ដោយៈ វឌ្ឍនៈ

ភ្នំពេញៈ វិស័យអចលនទ្រព្យក្នុងប្រទេសកម្ពុជា សម្រាប់ឆ្នាំ២០២២នេះ ត្រូវបានរាជរដ្ឋាភិបាលរំពឹងថា នឹងមានកំណើនក្នុងរង្វង់២,៥ភាគរយ និងឆ្នាំ២០២៣ខាងមុខកម្ពុជារំពឹងថា វិស័យនេះនឹងមានកំនើន៥,២ភាគរយ ។ នេះបើតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុចេញផ្សាយនៅពេលថ្មីៗនេះ។

ការព្យាករណ៍ថ្មីនេះ មានភាពខុសស្រឡះកាលពីឆ្នាំមុន ដែលក្រសួង​ដដែលនេះបានព្យាករណ៍ថា កំនើនវិនិយោគក្នុងវិស័យនេះ នឹងកើនក្នុងរង្វង់៤,៨ភាគរយ។

របាយការណ៍នេះឱ្យដឹងថា ការព្យាករពីកំណើននៃវិស័យអចលនទ្រព្យនេះ ដោយសារការរំពឹងទុកថា ការងើបឡើងវិញយឺត នៃសកម្មភាពទិញលក់ និងជួលអចលនទ្រព្យថ្លៃខ្ពស់ រួមមាន ខុនដូ និងអាផាតម៉ិន ស្របពេលដែលការវិនិយោគ និងតម្រូវការក្នុងស្រុក លើអចលនទ្រព្យផ្នែកលំនៅឋានតម្លៃទាប និងមធ្យម រំពឹងថានៅបន្តរក្សាកំណើនល្អ។

របាយការណ៍ដដែលបានបង្ហាញថា ទោះជាយ៉ាងនេះក្ដី វិស័យនេះនៅតែប្រឈមនឹងហានិភ័យខ្ពស់ ស្រដៀងគ្នាទៅអនុវិស័យសំណង់ ដោយហេតុថា វិស័យអចលនទ្រព្យ មានទំនាក់ទំនងខ្លាំង ជាមួយនឹងវិស័យហិរញ្ញវត្ថុក្នុងនិងក្រៅប្រព័ន្ធធនាគារ ។ ក្នុងនោះន័យនេះ រាជរដ្ឋាភិបាលនឹងបន្តតាមដាន យ៉ាងយកចិត្តទុកដាក់លើការវិវត្តនៃ អនុវិស័យនេះជាមួយនឹងការដាក់ចេញនូវវិធានការអន្តរាគមន៍ផ្សេងៗ សំដៅបញ្ចៀសហានិភ័យដែលអាចកើតមានឡើងជាយថាហេតុ ។

អ្នកជំនាញនៃវិស័យអចលនទ្រព្យជាច្រើន ក៏បានអះអាងមិនខុសគ្នាពីរបាយការណ៍របស់ក្រសួងដែរ ដោយលើកឡើងថា ដោយសារតែវិបត្តិនៃសង្គ្រាមរវាងរុស្ស៊ី និងអ៊ុយក្រែន បានធ្វើឱ្យប៉ះពាល់ដល់វិស័យអចលនទ្រព្យនិងការវិនិយោគក្នុងប្រទេសកម្ពុជា។ ជាមួយគ្នានេះដែរ ដោយសារតែគោលនយោបាយគ្មានកូវីដ១៩ របស់ប្រទេសចិនក៏បានរារាំង ដល់ការមកដល់នៃវិនិយោគិនចិនមកកម្ពុជា ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអច​លនវត្ថុកម្ពុជាបានលើកឡើងផងដែរថា សង្គ្រាមរវាងរុស្ស៊ី និងអ៊ុយក្រែន ជៀសមិនផុត ពីជះឥទ្ធិពលដល់អចលនទ្រព្យកម្ពុជានោះទេ ហើយវិនិយោគិនបរទេសជាពិសេសចិន នឹងចូលមកម្ពុជាវិញអាចនៅចុងឆ្នាំ២០២២នេះឬដើមឆ្នាំ២០២៣ខាងមុខ ។

