ដោយៈ ចំណាន

   ភ្នំពេញៈ លោកស្រីAleks Zittle បានបង្ហាញពីការចាប់អារម្មណ៍របស់ក្រុមហ៊ុន និងវិនិយោគិនសហរដ្ឋអាម៉េរិក ចំពោះវិស័យថាមពលកកើតឡើងវិញនៅកម្ពុជា ជាពិសេសចំពោះគម្រោងវិនិយោគធំៗរបស់ រ៉ូយ៉ាល់ គ្រុប។

លោកស្រីមានប្រសាសន៍បែបនេះ ក្នុងឱកាសអញ្ជើញជួបពិភា​ក្សាការជាមួយ អ្នកឧកញ៉ាគិត ម៉េង ​ប្រធានសភាពាណិជ្ជកម្មកម្ពុជានិងប្រធានក្រុមប្រឹក្សាភិបាល និងអគ្គនាយកប្រតិបត្តិក្រុមហ៊ុន រ៉ូយ៉ាល់ គ្រុប នៅរសៀលថ្ងៃទី១២ ខែសីហា ឆ្នាំ២០២៦ នៅទីស្នាក់ការក្រុមហ៊ុន រ៉ូយ៉ាល់ គ្រុប ដើម្បីពិភាក្សាអំពីការពង្រឹងកិច្ច សហប្រតិបត្តិការធុរកិច្ច និងវិនិយោគរវាងកម្ពុជា និងសហរដ្ឋអាម៉េរិក។

ក្នុងជំនួបនេះ ភាគីទាំងពីរបានផ្តោតសំខាន់ លើឱកាសវិនិយោគរបស់ក្រុមហ៊ុនអាម៉េរិកនៅកម្ពុជា ព្រមទាំងលទ្ធភាពក្នុងការចាប់ដៃគូជាមួយ ក្រុមហ៊ុន រ៉ូយ៉ាល់ គ្រុប ជាពិសេសក្នុងវិស័យថាមពល និងថាមពលកកើតឡើងវិញ ដែលត្រូវបានចាត់ទុកថាជាវិស័យមានសក្តានុពលសម្រាប់ការវិនិយោគ និងកិច្ចសហប្រតិបត្តិការរយៈពេលវែង។

លោកស្រីAleks Zittle បានបង្ហាញពីការចាប់អារម្មណ៍របស់ក្រុមហ៊ុន និងវិនិយោគិនសហរដ្ឋអាម៉េរិក ចំពោះវិស័យថាមពលកកើតឡើងវិញនៅកម្ពុជា ជាពិសេសចំពោះគម្រោងវិនិយោគធំៗរបស់ រ៉ូយ៉ាល់ គ្រុប ដែលអាចបង្កើតឱកាស សម្រាប់ក្រុមហ៊ុនអាម៉េរិក ចូលរួមជាដៃគូ និងពង្រីកវត្តមានរបស់ខ្លួននៅក្នុងទីផ្សារកម្ពុជា។

ជាការឆ្លើយតប អ្នកឧកញ៉ា គិត ម៉េង បានស្វាគមន៍ និងបង្ហាញការបើកចំហចំពោះក្រុមហ៊ុនសហរដ្ឋអាម៉េរិក ដែលមានបំណងមកវិនិយោគនៅកម្ពុជា ជាពិសេសក្នុងវិស័យថាមពលកកើតឡើងវិញ និងតាមរយៈកិច្ចសហការជាមួយក្រុមហ៊ុន បទុមសាគរ អេនើជី ឯ.ក (Botum Sakor Energy Company Limited) ដែលជាក្រុមហ៊ុនបុត្រសម្ព័ន្ធ គ្រប់គ្រងទាំងស្រុងដោយ រ៉ូយ៉ាល់ គ្រុប។

