ដោយ៖ សុផារី

ភ្នំពេញ៖ អគ្គលេខាធិការអង្គការសហប្រជាជាតិ (UN) លោក អាន់តូនីញ៉ូ ហ្គូទែរ៉េស (Antonio Guterres) នឹងពិចារណាក្នុងការអញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅចុងឆ្នាំ២០២២នេះ។

ការពិចារណាក្នុងការធ្វើដំណើរមកចូលរួមកិច្ចប្រជុំដ៏មានសារៈសំខាន់នេះ បន្ទាប់ពីមានសំណើរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ក្នុងជំនួបពិភាក្សាការងារនៅទីស្នាក់ការអង្គការសហប្រជាជាតិ នាទីក្រុងញូវយ៉ក សហរដ្ឋអាមេរិក នៅថ្ងៃទី២២ ខែកញ្ញា ឆ្នាំ២០២២។

ក្នុងជំនួបនេះសម្ដេចតេជោ បានអញ្ជើញលោកអគ្គលេខាធិការអង្គការសហប្រជាជាតិ ចូលរួមកិច្ចប្រជុំកំពូលអាស៊ាន-អង្គការសហប្រជាជាតិ ដែលគ្រោងនឹងធ្វើឡើងនៅរាជធានីភ្នំពេញ នាខែវិច្ឆិកា ឆ្នាំ២០២២ខាងមុខនេះ។

សម្តេចតេជោ បានបញ្ជាក់ថា ឆ្នាំនេះ កម្ពុជានឹងរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធផ្សេងទៀត ដែលនឹងមានវត្តមានប្រធានាធិបតី និងនាយករដ្ឋមន្ត្រី ពីបណ្ដាប្រទេស ជាដៃគូសន្ទនារបស់អាស៊ាន។

លោក អាន់តូនីញ៉ូ ហ្គូទែរ៉េស បានជម្រាបសម្តេចតេជោថា លោក នឹងពិចារណាក្នុងការចូលរួមក្នុងកិច្ចប្រជុំនាពេលខាងមុខ ពីព្រោះកន្លងទៅ លោកក៏ធ្លាប់មកប្រទេសកម្ពុជាផងដែរ តែក្នុងនាមជាអ្នកទេសចរណ៍។ លោកបានឱ្យដឹងថា លោកពិតជាចង់ត្រឡប់មកប្រទេសកម្ពុជាសារជាថ្មី ជាពិសេស ជំរុញកិច្ចសហប្រតិបត្តិការរវាងអង្គការសហប្រជាជាតិ និងអាស៊ាន៕

ដោយៈ ម៉ាលីនណា

       ភ្នំពេញៈ ក្រុមការងារចម្រុះ រៀបចំគោលនយោបាយស្វាយចន្ទីកម្ពុជា រៀបចំកិច្ចប្រជុំ ត្រៀមរៀបចំសន្និបាតកំណើតដំបូង “សហព័ន្ធស្វាយចន្ទីកម្ពុជា” នៅដើមខែតុលាខាងមុខនេះ។

កិច្ចប្រជុំដើម្បីរៀបចំសន្និបាតខាងលើនេះ ដឹកនាំដោយលោក រាជ រ៉ា រដ្ឋលេខាធិការក្រសួងពាណិជ្ជកម្ម និងជាអនុប្រធានក្រុមការងារចម្រុះ និងមានការចូលរួមពីថ្នាក់ដឹកនាំជារដ្ឋលេខាធិការ អនុរដ្ឋលេខាធិការ ទីប្រឹក្សា ក្រសួង លោកអគ្គនាយករងជំរុញពាណិជ្ជកម្ម លោក-លោកស្រីតំណាងនាយកដ្ឋានគោលនយោបាយពាណិជ្ជកម្ម នាយកដ្ឋានអភិវឌ្ឍន៍វិស័យឯកជន ដៃគូអភិវឌ្ឍន៍ និងតំណាងវិស័យឯកជនពាក់ព័ន្ធ។

