ដោយៈ ចំណាន

 លោកឈួន វិន រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បានដឹកនាំក្រុមការងារជំនាញចុះពិនិត្យស្ថានភាពជាក់ស្តែងនៃផ្លូវជាតិលេខ៨ ចាប់ពីស្ពានព្រែកតាមាក់ រហូតដល់ស្រុកពញាក្រែក (ត្រង់ចំណុចប្រសព្វផ្លូវជាតិលេខ៧)។

បេសកកម្មនេះ មានការចូលរួមពីថ្នាក់ដឹកនាំ និងមន្ត្រីជំនាញក្រសួង តំណាងធនាគារAIIB មន្ទីរសាធារណការ និងដឹកជញ្ជូន ខេត្តកណ្ដាល ខេត្តព្រៃវែង និងខេត្តត្បូងឃ្មុំផងដែរ។

ការចុះពិនិត្យនេះធ្វើឡើង ក្នុងគោលបំណងសិក្សា វាយតម្លៃស្ថានភាពផ្លូវជាក់ស្តែង ប្រមូលទិន្នន័យបច្ចេកទេស និងពិភាក្សាជាមួយអាជ្ញាធរពាក់ព័ន្ធ ដើម្បីប្រមូលធាតុចូលបន្ថែម សម្រាប់រៀបចំគម្រោងផ្លូវជាតិលេខ៨ឱ្យកាន់តែប្រសើរឡើង។

គម្រោងនេះមានមានប្រវែង សរុបប្រមាណ១២៩គីឡូម៉ែត្រ ចាប់ពីរង្វង់មូលព្រែកតាមាក់ ស្រុកខ្សាច់កណ្ដាល ខេត្តកណ្ដាល រហូតដល់ចំណុចប្រសព្វផ្លូវជាតិលេខ៧ ស្រុកពញាក្រែក ខេត្តត្បូងឃ្មុំ និងមានផ្លូវខ្នែងលេខ៨៨ តភ្ជាប់ទៅច្រកព្រំដែនអន្តរជាតិកម្ពុជា -វៀតណាម ម៉ឺនជ័យ-តឺនណាម។

ផ្លូវជាតិលេខ៨ គឺជាខ្សែផ្លូវយុទ្ធសាស្ត្រដ៏សំខាន់ សម្រាប់ការធ្វើដំណើរ និងដឹកជញ្ជូនទំនិញ ព្រមទាំងមានតួនាទី តភ្ជាប់រាជធានីភ្នំពេញទៅកាន់តំបន់ភាគខាងកើត និងច្រកព្រំដែនអន្តរជាតិកម្ពុជា-វៀតណាមផងដែរ៕

ដោយ: សហសេវិក
អន្តរជាតិ: ក្រុមហ៊ុនប្រឹក្សាអចលនទ្រព្យ Colliers Philippines បានបន្ទាបការព្យាករណ៍តម្រូវការការិយាល័យសរុបនៅទីក្រុងម៉ានីលរបស់ប្រទេសហ្វីលីពីនសម្រាប់ឆ្នាំនេះចំនួន ២៥ភាគរយ ពី៤០០.០០០ម៉ែត្រការ៉េ មកត្រឹម៣០០.០០០ម៉ែត្រការ៉េ។

ការព្យាករណ៍នេះធ្វើឡើង ស្របពេលវិបត្តិនៅមជ្ឈិមបូព៌ាធ្វើឱ្យក្រុមហ៊ុននានាមានការប្រុងប្រយ័ត្នកាន់តែខ្លាំងអំពីការពង្រីក និងការផ្លាស់ប្តូរទីតាំង។

ការជួលការិយាល័យនៅទីក្រុងម៉ានីលនៅត្រីមាសទី២ មានចំនួនប្រហែល១៤៥.០០០ម៉ែត្រការ៉េ ដាំក្បាលចុះ២៤ភាគរយបើធៀបនឹងត្រីមាសទី១ និងជាកម្រិតទាបបំផុតចាប់តាំងពីឆ្នាំ២០២៤។

អត្រាការិយាល័យទំនេរស្ថិតក្នងរង្វង់១៩ភាគរយ ឬស្មើនឹងប្រហែល២,៨លានម៉ែត្រការ៉េនៃទំហំការិយាល័យទំនេរ។ តម្លៃជួលការិយាល័យជាទូទៅ នៅក្នុងរដ្ឋធានីម៉ានីលបន្តស្ថិតនៅទ្រឹង។

ទីក្រុងម៉ានីលត្រូវបានគេរំពឹងថា នឹងទទួលបានការផ្គត់ផ្គង់ការិយាល័យថ្មីប្រហែល៣៥០.០០០ម៉ែត្រការ៉េជារៀងរាល់ឆ្នាំក្នុងរយៈពេល៥ឆ្នាំខាងមុខ។ ការណ៍នេះអាចជំរុញអត្រាការិយាល័យទំនេរឱ្យកើនឡើងខ្ពស់។

