ដោយៈ គង់ សូរិយា

       ភ្នំពេញៈ បន្ទាប់ពីអញ្ជើញដល់ប្រទេសបារាំង សម្តេចតេជោហ៊ុន សែននាយករដ្ឋមន្រ្តីនៃកម្ពុជា នឹងអញ្ជើញចូលរួមកម្មវិធីសំខាន់ៗៗចំនួន២ ដែលនឹងលើកកំពស់កិត្យានុភាពរបស់កម្ពុជា។

យោងតាមបណ្តាញទំនាក់ទំនងសង្គមរបស់សម្តេចតេជោបានបញ្ជាក់ឲ្យដឹងនាព្រឹកថ្ងៃទី១៣ ធ្នូនេះថា នៅយប់រំលងអាធ្រាត ម៉ោង ១.៤៥នាទី ម៉ោងនៅទីក្រុងប៉ារីស បារាំង ត្រូវនឹងម៉ោង ៧.៤៥នាទាទីព្រឹក ម៉ោងនៅរាជធានីភ្នំពេញ  ថ្ងៃទី១៣ ខែធ្នូ ឆ្នាំ២០២២ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបន្តដឹកនាំគណៈប្រតិភូតាមជើងយន្តហោះពិសេស ទៅដល់ អាកាសយានដ្ឋានអន្តរជាតិ Paris Charles de Gaulle ទីក្រុងប៉ារីស បន្ទាប់ពីសម្ដេចតេជោ បានអញ្ជើញសំណេះសំណាលជាមួយ បងប្អូនសហគមន៍ខ្មែរ នៅក្នុងទីក្រុងព្រុចស៊ែល ប្រទេសប៊ែលហ្ស៉ិករួចមក។

ការអញ្ជើញដល់របស់សម្ដេចតេជោ នាយករដ្ឋមន្ត្រី និងគណៈប្រតិភូ គឺត្រូវបានទទួលស្វាគមន៍យ៉ាងកក់ក្ដៅ ពីមន្ត្រីជាន់ខ្ពស់របស់បារាំង និងមន្ត្រីការទូតកម្ពុជា ប្រចាំនៅបារាំងជាច្រើនរូប។

តាមកម្មវិធីគ្រោងទុក ក្នុងពេលបំពេញទស្សនកិច្ចនៅក្នុងប្រទេសបារាំង សម្ដេចតេជោ ក៏នឹងអញ្ជើញចូលរួមសន្និសីទគាំទ្រភាពធន់ នៃប្រជាជនអ៊ុយក្រែន កិច្ចប្រជុំក្រុមប្រឹក្សាសហគ្រាសកម្ពុជា-បារាំង និងពិធីលៀងសាយភោជន៍ ជូនសម្ដេចតេជោ និងគណប្រតិភូ ដែលរៀបចំឡើងដោយប្រធានាធិបតីបារាំង៕

ដោយៈ សុខុម

ក្រុងឡុងដ៍: បណ្តាប្រទេសជាសមាជិកសហគមន៍អឺរ៉ុប មានការផ្គត់ផ្គង់ថាមពលដែលខ្លួនត្រូវការ សម្រាប់ឆ្លងផុតឆ្នាំនេះ ប៉ុន្តែនៅឆ្នាំ២០២៣ វិបត្តិថាមពលនឹងកាន់តែធ្ងន់ធ្ងរគួរឱ្យព្រួយបារម្ភ។

នេះជាការព្រមានរបស់ប្រធានទីភ្នាក់ងារថាមពលអន្តរជាតិ (IEA) លោក Fatih Birol និងប្រធានគណៈកម្មាធិការអឺរ៉ុប លោកស្រី Ursula von der Leyen ដែលកាលពីថ្ងៃច័ន្ទ ទី១២ ខែធ្នូ បានធ្វើសន្និសីទសារព័ត៌មានរួមគ្នាមួយ ដើម្បីបង្ហាញពីទំហំនៃបញ្ហាប្រឈមនេះ។

របាយការណ៍ថ្មីមួយពីទីភ្នាក់ងារ IEA បានរកឃើញថា អឺរ៉ុបអាចប្រឈមនឹងកង្វះខាតឧស្ម័នធម្មជាតិ ចំនួន២៧ពាន់លានម៉ែត្រគូប ក្នុងឆ្នាំ២០២៣។ នោះគឺស្មើនឹងជិត៧% នៃតម្រូវការប្រើប្រាស់ប្រចាំឆ្នាំក្នុងតំបន់អឺរ៉ុប។

មានហានិភ័យចំនួន៣ ដែលអាចនាំទៅរកការខ្វះខាតថាមពល។ ប្រទេសរុស្ស៊ី ដែលបានបញ្ជូនឧស្ម័នប្រមាណ៦០ពាន់លានម៉ែត្រគូប ទៅសហភាពអឺរ៉ុប ក្នុងឆ្នាំ២០២២ ទាំងមូលអាចនឹងកាត់ផ្ដាច់ការផ្គត់ផ្គង់ទាំង​ស្រុងនៅឆ្នាំ២០២៣។

