ដោយៈ ម៉ាណា

    ភ្នំពេញៈ មន្រ្តីជាន់ខ្ពស់ក្រសួងសាធារណការ និងដឹកជញ្ជូនបានបើកកិច្ចប្រជុំស្តីពីការចាប់ផ្តើម (kick-off meeting) ការងារសិក្សាសមិទ្ធិលទ្ធភាព និងរៀបចំគំនូសប្លង់បច្ចេកទេសលម្អិត គម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង (UIDP)។

កិច្ចប្រជុំនេះដឹកនាំដោយលោកហេង ណន រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំកិច្ចប្រជុំដោយផ្ទាល់ និងតាមរយៈប្រព័ន្ធវីដេអូពីចម្ងាយ ស្តីពីការចាប់ផ្តើម (kick-off Meeting) ការងារសិក្សាសមិទ្ធិលទ្ធភាព (FS) និងរៀបចំគំនូសប្លង់បច្ចេកទេសលម្អិត  គម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង (UIDP) ដោយមានការចូលរួម ពីថ្នាក់ដឹកនាំក្រសួង អង្គភាពគ្រប់គ្រងគម្រោង តំណាងក្រសួងសេដ្ឋកិច្ច និងហិរញ្ញវត្ថុ តំណាងរដ្ឋបាលថ្នាក់ក្រោមជាតិ  និងតំណាងក្រុមហ៊ុនទីប្រឹក្សាបច្ចេកទេស ធនាគារវិនិយោគហេដ្ឋារចនាសម្ព័ន្ធអាស៊ី (AIIB) និងសមាជិកក្នុងអង្គភាពគ្រប់គ្រងគម្រោងផងដែរ។

កិច្ចប្រជុំនេះត្រូវបានរៀបចំឡើង ដើម្បីប្រកាសការចាប់ផ្តើមអនុវត្តកិច្ចសន្យា និងប្រកាសសមាសភាពក្រុមហ៊ុន ទីប្រឹក្សាបច្ចេកទេស បទបង្ហាញពីសាវតា វឌ្ឍនភាព និងសេចក្ដីព្រាងផែនការសិក្សាសមិទ្ធិ លទ្ធភាព (FS) និងរៀបចំគំនូសប្លង់បច្ចេកទេសលម្អិត (DED) នៃគម្រោង និងកិច្ចការងារផ្សេងៗទៀត ដើម្បីអោយការអនុវត្តគម្រោងប្រកបដោយប្រសិទ្ធភាព និងទទួលបានភាពជោគជ័យ តាមរយៈកិច្ចសហការយ៉ាងជិតស្និទ្ធិពីគ្រប់ភាគីពាក់ព័ន្ធទាំងអស់៕

ដោយៈ ម៉ាណា

    កោះកុងៈ រដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់បានបិទបញ្ចប់ការងារដីធ្លីនៅខេត្តកោះកុង ពីនេះទៅមុខ យើងត្រូវងាកមកប្រែក្លាយដីឱ្យមានគុណតម្លៃ និងគិតគូររៀបចំជួយលើកស្ទួយជីវភាពអ្នកកោះកុង។

ព័ត៌មាននេះត្រូវបានលើកឡើង ក្នុងពេលលោកឧបនាយករដ្ឋមន្រ្តីសាយ សំអាល់ រដ្ឋមន្រ្តីក្រសួងរៀបចំដែនដី បានជួបសំណេះ​សំណាល និងចែកប័ណ្ណដីធ្លីជូនប្រជាពលរដ្ឋ។

ក្រសួងបានសរសេរលើបណ្តាញទំនាក់ទំនងសង្គមរបស់ខ្លូនបន្តថា ចាប់ពីពេលនេះទៅ គឺកសាងខឿនសេដ្ឋកិច្ចមូលដ្ឋាន ធ្វើឱ្យប្រជាជន និងមន្ត្រីរាជការមានដំបូលលើក្បាល ម្ហូបលើតុ មានប្រាក់សន្សំ កូនទៅរៀន មានពេលវេលាលំហែ និងជួបជុំគ្រួសារ។