និន្នាការនៃតម្រូវការការិយាល័យក៏កំពុងងាកទៅរកអគារមាននិរន្តរភាពផងដែរ ដោយប្រតិបត្តិការជួលការិយាល័យចំនួន៦៨ភាគរយនៅឆមាសទីមួយ ជាអគារការិយាល័យដែលមានវិញ្ញាបនបត្របញ្ជាក់ពីភាពបៃតង៕

ដោយ: សហសេវិក
អន្តរជាតិ: តម្លៃអចលនទ្រព្យពាណិជ្ជកម្មនៅក្នុងប្រទេសអាល្លឺម៉ង់បានធ្លាក់ចុះនៅត្រីមាសទីពីរ ឆ្នាំ២០២៦ ដោយបិទបញ្ចប់ការងើបឡើងវិញ។

ការធ្លាក់ចុះនេះបានកើតឡើង បន្ទាប់ពីតម្លៃអចលនទ្រព្យពាណិជ្ជកម្មបានកើនឡើងរយៈពេល៥ត្រីមាស ក្រោយធ្លាក់ចុះអស់រយៈពេលជាច្រើនឆ្នាំ បន្ទាប់ពីការឈ្លានពានរបស់រុស្ស៊ីលើអ៊ុយក្រែនក្នុងឆ្នាំ២០២២។

សង្គ្រាមនៅតំបន់មជ្ឈិមបូព៌ាបានបង្កើនការព្រួយបារម្ភជាថ្មីម្តងទៀតអំពីអតិផរណា និងអត្រាការប្រាក់ខ្ពស់។ ការណ៍នេះបង្កការលំបាកសម្រាប់ការផ្តល់ហិរញ្ញប្បទានដល់ការវិនិយោគអចលនទ្រព្យពាណិជ្ជកម្ម។

តម្លៃអចលនទ្រព្យការិយាល័យ និងលក់រាយ៖ បានធ្លាក់ចុះ១ភាគរយ បើប្រៀបធៀបទៅនឹងអត្រាកំណើន០,៥ភាគរយនៅក្នុងត្រីមាសទី១។ ផ្ទុយទៅវិញ តម្លៃលំនៅឋានបានកើនឡើង១,៩ភាគរយក្នុងត្រីមាសទី២ ធៀបនឹងឆ្នាំមុន។

ខុសផ្ទុយពីទីផ្សារលំនៅឋាន ទីផ្សារអចលនទ្រព្យពាណិជ្ជកម្មមានភាពងាយរងគ្រោះខ្លាំងជាងពីភាពតានតឹងខាងភូមិសាស្ត្រនយោបាយ ការរំពឹងទុកអតិផរណា និងអត្រាការប្រាក់។

ជារួម ទស្សនវិស័យសម្រាប់ទីផ្សារអចលនទ្រព្យពាណិជ្ជកម្មរបស់ប្រទេសអាល្លឺម៉ង់នឹងពឹងផ្អែកយ៉ាងខ្លាំងទៅលើថាតើ និងពេលណាដែលជម្លោះភូមិសាស្ត្រនយោបាយបច្ចុប្បន្នត្រូវបានដោះស្រាយ៕

ដោយៈ ចំណាន

   ភ្នំពេញៈ ចំណុចសំខាន់មិនមែនតម្លៃថោក ទល់នឹងតម្លៃថ្លៃ ដែលលោក អ្នកគួរសម្រេចចិត្តវិនិយោគនោះទេ ប៉ុន្តែពួកគេគួរសិក្សា និងដឹងពីព័ត៌មានមួយចំនួន។

ធនាគារពិភពលោកនិយាយថា ប្រទេសកម្ពុជានៅតែកំពុងធ្វើនគរូបនីយកម្ម ហើយផលប៉ះពាល់ទីក្រុងភ្នំពេញ បានពង្រីកយ៉ាងច្រើន។ ការងារថ្មីៗរបស់ខ្លួន ក៏បានកំណត់អត្តសញ្ញាណទីក្រុងភ្នំពេញ និងទីក្រុងចំនួនប្រាំពីរផ្សេងទៀតរបស់កម្ពុជាផងដែរ រួមមាន ខេត្តបាត់ដំបន់ កំពត កែប កោះកុង ប៉ោយប៉ែត សៀមរាប និងខេត្តព្រះសីហនុ  សម្រាប់ហេដ្ឋារចនាសម្ព័ន្ធ និងផែនការអភិវឌ្ឍន៍ទីក្រុងឆ្លាតវៃ សម្រាប់អាកាសធាតុ។

សំខាន់ជាងនេះទៅទៀត ប្រទេសកម្ពុជាបច្ចុប្បន្នកំពុងស្ថិតក្នុងស្ថានភាពធ្លាក់ចុះនៃអចលនទ្រព្យ។

