ដោយៈ វឌ្ឍនៈ

ភ្នំពេញៈ មហាវិថីតេជោ ឬហៅថាផ្លូវ៦០ម៉ែត្រ កាន់តែបង្ហាញសក្ដានុពល ក្នុងការទាក់ទាញការវិនិយោគ លើការសាងសង់អាគារខុនដូខ្ពស់និង កំពុងក្លាយជាមជ្ឈមណ្ឌលពាណិជ្ជកម្មថ្មីមួយនៅរាជធានីភ្នំពេញ។

អ្នកជំនាញបាន និងកំពុងសង្កេតឃើញថាតំបន់នេះ បានក្លាយជាតំបន់ពាណិជ្ជកម្មដ៏មានសក្ដានុពល មានអគារខ្ពស់ៗ អគារខុនដូ ផ្សារទំនើបៗនិងលំនៅឋានតម្លៃខ្ពស់ៗ កាន់តែច្រើនបន្ថែមទៀត និងមានវត្តមានផ្សារទំនើបកាន់តែច្រើនដូចជា ផ្សារទំនើបAEON Mall3 Chip Mong Retails Mall ផ្សារទំនើបបុរីប៉េងហួត និងផ្សារបែបសហគមន៍ ដែលនឹងត្រៀមសាងសង់នាពេលខាងមុខ។

ទោះបីជាតំបន់តាមបណ្ដោយផ្លូវ៦០ម៉ែត្រ មានការអភិវឌ្ឍខ្ពស់បែបនេះក្ដី តែតម្លៃដីធ្លីនៅតំបន់នេះ មិនទាន់មានហក់ឡើងបន្ថែមទៀតនោះទេ ក្នុងរយៈពេលប៉ុន្មានឆ្នាំកន្លងមកនេះ ។

លោកស្រីអាន សុធីតាអគ្គនាយិកាក្រុមហ៊ុនPropNex Cambodia បានឱ្យដឹងតាមទូរស័ព្ទកាលពីពេលថ្មីៗនេះថា ផ្លូវ៦០ម៉ែត្រយើងបានមើលឃើញថា មានការអភិវឌ្ឍលើវិស័យលំនៅឋាន អគារពាណិជ្ជកម្ម ខុនដូ និងផ្សារទំនើបច្រើន ហើយនៅពេលអនាគត តំបន់នេះនឹងកាន់តែមានការរីកចម្រើនបន្ថែមទៀតផងដែរ ។

លោកស្រីបន្តថា កត្តាដែលធ្វើឱ្យតំបន់នេះកាន់តែទាក់ទាញ ដោយសា​រតែការអភិវឌ្ឍហេដ្ឋារចនាសម្ព័ន្ធ របស់រាជរដ្ឋាភិបាលនៅជុំវិញតំបន់នោះ កាន់តែច្រើនកាន់តែស្អាត និងធ្វើឱ្យការធ្វើដំណើរពីភ្នំពេញ ទៅកាន់តំបន់នោះលឿនរហ័ស ។ ក្រៅពីនោះ មានព្រលានយន្តហោះអន្តរជាតិតេ មានផ្លូវក្រវ៉ាត់ក្រុង មានផ្សារទំនើបធំជាងគេ អ៊ីអនម៉ល ជាដើម ។

បើតាមលោកស្រីអាន សុធីតាបានបង្ហើបថា ក្នុងរយៈពេលពីរបីឆ្នាំកន្លងមកតំបន់ផ្លូវ៦០ម៉ែត្រ មិនមានការឡើងថ្លៃនោះទេ ហើយវានឹងរក្សាតម្លៃថេររយៈពេលពីរបីឆ្នាំបន្តទៀត ដោយរំពឹងថានឹងហក់ឡើងនៅក្រោយពីរបីឆ្នាំបន្ទាប់ ។

បើតាមប្រភពក្រៅផ្លូវការមួយបានបង្ហាញថា នៅតំបន់ផ្លូវ៦០ម៉ែត្រក៏មានគម្រោងធំមួយ ដែលមានទឹកប្រាក់រហូតដល់ជិត១០០០លានដុល្លារដោយផ្តោតទៅលើខុនដូ ផ្សារទំនើបនិងតំបន់ពាណិជ្ជកម្ម។ ដូច្នេះ តំបន់ផ្លូវ៦០ម៉ែត្រនេះ នឹងកាន់តែមានសន្ទុះនៃការអភិវឌ្ឍបន្ថែមទៀត នៅពេលអនាគតខាងមុខនេះ ។

លោកប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance ក៏បានលើកឡើងថាការ ផ្លូវ៦០ម៉ែត្រជាតំបន់មួយ ដែលនៅទូលាយ ដូច្នេះវានឹងទទួលបានការវិនិយោគបន្ថែមទៀត ទៅលើគម្រោងអគារខ្ពស់ៗ ផ្សារទំនើប និងផ្ទះទំនើបៗជាដើម។

