ដោយ៖ វឌ្ឍនៈ

ភ្នំពេញ ៖ គម្រោងលើកកម្ពស់គុណភាពផ្លូវជាតិលេខ៧ ពីស្គន់ទៅក្រុងកំពង់ចាម គ្រោងនឹងបើកការដ្ឋានសាងសង់នៅដើមខែមករា ឆ្នាំ២០២៣ខាងមុខនេះ។ គម្រោងផ្លូវជាតិមួយខ្សែនេះនឹងជំរុញឱ្យស្ថានភាពទីផ្សារអចលនទ្រព្យនៅខេត្តកំពង់ចាមមានសកម្មភាពកើនឡើងវិញ ខណៈបច្ចុប្បន្នទីផ្សារអចលនទ្រព្យនៅខេត្តមួយនេះនៅមានភាពមិនច្បាស់នៅឡើយ។

យោងតាមក្រសួងសាធារណការ និងដឹកជញ្ជូន នៅព្រឹកថ្ងៃទី១២ ខែធ្នូ ឆ្នាំ២០២២នេះឱ្យដឹងថាគម្រោងលើកកម្ពស់គុណភាពផ្លូវជាតិលេខ៧ នឹងបើកការដ្ឋានសាងសង់ ដំណាលគ្នានឹងស្ពានឆ្លងទន្លេមេគង្គ-ខេត្តក្រចេះ នៅដើមខែមករា ឆ្នាំ២០២៣ខាងមុខនេះ ក្រោមអធិបតីភាពសម្ដេចតេជោ ហ៊ុន សែននាយករដ្ឋមន្ត្រីនៃកម្ពុជា។

លោក ថេន សុថុល ប្រធានសាខានៃ ក្រុមហ៊ុន KW ប្រចាំខេត្តកំពង់ចាម បានមានប្រសាសន៍នៅថ្ងៃទី១២ ខែធ្នូនេះថា គម្រោងសាងសង់ផ្លូវភ្លោះលេខ៧ ពីស្គន់ ទៅក្រុងកំពង់ចាមនេះ គឺជាគម្រោងមួយដែលទាក់ទាញវិនិយោគិនជាតិ និងអន្តរជាតិ មកកាន់ទឹកដីខេត្តកំពង់ចាមបន្ថែមទៀត។ គម្រោងនេះអាចធ្វើឱ្យការវិនិយោគនៅក្នុងខេត្តកំពង់ចាមមានសន្ទុះកំណើនឡើងវិញ ស្របពេលបច្ចុប្បន្ននេះទីផ្សារអចលនទ្រព្យនៅក្នុងខេត្តមួយនេះនៅមានសភាពទ្រឹងនៅឡើយ។

លោកបង្ហាញក្តីរំពឹងថា “ក្រោយគម្រោងផ្លូវជាតិមួយនេះបើកការដ្ឋានសាងសង់ជាផ្លូវការ ទីផ្សារនិងការស្វែងរកការវិនិយោគពីសំណាក់វិនិយោគិននឹងកាន់មានតែច្រើន ជាពិសេស នៅតាមបណ្ដោយផ្លូវជាតិលេខ៧ ពីស្គន់ទៅក្រុងកំពង់ចាម។ នៅពេលនេះ ក៏មានគម្រោងឯកជនមួយចំនួន ដែលបាន និងកំពុងត្រៀមវិនិយោគ និងអភិវឌ្ឍ ដូចជា គម្រោងសាងសង់ផ្ទះល្វែង ដីឡូតិ៍ និងរោងចក្រឧស្សាហកម្ម ជាដើម”។

លោកសុថុលបានបន្ថែមថា “យើងទទួលស្គាល់ថា បច្ចុប្បន្ននេះ ស្ថានភាពទីផ្សារ និងហាងឆេងអចលនទ្រព្យ មិនថាតែនៅកំពង់ចាម ឬក៏នៅបណ្ដាខេត្តផ្សេងទេ គឺសុទ្ធតែជួបបញ្ហា ប៉ុន្តែសម្រាប់កំពង់ចាម គឺមានគម្រោងអភិវឌ្ឍន៍ ខ្លះគាំង ខ្លះក៏នៅតែមានសកម្មភាពដំណើរការ គឺមិនមែនជាទូទៅទាំងអស់ទេ ដោយក្រុមហ៊ុនតែប៉ុណ្ណោះ”។

