ដោយៈ សុផារី

ភ្នំពេញៈ ការកើនឡើងនូវប្រជាសាស្រ្ត ស្របពេលសេដ្ឋកិច្ចកើនឡើង ទោះបីលំទូរទុនវិនិយោគពីបរទេស ហូរចូលមកកម្ពុជានៅមានកម្រិតក្តី ប៉ុន្តែទីផ្សារតម្លៃដីធ្លីនៅតែបន្តកើនឡើង។

ក្នុងប៉ុន្មានឆ្នាំចុងក្រោយនេះ ដីធ្លីនៅក្នុងតំបន់ជាយរាជធានីភ្នំពេញ មានកំណើនឥតឈប់ឈរ ជំរុញដោយតម្រូវការសម្រាប់ការសាងសង់ និងអភិវឌ្ឍន៍ ដែលបណ្តាលមកពីលំហូរ នៃប្រជាជនមកកាន់ទីក្រុង និងអត្រានគរូបនីយកម្មមានការកើនឡើង។

តាមរយៈការសិក្សា អ្នកជំនាញអចលនទ្រព្យបានឱ្យដឹងថា វិស័យដីធ្លីនៅតាមតំបន់ជាយក្រុងភ្នំពេញ នឹងនៅបន្តមានកំណើនខ្ពស់ ប្រសិនបើគម្រោងហេដ្ឋារចនាសម្ព័ន្ធ នៅបន្តដំណើរការល្អប្រសើរ រួមផ្សំនឹងតម្រូវការរបស់ប្រជាជន ដែលមានកំណើនខ្ពស់ ហូរចូលមកកាន់ទីក្រុងក្នុងមួយឆ្នាំៗ។

អ្នកនាងជិន ច័ន្ទដាលុច្ស ប្រធានផ្នែកវាយតម្លៃនៃក្រុមហ៊ុន CBRE Cambodia បានមានប្រសាសន៍ឲ្យដឹង ក្នុងពិធីធ្វើបទបង្ហាញពីរបាយការ​ណ៍បច្ចុប្បន្នភាពអចលនទ្រព្យកម្ពុជា កាលពីពេលថ្មីៗនេះថា ការវិនិយោគលើដីធ្លី នៅក្នុងនិងជុំវិញក្រុងភ្នំពេញ ក្នុងរយៈពេល៥ទៅ១០ឆ្នាំចុងក្រោយនេះ បានជំរុញតម្លៃដីធ្លីឱ្យមានកំណើនឥតឈប់ឈរ។

អ្នកនាងបន្តដឹងថា “បើគិតចាប់ពីឆ្នាំ២០២០មកទល់បច្ចុប្បន្ន តម្លៃដីធ្លីនៅក្នុងតំបន់ខ្លះនៃជាយក្រុងភ្នំពេញ ដែលរំពឹងថានឹងមានការពង្រីកទីក្រុង ឬមានការអភិវឌ្ឍគម្រោងហេដ្ឋារចនាសម្ព័ន្ធ នាពេលបច្ចុប្បន្នឬអនា​គត ឃើញថាតម្លៃដីធ្លីនៅបន្តមានកំណើន ហើយរំពឹងថានឹងបន្តកើនឡើងរហូតដល់ចុងឆ្នាំ២០២២នេះ”។ អ្នកជំនាញបន្ថែមថា“វិស័យអចលនទ្រព្យនៅកម្ពុជា មានការប្រែប្រួលយ៉ាងលឿនរហ័ស ប៉ុន្តែប្រសិនបើគម្រោងហេដ្ឋារចនាសម្ព័ន្ធនានានៅបន្តជាធម្មតា នោះតម្លៃដីធ្លីក៏រំពឹងនៅមានសញ្ញា ងើបឡើងបន្តទៀត”។

អ្នកនាងជិន ច័ន្ទដាលុច្សបានពន្យល់ថា សំខាន់បំផុតនោះ តម្លៃដីធ្លីនៅក្នុងតំបន់មួយ អាស្រ័យទៅលើថា តើយើងអាចសាងសង់អ្វីបាននៅលើផ្ទៃដីនោះ អាស្រ័យលើចំនួនការផ្គត់ផ្គង់ និងតម្រូវការជាក់ស្តែង ជាពិសេស ទាក់ទងទៅនឹងនិន្នាការ នគរូបនីយកម្មនៅក្នុងក្រុងភ្នំពេញ។

