ដោយ៖ លាងហួរ

រុស្ស៊ី៖ ប្រទេសរុស្ស៊ីកំពុងបង្កើនគុណភាពនៃការនាំចេញប្រេងឆៅ Urals ដ៏ល្បីរបស់ខ្លួន ដោយលក់បញ្ចុះតម្លៃយ៉ាងច្រើន ដើម្បីទាក់ទាញអ្នកទិញប្រេងនៅអាស៊ី។

ការនាំចេញប្រេងរបស់រុស្ស៊ីត្រូវបានមើលឃើញថា នៅបន្តមានភាពរឹងមាំ បើទោះបីជាមានការដាក់ទណ្ឌកម្មពីលោកខាងលិចក៏ដោយ ខណៈដែលប្រទេសចិន និងឥណ្ឌាបង្កើនការទិញប្រេងពីរុស្ស៊ី។

មន្ត្រីសហរដ្ឋអាមេរិកបាននិយាយថា ទីក្រុងម៉ូស្គូឥឡូវនេះរកប្រាក់បានច្រើនជាងមុនសង្គ្រាមនៅអ៊ុយក្រែនទៅទៀត ដោយសារតម្លៃប្រេងនិងឧស្ម័នកើនឡើង។

បើយោងតាមទិន្នន័យពីសារពត៌មាន Reuters ប្រទេសរុស្ស៊ីបានលាយបញ្ចូលគ្នានៃប្រេងUrals ដើម្បីធ្វើឱ្យប្រេងកាន់តែស្រាលក្នុងរយៈពេល៣ខែចុងក្រោយនេះ បើទោះបីជាមានការហាមឃាត់លើការនាំចូលបច្ចេកវិទ្យាសម្រាប់ឧស្សាហកម្មប្រេង និងឧស្ម័នពីលោកខាងលិចក៏ដោយ។

ក្រុមហ៊ុនបំពង់បង្ហូរប្រេងរុស្ស៊ី Transneft ដែលដឹកជញ្ជូនប្រេងឆៅភាគច្រើន តាមរយៈប្រព័ន្ធបង្ហូររបស់ខ្លួន និងទទួលខុសត្រូវចំពោះការត្រួតពិនិត្យគុណភាព មិនបានឆ្លើយតបទៅនឹងសំណើររបស់សារព័ត៌មាន Reuters សម្រាប់ការសុំធ្វើអត្ថាធិប្បាយទេ។

ប្រទេសចិន និងឥណ្ឌាបានក្លាយជាអ្នកទិញប្រេងរុស្ស៊ីដ៏ធំ ក្នុងរយៈពេលពីរខែចុងក្រោយនេះ ខណៈដែលទីក្រុងម៉ូស្គូស្វែងរកទីផ្សារផ្សេងទៀត ដើម្បីលក់ប្រេងរបស់ខ្លួន ខណៈដែលការនាំចេញប្រេងទៅកាន់សហភាពអឺរ៉ុបបានធ្លាក់ចុះ មុនពេលសភាពអឺរ៉ុបហាមឃាត់ការនាំចូលប្រេងរុស្ស៊ីទាំងស្រុងនៅចុងឆ្នាំ២០២២នេះ៕

សុខុម

ញូវដេលី: មិនយូរទេ មហាយក្សឥណ្ឌា ដែលមានប្រជាជនដល់ទៅ១.៣៨៨លាននាក់គិតត្រឹមឆ្នាំ២០២២ បើយោងតាមគេហទំព័រ indiaonlinepages.com នឹងក្លាយជាប្រទេសមួយ ដែលមានទំហំសេដ្ឋកិច្ចរហូតដល់ទៅ៣០ទ្រីលានដុល្លារ ធៀបនឹងទំហំសេដ្ឋកិច្ច៣ទ្រីលានដុល្លារ នាពេលបច្ចុប្បន្ន។

នេះជាអ្វីដែលលោក Piyush Goyal រដ្ឋមន្ត្រីក្រសួងពាណិជ្ជកម្ម និងឧស្សាហកម្មឥណ្ឌា បានលើកឡើង ដោយទំនុកចិត្តខ្ពស់ និងសុទិដ្ឋិនិយម។ នេះបើយោងតាមសារព័ត៌មានថៃ The Nation ចុះផ្សាយនៅថ្ងៃអង្គារ ទី២៨ ខែមិថុនានេះ។