លោករាជ រ៉ាបានមានប្រសាសន៍ថា សមាគមសហព័ន្ធស្វាយចន្ទី គឺជាផ្នែកមួយ តំណាងសំឡេងវិស័យឯកជនដ៏សំខាន់ ក្នុងវិស័យស្វាយចន្ទី ដូចមានចែងក្នុងសេចក្តីព្រាង គោលនយោបាយជាតិស្តីពីស្វាយចន្ទី និងជាកម្លាំងចលករសំខាន់ ក្នុងការអនុវត្តគោលនយោបាយ ឱ្យកាន់តែមានប្រសិទ្ធភាព ឆ្លើយតបនឹងតម្រូវការទីផ្សារក្នុងស្រុក និងពិភពលោក។

លោកបន្តថា “ដូចនេះ ទើបក្រសួងត្រូវយកចិត្តទុកដាក់ខ្ពស់ ក្នុងការដឹកនាំកិច្ចប្រជុំ ដើមី្បពិនិត្យសេចក្ដីព្រាងលក្ខន្តិកៈសហព័ន្ធ នីតិវិធីបោះឆ្នោតជ្រើសរើសក្រុមប្រឹក្សាភិបាល និងដំណើរការត្រៀមរៀបចំសន្និបាត ដែលគ្រោងធ្វើឡើងនៅខែតុលាខាងមុខ និងប្រឹក្សាសម្របសម្រួលអំពីនីតិវិធីចុះបញ្ជីសហព័ន្ធនៅក្រសួងមហាផ្ទៃ”។

បន្ទាប់មកកិច្ចប្រជុំបានទទួលស្តាប់នូវបទបង្ហាញ ដែលធ្វើឡើងដោយតំណាងវិទ្យាស្ថានCIRD និងនាយកដ្ឋានអភិវឌ្ឍន៍វិស័យឯកជន អំពីសារបាន ការរៀបចំសេចក្តីព្រាងលក្ខន្តិកៈសហព័ន្ធ នីតិវិធីនៃការរៀបចំបោះឆ្នោតជ្រើសរើសក្បាលម៉ាស៊ីនដឹកនាំសហព័ន្ធ និងដំណើរការចុះបញ្ជីនៅក្រសួងមហាផ្ទៃ។ល។

បន្ទាប់មកកិច្ចប្រជុំ បានបើកកិច្ចពិភាក្សាយ៉ាងផុលផុស លើចំណុចសំខាន់ៗតាមរបៀបវារៈ និងបានពិនិត្យលម្អិតលើសេចក្តីព្រាង លក្ខន្តិកៈដែលបានរៀបចំដោយតំណាងដៃគូអភិវឌ្ឍន៍៕

ដោយៈ សុខុម

អន្តរជាតិ: ស្របពេលសម្តេចតេជោហ៊ុន សែននាយករដ្ឋមន្រ្តីនៃកម្ពុជា នឹងធ្វើដំណើរទស្សនកិច្ចទៅកាន់ប្រទេសគុយបា នៅថ្ងៃទី២៤ និង២៥ កញ្ញាខាងមុខនេះ គេហទំព័រPropertyarea.asia សូមលើកយកនូវពត៌មានត្រួសៗពីប្រទេសនេះ ដើម្បីជាចំណេះដឹងដល់សាធារណៈជន។

សាធារណរដ្ឋគុយបា គឺជាប្រទេសដែនកោះមួយ ដែលរួមមានកោះគុយបា (Cuba) កោះធំបំផុតទី២ ប្រចាំប្រទេសនេះឈ្មោះ Isla de la Juventud និងប្រជុំកោះតូចៗជាច្រើនទៀតផងដែរ។

ដោយមានរដ្ឋធានីឈ្មោះថាឡាហាវ៉ាន (Havana) ប្រទេសគុយបា មានភូមិសាស្ត្រ ស្ថិតនៅចំណុចប្រសព្វរវាងសមុទ្រការ៉ាអ៊ីព (Caribbean Sea) ភាគខាងជើង ឈូងសមុទ្រម៉ិកស៊ិក (Gulf of Mexico) និងមហាសមុទ្រអាត្លង់ទិក (Atlantic Ocean)។

ប្រទេសនេះ ស្ថិតនៅភាគខាងកើតនៃឧទ្វីបយូកាតាន (Yucatán Peninsula) (ប្រទេសម៉ិកស៊ិក) ដោយភាគខាងត្បូងជាប់រដ្ឋមួយរបស់សហរដ្ឋអាមេរិក គឺរដ្ឋផ្លរីដា (Florida) និងប្រទេសបាហាម៉ាស (Bahamas) ភាគខាងលិចជាប់ប្រទេសហៃទី (Haiti) និងសាធារណរដ្ឋដូមីនីក (Dominican Republic)។ ចំណែកឯភាគខាងជើង ជាប់ប្រទេសហ្សាម៉ាអ៊ីក (Jamaica) និងកោះកៃម៉ង់ (Cayman Islands)។

