ដោយៈ គង់ សូរិយា

       ភ្នំពេញៈ លោកឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណៈការ និងដឹកជញ្ជូន បានដឹកនាំកិច្ចប្រជុំ ដើម្បីជំរុញការប្រើប្រាស់រថយន្តក្រុងអគ្គិសនី។

កិច្ចប្រជុំដែលបានធ្វើឡើងកាលពីថ្ងៃទី១៨ ខែមករា ឆ្នាំ២០២៣ ដឹកនាំដោយលោកឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក បានអញ្ជើញដឹកនាំកិច្ចប្រជុំ ជាមួយសមាគមដឹកជញ្ជូនអ្នកដំណើរផ្លូវគោកកម្ពុជា និងបណ្តាក្រុមហ៊ុននាំចូល យានយន្តអគ្គិសនីនៅកម្ពុជា ដើម្បីពិភាក្សាពីការជំរុញការប្រើប្រាស់ រថយន្តក្រុងអគ្គិសនីនៅកម្ពុជា សម្រាប់មធ្យោបាយដឹកជញ្ជូនសាធារណៈ។

គោលដោនេះ ធ្វើឡើងស្របតាមអនុសាសន៍ណែនាំ ដ៏ខ្ពង់ខ្ពស់របស់លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ដែលបានជួបពិភាក្សាការងារជាមួយ សមាគមដឹកជញ្ជូនអ្នកដំណើរផ្លូវគោកកម្ពុជា កាលពីថ្ងៃទី ១១​ ខែ មករា ឆ្នាំ២០២៣​ កន្លងទៅ ដោយកិច្ចប្រជុំនេះ មានការចូលរួមពីលោកប្រធាន អនុប្រធាននាយកដ្ឋានដឹកជញ្ជូនសាធារណៈក្រុង និង លោក លោកស្រីប្រធាន អនុប្រធានការិយាល័យ និងមន្រ្តីពាក់ព័ន្ធផងដែរ។

នៅក្នុងកិច្ចប្រជុំពិភាក្សានេះ បានផ្ដោតសំខាន់លើការលើកទឹកចិត្តក្រុមហ៊ុនផ្គត់ផ្គង់យានយន្តអគ្គិសនី នាំចូលយានយន្តក្រុងអគ្គិសនី សម្រាប់ធ្វើមធ្យោបាយដឹកជញ្ជូនអ្នកដំណើរ ដើម្បីបំពេញតម្រូវការរបស់សមាគមដឹកជញ្ជូនអ្នកដំណើរ និងបណ្ដាក្រុមហ៊ុនដឹកជញ្ជូន អ្នកដំណើរមួយចំនួនផងដែរ។

ជាពិសេស លើកទឹកចិត្តវិស័យឯកជន សហការដំឡើងស្ថានីយបញ្ចូ​លថាមពលយានយន្តអគ្គិសនី នៅតាមបណ្ដាខេត្ត និងតំបន់សំខាន់ៗ មួយចំនួន។

ទន្ទឹមគ្នានេះដែរ ក្រុមហ៊ុនផ្គត់ផ្គង់យានយន្តអគ្គិសនី បានស្នើសុំរាជរដ្ឋាភិបាល កាត់បន្ថយពន្ធនាំចូលយានយន្តអគ្គិសនី ឱ្យបានកាន់តែទាបតាមដែលអាចធ្វើបាន៕

  ដោយៈ គង់ សូរិយា

       ភ្នំពេញៈ  ព្រឹត្តិការណ៍ “ការប្រណាំងយានយន្តសន្តិភាពខេត្តមណ្ឌ​លគិរីឆ្នាំ២០២៣” មានរយៈពេល៣ថ្ងៃ ចាប់ពីថ្ងៃទី១៣-១៥ ខែមករា ឆ្នាំ២០២៣ ដោយមានការចូលរួមពីក្រុមកីឡាករ កីឡាការិនីជាតិ និងអន្តរជាតិចំនួន ១១៥នាក់។

