ដោយៈ សុផារី

តាកែវៈ តំបន់ជាយរាជធានីភ្នំពេញ នៅតាមបណ្តាខេត្តមួយចំនួន បានក្លាយជាទីតាំងថ្មីមួយ សម្រាប់ការវិនិយោគ ទៅលើគម្រោងលំនៅឋាន និងដីឡូតិ៍ នាពេលបច្ចុប្បន្ននេះ។

ជាក់ស្ដែង គម្រោងបុរីដ៏ធំមួយ បានសម្លឹងឱកាសវិនិយោគ និងបានបោះទុនច្រើនលានដុល្លារ ក្នុងការអភិវឌ្ឍលើគម្រោងបុរីមួយ នៅដើមផ្លូវចូលរមណីយដ្ឋានភ្នំតាម៉ៅ ខេត្តតាកែវ ដែលមានចម្ងាយមិនឆ្ងាយពីរាជធានីភ្នំពេញឡើយ។

គម្រោងបុរីនេះមានឈ្មោះថា HK Residence ដែលមានទីតាំងស្ថិតនៅភូមិកណ្ដឹងតូច ឃុំកណ្ដឹងតូច ស្រុកបាទី ខេត្តតាកែវ ស្ថិតនៅព្រំប្រទល់រវាងខេត្តកណ្តាលនិងរាជធានីភ្នំពេញ។

HK Residence សាងសង់ប្រភេទផ្ទះវីឡាតឿ ស្ថិតនៅលើទំហំផ្ទះ ១៣,៥ម៉ែត្រគុណ៧,២ និងទំហំដី ២៣,៥ ម៉ែត្រ គុណ ៧,២ ម៉ែត្រ ដែលមាន៣បន្ទប់គេងនិង៣បន្ទប់ទឹក អមជាមួយសួនច្បារដ៏ស្រស់ស្អាត នៅក្នុងផ្ទះនីមួយៗដាច់ដោយឡែកពីគ្នា។ ជាពិសេ​ស ផ្លូវនៅក្នុងបុរីមានទំហំ២០ទៅ៣០ម៉ែត្រ និងមានសួនច្បារ ទីលានកំសាន្តសម្រាប់កុមារ កន្លែងហាត់ប្រាណ ។ល។

លោក ចាប ពៅ អគ្គនាយកបុរី HK Residence បានមានប្រសាសន៍ឱ្យដឹងនាពេលថ្មីៗនេះថា មូលហេតុដែលក្រុមហ៊ុនរបស់លោក ឈានជើងចូលមកអភិវឌ្ឍន៍គម្រោងលំនៅឋាន នៅក្នុងតំបន់នេះ ដោយសារក្រុមហ៊ុនសម្លឹងមើលឃើញ លក្ខខណ្ឌអំណោយផល នៃភាពងាយស្រួលក្នុងការធ្វើដំណើរពីរាជធានីភ្នំពេញ តាមរយៈផ្លូវជាតិលេខ២ ដែលបានសម្រេចការសាងសង់ស្ទើ១០០ភាគរយហើយ ជីវភាពធូរធាររបស់ប្រជាពលរដ្ឋ នៅក្នុងមូលដ្ឋាន កាន់តែជំរុញសក្តានុពលវិនិយោគនៅក្នុងតំបន់នេះ។

លោកបានបញ្ជាក់ថា បន្ថែមលើសនេះ បុរីមានទីតាំងស្ថិតនៅជិតផ្លូវក្រវាត់ក្រុងទី៤ ដែលគ្រោង និងសាងសង់ នាពេលខាងមុខឆាប់ៗនេះផងដែរ។ ជាពិសេស ទីតាំងរមណីយដ្ឋានភ្នំតាម៉ៅ គឺជារមណីយដ្ឋានដែលមានចម្ងាយជិតបំផុតពីរាជធានីភ្នំពេញ។

លោកបញ្ជាក់ថា “ប្រសិនបើយើងទិញផ្ទះ ដែលមានទីតាំងនៅកៀករាជធានីភ្នំពេញ នៅកៀកផ្លូវក្រវាត់ក្រុងផង ធ្វើដំណើរត្រឹម១៥នាទីហើយតម្លៃក៏មានភាពសមរម្យផងនោះ តើបងប្អូននឹងចំណេញច្រើនប៉ុណ្ណា?”។

ក្រៅពីគម្រោងរបស់លោកចាប ពៅបានបង្ហើបឲ្យដឹងថា នៅក្នុងតំបន់នេះ ក៏មានគម្រោងវិនិយោគធំៗជាច្រើន គ្រោងមកបណ្ដាក់ទុន ដូចជា គម្រោងរមណីយដ្ឋាន ខ្នាតអន្តរជាតិលំដាប់ខ្ពស់ ទំហំជាង៥០ហិចតា និងគម្រោងបុរីរបស់ក្រុមហ៊ុនផ្សេងៗទៀត។ អ្វីដែលសំខាន់ជាងនេះ ការអភិវឌ្ឍលើបណ្ដាញហេដ្ឋារចនាសម្ព័ន្ធ ផ្លូវ ទឹក ភ្លើង គឺមានគ្រប់គ្រាន់ ដោយមិនមានភាពខ្វះខាតឡើយ ដែលនេះនឹងបង្កលក្ខណៈកាន់តែងាយស្រួល ដល់ការរស់នៅរបស់អតិថិជន។

លោកអគ្គនាយកអះអាងថា ក្នុងរយៈពេលត្រឹម៣ទៅ៥ឆ្នាំខាងមុខ តម្លៃដី និងផ្ទះនៅក្នុងតំបន់នេះ នឹងកើនឡើងពីរដង ហើយកំឡុងពេលនេះគឺជាឱកាសល្អសម្រាប់អ្នក ដែលមានបំណងចង់វិនិយោគ ដោយសារតម្លៃដីធ្លី និងផ្ទះ នៅពេលនេះមានតម្លៃសមរម្យនៅឡើយ។