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថា គម្រោងផ្លូវជាតិលេខ៧នឹងត្រូវចំណាយថវិកាប្រមាណជាង១០០លានដុល្លារ ដើម្បីសាងសង់លើកកម្ពស់គុណភាពផ្លូវមួយខ្សែ ដែលជាហិរញ្ញប្បទានសម្បទានរបស់រដ្ឋាភិបាលនៃសាធារណរដ្ឋប្រជាមានិតចិន៕

ដោយ៖ សុផារី

កំពត៖ អំណោយផលពីធម្មជាតិ បូកផ្សំនឹងទីតាំងនៅជិតរាជធានីភ្នំពេញ បានជំរុញឱ្យទីផ្សារទិញលក់អចលនទ្រព្យប្រភេទដីធ្លីលំហែរនៅក្នុងខេត្តកំពត នៅបន្តមានភាពមមាញឹក និងមិនសូវជារងផលប៉ះពាល់ច្រើនដូចទីផ្សារដ៏ទៃទៀតឡើយ។ នៅក្នុងឆ្នាំ២០២៣ខាងមុខនេះ អ្នកជំនាញនៅក្នុងមូលដ្ឋាននៅបន្តមានសុទិដ្ឋិនិយមចំពោះទីផ្សារដីធ្លីលំហែរក្នុងខេត្តជាប់មាត់សមុទ្រមួយនេះ។

លោក សុខ គែន អគ្គនាយកក្រុមហ៊ុនអចលនទ្រព្យ Kompot Street Real Estate បានមានប្រសាសន៍ប្រាប់ Property Area Asia នៅព្រឹកថ្ងៃទី១២ ខែធ្នូនេះថា ទំនោរនៃការលក់ទិញដីធ្លីនៅក្នុងខេត្តជាប់ឆ្នេរមួយនេះនៅតែបន្តមានជាហូរហែ។ សម្រាប់ការលក់ទិញកន្លងមក មិនមានភាពខុសពីឆ្នាំកន្លងមកឡើងពោលគឺ នៅបន្តអាចលក់បានជាហូរហែរ ដោយសារខេត្តកំពតជាខេត្តអំណោយផលលើទីផ្សារទេសចរណ៍ស្រាប់ ព្រោះមានដីជាប់មាត់សមុទ្រ ជាប់ព្រែក ហើយមានទីតាំងនៅជិតភ្នំពេញផងដែរ។

លោកមានប្រសាសន៍ថា “ក្នុងចំណោមនោះ ប្រភេទដីដែលមានតម្រូវការខ្ពស់ភាគច្រើន គឺជាប្រភេទដីលំហែរកាយ សម្រាប់ធ្វើជាផ្ទះទី២ ដោយសារក្រុមអតិថិជនមកពីរាជធានីភ្នំពេញ និងខេត្តផ្សេង បានបន្តស្វែងរកផ្ទះលំហែរសម្រាប់ការកំសាន្តចុងសប្តាហ៍ជាដើម”។

អ្នកជំនាញរូបនេះបានបន្តថា “ស្របពេលដែលសេដ្ឋកិច្ចមានការធ្លាក់ចុះបន្តិច តម្លៃដីធ្លីនៅខេត្តកំពតជាទូទៅបានធ្លាក់ចុះបន្តិចដែរ។ ខ្ញុំយល់ថា នេះជាឱកាសសម្រាប់អ្នកចង់ស្វែងរកទិញដីធ្លីនៅទីនេះ ដោយសារទីផ្សារលំហែរនៅរក្សាបានទីផ្សារមួយល្អជានិច្ច”។