ពេលនេះអាកាសធាតុដ៏សែនត្រជាក់ កំពុងវាយលុកអឺរ៉ុបខាងជើង រួចទៅហើយ ហើយទីផ្សារឧស្ម័នធម្មជាតិ អាចនឹងរងការរង្គោះរង្គើ ប្រសិនបើសេដ្ឋកិច្ចរបស់ប្រទេសចិន មានសន្ទុះកើនឡើងជាថ្មីម្ដងទៀត ខណៈការរឹតបន្តឹងកូវីដ-១៩ ត្រូវបានដកចេញវិញ។

ប្រធានទីភ្នាក់ងារថាមពលអន្តរជាតិ (IEA) លោក Fatih Birol គូសបញ្ជាក់ថា “យើងអាចនឹងមានបញ្ហា”។

នៅក្នុងការវាយតម្លៃរបស់ខ្លួន ទីភ្នាក់ងារ IEA បានរកឃើញថា អាចនឹងមានគម្លាត នៃការផ្គត់ផ្គង់៥៧ពាន់លានម៉ែត្រគូប នៅឆ្នាំក្រោយ៕ CNN៕

ដោយៈ សុខុម

ភ្នំពេញ: ផ្ទះលម្ហែបែបជំរំព្រៃភ្នំដ៏ប្រណីតមួយ ដែលមានឈ្មោះថា Shinta Mani Wild នៅក្នុងប្រទេសកម្ពុជា បានជាប់ឈ្មោះជាសណ្ឋាគារថ្លៃបំផុតប្រចាំតំបន់អាស៊ីអាគ្នេយ៍គួរឱ្យភ្ញាក់ផ្អើល។ នេះបើយោងតាមការស្ទង់មតិថ្មីមួយដែលធ្វើឡើង ដោយគេហទំព័រទេសចរណ៍ដ៏ល្បីល្បាញ TravelMag.com។

សារព័ត៌មានឡាវ Laotian Times បានចុះផ្សាយកាលពីថ្ងៃច័ន្ទ ទី១២ ខែធ្នូ ថា ការស្ទង់មតិនេះត្រូវបានធ្វើដោយប្រៀបធៀប ទៅនឹងអត្រាតម្លៃនៅគ្រប់សណ្ឋាគារទាំងអស់ក្នុងតំបន់។

ផ្ទះលម្ហែបែបជំរំតង់ដ៏ប្រណីតនេះ សម្ងំលាក់ខ្លួននៅកណ្ដាលព្រៃព្រឹក្សា បង្អួតសម្រស់ធម្មជាតិដ៏ស្រស់ត្រកាល គួរឱ្យគយគន់ជាពន់ពេក និងខ្យល់អាកាសដ៏បរិសុទ្ធ នៃឧទ្យានជាតិគិរីរម្យ ដែលមានចម្ងាយជាង១០០គីឡូម៉ែត្រពីរាជធានីភ្នំពេញ។

ដោយសារតែមានលក្ខណៈពិសេសបែបនេះ ទើបវាមានតម្លៃ១យប់រហូតដល់ទៅ២.៤២៥ដុល្លារអាមេរិក ឯណោះក្នុង១បន្ទប់។  នេះបើយោងតាមការស្ទង់មតិខាងលើនេះ។

យោងតាមសារព័ត៌មានសិង្ហបុរី CNA ដែលចុះផ្សាយនៅថ្ងៃព្រហស្បតិ៍ ទី១៤ ខែកក្កដា កន្លងទៅឱ្យដឹងថា ផ្ទះលម្ហែបែបជំរំធម្មជាតិ Shinta Mani Wild បានជាប់ឈ្មោះ ក្នុងចំណោមផ្ទះលម្ហែដ៏ប្រណីតបំផុតទាំង៨នៅអាស៊ី។

សារព័ត៌មានក្នុងស្រុកមួយចុះផ្សាយថា ផ្ទះស្នាក់លម្ហែប្រកបដោយផាសុកភាពខ្ពស់ បែបធម្មជាតិពិតៗនេះនៅមាន១៥បន្ទប់ ពោលគឺ១៥ផ្ទះដាច់ដោយឡែកពីគ្នា ដែលមានកម្ពស់ខ្ពស់ជាងទឹករលក និងទឹកជ្រោះ អាចផ្តល់នូវទេសភាព និងបទពិសោធន៍ខុសប្លែក ពីរមណីយដ្ឋានឯទៀតនៅអាស៊ី។

អ្វីដែលកាន់តែពិសេសទៀតនោះ គឺថែមទាំងមានខ្សែរ៉តប្រវែង៤០០ម៉ែត្រ ដែលភ្ញៀវទេសចរអាចជិះឆ្លងស្ទឹង និងគយគន់សម្រស់ធម្មជាតិជុំវិញទីនោះយ៉ាងអស្ចារ្យថែមទៀតផង៕ Laotian Times៕

