ដោយៈសុខុម

ប៉េកាំង: ទិន្នន័យផ្លូវការបង្ហាញនៅថ្ងៃច័ន្ទ ទី១៨ មេសា នេះថា សេដ្ឋកិច្ចរបស់ប្រទេសចិន បានរីកចម្រើនលឿនជាងការរំពឹងទុក នៅក្នុងត្រីមាសទី១ ដើមឆ្នាំ២០២២ នេះជាមួយនឹងកំណើនផលទុនជាតិសរុប (GDP) ៤,៨%។

ទោះជាយ៉ាងណា ហានិភ័យនៃការធ្លាក់ចុះយ៉ាងខ្លាំង ក្នុងរយៈពេលប៉ុន្មានខែខាងមុខនេះបានកើនឡើង ខណៈវិធានការដ៏តឹងរ៉ឹងនៅក្នុងការទប់ស្កាត់ការរីករាលដាលវីរុសកូវីដ-១៩ និងសង្គ្រាមរុស្ស៊ី-អ៊ុយក្រែន បានបង្កផលប៉ះពាល់ធ្ងន់ធ្ងរ។

យោងតាមការស្ទង់មតិដែលទីភ្នាក់ងារព័ត៌មាន Reuters បានធ្វើឡើងទៅលើក្រុមអ្នកវិភាគបង្ហាញថា GDPរបស់ចិនត្រូវបានព្យាករថា នឹងទទួលបានកំណើន៤,៤%ធៀបនឹងឆ្នាំ២០២១ ដោយកើនឡើងពី៤,០%នៅក្នុងត្រីមាសទី៤ ចុងឆ្នាំ២០២១។ ់

លោក ZHANG ZHIWEI អ្នកជំនាញសេដ្ឋកិច្ចជាន់ខ្ពស់នៅក្រុមហ៊ុនគ្រប់គ្រងទ្រព្យសកម្ម PINPOINT ASSET MANAGEMENT មានមូលដ្ឋាននៅក្រុងស៊ឹនជិន (SHENZHEN) បានលើកឡើងថា “កំណើន GDP ត្រីមាសទី១ គឺរឹងមាំ ប៉ុន្តែសេដ្ឋកិច្ចរបស់ប្រទេសចិន មានសន្ទុះយឺតខ្លាំងក្នុងខែមីនា ដោយ​សារ ការផ្ទុះឡើងនូវការរីករាលដាលវីរុសកូវីដ-១៩ រលកថ្មីក្នុងទីក្រុងជាច្រើន។ តម្រូវការប្រើប្រាស់បានធ្លាក់ចុះ ដែលធ្វើឱ្យប៉ះពាល់ដល់ការលក់រាយ អត្រាគ្មានការងារធ្វើ នៅក្នុងទីក្រុងចំនួន៣១បានកើនឡើងដល់៦% ដែលជាកម្រិតខ្ពស់បំផុតចាប់តាំងពីឆ្នាំ២០១៨មក។ នេះសរបង្ហាញឱ្យឃើញថា បញ្ហាគ្មានការងារធ្វើ នៅក្នុងទីក្រុងធំៗកាន់តែធ្ងន់ធ្ងរ ជាងពេលផ្ទុះវីរុសកូវីដ-១៩ ក្នុងឆ្នាំ២០២០ ទៅទៀត”។

ទន្ទឹមនេះ លោក LI WEI អ្នកជំនាញសេដ្ឋកិច្ចជាន់ខ្ពស់មកពីក្រុមហ៊ុនផ្ដល់សេវាធនាគារ និងហិរញ្ញវត្ថុអង់គ្លេស STANDARD CHARTERED មានមូលដ្ឋាននៅក្រុងសៀងហៃ បានលើកឡើងថា “GDP ប្រឈមហានិភ័យធ្លាក់ចុះ នៅក្នុងត្រីមាសទី២ ខណៈការផ្ទុះការរីករាលដាលវីរុសកូវីដ-១៩ និងការបិទខ្ទប់បន្តបង្កផលប៉ះពាល់ធ្ងន់ធ្ងរ”។