យោងតាមលោក សុខ គែន នៅក្នុងឆ្នាំ២០២៣ខាងមុខនេះ ទីផ្សារដីធ្លីនៅក្នុងខេត្តកំពត ដែលអាចកែច្នៃជាប្រភេទអចលនទ្រព្យលំហែរបាន ដូចជា រីសត បឹងកាឡូ តំបន់អេកូទេសចរណ៍ និងតំបន់កសិទេសចរណ៍ នៅតែបង្ហាញភាពល្អប្រសើរច្រើន ព្រោះខេត្តនេះមានទីតាំងនៅជិតភ្នំពេញ មានសក្តានុពលគ្រប់គ្រាន់ បូកផ្សំនឹងការបញ្ចប់ការសាងសង់ និងការជិតបើកដំណើរការកំពង់ផែកំពត ដែលនឹងទាក់ទាញបាននូវទេសចរអន្តរជាតិមកពីបណ្តាប្រទេសជិតខាងផងដែរ។

ជាមួយគ្នានេះ លោក កែវ សុជាតិ ប្រធានក្រុមហ៊ុនអចលនទ្រព្យ KW ប្រចាំខេត្តកំពត បានមានប្រសាសន៍ប្រាប់ Property Area  Asia កាលពីសប្តាហ៍មុនថា ដោយសារតែអំណោយផលពីធម្មជាតិ បូកផ្សំនឹងទីតាំងនៅជិតរាជធានីភ្នំពេញ ទីផ្សារទេសចរណ៍កំពតនៅបន្តមានភាពល្អប្រសើរជាងគេក្នុងចំណោមទីផ្សារដ៏ទៃ។ មួយរយៈចុងក្រោយនេះ ថ្នាក់ដឹកនាំរដ្ឋបាលខេត្តក៏មានការយកចិត្តទុកដាក់ពង្រីកទីតាំងសម្រាប់ការលំហែរបន្ថែម ដើម្បីទាក់ទាញទេសចរជាតិ និងអន្តរជាតិមកកាន់ខេត្តកំពតបន្ថែមទៀត។

លោកបញ្ជាក់ទៀតថា តំបន់ដែលមានការពេញនិយមក្នុងស្វែងរកការទិញលក់ ក្នុងកំឡុងចុងឆ្នាំ២០២២នេះ ភាគច្រើនជាតំបន់ដែលមានទីតាំងនៅជាប់នឹងមាត់សមុទ្រ ព្រែក បឹង និងតំបន់ភ្នំ ហើយតម្លៃដីនៅក្នុងតំបន់ទាំងនោះក៏មិនមានការធ្លាក់ចុះថ្លៃដែរ៕

ដោយ: លាងហួរ

ភ្នំពេញ: យោងតាមរបាយការណ៍របស់អគ្គនាយកដ្ឋានគយ និងរដ្ឋាករបានបង្ហាញឱ្យដឹងនៅថ្ងៃច័ន្ទនេះថា ប្រទេសកម្ពុជាបាននាំចេញផលិតផ​លសរុប មានតម្លៃទឹកប្រាក់២០,៤ពាន់លានដុល្លារអាមេរិក ក្នុងរយៈពេល១១ខែដំបូងនៃឆ្នាំ២០២២នេះ។

តួលេខខាងលើនេះ បានកើនឡើង១៨ភាគរយ ពី១៧,៣ពាន់លានដុល្លារក្នុងរយៈពេលដូចគ្នាកាលពីឆ្នាំមុន។

របាយ​ការណ៍​ដដែលបាន​បន្ត​ថា ផលិតផល​​នាំ​ចេញ​សំខាន់​ៗរបស់កម្ពុជា រួម​មាន​ សម្លៀក​បំពាក់ ស្បែកជើង ផលិតផលធ្វើ​ដំណើរ កង់ និង​ទំនិញ​កសិកម្ម​មួយ​ចំនួន​ដូច​ជា អង្ករ កៅស៊ូ ដំឡូងមី ចេក និង​ស្វាយ។

របាយ​ការណ៍​ដដែលបាន​បន្ថែម​ថា ទិសដៅ​នាំ​ចេញ​កំពូល​ទាំង​៥សម្រាប់​កម្ពុជា​ ក្នុង​អំឡុង​ខែ​មករា​ ដល់​ខែ​វិច្ឆិកា​ឆ្នាំ​២០២២នេះ​ គឺ​សហរដ្ឋ​អាមេរិក វៀតណាម ចិន អាល្លឺម៉ង់ និង​ប្រទេសជប៉ុន។