ជាមួយគ្នានេះ លោក Lawrence Lennon នាយកប្រតិបត្តិ CBRE Cambodia បានមានប្រសាសន៍ ក្នុងការបង្ហាញរបាយការណ៍ ទាក់ទងបច្ចុប្បន្នភាពអចលនទ្រព្យកម្ពុជាកាលពីសប្តាហ៍មុនថា នៅក្នុងតំបន់អាស៊ាន ប្រទេសកម្ពុជាជាប្រទេសមួយ ដែលមានមូលដ្ឋានគ្រឹះរឹងមាំ ដែលគឺជាកត្តាសំខាន់មួយ នាំទៅកាន់ការរីកចម្រើនលើគ្រប់ផ្នែក នៃវិស័យអចលនទ្រព្យនៅកម្ពុជា។

លោកបន្តថា “ប្រទេសកម្ពុជាមានប្រជាជនកម្លាំងពលកម្ម ដែលនឹងបន្តមានយ៉ាងសកម្ម យ៉ាងហោចណាស់ក៏៥០ឆ្នាំទៀតដែរ ដែលធ្វើឱ្យកម្ពុជានឹងមិនប្រឈមនឹងការខាតកម្លាំងពលកម្មសកម្ម ដូចប្រទេសជប៉ុន កូរ៉េ និងចិននោះទេ”។

លោកបានបន្ថែមថា នៅក្នុងប្រទេសអភិវឌ្ឍន៍ផ្សេងទៀត អត្រានគរូបនីយកម្ម ស្ថិតនៅក្នុងអត្រាលើសពី៥០ភាគរយ។ អត្រានគរូបនីយកម្មរបស់កម្ពុជាមានត្រឹមតែ២៦ភាគរយតែប៉ុណ្ណោះ ដែលជាសូចនាករយ៉ាងសំខាន់បង្ហាញថា ប្រជាជននឹងនៅបន្តផ្លាស់ទីលំនៅ ចូលទៅរស់នៅក្នុងតំបន់ទីក្រុងបន្ថែមទៀត។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ថា យន្តការរបស់រដ្ឋាភិបាល​បាននិងកំពុង បន្តវិនិយោគហេដ្ឋារចនាសម្ព័ន្ឋសំខាន់ៗ ពិសេសការពង្រីកទីក្រុងជាបន្តបន្ទាប់ និងផែនការពង្រីកនាពេលអនាគត បានរួមចំណែកយ៉ាងសំខាន់ដល់ការរីកចម្រើនវិស័យនេះ ក៏ដូចជាធ្វើឲ្យទីផ្សារអចលនទ្រព្យកើនឡើងជាប្រចាំ។

លោកបន្តថា “ដីធ្លីនៅកម្ពុជាបានកើនឡើងចន្លោះពី១០ ទៅ១៥ភាគរយប្រចាំឆ្នាំ ប៉ុន្តែតំបន់ខ្លះ ទីតាំងខ្លះបានកើនឡើងខ្ពស់ជាងនេះ ដោយសារ គេមើលឃើញនិន្នាការរីកចម្រើន រយៈពេលវែងក្នុងវិស័យនេះបន្តទៀត”៕

ដោយៈគង់ សូរិយា

       កណ្តាលៈ ក្រុមអ្នកជំនាញបានលើកឡើងថា សកម្មភាពទិញ លក់ដីធ្លីបាន និងកំពុងកើនឡើងនៅតំបន់ផ្លូវក្រវ៉ាត់ក្រុងទី៣ និងទី៤ ដោយសារ​ហេតុផលជាច្រើន។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក សុខនីមបានមានប្រសាសន៍ឲ្យដឹងកាលពីចុងសប្តាហ៍មុនថា សកម្ម​ភាពទិញលក់ ក្នុងវិស័យនេះចាប់ផ្តើម ​មានសញ្ញាប្រសើរឡើងវិញបណ្តើរៗហើយ ពិសេសតំបន់ក្រវ៉ាត់ក្រុងទី៣ និងទី៤ ចរន្តនៃការទិញលក់ ដីឡូត៍ ដីធំៗចាប់ផ្តើមមានសកម្មភាពបណ្តើរហើយ។​