ថែ្លងនៅក្នុងពិធីប្រគល់វិញ្ញាបនបត្រ សម្គាល់ម្ចាស់អចលនវត្ថុចំនួន១៣០០ បណ្ណ ជូនពលរដ្ឋក្រុងខេមរភូម១មិន្ទ ខេត្តកោះកុង លោកឧបនាយករដ្ឋមន្ត្រី សាយ សំអាល់ បានអបអរសាទរពុកម៉ែបងប្អូនដែលបានមកទទួលវិញ្ញាបនបត្រ សម្គាល់ម្ចាស់អចលនវត្ថុនាពេលនេះ ហើយក្រសួងនឹងចែកជូនបងប្អូនជាបន្តបន្ទាប់ទៀត ដើម្បីធានានូវសុវត្ថិភាពផ្លូវច្បាប់ ក្នុងការកាន់កាប់អចលនទ្រព្យជូនបងប្អូនទាំងអស់។

មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកោះកុង គ្រោងនឹងបន្តប្រគល់វិញ្ញាបនបត្រ សម្គាល់ម្ចាស់អចលនវត្ថុជូនបងប្អូនពលរដ្ឋចំនួន៦ភូមិទៀត នៅស្រុកគិរីសាគរ និងស្រុកស្រែអំបិល នាពេលឆាប់ៗខាងមុខនេះ៕

ដោយៈ គង់ សូរិយា

    ភ្នំពេញៈ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានថ្លែងលើគោលការណ៍២ចំណុច គឺទឹកដី និងប្រជាជននៅតែជាអាទិភាព​របស់រាជរដ្ឋាភិបាល និងមិនទទួលស្គាល់ការកែប្រែបន្ទាត់ព្រំដែនរបស់ថៃ ជាឯកតោភាគី។

សម្តេចបានសរសេលើបណ្តាញ ទំនាក់ទំនងសង្គមរបស់ខ្លួននាព្រឹកថ្ងៃទី១០ កុម្ភៈនេះថា គោលការណ៍របស់រាជរដ្ឋាភិបាល គឺ ទី១. ទឹកដី និងប្រជាជន នៅតែជាអាទិភាពរបស់រាជរដ្ឋាភិបាល ទាំងពេលកន្លងមក បច្ចុប្បន្ន និងទៅអនាគត និង ទី២. ជំហរពាក់ព័ន្ធនឹងព្រំដែនកម្ពុជា-ថៃ គឺជាព្រំដែនអន្តរជាតិ រវាងរដ្ឋ និងរដ្ឋ និងត្រូវបានការពារដោយច្បាប់អន្តរជាតិ ហើយកម្ពុជាមិនទទួលស្គាល់ដាច់ខាត លើការកែប្រែខ្សែបន្ទាត់ព្រំដែន ឬការកាន់កាប់ទឹកដីដោយខុសច្បាប់អន្តរជាតិ ឬតាមរយៈការប្រើប្រាស់កម្លាំង។

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានថ្លែងក្នុងពិធីសំណេះសំណាលជាមួយសិស្សជាប់និទ្ទេសA សម្រាប់ការប្រឡងសញ្ញាបត្រ មធ្យមសិក្សាទុតិយភូមិ និង ការប្រឡងសញ្ញាបត្របច្ចេកទេស និងវិជ្ជាជីវៈ កម្រិត៣ នៅព្រឹកថ្ងៃទី ១០ ខែ កុម្ភៈ ឆ្នាំ ២០២៦។