ជាមួយគ្នានេះដែរ កម្ពុជាបានកត់ត្រាទំហំ នៃការនាំចូលសរុបចំនួន២៧,៧ពាន់លានដុល្លារ  ពោលគឺកើនឡើង៩ភាគរយ ពី២៥,៤ពាន់លានដុល្លារក្នុងរយៈពេលដូចគ្នាកាលពីឆ្នាំមុន  ដោយទំនិញនាំចូលសំខាន់ៗរួមមានប្រេង ឧស្ម័ន វត្ថុធាតុដើមសម្រាប់ផលិតសម្លៀកបំពាក់ ស្បែកជើង ទំនិ​ញធ្វើដំណើរ យានជំនិះ គ្រឿងយន្ត គ្រឿងអេឡិចត្រូនិច និងផលិតផលប្រើប្រាស់ផ្សេងៗ។

អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា លោក ប៉ែន សុវិជាតិ បានមានប្រសាសន៍ថា កិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA)  ដែលបានចូលជាធរមានកាលពីដើមឆ្នាំនេះ គឺជាកត្តាចូលរួមចំណែក ក្នុងការជំរុញការនាំចេញរបស់ប្រទេសកម្ពុជា។

លោកបានបញ្ជាក់ប្រាប់សារពត៌មានចិន Xinhua ថា កំណើននៃការនាំចេញរបស់យើង គឺជាសក្ខីភាពមួយចំពោះ ការចូលទៅកាន់ទីផ្សារកាន់តែធំ នៃផលិតផល របស់យើងទៅកាន់ប្រទេសជាសមាជិកRCEP រួមទាំងប្រទេសចិនក្រោមពន្ធអនុគ្រោះ៕

ដោយៈ គង់ សូរិយា

       ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជា នឹងជួបជាមួយប្រធានាធិបតីបារាំងនៅក្នុងសប្តាហ៍នេះ ក្នុងដំណើរបំពេញទស្សនកិច្ចនៅអឺរ៉ុប។

យោងតាមសេចក្តីថ្លែងការណ៍ក្រសួងការបរទេស និងសហប្រតិបត្តិការអន្តរជាតិបានឲ្យដឹងថា មុនពេលកិច្ចប្រជុំកំពូល រំលឹកខួបអនុស្សាវរីយ៍អាស៊ាន-សហភាពអឺរ៉ុប សម្តេចហ៊ុន សែន នឹងបំពេញទស្សនកិច្ចការងារ នៅប្រទេសបារាំង ដែលនឹងជួបជាមួយប្រធានាធិបតីបារាំង លោក Emmanuel Macron៕

ដោយៈសុផារី

ភ្នំពេញៈ ឥណទានជាប្រភពទុនយ៉ាងសំខាន់ ក្នុងការគាំទ្រដល់សកម្ម​ភាពសេដ្ឋកិច្ច និងបានបែងចែកទៅតាមប្រភេទជំនួញសំខាន់ៗ ក្នុងវិស័យសេដ្ឋកិច្ច រួមមាន វិស័យសំណង់ ការជួញដូរដុំនិងរាយ សេវាកម្ម កសិកម្ម អង្គភាពគ្រួសារ និងកម្មន្តសាលជាដើម។

យោងតាមរបាយការណ៍ចុងក្រោយបង្អស់ របស់ធនាគារជាតិនៃកម្ពុជា ចេញផ្សាយនៅថ្ងៃទី១១ ខែធ្នូ ឆ្នាំ២០២២នេះ បានឱ្យដឹងថា គិតត្រឹមចុងត្រីមាសទី២ ឆ្នាំ២០២២ គ្រឹះស្ថានធនាគារ និងហិរញ្ញវត្ថុបានផ្តល់ឥណទានដល់វិស័យឯកជន សរុប២១៦ពាន់ពាន់លានរៀល (ប្រហែល៥៣,១ពាន់លានដុល្លារអាមេរិក)។