ធនាគារពិភពលោកបានរាយការណ៍ថា តម្លៃដីនៅទីក្រុងភ្នំពេញបានបន្តធ្លាក់ចុះ នៅក្នុងឆមាសទីមួយ ឆ្នាំ២០២៥ ដោយតម្លៃនៅដូនពេញ បឹងកេងកង និង៧មករា ធ្លាក់ចុះប្រហែល៨ ទៅ១០% ធៀបនឹងឆ្នាំមុន។

វាជាការបង្កើតឱកាសគួរឱ្យចាប់អារម្មណ៍មួយ ដែលការទិញដីល្អក្នុងតម្លៃបញ្ចុះតម្លៃនៅថ្ងៃនេះ និងរង់ចាំហេដ្ឋារចនាសម្ព័ន្ធ ចំនួនប្រជាជន និងសកម្មភាពអាជីវកម្មដើម្បីតាមទាន់។

អ្វីដែលភស្តុតាងរបស់អ្នកជំនាញបង្ហាញ? ការវាយតម្លៃប្រចាំឆ្នាំ ២០២៦ របស់ធនាគារពិភពលោកនិយាយថា សេដ្ឋកិច្ចកម្ពុជាកំពុងប្រឈមមុខ នឹងការធ្លាក់ចុះនៃវិស័យអចលនទ្រព្យ ប៉ុន្តែFDI បានឈានដល់៥,១ពាន់លានដុល្លារនៅឆ្នាំ ២០២៥ ខណៈដែលការនាំចេញនៅតែរឹងមាំ។

ធនាគារនេះក៏ព្យាករណ៍ថា កំណើនGDP៣,៩% នៅឆ្នាំ ២០២៦ និង៤,៩% នៅឆ្នាំ២០២៧។

ធនាគារពិភពលោក ក៏បានប្រកាសពីការវិនិយោគដឹកជញ្ជូនសំខាន់ៗតាមបណ្តោយច្រករបៀងAH21 ដោយនិយាយថា ការតភ្ជាប់ប្រសើរឡើង អាចជំរុញការវិនិយោគឯកជន និងសកម្មភាពសេដ្ឋកិច្ចឆ្លងដែន ជាពិសេសក្នុងវិស័យកសិ-ពាណិជ្ជកម្ម ភស្តុភារកម្ម ដឹកជញ្ជូន និងទេសចរណ៍។

ដូច្នេះ សម្រាប់ការវិនិយោគដីធ្លី អ្នកជំនាញបានលើករូបមន្តមួយចំនួនដូចជា តម្លៃទិញចូលទាប មានប័ណ្ណកម្មសិទ្ធិល្អ ការចូលប្រើប្រាស់ផ្លូវធំទូលាយ ហេដ្ឋារចនាសម្ព័ន្ធនឹងមកដល់ កំណើនប្រជាជន/អាជីវកម្ម ដែលនឹងទាក់ទាញផលចំណេញពីការវិនិយោគខ្ពស់។

ឧទាហរណ៍ ឧបមាថាអ្នកទិញដីក្នុងតម្លៃ៥០ដុល្លារ/ម៉ែត្រការ៉េ នៅក្នុងតំបន់ដែលបច្ចុប្បន្ន នៅខាងក្រៅតំបន់អភិវឌ្ឍន៍សំខាន់។ប្រសិ​នបើហេដ្ឋារចនាសម្ព័ន្ធ និងការអភិវឌ្ឍន៍ជំរុញតម្លៃដល់១០០ ដុល្លារ/ម៉ែត្រការ៉េ។

តម្លៃដី៥០ដុល្លារ នឹងកើនដល់១០០ដុល្លារក្នុងមួយម៉ែត្រការ៉េ ចំណេ​ញដើមទុនសរុប១០០%។

ប៉ុន្តែប្រសិនបើអ្នកទិញ ដីឡូតិ៍ល្អៗរួចហើយក្នុងតម្លៃ៥០០ ដុល្លារ/ម៉ែត្រការ៉េ ហើយវាកើនឡើងដល់៧០០ ដុល្លារ មានន័យថា លោក អ្នកទទួលបានផលវចំណេញ ត្រលប់ពីការវិនិយោគ៤០%។

ការវិនិយោគលើកទីពីរ រកចំណូលបានច្រើនជាងក្នុងមួយម៉ែត្រការ៉េ ប៉ុន្តែការវិនិយោគលើកទីមួយ ផ្តល់ផលចំណេញភាគរយខ្ពស់ជាង។

ទោះជាយ៉ាងណា អ្នកជំនាញព្រមានថា ប៉ុន្តែកុំទិញដីថោកបំផុត
ខ្ញុំចង់ទិញដី៥០ដុល្លារ/ម៉ែត្រការ៉េ ចម្ងាយ១ ទៅ៣គីឡូម៉ែត្រពីច្រករបៀងអភិវឌ្ឍន៍ដ៏សំខាន់ ជាជាងដី១៥ ដុល្លារ/ម៉ែត្រការ៉េ ចម្ងាយ១៥ គីឡូម៉ែត្រ ដែលមានផ្លូវមិនល្អ និងគ្មានផែនការអភិវឌ្ឍន៍៕