ដោយ៖ វឌ្ឍនៈ

ភ្នំពេញ ៖ រាជរដ្ឋាភិបាលបានអភិវឌ្ឍផ្លូវជាច្រើនខ្សែទៅកាន់ខេត្តកំពត។ ក្នុងនោះ មានផ្លូវជាតិលេខ៣ ដែលសាងសង់រួចរាល់និងបានដាក់ដំណើរការរួចរាល់ហើយ។

ថ្មីៗនេះ រាជរដ្ឋាភិបាលក៏បានពង្រីកនិងលើកកម្រិតគុណភាពនៃផ្លូវមួយចំនួនទៀតទៅកាន់ខេត្តកំពត ដូចជាផ្លូវជាតិលេខ៤១ ផ្លូវលេខ៣១ និងផ្លូវ៣៣ជាដើម។ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានថ្លែងថា ការអភិវឌ្ឍផ្លូវទៅកាន់ខេត្តកំពត គឺជាការសម្រេចចិត្តដ៏ត្រឹមត្រូវបំផុត។

ថ្លែងនៅក្នុងពិធីបើកការដ្ឋានលើកកម្រិតគុណភាពផ្លូវលេខ៣១ និង៣៣កាលពីព្រឹកថ្ងៃទី៣០ ធ្នូ ២០២២ បានមានប្រសាសន៍ថា ខេត្តកំពតមានសក្ដានុពលនិងឧស្សាហកម្មធុនធំៗជាច្រើន ដែលត្រូវការប្រើប្រាស់ផ្លូវជាចាំបាច់។

ជាការកត់សម្គាល់ នៅក្នុងខេត្តកំពត មានរោងចក្រផលិតស៊ីម៉ង់ធំៗដែលមានសមត្ថភាព ក្នុងការផ្គត់ផ្គង់ផលិតផលស៊ីម៉ង់ទៅកាន់ទីផ្សារកម្ពុជានិងបំពេញតម្រូវការលើការសាងសង់សំណង់នៅកម្ពុជា ។

សម្ដេចតេជោបានបន្តថា “ក្រៅរោងចក្រឧស្សាហកម្មធំៗ ខេត្តកំពត និងកែបក៏ជាតំបន់ទេសចរណ៍ដ៏មានសក្ដានុពល និងមានភ្ញៀវទេសចរជាតិអន្តរជាតិជាច្រើន មកទស្សនា និងកម្សាន្ត។ ដូច្នេះហើយយើងត្រូវតែមានផ្លូវស្អាតផ្លូវធំតភ្ជាប់ពីភ្នំពេញ និងផ្លូវនៅក្នុងតំបន់ក្នុងខេត្តផ្ទាល់តែម្ដង។ ក្រៅពីនេះ កំពតជាខេត្តតែមួយគត់ដែលផលិតអំបិលសម្រាប់ផ្គត់ផ្គង់ក្នុងស្រុកផងដែរ”។

សម្ដេចតេជោបានបន្ថែមថា កាលពីមុនកម្ពុជាចំណាយលុយតិចតែសង់ផ្លូវឱ្យបានវែង តែមកដល់បច្ចុប្បន្ននេះ ទស្សនមួយនេះ ត្រូវបានផ្លាស់ប្តូរហើយ គឺយើងត្រូវការសាងសង់ផ្លូវ ដែលមានគុណភាពជាងមុន។ ជាក់ស្ដែង ផ្លូវដែលបើកការដ្ឋានលើកកម្រិតគុណភាពទាំង២ខ្សែនេះ មានប្រវែងប្រមាណជាង១០០គីឡូម៉ែត្រ តែត្រូវចំណាយថវិការហូតដល់១២០លានដុល្លារអាមេរិក ដែលជាថវិកាសម្បទានរបស់រដ្ឋាភិបាលប្រទេសចិន។ ផ្លូនេះ នឹងជួយជំរុញសេដ្ឋកិច្ចកម្ពុជាឱ្យមានសន្ទុះបន្ថែម ព្រោះនៅពេលមានផ្លូវស្អាតល្អហើយ ការធ្វើដំណើរការក៏លឿនរហ័ស និងអាចចំណាយថវិកាអស់តិច និងពេលវេលាខ្លី៕

