ដោយៈជេស៊ីកា

ភ្នំពេញៈ ទីក្រុងរណបធំមួយ ដែលមានផ្ទៃដីទំហំរហូតដល់ជាង៩០០​ហិកា កំពុងត្រៀមបង្ហាញរូបរាងនៅពេលឆាប់ៗខាងមុខនេះ ដែលគំរោងនេះនឹងវិនិយោគដោយសេដ្ឋីក្នុងស្រុក។

យោងតាមប្រភពព៌តមាន ដែលគួរឲ្យទុកចិត្តបានៗឲ្យដឹងកាលពីព្រឹក​ថ្ងៃទី៩ ៨ មិថុនាកន្លងមកថា ទីក្រុងរណបនេះបាន និងកំពុងបញ្ចប់ការរៀប​ចំផែនការមេរួចហើយ និងត្រៀមប្រកាសបើកដំណើរការ នាពេលខាងមុខនេះ ប៉ុន្តែយ៉ាងណាក៏ដោយអ្វីៗ ស្ថិតក្នុងការសំងាត់ ដែលមិនអាចបញ្ចេញឈ្មោះអ្នកវិនិយោគ និងឈ្មោះទីក្រុងរណបនេះនៅឡើយទេ។

ប្រភពព៌តមានដដែលបានឲ្យដឹងថា ម្ចាស់គម្រោងដ៏ធំនេះ កំពុងស្វែងរកកិច្ចសហការជាមួយក្រុមហ៊ុនចិនធំមួយ ដែលទើបបានបើកការិយាល័យ បន្ទាប់ពីឈានជើងចូលមកកាន់កម្ពុជា។

តំបន់ផ្លូវជាតិលេខ៦អា បាននិងកំពុងលេចចេញនូវវត្តមានបុរី ដែលភាគច្រើន ជាគម្រោងរបស់អ្នកវិនិយោគក្នុងស្រុក ដែលផ្តោតលើការសាងសង់លំនៅដ្ឋានលំដាប់ប្រណីត សម្រាប់អ្នកមានជីវភាពកម្រិតមធ្យមជាន់ខ្ពស់ឡើង។

បច្ចុប្បន្នទីក្រុងរណបនៅតំបន់នេះ កំពុងមានសកម្មភាពច្រើនជាងគេ គឺគំរោងទីក្រុងរណបជ្រោយចង្វារ ទីក្រុងនៃអនាគត គំរោងទីក្រុងរណបតេជោមរកត គំរោងទីក្រុងរណបអ័រគីដេដឺបូតានិក និងគំរោងមួយចំនួនទៀតផងដែរ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ឲ្យដឹងថា តំបន់ជ្រោយចង្វារ និងតំបន់ស្ថិតនៅស្របតាមផ្លូវជាតិលេខ៦អា បាននិងកំពុងបង្ហាញសក្តានុពល ដោ​យសារតំបន់នេះ មានហេដ្ឋារចនាសម្ព័ន្ឋតភ្ជាប់យ៉ាងល្អប្រសើរ ជាតំបន់ដែលផ្តល់នូវផាសុខភាពសម្រាប់ការរស់នៅ ព្រោះតំបន់នេះមានទន្លេព័ទ្ឋជុំវិញ៕

ដោយៈ ជេស៊ីកា

ភ្នំពេញៈ ការវាយតម្លៃអចលនទ្រព្យជាផ្នែកមួយដ៏សំខាន់ ដើម្បីដឹងពីតម្លៃអចលនទ្រព្យរបស់អ្នក ដើម្បីអាចលក់ ជួល ឬយកអចលនទ្រព្យនោះដាក់បញ្ចាំនៅធនាគារជាដើម។

តើការវាយតម្លៃអចលនទ្រព្យ ត្រូវមានមូលដ្ឋានគ្រឹះឬឈរលើគោលការណ៍អ្វីខ្លះ?។

យោងតាមឯកសារបទបញ្ញត្តិអន្តរជាតិ បានលើកឡើងនូវចំណុចមួយចំនួន ដែលគេនិយមយកមកប្រើប្រាស់ធ្វើជាមូលដ្ឋានរបស់ពួកគេដូចជា

តម្រូវការសម្រាប់អចលនទ្រព្យ ភាពរីករាយ ឫតម្រូវការសម្រាប់កម្មសិទ្ធិគាំទ្រដោយ មធ្យោបាយហិរញ្ញវត្ថុ នៅក្នុងទីផ្សារដើម្បីបំពេញទៅតាមការចង់បាន។

