ដោយ: សហសេវិក
អន្តរជាតិ: បណ្តាក្រុមហ៊ុនកាន់តែច្រើនឡើងៗកំពុងកំណត់គោលដៅវិនិយោគលើទីផ្សារមជ្ឈមណ្ឌលទិន្នន័យនៅតំបន់អាស៊ាន។នេះបើយោងតាមក្រុមហ៊ុនប្រឹក្សាអចលនទ្រព្យ CBRE។

ក្រុមហ៊ុន CBRE បានបញ្ជាក់នៅក្នុងទស្សនវិស័យនៃទីផ្សារមជ្ឈមណ្ឌលទិន្នន័យរបស់តំបន់អាស៊ីប៉ាស៊ីហ្វិកថា តំបន់អាស៊ាន ជាពិសេសប្រទេសម៉ាឡេស៊ី កំពុងក្លាយជាគោលដៅដ៏លេចធ្លោនៃការវិនិយោគ និងបន្តរីកចម្រើនបន្ថែមទៀតនៅឆ្នាំ២០២៦នេះ។

ប្រទេសម៉ាឡេស៊ីកំពុងទទួលបានការចាប់អារម្មណ៍ខ្លាំងពីបណ្តាអ្នកវិនិយោគលើមជ្ឈមណ្ឌលទិន្នន័យ ខណៈដែលរដ្ឋាភិបាលម៉ាឡេសុីកំពុងធ្វើឌីជីថលូបនីយកម្មផ្នែកសេដ្ឋកិច្ច។

ជាមួយគ្នានេះ ក្រុមហ៊ុន CBRE បានកត់សម្គាល់ថា សមត្ថភាពអភិវឌ្ឍន៍មជ្ឈមណ្ឌលទិន្នន័យថ្មីចំនួន២ របស់ប្រទេសសិង្ហបុរី ដែលមានថាមពលសរុបចំនួន១,២ជីហ្គាវ៉ាត់ (GW) នឹងធានាថា ទីក្រុងនេះនៅតែជាមជ្ឈមណ្ឌលដែលមានគុណភាពខ្ពស់លើការងារបច្ចេកវិទ្យាបញ្ញាសិប្បនិម្មិត AI។

ដោយឡែក ចំពោះតំបន់អាស៊ីប៉ាស៊ីហ្វិក ក្រុមហ៊ុនប្រឹក្សាអចលនទ្រព្យ CBRE រំពឹងថាប្រទេសអូស្ត្រាលី និងជប៉ុននឹងនាំមុខគេក្នុងការជំរុញតម្រូវការមជ្ឈមណ្ឌលទិន្នន័យនៅឆ្នាំនេះ។

កំណើននៃតម្រូវការមជ្ឈមណ្ឌលទិន្នន័យត្រូវបានគេរំពឹងថា នឹងជំរុញចំណាប់អារម្មណ៍របស់បណ្តាវិនិយោគិនយ៉ាងខ្លាំងនៅឆ្នាំនេះ ជាពិសេសនៅពេលនិយាយដល់គម្រោងសាងសង់មជ្ឈមណ្ឌលទិន្នន័យទ្រង់ទ្រាយធំដើរដោយថាមពល AI ដែលមានសមត្ថភាពយ៉ាងហោចណាស់១០០មេហ្គាវ៉ាត់៕ប្រភព: Edgeprop៕

ដោយៈ គង់ សូរិយា

    ភ្នំពេញៈ ក្រុមមន្រ្តីអន្តរក្រសួង និងអ្នកជំនាញជប៉ុន បានបើកកិច្ច ប្រជុំពិនិត្យពិភាក្សាលើលទ្ធផលបឋម នៃការសិក្សាសមិទ្ធិលទ្ធភាពគម្រោងធ្វើឱ្យប្រសើរឡើងវិញ នូវកំណាត់ផ្លូវជាតិលេខ១ និងស្ពានមេគង្គថ្មី។

ព័ត៌មាននេះត្រូវបានលើកឡើង ក្នុងកិច្ចប្រជុំដឹកនាំដោយលោកតូច ចាន់កុសល រដ្ឋលេខាធិការនៃ ក្រសួងសាធារណការ និងដឹកជញ្ជូន អញ្ជើញដឹកនាំកិច្ចប្រជុំពិភាក្សា និងពិនិត្យលើលទ្ធផលបឋម នៃការសិក្សាសមិទ្ធិលទ្ធភាព គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ១ និងស្ពានមេគង្គថ្មី ដោយមានការចូលរួមពីថ្នាក់ដឹកនាំក្រសួង តំណាងអគ្គនាយកដ្ឋានសហប្រតិបត្តិការអន្តរជាតិ និងគ្រប់គ្រ​ងបំណុល តំណាងអគ្គនាយកដ្ឋានដោះស្រាយផលប៉ះពាល់ ដោយសា​រគម្រោងអភិវឌ្ឍន៍ (ក្រសួងសេដ្ឋកិច្ច និងហិរញ្ញវត្ថុ) តំណាងក្រសួងធនធានទឹក និងឧតុនិយម តំណាងក្រសួងដែនដី នគររូបនីយកម្ម និងសំណង់ តំណាងរដ្ឋបាលរាជធានីភ្នំពេញ តំណាងរដ្ឋបាលខេត្តកណ្តាល ទីភ្នាក់ងារសហប្រតិបត្តិការអន្តរជាតិជប៉ុន(JICA)ក្រុមហ៊ុនទីប្រឹក្សាបច្ចេកទេសOCG និងមន្ត្រីជំនាញបច្ចេកទេសពាក់ព័ន្ធជាច្រើនរូប។

