ដោយ៖ សុផារី

ភ្នំពេញ៖ កំពង់ផែទឹកជ្រៅកម្រិតអន្តរជាតិដ៏ធំនៅខេត្តកំពត ដែលនឹងក្លាយជាសរសៃឈាមដ៏សំខាន់សម្រាប់ការដឹកជញ្ជូនផ្លូវសមុទ្ររបស់ប្រទេសកម្ពុជា បានបើកការដ្ឋានសាងសង់ជាផ្លូវការ ជាមួយទុនវិនិយោគ១.៥០០លានដុល្លារអាមេរិក។

ពិធីបើកការដ្ឋានសាងសង់កំពង់ផែសមុទ្រទឹកជ្រៅកម្រិតអន្តរជាតិ ត្រូវបានធ្វើឡើងនៅថ្ងៃទី០៥ ខែឧសភា ក្រោមអធិបតីលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីកម្ម និងសំណង់។

លោក ស៊ុន ចាន់ថុល លោកទេស រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ឱ្យដឹងថា ក្រុមបច្ចេកទេសរបស់ក្រុមហ៊ុនបានបញ្ជាក់ថា គម្រោងមួយនេះនឹងចំណាយរយៈពេល១៨ខែ ប៉ុន្តែក្រសួងបានឱ្យរយៈពេលចំនួន២ឆ្នាំ ស្មើនឹង២៤ខែ ដោយគ្រោងនឹងបញ្ចប់នៅក្នុងឆ្នាំ២០២៥។

លោកបានបន្តថា គម្រោងនេះ យ៉ាងយូរបំផុតត្រឹម នឹងរួចរាល់ហើយបើកឱ្យដំណើរការនៅក្នុងឆ្នាំ២០២៥។ នៅក្នុងជំហានទី១ កំពង់ផែនេះនឹងអាចទទួលយកទំនិញ ៣០០.០០០ TEU ហើយនៅក្នុងឆ្នាំ២០៣០ នឹងមានសមត្ថភាពទទួលទំនិញបានរហូត ៦០០.០០០ TEU ហើយអាចពង្រីកបន្តបន្ទាប់បាន។

ក្រុមហ៊ុនកំពត ឡូជីស្ទីក អេនផត ឯ.ក បានទទួលបានគោលការណ៍អនុញ្ញាតពីរាជរដ្ឋាភិបាល ដើម្បីអភិវឌ្ឍមជ្ឈមណ្ឌលភស្តុភារកម្ម និងកំពង់ផែពហុបំណង នៅលើដីឯកជនរបស់ក្រុមហ៊ុន ដែលមានទំហំសរុប៦០០ហិកតា គ្រោងប្រើទុនវិនិយោគសរុបប្រមាណ១៥០០លានដុល្លារអាមេរិក ដោយត្រូវអនុវត្តជា៣ដំណាក់កាល។

គម្រោងនេះស្ថិតនៅក្នុងតំបន់ដែលមានអំណោយផលក្នុងការតភ្ជាប់ប្រព័ន្ធដឹកជញ្ជូនផ្លូវទឹក ផ្លូវគោក និងផ្លូវដែក មកកាន់រាជធានីភ្នំពេញ និងបណ្តាខេត្តនានា តាមរយៈផ្លូវជាតិលេខ៣ ផ្លូវជាតិលេខ៤១ ផ្លូវជាតិលេខ៤ ផ្លូវល្បឿនលឿនភ្នំពេញ-ក្រុងព្រះសីហនុ ផ្លូវជាតិលេខ៤៨ និងតភ្ជាប់ផ្លូវដែកភាគខាងត្បូង ទៅភាគខាងជើងនៃប្រទេស។

គម្រោងវិនិយោតអភិវឌ្ឍន៍មជ្ឈមណ្ឌលភស្តុភារកម្ម និងកំពង់ផែពហុបំណងកំពត និងបង្កើតនូវកំពង់ផែទឹកជ្រៅពហុបំណងដ៏ធំមួយទៀតនៅកម្ពុជា និងទំនើបលំដាប់អន្តរជាតិ នៅក្នុងតំបន់អាស៊ាន ដែលអាចឱ្យនាវាចំណុះ១០០ ០០០តោនចូលចតបាន។

