ដោយ: សហសេវិក
អន្តរជាតិ: យោងតាមទិន្នន័យផ្លូវការបានបង្ហាញថា តម្លៃផ្ទះជាទូទៅនៅក្នុងទីក្រុងធំៗ និងមធ្យមចំនួន៧០ របស់ប្រទេសចិនបានធ្លាក់ចុះក្នុងខែវិច្ឆិកា បើធៀបនឹងខែតុលា ឆ្នាំ២០២៥។នេះបើយោងតាមការចុះផ្សាយដោយសារព័ត៌មាន Xinhua។

យោងតាមការិយាល័យស្ថិតិជាតិ (NBS) តម្លៃផ្ទះថ្មីនៅក្នុងទីក្រុងលំដាប់ទី១ រួមមានទីក្រុងប៉េកាំង សៀងហៃ ក្វាងចូវ និងសុិនជិន បានថយចុះ០,៤ភាគរយក្នុងខែវិច្ឆិកា បើប្រៀបធៀបនឹងខែតុលា។

កាសែតចិន Xinhua បានរាយការណ៍បន្តថា តម្លៃផ្ទះថ្មីនៅក្នុងទីក្រុងលំដាប់ទី២ បានធ្លាក់ចុះ០,៣ភាគរយ ខណៈដែលតម្លៃផ្ទះនៅក្នុងទីក្រុងលំដាប់ទី៣ បានធ្លាក់ចុះ០,៤ភាគរយ។

ទិន្នន័យរបស់ការិយាល័យ NBS ក៏បានបង្ហាញផងដែរពីការធ្លាក់ចុះប្រចាំខែនៃតម្លៃផ្ទះប្រភេទទី២ (second-hand)នៅទូទាំងទីក្រុងធំៗទាំងអស់របស់ប្រទេសចិន។ ដោយផ្អែកលើមូលដ្ឋានប្រចាំឆ្នាំ និន្នាការធ្លាក់ចុះជារួមនៃតម្លៃផ្ទះថ្មី និងផ្ទះប្រភេទទី២ នៅក្នុងទីក្រុងធំៗនៅតែបន្ត។

ក្នុងរយៈពេល១១ខែដំបូងនៃឆ្នាំ២០២៥ ការវិនិយោគរបស់ប្រទេសក្នុងការអភិវឌ្ឍអចលនទ្រព្យបានដាំក្បាលចុះ១៥,៩ភាគរយបើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យរបស់ការិយាល័យ NBS។

យោងតាមសន្និសីទការងារសេដ្ឋកិច្ចថ្នាក់ជាតិរបស់ប្រទេសចិន ដែលបានរៀបចំឡើងកាលពីសប្តាហ៍មុន រដ្ឋាភិបាលចិនបានប្តេជ្ញាខិតខំធ្វើឱ្យទីផ្សារអចលនទ្រព្យមានស្ថិរភាព និងជំរុញការសាងសង់ផ្ទះដែលមានគុណភាព ជាបន្តបន្ទាប់៕ប្រភព: Xinhua ៕

ដោយៈ ជេស៊ីកា

    ភ្នំពេញៈ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឧត្តមភរិយាសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃកម្ពុជា បានបន្តអញ្ជើញចូលរួមជាមួយក្រុមការងារស្ម័គ្រចិត្ត ជួយរៀបចំវេចខ្ចប់ អំណោយជាគ្រឿងឧបភោគបរិភោគ និងសម្ភារប្រើប្រាស់ចាំបាច់ជាច្រើនមុខ សម្រាប់យកទៅចែកជូនប្រជាពលរដ្ឋភៀសសឹកនៅតាមបណ្ដាជំរំសុវត្ថិភាព។

កាលពីថ្ងៃទី១៥ និងទី១៦ ខែធ្នូ ឆ្នាំ២០២៥ ក្រុមការងារស្ម័គ្រចិត្ត បានវេចខ្ចប់អំណោយចំនួន៨.០០០កញ្ចប់ទៀត ជាអំណោយដ៏ថ្លៃថ្លារបស់សម្ដេចតេជោ និងសម្ដេចកិត្តិព្រឹទ្ធបណ្ឌិត សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត សម្រាប់យកទៅចែកជូន ប្រជាពលរដ្ឋភៀសសឹក នៅតាមបណ្ដាជំរំសុវត្ថិភាព ដោយថ្ងៃទី១៥ធ្នូ បានចែកដល់ប្រជាពលរដ្ឋភៀសសឹកចំនួន ៣.០០០គ្រួសារ និងថ្ងៃទី១៦ធ្នូ បន្តចែកដល់ប្រជាពលរដ្ឋចំនួន ៥.០០០គ្រួសារ។

គិតត្រឹមថ្ងៃទី១៦ធ្នូនេះ អំណោយសរុបចំនួន២២.៦០០កញ្ចប់ ត្រូវបានចែកដល់ដៃ ប្រជាពលរដ្ឋភៀសសឹកចំនួន ២២.៦០០គ្រួសារ តាមបណ្ដាជំរំភៀសសឹកនានា។

កាលពីថ្ងៃទី១៥​កន្លងទៅ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បន្ទាប់ពីបានចុះសួរសុខទុក្ខវីរយុទ្ធជន ការពារបូរណភាពទឹកដី ដែលរងរបួសកំពុងព្យាបាល នៅតាមមន្ទីរពេទ្យនៅរាជធានីភ្នំពេញ អ្នកម្តាយមនុស្សធម៌ ក៏បានឆ្លៀតពេលវេលាអញ្ជើញ ចូលរួមវេចខ្ចប់អំណោយ ជាមួយក្រុមការងារស្ម័គ្រចិត្តផងដែរ ដែលនេះបង្ហាញពីការយកចិត្តទុកដាក់​ គិតគូរពីទុក្ខលំបាករបស់បងប្អូន ប្រជាពលរដ្ឋគ្រប់ពេលវេលា គ្រប់វិនាទី មិនដែលភ្លេចម្តងណាឡើយ៕

