ដោយៈ សហការី

ភ្នំពេញៈ អគ្គនាយកគេហទំព័រPorpertyarea.asia និងគេហទំព័រCambodiafinancialtimes.com ថ្នាក់ដឹកនាំ និងបុគ្គលិកទាំងអស់សូមផ្ញើសារលិខិតគោរពជូនពរ សម្ដេ ចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងឱកាសដ៏ប្រពៃថ្លៃថ្លានៃខួបច​ម្រើនជន្មាយុ៦៨ ឈានចូល៦៩ឆ្នាំ ដែលប្រព្រឹត្តទៅនាថ្ងៃព្រហស្បតិ៍ ៧រោច ខែមិគសិរ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១៥ ខែធ្នូ ឆ្នាំ២០២២។

នាឱកាសប្រកបដោយក្ដីសោមនស្សរីករាយនេះ យើងខ្ញុំទាំងអស់គ្នា សូមការអនុញ្ញាតគោរពជូនពរ សម្តេចកិត្តិព្រឹទ្ធបណ្ឌិត សូមបានប្រកប​ដោយសុខភាពល្អបរិបូរណ៍ បញ្ញាញាណភ្លឺថ្លា កម្លាំងពលំមាំមួន ជន្នាយុយឺនយូរ ដើម្បីបន្តដឹកនាំកាកបាទក្រហមកម្ពុជា ទទួលបាននូវជ័យជំនះថ្មីៗធំធេងថែមទៀត ជាពិសេសការស្វះស្វែងរក ជំនួយមនុស្សធម៌ពីគ្រប់មជ្ឈដ្ឋានជាតិ និងអន្តរជាតិ ដើម្បីជួយដល់ជនងាយរងគ្រោះ ទុរគតជន ជនចាស់ជរា កុមារកំព្រា ជនគរថ្លង់ យុទ្ធជន របួស ជនពិការ ព្រមទាំងជនរងគ្រោះដោយសារគ្រោះមហន្តរាយ និងគ្រោះធម្មជាតិផ្សេងៗ។

ជាថ្មីម្ដងទៀត យើងខ្ញុំទាំងអស់គ្នា សូមលំឱនកាយវាចាចិត្តលើកហត្ថប្រណមបួងសួងដល់ គុណបុណ្យព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក សូមជួយបីបាច់ថែរក្សា និងប្រោះព្រំសព្ទសាធុការពរ សិរីសួស្ដីជ័យមង្គលបវរមហាប្រសើរជូនចំពោះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងបុត្រាបុត្រី និងចៅប្រុសចៅស្រីជាទីស្រឡាញ់ទាំងអស់ សូមបានប្រកបនូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ ជានិច្ចនិរន្តរ៍៕

 ដោយៈ គង់ សូរិយា

       ភ្នំពេញៈ មន្រ្តីជាន់ខ្ពស់ក្រសួងទេសចរណ៍បវានថ្លែងថា  តំបន់ព្រៃកោងកាង “ពាមក្រសោប” អាចចាត់ថា ព្រៃកោងកាងធំជាងគេនៅតំបន់អាស៊ី។

       រដ្ឋលេខាធិការក្រសួងទេសចរណ៍លោកនី ផល្លី បានមានប្រសាសន៍បែបនេះកាលព៏ចុងសប្តាហ៍មុន អំឡុងពេលលោកនិងមន្រ្តីជាន់ខ្ពស់ក្រសួងពាក់ព័ន្ឋបានដឹកនាំគណៈប្រតិភូក្លិបឆ្នេរសមុទ្រ ដែលស្អាតជាងគេបំផុតលើពិភពលោក បានចុះសិក្សាពីសក្តានុពលជីវៈចម្រុះ នៅក្នុងតំបន់សហគមន៍ព្រៃកោងកាងពាមក្រសោប ខេត្តកោះកុង។

