ដោយៈ សុខុម

អាមេរិកៈ កាលពីថ្ងៃអង្គារ ទី១៦ ខែសីហា លោក Elon Musk ដែលជាមហាសេដ្ឋីមានទ្រព្បសម្បត្តិច្រើនបំផុត ក្នុងពិភពលោកបានបង្ហោះសារលើបណ្ដាញទំនាក់ទំនងសង្គម Twitter ថា លោកនឹងទិញយកក្លឹបបាល់ទាត់ Manchester United ដោយមិនផ្តល់ព័ត៌មានលម្អិត។

លោក Elon Musk បានសរសេរបង្ហោះថា “ខ្ញុំនឹងទិញយកក្លឹបបាល់ទាត់ Manchester United មិនអីទេ”។ នេះបើយោងតាមទីភ្នាក់ងារព័ត៌មាន Reuters ចុះផ្សាយនៅថ្ងៃពុធ ទី១៧ ខែសីហា នេះ។

ក្លឹបបាល់ទាត់នេះ ត្រូវបានគ្រប់គ្រងដោយគ្រួសារលោក Glazer ដែលជាមហាសេដ្ឋីជនជាតិអាមេរិក។

ទោះជាយ៉ាងណា ទាំងគ្រួសារលោកGlazer និងលោក Elon Musk មិនអាចទាក់ទងសុំការឆ្លើយបំភ្លឺបានទេជុំវិញបញ្ហានេះ។

កាសែតអង់គ្លេស The Daily Mirror បានចុះផ្សាយកាលពីឆ្នាំមុនថា គ្រួសារលោក Glazer ត្រៀមលក់ក្លឹបបាល់ទាត់នេះ ប៉ុន្តែទាល់តែបានតម្លៃលើសពី៤,៨៤ពាន់លានដុល្លារអាមេរិក ទើបពួកគេព្រមលក់។

បច្ចុប្បន្នលោក Elon Musk កំពុងព្យាយាមដកខ្លួនចេញពីកិច្ចព្រមព្រៀងទិញក្រុមហ៊ុន បណ្ដាញទំនាក់ទំនងសង្គម Twitter ក្នុងតម្លៃ៤៤ពាន់លានដុល្លារ ដែលធ្វើឱ្យក្រុមហ៊ុននេះកើតទុក្ខមិនសុខចិត្ត និងប្ដឹងលោកឡើងតុលាការ។

ក្លឹប Manchester United ស្ថិតក្នុងចំណោមក្លឹបបាល់ទាត់ ដែលទទួលបានការគាំទ្រច្រើនបំផុតរបស់ពិភពលោក។ ក្លឹបនេះបានក្លាយជាម្ចាស់ជើងឯករបស់ប្រទេសអង់គ្លេស ដល់ទៅ២០ដង និងបានឈ្នះពានរង្វាន់ European Cup ដែលជាការប្រកួតប្រជែង ដ៏មានកិត្យានុភាពបំផុតក្នុងពិភពលោកចំនួន៣ដង៕ Reuters៕

ដោយ: លាងហួរ

ប្រទេសចិន: ក្រុមមន្រ្តីជាន់ខ្ពស់នៃនិយតករសេដ្ឋកិច្ចកំពូលរបស់ប្រទេសចិន បាននិយាយកាលពីថ្ងៃអង្គារម្សិលមិញនេះថា ប្រទេសចិនកំពុងរៀបចំផែនការជាក្រុមទីបី លើគម្រោងហេដ្ឋារចនាសម្ព័ន្ធ ដែលគាំទ្រដោយប័ណ្ណបំណុលរដ្ឋាភិបាល។

ប្រទេសចិនក៏គ្រោងនឹងពន្លឿន ការសាងសង់គម្រោងសំខាន់ៗផ្សេង​ៗនៅក្នុងឆមាសទីពីរនៃឆ្នាំ២០២២នេះផងដែរ។

លោក Luo Guosan ប្រធាននាយកដ្ឋានវិនិយោគទ្រព្យសកម្មថេរនៃគណៈកម្មាធិការកំណែទម្រង់ និងអភិវឌ្ឍន៍ជាតិបានថ្លែងនៅក្នុងសន្និសីទសារព័ត៌មាន នៅទីក្រុងប៉េកាំងកាលពីថ្ងៃអង្គារថា ការវិនិយោគនេះដើរតួយ៉ាងសំខាន់ ក្នុងការគាំទ្រដល់ការអភិវឌ្ឍន៍សេដ្ឋកិច្ច របស់ប្រទេសចិនដែលកំពុងធ្លាក់ចុះ។