ការប្រើប្រាស់អចលនទ្រព្យ ៖ សមត្ថភាពនៃអចលនទ្រព្យរបស់អ្នក ដើម្បីបំពេញទៅតាម ការពេញចិត្ត និងតម្រូវការរបស់ម្ចាស់កម្មសិទ្ធិនៅពេលអនាគត។

ការខ្វះខាត៖ ការផ្គត់ផ្គង់ដែលមានដែនកំណត់នៃការប្រកួតប្រជែងអចលនទ្រព្យនៃប្រភេទអចលនទ្រព្យ និងការពិពណ៌នាស្រដៀងគ្នា។

ការផ្ទេរ៖ ងាយស្រួលក្នុងការផ្ទេរកម្មសិទ្ធិកាន់កាប់លើអចលនទ្រព្យរបស់អ្នក៕

ដោយ៖ សុខុម

ប៉េកាំង: ក្រុមហ៊ុនអភិវឌ្ឍន៍អចលនទ្រព្យចិន ធំបំផុតទី៣ Sunac China ដែលមានបញ្ហាសាច់ប្រាក់កំពុងស្វះស្វែងសុំពន្យារពេល២ឆ្នាំ សម្រាប់ការទូទាត់ថ្លៃមូលបត្របំណុលក្នុងស្រុកជាច្រើនរយលានដុល្លារ ដែលដល់ពេលកំណត់នៅថ្ងៃទី១៣ ខែមិថុនា ដ៏ខ្លីខាងមុខនេះ។

ប្រភពបានទម្លាយឱ្យដឹងនៅថ្ងៃពុធ ទី៨ ខែមិថុនានេះថា ក្រុមហ៊ុន Sunac China មានគម្រោងទូទាត់តែការប្រាក់ប៉ុណ្ណោះ ដែលដល់ពេលកំណត់នៅថ្ងៃច័ន្ទ ដើមសប្ដាហ៍ក្រោយប៉ុណ្ណោះ ហើយការទូទាត់ប្រាក់ដើមចំនួន៣៤៥លានដុល្លារ ដែលត្រូវរំលស់ជា៤ដំណាក់កាល រួមមាន ១០% ១៥% ២០% និង៥៥%នឹងត្រូវពន្យារ រហូតដល់ថ្ងៃទី១៣ ខែមិថុនា ឆ្នាំ២០២៤។

ក្រុមហ៊ុនអភិវឌ្ឍន៍អចលនទ្រព្យចិន ធំបំផុតទី៣ បើគិតពីទំហំនៃការលក់នេះកំពុងជួបវិបត្តិសាច់ប្រាក់យ៉ាងខ្លាំងដល់ថ្នាក់ស្វះស្វែងសុំពន្យារពេលទូទាត់បំណុល និងសម្រុកលក់ចេញទ្រព្យសកម្ម ដើម្បីដោះទាល់ បន្ទាប់ពីការលក់របស់ខ្លួនដាំក្បាលចុះខ្លាំងដោយសារវិបត្តិកូវីដ-១៩ និងដោយសារមិនអាចខ្ចីធនាគារបន្ថែមទៀតបាន។

កាលពីខែមុន ក្រុមហ៊ុន Sunac China បានខកខានការទូទាត់មូលបត្របំណុលនៅបរទេស ចំនួន៧៤២លានដុល្លារ។ ការខកខានទូទាត់របស់ក្រុមហ៊ុននេះកើតមានឡើង ក្រោយពីក្រុមហ៊ុនអភិវឌ្ឍន៍ចិនជាច្រើនផ្សេងទៀត បានខកខានទូទាត់បំណុលជាបន្តបន្ទាប់ ដែលឆ្លុះបញ្ចាំងពីការដាំក្បាលចុះយ៉ាងខ្លាំងនៃវិស័យអចលនទ្រព្យ ដែលហ៊ុមព័ទ្ធដោយបំណុលជុំទិស នៅក្នុងប្រទេសចិន ដែលជាសេដ្ឋកិច្ចធំបំផុតទី២ របស់ពិភពលោក។