តំបន់ផ្លូវ៦០ម៉ែត្រ ត្រូវបានអភិវឌ្ឍន៍ជាក្រុមរណបមានឈ្មោះING CITY ដែលមានទំហំដូរហូតដក់ប្រមាណ២០០០ហិកតា។ ផែនការអភិវឌ្ឍន៍ទីក្រុងរណបដ៏ធំ នៅភាគខាងត្បូងរាជធានីភ្នំពេញនេះ មានព៌តមានលំអិតជាច្រើនដែលគេហទំព័រPropertyarea.asiaបានផ្សាយជាច្រើនដងរួចមកហើយ៕

ដោយៈ ជេស៊ីកា

ភ្នំពេញៈ ក្រុមហ៊ុនសឹង្ហបុរីធំមួយ បានប្រកាសពីការលក់គំរោងខុនដូរបស់ខ្លួននៅក្រុងព្រះសីហនុ ក្នុងតម្លៃរហូតដល់ទឹកប្រាក់៥០លានដុល្លារដល់ក្រុមហ៊ុនFabi Capital ។

ក្រុមហ៊ុនHong Lai Huat បានប្រកាសកាលពីម្សិលម៉ិញ​នេះថា ខ្លួនបានចុះកិច្ចសន្យាជាមួយ Fabi Capital លើកិច្ចព្រមព្រៀងទិញលក់ តម្លៃ៥០លានដុល្លារអាមេរិកនៃកន្លែងស្នាក់ និងពាណិ​ជ្ជកម្ម នៅអគារD’Seaview នៅខេត្តព្រះសីហនុ។

យោងតាមការចុះផ្សាយរបស់សារព៌តមាន The Edge Singapore កាលពីថ្ងៃទី៤ ខែឧសភា D’Seaview គឺជាគម្រោងអភិវឌ្ឍន៍ចម្រុះដ៏ធំរបស់ក្រុមហ៊ុន ដែលមានទីតាំងនៅខេត្តព្រះសីហនុ។ គំរោងនេះលំនៅឋានសហកម្មសិទ្ឋ ចំនួន៧៣៧យូនីត និងអគារពាណិជ្ជកម្មផងដែរ ដែលគំរោងនេះសាងសង់នៅលើផ្ទៃដី៩៨១៨ម៉ែត្រការ៉េ។

កិច្ចសន្យា នេះត្រូវបានចុះហត្ថលេខាដោយក្រុមហ៊ុន PH One Development (Cambodia)  ដែលជាក្រុមហ៊ុនបុត្រសម្ព័ន្ធរបស់ Hong Lai Huat) នៅថ្ងៃទី3 ខែឧសភា។ កិច្ចសន្យា នឹងមានរយៈពេលអនុវត្តន៍រហូតដល់ថ្ងៃទី៣១ ខែធ្នូ ។

លោក Ong Jia Jing អ្នកគ្រប់គ្រងទូទៅ និងជានាយកប្រតិបត្តិនៃក្រុមហ៊ុន Hong Lai Huat និយាយថា “ភាពជាដៃគូជាមួយ Fabi Capital គឺជាឱកាសដ៏គួរឱ្យរំភើប ដែលអនុញ្ញាតឱ្យក្រុមហ៊ុនបង្កើតបណ្តាញ លក់បន្ថែមសម្រាប់គម្រោងអភិវឌ្ឍន៍ D’Seaview ។

លោកបន្តថា “ក្រុមហ៊ុននឹងបន្តស្វែងរកគម្រោងអភិវឌ្ឍន៍ ដែលអាចសម្រេចបាន និងពង្រីកផលប័ត្រអចលនទ្រព្យរបស់យើង”៕

ដោយៈ គង់ សូរិយា

ភ្នំពេញៈ មន្រ្តីជាន់ខ្ពស់ក្រសួងសាធារណការ  និងដឹកជញ្ជូនបានស្នើឱ្យទីភ្នាក់ងារអភិវឌ្ឍន៍បារាំង(AFD) ពិនិត្យលទ្ធភាពឡើងវិញលើការសិក្សាប្រព័ន្ធឡានដឹកជញ្ជូនប្រើផ្លូវដែក (Tramways) ក្នុងរាជធានីភ្នំពេញ ដើម្បីចូលរួមកាត់បន្ថយការកកស្ទះចរាចរណ៍ នៅក្នុងរាជធានីភ្នំពេញ។

ការលើកសំណើរនេះ ត្រូវបានធ្វើឡើងនៅក្នុងជំនួបពិភាក្សាការងារ កាលថ្ងៃទី០៣ ខែឧសភា ឆ្នាំ២០២២ រវាងលោកស៊ុន ចាន់ថុល រដ្ឋមន្ត្រីក្រសួងសាធារណការ  និងដឹកជញ្ជូន ជាមួយលោកJacques Pellet ឯកអគ្គរដ្ឋទូត បារាំងប្រចាំកម្ពុជា និងលោកស្រីOphelie Bourhis នាយកទីភ្នាក់ងារអភិវឌ្ឍន៍បារាំង(AFD) រួមទាំងអ្នកពាក់ព័ន្ធមួយចំនួនទៀត។