       បន្ទាប់ពីចូលរួមអបអរសាទរពិធីបុណ្យសមុទ្រ ជុំទី៣ លើកទី៩ នៅខេត្តព្រះសីហនុ ក្រសួងទេសចរណ៍​បានរៀបចំ ជាដំណើរទស្សនៈកិច្ចសិក្សាស្វែងយល់តាមដែនកោះ និងតំបន់សហគមន៍ព្រៃកោងកាងពាមក្រសោប ក្រោយមានការយកចិត្តទុកដាក់ របស់គណៈប្រតិភូក្លិបឆ្នេរសមុទ្រ ដែលស្អាតជាងគេបំផុតលើពិភពលោក។

លោក នី ផល្លីបានឱ្យដឹងបន្តថា នេះជាដំណើរ​ទស្សនៈកិច្ចកម្រមួយរបស់គណៈប្រតិភូក្លិបឆ្នេរសមុទ្រ ដែលស្អាតជាងគេបំផុតលើពិភពលោកមកកាន់តំបន់ព្រៃកោងកាង “ពាមក្រសោប” ដែលចាត់ថា ព្រៃកោងកាងធំជាងគេនៅតំបន់អាស៊ី។

ជាមួយគ្នានេះ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានលើកឡើងផងដែរថា ព្រៃកោងកាងជារបៀង​យុទ្ធ​សាស្រ្ត តភ្ជាប់ប្រព័ន្ធអេកូឡូស៊ីពីតំបន់ដីគោក ឆ្នេរ និងសមុទ្រ ហើយក៏ជារនាំងប្រឆាំង​នឹងគ្រោះធម្មជាតិ និងការ​ប្រែប្រួលអាកាសធាតុ ហើយមិនតែប៉ុណ្ណោះ​បានចូលរួមចំណែក ក្នុងការអភិវឌ្ឍសេដ្ឋកិច្ចជាតិ និងចូលរួមចំណែក​ក្នុងការកាត់បន្ថយភាពក្រីក្រ ដោយមានតួនាទីយ៉ាងសំខាន់ជាកន្លែ​ងរក្សាផលស្តុក ជាដែនជម្រក និងប្រភពមេពូជ​នៃមច្ឆធម្មជាតិ ដែលជាប្រភពធនធានសមុទ្រដ៏សម្បូណ៌បែប ហើយចាំបាច់យើងត្រូវការរពារ អភិរក្ស និងដាំស្តារព្រៃកោងកាងឡើងវិញ។

ក្រសួងបរិស្ថានបង្ហាញថា កម្ពុជាមានផ្ទៃដីព្រៃកោងកាងចំនួន៥៨, ៨០០ហិកតា ក្នុងនោះខេត្តកោះកុងមានទំហំ៤៦,៥២៩ហិកតា។ ព្រៃកោងកាង ក្នុងតំបន់ពាមក្រសោប បានចូលរួមចំណែក ក្នុងការអភិវឌ្ឍសេដ្ឋកិច្ចជាតិ និងចូលរួម​ចំណែកក្នុងការកាត់បន្ថយភាពក្រីក្រ ដោយមានតួនាទីយ៉ាងសំខាន់ ជាកន្លែងរក្សាផលស្តុក ជាដែនជម្រក និងប្រភព​មេពូជ ដែលជាប្រភពធនធានសមុទ្រសម្បូរបែប។

លោននី ផល្លីបានបន្ថែមទៀតថា សហគមន៍ព្រៃកោងកាងពាមក្រសោ​បក្នុងខេត្តកោះកុង កំពុងស្ថិត​នៅក្នុង​ក្រសែភ្នែក របស់មជ្ឈដ្ឋានអន្តរជាតិ ហើយកម្ពុជា នឹងទទួលការផ្សព្វផ្សាយកាន់តែទូលំទូលាយ ប្រាប់​ដល់​មនុស្សលើសកលលោកបានស្គាល់ និងដឹង។

មន្រ្តីជាន់ខ្ពស់ក្រសួងទេសចរណ៍ ក៏បានព្យាករណ៍ទុកមុនដែរថា ទៅថ្ងៃអនាគត ខេត្តកោះកុង នឹងទទួលបាន​គម្រោងអភិវឌ្ឍន៍ជាច្រើន តាមតំបន់ឆ្នេរសមុទ្រ និងដែនកោះ តាមរយៈជំនួយគាំទ្រលើក​កម្ពស់ របស់គណៈ​ប្រតិភូក្លិបឆ្នេរសមុទ្រ ដែលស្អាតជាងគេបំផុតលើពិភពលោក៕