លោកចាប ពៅ បានឱ្យដឹងថា គិតត្រឹមដើមខែកញ្ញាឆ្នាំ២០២២ បុរីទទួលបានការគាំទ្រយ៉ាងច្រើន ពីសំណាក់អតិថិជនទាំងក្នុងមូលដ្ឋាន និងក្នុងរាជនីភ្នំពេញ ដោយសម្រេចការលក់បាន ប្រមាណ២០ភាគរយក្នុងរយៈពេលខ្លីប៉ុណ្ណោះ៕

 ដោយៈ វឌ្ឍនៈ

ភ្នំពេញៈ ស្ថានភាពអចលនទ្រព្យ នៅក្នុងប្រទេសកម្ពុជាស្ថិតនៅក្នុងភាពមិនទាន់ច្បាស់លាស់នៅឡើយ ហើយអ្នកដែលចង់បង្កើតក្រុមហ៊ុនថ្មីៗក្នុងវិស័យអចលនទ្រព្យក៏ គួរមានការប្រុងប្រយ័ត្នខ្ពស់ដែរ។

លោកឧកញ៉ាបណ្ឌិតគីម ហ៊ាង ដែលជាបុគ្គលជោគជ័យក្នុងវិស័យអចលនទ្រព្យមួយរូប បានផ្ដល់ជាទស្សនទានមួយចំនួន ដល់អ្នកគ្រោងនឹងបើកក្រុមហ៊ុនក្នុងវិស័យអចលនទ្រប្យនៅឆ្នាំក្រោយ។

លោកឧកញ៉ាបានមានប្រសាសន៍ថា “អ្នកចង់បើកក្រុមហ៊ុនReal Estate ក្នុងឆ្នាំ២០២៣ គាត់ត្រូវរកបង្អែកដ៏រឹងមាំមួយដើម្បីដើរតាម ។ មានន័យថា គាត់ត្រូវធ្វើជារោមដំរី ជើងដំរីក៏បានដែរ ដោយមិនចាំបាច់ធ្វើជាក្បាល តែជាក្បាលមាន់នោះទេ”។ លោកបន្តថា “ក្នុងន័យនេះ បើសិនជាយើងមានក្រុមហ៊ុនណាមួយ ឬមានអ្នកណាម្នាក់ខ្លាំង ក្នុងវិស័យអចលនទ្រព្យ យើងសុំគាត់នៅអែបៗ ដើម្បីទប់យើងមិនឱ្យដួល ហើយយើងក៏ស្វះស្វែងរកឱកាស”។

លោកឧកញ៉ាបន្តថា ការបើកក្រុមហ៊ុនមួយ គឺត្រូវចំណាយច្រើនណាស់ ដូចជា ការជួលការិយាល័យ ចំណាយទៅលើការផ្សព្វផ្សាយពាណិជ្ជកម្ម បុគ្គលិក និងការបង់ពន្ធជាដើម។ ដូច្នេះហើយបើសិនជាយើងមិនមានបង្អែករឹងមាំ មិនមានហិរញ្ញវត្ថុច្បាស់លាស់ យើងត្រូវការចំណាយច្រើនដែលពេលវេលានេះ មិនមែនជាពេលវេលា ដែលយើងត្រូវចំណាយច្រើននោះទេ។

លោកឧកញ៉ាបណ្ឌិតគីម ហ៊ាងបានបន្តថា ក្នុងស្ថានភាពបែបនេះ សូមកុំអាលបើកជាក្រុមហ៊ុនដោយខ្លួនឯង កុំដាក់យីហោខ្លួនឯង ឬកុំធ្វើជាក្បាលមាន់ តែសូមធ្វើជាក្រចកជើងដំរីសិនទៅ ដែលមានន័យថាមានក្រុមហ៊ុនណាធំ សូមដើរតាមគេបណ្ដើរៗទៅ ហើយនៅពេលយើងមានបទពិសោធន៍ មានទីផ្សារហើយនោះយើងបើកខ្លួនឯងទៅ។

លោកឧកញ៉ាបន្ថែមថា ក្នុងស្ថានភាពបែបនេះ បើសិនជាយើងចង់បើកក្រុមហ៊ុន សូមទៅសិក្សាឬធ្វើការជាប្រធានផ្នែក នៅក្នុងក្រុមហ៊ុនណាមួយជាមុនសិន ពីព្រោះប្រធានផ្នែកនឹងមានបុគ្គលិក នៅក្រោមបង្គាប់របស់យើងមានក្រុមការងារបួនដប់នាក់ ហើយយើងចេញប្រតិបត្តិការរកលុយជូនក្រុមហ៊ុន បានប្រាក់ ខែបានកម្រៃជើងសារ ដោយយើងមិនចាំបាច់ចំណាយលើថ្លៃជួលការិយាល័យ ថ្លៃបង់ពន្ធ ថ្លៃទឹក ថ្លៃភ្លើងនោះឡើយ ។

លោកបញ្ជាក់ថា “ពេលយើងមានលុយគ្រប់គ្រាន់ មានកំលាំងការងារគ្រប់គ្រាន់ មានបទពិសោធន៍មានទីផ្សាររួចហើយ យើងចេញទៅបើកក្រមហ៊ុនខ្លួនឯង យើងមានអ្វីៗគ្រប់អស់ហើយ អញ្ចឹងដំណើរការក្រុមហ៊ុនយើងនឹងមិនមានបញ្ហានោះទេ ” ។