ទំហំឥណទានដល់វិស័យឯកជននេះ បានកើនឡើងចំនួន២៣,៦% ធៀបនឹងចុងត្រីមាសទី២ ឆ្នាំ២០២១។ ក្នុងនោះ ឥណទានតាមវិស័យសេដ្ឋកិច្ច ទីផ្សារសំណង់ ដែលរាប់បញ្ចូលទាំងសំណង់ អចលនទ្រព្យ និងការទិញផ្ទះជាកម្មសិទ្ធផ្ទាល់ខ្លួន ស្រូបបានឥណទានច្រើនជាងគេ ក្នុងទំហំជាង៥៨,៤ពាន់ពាន់លានរៀល (ប្រហែល១៤,១២ពាន់លានដុល្លារអាមេរិក) កើនឡើងចំនួន៣០% ធៀបនឹងរយៈពេលដូចគ្នាក្នុងឆ្នាំ២០២១។

តាមពីក្រោយដោយទីផ្សារជួញដូរដុំ និងរាយមានទំហំឥណទានចំនួន៥៣,៥ពាន់ពាន់លានរៀល កើនឡើងចំនួន២៥,៦% ទីផ្សារសេវាកម្មមានទំហំឥណទាន២១,៣ពាន់ពាន់លានរៀល កើនឡើងចំនួន១៤,៥% ទីផ្សារកសិកម្ម មានចំនួន២០,៣ពាន់ពាន់លានរៀល កើនឡើងចំនួន២៤,៦% ធៀបនឹងរយៈពេលដូចគ្នាក្នុងឆ្នាំ២០២១។

ដោយឡែកអង្គភាពគ្រួសារ ទទួលបានឥណទានក្នុងទំហំជាង១១,៧ពាន់ពាន់លានរៀល កើនឡើងចំនួន១២,១% កម្មន្តសាលទទួលបានឥណទានទំហំជាង៧,២ពាន់ពាន់លានរៀល កើនឡើងចំនួន២៤,៣% ហើយផ្សេងៗទៀត មានទំហំចំនួន៤៣,៦ពាន់ពាន់លានរៀល កើនឡើងចំនួន២០,៧%៕

ដោយៈ សុផារី

ភ្នំពេញ: រដ្ឋាភិបាលកម្ពុជាបានដាក់ផែនការ ក្នុងការជំរុញប្រទេសកម្ពុជា ឲ្យក្លាយជាប្រទេសដែលមានចំណូល មធ្យមកម្រិតខ្ពស់នៅឆ្នាំ២០៣០ តាមរយៈច្បាប់វិនិយោគថ្មី និងកំណើនសេដ្ឋកិច្ច ដែលត្រូវបានព្យាករណ៍ថាមានលក្ខណៈល្អប្រសើរ បូកផ្សំនឹងការកើនឡើង នៃចំនួនបុគ្គលដែលមានទ្រព្យច្រើនផងដែរ។

យោងតាមរបាយការណ៍ចុងក្រោយបង្អស់ របស់គេហទំព័រអន្តរជាតិដ៏ល្បីល្បាញមួយគឺ Capgemini បានបង្ហាញថា ក្នុងឆ្នាំ២០២១ ប្រទេសកម្ពុជា គឺជាទីតាំងប្រមូលផ្តុំរបស់សេដ្ឋីជាងបីពាន់នាក់ ដែលនេះជាហេតុផលសំខាន់ នាំឲ្យមានការចាប់អារម្មណ៍ ក្នុងការពង្រីកការលក់រាយ និង franchise ប្រណីត ដើម្បីចាប់យកចំណែកទីផ្សារដ៏មានសក្ដានុពលនេះ។

របាយការណ៍ដដែលនេះបង្ហាញថា “អាជីវកម្មអាហារ និងភេសជ្ជៈ និងម៉ូដសំលៀកបំពាក់ នៅតែជាចំណែកទីផ្សារលេចធ្លោ ក្នុងការពង្រីកទីផ្សារលក់រាយប្រណីតរបស់កម្ពុជា”។