ជាមួយនឹងមូលបត្របំណុលចំនួន៧,៧ពាន់លានដុល្លារ ដែលខ្លួនបានបោះផ្សាយ ក្រុមហ៊ុន Sunac China បានក្លាយជាអ្នកបោះផ្សាយមូលបត្របំណុលធំបំផុតទី៤ ក្នុងចំណោមក្រុមហ៊ុនអភិវឌ្ឍន៍អចលនទ្រព្យចិនផ្សេងៗទៀត។

ប្រភពមួយបានទម្លាយប្រាប់ទីភ្នាក់ងារព័ត៌មាន Reuters ថា ក្រុមហ៊ុន Sunac China កំពុងពិចារណារៀបចំឡើងវិញនូវបំណុលរបស់ខ្លួននៅបរទេស ដើម្បីពន្យារពេលទូទាត់។ ក្រុមហ៊ុននេះក៏កំពុងពិភាក្សា ជាមួយបណ្ដាអង្គភាពគ្រប់គ្រង ដោយរដ្ឋអំពីការវិនិយោគជាយុទ្ធសាស្រ្ត នៅក្នុងក្រុមហ៊ុននេះផងដែរ៕

ដោយៈ ជេស៊ីកា

ភ្នំពេញៈ ស្របពេលការសិក្សាពីគំរោង សាងសង់ផ្លូវជាតិប្រវែងប្រមា​ណ៧០គីឡូម៉ែត្រ តភ្ជាប់ពីក្រុងសៀមរាប ទៅកាន់ក្រុងបាត់ដំបង បាននិងកំពុងបញ្ចប់ រដ្ឋាភិបាលបាននិងកំពូងរៀបចំកញ្ចប់សំណើរ សុំជំនួយទៅកាន់ភាគីចិនជាមិត្ត។

ទេសរដ្ឋមន្រ្តីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ក្នុងកិច្ចសម្ភាសពិសេសនៅថ្ងៃទី៧ ខែមិថុនាកន្លងមកថា ផែនការប្រាំឆ្នាំរំកិល ដែលបានដាក់ស្នើទៅកាន់ប្រទេសចិន រួមមាន គម្រោងសាងសង់ផ្លូវបាត់ដំបង- សៀមរាប គម្រោងសាងសង់ផ្លូវកំពង់ធំ-កំពង់ឆ្នាំង គម្រោងសាងសង់ផ្លូវល្បឿនលឿនពីភ្នំពេញ-បាវិត ម៉ុកបៃ (ព្រំដែនវៀតណាម) គម្រោងសិក្សាធ្វើទំនើបកម្មផ្លូវដែកកម្ពុជាជាដើម។

គំរោងសាងសង់ផ្លូវជាតិដ៏សំខាន់នេះ មិនត្រឹមតែជាការតភ្ជាប់ផ្នែកគមនាគមន៍នោះទេ ប៉ុន្តែវាក៏ជួយដល់វិស័យទេសចរណ៍ ដែលវាជាវិស័យសំខាន់មួយចូលរួមលើកកំពស់សេដ្ឋកិច្ចកម្ពុជា។

សម្តេចតេជោហ៊ុន សែននាយករដ្ឋមន្រ្តីនៃកម្ពុជា បានថ្លែងកាលពីពេ​លថ្មីៗនេះថា មិត្តចិនបានជួយកម្ពុជា ក្នុងការសាងសង់ស្ពាន និងផ្លូវជាតិរាប់ពាន់គីឡូម៉ែត្រនៅកម្ពុជា ដើម្បីកម្ពុជាអាចសមាហរណកម្មផ្ទៃក្នុងរបស់ខ្លួន​ផង និងដើម្បីជម្រុញការលើកកំពស់សេដ្ឋកិច្ចជាតិផង។

សម្តេចបានបញ្ជាក់ថា “បើមិនឲ្យកម្ពុជាពឹងចិន តើឲ្យពឹងអ្នកណា?”។

កាលពីពេលថ្មីៗនេះ អ្នកនាំពាក្យនិងអនុរដ្ឋលេខាធិការក្រសួងសាធារណៈការ និងដឹកជញ្ជូន លោកវ៉ាស៊ីម សូរិយាបានមានប្រសាសន៍ឲ្យដឹងថា ការសាងសង់ផ្លូវតភភ្ជាប់ពីខេត្តសៀមរាប ទៅកាន់ខេត្តបាត់ដំបង ឯកឧត្តមទេស​រដ្ឋមន្រ្តីចង់បានលឿនណាស់ ព្រោះការសាងសង់ផ្លូវនេះមានគោលដៅសំខាន់ៗចំនួន៣ ទី១ ការតភ្ជាប់រវាងក្រុងបាត់ដំបង មកកាន់ក្រុងសៀមរាបកាន់តែកៀក និងជួយសម្រួលការធ្វើដំណើររបស់ប្រជាពលរដ្ឋ។