លោកឧកញ៉ាបញ្ជាក់ថា នៅក្នុងដំណើរទៅមុខ វិស័យនេះនឹងអាចបញ្ជាក់ថា អ្នកណាជាអ្នកខ្លាំង ហើយអ្នកខ្លាំងនឹងទៅមុខ អ្នកណាខ្សោយនឹងត្រូវបិទទ្វារ វាមិនខុសពីការរត់ម៉ារ៉ាតុង ចំងាយ១០០គីឡូម៉ែត្រនោះទេ អ្នកណាខ្សោយនឹងត្រូវឈប់ ហើយអ្នកខ្លាំងនឹងបន្តទៅមុខរហូតដល់ទី៕

 ដោយៈ វឌ្ឍនៈ

តាកែវៈ ការអភិវឌ្ឍអចលនទ្រព្យជាតំបន់លំហែកាយ នៅក្នុងប្រទេសកម្ពុជា ត្រូវបានមើលឃើញថា កំពុងមានការទាក់ទាញជាបន្តបន្ទាប់ជាពិសេសនៅតំបន់តាមបណ្ដាខេត្ត ដែលមានរមណីយដ្ឋានទេសចរណ៍ ក្នុងនោះដែរបណ្ដាខេត្តមាត់សមុទ្រ និងភ្នំមានការទាក់ទាញជាងគេ។

ជាក់ស្តែងតំបន់មួយចំនួននៅប៉ែកខាងលិច នៃខេត្តតាកែវក៏ឃើញថាកំពុងទទួលបានការអភិវឌ្ឍ ជាតំបន់លំហែកាយដ៏ទាក់ទាញមួយផងដែរ។

លោកCooler Tan អគ្គនាយកនៃក្រុមហ៊ុនYoungsia Real Estate ជាអ្នកវិនិយោគ និងជាអ្នកអភិវឌ្ឍន៍ដីឡូត៏លំហែរ នៅក្នុងតំបន់ប៉ែកសមុទ្របានមានប្រសាសន៍ប្រាប់គេហទំព័រ Property Area ឱ្យដឹងថាបច្ចុប្បន្ននេះ ក្រុមហ៊ុនបស់លោកមិនត្រឹមតែអភិវឌ្ឍន៍ នៅតាមតំបន់ឆ្នេរប៉ុណ្ណោះទេ តែក្រុមហ៊ុនបានពង្រីកមកកាន់តំបន់មួយចំនួ នៃខេត្តតាកែវផងដែរ ជាពិសេសនៅប៉ែកខាងលិចនៃខេត្តតាកែវ ។

លោកបន្តថា “ដោយសារតែមើលឃើញពីសក្ដានុពល នៃវិស័យទេស​ចរណ៍នៅក្នុងតំបន់ប៉ែកខាងលិច នៃខេត្តតាកែវកំពុងមានការទាក់ទាញ មានទេសចរជាច្រើនទៅកម្សាន្តនៅទីនោះ ទើបក្រុមហ៊ុនបានសម្រេចបណ្ដា​ក់ទុនវិនិយោគជាដីឡូត៏លំហែនៅទីនោះ ដើម្បីបំពេញតម្រូវការប្រជាពលរដ្ឋឋ​”។លោកបានបន្តថា “នៅពេលប្រជាពលរដ្ឋមានប្រាក់ចំណូល កាន់តែច្រើន ជីវភាពកាន់តែធូរធារ ពួកគាត់ក៏ត្រូវការគុណភាព នៃជីវិតផងដែរ ដែលសំដៅទៅលើការកម្សាន្តសប្បាយ ជាមួយគ្រួសារបង្កើតសុភមង្គលក្នុងគ្រួសារ”។

លោកបាននិងកំពុងវិនិយោគគំរោងដីឡូត៍ “ឋានសួគ៌លំហែរ” ដែលស្ថិតនៅតំបន់អន្លង់ភ្ញៀវ កំពូលពេជ្រ ត្រីមាស និងតំបន់រមណីយដ្ឋានជាច្រើនទៀត។ គំរោងនេះមានដីទំហំសរុប៣៤ហិកតា ដែលបាននិងកំពុងរៀបចំហេដ្ឋារចនាសម្ព័ន្ឋ ដោយមានសួនច្បារ សួនទឹក និងហេដ្ឋារចនាសម្ព័ន្ឋជាច្រើន ដើម្បីបំពេញតម្រូវការរបស់អតិថិជន ដែលចង់បានដីសំរាកលំហែរពិតប្រាកដ។

លោកCooler Tanបានបន្ថែមថា “ស្រុកត្រាំកក់ នៃខេត្តតាកែវ ប៉ែកខាងលិច ជាពិសេសក្នុងស្រុកត្រាំកក់ នឹងក្លាយជាតំបន់ឋានសួគ៌មួយ នៅក្នុងព្រះរាជាណាចក្រកម្ពុជា”។

លោកបានបន្តឲ្យដឹងទៀតថា ក្រោយពីក្រុមហ៊ុនរបស់យើងបានសម្រេចបោះទុន វិនិយោគជាតំបន់លំហែកាយថ្មីមួយ នៅទីនោះដែរយើងមានផែនការក្នុងការកែប្រែ និងធ្វើឱ្យតំបន់នេះកាន់តែទាក់ទាញ ជាតំបន់ដែលធ្វើឱ្យប្រជាពលរដ្ឋចង់រស់នៅ ជាពិសេសយើងនឹងអភិវឌ្ឍន៍បន្ថែមនូវហេដ្ឋារចនាសម្ព័ន្ធ កាន់តែងាយស្រួលចូលទៅកាន់តំបន់នោះ គឺធ្វើឱ្យតំបន់នោះក្លាយជាតំបន់ឋានសួគ៌ ដូចនឹងគម្រោងរបស់ខ្លួន គម្រោងឋានសួគ៌លំហែរ។