លោកស៊ុន ចាន់ថុល បានចាត់ទុកថា ការរីកចម្រើនយ៉ាងឆាប់រហ័សក្នុងវិស័យហេដ្ឋារចនាសម្ព័ន្ធផ្លូវថ្នល់របស់កម្ពុជា គឺបានមកពីការខិតខំប្រឹងប្រែងពីក្រសួងផ្ទាល់ ក្រោមការដឹកនាំដ៏ឆ្លាតវៃរបស់ រដ្ឋាភិបាលកម្ពុជា រួមទាំងដៃគូរអភិវឌ្ឍន៍នានា ក្នុងនោះមានបារាំងផងដែរ។

លោកទេសរដ្ឋមន្រ្តី ក៏បានជម្រាបទៅភាគីបារាំងដែរថា គម្រោងអភិ​វ ឌ្ឍន៍ហេដ្ឋារចនាសម្ព័ន្ធ សំខាន់របស់កម្ពុជារួមមាន ផែនការមេអភិវឌ្ឍន៍ហេដ្ឋារចនាសម្ព័ន្ធបណ្តាញផ្លូវថ្នល់ ផែនការមេដឹកជញ្ជូនផ្លូវទឹក ផែនការដឹកជញ្ជូនតាមផ្លូវដែក ផែនការមេភស្តុភារកម្ម និងការសិក្សាគម្រោងប្រព័ន្ធប្រតិបត្តិការរថភ្លើងស្វ័យប្រវត្តិ(AGT) ប្រព័ន្ធរថភ្លើងក្រោមដី(Bubway) និងការសិក្សាគម្រោងអភិវឌ្ឍន៍រថភ្លើង Monorailជាដើម។

លោកទេសរដ្ឋមន្រ្តី ស្នើឱ្យទីភ្នាក់ងារអភិវឌ្ឍន៍បារាំង ពិនិត្យលទ្ធភាពឡើងវិញលើការសិក្សាប្រព័ន្ធឡាន ដឹកជញ្ជូនប្រើផ្លូវដែក(Tramway) ក្នុងរាជធានីភ្នំពេញ ដើម្បីចូលរួមកាត់បន្ថយការកកស្ទះចរាចរណ៍ នៅក្នុងរាជធានីភ្នំពេញ និងជួយជំរុញឲ្យប្រព័ន្ធដឹកជញ្ជូនផ្លូវដែកកម្ពុជា កាន់តែប្រសើរឡើង៕

ដោយៈគង់ សូរិយា

ភ្នំពេញៈ ទេសរដ្ឋមន្ត្រី ស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានលើកឡើង ពីគំរោងដែលបាន និងកំពុងសាងសង់ និងគ្រោងសាងសង់ចំនួន៩នៅកម្ពុជា ដែលវាជាផ្នែកសំខាន់នៃការជំរុញកំណើនសេដ្ឋកិច្ចជាតិ។

លោកបានលើកឡើងពីគំរោងទាំងនោះ ក្នុងឱកាសជួបពិភាក្សាការងារជាមួយគណៈប្រតិភូ នៃក្រុមប្រឹក្សាធុរកិច្ចសហរដ្ឋអាមេរិក-អាស៊ាន (US-ABC) ដឹកនាំដោយលោក Jack Myint កាលពីថ្ងៃម្សិលម៉ិញនេះ។

ក្នុងជំនួបនេះ ក៏មានការចូលរួមពីគណៈប្រតិភូរបស់ក្រុមហ៊ុន Amazon ក្រុមហ៊ុន Chevron ក្រុមហ៊ុន ConocoPhillips ក្រុមហ៊ុន ExxonMobil ក្រុមហ៊ុន Ford ក្រុមហ៊ុន Meta ក្រុមហ៊ុន Visa ក្រុមហ៊ុន Pernod Ricard និងក្រុមហ៊ុន RMA Group ដោយមានការចូលរួមពីថ្នាក់ដឹកនាំ ក្រសួងមន្ត្រីជំនាញពាក់ព័ន្ធមកពីអង្គភាពក្រោមឱវាទក្រសួងផងដែរ។

ថ្លែងក្នុងជំនួបនោះ ទេសរដ្ឋមន្ត្រី បានធ្វើបច្ចុប្បន្នភាពអំពីវឌ្ឍនភាពនៃគម្រោងសាងសង់ហេដ្ឋា រចនាសម្ព័ន្ធ ដែលសម្រេចបានគម្រោងកំពុងអនុវត្តបន្ត និងគម្រោងសាងសង់នាពេលអនាគតដែលរួមមាន ទី១ គម្រោងពង្រីក និងលើកកម្ពស់គុណភាពផ្លូវជាតិលេខ៥ ពីពីរគន្លងទៅបួនគន្លងជាផ្នែកមួយនៃអាស៊ានហាយវ៉េ ដើម្បីតភ្ជាប់កម្ពុជាជាមួយបណ្ដាប្រទេសជិតខាង ទី២ គម្រោងស្ថាបនាផ្លូវល្បឿនលឿនពីភ្នំពេញ ទៅក្រុងព្រះសីហនុ ដែលគ្រោងនឹងបញ្ចប់នៅក្នុងឆ្នាំនេះ ការបញ្ចប់កិច្ចព្រមព្រៀងក្របខ័ណ្ឌ ទី៣ គម្រោងសាងសង់ផ្លូវល្បឿនលឿនពីភ្នំពេញ ទៅបាវិត ទី៤ គម្រោងកសាងចំណតផែកុងតឺន័រថ្មីដំណាក់កាលទី១ ដំណាក់កាលទី២ និងដំណាក់កាលទី៣ ដែលអនុញ្ញាតឱ្យនាវាធំៗលើពិភពលោកចូលចត និងដឹកជញ្ជូនទំនិញទៅកាន់បណ្តាប្រទេសនានាលើពិភពលោក ជាពិសេសសហរដ្ឋអាមេរិក។