    ដោយៈ គង់ ម៉ាលីនណា

       ភ្នំពេញៈ បច្ចុប្បន្ននៅកម្ពុជាកំពុងអនុវត្តកម្មវិធីសិក្សា មុខវិជ្ជាបច្ចេក​ទេសពាក់ព័ន្ធនឹង “ទេសចរណ៍” ដល់សិស្សវិទ្យាល័យចំណេះទូទៅ និងបច្ចេកទេស ពោលគឺនៅថ្នាក់ទី១០ ទី១១ និងទី១២ បន្ថែមពីលើមុខវិជ្ជាចំណេះដឹងទូទៅដែលមានស្រាប់ ខណៈនៅដំណាក់កាលដំបូង មានសាលាចំនួន៤កំពុងអនុវត្តកម្មវិធីសិក្សាជំនាញទេសចរណ៍នេះ។

ព៌តមានដ៏សំខាន់នេះ ត្រូវបង្ហាញឡើងក្នុងឱកាស ដែលក្រសួងទេស​ចរណ៍ និងក្រសួងអប់រំ យុវជន និងកីឡា បានធ្វើពិធីប្រកាសផ្សព្វផ្សាយកម្មវិធីសិក្សា ផ្នែកអប់រំបច្ចេកទេសមធ្យមសិក្សាទុតិយភូមិ ផ្នែកទេសចរណ៍ ជំនាញការិយាល័យជួរមុខ សម្រាប់ប្រើប្រាស់តាមវិទ្យាល័យចំណេះទូទៅ និងបច្ចេកទេស នាថ្ងៃទី២៨ ខែធ្នូ ឆ្នាំ២០២២ នៅទីស្នាក់ការ NOCC។

តើអ្វីទៅជាកម្មវិធីសិក្សាមុខវិជ្ជាបច្ចេកទេស ពាក់ព័ន្ធនឹងទេសចរណ៍នៅវិទ្យាល័យចំណេះទូទៅ និងបច្ចេកទេស?។

លោកទ្រី ឈីវ ប្រធាននាយកដ្ឋានសហប្រតិបត្តិការអន្តរជាតិ និងអាស៊ាន និងជាប្រធានលេខាធិការដ្ឋានគណកម្មាធិការជាតិ អ្នកជំនាញទេស​ចរណ៍ នៃក្រសួងទេសចរណ៍ បានឱ្យដឹងថា កម្មវិធីសិក្សាមុខវិជ្ជាទេសចរណ៍នៅវិទ្យាល័យចំណេះទូទៅ និងបច្ចេកទេស គឺជាការបន្ថែមនូវការបង្រៀនមុខវិជ្ជាដែលពាក់ព័ន្ធ នឹងវិស័យទេសចរណ៍ដល់សិស្ស ដែលសិក្សានៅវិទ្យាល័យចំណេះទូទៅ និងបច្ចេកទេស ពោលគឺចាប់ពីថ្នាក់ទី១០ ទី១១ និងទី១២។

លោកបានបន្តថា កម្មវិធីសិក្សា៣ឆ្នាំនេះ គឺឆ្នាំទី១-ថ្នាក់ទី១០ ដែលមានការសិក្សាអំពីមុខវិជ្ជា ចំណេះដឹងទូទៅផង (អក្សរសាស្ត្រខ្មែរ ភាសាអង់គ្លេស ភូមិវិទ្យា ប្រវត្តិវិទ្យា សីលធម៌-ពលរដ្ឋ​ សេដ្ឋកិច្ចជាដើម) និងទ្រឹស្ដីពាក់ព័ន្ធនឹងទេសចរណ៍ផង សរុប៨៣៦ម៉ោង, ឆ្នាំទី២-ថ្នាក់ទី១១ មានការសិក្សាមុខវិជ្ជាចំណេះដឹងទូទៅដូចគ្នា និងទ្រឹស្ដីពាក់ព័ន្ធនឹងទេសចរណ៍ដូចគ្នា តែក៏បូកថែមនូវការអនុវត្តពាក់ព័ន្ធ នឹងមុខវិជ្ជាទេសចរណ៍ទៀតដែរ សរុប៨៣៦ម៉ោង។ ឆ្នាំទី៣-ថ្នាក់ទី១២ គឺសិក្សានិងអនុវត្តដូចឆ្នាំទី២ គ្រាន់តែកម្រិតលើសឆ្នាំទី២សរុប៧៩៨ម៉ោង។ សរុបទាំង៣ឆ្នាំនេះ គឺម៉ោងសិក្សានិងអនុវត្តមានចំនួនសរុប២៤៧០ម៉ោង។

លោកទ្រី ឈីវ បានបន្តទៀតថា រយៈពេល៣ឆ្នាំនេះ សិស្សនឹងទទួលបានការសិក្សាលើមុខវិជ្ជាសំខាន់ៗ ដូចជា សេវាកម្មម្ហូបអាហារនិងភេសជ្ជៈ ការិយាល័យជួរមុខ ផលិតកម្មម្ហូបអាហារ គេហកិច្ច ការីទេសចរណ៍ ការប្រើប្រាស់កុំព្យូទ័រ បូករួមនឹងចំណេះដឹងផ្សេងៗទៀត និងការអនុវត្តជាក់ស្ដែងផងដែរ។