បន្ថែមពីនេះ កម្ពុជាប្រកាន់ខ្ជាប់ នូវការដោះស្រាយបញ្ហាព្រំដែនកម្ពុជា-ថៃ ដោយសន្តិវិធី ស្របតាមច្បាប់អន្តរជាតិ ព្រមទាំងកិច្ចព្រមព្រៀងដែលមានស្រាប់ដែលកម្ពុជា និងថៃ បានចុះហត្ថលេខាជាមួយគ្នា ជាពិសេសការចុះវាស់វែងតាមយន្ដការ គណៈកម្មការចម្រុះ ខណ្ឌសីមាព្រំដែនគោក (JBC) ដើម្បីកំណត់ភាពត្រឹមត្រូវ និងយុត្តិធម៌របស់ប្រទេសទាំងពីរ ក្នុងការការពារអធិបតេយ្យភាព និងបូរណភាពទឹកដីរៀងៗខ្លួន។

ជាមួយគ្នានេះ សម្ដេចបវរធិបតី នាយករដ្ឋមន្ត្រី បានគូសបញ្ជាក់ថា “ការពង្រឹងគុណភាពវិស័យអប់រំកម្ពុជា គឺជាគោលដៅឤទិភាពរបស់រាជរដ្ឋាភិបាល ដែលបានកំណត់ក្នុងយុទ្ធសាស្ត្របញ្ចកោណ សម្រាប់អនុវត្តនៅគ្រប់ដំណាក់កាល”។

សម្តេចបន្តថា គឺការអប់រំឱ្យមានចំណេះដឹងទូលាយ ជំនាញពិតប្រាកដ ព្រមទាំង សីលធម៌ គុណភាព និង មនសិការស្នេហាជាតិ ជាពិសេស ការបណ្តុះបណ្តាលជំនាញបច្ចេកទេស វិទ្យាសាស្ត្រ និង បច្ចេកវិទ្យា ការតម្រង់ទិសសម្រាប់ទីផ្សារការងារ និងការពង្រឹងជំនាញបច្ចេកទេសដល់យុវជន សំដៅធានាថា “យុវជនម្នាក់មានជំនាញមួយយ៉ាងតិចប្រចាំជីវិត” ដើម្បីលើកស្ទួយជីវភាពគ្រួសារ ឱ្យកាន់តែល្អប្រសើ​រ និងរួមចំណែកក្នុងកាអភិវឌ្ឍសង្គម-សេដ្ឋកិច្ចជាតិ។

ជាមួយនេះ ការងារអភិវឌ្ឍធនធានមនុស្សកម្ពុជា ពិតជាមានមោទនភាពខ្ពស់ នៅពេលដែលវិស័យអប់រំរបស់ខ្លួន ទទួលបាននូវការរីកចម្រើន ទាំងបរិមាណ និងគុណភាព ព្រោះអនាគតរបស់ប្រទេសជាតិ គឺភ្ជាប់ជាមួយអនាគតរបស់យុវជន។

ដើម្បីចូលរួមជំរុញការអនុវត្តគោលការណ៍ “អ្នកចេះគឺជាប់” និង ការបង្កើនបរិមាណសិស្សជាប់និទ្ទេសA សម្តេចបានផ្តល់អនុសាសន៍មួយចំនួនដល់ថ្នាក់ដឹកនាំ និងមន្ត្រីគ្រប់លំដាប់ថ្នាក់ នៃក្រសួងអប់រំ យុវជន និង កីឡា ដើម្បីចូលរួមអនុវត្តបន្ត រួមមាន៖ ទី១. ត្រូវបង្កើនលទ្ធភាព តាមគ្រប់រូបភាព ដើម្បីបណ្តុះបណ្តាលសិស្សពូកែ រាប់ចាប់តាំងពីកម្រិតមត្តេយ្យសិក្សា រហូតដល់មធ្យមសិក្សាទុតិយភូមិ និង រៀបចំឱ្យមានការគាំទ្រ ចំពោះមុខដល់សិស្សរៀនពូកែដែលកំពុងជួបបញ្ហា ទាំងក្នុងការរស់នៅ និង ការរៀនសូត្រ។