លោកបានលើកឡើងថា អ្វីដែលក្រុមហ៊ុនបានអភិវឌ្ឍន៍នៅពេលនេះ គឺដីឡូត៏លំហែសម្រាប់អ្នកមានជីវភាពមធ្យម ដោយក្នុងមួយឡូត៏ត្រឹមតែជាង៤០០០ដុល្លារអាមេរិកប៉ុណ្ណោះ បើអតិថិជនបង់ផ្ដាច់ ហើយអតិថិជនក៏អាចទិញគម្រោងដីឡូត៏របស់យើង ដោយបង់រំលស់ត្រឹមតែមួយខែ៥០ដុល្លា​រអាមេរិកប៉ុណ្ណោះ ។ អ្វីដែលពិសេសនោះ គម្រោងនេះមានទំហំដីដល់ទៅ៣៤ហិចតា ដែលល្អសម្រាប់ប្រែក្លាយតំបន់មួយនេះ ទៅជាតំបន់លំហែរ​កាយប្រកបដោយគុណភាព ។

ដោយឡែកលោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា ក៏បានលើកឡើងផងដែរថា ការអភិវឌ្ឍផ្ទះឬតំបន់លំហែរកាយ នឹងក្លាយជាការអភិវឌ្ឍដ៏ពេញនិយមមួយ នៅក្នុងប្រទេសកម្ពុជា ពីព្រោះនៅពេលប្រជាពលរដ្ឋមានជីវភាពកាន់តែធូរធា ផ្ទះទី២នឹងមានតម្រូវការខ្ពស់ សម្រាប់ពួកគាត់ទិញទុកលំហែរពេលចុងសប្ដាហ៍ ឬក៏ពេលឈប់សម្រាកក្នុងថ្ងៃបុណ្យជាតិធំៗ៕

ដោយៈ សុខុម

ប៉េកាំង: វាជាដំណឹងដ៏ល្អមួយ ដែលក្រុមនិយ័តករហិរញ្ញវត្ថុនៃប្រទេសចិន បានបញ្ជាឱ្យធនាគារធំៗបំផុតចំនួន៦ បញ្ចេញឥណទានរហូតដល់ទៅ៨៤,៣២ពាន់លានដុល្លារអាមេរិក ដើម្បីជួយស្រោចស្រង់វិស័យអចលនទ្រព្យ ដែលកំពុងធ្លាក់ចូលក្នុងវិបត្តិសាច់ប្រាក់កាន់តែធ្ងន់ធ្ងរទៅៗ។

ទីភ្នាក់ងារព័ត៌មានដ៏ល្បីល្បាញ Bloomberg News បានចុះផ្សាយដោយដកស្រង់ប្រភពស្និទ្ធ នឹងបញ្ហានេះកាលពីថ្ងៃសុក្រ ទី៣០ ខែកញ្ញា ថា ធនាគារកណ្ដាលចិន និងគណៈកម្មាធិការនិយតកម្មធនាគារ និងធានារ៉ាប់រងចិន (CBIRC) បានបញ្ជាឱ្យធនាគារ ដែលគ្រប់គ្រងដោយរដ្ឋជួយតាមគ្រប់ទម្រង់ រួមមាន ទាំងតាមរយៈឥណទានគេហដ្ឋាន ឬ កម្ចីទិញផ្ទះ និងឥណទានដល់បណ្ដាក្រុមហ៊ុនអភិវឌ្ឍន៍ និងការទិញមូលបត្របំណុលរបស់ពួកគេផងដែរ។

ធនាគារកណ្តាលចិន កាលពីថ្ងៃព្រហស្បតិ៍ ទី២៩ ខែកញ្ញា បានដាក់ចេញនូវវិធានការសម្រាប់ការពន្លឿន ការប្រើប្រាស់ប្រាក់កម្ចីពិសេស ដើម្បីធានាជំរុញការលក់លំនៅដ្ឋាន ហើយគ្រោងនឹងណែនាំ ឱ្យបណ្ដាធនាគារពាណិជ្ជ ជួយផ្តល់ការគាំទ្រផ្នែកហិរញ្ញវត្ថុសម្រាប់គម្រោងនេះ។

ក្នុងរយៈពេលប៉ុន្មានខែចុងក្រោយនេះ រដ្ឋាភិបាលចិន បានដាក់ចេញនូវវិធានការជាច្រើន ដើម្បីជួយគាំទ្រដល់សេដ្ឋកិច្ច ប៉ុន្តែការងើបឡើងវិញនៅតែមានសន្ទុះយឺត ដោយសារវិធានការយ៉ាងតឹងរ៉ឹង នៅក្នុងការទប់ស្កាត់វិបត្តិកូវីដ-១៩ និងការដាំក្បាលចុះនៃទីផ្សារអចលនទ្រព្យ។

ទោះជាយ៉ាងណា ទាំងធនាគារកណ្ដាលចិន និងគណៈកម្មាធិការនិយតកម្មធនាគារ និងធានារ៉ាប់រងចិន (CBIRC) មិនអាចទាក់ទងសុំការបំភ្លឺបានទេជុំវិញបញ្ហានេះ៕ Reuters៕

ដោយៈ វឌ្ឍនៈ

ភ្នំពេញៈ មានមនុស្សជាច្រើនបានយល់ច្រឡំ និងផ្សព្វផ្សាយពីកម្រោងអភិវឌ្ឍន៍ព្រលានយន្តហោះ ដោយរំពឹងថាដីធ្លីនៅជុំវិញព្រលានយន្តហោះនឹងហក់ឡើងថ្លៃ ប៉ុន្តែធាតុពិតទៅតំបន់នៅជុំវិញ គម្រោងអភិវឌ្ឍន៍ព្រលានយន្តហោះនឹងមិនឡើងថ្លៃខ្ពស់បន្តទៀតទេ ឬសឹងតែមិនឡើងតែម្ដង។