ចំណែកលោកខន គង្គា អគ្គនាយកក្រុមហ៊ុន ERA Cambodia ដែលជាក្រុមហ៊ុនជំនាញខាងខុនដូបានបញ្ជាក់ថា ក្នុងឆ្នាំ២០២២ការទិញលក់ខុនដូនៅមានសក្មភាព ប៉ុន្តែក្នុងចំណោមអ្នកទិញខុនដូភាគច្រើន គឺជាជនជាតិខ្មែរ ឬអតិថិជនក្នុងស្រុក។

លោកថា”ដោយសារតែជនបរទេស មិនទាន់ចូលមកកម្ពុជាច្រើនឡើងវិញ ទើបការលក់ខុនដូនៅក្នុងប្រទេសកម្ពុជា ភាគច្រើនផ្ដោតទៅលើអតិថិជនក្នុងស្រុក”៕

ដោយៈគង់់ សូរិយា

ភ្នំពេញៈ មន្រ្តីជាន់ខ្ពស់ក្រសួងរៀបចំដែនដី នគរូបនីយកម្មនិងសំណង់ និងស្ថានទូតអូស្រ្តាលីប្រចាំកម្ពុជា បានរៀបចំផ្សព្វផ្សាយគោលការណ៍ណែ​នាំថ្មីស្តីពីសុខភាព និងសុវត្ថិភាពនៅការដ្ឋានសំណង់ និងដាក់អោយអនុវត្តន៍ ដើម្បីសង្គ្រោះជីវិតនៅតាមការដ្ឋានសំណង់នានា។

លោកលាង មុនីរីត្ន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានអញ្ជើញជាអធិបតីក្នុងពិធីផ្សព្វផ្សាយ គោលការណ៍ណែនាំនេះ ត្រូវប្រកាសផ្សព្វផ្សាយ នៅថ្ងៃទី​៧​ ខែមិថុនា​ ឆ្នាំ​២០២២ ដោយមានការ​ចូលរួមពីលោក Robin Flint លេខាទី១​ នៃស្ថានទូតអូស្រ្តាលី​ ប្រចាំកម្ពុជា​។

លោក Robin Flint លេខាទី១ នៃស្ថានទូតអូស្រ្តាលី ប្រចាំកម្ពុជា បានឲ្យមានប្រសាសន៍ឲ្យដឹងថា គោលការណ៍ណែនាំ និងសិក្ខាសាលានេះ នឹងជួយលើកកម្ពស់សុវត្ថិភាព និងសុខភាពបុគ្គលិកធ្វើការ ក្នុងវិស័យសំណ​ង់ ឱ្យមានភាពល្អប្រសើរឡើងទាំងនៅក្នុង និងជុំវិញការដ្ឋានសំណង់ ដែលនេះគឺជាការងារដ៏សំខាន់មួយ ដើម្បីការពារនិងសង្គ្រោះអាយុជីវិតពួកគេ។

ការរីកលូតលាស់យ៉ាងឆាប់រហ័សនៃវិស័យសំណង់ ក្នុងប្រទេសកម្ពុជា ទាមទារឱ្យមានការរៀបចំ និងអនុវត្តស្តង់ដារផ្លូវការមួយ ដែលទាក់ទងនឹងគុណភាពសំណង់ ការរចនាគ្រឿងបង្គុំសំណង់ សុខភាព និងសុវត្ថិភាពនៅតាមការដ្ឋានសំណង់ផងដែរ។

គោលការណ៍ណែនាំស្តីពីសុខភាព និងសុវត្ថិភាពនៅការដ្ឋានសំណង់ ទទួលបានការឧបត្ថម្ភដោយរដ្ឋាភិបាលអូស្ត្រាលី ក្នុងទឹកប្រាក់សរុបចំនួន ៥១,៧លានដុល្លារអូស្រ្តាលី តាមរយៈកម្មវិធីវិនិយោគក្នុងវិស័យហេដ្ឋារចនាសម្ព័ន្ធ (3i) ដែលត្រូវបានអនុម័តក្នុងខែឧសភា ឆ្នាំ២០២២ កន្លងទៅនេះ៕