ទី៥ លើកកម្ពស់គុណភាពផ្លូវជាតិលេខ៤ ក្រោមហិរញ្ញប្បទានពីធនា​គារពិភពលោក ដើម្បីសម្រួលដល់លំហូរពាណិជ្ជកម្ម ទី៦ គម្រោង សិក្សាអំពីការធ្វើទំនើបកម្មផ្លូវដែក ដែលមានស្រាប់ឱ្យទៅជាផ្លូវដែកល្បឿនលឿន តភ្ជាប់ពីភ្នំពេញទៅកាន់ ប្រទេសថៃ និងទៅកាន់កំពង់ផែសមុទ្រទឹកជ្រៅ ឬសិក្សាប្រព័ន្ធផ្លូវដែកថ្មី តាមអនុសាសន៍ណែនាំដ៏ខ្ពង់ ខ្ពស់របស់សម្តេចតេ​ជោនាយករដ្ឋមន្ត្រី គម្រោងសិក្សាសមិទ្ធិលទ្ធភាពនៃគម្រោងដឹកជញ្ជូន ទី៧ តាមផ្លូវទឹកត្រង់ពីទន្លេបាសាក់ រាជធានីភ្នំពេញឆ្ពោះទៅកាន់កំពង់ផែឆ្នេរសមុទ្រខេត្តកែប ដែលអាចឱ្យកម្ពុជាដឹកជញ្ជូនទំនិញទៅក្រៅប្រទេស និងជួយកាត់បន្ថយថ្លៃដើមទំនិញ និងចំណេញពេលវេលា។

ទី៨ គំរោងសាងសង់ផែកំពតមួយបន្ថែមទៀត គ្រោងនឹងបើកការដ្ឋាននៅថ្ងៃនេះ ដែលនឹងជួយបំពេញបន្ថែមដល់កំពង់ផែស្វយ័ត ក្រុងព្រះសីហនុ ទី៩ ការចុះហត្ថលេខា លើអនុស្សរណៈយោគយល់រវាងក្រុមហ៊ុន YCH Group និងក្រុមហ៊ុន WorldBridge Group ក្នុងការអភិវឌ្ឍមជ្ឈមណ្ឌលភស្ភុភារកម្មភ្នំពេញ (PPLC) ដើម្បីជួយធ្វើឱ្យប្រសើរឡើងដល់ប្រព័ន្ធភស្តុភារកម្ម និងការដឹកជញ្ជូនរបស់កម្ពុជា។

លោកទេសរដ្ឋមន្ត្រីស៊ុន ចាន់ថុល បានគូសបញ្ជាក់ពីសារសំខាន់នៃការដឹកជញ្ជូនតាមផ្លូវទឹក ជាពិសេសប្រព័ន្ធផ្លូវទឹករបស់កម្ពុជាដែលរួមមាន ទន្លេមេគង្គ ទន្លេសាប ទន្លេបាសាក់ ទន្លេស្រែពក ទន្លេសេសាន ដែលជាប្រភពធនធានធម្មជាតិ ប្រកបដោយសក្កានុពលរបស់កម្ពុជា ហើយរហូតមកទល់ពេលនេះ កម្ពុជានៅមិនទាន់ទាញយកអត្ថប្រយោជន៍ ឱ្យអស់លទ្ធភាពនៅឡើយ។

លោកក៏បានលើកឡើងអំពីសារសំខាន់ នៃការរៀបចំប្រព័ន្ធស្វ័យ ប្រវត្តិកម្មផ្តល់សេវាសាធារណៈ ដើម្បីគាំទ្រដល់ការផ្ដល់សេវាសាធារណៈឱ្យស្របទៅនឹងបច្ចុប្បន្នភាព នៃបដិវត្តន៍ឧស្សាហកម្ម ជំនាន់៤.០ ឬហៅថា៖ ឌីជីថលភាវូបនីយកម្ម (Digitalization) ប្រព័ន្ធត្រួតពិនិ ត្យលក្ខណៈបច្ចេកទេសយានជំនិះ ការប្រឡងយកបណ្ណបើកបរ និងប្រព័ន្ធគ្រប់គ្រងពិន័យអំពើល្មើសច្បាប់ ស្តីពីចរាចរណ៍ផ្លូវគោក និងការដកពិន្ទុលើបណ្ណបើកបរផងដែរ។