ដោយៈ សុផារី

ភ្នំពេញ: ស្ថានទូតអូស្រា្តលីប្រចាំប្រទេសកម្ពុជា បានផ្តល់ហិរញ្ញប្បទានឥតសំណងចំនួន៦៥លានដុល្លារអាមេរិក ដើម្បីអភិវឌ្ឍន៍វិស័យ០៤សំខាន់ៗ សម្រាប់រយៈពេល៥ឆ្នាំ ចាប់ពីខែមិថុនា ឆ្នាំ២០២២ ដល់ខែមិថុនា ឆ្នាំ២០២៧។

ជំនួយឥតសំណងនេះ នឹងអភិវឌ្ឍផ្តោតគាំទ្រទៅលើវិស័យចំនួន៤សំខាន់ៗ រួមមាន ទី១ ហេដ្ឋារចនាសម្ព័ន្ធ ទី២ពាណិជ្ជកម្ម និងវិនិយោគ ទី៣កសិកម្ម និងកសិឧស្សាហកម្ម និងទី៤ យេនឌ័រ និងបរិយាប័ន្ន។

នេះបើតាមពិធីចុះហត្ថលេខា លើកិច្ចសម្របសម្រួលបំពេញបន្ថែមសម្រាប់កម្មវិធីភាពជាដៃគូ កម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ “Cambodia-Australia Partnership for Resilient Economic Development (CAP RED) Program” នៅថ្ងៃទី១២ ខែធ្នូ ឆ្នាំ២០២២។

តាមរយៈកម្មវិធី CAP RED ការអភិវឌ្ឍវិស័យគោលទាំងនេះ ធ្វើឡើងដោយមានកិច្ចសហការអនុវត្តន៍ រួមគ្នារវាងវិស័យឯកជន និងរាជរដ្ឋាភិបាលកម្ពុជា ដើម្បីកំណត់និងរិះរកដំណោះស្រាយ ដើម្បីសម្រេចបាននូវកំណើនសេដ្ឋកិច្ចប្រកប ដោយនិរន្តភាព ភាពធន់ និងបរិយាប័ន្ន។

លោកបណ្ឌិត អូន ព័ន្ធមុនីរ័ត្ន បានថ្លែងអំណរគុណ ចំពោះរដ្ឋាភិបាលអូស្ត្រាលី ដែលតែងតែបានជួយគាំទ្រ ដល់រាជរដ្ឋាភិបាលកម្ពុជា ក្នុងការអភិវឌ្ឍលើវិស័យសេដ្ឋកិច្ច សង្គម និងសុខមាលភាពប្រជាជន ព្រមទាំងបានចូលរួមគាំទ្រកម្ពុជា ក្នុងការទប់ស្កាត់ការរីករាលដាល នៃជំងឺកូវីដ-១៩ តាមរយៈការផ្តល់នូវជំនួយជាវ៉ាក់សាំង និងការចូលរួមការងារសេដ្ឋកិច្ចកម្ពុជាឡើងវិញក្នុងពេលអន្តរកាលនេះ៕

 ដោយៈ វឌ្ឍនៈ

ភ្នំពេញ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានបង្ហើបឲ្យដឹងពីគំរោងសាងសង់ស្ពានថ្មីមួយ ដែលជាស្ពានឆ្លងទន្លេតភ្ជាប់ពីផ្លូវជាតិលេខ១ ទៅស្រុកល្វាឯម ដែលគ្រោងនឹងចំណាយថវិកា២០០លានដុល្លារអាមេរិក។