ទី២ កម្ពុជាគ្រោងសាងសង់ប៉មមួយ នៅកណ្តាលបឹងទន្លេសាប ដើម្បីទាក់ទាញទេសចរណ៍ទស្សនាផ្ទៃបឹង និងសត្វស្លាបដទៃទៀត ដែលប៉មបែបនេះ ត្រូវបានធ្វើនៅក្រុងហុងកុង ប្រទេសកូរ៉េជាដើម។ ទី៣ ជាការរៀបចំខ្សែ​សង្វាក់ទេសចរណ៍ចេញពីខេត្តសៀមរាប ទៅកាន់ខេត្តបាត់ដំបង ដើម្បីធ្វើ​យ៉ាងណាឲ្យភ្ញៀវស្នាក់នៅយូរ និងចំណាយប្រាក់ច្រើន ពិសេសកាត់បន្ថយលំហូរទេសចរណ៍ចេញពីសៀមរាប ទៅកាន់ប្រទេសថៃ ដែលធ្វើឲ្យភ្ញៀវអន្តរជាតិស្នាក់នៅកម្ពុជាក្នុងរយៈពេលខ្លី៕

ដោយៈ គង់ សូរិយា

ភ្នំពេញៈ ផ្សារទំនើបថ្មីមួយ ព្រីនស៍ ថាមស៍សឃ្វែរត្រូវបានប្រារព្ធពិធីបើកសម្ភោធជាផ្លូវការនៅរាជធានីភ្នំពេញ ដែលមានទីតាំងស្ថិតនីលើមហាវិថីព្រះនរោត្តម។

លោកឃួង ស្រេង អភិបាលនៃគណៈអភិបាលរាជធានីភ្នំពេញ បានអញ្ជើញចូលរួមក្នុងពិធីបើកសម្ពោធនេះ។

លោក Edward Lee នាយកប្រតិបត្តិនៃក្រុមហ៊ុន ព្រីនស៍ រៀល អ៊ីស្ទេត គ្រុបបានថ្លែងអំណរគុណយ៉ាងស្មោះស្ម័គ្រ ចំពោះការគាំទ្រពីសំណា​ក់ស្ថាប័នរដ្ឋគ្រប់លំដាប់ថ្នាក់ក្នុងពេលកន្លងមក ក៏ដូចជាការគាំទ្រ និងការទទួលស្គាល់យ៉ាងពេញទំហឹង ពីគ្រប់មជ្ឈដ្ឋាននិងសំណាក់ប្រជាជនកម្ពុជាផងដែរ។

ផ្សារទំនើបព្រីនស៍ ថាមស៍ សឃ្វែរ បាននាំមកនូវម្ចាស់អាជីវកម្មចិននិងខ្មែរជាច្រើន និងជាអគារនិមិត្តសញ្ញាថ្មីៗនៅទីក្រុងភ្នំពេញ ដែលប្រមូលផ្តុំនូវភោជនីយដ្ឋានយ៉ាងច្រើន។ ក្នុងនាមជាមជ្ឈមណ្ឌលពាណិជ្ជកម្មដំបូងបង្អស់របស់ក្រុមហ៊ុន ព្រីនស៍ រៀល អ៊ីស្ទេត គ្រុប  ដែលបានបើកដំណើរជាសាធារណៈ ផ្សារទំនើប ព្រីនស៍ ថាមស៍ សឃ្វែរ មិនត្រឹមតែនាំមកនូវបទពិសោធន៍ពេញលេញថ្មីៗជូនប្រជាពលរដ្ឋ និងភ្ញៀវទេសចរទេ ថែមទាំងក៏អាចបង្កើតឱកាសការងារបន្ថែមទៀតនៅកម្ពុជា និងលើកកម្ពស់ការអភិវឌ្ឍសេដ្ឋកិច្ច និងសង្គមរបស់កម្ពុជាផងដែរ។