ទន្ទឹមជាមួយគ្នានោះ តំណាងក្រុមហ៊ុនធំៗរបស់អាមេរិក ចូលរួមបានបង្ហាញចំណាប់អារម្មណ៍របស់ខ្លួន លើបញ្ហាពាក់ព័ន្ធនឹងការលើកកម្ពស់សុវត្ថិភាពចរាចរណ៍ផ្លូវគោក ដែលផ្ដោតលើចំណុចសំខាន់បីរួមមាន ទី១) ការចែករំលែកចំណេះដឹង ពាក់ព័ន្ធនឹងហានិភ័យខ្ពស់ បង្កឡើងដោយគ្រោះថ្នាក់ចរាចរណ៍ និងយានយន្តធំៗបើកបរ នៅពេលយប់។

ទី២) ការធ្វើឱ្យប្រសើរឡើងហេដ្ឋារចនាសម្ព័ន្ធ សម្រាប់សុវត្តិភាពចរា​ចរណ៍ និងទី៣) សុវត្ថិភាព ចរាចរណ៍នៅតាមតំបន់ ដែលមាននិស្សិតសិស្សឆ្លងកាត់។

ដោយឡែកទាក់ទងនឹងការប្រើប្រាស់ យានយន្តអគ្គិសនី តំណាងក្រុមហ៊ុន បានស្នើឱ្យក្រសួងពិនិត្យលទ្ធភាព បង្កើតគោលនយោបាយ និងយុទ្ធសាស្ត្រថ្នាក់ជាតិ ដើម្បីកំណត់ស្តង់ដារលើការប្រើប្រាស់រថយន្ត ថាមពលអគ្គិសនី ក៏ដូចជាស្ថានីយបញ្ចូលថាមពលអគ្គិសនីផងដែរ។

បន្ថែមពីលើនេះ តំណាងស្ថានទូតសហរដ្ឋអាមេរិក បានសំដែងនូវការគាំទ្ររបស់របស់ខ្លួន ចំពោះកិច្ចខិតខំប្រឹងប្រែង របស់រាជរដ្ឋាភិបាលកម្ពុជា និងបានសន្យាជំរុញឱ្យក្រុមហ៊ុន ក៏ដូចជា វិនិយោគិនរបស់អាមេរិក មកដាក់ទុនវិនិយោគនៅកម្ពុជាឱ្យបានច្រើនថែមទៀត ដើម្បីផ្ទេរ ក៏ដូចជាចែករំលែកចំណេះដឹង និងបច្ចេក វិទ្យាថ្មីៗ សំដៅជំរុញការអភិវឌ្ឍសេដ្ឋកិច្ចកម្ពុជាឱ្យកាន់តែមានការរីកចម្រើនថែមទៀត៕

ភ្នំពេញ៖ មកដល់ហើយ កម្មវិធីប្រូម៉ូសិនថ្មីប្លែកពុំធ្លាប់មានពីមុនមក នោះគឺ Mega Sales ដែលអតិថិជនអាចមានឱកាសឈ្នះរង្វាន់ធំ ខុនដូអ័រគីដេចំនួន១រង្វាន់ ដែលមានទីតាំងនៅតាមបណ្តោយផ្លូវ២០០៤ និងរថយន្តដ៏ថ្មីស្រឡាងម៉ាក Toyota Raize ចំនួន២គ្រឿង ជាមួយនឹងរង្វាន់ផ្សេងទៀតជាច្រើនរួមមាន MacBook Pro​, iPhone 13 Pro Max, Electric Scooter, Smart Projector, Electric Scooter, Walking Pad, Machin Dishwasher, និងរង្វាន់ Robot Vacuum-Mop សរុបទាំងអស់៥០ រង្វាន់​។

កម្មវិធីប្រូម៉ូសិននេះនឹងចាប់ផ្តើមចាប់ពីថ្ងៃផ្សាយដំណឹងនេះ រហូតដល់បំណាច់ខែកក្កដា ឆ្នាំ២០២២ សម្រាប់គម្រោងអ័រគីដេ ដឹប៊ូតានិចស៊ីធី ខណ្ឌជ្រោយចង្វារ និងគម្រោងអ័រគីដេ ដឹពោធិ៍ចិនតុង ទល់មុខអាកាសយានដ្ឋានអន្តរជាតិភ្នំពេញ។

រាល់ការកក់ផ្ទះប្រភេទណាមួយដែលក្រុមហ៊ុនបានកំណត់ នោះអតិថិជននឹងទទួលបានសន្លឹកឆ្នោត ដើម្បីទទួលបានឱកាសក្នុងការឈ្នះរង្វាន់ដែលបានរៀបរាប់ខាងលើ។ កាលបរិច្ឆេទនៃការចាប់រង្វាន់នឹងធ្វើឡើងនៅខាងសីហាខាងមុខនេះហើយ។ ដូច្នេះកុំអោយឱកាសដ៏កម្រនេះកន្លងផុតទៅអោយសោះ ប្រញាប់ឡើង មកទទួលយកការផ្តល់ជូនប្រូម៉ូសិនពិសេសនេះ។