ទន្ទឹមនឹងនេះ អ្នកឧកញ៉ា គិត ម៉េង ក៏បានលើកឡើងពីសក្តានុពល និងភាពទាក់ទាញ នៃបរិយាកាសវិនិយោគនៅកម្ពុជា ដោយសង្កត់ធ្ងន់លើស្ថិរភាពនយោបាយ ស្ថិរភាពម៉ាក្រូសេដ្ឋកិច្ច និងការគាំទ្ររបស់រាជរដ្ឋាភិបាល ចំពោះវិស័យឯកជន និងវិនិយោគិនបរទេស។ កត្តាទាំងនេះ ត្រូវបាន មើលឃើញថាជាមូលដ្ឋានសំខាន់ សម្រាប់ការទាក់ទាញទុនវិនិយោគ និងជំរុញការចូលរួមរបស់ក្រុមហ៊ុនអន្តរជាតិ ក្នុងការអភិវឌ្ឍវិស័យថាមពលរបស់កម្ពុជា។

ក្នុងចំណោមគម្រោងវិនិយោគសំខាន់ៗរបស់ រ៉ូយ៉ាល់ គ្រុប ក្នុងវិស័យថាមពល គឺគម្រោងរោងចក្រផលិតអគ្គិសនី ដើរដោយឧស្ម័នធម្មជាតិរាវLNG របស់ ក្រុមហ៊ុនបទុមសាគរ អេនើជី ដែលមានអានុភាពសរុប៩០០មេហ្កាវ៉ាត់ និងទុនវិនិយោគប្រមាណ១,៣៤ពាន់លានដុល្លារអាម៉េរិក ស្ថិតនៅក្នុងស្រុកបទុមសាគរ ខេត្តកោះកុង ត្រូវបានចាត់ទុកថាជាគម្រោងថាមពលដ៏ធំមួយ ដែលអាចចូលរួមពង្រឹងសមត្ថភាពផលិតអគ្គិសនី និងសន្តិសុខថាមពលរបស់កម្ពុជា។

គម្រោងបានចាប់ផ្តើមសាងសង់ជាផ្លូវការ កាលពីថ្ងៃទី១៦ ខែតុលា ឆ្នាំ២០២៤ ហើយត្រូវបានបែងចែកជាពីរដំណាក់កាល។ ដំណា​ក់កាលទី១ មានអានុភាព៤៥០មេហ្គាវ៉ាត់ គ្រោងនឹងដាក់ឱ្យដំណើរការនៅចុងឆ្នាំ២០២៦ ខណៈដំណាក់កាលទី២ ដែលមានអានុភាព៤៥០មេហ្គាវ៉ាត់បន្ថែមទៀត គ្រោងនឹងដាក់ឱ្យដំណើរការនៅឆ្នាំ២០២៧។

ការអភិវឌ្ឍគម្រោងនេះ ត្រូវបានរំពឹងថា នឹងជួយបង្កើនសមត្ថភាពផ្គត់ផ្គង់អគ្គិសនីក្នុងប្រទេស កាត់បន្ថយសម្ពាធលើប្រព័ន្ធផ្គត់ផ្គង់ថាមពល ជួយបង្កើនស្ថិរភាពបណ្តាញអគ្គិសនី និងគាំទ្រដល់ការរីកចម្រើននៃវិស័យឧស្សាហកម្ម និងសកម្មភាពសេដ្ឋកិច្ចនៅកម្ពុជា៕

ដោយៈ ម៉ាណា

   ភ្នំពេញៈ ក្រុមមន្រ្តីក្រសួងសាធារណការ បានបើកកិច្ចប្រជុំពិនិត្យពិភាក្សា លើការតបណ្តាញខ្សែកាប្លិ៍អុបទិក នៅក្រោមផ្លូវថ្មើរជើងនៃគម្រោងសាងសង់ស្ពានឆ្លងកាត់ទន្លេបាសាក់ (ចាក់អង្រែ ក្រោម-ព្រែកប្រា)។

លោកសួង ហេង រដ្ឋលេខាធិការលេខា ក្រសួងសាធារណការ និងដឹកជញ្ជូន និងជានាយកគម្រោងស្ថាបនាស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) បានដឹកនាំកិច្ចប្រជុំពិនិត្យករណីក្រុមហ៊ុន ម៉ាយក្រូម៉ាកស៍ឯ.ក ស្នើសុំរត់បណ្តាញខ្សែកាប្លិ៍អុបទិក នៅក្រោ​មផ្លូវថ្មើរជើង នៃគម្រោងសាងសង់ស្ពានឆ្លងកាត់ ទន្លេបាសាក់ (ចាក់អង្រែ ក្រោម-ព្រែកប្រា) ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធផងដែរ។