លោកឃួង ស្រេងបានមានប្រសាសន៍បញ្ជាក់ថា បើទោះបីក្នុងឆ្នាំ២០២១ កន្លងទៅ មានផលប៉ះពាល់ពីវិបត្តិជាសាកល បង្កឡើងដោយជំងឺកូវីដ-១៩ ក៏រាជធានីភ្នំពេញ នៅតែបន្តទទួលបានគម្រោងសាងសង់ថ្មីៗពីវិស័យឯកជន រហូតដល់ទៅចំនួន១.០៥០គម្រោង លើផ្ទៃក្រឡាសំណង់សរុបជាង៤,៦៣លានម៉ែត្រក្រឡា ដែលមានទំហំទុនវិនិយោគប៉ាន់ស្មានជាង២,២៦ពាន់លានដុល្លាអាមេរិកបន្ថែមទៀត ធ្វើឱ្យរាជធានីភ្នំពេញកាន់​តែមានភាពស្រស់បំព្រង មិនចាញ់បណ្តាទីក្រុងនៃប្រទេសជិតក្បែរ និងក្នុងតំបន់អាស៊ានឡើយ។

លោកបានមានប្រសាសន៍ទៀតថា ផ្សារទំនើប ព្រីនស៍ ថាមសឃែ្វរ បានប្រមូលផ្តុំនូវម្ចាស់អាជីវកម្មចិន និងខ្មែរជាច្រើន និងជាអគារពាណិជ្ជកម្មខ្នាតធំដែលមានមុខងារពេញលេញ នៅក្នុងទីក្រុងភ្នំពេញ ហើយក៏ជាមជ្ឈ​មណ្ឌលពាណិជ្ជកម្មដំបូងបង្អស់របស់ក្រុមហ៊ុន ព្រីនស៍ រៀល អ៊ីស្ទេត គ្រុប ដែលបានបើកដំណើរជាសាធារណៈ។

ក្រុមហ៊ុន ព្រីនស៍ រៀល អ៊ីស្ទេត គ្រុប បានបណ្តាក់ទុនវិនិយោគក្នុងទំហំទឹកប្រាក់ដ៏ច្រើនសន្ធឹកសន្ធាប់ ក្នុងវិស័យអចលនទ្រព្យ ធនាគារ ផ្សារទំនើប និងគម្រោងអភិវឌ្ឍន៍មួយចំនួនទៀត ជាពិសេសក្នុងមូលដ្ឋានរាជធានីភ្នំពេញ។

លោកឃួង ស្រេងបានបន្តថា កំណើនសេដ្ឋកិច្ចកម្ពុជា ត្រូវបានប៉ាន់ស្មានថានឹងបន្តងើបឡើងវិញ នាបណ្តាឆ្នាំខាងមុខយ៉ាងឆាប់រហ័ស ស្របតាមការកើនឡើងនូវតម្រូវការសកល និងទំនុកចិត្តរបស់វិនិយោគគិនទាំងក្នុងស្រុក និងបរទេស ដែលជាសក្តានុពលដ៏ធំ សម្រាប់ការវិនិយោគក្នុងវិស័យអចលនទ្រព្យ ជាពិសេស អគារពាណិជ្ជកម្ម សណ្ឋាគារ សំណង់បុរី អគារស្នាក់នៅរួម ខុនដូ និងផ្សារទំនើប ប្រកបដោយប្រណីតភាព សម្រាប់បម្រើដល់ការរស់នៅប្រចាំថ្ងៃ។

លោកបន្ថែមថា ការបើកសម្ពោធផ្សារទំនើប ព្រីនស៍ ថាមសឃែ្វរ គឺជាជម្រើសអាជីវកម្មមួយ ដែលនឹងទទួលបានគាំទ្រ ពីសំណាក់បងប្អូនប្រជាពលរដ្ឋ និងភ្ញៀវទេសចរណ៍ក្នុងទីក្រុង ស្របពេលដែលប្រទេសជាតិយើងបានបើកដំណើរការសកម្មភាពសេដ្ឋកិច្ច-សង្គម ពេញលេញឡើងវិញលើគ្រប់វិស័យ៕

ដោយ៖ សុផារី

ភ្នំពេញ៖ ផ្លូវល្បឿនលឿនភ្នំពេញ-ក្រុងព្រះសីហនុ ដែលគ្រោងបើកដំណើរការជាផ្លូវការក្នុងពេលឆាប់ៗនេះមានតួនាទីសំខាន់ ក្នុងការតភ្ជាប់ប៉ូលសេដ្ឋកិច្ចកម្ពុជាធំៗចំនួនបី រួមមាន ប៉ូលសេដ្ឋកិច្ចភ្នំពេញ ប៉ូលសេដ្ឋកិច្ចក្រុងព្រះសីហនុ និងប៉ូលសេដ្ឋកិច្ចខេត្តសៀមរាប។