លោកថា សិស្សខ្លះ នៅពេលរៀនបានយល់ដឹងច្រើន ក៏មានឱកាសរកការងារធ្វើបណ្ដើរៗ។ អ្នកខ្លះទៀត បន្ទាប់ពីបញ្ចប់ការសិក្សា អាចទៅធ្វើការផ្ទាល់តែម្ដងក៏បាន ឬអាចបន្តការសិក្សានៅសាកលវិទ្យាល័យទៀតក៏បាន ដោយសញ្ញាបត្រមុខវិជ្ជា ទេសចរណ៍របស់ពួកគេ មានតម្លៃស្មើនឹងសញ្ញាបត្រមធ្យមសិក្សាទុតិយភូមិ។

បច្ចុប្បន្ននេះ មានសាលាចំនួន៤ ដែលកំពុងអនុវត្តកម្មវិធីសិក្សានេះ ក្នុងនោះរួមមាន ទី១-វិទ្យាស្ថានចំណេះទូទៅ និងបច្ចេកទេសអនុវត្តកំពង់ឈើទាល ខេត្តកំពង់ធំ ទី២-វិទ្យាស្ថានចំណេះទូទៅ និងបច្ចេកទេសឯកជន សន្តហ្វ្រង់ស្វ័រ ខេត្តតាកែវ ទី៣- មជ្ឈមណ្ឌលអប់រំបច្ចេកទេសមិត្តភាពកម្ពុជា-ជប៉ុន ខេត្តសៀមរាប និងទី៤-សាលាចំណេះទូទៅ និងបច្ចេកទេសឯកជន អេស៉ីធី រាជធានីភ្នំពេញ។

ជាមួយគ្នានេះ លោកស្រីនាយិកា ម៉ាថាលា ឡូ មានសំណូមពរចង់ឱ្យរាជរដ្ឋាភិបាលលើកស្ទួយនូវកិត្តិនាម វិទ្យាល័យដែលមានការបណ្ដុះបណ្ដា​លជំនាញទេសចរណ៍ ដែលលោកស្រីពោលថា “វិទ្យាល័យបែបនេះគួរតែក្លាយជាវិទ្យាល័យCredit Best#។

ម្យ៉ាងទៀតសិស្ស ដែលរៀនមុខវិជ្ជាទេសចរណ៍នេះ ពួកគេត្រូវការអនុវត្តផ្ទាល់ ក៏ដូចជារកប្រាក់ចំណូលក្នុងពេលសិក្សា ដើម្បីទ្រទ្រង់ការសិក្សាផងដែរ។

រដ្ឋមន្រ្តីក្រសួងទេសចរណ៍ លោកថោង ខុន បានលើកឡើងថា ការប្រកាសផ្សព្វផ្សាយកម្មវិធីសិក្សា ផ្នែកអប់រំបច្ចេកទេសមធ្យមសិក្សាទុតិយភូមិ ផ្នែកទេសចរណ៍ ជំនាញការិយាល័យជួរមុខ សម្រាប់ប្រើប្រាស់តាមវិទ្យាល័យចំណេះទូទៅ និងបច្ចេកទេសនាពេលនេះ គឺជាសមិទ្ធផលថ្មីមួយទៀតក្នុងប្រព័ន្ធបណ្តុះបណ្តាល ជំនាញទេសចរណ៍ជាតិ។

លោកបន្តថា នេះជាការដាក់បញ្ចូលជាលើកទី១ នូវកម្មវិធីសិក្សាដល់កម្រិតវិទ្យាល័យ ចំណេះទូទៅ និបច្ចេកទេស ដែលនឹងផ្តល់នូវឱកាសឱ្យសិស្សានុសិស្ស អាចចាប់យកជំនាញទេសចរណ៍ ទាំងនៅវ័យក្មេង និងទទួលបានសញ្ញាបត្របច្ចេកទេស និងវិជ្ជាជីវៈ ដែលមានតម្លៃសមមូលនឹងសញ្ញាបត្របាក់ឌុប។

រដ្ឋមន្ត្រីបានបន្តថា កម្មវិធីសិក្សានេះក៏នឹងផ្ដល់ជម្រើសការងារ និងជំនាញបន្ថែមទៀត ដល់យុវជនកម្ពុជា ក្នុងការចាប់យកជំនាញទេសចរណ៍ ទាំងសម្រាប់យុវជនជាប់ ឬធ្លាក់បាក់ឌុប ឬក៏យុវជនដែលបានបញ្ចប់ការសិក្សាថ្នាក់ទី៩៕

