គឺស្ថិតនៅក្រោមការគ្រប់គ្រងទាំងស្រុងពីសមាជិក ព្រឹទ្ធសភាមានភក្ដីភាពនឹងយោធាថៃ។

នៅត្រង់ចំណុចនេះ​ វាមានលទ្ធភាពខ្ពស់ដែលសេណារីយ៉ូ ដូចគ្នាទៅនឹងការបោះឆ្នោតកាលពីឆ្នាំ២០១៩ អាចនឹងកើតឡើងជាថ្មី ម្ដងទៀតក្នុងឆ្នាំ២០២៣នេះ។ ក្នុងការបោះឆ្នោតកាលពីឆ្នាំ២០១៩ គណបក្សភឿថៃទទួលបានសំឡេងភាគច្រើន នៅក្នុងសភាជាន់ទាប ប៉ុន្តែព្រឹទ្ធសភាគ្រប់​គ្រងដោយយោធាទៅវិញទេ ដែលមានសិទ្ធិអំណាចអនុញ្ញាតឱ្យលោក ប្រាយុទ្ធ បង្កើតរដ្ឋាភិបាលចម្រុះដឹកនាំប្រទេស។

ដូច្នេះមិនថា នៅក្នុងការបោះឆ្នោតណានោះទេ ក្រុមគណបក្សគាំទ្រ យោធាថៃ នឹងធ្វើអ្វីៗគ្រប់យ៉ាងដើម្បីរក្សាអំណាច ហើយព្យាយាមបកស្រា​យផ្លូវច្បាប់ថាគណបក្សភឿថៃ មិនគួរត្រូវបានអនុញ្ញាតឱ្យបង្កើតរដ្ឋភិបាលចម្រុះទេ។

នាយករដ្ឋមន្ត្រីថៃ លោក ប្រាយុទ្ធ ចាន់អូចា កាលពីថ្ងៃទី៩ ខែមករា ឆ្នាំ២០២៣ បានផ្ដាច់ខ្លួនចេញពីគណបក្ស Palang Pracharath គាំទ្រដោយយោធា និងបានចូលរួមក្នុង ជីវភាពនយោបាយថ្មី នៅក្នុងគណបក្ស Ruam Thai Sang Chart ឬ United Thai Nation Party ដែលបានបើកសមាជបក្សដំបូងកាលពីខែសីហា ឆ្នាំ២០២២។

ក្រោយការចាកចេញរបស់លោក ប្រាយុទ្ធ បក្ស Palang Pracharath (PPRP) បានប្រកាសថា លោកឧបនាយករដ្ឋមន្ត្រី ប្រាវីត វ៉ុងស៊ូវ៉ាន់ (Prawit Wongsuwan) គឺជាបេក្ខាភាពនាយករដ្ឋមន្ត្រីរបស់បក្សសម្រាប់ការបោះឆ្នោតសកល ដែលអាចនឹងធ្វើឡើងនៅមុនខែឧសភា។

បើតាមក្រុមអ្នកវិភាគ លោក ប្រាយុទ្ធ ចាន់អូចា លោក ប្រាវីត វ៉ុងស៊ូវ៉ាន់ និងអ្នកនាង ផែថងថាន គឺជាបេក្ខជនសំខាន់ៗ ត្រូវប្រជែងគ្នាយកកៅអីនាយករដ្ឋមន្ត្រីនៅក្នុងឆ្នាំនេះ។

តាមរយៈការចូលរួមជាមួយគណបក្ស United Thai Nation Party លោក ប្រាយុទ្ធ អាចនឹងសហការជាមួយលោក ប្រាវីត និងគណបក្សដទៃដែលស្និទ្ធនឹងយោធាថៃ ដើម្បីបង្កើតរដ្ឋាភិបាលចម្រុះ។