គម្រោងនេះក៏នឹងក្លាយជាតំបន់សេដ្ឋកិច្ចពិសេស ដែលមានតំបន់ពាណិជ្ជកម្មសេរី ទីលានកុងតឺន័រ មជ្ឈមណ្ឌលភស្តុភារកម្មឃ្លាំងស្តុកទំនិញគ្រប់ប្រភេទ ឃ្លាំងភណ្ឌាគារតយ រោងចក្រផលិតនិងចែកចាយ រោងចក្រចម្រាញ់ប្រេងឥន្ធនៈ និងមជ្ឈមណ្ឌលប្រេងឥន្ធនៈ តំបន់លំនៅឋាន និងចំណតនាវាដឹកអ្នកដំណើរទេសចរ។

គម្រោងអភិវឌ្ឍន៍មជ្ឈមណ្ឌលភស្តុភារកម្ម និងកំពង់ផែពហុបំណងកំពតនឹងបង្កើតការងារដោយផ្ទាល់ និងដោយប្រយោលជូនប្រជាពលរដ្ឋប្រមាណ១០០០០កន្លែង នៅពេលដាក់ឱ្យដំណើការ។ លើសពីនេះទៅទៀត គម្រោងនេះជួយឱ្យសម្រេចឱ្យបានជោគជ័យនូវ “ផែនការមេស្តីពីការតភ្ជាប់ប្រព័ន្ធដឹកជញ្ចូនពហុមធ្យោបាយ និងភស្តុភារកម្ម” និងគោលដៅអភិវឌ្ឍន៍តំបន់ឆ្នេរសមុទ្រនៃគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា។

ជាពិសេស ក៏នឹងដើរតួនាទីយ៉ាងសំខាន់ក្នុងការលើកដាក់ផ្ទេរទំនិញចេញ-ចូលទៅកាន់ទីផ្សារអន្តរជាតិ ដែលនឹងនាំមកនូវភាពងាយស្រួល និងប្រសិទ្ធភាពខ្ពស់ដល់ពាណិជ្ជករ និងអ្នកវិនិយោគ ក្នុងការនាំចេញផលិតផល កសិកម្ម ឧស្សាហកម្ម និងនេសាទ ទៅលក់នៅទីផ្សារក្នុងតំបន់ និងពិភពលោក ដូចជាចូលរួមចំណែកអភិវឌ្ឍវិស័យភស្តុភារកម្ម និងកំពង់ផែនៅកម្ពុជា សំដៅជួយលើកកម្ពស់ជីវភាពរស់នៅរបស់ប្រជាជននិង អភិវឌ្ឍសេដ្ឋកិច្ចជាតិ រួមចំណែកជំរុញសម្រេចគោលដៅ “ប្រែក្លាយកម្ពុជាទៅជាប្រទេសដែលមានចំណូល មធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ ២០៥០”៕

ដោយ៖ សុផារី

ភ្នំពេញ៖ ក្រុមហ៊ុនដឹកជញ្ជូនធំមួយរបស់ប្រទេសថៃ គឺ ក្រុមហ៊ុន CTI Logistic Co., Ltd បានបង្ហាញចំណាប់អារម្មណ៍ចង់មករកស៊ីលើវិស័យភ័ស្តុភារ និងការនាំចេញនាំចូល ក្នុងប្រទេសកម្ពុជា ខណៈប្រព័ន្ធហេដ្ឋរចនាសម្ព័ន្ធ និងបរិយាកាសវិនិយោគនៅកម្ពុជាមានអំណោយផលខ្ពស់សម្រាប់វិនិយោគិនបរទេស។

ក្នុងជំនួបសម្តែងការគួរសមជាមួយលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន នៅថ្ងៃទី០៤ ខែឧសភា ឆ្នាំ២០២២នេះ លោក Anuwat Inthraphuvasak ប្រធានផ្នែកពាណិជ្ជកម្ម ក្រុមហ៊ុនវិនិយោគិននៃប្រទេសថៃ CTI LOGISTICS បានជម្រាបថា ក្រុមហ៊ុនលោកចង់មកបណ្តាក់ទុនរកស៊ីលើវិស័យដឹកជញ្ជូននៅក្នុងប្រទេសកម្ពុជា។

លោកមានប្រសាសន៍ថា ក្រុមហ៊ុនលោកចង់សិក្សាស្វែងយល់ពីឱកាសសម្រាប់វិនិយោគលើវិស័យនាំចេញ និងនាំចូលទំនិញ ដោយចាត់ទុកថា អាជីវកម្មនេះជាផ្នែកមួយមានសក្តានុពលទីផ្សារនៅក្នុងប្រទេសកម្ពុជា។