កីឡាករ កីឡាការិនីទាំងនោះ បានមកពីប្រទេស ចំនួន០៦ រួមមាន៖ ប្រទេសកម្ពុជា ថៃ ឡាវ វៀតណាម កូរ៉េ និងបារាំង។ ការប្រកួតមានវិញ្ញាសារចំនួន ០៣ ប្រភេទ ផ្សេងៗគ្នា ដែលរួមមាន ទី១. ការប្រណាំងរថយន្តឆ្លងកាត់ឧបសគ្គ Off Road មានចំនួន៣ក្រុម ដែលមានរថយន្តសរុបចំនួន ៦៧គ្រឿង ក្នុងនោះរួមមាន Class A សម្រាប់កីឡាករជំនាញ (Hard Core) Class B កីឡាករមធ្យម (Light Core) និង Class C សម្រាប់កីឡាករចូលរួមដំបូង (Overland)។

២. ការប្រណាំងរថយន្ត OFF ROAD RALLY មានរថយន្តសរុប ២០ គ្រឿង និងទី៣.ការប្រណាំងម៉ូតូមានម៉ូតូសរុបចំនួន១២១គ្រឿង ដែលត្រូវបានបែងចែកជា៥ ក្រុម ក្នុងនោះ រួមមាន៖ CLASS A, CLASS B, CLASS C, CLASS VIP និង CLASS Kids។

លោកហោ សារុន រដ្ឋលេខាធិការក្រសួងទេសចរណ៍ បានថ្លែងអំណរគុណយ៉ាងជ្រាលជ្រៅ ចំពោះវត្តមានអញ្ជើញចូលរួមរបស់លោក លោកជំទាវ លោក លោកស្រី នាងកញ្ញាទាំងអស់ ជាពិសេសកីឡាករ កីឡាការិនី ដែលមក ពីប្រទេសកម្ពុជា ថៃ ឡាវ វៀតណាម កូរ៉េ និងបារាំង និងសូមថ្លែងអំណរគុណដល់រដ្ឋបាលខេត្តមណ្ឌលគីរី ក្លឹបរថយន្តគោព្រៃខេត្តមណ្ឌលគីរី សហព័ន្ធកីឡាយានយន្តកម្ពុជា ទីលានប្រណាំង១២ម៉ូតូផាក គណៈកម្មការ រៀបចំការប្រកួត កងកម្លាំងសន្តិសុខ ក្រុមការងារសុខាភិបាល និងភាគីពាក់ព័ន្ធទាំងអស់ដែលបានលះបង់ កម្លាំងកាយ កម្លាំងចិត្ត និងពេលវេលាចូលរួមរៀបចំព្រឹត្តិការណ៍ប្រកួតនេះប្រកបដោយជោគជ័យ។

“ព្រឹត្តិការណ៍ប្រណាំងយានយន្តសន្តិភាព ខេត្តមណ្ឌលគីរីឆ្នាំ២០២៣​” ដែលបានបញ្ចប់ការប្រកួត ប្រកបដោយជោគជ័យ នៅទីលានប្រកួត “១២ម៉ូទ័រផាក” ដែលជាទីលានលំដាប់ថ្នាក់អន្តរជាតិមួយ ដំបូងគេ បង្អស់នៅកម្ពុជាក្នុងខេត្តមណ្ឌលគីរី។

លោកហោ សារ៉ុនបានចាត់ទុកការប្រសិទ្ធនាម “ព្រឹត្តិការណ៍ប្រណាំងយានយន្តសន្តិភាពខេត្តមណ្ឌលគីរី ឆ្នាំ២០២៣” នេះ គឺជាការប្រសិទ្ធនាមដ៏ល្អមួយដែលឆ្លុះបញ្ចាំង ឲ្យឃើញពីការផ្តល់តម្លៃ និងការដឹងគុណចំពោះ “សន្តិភាព” ដែលជាម្លប់ដ៏ត្រឈឹងត្រឈៃ សម្រាប់យើងទាំងអស់គ្នា។ ម្លប់នៃសន្តិភាពដែលយើងកំពុងមាននាពេលបច្ចុប្បន្ននេះ បានកើតចេញពីការលះបង់ និងការដឹកនាំដ៏ត្រឹមត្រូវ ឈ្លាសវៃ ប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