ថ្លែងក្នុងពិធីសំណេះសំណាល ជាមួយបងប្អូនរស់នៅបណ្ដាប្រទេសអឺរ៉ុបកាលពីយប់ថ្ងៃទី១២ ធ្នូ២០២២ សម្ដេចអគ្គមហាសេនាបតីតេជោហ៊ុនសែន នាយករដ្ឋមន្ត្រីបានមានប្រសាសន៍ថា ដោយសារតែកម្ពុជាត្រូវសាងសង់ផ្លូវល្បឿនលឿនមួយខ្សែទៀត តភ្ជាប់ពីភ្នំពេញ ទៅកាន់ព្រំដែនកម្ពុជាវៀតណាម ( បាវិត ) ហើយដើម្បីសម្រួលឱ្យការឡើងចុះ ផ្លូវល្បឿនលឿននេះបានស្រួល រដ្ឋាភិបាលសម្រេចធ្វើស្ពានមួយខ្សែ ពីផ្លូវជាតិលេខ១ទៅកាន់ល្វាឯម។

សម្ដេចមានប្រសាសន៍ថា “ដំបូងឡើយមានអ្នកផ្ដល់ជាយោបល់ថាស្ពាននេះ តម្រូវឱ្យពលរដ្ឋបង់លុយពេលឆ្លងកាត់ តែសម្ដេចមិនយល់ព្រមនិងមិនតម្រូវឱ្យពលរដ្ឋបង់លុយឡើយ ពីព្រោះស្ពាននេះមានការចាំបាច់សម្រាប់ពលរដ្ឋត្រូវឆ្លងកាត់ចុះឡើងៗ ដោយខ្លះឆ្លងព្រឹកល្ងាច ខ្លះទៀតឆ្លងមួយថ្ងៃបួនទៅប្រាំដង”។

សម្ដេចមានប្រសាសន៍បន្ថែមថា សម្ដេចបានចង្អុលបង្ហាញ និងបានបញ្ចេញថវិកា២០០លានដុល្លារអាមេរិក ដើម្បីសង់ស្ពាននេះ ហើយបើមិនធ្វើស្ពាននេះ ផ្លូវល្បឿនលឿននឹងពិបាកឆ្លង ព្រោះមិនអាចឆ្លងសាឡាងហើយឡើងទៅផ្លូវល្បឿនលឿននោះទេ។ ដូច្នេះពលរដ្ឋដែលធ្វើដំណើរតាមផ្លូវល្បឿនលឿន នឹងត្រូវបង់លុយតែឆ្លងស្ពានមិនចាំបាច់បង់លុយឡើយ។

សម្ដេចបញ្ជាក់ថា “ស្ពាននេះបានសិក្សារួចហើយ និងមានទំហំធំទៅពីរមកពីរ ហើយវាជាគម្រោងដែលអាចជួយជំរុញ កំណើនសេដ្ឋកិច្ចកម្ពុជាឱ្យមានដំណើរការបានលឿនមួយម្រិតទៀត”៕

ដោយ: លាងហួរ

ភ្នំពេញ: អាជីវកម្មជាង២០.០០០  និងទំហំទុនវិនិយោគចំនួន៥,៧ពាន់លានដុល្លារ ត្រូវបានចុះឈ្មោះជាមួយប្រព័ន្ធចុះបញ្ជី ពាណិជ្ជកម្មតាមអ៉ីធឺណិតគិតត្រឹមថ្ងៃទី ១២ ខែធ្នូ ឆ្នាំ២០២២។

គិតត្រឹមថ្ងៃទី១២ ខែធ្នូ អាជីវកម្មចំនួន២០.១៨៩ ត្រូវបានអនុម័តជាមួយនឹងដើមទុនវិនិយោគ ក្នុងទំហំទឹកប្រាក់សរុបចំនួន៥,៧ពាន់លានដុល្លារ។ នេះបើយោងតាមរបាយការណ៍ ពីប្រព័ន្ធចុះបញ្ជីពាណិជ្ជកម្មតាមអ៊ីនធឺណិត ដែលស្ថិតក្រោមក្រសួងសេដ្ឋកិច្ច និងហិរញ្ញវត្ថុ។

របាយការណ៍ដដែលបានបន្តថា ឈ្មោះអាជីវកម្មចំនួន១២.៧៤២របស់ក្រុមហ៊ុននានា កំពុងស្ថិតក្នុងដំណាក់កាលនៃការអនុម័ត ដោយឈ្មោះអាជីវកម្មចំនួន២ត្រូវបានច្រានចោល។