លោករដ្ឋមន្ត្រី ខៀវ កាញារីទ្ធ បានស្វាគមន៍ចំពោះគម្រោងរបស់ក្រុមហ៊ុន CTI LOGISTICS ប្រទេសថៃដែលចង់មកបណ្តាក់ទុនរកស៊ីនៅកម្ពុជា ដោយលោកបានជម្រាបឱ្យខាងក្រុមហ៊ុនធ្វើទំនាក់ទំនង និងពិភាក្សាគ្នាបានលម្អិតជាមួយ ក្រុមប្រឹក្សាអភិវឌ្ឍន៍កម្ពុជា CDC សម្រាប់កិច្ចការងារលម្អិត។

លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការ ក្រុមប្រឹក្សាអភិវឌ្ឍន៍កម្ពុជា (CDC) បានលើកឡើងថា ប្រទេសកម្ពុជា គឺជាប្រទេសដែលមានកាលានុវត្តភាពច្រើនសម្រាប់ការវិនិយោគ ខណៈប្រទេសកម្ពុជាក៏ទើបនឹងបានដាក់ឱ្យប្រើប្រាស់ច្បាប់ស្ដីពីវិនិយោគថ្មី ដែលមានភាពទាក់ទាញនិងអំណោយផលផងសម្រាប់ការចូលមកបណ្តាក់ទុន៕

ដោយ៖ សុផារី

ភ្នំពេញ៖ គិតត្រឹមថ្ងៃទី០៥ ខែឧសភា ឆ្នាំ២០២២នេះ កម្ពុជានៅសល់ពេល៣៦៥ថ្ងៃ ឬ១ឆ្នាំគត់ ក្នុងដំណើរឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេម លើកទី៣២ឆ្នាំ២០២៣ ដែលរាជរដ្ឋាភិបាលសម្រេចកំណត់យកថ្ងៃទី០៥ ខែឧសភា ឆ្នាំ២០២៣ សម្រាប់រៀបចំពិធីបើកព្រឹត្តិការណ៍ជាប្រវត្តិសាស្ដ្រលើកដំបូងនៅកម្ពុជា។

លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) បានថ្លែងអំណរគុណចំពោះថ្នាក់ដឹកនាំ ជាពិសេសសម្ដេចតេជោ ហ៊ុន សែន នាយករដ្ឋមន្ដ្រីកម្ពុជា ដែលបានយកចិត្តទុកដាក់ខ្ពស់ ក្នុងដំណើរការត្រៀមធ្វើម្ចាស់ផ្ទះព្រឹត្តិការណ៍ប្រចាំតំបន់២ឆ្នាំម្ដងនេះ។

លោក វ៉ាត់ ចំរើន បានបញ្ជាក់ថា “ក្នុងនាមអគ្គលេខាធិការដ្ឋាននៃគណៈកម្មាធិការជាតិ CAMSOC សូមថ្លែងអំណរគុណយ៉ាងជ្រាលជ្រៅបំផុត ចំពោះការយកចិត្តទុកដាក់ដ៏ខ្ពង់ខ្ពស់របស់សម្ដេចតេជោនាយករដ្ឋមន្ដ្រី និងក្រោមការដឹកនាំផ្ទាល់របស់សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានគណៈកម្មាធិការជាតិ CAMSOC និងការអនុវត្ត តាមដាន ត្រួតពិនិត្យការងារជាប្រចាំក្រោមភាពជាអ្នកដឹកនាំរបស់ឯកឧត្ដមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍នៃគណៈកម្មាធិការជាតិ CAMSOC”។