លោកបញ្ជាក់ថា “វិស័យកីឡា ក៏មិនខុសពីវិស័យដទៃទៀតដែរ អាចមានការរីកចម្រើនឥតឈប់ឈរ លុះត្រាតែមាន”សន្តិភាព” ប្រៀបបីដូចជាពាក្យស្លោកកីឡាមួយឃ្លាថា “កីឡារស់ក្នុងសន្តិភាព”។

លោកបញ្ជាក់ថាវិស័យកីឡា និងវិស័យទេសចរណ៍ គឺជាវិស័យពីរដែលមានទំនាក់ទំនងគ្នា ជាក់ស្តែងព្រឹត្តិការណ៍ប្រណាំងយានយន្តសន្តិភាពខេត្តមណ្ឌលគីរីឆ្នាំ២០២៣នេះ នឹងចូលរួមផ្សព្វផ្សាយវិស័យ កីឡាទេសចរ​ណ៍ និងបង្ហាញពីគោលដៅទេសចរណ៍កម្ពុជា ជាគោលដៅទេសចរណ៍សុវត្ថិភាព ស្អាត និងបៃតង ជាពិសេស ខេត្តមណ្ឌលគិរីតែម្តង ដែលជាគោលដៅអេកូទេសចរណ៍ ប្រកបដោយភាពទាក់ទាញ ជាមួយធម្មជាតិដ៏ស្រស់បំព្រង និងអាកាសធាតុត្រជាក់ជាទីមនោរម្យ។ លើសពីនេះ ព្រឹត្តិ​កា​រណ៍ប្រកួតនេះ គឺជាភាពច្នៃប្រឌិតនៃការធ្វើពិពិធកម្ម កីឡាទេសចរណ៍ដែលជាផលិតផលទេសចរណ៍ដ៏ល្អ និងស័ក្តិសមបំផុតជាមួយខេត្តមណ្ឌលគីរី៕

  ដោយៈ វឌ្ឍនៈ

ភ្នំពេញៈ គម្រោងអគារភូមិកីឡដ្ឋានវើលដ៏ប្រ៊ីដ ឬហៅថាបុរីកីឡាដែ​លស្ថិតនៅពហុកីឡដ្ឋានជាតិមរតកតេជោ សម្រាប់ទទួលស្វាគមន៍កីឡាករកីឡាការិនី ក្នុងព្រឹត្តិការណ៍ប្រកួតកីឡាស៊ីហ្គេម បានបញ្ចប់គ្រោងអគារទាំង៦ និងគ្រោងពង្រីកការអភិវឌ្ឍការងារបន្តបន្ទាប់ទៀត។

អ្នកឧកញ៉ាសៀ ឬទ្ធីប្រធានក្រុមប្រឹក្សាភិបាល នៃក្រុមហ៊ុនវើលដ៏ប្រ៊ីដគ្រុប ដែលជាអ្នកអភិវឌ្ឍន៍គម្រោងដ៏ធំនេះបានឱ្យដឹងថា រហូតមកដល់ពេលនេះ យើងសម្រេចបានលទ្ធផលច្រើនហើយ និងអាចទាន់នឹងព្រឹត្តិ​កា​រណ៍ប្រកួតកីឡាស៊ីហ្គេម ដែលកម្ពុជាធ្វើជាម្ចាស់ផ្ទះក្នុងប្រវត្តិសាស្ត្រ។

អ្នកឧកញ៉ាបន្តថា ព្រឹត្តិការណ៍កីឡាអន្តរជាតិនេះ នឹងមកដល់កម្ពុជាក្នុងរយៈពេលប៉ុន្មានខែខាងមុខនេះហើយ។ដូច្នេះយើងត្រូវធ្វើយ៉ាងណាពន្លឿនការងារសាងសង់ ផ្នែកខាងក្នុងឱ្យបានរួចរាល់ តាមតែអាចធ្វើបាន ខណៈឆ្នាំនេះជាឆ្នាំដំបូងហើយ ដែលកម្ពុជាបានទទួលធ្វើជាម្ចាស់ផ្ទះ នៃព្រឹត្តិ​ការណ៍ប្រកួតកីឡាស៊ីហ្គេម។