កិច្ចប្រជុំនេះរៀបចំឡើងក្នុងគោលបំណង ដើម្បីជួបប្រជុំពិនិត្យពិភាក្សាកម្រិតថ្នាក់ដឹកនាំ រវាងក្រសួងសាធារណការ និងដឹកជញ្ជូន និងតំណាងស្ថាប័នពាក់ព័ន្ធ លើលទ្ធផលបឋម នៃការសិក្សាសមិទ្ធិលទ្ធភាពគម្រោងធ្វើឱ្យប្រសើរឡើងវិញ កំណាត់ផ្លូវជាតិលេខ១ និងស្ពានមេគង្គថ្មី និងប្រមូលនូវធាតុចូលបន្ថែម ធ្វើយ៉ាងណាធានាឱ្យបានថាកិច្ចការនេះ មានភាពច្បាស់លាស់ និងគ្រប់ជ្រុងជ្រោយ មុនចេញរបាយការណ៍ផ្លូវការចុងក្រោយ។

បន្ថែមពីលើនេះ ឯកឧត្តមប្រធានអង្គប្រជុំ ក៏បានថ្លែងអំណរគុណដល់តំណាងស្ថាប័នពាក់ព័ន្ធទាំងអស់ ដែលបានចូលរួមសហការក្នុងការជំរុញ និងការស្វះស្វែងយ៉ាងយកចិត្តទុកដាក់ ធ្វើយ៉ាងណាឱ្យការអនុវត្តការងារនេះសម្រេចបានជាលទ្ធផលល្អ និងបន្តកិច្ចសហការជាមួ​យក្រុមការងារទាំងអស់បន្ថែមទៀត ដើម្បីជំរុញឱ្យការសិក្សាស្រាវជ្រាវទទួលបានជោគជ័យ និងអនុត្តន៍ទៅផែនការគ្រោងទុក។

គំរោងសាងសង់ស្ពានមេគង្គថ្មីនេះ អាចជាស្ពានតភ្ជាប់ពីម្តុំវត្តក្តីតាកុយទៅកាន់ក្រុងអរិយក្សត្រ ដែលអតីតនាយករដ្ឋមន្រ្តីនៃកម្ពុជាសម្តេចតេជោហ៊ុន សែនបច្ចុប្បន្នជាប្រធានព្រឹទ្ធសភា ស្នើសុំភាគីជប៉ុនជួយសិក្សា និងផ្តល់ជំនួយ។

ទោះជាយ៉ាងណា លោកផន រឹមអ្នកនាំពាក្យក្រសួងសាធារណការ និងដឹកជញ្ជូនមិនអាចបញ្ជាក់បានទេ ដោយសារគំរោងនេះមិនទាន់ត្រូវបានអនុម័តនៅឡើយ៕

ដោយៈ ម៉ាណា

    កណ្តាលៈ រដ្ឋមន្រ្តីក្រសួងសាធារណការ និងដឹកជញ្ជូន លោកប៉េង ពោធិ៍នា បានអញ្ជើញដឹកនាំគណៈប្រតិភូ ចុះពិនិត្យវឌ្ឍនភាពការងារគម្រោងសាងសង់ស្ពានឆ្លងទន្លេមេគង្គ (ដីឥដ្ឋ-ថ្មគរ) ដែលស្ថិតនៅឃុំដីឥដ្ឋ ស្រុកកៀនស្វាយ និងឃុំថ្មគរ ស្រុកល្វាឯម ខេត្តកណ្តាល។

ក្នុងដំណើរចុះពិនិត្យវឌ្ឍនភាពការងារនេះ លោករដ្ឋមន្រ្តី បានណែនាំឱ្យក្រុមហ៊ុនអនុវត្តន៍ ការងារឱ្យស្របតាមផែនការ ដោយធានាឱ្យបាននូវសុវត្ថិភាពតាមស្តង់ដារបច្ចេកទេស និងប្រកបដោយសោភ័ណ្ឌភាព។ ជាការឆ្លើយតប ក្រុមហ៊ុនសាងសង់ សន្យា និងបេ្ដជ្ញាចិត្តមោះមុត អនុវត្តន៍ការងារ ឱ្យកាន់តែប្រសើរឡើង ជាមួយក្រុមការងារបច្ចេកទេស និងភាគីពាក់ព័ន្ធ ដោយធ្វើការសហការ ពន្លឿនការសាងសង់ស្ពានមេគង្គនេះ ឱ្យបានកាន់តែឆាប់រហ័ស ព្រមទាំងជួយសម្រួលដល់ការធ្វើដំណើររបស់បងប្អូនប្រជាពលរដ្ឋផងដែរ។