លោក Piyush Goyal បានគូសបញ្ជាក់ក្នុងពិព័រណ៍វាយនភណ្ឌក្នុងក្រុង Coimbatore នៃរដ្ឋភាគខាងត្បូង Tamil Nadu កាលពីថ្ងៃទី២៥ ខែមិថុនាថា ដើម្បីសម្រេចមហិច្ឆតានេះ រដ្ឋាភិបាលឥណ្ឌា បាននិងកំពុង “ខ្នះខ្នែងដោះស្រាយរាល់បញ្ហា រួមទាំង របាំងពន្ធ បញ្ហាពន្ធដារ និងការប្រកួតប្រជែងជាសកលផងដែរ”។

រដ្ឋមន្ត្រីរូបនេះបានលើកឡើងថា ប្រទេសឥណ្ឌា កំពុងធ្វើការយ៉ាងសកម្មជាមួយបណ្តាប្រទេសផ្សេងៗ ដើម្បីសម្រេចកិច្ចព្រមព្រៀងពាណិជ្ជកម្មសេរី (FTA) ឱ្យចប់សព្វគ្រប់ ដែលនឹងផ្ដល់ឱកាសឱ្យវិស័យវាយនភណ្ឌឥណ្ឌា ចូលទៅកាន់ទីផ្សារពិភពលោក ដោយមិនអស់ពន្ធ។

លោកបានផ្តល់អនុសាសន៍ឱ្យគ្រប់ភាគីពាក់ព័ន្ធទាំងអស់ នៅក្នុងខ្សែសង្វាក់តម្លៃ (Value Chain) ខិតខំប្រឹងប្រែងឱ្យខ្លាំង រួបរួមគ្នា ធ្វើយ៉ាងណាជួយជ្រោមជ្រែងមហាយក្សឥណ្ឌា ឱ្យក្លាយជាប្រទេសផលិតកម្មដ៏ធំបំផុតក្នុងពិភពលោក។

ខ្សែសង្វាក់តម្លៃ ឬ Value Chain គឺជាដំណើការភ្ជាប់ទំនាក់ទំនងគ្នារវាងតួអង្គ (ដូចជាអ្នកផលិត អ្នកផ្តល់សេវាកម្ម អ្នកផ្គត់ផ្គង និងអ្នកលក់ជាដើម) ដើម្បីស្វែងរកការគាំទ្រគ្នាទៅវិញទៅមក ដែលនាំមកនូវការបង្កើនប្រសិទ្ធភាពខ្ពស់សម្រាប់ផលិតផលមួយ និងច្រើន។

លោក Piyush Goyal បានបន្ថែមទៀតថា ចាប់ពីកសិដ្ឋានរហូតដល់ក្រណាត់ ចាប់ពីក្រណាត់រហូតដល់ផលិតផលសម្រេច ចាប់ពីផលិតផលសម្រេចរហូតដល់ផលិតផលម៉ូត ហើយចុងក្រោយរហូតដល់ផលិតផលបរទេស ឥណ្ឌា មានចំណែកយ៉ាងធំធេង នៅក្នុងខ្សែសង្វាក់តម្លៃទាំងមូល។

រដ្ឋមន្ត្រីរូបនេះបានគូសបញ្ជាក់ថា ឥណ្ឌា សម្រេចបានកិច្ចព្រមព្រៀងពាណិជ្ជកម្មសេរី (FTA) ចប់សព្វគ្រប់ចំនួន២ជាមួយប្រទេសអូស្ត្រាលី និងប្រទេសអារ៉ាប់រួមអេមីរ៉ាត ហើយកំពុងចរចាជាមួយអង់គ្លេស កាណាដា និងសហភាពអឺរ៉ុប។

លោកបានបន្ថែមថា កិច្ចព្រមព្រៀងពាណិជ្ជកម្មសេរីទាំងនេះនឹងផ្តល់អត្ថប្រយោជន៍ច្រើនសន្ធឹកសន្ធាប់ដល់មជ្ឈមណ្ឌលអាជីវកម្មវាយនភណ្ឌដូចជាក្រុង Coimbatore និងក្រុង Tirupur នៃរដ្ឋ Tamil Nadu៕