ការពន្លឿន និងការជំរុញលើកកម្ពស់ការសាងសង់ គម្រោងសំខាន់ៗផ្តល់នូវការបម្រុងទុកដ៏សំខាន់ សម្រាប់ការពង្រីកតម្រូវការក្នុងស្រុក និងស្ថិរភាពសេដ្ឋកិច្ចទាំងមូល។

លោកបានបន្តថា “ប្រទេសចិន បានបញ្ចប់ការចេញមូលបត្របំណុលពិសេសចំនួន៣,៤៥ពាន់ពាន់លានយ័ន(៥០៨ពាន់លានដុល្លារ) សម្រាប់គម្រោងហេដ្ឋារចនាសម្ព័ន្ធ”។

ក្នុងអំឡុងពេលប្រាំពីរខែដំបូង  គណៈកម្មការកំណែទម្រង់ និងអភិវឌ្ឍន៍ជាតិ(NDRC) បានអនុម័តគម្រោងវិនិយោគទ្រព្យសកម្ម ថេរចំនួន៦៥ដែលមានតម្លៃជាង១ពាន់ពាន់លានយ័ន។

កាលពីខែកក្កដា គណៈកម្មការនេះក៏បានអនុម័ត គម្រោងចំនួនប្រាំបីដែលមានតម្លៃ២៣៦,៨ពាន់លានយ័ន ដែលភាគច្រើននៅក្នុងវិស័យដូចជាការអភិរក្សទឹក និងថាមពល៕

ដោយ៖ សុផារី

ភ្នំពេញ៖ សម្តេចតេជោ ហ៊ុន សែន បានសម្តែងកង្វល់រឿងថ្លៃប្រេងឥន្ធនៈឡើងខ្ពស់ ច្រើនជាងកង្វល់តម្លៃទំនិញឡើងខ្ពស់ ដោយប្រាប់ឱ្យក្រុមហ៊ុនរកស៊ីប្រេងឥន្ធនៈនៅក្នុងប្រទេសកម្ពុជា កុំដំឡើងតម្លៃប្រេងលឿនជាងទីផ្សារអន្តរជាតិ។

សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា មានប្រសាសន៍យ៉ាងដូច្នេះ នៅក្នុងពិធីប្រគល់សញ្ញាបត្រជូននិស្សិតសាកលវិទ្យាល័យពុទ្ធិសាស្ត្រ នាព្រឹកថ្ងៃទី១៧ ខែសីហានេះ។

សម្តេចមានប្រសាសន៍ថា ប្រសិនបើតម្លៃប្រេងនៅទីផ្សារអន្តរជាតិចុះថ្លៃហើយ តម្លៃប្រេងនៅកម្ពុជាមិនអាចនៅតែឡើងថ្លៃនោះទេ។ ការរកស៊ីតែងមានការចំណេញ ប៉ុន្តែកុំឆ្លៀតឱកាសកេងចំណេញ នៅចំពេលដែលពិភពលោកកំពុងមានបញ្ហារឿងតម្លៃប្រេងឥន្ធនៈនេះ។

សម្តេចតេជោ បន្តថា “ព្រឹកមិញ ខ្ញុំតាមដានបញ្ហាប្រេង តម្លៃប្រេង៩២,០៦ តែឥឡូវនេះ ចុះដល់៩១,៩០ទេ។ ខ្ញុំចេះតែតាមដានទៅ ដើម្បីដឹងការកំណត់ថ្លៃក្នុងប្រទេស។ បើចុះ វាល្អសម្រាប់យើង ថ្ងៃនេះ ឬស្អែក ត្រូវប្រកាសតម្លៃជាថ្មីហើយ ឥលូវតើចុះ ឬមិនចុះ?”។

សម្តេចតេជោ បានមានថ្លែងបន្ថែមថា “រដ្ឋមន្រ្តីក្រសួងពាណិជ្ជកម្ម ជាការសម្របសម្រួល ខ្ញុំសូមកោតសរសើរ រដ្ឋមន្រ្តីក្រសួងពាណិជ្ជកម្ម និងក្រុមហ៊ុនប្រេងទាំងឡាយនៅកម្ពុជា។ តែខ្ញុំសុំថាអញ្ចេះ ​កុំថា គេប្រកាសឡើងថ្លៃភ្លាមពីក្រៅប្រទេស តែយើងនៅក្នុងនេះ ប្រកាសឡើងភ្លាមដែរ ដែលអាចធ្វើឱ្យវាជ្រួលច្របល់”៕