កិច្ចប្រជុំនេះត្រូវបានរៀបចំឡើង ក្នុងគោលបំណង ដើម្បីពិនិត្យលើការតបណ្តាញខ្សែកាប្លិ៍អុបទិក របស់ក្រុមហ៊ុននៅក្រោមផ្លូវថ្មើរជើងនៃគម្រោងសាងសង់ស្ពាន ឆ្លងកាត់ទន្លេបាសាក់ (ចាក់អង្រែ ក្រោម-ព្រែកប្រា) ធ្វើយ៉ាងណាឱ្យអនុវត្តន៍ ទៅតាមបទដ្ឋានបច្ចេកទេសត្រឹមត្រូវ ដើម្បីឱ្យគម្រោងសាងសង់ស្ពាននេះ មានភាពរលូន ទាន់ពេលវេលា និងមានប្រសិទ្ធភាព៕

ដោយៈ ម៉ាណា

   ភ្នំពេញៈ ក្រុមមន្រ្តី និងវិស័យឯកជនបានបើកកិច្ចពិភាក្សាស្វែងយល់អំពីគោលការណ៍ និងនីតិវិធីនៃការដំឡើង និងការប្រើប្រាស់ប្រព័ន្ធថាមពលពន្លឺព្រះអាទិត្យលើដំបូល (សូឡា)នៅកម្ពុជា។

តាមរយៈកិច្ចសហការគ្នារវាងសភាពាណិជ្ជកម្មកម្ពុជា និងអាជ្ញាធរអគ្គិសនីកម្ពុជា​ ក្រោមក្របខណ្ឌនៃក្រុមការងារ “ញ” “ផ្នែកធនធានរ៉ែ និងថាមពល” នៃយន្តការវេទិការាជរដ្ឋាភិបាល-ផ្នែកឯកជន បានរៀបចំកិច្ចពិភាក្សា ស្វែងយល់អំពីគោលការណ៍ និងនីតិវិធីនៃការដំឡើង និងការប្រើប្រាស់ប្រព័ន្ធថាមពលពន្លឺព្រះអាទិត្យ លើដំបូលនៅកម្ពុជាសម្រាប់វិស័យឯកជន ក្រោមអធិបតីភាពឧកញ៉ាអ៊ុន យុទ្ធី សហប្រធានក្រុមការងារ​ “ញ” “ផ្នែកធនធានរ៉ែ និងថាមពល” ផ្នែកឯកជន និងលោកយឹម វិសិដ្ឋ ប្រធានអាជ្ញាធរអគ្គិសនីកម្ពុជា។

កិច្ចពិភាក្សានេះក៏មានការចូលរួមផងដែរ ពីសំណាក់មន្តរីជំនាញ និហមន្ត្រីពាក់ព័ន្ធនៃអាជ្ញាធរអគ្គីសនីកម្ពុជា តំណាងពីអគ្គិសនីកម្ពុជា (EDC) តំណាងសភាពាណិជ្ជកម្មអន្តរជាតិប្រចាំនៅកម្ពុជា តំណា​ង​គ្រឹះស្ថាន សមាគមក្រុមហ៊ុនឯកជន និងអ្នកពាក់ព័ន្ធក្នុងវិស័យថាមព​លពន្លឺព្រះអាទិត្យលើដំបូល (សូឡា) ទាំងការចូលរួមដោយផ្ទាល់ និងតាមប្រព័ន្ធអនឡាញសរុបប្រមាណជា៣៥០នាក់។