ប្រទេសគុយបា មានផ្ទៃដីសរុប១០៩.៨៨៦គីឡូម៉ែត្រការ៉េ។ គុយបាយ ជាប្រទេសដែនកោះ ដែលមានប្រជាជនរស់នៅច្រើនបំផុតទី២ ក្នុងសមុទ្រការ៉ាអ៊ីព បន្ទាប់ពីប្រទេសហៃទី និងមានប្រជាជនរស់នៅប្រមាណ១១លាននាក់ នេះបើយោងតាមជំរឿនក្នុងឆ្នាំ២០២១។

ប្រទេសគុយបា ប្រើប្រាស់ភាសាអេស្ប៉ាញ ជាភាសាផ្លូវការ ហើយក៏ប្រើភាសាមួយចំនួនទៀតផងដែរ រួមមានភាសាគ្រីអូល (Creole) របស់ជនជាតិហៃទី និងភាសាអង់គ្លេស។

យោងតាមទិន្នន័យឆ្នាំ២០១២ បង្ហាញថា ប្រជាជនគុយបា មានពណ៌សម្បុរចម្រុះ ដោយជាង៦៤,១% មានសម្បុរស ២៦,៦%មានសម្បុរចម្រុះ និង៩,៣%មានសម្បុរខ្មៅ។

ទាក់ទិននឹងជំនឿសាសនា ប្រជាជនគុយបា៥៨,៩% កាន់សាសនាគ្រិស្ត ២៣,៣%គ្មានជំនឿសាសនា និង១៧,៩%កាន់សាសនាផ្សេងៗទៀត នេះបើយោងតាមទិន្នន័យឆ្នាំ២០២០។

ផលទុនជាតិសរុប (GDP) របស់ប្រទេសនេះ មានទំហំ២៥៤,៩ពាន់លានដុល្លារអាមេរិក ចំណែកឯផលិតផលក្នុងស្រុកសរុបរបស់មនុស្សម្នាក់ៗ ឬ GDP per Capita គឺមានចំនួន២២.២០០ដុល្លារអាមេរិក ក្នុងមួយឆ្នាំ។

*តើសេដ្ឋកិច្ចរបស់គុយបា ពឹងផ្អែកលើអ្វីខ្លះ?

បច្ចុប្បន្ន គុយបា គឺនៅតែជាសេដ្ឋកិច្ចផែនការ ហើយសេដ្ឋកិច្ចរបស់ប្រទេសនេះ ពឹងផ្អែកខ្លាំងលើឧស្សាហកម្មទេសចរណ៍ និងការនាំចេញកម្លាំងពលកម្មជំនាញ ស្ករស ថ្នាំជក់ និងកាហ្វេ។

គុយបា គឺជារបបផ្ដាច់ការឯកបក្ស ដែលមិនអនុញ្ញាតឱ្យមានគណបក្សប្រឆាំងនោះឡើយ។ ដូចនេះថ្វីដ្បិតមានការបោះឆ្នោតក្ដី ក៏មិនត្រូវបានគេចាត់ថាត្រឹមត្រូវ និងយុត្តិធម៌តាមលទ្ធិប្រជាធិបតេយ្យនោះដែរ៕

 ដោយៈ គង់ សូរិយា

       ភ្នំពេញៈ រដ្ឋាភិបាលតាមរយៈក្រសួងវប្បធ៌ម និងវិចិត្រសិល្បៈបាននិងកំពុងរៀបចំ និងស្នើការដាក់បញ្ចូលក្បាច់គុនល្បុកតោ និងនំបញ្ចុកជាបេតិកភ័ណ្ឌអរូបិយពិភពលោក ពីអង្គការយូណេស្កូ។

លោកឡុង ប៉ុណ្ណាសិរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈបានឲ្យដឹងកាលពីព្រឹកថ្ងៃទី២២ កញ្ញាកន្លងមកថា ក្រសួងកំពុងរៀបចំ និងនាំមរតកវប្បធម៌អរូបីចំនួនពីរ គឺនំបញ្ចុក និងគុនល្បុក្កតោ ដើម្បីចុះបញ្ជីចូលក្នុងបេតិកភណ្ឌអរូបី របស់អង្គការយូណេស្កូ។