នៅក្នុងករណីនេះ ប្រសិនបើមានសំឡេងគ្រប់គ្រាន់ នៅក្នុងសភាជាន់ទាប នោះលោក ប្រាយុទ្ធ និងលោក ប្រាវីត អាចនឹងចាប់ដៃសហការគ្នាដោយមានជំនួយពីព្រឹទ្ធសភា។ ប៉ុន្តែបើដូច្នេះមែន តើរវាងលោក ប្រាយុទ្ធ និងលោក បា្រវីត នរណានឹងក្លាយជានាយករដ្ឋមន្ត្រី? ក្រុមអ្នកវិភាគជឿថាបើគណបក្ស United Thai Nation Party មានអាសនៈ ច្រើនជាងគណបក្ស Palang Pracharath នោះលោក ប្រាយុទ្ធនឹងត្រូវតែងតាំងជានាយករដ្ឋមន្ត្រី និងច្រាសមកវិញ ខណៈទំនាក់ទំនងមិត្តភាព រវាងអ្នកទាំង២ មានការរង្គោះរង្គើរតិចតួច កាលពីពេលថ្មីៗនេះក៏ដោយ ក៏វានៅតែមានភាពរឹងមាំគ្រប់គ្រាន់អាចឱ្យសេណារីយ៉ូ ទៅរួច។

តែក៏អាចមានសេណារីយ៉ូមួយផ្សេងទៀត ដែលគេសឹងតែមិនហ៊ាននឹកស្មានដល់ នោះគឺលោកប្រាវីត លួចចាក់លោក ប្រាយុទ្ធពីក្រោយខ្នង បើគណបក្សភឿថៃនិយាយថា “មកចូលរួមជាមួយនឹងពួកយើង បើអ្នកចង់ក្លាយជានាយករដ្ឋមន្ត្រី”។

នៅក្នុងសេណារីយ៉ូនេះ គឺគណបក្ស Palang Pracharath មានអាសនៈតិចជាងគណបក្ស United Thai Nation Party តែគណបក្សភឿថៃ យល់ព្រមបង្កើតរដ្ឋាភិបាលចម្រុះ ដោយឱ្យលោកប្រាវីត ធ្វើជានាយករដ្ឋមន្ត្រីំ រីឯអ្នកនាង ផែថងថាន ត្រូវបានរៀបចំសម្រាប់កាន់តំណែងជា នាយករដ្ឋមន្ត្រីនៅពេលអនាគត។

ក្នុងន័យនេះ គោលដៅរយៈពេលខ្លីរបស់គណបក្សភឿថៃ នោះគឺត្រឡប់ មកចូលរួមក្នុងរដ្ឋាភិបាលវិញសិន ហើយគោលដៅរយៈពេលវែង នោះគឺមាននាយករដ្ឋមន្ត្រីម្នាក់ដឹកនាំរដ្ឋាភិបាល។

នៅពេលត្រូវបានសាកសួរថា តើគណបក្សរបស់លោក នឹងធ្វើកិច្ចព្រមព្រៀងនៅមុនការបោះឆ្នោត ជាមួយគណបក្សណាមួយដែរឬទេ? មេដឹកនាំគណបក្សភឿថៃ លោកCholnan Srikaew បាននិយាយថា ជាការពិតណាស់ កិច្ចព្រមព្រៀងមុនការបោះឆ្នោតរបៀបនេះ ប្រហែលជានឹងមិនអាចកើតឡើង។

ប៉ុន្តែក្នុងន័យនេះ លោក Srikaew និយាយត្រឹមពាក្យ “ប្រហែល តែមិនមែនដាច់ខាតនោះទេ”។ ប្រភពFreshnews៕

ដោយៈសុខុម

ប៉េកាំង: ប្រភពទម្លាយឱ្យដឹងថា ក្រុមនិយ័តករហិរញ្ញវត្ថុ និងក្រុមហ៊ុនគ្រប់គ្រងបំណុលស្អុយ(Bad debt) ធំៗបំផុតនៃប្រទេសចិន គ្រោងបញ្ចេ​ញថវិកា២៤ពាន់លានដុល្លារអាមេរិក សម្រាប់ការរៀបចំឥណទានឡើងវិញ។

ការបញ្ចេញកញ្ចប់ថវិកាដ៏ច្រើននេះ ដើម្បីជួយស្រោចស្រង់ក្រុមហ៊ុនអភិវឌ្ឍន៍លេចធ្លោសំខាន់ៗក្នុងត្រីមាសទី១ ដើមឆ្នាំនេះ។