ដោយ៖ សុផារី

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាឱ្យបញ្ឍប់ការចុះកុងត្រាផ្ដាច់មុខរវាងក្រុមហ៊ុនសេវាទូរស័ព្ទ និងសេវាអ៊ិនធើណែត ជាមួយក្រុមហ៊ុនបុរី ដែលបានបង្កផលលំបាកយ៉ាងខ្លាំងក្នុងការរស់នៅប្រចាំថ្ងៃរបស់ប្រជាពលរដ្ឋរស់នៅក្នុងបុរី ដោយសារបញ្ហា មិនមានសេវាទូរស័ព្ទ និងអ៊ិនធើណែតក្នុងបុរី។

សម្ដេចតេជោថ្លែងបែបនេះ ក្នុងពេលអញ្ជើញជាអធិបតី ប្រគល់សញ្ញាបត្រដល់និស្សិត សាកលវិទ្យាល័យពុទ្ធិសាស្រ្ត នៅរាជធានីភ្នំពេញ ព្រឹកថ្ងៃទី១៧ ខែសីហា ឆ្នាំ២០២២នេះ។

សម្ដេចតេជោ បញ្ជាក់ថារាជរដ្ឋាភិបាលលើកទឹកចិត្តឱ្យមានការប្រកួតប្រជែងមិនមែនដើម្បីជំរុញឱ្យផ្ដាច់មុខទេ ដោយការងារនេះ ត្រូវធ្វើតាមរយៈការប្រកួតប្រជែងរវាងក្រុមហ៊ុនផ្ដល់សេវាទូរស័ព្ទ និងអ៊ិនធើណែត ដើម្បីសម្រួលដល់ការប្រើប្រាស់ របស់ប្រជាពលរដ្ឋរស់នៅក្នុងបុរី។

សម្ដេចតេជោ ហ៊ុន សែន បានថ្លែងបែបនេះ បន្ទាប់ពីសម្ដេចបានបញ្ជាឱ្យរដ្ឋមន្ត្រីប្រៃសនីយ៍ និងទូរគមនាគមន៍លុបកុងត្រាសិទ្ធផ្ដាច់មុខរបស់ក្រុមហ៊ុនទូរគមនាគមន៍ ក្នុងគម្រោងបុរីនីមួយៗឱ្យអស់ និងអនុញ្ញាតដល់ក្រុមហ៊ុនផ្សេងរៀបចំបង្កើនគុណភាពសេវា ក្នុងតំបន់ទាំងនោះ។

សម្ដេចតេជោថា “ត្រូវជំរុញល្បឿនឱ្យសេវានានាទៅតម្លើងឡើងវិញ”៕

ដោយសុខុម

ហាណូយ: ក្រុមហ៊ុនវៀតណាម TTC Group មានបំណងបង្កើនសមត្ថភាពផលិតថាមពលអគ្គិសនីកកើតឡើងវិញរបស់ខ្លួនទ្វេដងរហូតដល់ឆ្នាំ២០២៥ ខណៈប្រទេសវៀតណាម កំពុងព្យាយាមកាត់បន្ថយការប្រើប្រាស់ធ្យូងថ្ម។

យោងតាមសារព័ត៌មាន The Edge Markets ចុះផ្សាយកាលពីថ្ងៃអង្គារ ទី១៦ ខែសីហា ឱ្យដឹងថា ការបង្កើនសមត្ថភាពផលិតថាមពលកកើតឡើងវិញនេះ នឹងធ្វើឡើងតាមរយៈការបោះទុនវិនិយោគយ៉ាងច្រើនសម្បើមលើថាមពលខ្យល់ និងការចាប់ដៃគូសហការជាមួយក្រុមហ៊ុនផលិតថាមពលដ៏ធំបំផុតរបស់ប្រទេសជប៉ុន Jera Co។

ក្រុមហ៊ុន Jera Co បានទិញយកភាគហ៊ុន៣៥,០៩%នៅក្នុងក្រុមហ៊ុនបុត្រសម្ព័ន្ធ Gia Lai Electricity JSC របស់ TTC Group។ នេះបើយោងតាមការទម្លាយឱ្យដឹងពីលោក Dang Van Thanh ប្រធានក្រុមហ៊ុន TTC Group ដែលមានអាជីវកម្មចម្រុះរាប់ចាប់ពីថាមពលរហូតដល់ទេសចរណ៍។