លោកបានមានប្រសាសន៍បែបនេះ ក្នុងបានថ្លែងបែបនេះក្នុងសន្និ​សីទ​សារព៌តមានស្តីពីសមិទ្ឋផលរបស់ក្រសួងវប្បធ៌ម និងវិចិត្រសិល្បៈ ដែលរៀបចំដោយអង្គភាពព៌តមាន និងប្រតិកម្មរហ័សនៃទីស្តីការគណៈរដ្ឋមន្រ្តីថា

ក្រសួងកំពុងរៀបចំដើម្បីស្នើចុះបញ្ជី នំបញ្ចុក និងគុនល្បុក្កតោ ក្នុងសម្បត្តិអរូបីរបស់អង្គការយូណេស្កូ និងព្រះរាជពិធីបុណ្យអុំទូក ដាក់ក្នុងបញ្ជីត្រៀមដើម្បីស្នើសុំចុះបញ្ជីក្នុងពេលខាងមុខ។

លោកបន្តថា ក្រៅពីមរតកវប្បធម៌អរូបី ក្រសួងវប្បធម៌ ក៏បានត្រៀមស្នើសុំចុះបញ្ជីប្រាសាទកោះកេរ ក្នុងបញ្ជីសម្បត្តិបេតិកភណ្ឌពិភពលោកផងដែរ។លោកបន្ដថា ក្រសួងក៏កំពុងពិនិត្យសម្បត្តិវប្បធម៌ រូបីមួយចំនួនទៀត ដូចជាក្រុមប្រាសាទបន្ទាយឆ្មារ រមណីយដ្ឋានអង្គរបុរី និងភ្នំដា រមណីយដ្ឋានគូលែន ក្រុមប្រាសាទបេងមាលា ក្រុមប្រាសាទព្រះខ័នកំពង់ស្វាយ រមណី​យដ្ឋានឧត្តុង្គ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌ​លប្រល័យពូជសាសន៍ជើងឯក និងអតីតមន្ទីរឃុំឃាំង “ម-១៣” ដាក់ក្នុងបញ្ជីត្រៀម ដើម្បីស្នើសុំចុះបញ្ជី។

លោកបញ្ជាក់ថា បើគិតមកដល់ពេលបច្ចុប្បន្ននេះ កម្ពុជាមានសម្បត្តិបេតិកភណ្ឌពិភពលោក ដែលបានចុះបញ្ជីដោយអង្គការយូណេស្កូ ក្នុងនោះចែកជាសម្បត្តិវប្បធម៌រូបី ចំនួន៣ និងសម្បត្តិវប្បធម៌អរូបី ចំនួន៥ ក្នុងនោះរួមមាន៖

* ប្រាសាទអង្គរ៖ សម្បត្តិបេតិកភណ្ឌពិភពលោក ចុះបញ្ជីនៅថ្ងៃទី១៤ ខែធ្នូ ឆ្នាំ១៩៩២
* របាំព្រះរាជទ្រព្យ៖ សម្បត្តិបេតិកភណ្ឌវប្បធម៌អរូបីនៃមនុស្សជាតិ ចុះបញ្ជីនៅថ្ងៃទី០៧ ខែវិច្ឆិកា ឆ្នាំ២០០៣
* ប្រាសាទព្រះវិហារ៖ សម្បត្តិបេតិកភណ្ឌពិភពលោក ចុះបញ្ជីនៅថ្ងៃទី០៧ ខែកក្កដា ឆ្នាំ២០០៧
* ល្ខោនស្រមោលស្បែកធំ៖ សម្បត្តិបេតិកភណ្ឌវប្បធម៌អរូបីនៃមនុស្សជាតិ ចុះបញ្ជីនៅថ្ងៃទី២៥ ខែវិច្ឆិកា ឆ្នាំ២០១៥
* ល្បែងទាញព្រ័ត្រ៖ សម្បត្តិបេតិកភណ្ឌវប្បធម៌អរូបីនៃមនុស្សជាតិ ចុះបញ្ជីនៅថ្ងៃទី០២ ខែធ្នូ ឆ្នាំ២០១៥
* ចាប៉ីដងវែង៖ សម្បត្តិបេតិកភណ្ឌវប្បធម៌អរូបី ត្រូវការសង្គ្រោះបន្ទាន់ ចុះបញ្ជីនៅថ្ងៃទី៣០ ខែវិច្ឆិកា ឆ្នាំ២០១៦