លោកបន្តថា “សកម្មភាពទិញលក់ដីនៅខេត្តមណ្ឌលគិរី ក៏បានកំរើកឡើងវិញបណ្តើរៗផងដែរ បន្ទាប់ពីពិធីបុណ្យចូលឆ្នាំប្រពៃណីជាតិនាពេលកន្លងមកនេះ”។ លោកបន្តថា“ការវិនិយោគដីធ្លី នៅតែបន្តផ្តល់ភាពចំណេ​ញច្រើនពីការវិនិយោគ ហេតុនេះដីធ្លីនៅតែមានប្រជាប្រិយភាពជាងគេ ក្នុងចំណោមផ្នែកផ្សេងទៀតនៃវិស័យអចលនទ្រព្យ”។

ចំំណែកលោកបណ្ឌិតឧកញ៉ាគីម ហ៊ាងប្រធានKW Cambodiaបានមានប្រសាសន៍ឥ្យដឹងផងដែរថា ការវិនិយោគដីធ្លី នៅតែមានឱកាសចំណេ​ញ ប្រសិនជាយើងជ្រើសរើសបានទីតាំងល្អ វានឹងទទួលបានផលចំណេញលឿន ដោយតំបន់នៃទិសទាំងបួននៃទីក្រុងភ្នំពេញ មានសក្តានុពលខុសៗគ្នា ប៉ុន្តែកំពុងមានភាពរីកចម្រើនស្របគ្នាផងដែរ គ្រាន់តែតំបន់ខ្លះត្រូវរង់ចាំពេលវេលាបន្តិច ខណៈតំបន់ខ្លះទៀតកំពុងមានភាពរីកចម្រើនខ្លាំង និងលឿន ពិសេសតំបន់ភាគខាងជើងរាជធានីភ្នំពេញ ដែលលោកបានចាត់ទុកថា “ជាតំបន់រស់នៅរបស់អភិជនសម័យថ្មី”។​

លោកឧកញ៉ាបានបន្តថា “ការរីកចម្រើននៃវិស័យអចលនទ្រព្យ បាននិងកំពុងបន្តរយៈពេលវែងតទៅទៀត ប៉ុន្តែកម្រិតនៃការវិនិយោគនិងផលចំណេញ អាស្រ័យលើចំណេះដឹង និងលទ្ឋភាពរបស់យើង”៕

  ដោយៈ គង់ សិរីជេស៊ីកា

       ភ្នំពេញៈ ការវិនិយោគលើហេដ្ឋារចនាសម្ព័ន្ឋ ជាកត្តាដ៏ធំមួយនិងមិនអាចប្រកែកបាន ដែលបាននិងកំពុងធ្វើឲ្យតំបន់ភាគខាងត្បូង រាជធានីភ្នំពេញ បានទាក់ទាញការវិនិយោគច្រើននាប៉ុន្មានឆ្នាំចុងក្រោយនេះ។

ក្រុមហ៊ុនCBRE Cambodia បានចេញផ្សាយរបាយការណ៍ស្រា​
វជ្រាវកាលពីពេលថ្មីៗនេះថា សក្តានុពលអចលនទ្រព្យ ភាគខាងត្បូងរាជធានីភ្នំពេញ និងឆ្ងាយពីនេះ សម្រាប់ការគិតគូរក្នុងភាពជាអ្នកដឹកនាំ ដោយស្វែករកនូវនិន្នាការអភិវឌ្ឍន៍ ក្នុងការកំណត់ឡើងវិញនូវសក្តានុពលថ្ងៃអនាគត នៃការអភិវឌ្ឍរាជធានីភ្នំពេញ។