លោក Dang Van Thanh បានលើកឡើងថា ក្រុមហ៊ុន Jera Co ដែលក្លាយជាភាគហ៊ុនិកបរទេសធំបំផុតនៅក្នុងក្រុមបុត្រសម្ព័ន្ធ Gia Lai Electricity JSC បានទិញយកភាគហ៊ុនពីក្រុមហ៊ុន International Finance Corp និងក្រុមហ៊ុន Armstrong Asset Management ដែលមានមូលដ្ឋាននៅប្រទេសសិង្ហបុរី ក្នុងចំនួនទឹកប្រាក់ដែលមិនបង្ហាញ។

ក្រុមហ៊ុនជប៉ុន មួយនេះនឹងជួយផ្តល់បច្ចេកវិទ្យា និងជំនាញ ខណៈក្រុមហ៊ុនមេ TTC Group ដែលមានមូលដ្ឋាននៅទីក្រុងហូជីមិញ និងក្រុមហ៊ុនបុត្រសម្ព័ន្ធ Gia Lai Electricity គ្រោងបោះទុនវិនិយោគ១ពាន់លានដុល្លារអាមេរិក ដើម្បីបង្កើនសមត្ថភាពផលិតថាមពលកកើតឡើងវិញឱ្យឈានដល់ជាង២.០០០មេហ្គាវ៉ាត់ (MW)។

តាមការរំពឹងទុក ថាមពលខ្យល់នឹងគ្របដណ្ដប់ប្រមាណ២ភាគ៣នៃថាមពលស្អាតរបស់វៀតណាម នៅត្រឹមឆ្នាំ២០២៥ ដោយកើនឡើងពី២៥%នាពេលបច្ចុប្បន្ន។

ក្រុមហ៊ុន Jera Co បានលើកឡើងតាមរយៈសេចក្តីថ្លែងការណ៍ថា ប្រទេសវៀតណាម កំពុងកំណត់គោលដៅប្រកបដោយមហិច្ឆតាក្នុងការបន្ថែមការផលិតថាមពលស្អាត និងមានតម្រូវការអគ្គិសនីកើនឡើងដែលធ្វើឱ្យប្រទេសនេះក្លាយជា “ប្រទេសអាទិភាព” សម្រាប់ការវិនិយោគរបស់ខ្លួន៕ The Edge Markets៕

ដោយ៖ សុខុម

មូស្គូ: ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចោទប្រកាន់សហរដ្ឋអាមេរិក ថាព្យាយាមធ្វើឱ្យសង្រ្គាមនៅអ៊ុយក្រែន អូសបន្លាយពេលកាន់តែវែង ហើយថា វាជាចេតនារបស់រដ្ឋាភិបាលក្រុងវ៉ាស៊ីនតោន ដើម្បីរក្សាអនុត្តរភាព (ភាពលប់លើសគេគ្មានគូប្រៀប) របស់ខ្លួនក្នុងពិភពលោក។

ថ្លែងបើកសន្និសីទស្ដីពីបញ្ហាសន្តិសុខក្នុងក្រុងមូស្គូ ប្រទេសរុស្ស៊ី កាលពីថ្ងៃអង្គារ ទី១៦ ខែសីហា ប្រធានាធិបតីដែលមានងារជាបុរសខ្លាំងរូបនេះបានលើកឡើងចំៗថា “ស្ថានការណ៍នៅអ៊ុយក្រែន បង្ហាញថា សហរដ្ឋអាមេរិក កំពុងព្យាយាមធ្វើឱ្យជម្លោះនេះអូសបន្លាយ…”។

លោកលើកឡើងថា រដ្ឋាភិបាលក្រុងវ៉ាស៊ីនតោន កំពុង “ប្រើប្រាស់ប្រជាជនអ៊ុយក្រែន ធ្វើជាអ្នកពាំងកាណុងកាំភ្លើង” ហើយបានថ្កោលទោសសហរដ្ឋអាមេរិក ធ្ងន់ៗចំពោះការផ្គត់ផ្គង់សព្វាអាវុធដល់រដ្ឋាភិបាលក្រុងគៀវ (អ៊ុយក្រែន)។ លោកបានសង្កត់ធ្ងន់ថា “ពួកគេត្រូវការជម្លោះដើម្បីរក្សាអនុត្តរភាពរបស់ខ្លួន”។

រុស្ស៊ី បានបញ្ឆេះសង្គ្រាមចូលឈ្លានពានអ៊ុយក្រែន នៅថ្ងៃទី២៥ ខែកុម្ភៈ ដើមឆ្នាំនេះ ដោយមើលស្រាលថា ខ្លួននឹងអាចផ្តួលរំលំរដ្ឋាភិបាលក្នុងទីក្រុងគៀវ បានក្នុងពេលដ៏ខ្លី។