* តំបន់ប្រាសាទសំបូរព្រៃគុក៖ សម្បត្តិបេតិកភណ្ឌពិភពលោក ចុះបញ្ជីនៅថ្ងៃទី០៨ ខែកក្កដា ឆ្នាំ២០១៧
* ល្ខោនខោលវត្តស្វាយអណ្ដែត៖ សម្បត្តិបេតិកភណ្ឌវប្បធម៌អរូបី ត្រូវការសង្គ្រោះបន្ទាន់ ចុះបញ្ជីនៅថ្ងៃទី២៨ ខែវិច្ឆិកា ឆ្នាំ២០១៨៕

ដោយៈ ជេស៊ីកា

       អាមេរិកៈ ជាមោទនភាពសម្រាប់ប្រជាជាតិកម្ពុជា នៅពេលដែលប្រមុខរាជរដ្ឋាភិបាលកម្ពុជា សម្តេចតេជោហ៊ុន សែននាយករដ្ឋមន្រ្តីនៃកម្ពុជា បានចុះហត្ថលេខាលើសៀវភៅ “ក្រាំងមាស” របស់អង្គការសហប្រជាជាតិ។

ពិធីចុះហត្ថលេខានេះ ធ្វើឡើងខណៈកំពុងមានវត្តមាននៅសហរដ្ឋអាមេរិក ដើម្បីចូលរួមក្នុងមហាសន្និបាតលើកទី៧៧ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២២ ខែកញ្ញា ឆ្នាំ២០២២នេះ៕

ដោយៈ ជេស៊ីកា

       ភ្នំពេញៈ រដ្ឋមន្រ្តីក្រសួងបរិស្ថាន លោកសាយ សំអាល់បានមានប្រសាសន៍ថា ការវិនិយោគរបស់ក្រុមហ៊ុនHeineken នៅកម្ពុជា គឺជាការជឿជាក់ទៅលើដំណើរកម្ពុជា និងប្តេជ្ញាចិត្តខ្ពស់ក្នុងការបន្តពង្រីក ការវិនិយោគនៅលើទឹកដីកម្ពុជា។

លោករដ្ឋមន្ត្រីក្រសួងបរិស្ថាន បានមានប្រសាសន៍បែបនេះ ក្នុងឱកាសអញ្ជើញជា អធិបតីភាពក្នុងពិធីសម្ពោធ ដាក់ឱ្យប្រើប្រាស់ជាផ្លូវការរោងចក្រថាមពលកម្តៅជីវម៉ាស របស់ក្រុមហ៊ុន Heineken ដោយមានការចូលរួមពីលោក Dolf van den Brink, ប្រធានក្រុមប្រឹក្សាប្រតិបត្តិ និងជានាយកប្រតិបត្តិនៃក្រុមហ៊ុន HEINEKEN group លោកស្រី Michel de Carvalho នាយកប្រតិបត្តិនៃ Heineken Holding NV លោកស្រី Charlene L. de Carvalho-Heineken នាយិកាប្រតិបត្តិនៃ Heineken Holding NV។

លោក Jacco van der Linden ប្រធាន HEINEKEN Groupប្រចាំតំបន់អាស៊ី-ប៉ាស៊ីហ្វិក លោក Samson Wong នាយកគ្រប់គ្រងនៃ HEINEKEN Cambodia និង លោក Eren Ergin, នាយកប្រតិបត្តិនៃ BECIS នៅព្រឹកថ្ងៃទី ២២ ខែកញ្ញា ឆ្នាំ២០២២ ។