ការចាប់អារម្មណ៍ ចំពោះតំបន់ភាគខាងត្បូងរាជធានីភ្នំពេញ បានបន្តកើនឡើង ដោយសារតែការអភិវឌ្ឍហេដ្ឋារចនាសម្ពន្ធ និង តម្លៃដីសមរម្យ។ តំបន់នេះ បានក្លាយទៅជាទីតាំងអភិវឌ្ឍន៍គ្រប់ជ្រុងជ្រោយ ចាប់ពីលំនៅដ្ឋានស្នាក់នៅ រហូតដល់ជាតំបន់ឧស្សា​ហកម្ម។

លោកJame Hodge អគ្គនាយកគ្រប់គ្រងនៃភ្នាក់ងារវាយតម្លៃអច​លនទ្រព្យ CBRE បានលើកឡើងថា ដោយសារតែការអភិវឌ្ឍ ភូមិសាស្រ្តជុំវិញរាជធានីភ្នំពេញ ឆ្ពោះទៅកាន់ភាគខាងត្បូង គឺជារឿងដែលមិនអាចជៀសផុតបាន ជាមួយនឹងគម្រោងអភិវឌ្ឍទ្រទ្រាយធំៗ ធ្វើអោយទីតាំងភាគខាងត្បូង គឺមេដែកឆក់សម្រាប់អ្នកវិនិយោគ។

គម្រោងការអភិវឌ្ឍហេដ្ឋារចនាសម្ពន្ធ មានដូចជាមហាវិថី ហ៊ុន សែន ព្រមទាំងការអភិវឌ្ឍព្រលានយន្តហោះអន្តរជាតិតេជោថ្មី បានធ្វើអោយមានសកម្មភាពបំប៉ោងតម្លៃដីធ្លី នៅតំបន់ភាគខាងត្បូងនេះ។

របាយការណ៍របស់ CBRE ក្រោមចំណងជើងថា អនាគតរាជធានីភ្នំពេញ តំបន់ភាគខាងត្បូង និងលើសពីនេះ បានទស្សន៍ទាយពីសក្តានុពលតំបន់នេះ ដែលអាចអភិវឌ្ឍគ្រប់ជ្រុងជ្រោយ សម្រាប់ប្រទេសជាតិទាំងមូល។

និន្នាការអភិវឌ្ឍ រូមបញ្ចូលការពង្រីកតំបន់ សួនឧស្សាហកម្ម ផលិតកម្ម តម្លៃដីសមរម្យ។

ជាមួយគ្នានេះ លោកLawrence lenonce អគ្គនាយកក្រុមសេវាកម្មវិជ្ជាជីវៈរបស់ភ្នាក់ងារអចលនទ្រព្យ CBRE បានបញ្ជាក់ថា មានការស៊ើបអង្កេតពីសក្តានុពលនៃឧស្សាហកម្ម និងភស្តុភារតំបន់ដែលអាចកើតឡើង ព្រមទាំងចង្វាក់ផលិតកម្ម ស្របពេលដែលការពង្រីកហេដ្ឋារចនាសម្ពន្ធឆ្ពោះទៅកាន់តំបន់នេះផងដែរ។

លោកបន្តថា “ជាងនេះទៀតនៅតំបន់នេះ តំបន់ទីក្រុងថ្មីដែលអាចអភិវឌ្ឍទៅជាតំបន់ស្នាក់នៅ និងតំបន់ពាណិជ្ជកម្មផងដែរ”។លោកបន្ថែមទៀតថា “ប្រសិនបើអ្នកអភិវឌ្ឍទទួលជោគជ័យ នៅតំបន់ភាគខាងត្បូងនេះ ពួកគេនឹងផ្លាស់ប្តូរទីក្រុងទាំងមូល ក្នុងទ្រង់ទ្រាយធំ”។

បើទោះបីជាផែនការមេ ត្រូវបានកំណត់ជាតំបន់អភិវឌ្ឍ និងហេដ្ឋារចនាសម្ពន្ធនានា ត្រូវឆ្លើយតបទៅនឹងបញ្ហាប្រឈមមុខនៃទីផ្សារ និងបរិស្ថានក៏ដោយ។