ក្រោមផែនការដែលត្រូវបានប្រកាស ជាលើកដំបូងកាលពីថ្ងៃសុក្រ សប្ដាហ៍កន្លងទៅ ដោយផ្ដល់ព័ត៌មានលម្អិតតិចតួចនេះ ធនាគារកណ្ដាលចិន (PBOC) នឹងផ្តល់ឥណទានប្រមាណ១១,៨ពាន់លានដុល្លារអាមេរិក។

យោងតាមសារព័ត៌មាន South China Morning Post ចុះផ្សាយកាលពីថ្ងៃអង្គារ ទី១៧ ខែមករា ឱ្យដឹងថា ធនាគារកណ្ដាលចិន (PBOC) នឹងផ្តល់ឥណទាន ជិត១២ពាន់លានដុល្លារអាមេរិក នេះតាមរយៈក្រុមហ៊ុនគ្រប់គ្រងទ្រព្យសកម្មចិន China Huarong Asset Management និងដៃគូរបស់ខ្លួន ដើម្បីជួយដល់បណ្ដាក្រុមហ៊ុនអភិវឌ្ឍន៍ ដែលជំពាក់បំណុលវ័ណ្ឌក ដែលត្រូវបានជ្រើសរើស ដោយគិតអត្រាការប្រាក់ប្រចាំឆ្នាំត្រឹមតែ១,៧៥%។

ទោះជាយ៉ាងណា ធនាគារកណ្ដាលចិន (PBOC) ក្រុមហ៊ុន China Huarong Asset Management និងក្រុមហ៊ុន China Cinda Asset Management បានបដិសេធមិនឆ្លើយបំភ្លឺទេទាក់ទិននឹងរឿងនេះ។

កញ្ចប់ឥណទានយ៉ាងច្រើន សន្ធឹកសន្ធាប់នេះបន្ថែម ពីលើវិធានការនានា ដែលត្រូវបានដាក់ចេញចាប់តាំងពីខែវិច្ឆិកា ដើម្បីស្រោចស្រង់ទីផ្សារអចលនទ្រព្យរបស់ប្រទេសចិន ដែលកំពុងដាំក្បាលចុះ។

ក្រុមនិយ័តករចិន កំពុងបង្កើនការគាំទ្រផ្នែកហិរញ្ញវត្ថុ ដល់ក្រុមហ៊ុនអភិវឌ្ឍន៍ ដែលមានលក្ខណៈសំខាន់ជាប្រព័ន្ធ ហើយទន្ទឹមនេះក៏បញ្ចុះអត្រាប្រាក់ឥណទានគេហដ្ឋាន (កម្ចីទិញផ្ទះ) និងតម្រូវឱ្យបង់ប្រាក់កក់ (Down Payment) តិចជាងមុនផងដែរដើម្បីបង្កើនតម្រូវការ។

ទោះជាយ៉ាងណា វិធានការទាំងនោះកំពុងត្រូវបានរារាំង ដោយសារការផ្ទុះកូវីដ-១៩ រលកថ្មីទ្រង់ទ្រាយធំ បន្ទាប់ពីដ្ឋាភិបាលបានបោះបង់ចោ​លគោលនយោបាយសូន្យ-កូវីដ របស់ខ្លួនភ្លាមៗដើម្បីបើកព្រំដែនឡើងវិញ។

អាជីវកម្ម និងអតិថិជនអ្នកប្រើប្រាស់នានា មិនទាន់មានទំនុកចិត្តមាំទាំដូចមុនកម្រិតមុន ពេលផ្ទុះវិបត្តិកូវីដ-១៩ នៅឡើយទេ។ តួលេខផ្លូវការបានបង្ហាញកាលពីថ្ងៃច័ន្ទ ទី១៦ ខែមករា ថា តម្លៃផ្ទះថ្មីនៅក្នុងទីក្រុងចំនួន៧០នៃប្រទេសចិន កាលពីខែធ្នូ ចុងឆ្នាំ២០២២ បានធ្លាក់ចុះរយៈពេល១៦ខែជាប់គ្នា។

ជំនួសឱ្យការបញ្ចេញថវិកាសង្គ្រោះពេញលេញ រដ្ឋាភិបាលចិននាពេលនេះ ផ្តល់ការគាំទ្រដល់តែក្រុមហ៊ុន ដែលខ្លាំងលេចធ្លោជាងគេ នៅក្នុងទីផ្សារអចលនទ្រព្យប៉ុណ្ណោះ៕ South China Morning Post៕