ដោយៈជេស៊ីកា

ភ្នំពេញៈ វិស័យសំណង់បាន និងកំពុងផ្លាស់ប្តូរមុខមាត់កម្ពុជា ពិសេ​សរាជធានីភ្នំពេញ និងក្រុងព្រះសីហនុ ទៅកាន់កម្រិតថ្មីមួយក្នុងរយៈពេលប៉ុន្មានទសវត្សរ៍ចុងក្រោយនេះ។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានឲ្យដឹងកាលពីម្សិលម៉ិញនេះថា ក្នុងរយៈពេលជាងពីរទស្សវត្សរ៍ចុងក្រោយនេះ លិខិតអនុញ្ញាតសាងសង់ជាង៥៧,០០០ ត្រូវបានចេញឱ្យទៅការដ្ឋានសំណង់ នៅទូទាំងប្រទេសកម្ពុជា ដែលផ្តល់ការងារជាមធ្យមប្រមាណ១៥០,០០០នាក់ ក្នុងមួយថ្ងៃ និងមានទុនវិនិយោគសរុបដែលមានតម្លៃជាង ៦៦ពាន់លានដុល្លារអាមេរិក។

ក្នុងចំណោមគំរោងសំណង់ ដែលបានអនុម័តច្រើនជាងគេ មានដូចជា អាគារពាណិជ្ជកម្ម អាគារសហកម្មសិទ្ឋ(ខុនដូ) លំនៅដ្ឋាន អាផាតម៉ិន ការិយាល័យសម្រាប់ជួលជាដើម។

លោកស្រីអាន សុធីតា អគ្គនាយិកកាក្រុមហ៊ុន PropNex Cambodiaបានលើកឡើងថា កម្ពុជានៅតែស្ថិតក្រោមក្រសែភ្នែក របស់វិនិយោគិនអន្តរជាតិ ដោយសារការវិនិយោគនៅកម្ពុជា ទាក់ទាញបានផលចំណេញច្រើន ធៀបនឹងការវិនិយោគនៅតាមបណ្តាប្រទេសនានាក្នុងតំបន់។

លោកស្រីបន្តថា “ទោះជាយ៉ាងណាផលចំណេញ ពីការវិនិយោគនៅកម្ពុជា បានធ្លាក់ចុះក្នុងប៉ុន្មានឆ្នាំចុងក្រោយនេះ ប៉ុន្តែនៅតែមានអត្រាខ្ពស់ជាងប្រទេសក្នុងតំបន់នៅឡើយ”។

ជាមួយគ្នានេះ លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចល​នវត្ថុកម្ពុជាបានមានប្រសាសន៍ឲ្យដឹងផងដែរថា កម្ពុជានៅតែជាទីតាំង ដែលទាក់ទាញការវិនិយោគ ដោយសារការរីកចម្រើននៃសេដ្ឋកិច្ច ហើយវាជាទីផ្សារថ្មីមួយ ដែលអ្នកវិនិយោគអន្តរជាតិ ងាយស្រួលរកបានផល​ចំនេញខ្ពស់ ព្រោះតម្លៃដី កំលាំងពលកម្ម នៅតែមានតម្លៃទាប បើធៀប​ជាមួយប្រទេសជិតខាង។

លោកបន្តថា “ការរីកចម្រើនសេដ្ឋកិច្ច ស្ថេរភាពនយោបាយ និងបទបញ្ញត្តិច្បាប់នានាបានផ្តល់ភាពអនុគ្រោះ និងលើកទឹកចិត្តដល់វិនិយោគិនអន្តរជាតិ ជាមូលដ្ឋានសំខាន់មួយ ដែលកម្ពុជានៅតែទាក់ទាញការវិនិយោគពីបរទេស”៕