លោកបន្តថា “អគ្គលេខាធិការដ្ឋាន CAMSOC មានក្ដីសោមនស្សរីករាយ ចំពោះពេលវេលាខិតជិតមកដល់នេះ ដ្បិតថ្ងៃនេះ គឺជាពេលវេលាសេសសល់១ឆ្នាំគត់ រហូតដល់ថ្ងៃទី០៥ ខែឧសភា ឆ្នាំ២០២៣ ដែលព្រឹត្តិការណ៍កំណត់ត្រាប្រវត្តិសាស្ដ្រដ៏ធំមួយប្រចាំកម្ពុជា នឹងលេចចេញជារូបរាង ហើយយើងខ្ញុំទាំងអស់គ្នា ប្ដេជ្ញាចិត្តក្នុងការរៀបចំព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នេះឱ្យទទួលបាននូវកិត្តិយស សេចក្ដីថ្លៃថ្នូរ និងទទួលបានជោគជ័យ ក្នុងការស្វែងរកឧត្តមភាពកីឡា ក្នុងការប្រកួតកីឡាអាស៊ីអាគ្នេយ៍ ប្រចាំឆ្នាំ២០២៣ នេះ”។

ព្រឹត្តិការណ៍ស៊ីហ្គេមលើកទី៣២ត្រូវបានរាជរដ្ឋាភិបាលកម្ពុជាសម្រេចប្រារព្ធពិធីបើកការប្រកួតផ្លូវការនៅថ្ងៃទី០៥ ខែឧសភា ឆ្នាំ២០២៣ និងបិទនៅថ្ងៃទី១៧ ខែឧសភា ឆ្នាំ២០២៣។ បន្ទាប់ពីចប់ព្រឹត្តិការណ៍ នេះ ប្រទេសកម្ពុជានឹងបន្ដរៀបចំការប្រកួតកីឡាអាស៊ានប៉ារ៉ាហ្គេម លើកទី១២ ចាប់ពីថ្ងៃទី០៣-០៩ ខែមិថុនា ឆ្នាំ២០២៣ដដែល៕

ដោយ៖ សុផារី

ភ្នំពេញ៖ បន្ទាប់ពីរដ្ឋាភិបាលថៃអនុញ្ញាតឱ្យបើកច្រកព្រំដែនជាមួយកម្ពុជាឡើងវិញ ចាប់ពីថ្ងៃទី០១ ខែឧសភា ឆ្នាំ២០២២នោះមក សមាគម-ក្រុមហ៊ុនឯកជនក្នុងវិស័យទេសចរណ៍មួយចំនួននៅកម្ពុជា ថៃ ក៏ដូចជាវៀតណាម បានសហការរៀបចំផែនការជំរុញចរន្តភ្ញៀវទេសចរឡើងវិញ ប៉ុន្តែបែបបទនៅតាមព្រំដែនខាងភាគីថៃហាក់មិនទាន់រលូននៅឡើយ។

សមាគមទេសចរណ៍អាស៊ីប៉ាស៊ីហ្វិក (PATA) ដឹកនាំដោយលោក ធួន ស៊ីណាន ប្រធានសមាគម បានធ្វើដំណើរឆ្លងកាត់ច្រកព្រំដែនអន្តរជាតិចាំយាម ខេត្តកោះកុង ទៅកាន់ខេត្តត្រាត ប្រទេសថៃ និងបន្តទៅដល់ទីក្រុងបាងកក ដើម្បីចូលរួមក្នុងកិច្ចប្រជុំផ្លាស់ប្ដូរទេសចរណ៍ និងពាណិជ្ជកម្មរវាងកម្ពុជា ថៃ និងវៀតណាម ចាប់ពីថ្ងៃទី៥-៦ ខែឧសភា ឆ្នាំ២០២២។

សមាគមបានសិក្សាឈ្វេងយល់អំពីការធ្វើដំណើរ ក៏ដូចជាការបំពេញបែបបទឯកសារនៅតាមច្រកព្រំដែនទាំងខាងភាគីកម្ពុជា និងខាងភាគីថៃ ខណៈប្រតិភូក្រុមហ៊ុននៅកម្ពុជាមួយចំនួនទៀតក៏បានធ្វើដំណើរតាមផ្លូវអាកាសពីភ្នំពេញទៅកាន់បាងកកផងដែរ។

លោក ធួន ស៊ីណាន បានថ្លែងនៅថ្ងៃទី៤ ខែមេសាឱ្យដឹងថា ការបើកច្រកព្រំដែនរវាងភាគីកម្ពុជា និងភាគីថៃនេះ គឺពិតជាល្អមែនទែនសម្រាប់វិស័យទេសចរណ៍ ដឹកជញ្ជូន ពាណិជ្ជកម្ម ក៏ដូចជាវិស័យផ្សេងទៀត ដែលជាចំណុចពិសេសសម្រាប់ការបន្តកិច្ចអភិវឌ្ឍសេដ្ចកិច្ចរវាងប្រទេសទាំងពីរ។

