ដោយៈគង់ សូរិយា

        ភ្នំពេញៈ អភិបាលនៃគណអភិបាលខេត្តព្រះសីហនុ លោកគួច ចំរើនបានលើកឡើងពីសក្តានុពលធំៗចំនួន៤របស់ខេត្ត ដែលកំពុងក្លាយជាកំលាំងចលករដ៏សំខាន់ក្នុងការអភិវឌ្ឍសេដ្ឋកិច្ចជាតិ។

លោកបានលើកឡើងនូវសមិទ្ឋផល និងសក្តានុុពលធំៗទាំងបួននោះ ក្នុងឱកាស លោកអនុញ្ញាតឱ្យលោកជំទាវ Teo Lay Cheng ឯកអគ្គរដ្ឋទូតសាធារណរដ្ឋសឹង្ហបុរី ប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារកាលពីថ្ងៃម្សិលម៉ិញនេះ។

លោកគួច ចំរើន អភិបាលខេត្តព្រះសីហនុ បានស្វាគមន៍វត្តមានលោកជំទាវ និងសហការីមកធ្វើទស្សនកិច្ចខេត្តព្រះសីហនុ ព្រមទាំងជម្រាបជូនពីភូមិសាស្ត្រខេត្តព្រះសីហនុ មានក្រុង២ ស្រុក ៣ មានកោះ៣២ ឆ្នេរប្រវែង ១៧៥គីឡូម៉ែត្រ។ ក្រោយពីកម្ពុជាទទួលបានឯករាជ្យ សម្តេចព្រះករុណាព្រះបាទសម្ដេចព្រះនរោត្ដម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ “ព្រះបរមរតនកោដ្ឋ” បានរៀបចំបង្កើតខេត្តព្រះសីហនុ ដែលមានសក្តានុពលសេដ្ឋកិច្ច បានចាប់ផ្តើមកសាងសង់ផ្លូវជាតិលេខ៤ និងបន្តសាងសង់កំពង់ផែក្រុងព្រះសីហនុ ដែលមានសារៈសំខាន់ ក្នុងការដឹកជញ្ជូនទំនិញចេញ-ចូលប្រមាណ៧០ភាគរយ ក្នុងក្របខ័ណ្ឌទូទាំងប្រទេស។

លោកបន្តថា បច្ចុប្បន្នរាជរដ្ឋាភិបាល បានសហការជាមួយរដ្ឋាភិបាលជប៉ុន JICA សាងសង់ពង្រីកកំពង់ផែ ក្រុងព្រះសីហនុជំហានទី១ អាចឱ្យនាវាមានជំរៅទឹក១៣,៥០ម៉ែត្រ ចូលចតបាននៅឆ្នាំ២០២៥ និងបន្តពង្រឹ​ងបន្ថែមដល់ឆ្នាំ២០២៩ អាចឱ្យនាវាមានជំរៅទឹក១៥ម៉ែត្រ ចូលចតបាន ហើយនាវានៅលើពិភពលោក៩៧ភាគរយ ចូលចតបានធ្វើឱ្យតម្លៃដឹកជញ្ជូនតាមផ្លូវទឹក មានការថយចុះប្រកួតប្រជែងប្រទេសក្នុងតំបន់។

ខេត្តមានព្រលានយន្តហោះអន្តរជាតិ ដែលមានផ្លូវរត់ប្រវែង៣,៤០០ម៉ែត្រ បច្ចុប្បន្នកំពុងបន្តសាងសង់ស្ថានីយចេញដំណើរ។ ខេត្តមានផ្លូវល្បឿ​នលឿនតភ្ជាប់ពីរាជធានីភ្នំពេញ មកកាន់ខេត្តព្រះសីហនុ គ្រោងនឹងដាក់ឱ្យដំណើរការនៅចុងឆ្នាំ២០២២ខាងមុខនេះ គាំទ្រដល់កំណើនសេដ្ឋកិច្ចជាតិ។