ដោយៈគង់ សូរិយា

ព្រះសីហនុៈ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោក វ៉ាង វិនធាន ឯកអគ្គរដ្ឋទូតចិន ប្រចាំកម្ពុជា នឹងអញ្ជើញបើកការដ្ឋានសាងសង់ រោងជាងជួសជុលនាវា (Drydock, Slipway) ផែសំចត និងស្តារឃ្លង នៅមជ្ឈមណ្ឌលទំនើបកម្មមូលដ្ឋានសមុទ្ររាម នៅព្រឹកថ្ងៃទី៨ ខែមិថុនា ឆ្នាំ២០២២នេះហើយ។

ការការដ្ឋានសាងសង់រោងជាងជួសជុលនាវា ផែសំចត និងស្តារឃ្លងនេះ គឺជាជំនួយឥតសំណងរបស់រដ្ឋាភិបាលចិន ដល់កងទ័ពជើងទឹកកម្ពុជា ផ្ដោតលើចំណុចសំខាន់ៗដូចជា ទី១ រៀបចំស្តារទីតាំងរបស់កងទ័ពជើងទឹក នៅមូលដ្ឋានរាមសំដៅធ្វើឱ្យមានលទ្ធភាព គ្រប់គ្រងពិតប្រាកដលើទីតាំងភូមិសាស្ត្រ ដែលមានស្រាប់ ឱ្យមានជំរុំបន្ទាយ ដែលមានអគារទីបញ្ជាការ អគារបំពេញការងារគ្រប់ផ្នែកដូចជា អគារសាលប្រជុំ អគារឃ្លាំង អគារកម្សាន្ត អាហារដ្ឋាន ទីលានកីឡា អគារទទួលភ្ញៀវជាតិ-អន្តរជាតិស្តង់ដារកម្រិតខ្ពស់ ការកសាងប្រព័ន្ធអគ្គិសនី ប្រព័ន្ធទឹកស្អាត ប្រព័ន្ធលូបង្ហូរទឹក។ល។

ទី២ ជួយជួសជុលនាវាចាស់ៗ ដែលអស់ពេលវេលាប្រើប្រាស់ ដែលកងទ័ពជើងទឹកភាគីកម្ពុជា ពុំមានលទ្ធភាពជួសជុល ចំនួន៨គ្រឿង យកទៅជួសជុលនៅប្រទេសចិន និងដុកបណ្តែតចំនួន២គ្រឿង (១គ្រឿង ចំណុះ៦០០តោន ជួសជុលនៅប្រទេសចិន និង១គ្រឿងទៀត ចំណុះ៧០០តោន ជួសជុលនៅប្រទេសកម្ពុជា) និងជួយបំពេញបន្ថែមនូវនាវា សម្រាប់បម្រើការបច្ចេកទេសដូចជា នាវាអូសសណ្ដោងចំនួន២គ្រឿង (ទំហំផ្ទុក ១០០តោនចំនួន១គ្រឿង និង៥០តោនចំនួន១គ្រឿង) នាវាដឹកស្បៀងគ្រឿងបរិក្ខារ ចំនួន១គ្រឿង និងត្រៀមលើកគម្រោងសម្ភារៈ ឧបករណ៍ផ្សេងៗទៀត តាមការខ្វះខាតជាក់ស្តែង។