អ្នកឧកញ៉ាបន្ថែមថា តាមពិតទៅការសាងសង់គម្រោងនានា អ្នកអភិ​វឌ្ឍន៍ចង់ឱ្យយឺត ឬឆាប់បានទៅតាមហិរញ្ញវត្ថុ តែសម្រាប់ក្រុមហ៊ុនមិនមានបញ្ហាហិរញ្ញវត្ថុទេ ហើយក្រុមហ៊ុនសាងសង់ ក៏បានខិតខំណាស់ដែរនៅក្នុងរយៈពេលចុងក្រោយនេះ ។

លោកសុទ្ធ សុធារ៉ា អ្នកគ្រប់គ្រងគម្រោងនេះបានឱ្យដឹងថា តាមពិតទៅការសាងសង់គម្រោងនេះគឺ បានយឺតយ៉ាវបន្តិចនៅពេលដំបូង ដោយសា​រតែពេលបុកគ្រឹះ គឺចំពេលដែលកម្ពុជា ទទួលរងនូវគ្រោះទឹកជំនន់ និងមានភ្លៀងធ្លាក់ស្ទើរតែពេញមួយឆ្នាំ ដែលធ្វើឱ្យការងារសាងសង់គ្រឹះ ក្រោមមានការលំបាកបន្តិច ប៉ុន្តែដល់ពេលសាងសងគ្រឹះខាងក្រោមហើយ ក្រុមហ៊ុនក៏បានបន្ថែមកម្មករ បុគ្គលិកពន្លឿនការងារឱ្យបានលឿន និងធ្វើការទាំងថ្ងៃទាំងយប់ ។

លោកបន្តថា “មួយរយៈពេលចុងក្រោយនេះ ក្រុមហ៊ុនសាងសង់បានប្រើប្រាស់កម្លាំងពលកម្ម កម្មករសុរបប្រមាណ៣០០០នាក់ ធ្វើការគ្រប់ផ្នែកដែលពាក់ព័ន្ធ ដើម្បីជំរុញឱ្យទាន់នូវព្រឹត្តិការណ៍ប្រកួតកីឡាស៊ីហ្គេម ហើយថ្នាក់ដឹកនាំក្រុមហ៊ុន ក៏បានយកចិត្តទុកដាក់បំផុត សម្រាប់ការងារសាងសង់នេះដែរ ។

ពាក់ព័ន្ធនឹងព្រឹត្តិការណ៍ស៊ីហ្គេមនេះដែរ រដ្ឋបាលរាជធានីភ្នំពេញក៏បា​ននិងកំពុងមមាញឹក ក្នុងការកែលម្អហេដ្ឋារចនាសម្ព័ន្ធផ្លូវនានា នៅជុំវិញរាជធានីភ្នំពេញ ជាពិសេសផ្លូវទៅកាន់ពហុកីឡដ្ឋានជាតិមរតកតេជោ ដូចជាផ្លូវជាតិលេខ៦អា ផ្លូវមហាវិថីឈ្នះឈ្នះ និងបានសាងសង់ផ្លូវថ្មីៗ ដើម្បីរំដោះការកកស្ទះចរាចរណ៍៕

  ដោយៈគង់ សូរិយា

       ភ្នំពេញៈ ជាទម្លាប់អាជីវករភាគច្រើន ពួកគេតែងតែដំឡើងថ្លៃមុខទំនិញសំខាន់ៗ សម្រាប់រៀបចំសែនព្រេន ក្នុងឱកាសចូលឆ្នាំប្រពៃណីជាតិចិន វៀតណាមដែលចូលមកដល់ចុងសប្តាហ៍នេះ។

ផ្កាអង្គារសីល មានហាងឆេងតែពេលបុណ្យចូលឆ្នាំចិន និងតែងតែរីកក្នុងពេលវេលានេះ តែងតែឡើងថ្លៃ ជ្រូកខ្វៃ និងទំនិញជាច្រើនទៀតទាំងចេក មាន់ ទា ជាដើមសុទ្ឋតែឡើងថ្លៃនៅគ្រប់ទីផ្សារទាំងអស់។