លោកគួច ចំរើនបានបន្តថា រាជរដ្ឋាភិបាលបានទម្លាក់កញ្ចប់ថវិកាក្នុងការកែលម្អជាហេដ្ឋារចនាសម្ព័ន្ធផ្លូវថ្នល់ ក្នុងក្រុងព្រះសីហនុចំនួន៣៧ខ្សែ ដឹកនាំដោយឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងជាប្រធានគណៈកម្មាធិការជាតិ អភិ​វឌ្ឍតំបន់ឆ្នេរសមុទ្រកម្ពុជា។

ផ្អែកតាមផែនការមេ រាជរដ្ឋាភិបាល បានកំណត់ខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង និងជាតារារះនាទិសនារតី។

លោកគួច ចំរើនបាមបន្តថា នៅខេត្តព្រះសីហនុមានជនជាតិសឹង្ហបុរីបានមកធ្វើការវិនិយោគលើផ្នែកអចលនទ្រព្យ និងទេសចរណ៍ និងស្នើសុំឱ្យលោកជំទាវឯកអគ្គរដ្ឋទូតសឹង្ហបុរី ជួយផ្សព្វផ្សាយពីសក្តានុពលរបស់ខេត្តព្រះសីហនុ ដល់ប្រជាពលរដ្ឋសឹង្ហបុរី និងជម្រុញអ្នកវិនិយោគប្រទេសសឹង្ហបុរីមកធ្វើការវិនិយោគនៅខេត្តព្រះសីហនុកាន់តែច្រើនបន្ថែមទៀត។

ជាមួយគ្នានេះ លោកជំទាវ Teo Lay Cheng ឯកអគ្គរដ្ឋទូតសាធារណរដ្ឋសឹង្ហបុរី បានថ្លែងអំណរគុណលោកអភិបាលខេត្ត ដែលឱ្យលោកជំទាវ និងសហការីចូលជួបពិភាក្សាការងារ ហើយក៏ជាលើកទីពីរដែលលោកជំទាវ បានមកកាន់ខេត្តព្រះសីហនុគឺលើកទី១ បានចូលរួមកិច្ចប្រជុំវេទិការទេសចរណ៍ អាស៊ានកាលពីខែមករា ឆ្នាំ២០២២កន្លងមក ស្របពេលដែលរាជរដ្ឋាភិបាលកម្ពុជា បានបន្ធូបន្ថយនៃការរឹតបណ្តឹងវិបត្តិកូវីដ-១៩ ធ្វើឱ្យមានទំនុកចិត្តក្នុងតំបន់។

លោកជំទាវបន្តថា ការមកទស្សនកិច្ចនាពេលនេះ លោកជំទាវក៏បានទៅទស្សនារូបសំណាក “ព្រះថោងនាងនាគ” មានលក្ខណៈស្អាតជាស្នាដៃខ្មែរ ក្រោមការដឹកនាំរបស់ឯកឧត្តមអភិបាលខេត្ត មានការអភិវឌ្ឍរីកចម្រើននូវហេដ្ឋារចនាសម្ព័ន្ធជាច្រើន ហើយលោកជំទាវក៏ចង់ឃើញការអភិវឌ្ឍថ្មីៗបន្ថែមទៀតមាន ដូចជា កំពង់ផែ ផ្លូវល្បឿនលឿន ក្នុងអាណត្តិរបស់លោកជំទាវជាឯកអគ្គរដ្ឋទូតសឹង្ហបុរីប្រចាំកម្ពុជា និងគម្រោងជាច្រើនផ្សេងទៀតធ្វើឱ្យទីក្រុងនេះ ក្លាយជាទីក្រុងឆ្លាតវៃ និងជាមជ្ឍមណ្ឌលហិរញ្ញវត្ថុ។ ក្នុងនាមខេត្តព្រះសីហនុ ជាខេត្តប៉ូលសេដ្ឋកិច្ចរបស់កម្ពុជា ដែលមានរាជធានីភ្នំពេញ សៀមរាប ៕

   ដោយៈគង់ សូរិយា

        ភ្នំពេញៈ លោកទេសរដ្ឋមន្រ្តី ស៊ុន ចាន់ថុលរដ្ឋមន្រ្តីក្រសួងសាធារណការ និងដឹកជញ្ជូនបានឲ្យដឹងថា ក្រសួងកំពុងសិក្សាលទ្ធភាពធ្វើទំនើបកម្មផ្លូវដែកដែលមានស្រាប់២ខ្សែ គឺភ្នំពេញ-ប៉ោយប៉ែត និងភ្នំពេញ-ព្រះសីហនុ ទៅជាផ្លូវដែកល្បឿនលឿន ដោយគ្រោងនឹងបញ្ចប់ក្នុងរយៈពេល ៣ ខែខាងមុខនេះ។

លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងដូច្នេះ ក្នុ្ងងកិច្ចប្រជុំជាមួយឯកឧត្តម Saksayam Chidchob រដ្ឋមន្រ្តីក្រសួងដឹកជញ្ជូនថៃ តាមប្រព័ន្ធវីដេអូពី ចម្ងាយនៅថ្ងៃទី២០ ខែមេសា។

លោកទេសរដ្ឋមន្រ្តីបានបន្តថា ការសិក្សាគម្រោងផ្លូវដែកល្បឿនលឿននៅកម្ពុជា គឺស្របពេលដែលប្រទេសកម្ពុជា និងប្រទេសថៃ បាននិងកំពុងជំរុញការបើកច្រកព្រំដែនអន្តរជាតិស្ទឹងបត់-បានណងអៀន ដើម្បីសម្រួលការដឹកជញ្ជូនទំនិញឆ្លងកាត់ព្រំដែន។

លោកបន្តថា “ការតភ្ជាប់ហេដ្ឋារចនាសម្ព័ន្ធរូបវ័ន្ត រវាងប្រទេសទាំង២ មិនគ្រាន់តែបង្កើនទំហំនៃការធ្វើពាណិជ្ជកម្ម ទេសចរណ៍ និងវិនិយោគប៉ុណ្ណោះទេ ប៉ុន្តែថែមទាំងជាកត្តាគន្លឹះ ជួយជំរុញដល់កំណើនការអភិវឌ្ឍសេដ្ឋកិច្ចរបស់ប្រទេសទាំង២ ផងដែរ”។

ការសិក្សាធ្វើទំនើបកម្មផ្លូវដែកនេះ ធ្វើឡើងក្រោយពេលសម្តេចនាយករដ្ឋមន្ត្រី ហ៊ុន សែន ប្រកាសជំរុញឱ្យក្រសួងពន្លឿនការងារ ធ្វើទំនើបកម្មរថភ្លើងទាំង២ខ្សែ និងសង់ផ្លូវដែកបន្ថែមជាច្រើនខ្សែទៀត៕

ដោយៈសុខុម

ហាណូយ: ប្រទេសវៀតណាម កំពុងសម្រុកសាងសង់បង្ហើយនូវស្ពានកញ្ចក់ដែលវែងបំផុត ក្នុងពិភពលោក ដើម្បីដណ្ដើមកំណត់ត្រាឯតទគ្គកម្មចាស់ពីប្រទេសចិន។ នេះបើយោងតាមសារព័ត៌មាន Laotian Times ចុះផ្សាយកាលពីថ្ងៃព្រហស្បតិ៍ ទី២១ ខែមេសា។

នៅថ្ងៃទី៣០ ខែមេសា ដ៏ខ្លីខាងមុខនេះ គឺជាទិវាបង្រួបបង្រួមជាតិ (Reunification Day) ដែលជាថ្ងៃបុណ្យជាតិក្នុងប្រទេសវៀតណាម ហើយស្ពានកញ្ចក់ ដែលមានកម្ពស់ជាង៦៣០ម៉ែត្រនេះនឹងត្រូវសម្ពោធដាក់ឱ្យប្រើប្រាស់ ចំថ្ងៃបុណ្យនេះ ដើម្បីទទួលស្វាគមន៍ភ្ញៀវទេសចរ។

ស្ពានកញ្ចក់នៅក្នុងប្រទេសវៀតណាម នេះមានប្រវែងវែងជាង២០០ម៉ែត្រ បើធៀបនឹងស្ពានកញ្ចក់ប្រវែង៤៣០ម៉ែត្រនៅជ្រោះ Zhangjiajie Grand Canyon ក្នុងប្រទេសចិន ដែលគ្រងកំណត់ត្រាឯតទគ្គកម្ម ជាស្ពានកញ្ចក់វែងបំផុតក្នុងពិភពលោក។