ទី២. ត្រូវផ្តល់នូវការតម្រង់ទិសសិក្សា ដើម្បីឱ្យសិស្សពូកែរបស់យើងឈានចូល និងបន្តការសិក្សានៅកម្រិតបន្តបន្ទាប់ នៅតាមបណ្តាគ្រឹះស្ថានឧត្តមសិក្សា ឈានមុខនៅលើសកលលោក ដែលនឹងក្លាយជាធនធានដ៏សំខាន់ ក្នុងការអភិវឌ្ឍប្រទេសជាតិ ជាពិសេសមុខជំនាញវិទ្យាសាស្រ្ត បច្ចេកវិទ្យា វិស្វកម្ម និង គណិតវិទ្យា។

ទី៣. ត្រូវរៀបចំចងក្រងនូវបទពិសោធរបស់ក្មួយៗ ដែលជាសិស្សពូកែ អំពីវិធីសាស្រ្តក្នុងការរៀនសូត្រឱ្យក្លាយជាសិស្សពូកែ ដើម្បីចែករំលែកដល់ក្មួយៗ សិស្សានុសិស្សដទៃទៀត។ ទី៤. ត្រូវបន្តផ្តល់អាហារូបករណ៍ដល់សិស្សពូកែ សិស្សជួបការលំបាក ជាពិសេស សិស្សនារី និង សិស្សក្នុងគ្រួសារក្រីក្រ និង ធានាប្រសិទ្ធភាព និង ទី៥. ត្រូវបន្តអនុវត្តឱ្យកាន់តែសកម្ម នូវគោលនយោបាយអភិវឌ្ឍវិស័យអ​ប់​រំ ដើម្បីធានាថា ការអប់រំមានគុណភាព ប្រកបដោយបរិយាប័ន្ន និង លើកកម្ពស់ឱកាស ក្នុងការសិក្សាពេញមួយជីវិត សម្រាប់ទាំងអស់គ្នា៕

ដោយៈ ម៉ាលីនណា

    ភ្នំពេញៈ ឯកអគ្គរដ្ឋទូតចិនប្រចាំកម្ពុជា លោកវ៉ាង វិនប៊ីញបានជួបជាមួយលោកស៊ុន ចាន់ថុល ឧបនាយករដ្ឋមន្រ្តី និងជាអនុប្រធានទី១នៃក្រុមប្រឹក្សាអភិវឌ្ឍន៍កម្ពុជាកាលពីថ្ងៃទី៩ កុម្ភៈកន្លងមកនេះ។

លោកឯកអគ្គរដ្ឋទូត បានសរសេរលើបណ្តាញទំនាក់ទំនងសង្គមរបស់ខ្លួនថា មានក្តីរីករាយណាស់ ដែលបានប្រារព្ធកិច្ចប្រជុំលើកដំបូងនៃយន្តការសន្ទនាវិស័យសាធារណៈ-ឯកជនកម្ពុជា-ចិន ជាមួយលោកស៊ុន ចាន់ថុល ឧបនាយករដ្ឋមន្ត្រី និងអនុប្រធានទីមួយនៃក្រុមប្រឹក្សាអភិវឌ្ឍន៍កម្ពុជា។

លោកបន្តថា ភាគីទាំងពីរបានឯកភាពគ្នាថា នឹងប្រកាន់ឥរិយាបទជាក់ស្តែង ជំនាញ និងសហប្រតិបត្តិការ ដើម្បីសម្របសម្រួល និងដោះស្រាយបញ្ហាដែលសហគ្រាសចិន កំពុងជួបប្រទះនៅកម្ពុជា ព្រមទាំងបង្កើតបរិយាកាសល្អប្រសើរ សម្រាប់សហគ្រាសចិននៅកម្ពុជា ដើម្បីពង្រីកការដាក់វិនិយោគទុន។

លោកវ៉ាង វិនប៊ីញបានបញ្ជាក់ថា “យើងមានទំនុកចិត្តយ៉ាងពេញលេញ លើអនាគតនៃប្រទេសកម្ពុជា និងអនាគតនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្ម កម្ពុជា-ចិន”៕