ដោយសុខុម

ព្រុចសែល: លោក Jens Stoltenberg អគ្គលេខាធិការអង្គការ NATO បានប្រកាសកាលពីថ្ងៃច័ន្ទ ទី២៧ ខែមិថុនា ថា អង្គការបក្សសម្ព័ន្ធយោធាមួយនេះនឹងបង្កើនចំនួនកងទ័ពរហូតដល់៣០០.០០០នាក់ឱ្យប្រុងជើងការខ្ពស់ជាមួយបណ្ដាសម្ព័ន្ធមិត្តដើម្បីអនុវត្តយុទ្ធសាស្រ្តថ្មី។

លោក Jens Stoltenberg បានចាត់ទុកក្រុងមូស្គូ ថាជាការគំរាមកំហែងដោយផ្ទាល់ដល់សន្តិសុខរបស់សហភាពអឺរ៉ុប ក៏ដូចជាពិភពលោកទាំងមូល ក្រោយសង្គ្រាមឈ្លានពានអ៊ុយក្រែន អូសបន្លាយអស់រយៈពេល៤ខែមកនេះ ដែលគ្មានសញ្ញាថានឹងបញ្ចប់ពេលណា។

អគ្គលេខាធិការអង្គការ NATO រូបនេះបានថ្លែងក្នុងក្រុងព្រុចសែល ប្រទេសបែលហ្ស៊ិក មុនកិច្ចប្រជុំកំពូលរបស់អង្គការ NATO នៅថ្ងៃទី២៨-២៩ ខែមិថុនា ក្នុងក្រុងម៉ាឌ្រីត (Madrid) ប្រទេសអេស្ប៉ាញ ថា “រុស្ស៊ី បានដើរចេញពីភាពជាដៃគូ និងកិច្ចចរចាដែល NATO បានព្យាយាមបង្កើតឡើងជាមួយរុស្ស៊ី អស់រយៈពេលជាច្រើនឆ្នាំមកហើយ”។

លោកបានថ្លែងទៅកាន់ក្រុមអ្នកយកព័ត៌មានថា “ពួកគេបានជ្រើសរើសការប្រឈមមុខដាក់គ្នាជំនួសឱ្យការចរចា។ យើងសោកស្តាយចំពោះរឿងនោះ ប៉ុន្តែពិតណាស់ថា យើងត្រូវតែឆ្លើយតបទៅតាមស្ថានការណ៍ពិតជាក់ស្ដែងនោះ”។

លោក Jens Stoltenberg និយាយថា អង្គការ NATO នឹងបញ្ជាឱ្យកងកម្លាំងប្រតិកម្មរហ័សដែលមានស្រាប់របស់ខ្លួន ពោលគឺកងកម្លាំងឆ្លើយតបរបស់អង្គការ NATO ដែលមានទ័ពប្រមាណ៤០.០០០នាក់ត្រៀមប្រុងជើងការខ្ពស់ ហើយនឹងបង្កើនចំនួនទ័ពសរុបនេះឱ្យលើសពី៣០០.០០០នាក់”៕ Reuters៕

ដោយ សុខុម

អាល្លឺម៉ង់: តាមដឹង ប្រទេសអ៊ីរ៉ង់ និងប្រទេសវេណេហ្ស៊ុយអេឡា ត្រូវបានដាក់ទណ្ឌកម្មដោយលោកខាងលិច មកទល់នឹងសព្វថ្ងៃ។ ប៉ុន្តែដោយសារអស់ជម្រើស ប្រទេសបារាំង ចង់ឱ្យប្រទេសទាំងពីរនេះវិលត្រលប់មកកាន់ទីផ្សារប្រេងវិញដើម្បីជំនួសរុស្ស៊ី។

មន្ត្រីមួយរូបនៅវិមានប្រធានាធិបតីបារាំង បានទម្លាយឱ្យដឹងកាលពីថ្ងៃច័ន្ទ ទី២៧ ខែមិថុនា ថា ប្រទេសបារាំង ចង់ឱ្យប្រទេសដែលរងទណ្ឌកម្មទាំងពីរខាងលើត្រលប់មកកាន់ទីផ្សារប្រេងវិញ ដើម្បីកាត់បន្ថយការពឹងផ្អែកលើប្រេងរុស្ស៊ី។