ទំហំនៃតម្លៃវិនិយោគ តាមវិស័យត្រូវបាននាំមុខគេ ដោយវិស័យសំ​ណង់ ដែលមានទឹកប្រាក់សរុបចំនួន៩៧១លានដុល្លារ។ បន្ទាប់មកគឺវិស័យអចលនទ្រព្យ មានទឹកប្រាក់សរុបចំនួន៧០១លានដុល្លារ សកម្មភាព ប្រឹ​  ក្សាគ្រប់គ្រងមានចំនួន២៩៣លានដុល្លារ។ ការផលិតមានទឹកប្រាក់ចំនួន២៧៥លានដុល្លារ សកម្មភាពហិរញ្ញវត្ថុ និងធានារ៉ាប់រងមានចំនួន២៥៩ លានដុល្លារ និងវិស័យផ្សេងៗទៀតមានចំនួន៣,២លានដុល្លារ ។

របាយការណ៍ដដែលបានចង្អុលបង្ហាញថា អាជីវកម្ម  ដែលគ្រប់គ្រងដោយបុរសមានចំនួន៦២ភាគរយ នៃអាជីវកម្មដែលបានចុះបញ្ជីសរុប។

រដ្ឋាភិបាលកម្ពុជា បានដាក់ឱ្យដំណើរការប្រព័ន្ធចុះបញ្ជី ពាណិជ្ជកម្មតាមអ៉ឺនធឺណិត នេះ កាលពីខែមិថុនា ឆ្នាំ២០២២៕

ដោយ: លាងហួរ

ប៉េកាំង: លោក Zhang Li សហស្ថាបនិក នៃក្រុមហ៊ុនអភិវឌ្ឍន៍អចលនទ្រព្យចិនGuangzhou R&F Properties Co. Ltd., ត្រូវបានប៉ូលិសស្វែងរកនៅសហរដ្ឋអាមេរិក ជុំវិញការចោទប្រកាន់ថា លោកបានផ្តល់សំណូក ដើម្បីទទួលបានកិច្ចសន្យានៅរដ្ឋកាលីហ្វ័រញ៉ា។

លោក Zhang Li អតីតមន្ត្រីរដ្ឋាភិបាល ដែលបានឡើងកាន់តំណែង ជាក្រុមហ៊ុនអចលនទ្រព្យដ៏ធំបំផុតមួយ របស់ប្រទេសចិន ត្រូវបានចាប់ខ្លួនកាលពីថ្ងៃទី៣០ ខែវិច្ឆិកាដោយប៉ូលីសទីក្រុងឡុងដ៍ ហើយលោកកំពុងប្រឈមមុខ នឹងដំណើរការធ្វើបត្យាប័នទៅសហរដ្ឋអាមេរិក។

ចៅក្រម John Zani បានផ្តល់ប្រាក់នៅក្រៅឃុំចំនួន១៥លានផោន(១៨,៤លានដុល្លារអាមេរិក) កាលពីថ្ងៃចន្ទនៅឯតុលាការ Westminster Magistrates ដែលជាចំនួនទឹកប្រាក់ខ្ពស់បំផុត មិនធ្លាប់មានសម្រាប់តុលាការចក្រភពអង់គ្លេស។

លោក Zhang នឹងត្រូវបានឃុំខ្លួនចំនួន២៤ម៉ោង ក្នុងមួយថ្ងៃនៅក្នុងផ្ទះល្វែងមួយនៅជាន់ទី៤៣ នៃប៉មទីក្រុងឡុងដ៍ ដែលត្រូវបានត្រួតពិនិត្យដោយសន្តិសុខ និងទូរទស្សន៍CCTV ។

លោក Zhang ដែលមានវ័យ៦៩ឆ្នាំ​ ត្រូវ​បាន​គេ​ចោទ​ប្រកាន់​ថា​បាន​ផ្តល់​ប្រាក់​សំណូក និង​មូលនិធិ​ដល់​អ្នក​រួម​គំនិត ​ដើម្បី​ទទួល​បាន​ការ​អនុញ្ញាត សម្រាប់​គម្រោង​សាងសង់​មួយ​។ នេះ​បើ​យោង​តាម​ការ​ចុះ​បញ្ជី​របស់​តុលាការ​។