គោលបំណងនៃកិច្ចពិភាក្សានេះគឺ ទី១. បង្កើនការយល់ដឹង៖ ដើម្បីស្តាប់ការបង្ហាញផ្ទាល់អំពីគោលការណ៍ បទប្បញ្ញត្តិ និងនីតិវិធីបច្ចេកទេសផ្លូវការនៃការដំឡើង និងប្រើប្រាស់ថាមពលពន្លឺព្រះ អាទិ​ត្យលើដំបូលនៅកម្ពុជា និងទី២. ដោះស្រាយការលំបាក និងចម្ងល់៖ បើកឱកាសឱ្យតំណាងផ្នែកឯកជនបានលើក ឡើងនូវបញ្ហាប្រឈម ចម្ងល់ និងសំណូម ពរជាក់ស្តែង ជុំវិញការអនុវត្តកន្លងមក ដើម្បីទទួលបានការបកស្រាយ និងដំណោះស្រាយដ៏ច្បាស់លាស់ ពីអាជ្ញាធរមាន សមត្ថកិច្ច។

ឧកញ៉ា អ៊ុន យុទ្ធី សហប្រធានក្រុមការងារ​ “ញ” តំណាងផ្នែកឯកជនបានថ្លែងថា ការប្រើប្រាស់ថាមពលពន្លឺព្រះអាទិត្យ លើដំបូល (Rooftop Solar) កំពុងតែក្លាយជាប្រធានបទដ៏ក្តៅគគុក និងជាតម្រូវការចាំបាច់របស់វិស័យឯកជន ជាពិសេសក្នុងចំណោមរោងចក្រ សហគ្រាស និងអាជីវកម្មនានា ដើម្បីចូលរួមចំណែកក្នុងកាត់បន្ថយថ្លៃដើមផលិតកម្ម ការពារបរិស្ថាន និងឆ្លើយតបទៅនឹងគោលនយោ បាយអភិវឌ្ឍន៍បៃតង។

ទោះជាយ៉ាងណាក៏ដោយ កន្លងមកនេះភាគីផ្នែកឯកជននៅតែបន្តមានចម្ងល់ និងជួបប្រទះនូវបញ្ហាប្រឈមមួយចំនួន ពាក់ព័ន្ធនឹងគោលការណ៍ណែនាំ បទដ្ឋានបច្ចេកទេស និងនីតិវិធីនៃការស្នើសុំដំឡើងនិងប្រើប្រាស់ប្រព័ន្ធថាមពលពន្លឺ ព្រះអាទិត្យលើដំបូល (សូឡា) នេះ។

បន្ថែមលើកនេះ ឧកញ៉ា ក៏បានអំពាវនាវ និងសម្តែងការស្វាគមន៍ចំពោះការចូលរួម និងសហការគ្នាចំពោះគ្រប់ភាគីពាក់ព័ន្ធ ផ្នែកឯកជនទាំងអស់ ក្នុងការពង្រឹងយន្តការក្រុមការងារ នៃវេទិការាជរដ្ឋាភិបាល-ផ្នែកឯកជន (G-PSF)ដោយប្រើយន្តការនេះ តាមរយៈសភាពាណិជ្ជកម្មកម្ពុជា ជាច្រករួមតែមួយគត់ក្នុងការទទួលយក និងប្រមូលធាតុចូល និងបញ្ហាប្រឈមនានារបស់វិស័យឯកជន ដើម្បីស្វែងរកដំណោះស្រាយជូនប្រកបដោយប្រសិទ្ធិភាព៕

ដោយៈ ចំណាន

   ភ្នំពេញៈ ថ្លែងចេញពីលើវេទិកាក្នុងខេត្តភាគឦសាន នៃប្រទេសកម្ពុជា នាព្រឹកថ្ងៃទី១២ ខែសីហា ឆ្នាំ២០២៦នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានអះអាងថា ការសាងសង់ផ្លូវក្រវាត់ព្រំដែន ឆ្ពោះទៅកាន់តំបន់កន្ទុយនាគ ដែលជាចំណុចប្រសព្វរវាងប្រទេសកម្ពុជា វៀតណាម ឡាវ គឺជាមហិច្ឆតារបស់រាជរដ្ឋាភិបាល ទោះត្រូវឆ្លងកាត់ការលំបាកបែបណាក៏ដោយ ត្រូវតែពុះពារឲ្យបាន។