ដោយៈ សុខុម

សៀងហៃ: ក្រុមហ៊ុនអភិវឌ្ឍន៍របស់ចិន China Fortune Land Development Co បានព្រមព្រៀងលក់ភាគហ៊ុន និងបំណុលនៅក្នុងបុត្រសម្ព័ន្ធអចលនទ្រព្យចំនួន៤ ក្នុងតម្លៃប្រមាណ១,៨ពាន់លានដុល្លារអាមេរិក ឱ្យទៅបុត្រសម្ព័ន្ធមួយ នៃក្រុមក្រុមហ៊ុន China Resources Land Ltd (CR Land)។

កិច្ចព្រមព្រៀងនេះ ធ្វើឡើងស្របពេលក្រុមនិយ័តករចិន ជំរុញលើកទឹកចិត្តឱ្យបណ្ដាក្រុមហ៊ុនអភិវឌ្ឍន៍ ដែលគ្មានបញ្ហាហិរញ្ញវត្ថុជួយទិញយកគម្រោងពីបណ្ដាបណ្ដាក្រុមហ៊ុនគូប្រជែង ដែលជំពាក់បំណុលរុំកោះ ដើម្បីបន្ធូរបន្ថយវិបត្តិសាច់ប្រាក់ក្នុងវិស័យអចលនទ្រព្យ ដែលមានសារៈសំខាន់ខ្លាំង ចំពោះសេដ្ឋកិច្ចរបស់ប្រទេសចិន។

ក្រុមហ៊ុនអភិវឌ្ឍន៍ China Fortune Land បានចេញសេចក្តីថ្លែងការណ៍កាលពីថ្ងៃពុធ ទី២៨ ខែធ្នូ ថា ប្រតិបត្តិការលក់នេះ គឺជាផ្នែកមួយ នៃផែនការរៀបចំបំណុលឡើងវិញ ដែលត្រូវបានបង្ហាញកាលពីខែតុលា ខណៈក្រុមហ៊ុននេះស្វែងរកមធ្យោបាយផ្សេងៗ ដើម្បីសម្រាលបញ្ហាកង្វះសាច់ប្រាក់ដែលបង្កឡើង ដោយបរិយាកាសសេដ្ឋកិច្ចមិនល្អ និងវិបត្តិកូវីដ-១៩។

ក្រុមហ៊ុនដដែលបញ្ជាក់ថា មួយចំណែកធំនៃប្រាក់ ដែលទទួលបានពីកិច្ចព្រមព្រៀងលក់នេះ “នឹងត្រូវយកទៅសងបំណុល … និងជំរុញការអនុវត្តផែនការរៀបចំបំណុលឡើងវិញ”។

ក្រុមហ៊ុន China Resources Land បានចេញសេចក្តីថ្លែងការណ៍ដាច់ដោយឡែកមួយថា គម្រោងគោលដៅទាំងនេះ ស្ថិតនៅក្នុងតំបន់ស្នូលនៃទីក្រុងវូហាន (Wuhan) និងណានជីង (Nanjing) ដែលមានសក្ដានុពលរយៈពេលវែងសម្រាប់ការអភិវឌ្ឍ និងស្របតាមយុទ្ធសាស្ត្រវិនិយោគរបស់ក្រុមហ៊ុន។

ក្រុមហ៊ុននិយាយថា កិច្ចព្រមព្រៀងទិញលក់នេះ អាចជួយឱ្យក្រុមហ៊ុន China Resources Land មានលទ្ធភាពពង្រីកចំណែកទីផ្សារ បង្កើនការប្រកួតប្រជែង និងបង្កើតផលចំណេញពីការវិនិយោគ។

ប្រទេសចិន បាននិងកំពុងសម្របសម្រួល ការផ្តល់ប្រាក់កម្ចីធនាគារ ក៏ដូចជា ការផ្តល់ហិរញ្ញប្បទានមូលបត្របំណុល និងសមធម៌ដល់បណ្ដាក្រុមហ៊ុនអភិវឌ្ឍន៍ ដែលមានលក្ខណសម្បត្តិគ្រប់គ្រាន់ ក្នុងកិច្ចខិតខំប្រឹងប្រែង ដើម្បីជួយស្រោចស្រង់វិស័យអចលនទ្រព្យចិន ដែលកំពុងជាប់ផុងក្នុងបំណុលគរដូចភ្នំ៕ Reuters៕