ក្រុមហ៊ុនR&F បានធ្វើអាជីវកម្មនៅសហរដ្ឋអាមេរិក តាមរយៈសាខាក្នុងស្រុក។  នៅក្នុង​ចំណោម​គម្រោង​ផ្សេង​ទៀត ក្រុមហ៊ុន​នេះទទួល​ខុស​ត្រូវ​លើ​គម្រោង​អភិវឌ្ឍន៍​លំនៅឋាន និង​ពាណិជ្ជកម្ម​ចម្រុះ​ ដែល​មាន​តម្លៃ​រាប់​លាន​ដុល្លារ​ក្នុង​ទីក្រុងSan Francisco។

ទោះបីជាយ៉ាងណាក្តី មេធាវីរបស់លោក Zhang បានបដិសេធមិនធ្វើអត្ថាធិប្បាយនៅខាងក្រៅតុលាការទេ។

ក្រុមហ៊ុន R&F Properties ដែលចុះបញ្ជីនៅហុងកុង បានឱ្យដឹងនៅលើគណនី WeChat ផ្លូវការរបស់ខ្លួនថា ខ្លួនមានគម្រោងប្រឆាំង នឹងអ្វីដែលហៅថា“ការចោទប្រកាន់មិនពិត”៕

 ដោយៈ ម៉ាលីនណា

       ភ្នំពេញៈ រដ្ឋាភិបាលចិនបានផ្តល់ហិរញ្ញ​ទានសម្បទាន ក្នុងទំហំទឹក​ប្រាក់ចំនួនជិត១១២លានដុល្លារអាមេរិក ដើម្បីសាងសង់ស្ពានឆ្លងកាត់ទន្លេរមេគង្គក្នុងខេត្តក្រចេះ និងការស្តារឡើងវិញនូវផ្លូវជាតិលេខ៧។

អនុរដ្ឋលេខាធិការ និងជាអ្នកនាំាំពាក្យក្រសួង​សាធារណការ​ និង​ដឹកជញ្ជូន​លោកវ៉ាស៊ីម សូរិយាបានមានប្រសាសន៍ឱ្យដឹងថា រដ្ឋាភិបាល​នឹង​ប្រកាស​បើក​ការដ្ឋាន ​“​គម្រោង​សាងសង់​ស្ពាន​ឆ្លងកាត់​ទន្លេមេគង្គ​-​ខេត្តក្រចេះ​” និង “​គម្រោង​លើកកម្ពស់​គុណភាព​ផ្លូវជាតិ លេខ​៧ (​ពី​ទីប្រជុំជន​ស្គន់ ដល់​ក្រុង​កំពង់ចាម​)” នៅ​ដើមខែ​មករា ឆ្នាំ​២០២៣ ខាងមុខ​។

គម្រោងហេ​ដ្ឋ​រចនាសម្ព័ន្ធ​ទាំងនេះ នឹងត្រូវ​ចំណាយប្រាក់​សរុប ១១១,៩៨​​លាន​ដុល្លារ​សហរដ្ឋអាមេរិក ដែល​រដ្ឋាភិបាល​កម្ពុជា​ខ្ចី​ពី​ចិន​។ ក្រសួង​សាធារណការ​ និង​ដឹកជញ្ជូន​កំពុង​រៀបចំ​កិច្ចការ​នានា ​ដើម្បី​ត្រៀម​ពិធីបើកការដ្ឋាន​សាងសង់​ ដែល​នឹងត្រូវ​ធ្វើឡើង​ក្រោម​អធិបតីភាពសម្តេចតេជោហ៊ុន សែននាយករដ្ឋមន្រ្តីនៃកម្ពុជា​។