របាយការណ៍ស្រាវជ្រាវនេះ សម្រាប់អ្នកអភិវឌ្ឍនៅក្នុងស្រុក និងក្រៅស្រុក ដែលជាមគ្គុទេសន៍ ក្នុងការសម្រេចចិត្តដ៏ប្រសើរបំផុត សម្រាប់គម្រោ​ងពួកគេ។

ប្រធានសមាគមអ្នកវាយតម្លៃ និងភ្នាក់ងងារអចលនវត្ថុកម្ពុជា លោកច្រឹក សុខនីមបានមានប្រសាសន៍ថា តំបន់ផ្លូវ៦០ម៉ែត្រ កំពុងពង្រីកសក្តានុពលបណ្តើរៗហើយ ដោយ​មានគំរោងជាច្រើនបានបាញ់ឆ្ពោះ និងសម្រុកសាងសង់នៅតំបន់នេះ។ ភាពទាក់ទាញតំបន់់នេះ ដោយសារវាជាទីក្រុងថ្មី ដែលមានដីធំៗច្រើន ងាយស្រួលរៀបចំហេដ្ឋារចនាសម្ព័ន្ឋ ពិសេសជាផ្លូវភ្ជាប់ជាមួយព្រលានយន្តហោះថ្មី ដែលកំពុងសាងសង់យ៉ាងសកម្ម។

លោកបន្តថា ការរីកចម្រើនតំបន់់នេះ បានធ្វើឲ្យតម្លៃដីធ្លីកើនឡើង ដែលតម្លៃដីមានចន្លោះពី១៨០០ ទៅ២៨០០ដុល្លារក្នុងមួយម៉ែត្រការ៉េ បើគិតពីចំណុចច្រមុះជ្រូកផ្លូវ២៧១ ដល់ស្តុបទី១ ដែលជាសាលពិព៌ណរបស់រថយន្តម៉ាសឺដេស និងចាប់ពីតំបន់ស្តុបទី១ ដល់ចំណុចផ្លូវ៥០ម៉ែត្រ ដីមានតម្លៃចន្លោះពី១៥០០ ដល់២៣០០ដុល្លារ និងចំណុចចុងក្រោយតភ្ជាប់ជាមួយផ្លូវជាតិលេខ២ ដីមានតម្លៃចន្លោះពី១៦០០ ទៅ១៨០០ដុល្លារក្នុងមួយម៉ែត្រការ៉េ។

លោកច្រឹក សុខនីមបានបន្តថា បច្ចុប្បន្នគំរោងធំៗជាច្រើនឆ្ពោះទៅតំបន់នេះ ដែលវាបាននិងកំពុងជះឥទ្ឋិពល ដល់តំបន់ផ្លូវជាតិលេខ២ ដែលនឹងមានគំរោងជាច្រើន បានពង្រីកទៅដល់តំបន់នេះ នៅពេលការពង្រីកផ្លូវជាតិនេះបញ្ចប់”៕

ដោយៈ វឌ្ឍនៈ

ភ្នំពេញៈ អគារដែលធ្លាប់ជួលទៅជនជាតិចិន និងវៀតណាមសម្រាប់បើកជាកាស៊ីណូនៅក្នុងខេត្តព្រះសីហនុ ចាប់ផ្ដើមទំនេរ ក្រោយការចាកចេញរបស់ជនជាតិវៀតណាមនិងចិន បន្ទាប់ពីរាជរដ្ឋាភិបាលបញ្ជាឱ្យប     ង្ក្រាបល្បែងស៊ីសងខុសច្បាប់ទូទាំងប្រទេស។

ការចាកចេញពីជនជាតិចិន និងវៀតណាម ពីខេត្តព្រះសីហនុនេះក៏បានធ្វើឱ្យប៉ះពាល់ដោយផ្ទាល់ និងប្រយោលដល់ប្រជាពលរដ្ឋ នៅក្នុងខេត្តនេះផងដែរ  ដូចជាម្ចាស់អគារ បុគ្គលិកបម្រើការងារនៅក្នុងអគារ ក្រុមអ្នកផ្គត់ផ្គង់នៅក្នុងខេត្តនេះជាដើម ។