ដំណឹងនេះកើតមានឡើង ស្របពេលលោកខាងលិច សហភាពអឺរ៉ុប និងបណ្ដាសម្ព័ន្ធមិត្តបង្កើនការដាក់ទណ្ឌកម្មលើរុស្ស៊ី ក្នុងគោលបំណងផ្ដាច់ដង្ហើមសេដ្ឋកិច្ចរបស់រុស្ស៊ី ជាការដាក់ទណ្ឌកម្មចំពោះទង្វើរបស់ខ្លួននៅក្នុងការបញ្ឆេះសង្គ្រាមចូលឈ្លានពានប្រទេសអ៊ុយក្រែន។

ប្រទេសបារាំង ក៏ចង់ឱ្យមានយន្តការគ្រោងទុកមួយដើម្បីទប់តម្លៃប្រេងតាមដែលអាចធ្វើទៅបានផងដែរ ធ្វើយ៉ាងណាកុំឱ្យប្រេងហក់ឡើងថ្លៃខ្លាំងពេក។

មន្ត្រីបារាំង ដដែលក៏បានលើកឡើងដែរថា ប្រធានាធិបតីអ៊ុយក្រែន លោក Volodymyr Zelenskiy បានប្រាប់មេដឹកនាំនៃក្រុមប្រទេស G7 កាលពីព្រឹកថ្ងៃច័ន្ទ ទី២៧ ខែមិថុនា ថា ស្ថានភាពមិនអំណោយផលឡើយនៅក្នុងការចរចាជាមួយរុស្ស៊ី ហើយចង់រក្សាជំហរឱ្យរឹងមាំសិន មុននឹងចាប់ផ្តើមការចរចាណាមួយ៕ Reuters៕

ដោយ៖ វឌ្ឍនៈ

ភ្នំពេញ ៖ គម្រោងវិនិយោគក្នុងឆ្នាំ២០២២នេះ ត្រូវបានមើលឃើញថាមានសកម្មភាពជាងរយៈពេល២ឆ្នាំកន្លងមក ទាំងការវិនិយោគនៅក្នុងនិងក្រៅតំបន់សេដ្ឋកិច្ចពិសេស។

យោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា ត្រីមាសទី១ឆ្នាំនេះ កម្ពុជាអនុម័តគម្រោងវិនិយោគឯកជន៤៧គម្រោង កើនឡើង៣ គម្រោងធៀបនឹងត្រីមាសទី១ឆ្នាំមុន។

របាយការណ៍ដដែលឱ្យដឹងថា គម្រោងវិនិយោគ ដែលកម្ពុជាអនុម័តក្នុងត្រីមាសទី១ឆ្នាំនេះ មានទឹកប្រាក់២,៥២ពាន់លានដុល្លារអាមេរិក កើនឡើងប្រមាណ១៤,២ភាគរយ ធៀបនឹងរយៈពេលដូចគ្នាកាលពីឆ្នាំមុន។

ក្នុងគម្រោងវិនិយោគទាំង៤៧នេះ មាននៅក្រៅតំបន់សេដ្ឋកិច្ចពិសេសចំនួន៤៣គម្រោង បានកើនឡើង១៥គម្រោង ឬប្រមាណ៥៣,៦ភាគរយ និងទុនវិនិយោគសរុបចំនួន២,២១៩ពាន់លានដុល្លារអាមេរិក កើនឡើង២១០,៣ភាគរយ ធៀបនឹងរយៈពេលដូចគ្នា កាលពីឆ្នាំមុននេះ។

ការវិនិយោគក្រៅតំបន់សេដ្ឋកិច្ចពិសេស គាំទ្រដោយគម្រោងវិនិយោគលើមណ្ឌលភស្តុភារកម្ម និងកំពង់ផែពហុបំណង វារីអគ្គិសនី រោងចក្រផលិតសំបកកង់យានយន្ត សណ្ឋាគារ រោងចក្រស៊ីម៉ង់ត៍ កសិដ្ឋានដាំដំណាំចេកនិងដំណាំហូបផ្លែផ្សេងៗទៀត រោងចក្រដំឡើងរថយន្ត និងមន្ទីរពហុព្យាបាល។