អតិថិជនអាចជ្រើសរើសប្រភេទផ្ទះណាមួយនៃគម្រោងទាំង២របស់ក្រុមហ៊ុនអ័រគីដេ ឌីវែឡុបម៉ិន ដែលរួមមានគេហដ្ឋានគ្រប់ប្រភេទដូចជា​ វីឡាទោល វីឡាភ្លោះ វីឡាកូនកាត់ ផ្ទះប្រកបអាជីវកម្ម (ហ្ស៊បហោសន៍) ដីឡូតិ៍ គ្រប់ទំហំ។ គម្រោងនីមួយៗរបស់អ័រគីដេសុទ្ធតែមានទីតាំងស្ថិតនៅតំបន់ ដែលមានសក្តានុពលខ្ពស់ ងាយស្រួលក្នុងការប្រកបអាជីវកម្ម រស់នៅ និងធ្វើដំណើរទៅមក​។​

សម្រាប់ព័ត៌មានលម្អិត អតិថិជនក៏អាចអញ្ជើញទៅទស្សនាផ្ទាល់ នៅការិយាល័យលក់ទាំង២ទីតាំងដែលនៅជិតលោកអ្នក។​

• គម្រោងអ័រគីដេ ដឹប៊ូតានិចស៊ីធី ទីតាំងនៅតាមបណ្តោយផ្លូវជាតិលេខ៦អា សង្កាត់ព្រែកលាប ខណ្ឌជ្រោយចង្វារ ធ្វើដំណើរត្រឹមតែជាង៧គ.មប៉ុណ្ណោះ ពីស្ពានជ្រោយចង្វារ រួចបត់ស្តាំតាមស្តុបអ័រគីដេ។
• គម្រោងអ័រគីដេ ដឹពោធិ៍ចិនតុង តាមបណ្តោយផ្លូវ វត្តតាំងកសាង (105k) ទល់មុខអាកាសយានដ្ឋានអន្តរជាតិភ្នំពេញ។​

ឬ ទំនាក់ទំនងមកកាន់លេខទូរស័ព្ទ 076 879 9999 – 085​ 388 388 – 095 277 277 – 098 733 333 និង ហ្វេសប៊ុកផេក​​ https://www.facebook.com/orkide.development​

ដោយ៖ សុធី

ប៉ៃលិន៖ វិស័យអចលនទ្រព្យនៅខេត្តប៉ៃលិនហាក់មានសភាពល្អប្រសើរ ក្នុងរយៈពេលចុងក្រោយនេះ ដោយអ្នកជំនាញវិស័យអចលនទ្រព្យ បានឱ្យដឹងថា ច្រកទ្វារព្រំដែនអន្តរជាតិបាន និងកំពុងបង្កើនសក្តានុពលវិនិយោគវិស័យដីធ្លីក្នុងខេត្តប៉ៃលិន។

លោក ខេន ឡូ នាយកប្រតិបត្តិក្រុមហ៊ុន Century 21 Imperial Realty បានឱ្យដឹងថា គម្រោងវិនិយោគអចលនទ្រព្យនៅតំបន់ព្រំដែន នៅក្នុងខេត្តប៉ៃលិន ក៏មិនមានអ្វីប្លែកច្រើនដែរ ដោយទើបតែចាប់ផ្តើមមានសណ្ឋាគារ និងកាស៊ីណូមួយចំនួនតូចតែប៉ុណ្ណោះ ហើយបើពិនិត្យមើលពីកម្រិតជីវភាពប្រជាជន គឺនៅមានកម្រិត ដោយភាគច្រើនពឹងផ្អែកតែទៅលើមុខរបរកសិកម្ម ចំណែកការវិនិយោគទ្រង់ទ្រាយតូចតាចតែប៉ុណ្ណោះ។

លោកបានឱ្យដឹងទៀតថា សព្វថ្ងៃនេះ ច្រកព្រំដែនអន្តរជាតិនេះបានរួមចំណែកដ៏សំខាន់ក្នុងការជំរុញកំណើនសេដ្ឋកិច្ចរបស់ខេត្ត តាមរយៈការទាក់ទាញលើការវិនិយោគផ្សេងៗ ដូចជា រមណីយដ្ឋាន ភោជនីយដ្ឋាន សណ្ឋាគារ និងជាពិសេសកាស៊ីណូ។

លោកគូសបញ្ជាក់ថា កាស៊ីណូនៅច្រកព្រំដែនអន្តរជាតិមួយនេះមានតិចតួច កន្លែង រួមទាំង កាស៊ីណូខ្នាតតូច និងខ្នាតធំ។ បន្ទាប់ពីធូរស្បើយពីជំងឺកូវីដមកទីផ្សារអចលនទ្រព្យហាក់មានសន្ទុះឡើងវីញ ហើយប្រជាពលរដ្ធកម្ពុជាក៏មិនសូវទិញដី ឬលំនៅឋានទុកលក់យកចំណេញដែរ គឺពួកគាត់ទិញតម្រូវការស្នាក់នៅតែម្តង។