ដោយៈ ចំណាន

    ភ្នំពេញៈ រដ្ឋមន្រ្តីក្រសួងសាធារណការ និងដឹកជញ្ជូន លោកប៉េង ពោធិ៍នា បានអញ្ជើញដឹកនាំកិច្ចប្រជុំស្តីពី ហេដ្ឋារចនាសម្ព័ន្ធផ្លូវថ្នល់ដែលខូចខាតក្នុងអំឡុងពេលសង្រ្គាមកម្ពុជា-សៀម។

កិច្ចប្រជុំនេះ មានការចូលរួម ឯកឧត្តម លោកជំទាវ ថ្នាក់ដឹកនាំក្រសួង មន្ទីរសាធារណការ និងដឹកជញ្ជូន តាមបណ្តាខេត្ត អង្គភាពពាក់ព័ន្ធ និងមន្រ្តីបច្ចេកទេស។

កិច្ចប្រជុំនេះ ធ្វើឡើងដើម្បីពិនិត្យពិភាក្សា លើការខូចខាតហេដ្ឋារចនាសម្ព័ន្ធផ្លូវថ្នល់ ផលប៉ះពាល់ និងយន្តការដោះស្រាយបន្ទាន់ ដើម្បីសម្រួល ដល់ការធ្វើដំណើររបស់បងប្អូនប្រជាពលរដ្ឋ៕

ដោយ៖ សហការី
ភ្នំពេញ៖ សកម្មភាពចុះចែកស្បៀងអាហារជូនទៅដល់បងប្អូនជនភៀសសឹកកំពុងខ្វះខាត ក្រោមការផ្តួចផ្តើមដោយ ឧកញ៉ាបណ្ឌិត គីម ហ៊ាង អគ្គនាយក បុរី វិមានសំណាង និងជំទាវឧកញ៉ា គង់ សំណាង អគ្គនាយិការ បុរី វិមានសំណាង នាថ្ងៃទី17 ខែធ្នូ ឆ្នាំ2025។
សូមអរគុណដល់បងប្អូន និងក្រុមការងារទាំងអស់ដែលបានមកចូលរួមវេចខ្ចប់ និងរៀបចំសម្ភារប្រើប្រាស់ ក៏ដូចជាស្បៀងដែលទទួលបានពីការបរិច្ចាគរបស់បងប្អូនផ្ទាល់ មកកាន់ បុរី វិមានសំណាង ជូនទៅដល់បងប្អូនជនភៀសសឹក។ 🇰🇭

ដោយៈ ម៉ាណា

ភ្នំពេញៈ អគ្គលេខាធិការក្រុមប្រឹក្សាអភិវឌ្ឍន៍កម្ពុជា លោកជា វុទ្ឋីបានលើកឡើងពីមូលដ្ឋាន ដែលត្រូវធ្វើដើម្បីសម្រេចបានចក្ខុវិស័យឆ្នាំ​២០៥០ ក្នុងការប្រែក្លាយកម្ពុជាជាប្រទេសមានប្រាក់ចំណូលខ្ពស់។

លោកបន្តថា ដើម្បីសម្រេចបានចក្ខុវិស័យឆ្នាំ២០៥០  ប្រែក្លាយជាប្រទេសមានចំណូលខ្ពស់ កម្ពុជាត្រូវតែបន្តខិតខំធ្វើពិពិធកម្មសេដ្ឋកិច្ចរបស់ខ្លួន តាមរយៈការធ្វើពិពិធកម្មប្រភពទុនវិនិយោគ ក៏ដូជាការធ្វើពិពិធកម្មឧស្សាហកម្ម បូករួមទាំងការខិតខំជំរុញលើកទឹកចិត្តឱ្យមានការផលិត/កែច្នៃវត្ថុធាតុដើម ក្នុងស្រុកឱ្យបានជាអតិបរមា ហើយជាពិសេសការកែច្នៃកសិផល។

លោកជា វុទ្ធី បានថ្លែងបែបនេះ ក្នុងកិច្ចប្រជុំផ្ទៃក្នុងរបស់ក្រុមការងារBCT ក្នុងគោលបំណង (១) ណែនាំខ្លួន និងរឹតចំណងមិត្តភាពរវាងសមាជិកក្រុមការងារ (២) ពិភាក្សាអំពីយន្តការទំនាក់ទំនង និងទិសដៅចំពោះមុខរបស់ BCT និង (៣) ត្រៀមលក្ខណៈសម្រាប់វគ្គបណ្តុះបណ្តាលនៅប្រទេសជប៉ុន ដែលនឹងប្រព្រឹត្តទៅក្នុងខែមករា ឆ្នាំ២០២៦ ខាងមុខ។

ក្រុមការងារBCT ត្រូវបានបង្កើតឡើងក្នុងគោលបំណង លើកកម្ព​ស់ប្រសិទ្ធភាពនៃការផ្តល់សេវាគាំទ្រ និងសេវាថែទាំជូនវិនិយោគិនជប៉ុន ដោយអនុលោមតាមស្មារតី នៃកញ្ចប់សហបង្កើតសេដ្ឋកិច្ចកម្ពុជា- ជប៉ុន ដែលបានប្រកាសដាក់ចេញ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោក Shigeru Ishiba អតីតនាយករដ្ឋមន្ត្រីជប៉ុន កាលពីថ្ងៃទី៣០ ខែឧសភា ឆ្នាំ២០២៥៕