លោករដ្ឋមន្ត្រីបានសង្កត់ធ្ងន់ថា “ថ្ងៃនេះជាប្រវត្តិសាស្រ្ត ដែលក្រុមហ៊ុន Heineken បានឈានមួយជំហានទៀត ប្រកបដោយចក្ខុវិស័យ និង សុទិដ្ឋិនិយម តាមរយៈការពង្រីកវិសាលភាពវិនិយោគនៅកម្ពុជា”។លោកបន្តថា “ការដាក់សម្ពោធអោយប្រើប្រាស់ជាផ្លូវការ រោងចក្រថាមពលកម្តៅជីវម៉ាស ស្របពេលដែលកម្ពុជា កាលពីចុងឆ្នាំ២០២១ ក៏បានដាក់ “យុទ្ធសាស្ត្រអភិវឌ្ឍន៍រយៈពេលវែងប្រកប ដោយអព្យាក្រឹតកាបូន” ស្របតាមការប្តេជ្ញាចិត្តដ៏ខ្ពង់ខ្ពស់របស់សម្តេចតេជោ ធ្វើឱ្យកម្ពុជា ក្លាយជាប្រទេសអភិវឌ្ឍន៍តិចតួចទីពីរ ដែលបានកំណត់គោលដៅច្បាស់លាស់ សម្រាប់អព្យាក្រឹតភាពកាបូននៅឆ្នាំ២០៥០។

លើសពីនេះរាជរដ្ឋាភិបាលកម្ពុជា បាននិងកំពុងគិតគូរផងដែរលើការអនុវត្ដសេដ្ឋកិច្ចវិលជុំ តាមរយៈ ការអភិវឌ្ឍហេដ្ឋារចនាសម្ព័ន្ធគាំទ្រ ការជំរុញការកែច្នៃ និងការពង្រឹងប្រសិទ្ធភាពថាមពល សំដៅលុបបំបាត់ ប្រភពបង្កើ​តសំណល់ និងកែច្នៃសំណល់ ដែលបានបង្កើតឱ្យមានតម្លៃសេដ្ឋកិច្ច ដូចជាប្រែក្លាយសំណល់ឱ្យទៅជាថាមពល ដែលអាចប្រើប្រាស់ និងផ្គត់ផ្គង់ដល់ដំណើរការខ្សែច្រវាក់ផលិតកម្មនៅក្នុងរោងចក្រ ជាដើម។

ក្នុងនាមជាដៃគូរវិនិយោគដ៏ល្អ ដែលបានជឿជាក់មកលើកម្ពុជា តាំងពីឆ្នាំ១៩៩២-៩៣មកម៉្លេះ អំឡុងពេលដែលកម្ពុជាទើបបោះឆ្នោត អាណត្តិទី១ និង លំនឹងចិត្តនៃការវិនិយោគរបស់ក្រុមហ៊ុន Heineken ដែលបានជឿជាក់លើការដឹកនាំ កសាង អភិវឌ្ឍន៍ និងការរក្សាបាននូវសុខសន្តិភាព     ស្ថេរភាពនយោបាយរបស់កម្ពុជា រហូតមកដល់បច្ចុប្បន្ននេះ បានរួមចំណែកយ៉ាងសំខាន់ក្នុងការអភិវឌ្ឍ សង្គម សេដ្ឋកិច្ចកម្ពុជា ជាពិសេសធ្វើអោយយុវជនកម្ពុជា បានផ្ញើរជោគវាសនាឱកាសការងារ របស់ខ្លួនទៅលើក្រុមហ៊ុន។

លោកសាយ សំអាល់បានបន្តថា បន្ទាប់ពីទស្សនកិច្ចខ្សែសង្វាក់ផលិតកម្ម ឃើញថា ក្រុមហ៊ុន Heineken បានគិតគូរពីសុវត្ថិភាព សុខភាពរបស់បុគ្គលិក និងបរិស្ថានរបស់កម្ពុជា ពិតប្រាកដមែន តាមរយៈការរៀបចំហេដ្ឋារចនាសម្ព័ន្ធ ខ្សែសង្វាក់ផលិតកម្ម ស្អាត ទំនើប ធំទូលាយ និងការទុកដាក់ វេចខ្ចប់ កែច្នៃការសំនល់ប្រកប ដោយលក្ខណៈបច្ចេកទេសត្រឹមត្រូវ៕

ដោយៈ សុផារី

សហរដ្ឋអាមេរិក: សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នឹងឡើងថ្លែងការណ៍ នៅមហាសន្និបាតលើកទី៧៧ នៃអង្គសហប្រជាជាតិ នៅព្រឹកនេះ។