គម្រោងនេះ មានទីតាំងស្ថិតនៅខេត្តកណ្ដាល  ឆ្លងកាត់តាមទន្លេមេគង្គ ផ្លូវនៅត្រើយខាងលិច ស្ថិតក្នុងឃុំដីឥដ្ឋ តភ្ជាប់នឹងមហាវិថី ស៊ី ជីនពីង (ផ្លូវក្រវាត់ក្រុងទី៣) និងផ្លូវជាតិលេខ១ ផ្លូវនៅត្រើយខាងកើតស្ថិត ក្នុងឃុំថ្មគរ តភ្ជាប់នឹងផ្លូវល្បឿនលឿនភ្នំពេញ-បាវិត ដែលគ្រោងនឹងសាងសង់។

គម្រោងនេះ មានប្រវែងសរុប៣,៧គីឡូម៉ែត្រ រួមមានស្ពានដែលឆ្លងទន្លេ និងស្ពានអាកាសតភ្ជាប់ផ្លូវ លូ និងការងារវិស្វកម្មបន្ទាប់បន្សំ។ ស្ពានឆ្លងទន្លេមេគង្គ មានប្រវែងសរុប១៦០០ម៉ែត្រ និងទទឹង២៦ម៉ែត្រ ដោយមានគន្លងផ្លូវរថយន្ត ផ្លូវទោចក្រយានយន្ត និងផ្លូវថ្មើរជើង ព្រមទាំងមានគន្លងនាវាចរណ៍ចំនួន៣គន្លង ដែលគន្លងនីមួយៗមានចន្លោះសុវត្ថិភាព ទទឹង១១០ម៉ែត្រ និងកម្ពស់១៥ម៉ែត្រ៕

ដោយៈ គង់ សូរិយា

    ភ្នំពេញៈ ក្រុមមន្រ្តីជានខ្ពស់នៃក្រុមប្រឹក្សាអភិវឌ្ឍន៍កម្ពុជា បានបើកកិច្ចប្រជុំច្រកចេញ-ចូលតែមួយ” លើកទី២ ក្នុងឆ្នាំ២០២៦ ត្រូវបានរៀបចំឡើងដើម្បីពិនិត្យពិភាក្សា លើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន៩គម្រោង។

កិច្ចប្រជុំគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំច្រកចេញចូលតែមួយ បានធ្វើឡើងក្រោម អធិបតីភាព លោកជា វុទ្ធី អគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា។

គម្រោងវិនិយោគទាំងនេះ មានទុនវិនិយោគសរុបប្រមាណ ៤២៣លានដុល្លារអាម៉េរិក អាចបង្កើតការងារបានប្រមាណ ៥ពាន់កន្លែង និងមានមុខសញ្ញាវិនិយោគក្នុងវិស័យឧស្សាហកម្មចំនួន៧គម្រោង រួមមាន៖ ផ្គុំដំឡើងគ្រឿងអេឡិចត្រូនិក បរិក្ខារអគ្គិសនីនិងបរិក្ខារអគ្គិសនីបំភ្លឺ, ផលិតប្រដាប់ព្យួរសម្លៀកបំពាក់ ផលិតសម្ភារៈតុបតែងសម្រាប់ពិធីបុណ្យ (បុណ្យណូអែលនិងបុណ្យ Halloween) និងវត្ថុអនុស្សាវរីយ៍, ជ្រលក់ពណ៌, ផ្គុំដំឡើងម៉ូតូ, ផលិតក្តារបន្ទះ និងផលិតក្រដាស វិស័យទេសចរណ៍ចំនួន១គម្រោង៖ សាងសង់ និងធ្វើអាជីវកម្មសណ្ឋាគារផ្កាយ៥ ចំនួន១.៣៤១បន្ទប់ និងវិស័យកសិកម្ម និងកសិ-ឧស្សាហកម្មចំនួន១គម្រោង៖ បង្កើតកសិដ្ឋានបណ្តុះមេផ្សិតនិងផ្សិតគ្រប់ប្រភេទ និងវេចខ្ចប់កសិផល (ផ្សិត)។

គម្រោងវិនិយោគទាំង៩ ដូចបានរៀបរាប់ខាងលើនេះ បានបោះទីតាំងនៅរាជធានីភ្នំពេញ ខេត្តតាកែវ កំពង់ស្ពឹ កំពង់ឆ្នាំង និងស្វាយរៀង៕