ប៉ុន្តែបន្ទាប់ពីបរាជ័យក្នុងការវាយដណ្តើមគ្រប់គ្រងរដ្ឋធានីគៀវ យោធារុស្ស៊ី បានងាកទៅផ្តោតលើការវាយដណ្ដើមកាន់កាប់តំបន់ដុនបាស (Donbas) ភាគខាងកើតជំនួសវិញ។ អ្វីដែលរុស្ស៊ី គិតថាខ្លួននឹងអាចដណ្ដើមជ័យជម្នះបានក្នុងពេលដ៏ខ្លី បានក្លាយជាសង្គ្រាមអូសបន្លាយរហូតមកទល់ពេលនេះដោយសារអ៊ុយក្រែន ទទួលបានការផ្គត់ផ្គង់សព្វាវុធពីបណ្ដាប្រទេសលោកខាងលិច។

សហរដ្ឋអាមេរិក បានផ្តល់ជំនួយយ៉ាងច្រើនសម្បើមគួរឱ្យភ្ញាក់ផ្អើលរហូតដល់ទៅ៥០ពាន់លានដុល្លារ ដល់អ៊ុយក្រែន ចាប់តាំងពីខែកុម្ភៈ ដើមឆ្នាំនេះ ក្រោយពីរុស្ស៊ី បញ្ឆេះសង្គ្រាមចូលឈ្លានពានអ៊ុយក្រែន។

កាំភ្លើងធំរយៈចម្ងាយឆ្ងាយដែលជាផ្នែកមួយនៃជំនួយយោធាចំនួន៩ពាន់លានដុល្លារ របស់សហរដ្ឋអាមេរិក បានធ្វើឱ្យអ៊ុយក្រែន មានលទ្ធភាពវាយលុកទីតាំងផ្គត់ផ្គង់របស់រុស្ស៊ី ចូលជ្រៅទៅក្នុងទឹកដីដែលគ្រប់គ្រងដោយទីក្រុងមូស្គូ៕

ដោយ សុខុម

ហ្សាការតា: ប្រធានាធិបតីឥណ្ឌូនេស៊ី លោក Joko Widodo នៅថ្ងៃអង្គារ ទី១៦ ខែសីហា នេះបានស្នើកញ្ចប់ថវិកាជាតិចំនួន២០៦ពានលានដុល្លារអាមេរិក សម្រាប់ឆ្នាំ២០២៣។

ប្រធានាធិបតីដ៏មានប្រជាប្រិយរូបនេះបានស្នើកញ្ចប់ថវិកានេះជាមួយនឹងឱនភាព២,៨៥% នៃផលទុនជាតិសរុប (GDP) ដែលជាគម្លាតថវិកាតិចបំផុតចាប់តាំងពីឆ្នាំ២០១៩។ ទោះជាយ៉ាងណា កញ្ចប់ថវិកានេះមានទំហំតូចជាងកញ្ចប់ថវិកាឆ្នាំ២០២២។

ឆ្នាំ២០២៣ នឹងក្លាយជាឆ្នាំដំបូង ដែលឥណ្ឌូនេស៊ី ក្នុងនាមជាសេដ្ឋកិច្ចធំបំផុតនៅអាស៊ីអាគ្នេយ៍ស្តារឡើងវិញនូវពិដានឱនភាពសារពើពន្ធ៣%នៃ GDP បន្ទាប់វាត្រូវបានលើកលែងរយៈពេល៣ឆ្នាំដើម្បីអនុញ្ញាតឱ្យរដ្ឋាភិបាលមានលទ្ធភាពឆ្លើយតបទៅនឹងវិបត្តិកូវីដ-១៩។

ទំហំនៃថវិកាដែលបានស្នើឡើងនេះគឺតិចជាងកញ្ចប់ថវិកាសម្រាប់ឆ្នាំ២០២២ ប្រមាណ២%។ លោក Joko Widodo បានព្យាករថា ប្រាក់ចំណូលសរុបនៅឆ្នាំក្រោយនឹងសម្រេចបានកំណើនជិត៨%ឈានដល់ជិត២០០ពាន់លានដុល្លារអាមេរិក។

ប្រធានាធិបតីរូបនេះគូសបញ្ជាក់ថា ថវិកានឹងក្លាយជាក្បាលម៉ាស៊ីនជំរុញកំណើន ដោយកំណត់គោលដៅកំណើនសេដ្ឋកិច្ច៥,៣%នៅឆ្នាំក្រោយ ហើយប្តេជ្ញាគ្រប់គ្រងអតិផរណាឱ្យនៅរង្វង់៣,៣%៕