ស្ពានដែលមានឈ្មោះថា Bach Long នេះស្ថិតនៅចម្ងាយប្រមាណ២០០គីឡូម៉ែត្រ ពីទីក្រុងហាណូយ ក្នុងតំបន់ទេសចរណ៍ភ្នំ Moc Chau Island Tourist Area នៃខេត្ត Son La ប្រទេសវៀតណាម។

ដោយមានកម្ពស់ផុតពីដីប្រមាណ១៥០ម៉ែត្រ កម្រាលនៃស្ពាននេះត្រូវបានក្រាលដោយកញ្ចក់បារាំង ដ៏រឹងមាំដែលមាន៣ស្រទាប់ ហើយទ្រដោយប្រព័ន្ធខ្សែកាបរបស់កូរ៉េខាងត្បូង។

យោងតាមការព្យាករណ៍ ការសម្ពោធស្ពាននេះ នឹងជួយទាក់ទាញភ្ញៀវទេសចរណ៍យ៉ាងច្រើននៅក្នុងខេត្តនេះ ប៉ុន្តែក្នុងមួយលើក មនុស្សត្រឹមតែ៥០០នាក់ប៉ុណ្ណោះ ដែលនឹងត្រូវអនុញ្ញាតឱ្យដើរលើស្ពាននេះ ដើម្បីធានាសុវត្ថិភាព។

ស្ពាននេះត្រូវបានគេបង្ហោះ និងចែករំលែករំលែកល្បីសុសសាយពេញបណ្ដាញទំនាក់ទំនងសង្គម ហើយក្រុមមន្ត្រីវៀតណាម បានដាក់សំណើទៅកំណត់ត្រាពិភពលោក Guinness ហើយដើម្បីសុំការបញ្ជាក់ទទួលស្គាល់ជាផ្លូវការថា ស្ពាននេះជាស្ពានកញ្ចក់វែងបំផុត ក្នុងពិភពលោកនេះ៕ Vietnam News៕

ដោយៈសុខុម

មូស្គូ: រុស្ស៊ី បានបាញ់សាកល្បងមីស៊ីលផ្លោងឆ្លងទ្វីប ដែលមានសមត្ថភាពផ្ទុកក្បាលគ្រាប់នុយក្លេអ៊ែរថ្មីមួយ គ្រាប់ដែលបុរសខ្លាំង វ៉្លាឌីមៀ ពូទីន បានអួតកាលពីថ្ងៃពុធ ទី២០ ខែមេសាថា នឹងធ្វើឱ្យសត្រូវរបស់ក្រុងមូស្គូ ខ្លបខ្លាច និងពិចារណាសាជាថ្មី។ នេះបើយោងតាមទីភ្នាក់ងារព័ត៌មាន Reuters ចុះផ្សាយកាលពីថ្ងៃព្រហស្បតិ៍ ទី២១ ខែមេសា។

ការបាញ់សាកល្បងអាវុធមហាប្រល័យ ដ៏គួរឱ្យភ្ញាក់ផ្អើលនេះធ្វើឡើង ក្រោយការបញ្ឆេះសង្គ្រាមរបស់រុស្ស៊ី ចូលឈ្លានពានប្រទេសអ៊ុយក្រែន បានឈានចូលរយៈពេល២ខែ និងស្របពេលរុស្ស៊ី កំពុងទទួលរងទណ្ឌកម្មជុំទិសដែលធ្ងន់ធ្ងរបំផុតមិនធ្លាប់មានក្នុងប្រវត្តិសាស្ត្រ។

ប្រធានាធិបតីរុស្ស៊ី លោក វ៉្លាឌីមៀ ពូទីន បានបង្ហាញមុខតាមកញ្ចក់ទូរទស្សន៍ ហើយក្នុងពេលនោះយោធាបានប្រាប់លោកថា កាំជ្រួចមីស៊ីលផ្លោងឆ្លងទ្វីបធុន Sarmat ដែលគេទន្ទឹងរង់ចាំជាយូរមកហើយ ត្រូវបានបាញ់សាកល្បងជាលើកដំបូងពីតំបន់ Plesetsk នាភាគពាយព្យនៃប្រទេសរុស្ស៊ី ហើយបានវាយប្រហារគោលដៅ នៅឧបទ្វីប Kamchatka ចម្ងាយជិត៦.០០០គីឡូម៉ែត្រ។