លោកបានបន្តថា “ដីធ្លីនៅតំបន់មាត់ច្រកព្រំដែននេះនៅតែមានហាងឆេងខ្ពស់ជាងគេ បើធៀបនឹងទីផ្សារដីធ្លីនៅក្នុងក្រុងប៉ៃលិន ហើយភាពរីកចម្រើននៅច្រកព្រំដែនអន្តរជាតិក៏ធ្វើឱ្យតម្លៃដីនៅតំបន់នៅក្បែរៗនោះមានទីផ្សារល្អផងដែរ រួមទាំងដីសម្រាប់ធ្វើកសិកម្ម”។

ថ្លែងក្នុងសន្នសីទសារព័ត៌មានស្តីពីវឌ្ឍនភាពរបស់ខេត្តនាពេលថ្មីៗកន្លងទៅនេះ លោក ធូ ភា អភិរងខេត្តប៉ៃលិន បានមានប្រសាសន៍ថា ដើម្បីបង្កើនកំណើនសេដ្ឋកិច្ចក្នុងខេត្ត រដ្ឋបាលខេត្តបានពង្រីកវិសាលភាពនៃការដាំដុះ និងស្វែងរកទីផ្សារក្នុងស្រុក និងការនាំចេញទៅកាន់ប្រទេសថៃ ដោយបានធានាបាននូវតម្លៃលើទីផ្សារនឹងនរនារយៈពេលប៉ុន្មានឆ្នាំចុងក្រោយនេះ៕

ដោយ៖ វឌ្ឍនៈ

ភ្នំពេញ ៖ ការបណ្ដាក់ទុនវិនិយោគដំបូងៗ ជៀសមិនផុតតែងតែមានបញ្ហានិងកំហុសជាមិនខានឡើយ។ ការវិនិយោគលើវិស័យអចលនទ្រព្យក៏ត្រូវតែមានចំណុចត្រូវសិក្សារៀនសូត្រដែរ។ ថ្ងៃនេះ យើងនឹងដកស្រង់នូវកំហុសមួយចំនួន ដែលអ្នកវិនិយោគលើវិស័យអចលនទ្រព្យថ្មីថ្មោងគួរជៀសវាង។

យោងតាមសៀវភៅ “ការពិតហួសពីការពិតក្នុងអាជីវកម្ម” បានបង្ហាញពីកំហុស៧យ៉ាង ដែលវិនិយោគិនអចលនទ្រព្យថ្មីថ្មោងគួរជៀសវាង ក្នុងនោះរួមមាន៖

១. មិនបានកំណត់គោលដៅ ៖ កំហុសទូទៅរបស់វិនិយោគិនថ្មី គឺមិនបានកំណត់គោលដៅជាក់លាក់ ឬមានដែរ តែមិនផ្អែកលើគោលដៅខ្លួនឯង ជឿតាមពាក្យបញ្ចុះបញ្ចូលរបស់ភ្នាក់ងារអចលនទ្រព្យ។ សំនួរដែលអ្នកគួរសួរខ្លួនឯង មុននឹងទិញអចលនទ្រព្យណាមួយ ដូចជា តើអចលនទ្រព្យប្រភេទណាដែលអ្នកចង់ទិញ? តើលោកអ្នកកំពុងស្វែងរកផ្ទះសម្រាប់ម្នាក់ឯង ឬផ្ទះសម្រាប់គ្រួសារធំមែនទេ? តើអ្នកចង់ទិញអចលនទ្រព្យនៅទីណា ? តើវាស្ថិតនៅក្នុងកន្លែងសម្រាប់ដើរកម្សាន្តដែរទេ? តើអ្នកចង់ទិញអចលនទ្រព្យកែសម្រួលឬអចលនទ្រព្យថ្មី?

២. ការស្រាវជ្រាវ ៖ នៅពេលអ្នកទិញអ្វីមួយ មិនថាតូចឬធំ អ្នកប្រាកដជាធ្វើការប្រៀបធៀបគុណភាព និងតម្លៃ។ សម្រាប់អចលនទ្រព្យ ព័ត៌មានកាន់តែលម្អិតផ្ដល់ភាពងាយស្រួល និងការសម្រេចចិត្តដោយត្រឹមត្រូវមួយ ហើយអ្នកចាប់ផ្ដើមស្រាវជ្រាវ ដោយការពិនិត្យមើលទីផ្សារក្នុងស្រុក ការស្រាវជ្រាវទីតាំងថាទីតាំងនៅតំបន់នោះ មានសុវត្ថិភាពកម្រិតណា ហើយប្រសិនជាមានភ្លៀងខ្លាំងអាចធ្វើឱ្យផ្ទះលិចឬទេ។