អ្នកនាងជិន ច័ន្ទដាលុច្ស ប្រធានផ្នែកវាយតម្លៃនៃក្រុមហ៊ុនអចលនទ្រព្យ CBRE Cambodia បានមានប្រសាសន៍តាមទូរសព្ទឱ្យដឹងថា តាមពិតទៅមនុស្សមួយចំនួន គាត់យល់ច្រលំថា នៅពេលមានការអភិវឌ្ឍព្រលានយន្តហោះ នឹងធ្វើឱ្យតម្លៃដីធ្លីរបស់គាត់ឡើងថ្លៃខ្ពស់។ ផ្ទុយទៅវិញដីធ្លីដែលនៅជាប់នឹងព្រលានយន្តហោះ ឬក្បែរៗព្រលានយន្តហោះមិនអាចហក់ឡើងខ្ពស់បានទេ ។

អ្នកនាងបន្តថា “ដីនៅជិតព្រលានយន្តហោះ គេមិនអាចយកទៅអភិវឌ្ឍន៍ជាអគារខ្ពស់ៗបានទេ ហើយបើសង់បុរីលំនៅឋាន ក៏ប្រជាពលរដ្ឋ អ្នកទិញ មិនចង់ទៅរស់នៅក្បែរព្រលានយន្តហោះដែរ”។ អ្នកនាងបន្តថា “ដូច្នេះតម្លៃនៅតំបន់ជុំវិញនោះ នឹងមិនអាចឡើងថ្លៃបានទេ។ ជាក់ស្ដែងព្រលានយន្តហោះភ្នំពេញយើង មិនមានអគារខ្ពស់ៗសង់នៅក្បែរនោះទេ ពីព្រោះថាវាច្បាប់ ដែលកំណត់ដោយអាកាសចរណ៍ គឺមានតែផ្ទះពលរដ្ឋនិងជាតំបន់ឧស្សាហកម្មប៉ុណ្ណោះ”។

អ្នកនាងបន្ថែមថា ដីឧស្សាហកម្មក៏មិនអាចឡើងថ្លៃខ្ពស់បានដែរ គឺតម្លៃមួយសមរម្យ។ ក្នុងន័យនេះ យើងមិនមែនសំដៅថា ដីនៅតំបន់ជុំវិញព្រលានយន្តហោះអត់ឡើងថ្លៃទេ គឺឡើងនិងតែឡើងគ្រាន់តែអត្រានៃការឡើងថ្លៃទាបជាងតំបន់ ដែលនៅឆ្ងាយពីព្រលានយន្តហោះ ។

លោកស៊ិន ចាន់សិរីវត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិលបានឱ្យដឹងផងដែរថា បច្ចុប្បន្ននេះគម្រោងអភិវឌ្ឍន៍ព្រលានយន្តហោះពីរ កំពុងសាងសង់យ៉ាងមមាញឹក គឺព្រលានយន្តហោះអន្តរជាតិខេត្តសៀមរាប និងព្រលានយន្តហោះអន្តរជាតិតេជោស្ថិតនៅក្នុងស្រុកកណ្ដាលស្ទឹង ខេត្តកណ្ដាល ហើយព្រលានយន្តហោះអន្តរជាតិខេត្តសៀមរាប នឹងដាក់ដំណើរការមុន ព្រលានយន្តហោះតេជោដោយសារតែគម្រោងនេះ បានដំណើរការសាងសង់មុន៕

ដោយៈ សុផារី

ភ្នំពេញៈ ទោះប្រឈមនឹងវិបត្តិជាបន្តបន្ទាប់ក្តី លំហូរវិនិយោគលើវិស័យអចលនទ្រព្យនៅក្នុងប្រទេសកម្ពុជា នៅតែបន្តហូរចូលមក ដែលបង្ហាញពីទំនុកចិត្តខ្ពស់ មកលើស្ថិរភាពសេដ្ឋកិច្ច ជាពិសេសភាពរឹងមាំនៃទីផ្សារអចលនទ្រព្យកម្ពុជាផងដែរ។

អ្នកជំនាញលើកឡើងថា ការបន្តផ្តល់ការទុកចិត្ត មកលើអចលនទ្រព្យកម្ពុជានេះ មិនមែនជាភាពចៃដន្យនោះទេ តែដោយសារតែកម្ពុជាមានយន្តការពិសេសៗមួយចំនួន ខុសពីប្រទេសផ្សេងទៀត។

លោកសន សៀប ប្រធានក្រុមហ៊ុនអចលនទ្រព្យ Key Real Estate បានមានប្រសាសន៍នៅថ្ងៃទី២៩ ខែកញ្ញា ឆ្នាំ២០២២នេះថា ប្រទេសកម្ពុជាក៏ទទួលផលប៉ះពាល់ ពីវិបត្តិសេដ្ឋកិច្ចទាំងនេះផងដែរ ប៉ុន្តែស្ថិតនៅក្នុងកម្រិតតិចតួចជាងប្រទេសផ្សេងៗ។

អ្នកជំនាញរូបនេះលើកឡើងថា “ការទទួលបានជោគជ័យលើការគ្រប់គ្រង់ការឆ្លងរាលដាលនៃជំងឺកូវីដ១៩ គោលនយោបាយចាក់វ៉ាក់សាំង និងការវិនិយោគលើហេដ្ឋារចនាសម្ព័ន្ធធំៗ នៅតាមប៉ូលសេដ្ឋកិច្ចសំខាន់ៗរបស់​រដ្ឋាភិបាលពិតជាធ្វើបានល្អពីរដ្ឋាភិបាល”។លោកបន្ថែមថា ការវិនិយោគលើហេដ្ឋារចនាសម្ព័ន្ឋ នៅតំបន់សក្តានុពលសំខាន់ៗ ដែលចំណាយថវិកាយ៉ាងច្រើនសន្ធឹកសន្ធាប់ ជាគោលការណ៍ដែលផ្តល់ទំនុកចិត្តដល់អ្នកវិនិយោគ ទាំងជាតិ និងអន្តរជាតិ ឱ្យបន្តធ្វើការវិនិយោគនៅក្នុងប្រទេសកម្ពុជាទៀត”។