ដោយ: លាងហួរ

ប៉េកាំង: យោងតាមគេហទំព័រទេសចរណ៍ KAYAK  ដែលជាកម្មសិទ្ធិរបស់ក្រុមហ៊ុន Booking Holdings Inc បានរាយការណ៍ថា តម្រូវការស្វែងរកសណ្ឋាគារ ក្នុងស្រុកនៅប្រទេសចិន បានកើនឡើងកាលពីសប្តាហ៍មុន បន្ទាប់ពីប្រទេសនេះបានបន្ធូរបន្ថយ ការរឹតបន្តឹងវិធានការកូវីដសូន្យ របស់ខ្លួន។

KAYAK បានរាយការណ៍មកថា ការស្វែងរកសណ្ឋាគារបានកើនឡើងលើសពី១០០ភាគរយ  នៅក្នុងរយៈពេលពីរថ្ងៃចុងក្រោយនេះ បើប្រៀបធៀបទៅនឹងឆ្នាំមុន និងកើនជាង៥០ភាគរយ បើប្រៀបធៀបទៅនឹងឆ្នាំ២០១៩ ។

នាយកប្រតិបត្តិគេហទំព័រ KAYAK លោក Steve Hafner បានឱ្យដឹងនៅក្នុងសេចក្តីថ្លែងការណ៍មួយថា “ខ្ញុំរំពឹងថាទីផ្សារធ្វើដំណើររបស់ប្រទេសចិន នឹងបើកឡើងវិញយ៉ាងពេញលេញ”។

ប្រទេសមហាអំណាចសេដ្ឋកិច្ចទី២ របស់ពិភពលោកមួយនេះ បានប្រកាសធ្វើការផ្លាស់ប្តូរយ៉ាងខ្លាំង ចំពោះវិធានការសូន្យកូវីដ ដ៏ម៉ឺងម៉ាត់របស់ខ្លួន ចាប់តាំងពីជំងឺកូវីដ បានរីករាលដាលកាលពី៣ឆ្នាំមុន ។

ចំណែក ការស្រាវជ្រាវស្វែងរកនៅលើវេទិកា ធ្វើដំណើរផ្សេងទៀតដូចជា Trip.com  ក៏បានកើនឡើងផងដែរកាលពីសប្តាហ៍មុន ខណៈដែលសាធារណជនបានអបអរសាទរ ចំពោះការបន្ធូរបន្ថយការទប់ស្កាត់ការធ្វើដំណើររបស់ប្រទេសចិន៕

ដោយ: លាងហួរ

បាងកក: រដ្ឋាភិបាលថៃបានរាយការណ៍កាលពីថ្ងៃចន្ទ ទី១២ ខែធ្នូ ថា តំបន់សេដ្ឋកិច្ចពិសេស នៅតាមព្រំដែនចំនួន១០របស់ប្រទេសថៃ (SEZs) បានទាក់ទាញទុនវិនិយោគ ចំនួន៣៧ពាន់លានបាត(ប្រហែល១,០៦ពាន់លានដុល្លារ)គិតមកទល់ពេលនេះ។

អ្នកនាំពាក្យរបស់រដ្ឋាភិបាលលោកស្រី Ratchada Thanadirek បានមានប្រសាសន៍ឱ្យដឹងថា  គម្រោងហេដ្ឋារចនាសម្ព័ន្ធ នៅក្នុងតំបន់សេដ្ឋកិច្ចពិសេសទាំង១០ ក៏សម្រេចបានវឌ្ឍនភាព ក្នុងការសាងសង់ចំនួន៨៩ភាគរយផងដែរ។

លោកនាយករដ្ឋមន្ត្រីថៃ លោកប្រាយុទ្ធ ចាន់អូចា មានទំនុកចិត្តថា តំបន់សេដ្ឋកិច្ច  ដែលមានទីតាំងស្ថិតក្នុងខេត្ត Tak ខេត្ត Mukdahan ខេត្ត Trat  ខេត្ត Sa Kaew ខេត្ត Songkhla ខេត្ត Nong Khai ខេត្ត Narathiwat  ខេត្ត Chiang Rai  ខេត្ត Nakhon Phanom និងខេត្ត Kanchanaburi  នឹងជំរុញដល់ការអភិវឌ្ឍ និងប្រាក់ចំណូលសម្រាប់ប្រជាជននៅជនបទក្នុងខេត្តដាច់ស្រយ៉ាល។

តំបន់សេដ្ឋកិច្ចពិសេស នៅតាមព្រំដែនត្រូវបានផ្តួចផ្តើមឡើង កាលពីឆ្នាំ២០១៥ ដើម្បីទាញយកសក្តានុពលសម្រាប់ពាណិជ្ជកម្ម និងការវិនិយោគពីប្រទេសជិតខាង និងសហគមន៍សេដ្ឋកិច្ចអាស៊ាន៕