ការបាញ់សាកល្បងកាំជ្រួចមីស៊ីលផ្លោងឆ្លងទ្វីប Sarmat ដែលស្ថិតក្រោមការអភិវឌ្ឍអស់ជាច្រើនឆ្នាំនេះ មិនបានធ្វើឱ្យលោកខាងលិចព្រឺរោម ឬខ្លាចញញើតឡើយ។

រហូតមកទល់ពេលនេះ ប្រទេសរុស្ស៊ី មិនទាន់អាចវាយដណ្តើមយកទីក្រុងធំៗ ណាមួយរបស់អ៊ុយក្រែនបាននៅឡើយទេ ចាប់តាំងពីខ្លួនបានបញ្ជូនទាហានរាប់សែននាក់ ចូលឈ្លានពានប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ នេះ។

ទោះជាយ៉ាងណា ភ្លាមៗក្រសួងការពារជាតិអ៊ុយក្រែន មិនអាចទាក់​ទងសុំការធ្វើអត្ថាធិប្បាយបានទេ ជុំវិញការបាញ់សាកល្បងកាំជ្រួចមីស៊ីលនេះ៕ Reuters៕

ដោយៈ គង់ សូរិយា

ភ្នំពេញៈ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជានៅថ្ងៃទី២២មេសានេះ នឹងដឹកនាំគណៈប្រតិភូជាន់ខ្ពស់ នៃរាជរដ្ឋាភិបាលកម្ពុជា អញ្ជើញទៅចូលរួមកិច្ចប្រជុំកំពូលស្តីពី បញ្ហាទឹកនៅតំបន់អាស៊ី-ប៉ាស៊ីហ្វិក (APWS) លើកទី៤ ដែលប្រារព្ធធ្វើឡើងនៅទីក្រុង Kumamoto ប្រទេសជប៉ុន។

កិច្ចប្រជុំកំពូលលើកទី៤ ស្តីពី “បញ្ហាទឹកក្នុងតំបន់អាស៊ី-ប៉ាស៊ីហ្វិក” នឹងត្រូវធ្វើឡើង ក្រោមមូលបទ “ទឹកសម្រាប់ការអភិវឌ្ឍប្រកបដោយចីរភាព៖ ឧត្តមានុវត្តន៍ និងអ្នកបន្តវេនជំនាន់ក្រោយ” ដែលនឹងធ្វើឡើងចាប់ពីថ្ងៃទី២៣ ដល់២៤ ខែមេសា។

កិច្ចប្រជុំនេះ ធ្វើឡើងក្នុងគោលបំណងចែករំលែកទស្សនទាន ការប្រមើមើលទៅមុខនៃដំណោះស្រាយ និងការអនុវត្ត ជូនចំពោះប្រមុខរដ្ឋ ប្រមុខរដ្ឋាភិបាល ដែលគាំទ្រដល់ការសម្រេចចិត្តជាគោលនយោបាយ ក្នុងការពន្លឿនសកម្មភាព ឲ្យសម្រេចបាននូវការលូតលាស់ ប្រកបដោយគុណភាព ឆ្ពោះទៅកាន់សង្គមមួយដែលមានភាពធន់ ប្រកបដោយបរិយាប័ន្ន និងដោយចីរភាព ដោយដោះស្រាយនូវរាល់បញ្ហា ដែលពាក់ព័ន្ធនឹងទឹក ក្រោយពេលដែលស្ថានភាពជំងឺកូវីដ-១៩ បានប្រសើរឡើងវិញ ក្នុងតំបន់អាស៊ី-បាស៊ីហ្វិក។

កិច្ចប្រជុំក៏មានគោលបំណងជំរុញកិច្ចសហការ និងភាពជាដៃគូបន្ថែមទៀត ដើម្បីប្រើប្រាស់ហេដ្ឋារចនាសម្ព័ន្ធ ប្រកបដោយគុណភាព ដើម្បីគាំទ្រការលូតលាស់ប្រកបដោយគុណភាព៕