លោកបានបន្តថា តាមទិដ្ឋភាពជាក់ស្ដែងនៅពេលក្រុមការងារសមាគម PATA បានឆ្លងកាត់ច្រកព្រំដែនចាំយាម-ខ្លងយ៉ៃ កាលពីថ្ងៃទី៣ ខែឧសភាម្សិលមិញ ឃើញថាខាងភាគីកម្ពុជាគឺពិតជាមានការអនុវត្តកិច្ចការបំពេញបែបបទឯកសារបានយ៉ាងល្អតាមគោលនយោបាយរបស់រាជរដ្ឋាភិបាល ទាំងមន្ត្រីអន្តោប្រវេសន៍ មន្ត្រីច្រកព្រំដែន ក៏ដូចជាមន្ត្រីគយជាដើម។

លោកថា ចរន្តភ្ញៀវទេសចរតាមផ្លូវគោកនឹងកាន់តែមានច្រើនថែមទៀត ប្រសិនបើខាងភាគីថៃបន្ធូរបន្ថយលក្ខខណ្ឌ ឬបែបបទឯកសារមួយចំនួនបន្ថែមទៀត ដោយសារនៅថ្ងៃម្សិលមិញ ពេលដែលលោកឆ្លងកាត់ព្រំដែន ការតម្រូវលក្ខខណ្ឌពីខាងភាគីថៃគឺនៅមិនទាន់មានភាពច្បាស់លាស់នៅឡើយ ដូចជាលក្ខខណ្ឌនៃការបើកបររថយន្តផ្ទាល់ខ្លួនចូលទៅប្រទេសថៃ និងបញ្ហាដែលភាគីថៃស្នើឱ្យខាងភាគីកម្ពុជាធ្វើតេស្តរហ័សលើភ្ញៀវ និងអ្នកដំណើរជាដើម។

អ្នកស្រី វីយ៉ាដា ស្រុង (Viyada Srong) អនុប្រធានសភាទេសចរណ៍ខេត្តត្រាត បានបង្ហាញចំណាប់អារម្មណ៍រីករាយចំពោះការបើកច្រកព្រំដែនរវាងកម្ពុជានិងថៃនេះ។ អ្នកស្រីមានសុទិដ្ឋិនិយមថា វិស័យទេសចរណ៍រវាងកម្ពុជានិងថៃ ពិសេសរវាងកម្ពុជានិងខេត្តត្រាតនឹងងើបឡើងវិញ បន្ទាប់ពីការបើកច្រកព្រំដែនកម្ពុជា-ថៃនេះ ខណៈវិស័យទេសចរណ៍នៅខេត្តត្រាតក៏បានត្រៀមខ្លួនជាបណ្ដើរៗបានច្រើនហើយដែរ។

អនុប្រធានសភាទេសចរណ៍ខេត្តត្រាតរូបនេះបានបញ្ជាក់ទៀតថា តាមច្រកព្រំដែនចាំយាម-ខ្លងយ៉ៃនៅទាន់មានចរន្តភ្ញៀវទេសចរចេញចូលច្រើននៅឡើយទេ ប៉ុន្តែទោះជាយ៉ាងណាការកក់សណ្ឋាគារ រីស៊ត គឺចាប់ផ្ដើមមានខ្លះៗហើយ។

យ៉ាងណាមិញ លោក ធួន ស៊ីណាន ក្នុងនាមតំណាងភាគីកម្ពុជា និងលោកស្រី វីយ៉ាដា ក្នុងនាមតំណាងភាគីថៃ ព្រមទាំងលោក ង្វៀន ហុងហ៊ីវ (Nguyen Hong Hieu) តំណាងភាគីវៀតណាម នឹងចូលរួមដឹកនាំក្នុងកិច្ចប្រជុំផ្លាស់ប្ដូរផ្គូរផ្គងដៃគូក្រុមហ៊ុនទីភ្នាក់ងារទេសចរណ៍ និងផ្លាស់ប្ដូរពាណិជ្ជកម្មរវាងកម្ពុជា ថៃ និងវៀតណាម នាទីក្រុងបាងកក រយៈពេល២ថ្ងៃបន្តទៀត ដើម្បីពិគ្រោះពិភាក្សាលម្អិតអំពីដំណើរការជំរុញចរន្តភ្ញៀវទេសចរទៅមកជាលក្ខណៈទ្វេភាគី ឬត្រីភាគី នាពេលខាងមុខឆាប់ៗនេះ៕