ជាក់ស្តែង គម្រោង Naga៣ បាននិងកំពុងបន្តការអភិវឌ្ឍ ដោយភ្ជាប់ទៅកាន់ផ្សារទំនើបប្រណីតជាន់ក្រោមដី និងផ្សារលក់រាយបែបduty free នៃអាគារណាហ្គាវើលដ៍ និងណាហ្គាវើល២ ដែលបានបង្ហាញពីការពង្រីកខ្លួនរបស់ផ្សារលក់រយប្រណីត ដែលផ្តល់ជូននូវជម្រើសម៉ាកយីហោ លំដាប់ថ្នាក់កណ្តាល និងប្រណីតជាច្រើន។

បន្ថែមលើសនេះ ក្រុមហ៊ុន Confluences ក៏បានប្រកាសកាលពីពេលថ្មីៗនេះថា ខ្លួនបានសហការជាមួយក្រុមហ៊ុន លក់រាយប្រណីត Bluebell និងក្រុមហ៊ុនប្រឹក្សា CGHP Beespoke ដើម្បីបើកដំណើរការទីផ្សារប្រណីតបារាំង ដំបូងគេក្នុងត្រីមាសទី១ នៃឆ្នាំ២០២៣ នៅក្នុងអាគារ The Peak ដែលជាផ្សារទំនើបមានទំហំជាង12.000ម៉ែត្រការ៉េផងដែរ៕

ដោយ: លាងហួរ

ប៉េកាំង: ប្រទេសចិនគ្រោងបោះផ្សាយមូលបត្រ បំណុលរតនាគារពិ សេស  ដែលមានតម្លៃ៧៥០ពាន់លានយ័ន (១០៧,៩៣ពាន់លានដុល្លារ)នៅថ្ងៃទី១២ ខែធ្នូខាងមុខ ដើម្បីជំរុញដល់វិស័យសេដ្ឋកិច្ច។

ក្រុមអ្នកសង្កេតការណ៍បានលើកឡើងថា ការបោះផ្សាយមូលបត្របំណុលដ៏កម្រនេះជាធម្មតា បម្រើតម្រូវការហិរញ្ញប្បទាន សម្រាប់គម្រោងជាតិសំខាន់ៗ ជាក់លាក់ក្នុងគ្រាមានអាសន្ន  និងបង្ហាញពីសញ្ញាគោលនយោបាយដ៏សំខាន់  និងការប្តេជ្ញាចិត្តពីសំណាក់រដ្ឋាភិបាលកណ្តាល ។

ការបោះផ្សាយមូលបត្រនេះ មានគោលបំណង  ក្នុងការប្រមូលមូលនិធិសម្រាប់ការអភិវឌ្ឍសេដ្ឋកិច្ចជាតិ  និងកិច្ចការសង្គម។ នេះបើយោងតាមសេចក្តីថ្លែងការណ៍ នៅលើគេហទំព័រផ្លូវការរបស់ក្រសួងហិរញ្ញវត្ថុចិន។

លោក Dong Dengxin នាយកវិទ្យាស្ថានហិរញ្ញវត្ថុ និងមូលបត្រនៃសាកលវិទ្យាល័យWuhan University of Science and Technology បានអះអាងប្រាប់ កាសែតGlobal Timesថា ការបោះផ្សាយមូលបត្របំណុលនេះ ធ្វើឡើងនៅពេលដ៏ពិសេសមួយ ខណៈប្រទេសចិនកំពុងបង្កើនល្បឿននៃការចាប់ផ្តើមសេដ្ឋកិច្ចឡើងវិញ  ហើយទីផ្សារក៏ត្រូវការការជំរុញបន្ថែមទៀត។

លោក Dong បានកត់សម្គាល់ថា  ប័ណ្ណរតនាគារពិសេស គឺជា“ថវិកាពិសេស” ដែលមិនត្រូវបានរាប់បញ្ចូល ក្នុងការគណនាឱនភាព  ប៉ុន្តែប័ណ្ណរតនាគារនេះ ត្រូវបានផ្តល់ជូនសម្រាប់គម្រោងសំខាន់ៗ ជាក់លាក់នៅពេលពិសេស  ដើម្បីដោះស្រាយបញ្ហាហិរញ្ញវត្ថុ ឬការធ្វើកំណែទម្រង់សំខាន់ៗ៕