ទី៣ ជួយកសាង និងពង្រីកបន្ថែមមន្ទីរពេទ្យ១កន្លែង សម្រាប់បម្រើការងារផ្ទៃក្នុងរបស់កងទ័ពជើងទឹក និងប្រជាជនដែលរស់នៅក្បែរខាងក្នុងតំបន់។ ទី៤ ជួយកសាងរោងជាងជួសជុលនាវា អ៊ូ (Drydock) និងរ៉ៃ (Slipway) សម្រាប់បម្រើឱ្យការជួសជុលនាវាគ្រប់ប្រភេទ ដែលកងទ័ពជើងទឹកកម្ពុជា កំពុងប្រើប្រាស់កាត់បន្ថយការបញ្ជូន ទៅជួសជុលនៅក្រៅប្រទេស និងបន្ថយការចំណាយថវិកាជាតិខ្ជះខ្ជាយ លើកកម្ពស់កាបង្ហាត់បង្រៀនអ្នកឯកទេសគ្រប់ផ្នែក ទាំងគ្រឿងបំពាក់ ដែលមានលើនាវាដោយខ្លួនឯង រៀនបើកបរ ជួសជុលថែទាំ និងសិក្សាស្រាវជ្រាវ។

លើកកម្រិតសមត្ថភាពជាអ្នកឯកទេស អាចជួសជុល ឬរៀបតម្លើងនាវាធុនមធ្យមល្មមៗ ដោយខ្លួនឯង សិក្សាច្បាប់ទម្លាប់ វិស័យផ្ទៃសមុទ្រ សម្រាប់ជាតិ និងអន្តរជាតិដើម្បីពង្រីកកិច្ចសហប្រតិបត្តិការជាមួយបណ្តាប្រទេសក្នុងតំបន់ និងពិភពលោក។

ទី៥ ជួយកសាងផសំចតចំនួន០២កន្លែង បើកទូលាយសម្រាប់សំចតនាវាធុនស្រាល និងមធ្យម។ ទី៦ ជួយស្ដារឃ្លងមានស្រាប់ ដែលជម្រៅទឹកនៅរាក់នៅឡើយ ឱ្យមានលទ្ធភាពទូលំទូលាយ សម្រាប់នាវាធុនមធ្យមចរាចរចេញចូលបានដោយរលូន។

ទី៧ បានផ្តល់នូវឯកសណ្ឋានយោធា សម្រាប់កងទ័ពជើងទឹកកម្ពុជាប្រើប្រាស់ មានចំនួន០៧ប្រភេទ ស្មើនឹង៣៦,៩០០កំប្លេ។

ក្រៅពីនេះគណៈកម្មការ នៃប្រទេសទាំងពីរ កំពុងបន្តសិក្សាស្វែងយល់អំពីការបំពេញតម្រូវការផ្សេងៗមួយចំនួនទៀត សម្រាប់ហ្វឹកហាត់ជំនាញរបស់កងទ័ពជើងទឹក ឱ្យមានសមត្ថភាពបំពេញភារកិច្ច ការពារសន្តិសុខ ស្ថេរភាព សណ្តាប់ធ្នាប់ ការជួយសង្គ្រោះគ្រោះមហន្តរាយ អំពើភេវរកម្មហិង្សា ការជួញដូរអាវុធ គ្រឿងញៀនខុសច្បាប់ ទប់ស្កាត់រាល់បាតុភាពដែលអាចកើតឡើង ដោយសហការជាមួយប្រទេសក្នុងតំបន់ និងអន្តរជាតិ៕
ប្រភពFreshnews៕

ដោយ៖ សុផារី

ភ្នំពេញ៖ លោកស្រី ជា សិរី បានធ្វើការណែនាំ ដល់​ធនាគារ​ត្រូវមានការប្រុងប្រយ័ត្នខ្ពស់ ចំពោះការផ្តល់កម្ចីលើការទិញដី និងលំនៅដ្ឋានសម្រាប់វិនិយោគ ព្រោះថាអាចមានហានិភ័យ​ខ្ពស់ នៅពេលអតិថិជនជួបវិបត្តិអ្វីមួយ ហើយមិនអាចសងត្រឡប់វិញបាន។