ក្នុងឱកាសអញ្ជើញសម្ពោធដាក់ឲ្យប្រើប្រាស់ សមិទ្ធ​ផល​​នានានៅក្នុងខេត្តស្ទឹងត្រែង​ សម្ដេចមហាបវរធិបតី ហ៊ុន ម៉ាណែត បានសង្កត់ធ្ងន់ថា ការខិតខំពុះពាររបស់រាជរដ្ឋាភិបាលកម្ពុជា គឺដើម្បីឲ្យប្រជាពលរដ្ឋ អាចធ្វើដំណើរទៅកាន់តំបន់កន្ទុយនាគ ដោយមិនចាំបាច់ឆ្លងកាត់ប្រទេសជិតខាងឡើយ។

សម្តេចបញ្ជាក់ថា នាពេលកន្លងទៅ ដើម្បីធ្វើដំណើរទៅតំបន់កន្ទុយនាគនេះបាន គឺត្រូវឆ្លងកាត់ប្រទេសវៀតណាមសិន ទើបត្រឡប់មកវិញ ដោយសារស្ថានភាពផ្លូវឡើងពីប្រទេសកម្ពុជា គឺលំបាកខ្លាំង។

សម្ដេចមហាបវរធិបតី ហ៊ុន ម៉ាណែត បានបញ្ជាក់ថា “ឥលូវយើងកំពុងដាក់ ក្នុងគម្រោងរៀបចំសាងសងផ្លូវ៧៨កន្លះ ពីបានលុង ទៅតំបន់កន្ទុយនាគ”។ សម្តេចបន្ថែមថា “តំបន់កន្ទុយនាគ មិនដែលមានអ្នកណាបានទៅទេនៅខាងដីយើង (កម្ពុជា) បើចូលពីឥលូវគឺចោទពេក អ៊ីចឹងទាល់តែសុំចូលខាងវៀតណាមមកវិញ ខ្ញុំបានឲ្យបានគោលការណ៍ឯកឧត្តម ខ្វាន់ ស៊ាម ត្រូវពុះពារធ្វើឲ្យបានមិនថាវាត់ចម្ងាយណាទេ ត្រូវតែធ្វើឲ្យបានចូលពីដីខ្មែរដល់កន្ទុយនាគ ដើម្បីឲ្យកូនខ្មែរបាន ទៅមើលកន្លែងចុងមុំបីរវាងកម្ពុជា វៀតណាម ឡាវ ដើម្បីទៅដល់កន្លែងនោះ ដោយមិនឆ្លងកាត់ប្រទេសជិតខាង”។

សម្ដេចមហាបវរធិប​តី ប្រមុខនៃរាជរដ្ឋាភិបាលកម្ពុជា បានបន្ថែមទៀតថា ផ្លូវប្រៀបដូចជាសរសៃឈាមយ៉ាងដូច្នេះដែរ ពោលសរសៃឈាមទៅដល់កន្លែងណា ចិញ្ចឹមសរីរាង្គរបស់មនុស្ស នៅកន្លែងនោះ ហើយនៅពេលមានផ្លូវ គឺមានក្ដីសង្ឃឹម ខណៈប្រជាពលរដ្ឋក៏ចាប់ផ្ដើមទៅរស់នៅបង្កើតជាភូមិ បង្កបង្កើនផលចិញ្ចឹម និងក៏ជាចំណែកការពារបូរណភាពទឹកដី តាមរយៈការរស់នៅប្រចាំថ្ងៃ របស់ប្រជាពលរដ្ឋផងដែរ។

ជាមួយនឹងហេដ្ឋារចនាសម្ព័ន្ធ តភ្ជាប់ប្រៀបដូចជាសរសៃឈាមហើយនោះ សម្ដេចមហាបវរធិបតី ហ៊ុន ម៉ាណែត បានគូសបញ្ជាក់ថា រាជរដ្ឋាភិបាលកម្ពុជា ក៏បានចរចាជាមួយប្រទេសជិតខាង ដើម្បីបើកច្រកទៅជាតំបន់សេដ្ឋកិច្ចពិសេស សំដៅសម្រួលដល់ការធ្វើពាណិជ្ជកម្មបានកាន់តែល្អប្រសើរ ទំនិញឆ្លងកាត់ទៅវិញទៅមក និងបង្កើនភាពទាក់ទាញ៕