ដោយៈ វិវឌ្ឍន៍

ភ្នំពេញៈ ថ្នាក់ដឹកនាំក្រុមហ៊ុនFORVALរបស់ជប៉ុន គ្រោងនឹងពង្រីកសកម្មភាពអាជីវកម្មនៅកម្ពុជា និងជួយដល់វិស័យSMEsផងដែរ។

ក្នុងជំនួបជាមួយ លោកប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មដឹកនាំ ដោយលោក Katsuhiro SHINOHARA អតីតឯកអគ្គរាជទូតជប៉ុនប្រចាំកម្ពុជា និងជាប្រធានមូលនិធិគាំទ្រ ការអប់រំនៅកម្ពុជា លោកនាយកប្រតិបត្តិរបស់ក្រុមហ៊ុនFORVAL ជប៉ុន ក៏បានជម្រាបពីគោលបំណងក្នុងការជួយគាំទ្រ និងរួមចំណែកអភិវឌ្ឍសហគ្រាសធុនតូច និងមធ្យម នៅកម្ពុជា ព្រមទាំងប្តេជ្ញាពង្រីកសកម្មភាពធុរកិច្ចនៅកម្ពុជា ក៏ដូចជាកៀគរវិនិយោគិនជប៉ុន មកកម្ពុជាឱ្យកាន់តែច្រើន ដើម្បីរួមចំណែកដល់ការអភិវឌ្ឍ និងលើកកម្ពស់ជីវភាពប្រជាពលរដ្ឋកម្ពុជាផងដែរ។

ជាមួយគ្នានេះ ភាគីទាំងពីរបានសម្តែងសារជាថ្មី នូវការប្តេជ្ញាចិត្តបន្តកិច្ចសហការសម្របសម្រួល និងជំរុញសកម្មភាពធុរកិច្ច និងវិនិយោគ ជាពិសេសលើវិស័យ ដែលមានសក្តានុពលនានានៅកម្ពុជា ដើម្បីជំរុញកំណើនសេដ្ឋកិច្ច-ពាណិជ្ជកម្មរវាងប្រទេសទាំងពីរ បន្ថែមទៀត។

មានប្រសាសន៍នាឱកាសនោះ លោកប៉ាន សូរស័ក្តិ បានសម្តែងនូវសេចក្តីសោមនស្សរីករាយ និងការស្វាគមន៍យ៉ាងកក់ក្តៅចំពោះ លោកអតីតឯកអគ្គរាជទូត និងគណៈប្រតិភូក្រុមហ៊ុន FORVAL ជប៉ុន ព្រមទាំងថ្លែងកោតសរសើរ និងវាយតម្លៃខ្ពស់ លើទំនាក់ទំនងដ៏ល្អរវាងប្រទេសទាំងពីរ ជាពិសេសកិច្ចសហប្រតិបត្តិការ ក្នុងវិស័យសេដ្ឋកិច្ច-ពាណិជ្ជកម្ម នាពេលកន្លងមក។

លោករដ្ឋមន្រ្តី បានគូសបញ្ជាក់អំពីកិច្ចខិតខំ ប្រឹងប្រែងរបស់ក្រសួងពាណិជ្ជកម្ម ក្នុងការធ្វើឱ្យប្រសើរឡើង នូវបរិយាកាសធុរកិច្ចនៅកម្ពុជា។លោក​បានស្នើឱ្យអតីតឯកអគ្គរាជទូត ក៏ដូចជាវិស័យឯកជនជប៉ុនជួយគាំទ្រ ឱ្យមានការបង្កើតកិច្ចព្រមព្រៀងពាណិជ្ជកម្ម សេរីទ្វេភាគីកម្ពុជា-ជប៉ុន ដូច​ដែលបានលើកឡើងនៅក្នុងជំនួបរវាង សម្ដេចអគ្គមហាសេនាបតីតេជោ ហ៊ុន សែននាយករដ្ឋមន្រ្តីនៃកម្ពុជា ជាមួយលោកFUMIO KIshida នាយករដ្ឋមន្រ្តីជប៉ុន ដើម្បីផលប្រយោជន៍ប្រជាជន និងវិស័យធុរកិច្ចនៃប្រទេសទាំងពីរ៕