លោក វ៉ា វីរៈ អ្នកជំនាញអចលនទ្រព្យអន្តរជាតិ បានលើកឡើងផងដែរថា ក្នុងឆ្នាំ២០២២នេះ កម្ពុជាទទួលបានគម្រោងវិនិយោគនានាឡើងវិញ បន្ទាប់ពីមានបញ្ហារយៈពេលពេល២ឆ្នាំកន្លងមកនេះ ហើយរំហូរទុនវិនិយោគពីបរទេស ក៏ឃើញថា ចាប់ផ្ដើមមានកំណើនឡើងវិញផងដែរ។

តាមរយៈការអនុម័តគម្រោងវិនិយោគថ្មីៗនិងរំហូរទុនវិនិយោគ នៅដើមឆ្នាំ២០២២នេះ កម្ពុជារំពឹងថា ចុងឆ្នាំនេះ និងដើមឆ្នាំក្រោយ ការវិនិយោគក្នុងប្រទេសនឹងទទួលបានកំណើនឡើងវិញ ទាំងគម្រោងវិនិយោគ និងរំហូរទុនវិនិយោគ៕

ដោយ៖ សហការី

ឡាវ៖ រដ្ឋាភិបាលឡាវកំពុងផ្តោតលើការអនុវត្តគម្រោងថាមពលវារីអគ្គិសនីនៅទូទាំងប្រទេស ដើម្បីបង្កើនការនាំចេញអគ្គិសនីរបស់ខ្លួនទៅកាន់ប្រទេសក្នុងតំបន់ រួមទាំង ប្រទេសវៀតណាម និងកម្ពុជាផងដែរ។

ក្នុងនោះ ឡាវគ្រោងនាំចេញមកប្រទេសកម្ពុជាឱ្យបាន៦.០០០មេហ្កា​​​វ៉ាត់ ក្នុងឆ្នាំ២០៣០ ខាងមុខនេះ។ នេះបើតាមការចុះផ្សាយរបស់សារពត៌មានវៀតណាម Vietnam​plus កាលពីចុងសប្តាហ៍កន្លងមក។

បច្ចុប្បន្ននេះ ឡាវបាននាំចេញថាមពលអគ្គិសនីរបស់ខ្លួនមកប្រទេសកម្ពុជា​ ដែលមានសមត្ថភាពប្រមាណចំនួន៤៤៥ មេហ្កាវ៉ាត់ តែប៉ុណ្ណោះ។

ប្រទេសឡាវក៏បានចុះកិច្ចសន្យាជាមួយក្រុមហ៊ុន Vietnam Electricity (EVN) ដែលគ្របដណ្តប់លើគម្រោងចំនួន២៥ ដែលមានថាមពលសរុប២.១៨០MW។

ជាមួយនឹង​សមត្ថភាព​បង្គួរ១.៦០៨MWនៅសល់ ​គ្រោង​នឹង​ដាក់ឱ្យ​ដំណើរការ និង​ផ្គត់ផ្គង់​អគ្គិសនី​សម្រាប់​ប្រទេស​វៀតណាម​ចាប់ពី​ឆ្នាំ២០២២-២០២៥។

ប្រទេសទាំងពីរក៏បានឈានដល់អនុស្សរណៈនៃការយោគយល់គ្នាលើគម្រោងផ្សេងទៀត ដោយជួយជំរុញទិន្នផលអគ្គិសនីសរុប ដែលរំពឹងថា នឹងនាំចេញពីប្រទេសឡាវទៅកាន់ប្រទេសវៀតណាម ដល់ ៨.១៤៨មេហ្គាវ៉ាត់ នៅឆ្នាំ២០៣០។

ក្រៅពីប្រទេសវៀតណាម ឡាវក៏បាននាំចេញថាមពលអគ្គិសនីមកកម្ពុជាផងដែរ ដែលមានបរិមាណ៤៤៥មេហ្គាវ៉ាត់ ដែលគ្រោងនឹងកើនឡើងដល់ ៦.០០០មេហ្គាវ៉ាត់នៅឆ្នាំ២០៣០។

ប្រទេសចិន ថៃ និងសិង្ហបុរី ក៏នាំចូលថាមពលអគ្គិសនីពីឡាវដូចកម្ពុជា និងវៀតណាមផងដែរ៕