ថ្លែងក្នុងឱកាសបើកសិក្ខាសាលាស្ដីពីការផ្សព្វផ្សាយ និងដាក់ឱ្យប្រើប្រាស់ជាផ្លូវការសន្ទស្សន៍ថ្លៃលំនៅដ្ឋាន នៅថ្ងៃទី០៦ ខែមិថុនា លោកស្រី ជា សិរី ឧបការីទេសសាភិបាល និងជាអគ្គនាយកបច្ចេកទេសធនាគារជាតិនៃកម្ពុជា បានមានប្រសាសន៍ថា ជាទូទៅ ការផ្តល់ប្រាក់កម្ចីអ្វីមួយ ត្រូវមាន​ការធានាជាផ្ទះ ឬដីមកបញ្ចាំទើបធនាគារគេឱ្យខ្ចី ប៉ុន្តែការខ្ចីប្រាក់យកទៅទិញដី ឬលំនៅដ្ឋាន មានហានិភ័យ​ជាងខ្ចីយកទៅទិញផ្ទះខ្លួនឯង។​

លោកស្រីបានបន្តថា អតិថិជនខ្ចីប្រាក់យកទៅទិញផ្ទះរស់នៅ បើទោះបីជាមានហានិភ័យអ្វីមួយក៏ដោយ ក៏គាត់ខំប្រឹង​រកប្រាក់ ដើម្បីបង់ត្រឡប់មកធនាការវិញដែរ។

អ្នកជំនាញរូបនេះបានសង្កត់ធ្ងន់ថា “ប៉ុន្តែ យើងបារម្ភទៅលើអ្នកដែលខ្លីយកទៅទិញដី ឬលំនៅដ្ឋានទុក ដើម្បីរង់ចាំឡើង​ថ្លៃលក់ចំណេញនោះ អាចជាហានិភ័យនៅពេល ដែលមានផលលំបាកកើតឡើង ដោយគាត់អាចនឹងបោះបង់ដី ​ឬលំនៅដ្ឋាននោះចោល ដោយសារមិនមានលទ្ធភាពបង់ប្រាក់ត្រឡប់ទៅធនាគារវិញបាន”។

លោកស្រីបានបន្ថែមថា “ដូចនេះ ធនាគាត្រូវរឹបអូសដី ឬលំនៅដ្ឋាននោះ ដើម្បីលក់បន្ត ហើយក៏មិនប្រាកដថា អាចលក់បាន​ដូចការវាយតម្លៃ ដែលអតិថិជនមកខ្ចីនោះដែរ ព្រោះប្រាក់ដែលផ្តល់ឱ្យជាប្រាក់បញ្ញើរបស់អតិថិជនទេ ​មិនមែនប្រាក់​របស់ធនាគារទាំងអស់ដែរ។ នៅពេលដែលធនាគារអត់មានប្រាក់ប្រមូលបានត្រឡប់មកវិញច្រើន វានឹងប៉ះពាល់ដល់​អ្នកដែលយកប្រាក់មកបញ្ញើរ។

លោកស្រីថា ដូច្នេះ ត្រូវមានការប្រុងប្រយ័ត្ន ដើម្បីធ្វើយ៉ាងណាការពារវិស័យធនាគារ កុំឱ្យមានបញ្ហាត្រូវ​មានរង្វាស់​ជាក់លាក់ ដើម្បីវាស់វែងហានិភ័យ និងមានវិធានការឱ្យបានទាន់ពេលវេលាកុំឱ្យដូចពាក្យចាស់លើកឡើងថា ទឹកដល់ច្រមុះហើយ ទើបរកវិធានការដោះស្រាយនោះ”។

លោកស្រី ជា សិរី បានបញ្ជាក់ថា ក្នុងការទប់ស្កាត់ហានិភ័យនេះជាវិធានការ គឺមានតែធនាគារត្រូវសិក្សា និងវាយ​តម្លៃឱ្យបានច្បាស់លាស់ពីតម្លៃអចនលទ្រព្យ។ បើមានការធ្លាក់ថ្លៃ ត្រូវប្រុងប្រយ័ត្ន ហើយបើតម្លៃឡើង​ថ្លៃ ក៏មានការប្រុង​ប្រយ័ត្នដែរ ព្រោះជួនកាលការឡើង​ថ្លៃបែប​ពពុះសេដ្ឋកិច្ចប៉ុណ្ណោះ៕