សម្តេចតេជោ ហ៊ុន សែន បានសរសេរនៅលើបណ្ដាញសង្គមហ្វេសប៊ុក ដោយបញ្ជាក់ថា សម្តេចនឹងឡើងថ្លែងការណ៍ នៅក្នុងមហាសន្និបាតលើកទី៧៧ នៃអង្គការសហប្រជាជាតិ នៅព្រឹកថ្ងៃទី២៣ ខែកញ្ញា ឆ្នាំ២០២២។

សម័យប្រជុំលើកទី៧៧ នៃកិច្ចពិភាក្សាទូទៅ របស់មហាសន្និបាតអង្គការសហប្រជាជាតិ ក្រោមប្រធានបទ “ចំណុចរបត់សំខាន់នៃការផ្លាស់ប្ដូរមិនអាចត្រឡប់ក្រោយបាន÷ដំណោះស្រាយបរិបទកម្ម ចំពោះបញ្ហាប្រឈមប្រទាក់ក្រឡាគ្នា” ធ្វើឡើងចាប់ពីថ្ងៃទី២១ ដល់ ២៣ ខែកញ្ញា ឆ្នាំ២០២២ នៅទីក្រុងញូយ៉ក។

សម្តេចសរសេរថា “បន្ទាប់ពីជួបពិភាក្សាជាមួយអគ្គលេខាអង្គការសហប្រជាជាតិ និងជាមួយនាយកUNDP ឆ្លៀតឱកាសមកស្តាប់សេចក្តីថ្លែងការរបស់ប្រមុខរដ្ឋ ប្រមុខរដ្ឋាភិបាលក្នុងមហាសន្និបាត លើកទី៧៧នៃអង្គសហប្រជាជាតិ។ សម្រាប់ខ្ញុំនឹងឡើងថ្លែងការនៅព្រឹកស្អែក ត្រូវនឹងថ្ងៃ23/9/2022″។

សម្ដេចតេជោនាយករដ្ឋមន្ត្រី នឹងអញ្ជើញធ្វើសេចក្តីថ្លែងការណ៍ជាតិរបស់កម្ពុជា នៅក្នុងកិច្ចពិភាក្សាទូទៅរបស់មហាសន្និបាត អង្គការសហប្រជាជាតិ។

បទអន្តរាគមន៍នេះ នឹងផ្តោតលើតួនាទីស្ថាបនារបស់កម្ពុជា ក្នុងការគាំទ្រពហុភាគីនិយម ផ្អែកលើគោលការណ៍ច្បាប់ ការរួមសហការគ្នាប្រយុទ្ធប្រឆាំងនឹងការគំរាមកំហែង ផ្នែកសន្តិសុខជាសកលដែលកំពុងបន្តកើតមាន ការប្រែប្រួលអាកាសធាតុ ការពង្រឹងប្រព័ន្ធពាណិជ្ជកម្មពហុភាគី គោ​លនយោបាយឌីជីថល និងសេដ្ឋកិច្ចបៃតង ព្រមទាំងការធ្វើជាប្រធានអាស៊ានរបស់កម្ពុជា និងខិតខំប្រឹងប្រែងរបស់កម្ពុជា ក្នុងការកាត់បន្ថយផលប៉ះពាល់នៃជំងឺរាតត្បាតកូវីដ-១៩ និងការរក្សាបាននូវនិរន្តរភាពនៃកំណើនសេដ្ឋកិច្ច-សង្គមយូរអង្វែង។

ក្នុងអំឡុងពេលស្នាក់នៅទីក្រុងញូយ៉ក សម្តេចតេជោនាយករដ្ឋមន្ត្រីក៏នឹងមានជំនួបបន្តបន្ទាប់គ្នា ជាមួយលោក អាន់ តូនីញ៉ូ ហ្វូទែរ៉េស អគ្គលេខាធិការអង្គការសហប្រជាជាតិ លោកឆាលស៍ មីឆែល ប្រធានក្រុមប្រឹក្សាអឺរ៉ុប លោកស្រីសេក្ខ ហាស៊ីណា នាយករដ្ឋមន្ត្រីនៃសាធារណរដ្ឋប្រជាមានិតបង់ក្លាដែស លោកបណ្ឌិតចូហ្សេ ម៉ានូអែល រ៉ាម៉ូស អរតា ប្រធានា​ធិបតីនៃសាធារណរដ្ឋ ប្រជាធិបតេយ្យទីម័រខាងកើត និងថ្នាក់ដឹកនាំផ្សេងទៀតផងដែរ៕