នេះបើតាមការលើកឡើងរបស់លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ក្នុងកិច្ចសម្ភាសពិសេសនៅថ្ងៃទី០៧ ខែមិថុនានេះ។

លោក ស៊ុន ចាន់ថុល បានលើកឡើងពីសារៈសំខាន់នៃផ្លូវល្បឿនលឿនភ្នំពេញ-ក្រុងព្រះសីហនុ ក្នុងការតភ្ជាប់ប៉ូលសេដ្ឋកិច្ចកម្ពុជាធំៗចំនួនបី ដូចជា ប៉ូលសេដ្ឋកិច្ចភ្នំពេញ ប៉ូលសេដ្ឋកិច្ចក្រុងព្រះសីហនុ ខេត្តព្រះសីហនុ និងប៉ូលសេដ្ឋកិច្ចខេត្តសៀមរាប។

លោកបានសង្កត់ធ្ងន់ថា ការតភ្ជាប់ប៉ូលសេដ្ឋកិច្ចភ្នំពេញ-ក្រុងព្រះសីហនុ តាមរយៈផ្លូវល្បឿនលឿននេះ នឹងធ្វើឱ្យការដឹកជញ្ជូនទំនិញ ក៏ដូចជាអ្នកដំណើរកាន់តែមានប្រសិទ្ធភាព ចំណាយពេលវេលាតិចជាងមុន កាត់បន្ថយចំណាយ និងធ្វើឱ្យប៉ូលសេដ្ឋកិច្ចខេត្តព្រះសីហនុមានការរីកចម្រើនថែមទៀត។

លោកទេសរដ្ឋមន្ត្រី បានមានប្រសាសន៍ថា បច្ចុប្បន្នរាជរដ្ឋាភិបាលកម្ពុជាកំពុងសហការជាមួយមិត្ត ចិន ដើម្បីធ្វើផែនការមេសម្រាប់ខេត្តព្រះសីហនុទាំងមូល ក្នុងការប្រែក្លាយខេត្តនេះឱ្យទៅជាតំបន់សេដ្ឋកិច្ច ពិសេស ហើយផ្លូវល្បឿនលឿននេះនឹងដើរតួនាទីយ៉ាងសំខាន់ ក្នុងការជួយលើកកម្ពស់កំណើនសេដ្ឋកិច្ច របស់ខេត្តព្រះសីហនុទាំងមូល។

លោកទេសរដ្ឋមន្ត្រីលើកឡើងថា ផែនការនេះស្របតាមសុភាសិតចិនលើកឡើងថា “ចង់មានបាន ត្រូវសង់ផ្លូវ”  ឯចំណែក​សុភាសិតខ្មែរថា “មានផ្លូវ មានក្តីសង្ឃឹម” និងស្របតាមចក្ខុវិស័យវែងឆ្ងាយរបស់សម្ដេចតេជោ ដែលបានផ្ដល់អាទិភាពបួនយ៉ាងគឺ ដើម្បីកសាងប្រទេសជាតិឱ្យមានការរីកចម្រើន ត្រូវតែមាន ផ្លូវ ភ្លើង ទឹក និងធនធានមនុស្ស។

ទាក់ទងនឹងគុណភាពផ្លូវល្បឿនលឿនភ្នំពេញ-ក្រុងព្រះសីហនុ លោកទេសរដ្ឋមន្ត្រីអះអាងថា ផ្លូវនេះមានគុណភាពល្អ ទាំងការរៀបចំកសាង និងការរៀបចំសុវត្ថិភាព ហើយបន្ថែមពីលើនេះក្រសួងបានជួលក្រុមហ៊ុនទីប្រឹក្សាបច្ចេកទេស និងវិស្វករឯករាជ្យឱ្យមកពិនិត្យលើគុណភាពថែមទៀត រួមជាមួយការប្រើបច្ចេកវិទ្យាថ្មី សម្ភារៈទំនើប បទពិសោធន៍ និងអ្នកជំនាញគ្រប់គ្រាន់ ដើម្បីសាងសង់ផ្លូវនេះឱ្យមានគុណភាពរឹងមាំតាមស្តង់ដារបច្ចេកទេស៕