លោកសន សៀបបានបញ្ជាក់ថា រដ្ឋាភិបាលបានចំណាយទុនយ៉ាងច្រើន ដើម្បីយកឱកាសក្នុងពេលស្ងប់ស្ងាត់ រៀបចំហេដ្ឋារចនាសម្ព័ន្ធ ដើម្បីត្រៀមខ្លួនរួចជាស្រេច ក្នុងការទទួលភ្ញៀវទេសចរណ៍ ធ្វើដំណើរចេញចូលប្រទេស ដឹកទំនិញ ។ល។ ដើម្បីឲ្យសកម្មភាពសេដ្ឋកិច្ចរបស់យើងរីកចម្រើនឡើងវិញ។

លោកបន្តថា “នៅពេលមានការសាងសង់ ហេដ្ឋារចនាសម្ព័ន្ធធំៗ នៅតាមតំបន់នានា ក៏ផ្តល់ទំនុកចិត្តដល់ទីផ្សារអចលនទ្រព្យ។ អ្នកវិនិយោគជាច្រើនមានទំនុកចិត្ត មកលើទីផ្សារអចលនទ្រព្យរបស់យើង ដោយសារឃើញការរីកចម្រើននេះហើយ”។

ជាមួយគ្នានេះ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ នាពេលថ្មីៗនេះថា វិស័យអចលនទ្រព្យនៅតែបន្តភាពរឹងមាំ តាមរយៈយន្តការផ្សេងគ្នានៃចូលមកវិនិយោគរបស់ជនជាតិបរទេស ដោយសារទំនាក់ទំនងល្អ រវាងបណ្តាប្រទេសជាដៃគូ។ ជាក់ស្តែង វិនិយោគិនចិនបានចូលមកកាន់កម្ពុជា ហើយបន្តចូលទៅវិនិយោគនៅក្នុងក្រុងព្រះសីហនុ។ ជនជាតិជប៉ុន និងអឺរ៉ុប ក៏បានវិនិយោគនៅក្នុងប្រទេសកម្ពុជាផងដែរ។

លោកបន្តទៀតថា “ការដឹកនាំ និងការសម្រេចចិត្តដ៏ត្រឹមត្រូវរបស់រដ្ឋាភិបាលកម្ពុជា  ក្នុងការអនុវត្តការចាក់វ៉ាក់សាំង ដល់ប្រជាពលរដ្ឋកម្ពុជា បានអនុញ្ញាតឱ្យកម្ពុជា អាចបន្តខឿនសេដ្ឋកិច្ចរបស់ខ្លួនបានរលូន”។

លោកមានប្រសាសន៍ថា “ធៀបនឹងកំណើនតម្លៃ វិស័យអចលនទ្រព្យនៅកម្ពុជា មានភាពល្អប្រសើរជាងបណ្តាប្រទេសផ្សេងៗទៀត ដោយសារប្រទេសផ្សេង តម្លៃអចលនទ្រព្យបានកើនឡើងសល់កម្រិតមួយហើយ ខណៈប្រទេសកម្ពុជា ជាការអភិវឌ្ឍក្មេងខ្ចី នោះឱកាសនៃការរីកចម្រើន និងតម្លៃដីធ្លីនៅមានកម្រិតខ្ពស់”៕

ដោយៈ គង់ ម៉ាលីន

       ភ្នំពេញៈ រដ្ឋាភិបាលតាមរយៈក្រសួងទេសចរណ៍ បាននិងកំពុងរៀបចំនិងត្រៀមបោះពុម្ភផ្សាយ “ផែនទីទេសចរណ៍ម្ហូបអាហារកម្ពុជា” ដែលមានបញ្ជាក់ពីម្ហូបអាហារនៅតាមខេត្ត និងតំបន់សម្រាប់បង្កើនការទាក់ទាញភ្ញៀវទេសចរ ដែលនិយមចូលចិត្តទទួលទានម្ហូបអាហារ និងឈ្វេងយល់/ស្វែងយល់ពីម្ហូបអាហារប្រចាំតំបន់។

មានប្រសាសន៍ក្នុងសន្និសីទស្ដីពីសមិទ្ធផល និងវឌ្ឍនភាពការងាររយៈពេល៥ឆ្នាំរបស់ក្រសួងទេសចរណ៍ នៅទីស្ដីការក្រសួងទេសចរណ៍ នាថ្ងៃទី៣០ ខែកញ្ញា ឆ្នាំ២០២២នេះ លោកអាំង សុវណ្ណរ័ត្ន អគ្គនាយករង នៃអគ្គនាយកដ្ឋានអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ បានលើកឡើងថា នៅពេលឆាប់ខាងមុខនេះ ក្រសួងទេសចរណ៍នឹងបោះពុម្ភផ្សាយ “ផែនទីទេសចរណ៍ម្ហូបអាហារកម្ពុជា” សម្រាប់បង្កើនភាពទាក់ទាញភ្ញៀវទេសចរបន្ថែម។

លោកបានបន្តថា នៅពេលឆាប់ខាងមុខនេះ យើងនឹងបោះពុម្ភផ្សាយជាផែនទីទេសចរណ៍ម្ហូបអាហារកម្ពុជា ថានៅស្រុកខ្មែរ ខេត្តណាខ្លះមានសក្ដានុពលម្ហូបអាហារ ឧទាហរណ៍ថានៅបាត់ដំបងមានមីកូឡាជាដើម។លោកបន្តថា បច្ចុប្បន្នក្រសួងបានរៀបចំជា Soft បណ្ដើរៗហើយ ហើយក្នុងពេលឆាប់ៗខាងមុខ នឹងបោះពុម្ភជាខិត្តបណ្ណ កូនសៀវភៅ ឬ Pocket Guidebook សម្រាប់ចែកជូនដល់ភ្ញៀវទេសចរទាំងអស់នៅ តាមមណ្ឌលព័ត៌មានទេសចរណ៍គ្រប់រាជធានី-ខេត្ត។