ប្រធានសន្តិសុខក្នុងអគារមួយក្នុងតំបន់ China Town ក្រុងព្រះសីហនុ បានប្រាប់ដោយមិនបញ្ចេញឈ្មោះឱ្យដឹងកាលពីចុងសប្តាហ៍មុនថា ជាការពិតណាស់ ក្រោយពីរដ្ឋាភិបាលបានប្រកាស បង្ក្រាបល្បែងស៊ីសង ឃើញកាស៊ីណូមួយចំនួន ដែលមិនមានអាជ្ញាបណ្ណ ឬអត់ច្បាប់ក៏បានបិទហើយបុគ្គលិក នៅក្នុងអគាររាប់រយនាក់ត្រូវបញ្ឈប់ និងត្រលប់ទៅស្រុកវិញ ធ្វើឱ្យអគារដែលជួលធ្វើអាជីវកម្មនោះត្រូវស្ងាត់ អត់មានអ្នកជួល ។

សន្តិសុខរូបនេះឱ្យដឹងថា កាលពីចិននិងវៀតណាម នៅជួលអគារធ្វើអាជីវកម្មឃើញថា មានសភាពអ៊ូរអរគ្រាន់បើហើយ អ្នកធ្វើការនៅក្នុងអគារជាមួយចិន និងវៀតណាម ក៏រកចំណូលតាមរយៈប្រាក់ខែ ហើយពេលបើកប្រាក់ខែម្ដងៗ ការចាយវាយរបស់បុគ្គលិកក៏ច្រើន ធ្វើឱ្យអាជីវករផ្គត់ផ្គង់នៅក្បែរៗក៏រកចំណូលបានច្រើនដែរ ។

ម្ចាស់ហាងកាហ្វេមួយកន្លែងនៅអូរត្រេះ លោកសំ ម៉ាប់ បាននិយាយថា មុននេះបន្តិច នៅកំពង់សោមអ៊ូរណាស់ តែបច្ចុប្បន្នរាងស្ងាត់ ក្រោយពីចិននិងវៀតណាមចេញទៅវិញ ហើយខ្លះទៀតចាកចេញទាំងបង្ខំ ព្រោះពួកគេជាជនបរទេសមិនស្របច្បាប់ ខ្លះចេញទៅទាំងយប់ ដើម្បីឡើងយន្តហោះ និងខ្លះទៀតទៅកាន់ព្រំដែនកម្ពុជាវៀតណាម រួចបន្តដំណើរទៅវៀតណាម ។

លោកបន្តថា ថ្វីត្បិតតែបច្ចុប្បន្ន មានភ្ញៀវទេសចរមកលេងកំពង់សោមក្រោយបើកដំណើរការផ្លូវល្បឿនលឿន ក៏ភ្ញៀវទេសចរមួយចំនួនបានយកអហារ និងមានរបរផ្ទាល់ខ្លួនមកជាមួយ ដើម្បីកាត់បន្ថយការចំណាយរបស់ពួកគេ ។ ម្យ៉ាងទៀតភ្ញៀវទេសចរ មកលេងកំពង់សោម ក៏លេងតែតំបន់ជុំវិញឆ្នេរ ដូច្នេះអាជីវកម្មឆ្ងាយពីឆ្នេររាងមិនសូវកាក់កប ។

ប្រធានមន្ទីរទេសចរណ៍ខេត្តព្រះសីហនុ លោកតាំង សុចិត្រគ្រឹះស្នា បានឱ្យដឹងថា ផលប៉ះពាល់ពីការចាកចេញ របស់ជនជាតិចិន និងវៀតណាមវា មិនយូរអង្វែងទេ ហើយការចាកចេញនេះ គឺចេញតែក្រុមអ្នកលេងល្បែង ឬមិនស្របច្បាប់ តែនៅពេលបន្តិចទៀត ជនជាតិបរទេសដែលចូលមកកំពង់សោមវិញ ជាអ្នកវិនិយោគអ្នករកស៊ី ភ្ញៀវទេសចរ ដែលអាចបង្កើនចំណូលដល់អាជីវករ និងម្ចាស់អគារឡើងវិញបានហើយ៕