ដោយៈ សុខុម

បាងកក: គេហទំព័រអចលនទ្រព្យ DDproperty.com បានក្រើនរំឭកថា អ្នកទិញផ្ទះក្នុងទីផ្សារប្រទេសថៃ គួរតែមានវិន័យជាងមុននៅក្នុងការគ្រប់គ្រងហិរញ្ញវត្ថុ និងត្រៀមលក្ខណៈឱ្យបានល្អជាងមុន មុនពេលសម្រេចចិត្តទិញផ្ទះ។

ការលើកឡើងនេះ ស្របពេលតម្លៃផ្ទះកំពុងហក់ឡើង អត្រាការប្រាក់ក៏កើនឡើង ហើយគ្រឿងលើកទឹកចិត្តអចលនទ្រព្យក៏ផុតសុពលភាព។

លោក Wittaya Apirakviriya នាយកប្រតិបត្តិគេហទំព័រខាងលើនេះថ្លែងថា តាមការរំពឹងទុកតម្លៃអចលនទ្រព្យក្នុងឆ្នាំនេះ នឹងហក់ឡើងចន្លោះពី៥%ទៅ១០% ស្របតាមអត្រាការប្រាក់ហក់ឡើង ហើយថ្លៃចំណា​យអភិវឌ្ឍន៍ក៏កើនឡើង។ នេះបើយោងតាមកាសែត Bangkok Post ចុះផ្សាយកាលពីថ្ងៃច័ន្ទ ទី១៦ ខែមករា។

លោកបានបន្ថែមថា “ចំណាយថ្លៃដើមកំពុងហក់ឡើង ដោយសារតែអតិផរណាកើនឡើង ការដំឡើងប្រាក់ឈ្នួលអប្បបរមា ហើយថ្លៃប្រេងឥន្ធនៈ និងថ្លៃសម្ភារសំណង់ក៏ហក់ឡើង”។

លោកបានបន្តថា “ឆ្នាំនេះថ្លៃសេវាថ្មី សម្រាប់ការវាយតម្លៃដីធ្លី នឹងត្រូវអនុវត្ត ដែលនឹងជះផលប៉ះពាល់ផ្ទាល់ ទៅលើប្រតិបត្តិការទិញលក់អចលនទ្រព្យ”។

ទន្ទឹមនេះ លោក Naporn Sunthornchitcharoen ប្រធានគណៈកម្មាធិការប្រតិបត្តិ នៃក្រុមហ៊ុនអចលនទ្រព្យ Land & House Plc បានលើកឡើងថា តម្លៃដីបានហក់ឡើងប្រមាណ៥%ជារៀងរាល់ឆ្នាំ។

លោកគូសបញ្ជាក់ថា “ដោយសារចំណាយថ្លៃដើមទាំងនេះ ហក់ឡើង តម្លៃផ្ទះក្នុងឆ្នាំនេះនឹងហក់ឡើង៥%។ លោកបញ្ជាក់ថា “ដោយសារកង្វះកម្លាំងពលកម្ម កើតមានតាំងពីឆ្នាំមុន យើងបានបន្ថែមចំនួនអ្នកម៉ៅការដើម្បីជួយគាំទ្រ ដល់អាជីវកម្មរបស់យើងក្នុងឆ្នាំ២០២៣”។

អ្នកជំនាញរូបនេះបន្ថែមទៀតថា ផ្អែកលើស្ថានភាពបច្ចុប្បន្ន អ្នកទិញផ្ទះពេលនេះ ត្រូវបង់រំលស់ប្រចាំខែខ្ពស់ជាងមុន និងបង់រយៈពេលយូរជាងមុនដោយសារតែអត្រាការប្រាក់ហក់ឡើង។ ដូចនេះពួកគេគួរតែពិចារណាអំពីស្ថានភាពហិរញ្ញវត្ថុរបស់ខ្លួន ឱ្យបានច្បាស់លាស់ និងត្រូវមានវិន័យនៅក្នុងគ្រប់គ្រងហិរញ្ញវត្ថុ មុននឹងសម្រេចចិត្តទិញផ្ទះ៕ Bangkok Post៕