លោកវ៉ា​ស៊ីម សូរិយាបានមានប្រសាសន៍ឲ្យដឹងទៀតថា គម្រោង​ទាំងនេះ​ជា​ការតភ្ជាប់​របៀង​សេដ្ឋកិច្ច​២ គឺ​របៀង​សេដ្ឋកិច្ច​ខាងត្បូង (​បាងកក​-​ភ្នំពេញ​-​ហូ​ជី​មី​ញ​) និង របៀង​សេដ្ឋកិច្ច​កណ្តាល (​យូ​ណាន -​វៀង​ច័​ន្ធ​-​ត្រពាំង​ក្រៀល ) ឬត​ភ្ជាប់​មក​តំបន់​មេគង្គ​។

លោកបន្តថា​ “នៅពេលដែល​គម្រោង​ផ្លូវ និង​ស្ពាន​នេះ បានបញ្ចប់ នឹង​អនុញ្ញាតឱ្យ​អ្នកធ្វើដំណើរ​ឆ្លងកាត់ ​ពី​តំបន់​មួយ​ទៅ​តំបន់​មួយទៀត និង​ផ្ទៃក្នុង​កាន់​តែមាន​ភាពងាយស្រួល ជាពិសេស​ការដឹកជញ្ជូន​ទំនិញ​នានា​ឆ្លងកាត់​កាន់តែ​បាន​លឿន និង​ទាន់ពេលវេលា”​។​

ក្រសួង​សាធារណការ និង​ដឹកជញ្ជូនបង្ហាញថា គម្រោង​សាងសង់​ផ្លូវ​ថ្មី​ពី​ចំណុច​ផ្លូវជាតិ​លេខ​៧ ទៅ​ផ្លូវជាតិ​លេខ​៦០B នឹងត្រូវ​ត​ភ្ជាប់​រវាង​ក្រុង​ក្រចេះ និង​ស្រុក​ព្រែក​ប្រសព្វ ខេត្តក្រចេះ​។

ដោយឡែក​គម្រោង​សាងសង់​ស្ពាន​ ឆ្លងកាត់ទន្លេ​មេគង្គ និង​ផ្លូវ​ត​ភ្ជាប់​នេះ មាន​ប្រវែង​សរុប​៣៣,៤៥ គីឡូម៉ែត្រ ត​ភ្ជាប់​ពី​ផ្លូវជាតិ​លេខ​៧ (​រង្វង់​មូល​ខ្លា​ស្ទុះ​) ទៅ​ផ្លូវជាតិ​លេខ​៦០B ដោយ​ក្នុងនោះ​ការសាងសង់​ស្ពាន​ឆ្លងកាត់​ទន្លេមេគង្គ​ប្រវែង១៧៦១​ម៉ែត្រ មានមុខ​កាត់​ទទឹង​១៣,៥​ម៉ែត្រ ត​ភ្ជាប់​ពី​ត្រើយ​ខាងកើត​ស្ថិត​ត្រង់ ភូមិ​បុស្ស​លាវ​លើ ឃុំ​បុស​លាវ ស្រុក​ចិត្រ​បុរី ទៅ​ត្រើយ​ខាងលិច​ត្រង់​ភូមិ​ព្រែក​ព្រលូង ឃុំ​សោ​ប ស្រុក​ព្រែក​ប្រសព្វ ខេត្តក្រចេះ​។

គម្រោង​សាងសង់​ស្ពាន​ឆ្លងទន្លេ​មេគង្គ និង​ផ្លូវ​ត​ភ្ជាប់​នេះ នឹង​ចំណាយ​ថវិកា​សរុប១១១,៩៨​លាន​ដុល្លា​សហរដ្ឋអាមេរិក ដែលជា​ហិរញ្ញប្បទាន​ពី​សាធារណរដ្ឋ​ប្រជាមានិត​ចិន ដោយ​ប្រើពេល​សាងសង់​ប្រមាណ ៤២​ខែ អនុវត្ត​ដោយ​ក្រុមហ៊ុន​សំណង់​សៀង​ហៃ (SCG) និង​ត្រួតពិនិត្យ​គុណភាព​ដោយ​ក្រុមហ៊ុន​ទីប្រឹក្សាបច្ចេកទេស​ក្វាង​ចូ​វ​វ៉ាន​អាន​៕