ធ្វើការត្រួតពិនិត្យឱ្យស៊ីជម្រៅលើលក្ខខណ្ឌ នៃអចលនទ្រព្យនីមួយៗ ស្វែងយល់ពីតំបន់ដែលអ្នកចង់វិនិយោគ ថាតើនៅទីនោះមានអ្វីដែលអ្នកជួលទូទៅចង់បានឬទេ? ត្រូវពិនិត្យជាមួយអាជ្ញាធរដែនដី ថាតើដី ឬផ្ទះនោះមានម្ចាស់កម្មសិទ្ធិត្រឹមត្រូវ និងស្របតាមច្បាប់ដែរឬទេ? ត្រូវពិនិត្យមើលទាំងផ្នែកខាងក្នុង និងខាងក្រៅរបស់អចលនទ្រព្យនោះ ជៀសវាងទិញប៉ះចំអចលនទ្រព្យ ដែលត្រូវការថែទាំច្រើនដូចជាត្រូវការជួសជុលច្រើន នៅពេលត្រួតពិនិត្យអចលនទ្រព្យ ស្នាមប្រេះនៅលើជញ្ជាំង ថ្នាំពណ៌មិនជាប់ល្អ និងសញ្ញានៃសត្វល្អិតជាដើម។

៣.គិតឱ្យដូចអ្នកទិញឬអ្នកជួល ៖ នៅពេលអ្នកស្វែងរកអចលនទ្រព្យនៅកន្លែងណាមួយ អ្នកត្រូវមានការគិតឱ្យដូចអ្នកជួលឬអ្នកទិញ និងដឹងពីប្រភេទអតិថិជន ដែលអ្នកចង់ជួល ឬលក់ឱ្យនាពេលអនាគត ។ ឧទាហរណ៍ ប្រសិនជាអតិថិជនរបស់អ្នកជាក្រុមគ្រួសារ អ្នកប្រាកដជាត្រូវមើលអចលនទ្រព្យនៅក្នុងតំបន់ ដែលមានសាលារៀន មានសុវត្ថិភាព និងមានបន្ទប់គេងច្រើន។

៤.កុំវិនិយោគលើអ្វី ដែលខ្លួនអ្នកមិនយល់៖ សម្រាប់វិនិយោគិនថ្មីៗ ប្រហែលជាត្រូវការស្រាវជ្រាវច្រើន និងសិក្សាគន្លឹះពីអ្នកធ្លាប់មានបទពិសោធន៍ឱ្យបានច្រើន។ ចំណុចទាំងនេះ ចង់ប្រាប់អ្នកថាមុននឹងវិនិយោគអចលនទ្រព្យនៅកន្លែងណាមួយ អ្នកត្រូវយល់ឱ្យច្បាស់ខ្លួនឯងជាមុនសិនថា តំបន់នោះពិតជាមានសក្ដានុពលដូចគេនិយាយមែនឬទេ ហាមដាច់ខាតមិនទាន់យល់ច្បាស់ផង លឺតែគេថាល្អ ក៏សម្រេចចិត្តភ្លាម។

៥. មានប្រាក់បម្រុង ៖ អ្នកវិនិយោគថ្មីៗ គួរតែមានប្រាក់បម្រុង ដែលអាចគ្របដណ្ដប់ លើការចំណាយរយៈពេលខ្លីចន្លោះពី៦ខែទៅ៩ខែ មុនពេលអ្នកចាប់ផ្ដើមវិនិយោគឱ្យស៊ីជម្រៅជាងនេះ ព្រោះប្រសិនជាស្ថានការណ៍ប្រែប្រួល ដោយមិនបានរំពឹងទុកជាមុន នោះអ្នកនឹងមានប្រាក់បម្រុង ដែលអាចជួយទប់បានមួយគ្រា ហើយមិនបាច់បង្ខំចិត្តលក់អចលនទ្រព្យនោះដែរ។

៦. ការលក់ដោយភាពភ័យស្លន់ស្លោនាំឱ្យខាតបង់ ៖ ជាទូទៅ នៅពេលទីផ្សារធ្លាក់ចុះ ឬអ្នកចាប់ផ្ដើមឃើញថាការវិនិយោគរបស់ខ្លួនមានការបាត់បង់ប្រាក់ច្រើន អ្នកក៏មានអារម្មណ៍ចង់លក់ចេញភ្លាមៗ ព្រោះរូបភាពបែបនេះបើទុកទៀតវាអាចនឹងខាតច្រើនជាងនេះ។

៧. គណនាការចំណាយប្រចាំខែ ៖ អ្នកគួរតែយល់ច្បាស់អំពីការចំណាយប្រចាំរបស់អ្នក ព្រោះវានឹងជួយអ្នកកំណត់ថា តើអ្នកអាចចាប់ផ្ដើមវិនិយោគពីទឹកលុយប៉ុន្មាន? លើសពីនេះអ្នកក៏អាចដឹងថា តើចំណាយណា ដែលអ្នកអាចកាត់បន្ថយ ហើយបន្ថែមប្រាក់នោះទៅលើការវិនិយោគនាពេលអនាគត៕