អាជីករលក់ដើមផ្កានៅខណ្ឌសែនសុខ ដោយគ្រាន់តែប្រាប់ថាឈ្មោះ មករាបានមានប្រសាសន៍ឲ្យដឹងនៅព្រឹកថ្ងៃទី១៨ ខែមករា ឆ្នាំ២០២៣នេះថា នៅឆ្នាំនេះការនាំចូលផ្កា ដើម្បីយកមកលក់រាយ មានតម្លៃខ្ពស់ជាងមុន មូលហេតុដោយសារភាគីបោះដុំបន្តប្រាប់ថា នៅឆ្នាំមុនខាតបង់ដើមទុនច្រើន និងខ្វះអ្នកដាំដុះជាដើម ដែលនាំឲ្យតម្លៃកើនខ្ពស់។

លោកបានបន្តថា ការតម្លើងថ្លៃនេះ សម្រាប់ដើមក្រូចភ្នំ កម្ពស់ប្រហែល១ម៉ែត្រ នាំចូលមានតម្លៃជិត៤០០ដុល្លារទៅហើយ។ ចំណែកឯដើមផ្កាអង្គារសីល៍ ក៏ត្រូវតម្លើងពីចំនួន១០ ទៅ២០ដុល្លារ សម្រាប់ដើមធំ និងល្អៗ។

ចំណែកអ្នកស្រី សុខ លាង អាជីវករលក់ដើមផ្កានៅបណ្តោយផ្លូវសហព័ន្ធរុស្ស៉ី បានលើកឡើងថា ឆ្នាំនេះត្បិតតែកូវីដ១៩ មានសភាពធូរស្រាល ប៉ុន្តែអ្នកស្រីបានសម្រេចចិត្ត កាត់បន្ថយការនាំចូលផ្កាស្បៃរឿង ជាងពាក់កណ្តាលបើធៀបឆ្នាំមុនៗ។

អ្នកស្រីបានឲ្យដឹងថា “ឆ្នាំមុនខ្ញុំកម្ម៉ងផ្កាស្បៃរឿងចំនួន៣,០០០ផើង ប៉ុន្តែឆ្នាំនេះខ្ញុំកម្ម៉ង់តែ១,០០០ផើងទេ”។

អាជីវករលក់ក្បែរៗគ្នា លើកឡើងស្រដៀងគ្នាថា ទោះបីជាស្ថានភាពកូវីដធូរស្រាលច្រើនជាងឆ្នាំមុនៗយ៉ាងណាក្តី ប៉ុន្តែពួកគាត់មិនហ៊ានរំពឹងទេថា អាចនឹងលក់ផ្កាដាច់ច្រើន ឬក៏អស់យ៉ាងណាទេ ដោយសារបច្ចុប្បន្នទីផ្សារប្រកួតប្រជែង ជាពិសេសអ្នកលក់កើនឡើង ពីមួយឆ្នាំទៅមួយឆ្នាំ និងគ្រប់ទីកន្លែង។

មុខទំនិញសំខាន់ៗ ត្រូវបានលក់ក្នុងតម្លៃដូចជា ប្រភេទផ្កាដង្គុំលក់ ក្នុងតម្លៃ៤ម៉ឺនរៀលក្នុង១ផើង។ ដើមរាសី ១២ ០០០រៀល ក្នុង១ដើមវែង, ដើមម្នាស់ ៤០ ០០០រៀល ក្នុង១ផើង, ផ្កាសេមាន់ ២០ ០០០រៀល ក្នុង១ផើង, ផ្កាស្បៃរឿង៨ពាន់រៀល សម្រាប់១ផើងតូច និងផើងធំតម្លៃ ១ម៉ឺនរៀល, ផ្កាអ័រគីដេ ២០ ០០០រៀល ក្នុង១ផើងជាដើម។

ពីមួយឆ្នាំទៅមួយ ប្រជាពលរដ្ឋខ្មែរសែស្រឡាយចិន ប្រជាជនចិន ក៏ដូចជាប្រជាជនខ្មែរកាត់វៀតណាម នៅក្នុងប្រទេសកម្ពុជានាំគ្នាប្រារព្ធបុណ្យចូលឆ្នាំចិន-វៀតណាមកាន់តែច្រើនឡើងៗ។

នៅឆ្នាំ២០២៣នេះ ថ្ងៃសែនកុងម៉ារបស់ជនជាតិចិន- វៀតណាម និងជនជាតិខ្មែរសែស្រឡាយចិន នឹងប្រព្រឹត្តទៅនៅថ្ងៃទី២១ ខែមករាខាងមុខនេះ៕