ផែនទីទេសចរណ៍ម្ហូបអាហារនោះ គឺមានរំលេចអំពីរូបភាព បញ្ជាក់ពីឈ្មោះម្ហូបអាហារ ប្រវត្តិ របៀបធ្វើ ដើម្បីទាក់ទាញភ្ញៀវឱ្យងាយស្រួល ក្នុងការឈ្វេងយល់ ពីព្រោះជូនកាលភ្ញៀវទេសចរណ៍ បានភ្លក្សរសជាតិហើយ បើបានដឹងប្រវត្តិទៀតគឺពួកគេកាន់តែជក់ចិត្ត។ ក្រុមជំនាញក៏នឹងមានការបកប្រែជាភាសាអង់គ្លេស និងភាសាបរទេសផ្សេងៗ សម្រាប់បង្កើនភាពទាក់ទាញភ្ញៀវទេសចរគ្រប់ជាតិសាសន៍។

លោកបានបន្តឲ្យដឹងទៀតថា ទេសចរណ៍ម្ហូបអាហារនេះ គឺជាសក្ដានុពលធំ សម្រាប់គោលដៅទេសចរណ៍នីមួយៗ ហើយវាក៏ជាអនុវិស័យមួយក្នុងវិស័យទេសចរណ៍និងវប្បធម៌ ដែលមានភាពទាក់ទាញយ៉ាងសំខាន់សម្រាប់ភ្ញៀវទេសចរ។

ក្រៅពីនេះ កម្ពុជាក៏ខិតខំផ្សព្វផ្សាយ គោលដៅទេសចរណ៍កម្ពុជាជាគោលដៅម្ហូបអាហារ (Gastronomy) និងមានការផលិតស្ពតវីដេអូ ដែលមានទាំងភាសាខ្មែរ បកប្រែជាភាសាអង់គ្លេស និងភាសាចិន ដើម្បីឱ្យភ្ញៀវទេសចរងាយស្រួលយល់ដឹង៕

 ដោយៈ សុផារី

សៀមរាបៈ នៅព្រឹកថ្ងៃទី ១ ខែតុលា ឆ្នាំ ២០២២ ស្អែកនេះសម្តេចតេជោ​ ហ៊ុន​ សែន​ នាយករដ្ឋមន្រ្តី​នៃកម្ពុជា​ នឹងអញ្ជើញជួបសំណេះ​សំណាល​​ជាមួយប្រជាពលរដ្ឋ ដែលបាន​ចាប់ឆ្នោតមកស់នៅ ​តំបន់អភិវឌ្ឍន៍ភូមិធម្មជាតិរុនតាឯក ក្នុងឃុំរុនតាឯក​ ស្រុកបន្ទាយស្រី​ ខេត្តសៀមរាប។

រាជរដ្ឋាភិបាលកម្ពុជា តាមរយៈគណៈកម្មការអន្តរក្រសួងមួយ ដឹកនាំដោយលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបើកយុទ្ធនាការទ្រង់ទ្រាយធំ ក្នុងការវាស់វែង កំណត់និយាមកាក្បាលដី និងរមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រង របស់អាជ្ញាធរជាតិអប្សរា ក៏ដូចជារុះរើសំណង់ខុសច្បាប់ចេញពីតំបន់ទាំងនេះ។

ការបើកយុទ្ធនាការនេះ បានធ្វើឡើងបន្ទាប់ពីប្រាសាទ ក្នុងតំបន់រម​ណី​យអង្គរ បានរងការព្រមានពីអង្គការយូណេស្កូ ក្នុងការដកប្រាសាទតំបន់រមណីយដ្ឋានអង្គរ ចេញពីបញ្ជីសម្បត្តិបេតិកភណ្ឌពិភពលោក ព្រោះតែសំណង់ជាច្រើន ត្រូវបានសង់ឡើងនៅតំបន់រមណីយដ្ឋានអង្គរ ផ្ទុយពីលក្ខខណ្ឌកំណត់ដោយអង្គការយូណេស្កូ ក្រោយពេលដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោកនាថ្ងៃទី១៤ ខែធ្នូ ឆ្នាំ១៩៩២៕

  ដោយៈ ជេស៊ីកា

       ភ្នំពេញៈ ហេដ្ឋារចនាសម្ព័ន្ឋ ដែលមានតម្លៃជាប្រវត្តិសាស្រ្ត និងមិនអាចកាត់ថ្លៃបាន គឺផ្លូវល្បឿនលឿនភ្នំពេញ ព្រះសីហនុនឹងបើកដំណើរការនៅថ្ងៃនេះហើយ។

ដើម្បីត្រៀមក្នុងការបើកដំណើការ សាកល្បងផ្លូវល្បឿនលឿន ភ្នំពេញ-ព្រះសីហនុ នៅថ្ងៃស្អែក (ថ្ងៃទី០១ ខែតុលា) ឱ្យប្រព្រឹត្តទៅបានប្រកបដោយសុវត្ថិភាព និងមានរបៀបរៀបរយ ថ្នាក់ដឹកនាំក្រសួងបានចុះទៅពិនិត្យ និងផ្ទៀងផ្ទាត់ការងារមួយចំនួន ដែលនៅសេសសល់ជាមួយក្រុមហ៊ុនផ្លូវល្បឿនលឿន។

លោកយិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន កាលពីថ្ងៃទី៣០ កញ្ញា បានអញ្ជើញដឹកនាំក្រុមការងារ បច្ចេកទេសចុះពិនិ ត្យ និងផ្ទៀងផ្ទាត់ការងារមួយចំនួន ដែលនៅសេសសល់ជាមួយក្រុមហ៊ុនផ្លូវល្បឿនលឿន តាមអនុសាសន៍ណែនាំដ៏ខ្ពង់ខ្ពស់ពី លោកទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដើម្បីត្រៀមបើកដំណើរការសាកល្បងនៅថ្ងៃទី១ ខែតុលា ឆ្នាំ២០២២ ដោយមានការអមដំណើរពីសំណាក់ថ្នាក់ដឹកនាំ និងមន្រ្តីជំនាញពាក់ព័ន្ធ ព្រមទាំងអាជ្ញាធរមានសមត្ថកិច្ចពាក់ព័ន្ធ។

ក្នុងការចុះពិនិត្យលើកនេះ ថ្នាក់ដឹកនាំ និងក្រុមការងារបច្ចេកទេស បានធ្វើការផ្ទៀងផ្ទាត់ លើការងារមួយចំនួន ដែលតម្រូវឱ្យមានការកែលម្អ ខណៈពេលចុះត្រួតពិនិត្យ កាលពីថ្ងៃទី២៨ ខែកញ្ញា ក៏ដូចជាយោងលើស្មារតីអង្គប្រជុំកាលពីថ្ងៃទី២៩ ខែកញ្ញា កន្លងទៅ។

បន្ថែមលើសពីនេះ លោករដ្ឋលេខាធិការ បានដឹកនាំក្រុមការងារ និងភាគីសាងសង់ ចុះត្រួតពិនិត្យជាពិសេស នៅតាមកន្លែងឈប់សម្រាកទាំង៤ទីតាំង ដើម្បីដឹងពីវឌ្ឍនភាពការងារ និងបញ្ជាក់ថាការរៀបចំបានត្រឹមត្រូវស្របតាមបទដ្ឋានសុខភាពអនាម័យ សម្រាប់បម្រើជូនសាធារណជន។

ជាលទ្ធផល ថ្នាក់ដឹកនាំក្រសួង និងក្រុមហ៊ុនផ្លូវល្បឿនលឿន បានឯកភាពសម្រេចបើកឱ្យដំណើរការ សាកល្បងផ្លូវល្បឿនលឿនភ្នំពេញ- ព្រះសីហនុ ទៅតាមការគ្រោងទុក ចាប់ពីម៉ោង៧ និង០០នាទីព្រឹក ថ្ងៃទី០១ ខែតុលា ឆ្នាំ២០២២ ស្អែកនេះតទៅ ដោយមិនគិតថ្លៃ រយៈពេលពេញមួយខែ (រហូតដល់ម៉ោង២៣ និង៥៩នាទីរំលងអាធ្រាត ថ្ងៃទី៣១ ខែតុលា ឆ្នាំ២០២២)។

ក្រសួងសាធារណការ និងដឹកជញ្ជូន បានធ្វើការក្រើនរម្លឹកដល់បងប្អូនប្រជាពលរដ្ឋជាថ្មីម្តងទៀត សូមចូលរួមសហការ និងអនុវត្តតាមសេចក្តីណែនាំ បញ្ឈប់នូវការកាត់របងសុវត្ថិភាព ដើម្បីចេញចូល និងគ្រប់គ្រងសត្វពាហនៈ/សត្វចិញ្ចឹមគ្រប់ប្រភេទឱ្យបានគត់មុត។ មួយវិញទៀត ចំពោះបងប្អូន ដែលមានបំណងបើកបរលើផ្លូវថ្មីល្បឿនលឿន សូមធ្វើការស្វែងយល់ពីលក្ខខណ្ឌផ្សេងៗទាក់ទងនឹងផ្លូវនេះ ដែលក្រសួងបានផ្សព្វផ្សាយ ជាពិសេ​សវីដេអូខ្លីស្តីពី “លក្ខខណ្ឌបើកបរលើផ្លូវល្បឿនលឿន” ជាមុនសិន។

កន្លែងឈប់សម្រាកទី១(កំពង់ស្ពឺ) ទី២(កំពង់ស្ពឺខាងលិច) និងទី៤(ព្រៃនប់ខាងលិច) នៅមិនទាន់បានសាងសង់រួចរាល់ ជាស្ថាពរនៅឡើយទេ។ ដោយឡែក កន្លែងឈប់សម្រាកទី៣(កំពង់សិលា) សាងសង់រួចបានមួយផ្នែកធំហើយ ពោលគឺបងប្អូនអាចឆៀងចូល ប្រើប្រាស់បង្គន់អនាម័យនៅកន្លែងឈប់សម្រាកទី៣នេះបាន។

ប៉ុន្តែចំពោះស្ថានីយប្រេងឥន្ធនៈ អាហារដ្ឋាន និងកន្លែងផ្តល់សេវាកម្មនានា គឺមិនទាន់រួចរាល់ អាចបម្រើការបាននៅឡើយទេ។ ក្នុងន័យនេះដែរ ចំពោះបងប្អូន ដែលមានបំណង ក្នុងការធ្វើដំណើលើផ្លូវល្បឿនលឿន កំឡុងពេលសាកល្បងមួយខែនេះ សូមមេត្តាត្រួតពិនិត្យយានយន្ត ឱ្យបានសព្វជ្រុងជ្រោយ ជាពិសេសកម្រិតប្រេងឥន្ធនៈ ដើម្បីធានាថាគ្រប់គ្រាន់សម្រាប់ការបើកបរលើចម្ងាយផ្លូវ១៨៧,០៥គីឡូម៉ែត្រនេះ៕