ចំណែកឯលោក MARCO SUN អ្នកវិភាគជានខ្ពស់ផ្នែកទីផ្សារហិរញ្ញវត្ថុ ប្រចាំធនាគារធំបំផុតរបស់ជប៉ុន MUFG មានមូលដ្ឋាននៅក្រុងសៀងហៃបានលើកឡើងថា “ដោយសារគោលដៅកំណើន GDP របស់ប្រទេសចិន សម្រាប់ឆ្នាំ២០២២ មានប្រមាណ៥,៥% យើងឃើញកត្តាជំរុញជាច្រើនដែលជួយសេដ្ឋកិច្ចក្នុងខែមករា និងខែកុម្ភៈ។

លោកបន្តថា “ផលប៉ះពាល់មកលើសេដ្ឋកិច្ចក្នុងខែមីនា ដែលបង្កឡើងដោយសារកូវីដ-១៩ បានកើតឡើងយឺត។ ប្រហែលជាផលប៉ះពាល់ខ្លះនឹងបង្ហាញនៅក្នុងស្ថិតិត្រីមាសទី២”។ លោកបន្ថែមថា “ទោះជាយ៉ាងណា ខ្ញុំឃើញថា ក្រុមអ្នកបង្កើតគោលនយោបាយចិន នឹងពន្លឿនការចំណាយសារពើពន្ធ ហើយបន្ធូរបន្ថយគោលនយោបាយរូបិយវត្ថុបន្ថែមទៀត។ វិធានការទាំងនេះអាចជួយជំរុញកំណើន GDP”៕  Reutters៕

 ដោយៈគង់ សូរិយា

         ភ្នំពេញៈ ទីផ្សារគ្រឿងសំណង់កំពុងមានសញ្ញាវិជ្ជមានឡើងវិញបណ្តើរៗ ដោយទំហំនៃៃការនាំចូលដែក និងដែកថែប មានតម្លៃគិតជាទឹកប្រាក់ជិត១០០លានដុល្លារអាមេរិក ក្នុងអំឡុងត្រីមាសទី១ឆ្នាំនេះ។

យោងតាមទិន្នន័យពីរដ្ឋបាលគយ និងរដ្ឋាករកម្ពុជាបានឲ្យដឹងថា តម្លៃនៃការនាំចូលដែក និងដែកថែបក្នុងត្រីមាសទី១ ឆ្នាំនេះមានទឹកប្រាក់រហូតដល់ទៅជាង៨៤លានដុល្លារ ដែលកើនឡើង៣,៥ភាគរយ បើធៀបនឹងរយៈពេលដូចគ្នា កាលពីឆ្នាំមុន។

របាយការណ៍ដដែលបានបន្ដថា សម្រាប់ខែមីនា ឆ្នាំ២០២២ តែមួយខែគត់ ទឹកប្រាក់នៃការនាំចូលដែក និងដែកថែបមានដល់២៦,២៩លានដុល្លារ។

ក្នុងរយៈពេលត្រីមាសទី១នេះ អគ្គនាយកដ្ឋានគយ និងរដ្ឋាករកម្ពុជាប្រមូលបានទឹកប្រាក់សរុបមានដល់ជាង៥៩០លានដុល្លារអាមេរិក ក្នុងនោះសម្ភារសំណង់និងកម្រៃផ្សេងៗមានចំនួន៥,៩ភាគរយ ស្មើនឹង៣៤លានដុល្លារ៕

ដោយៈសុផារី

ភ្នំពេញៈ តាមរយៈស្ថិតិក្រសួងទេសចរណ៍បានឱ្យដឹងថា ក្នុងកំឡុងពិធីបុណ្យចូលឆ្នាំប្រពៃណីជាតិខ្មែរ រយៈពេល៣ថ្ងៃ និងថ្ងៃអាទិត្យ១ថ្ងៃទៀត នៃឆ្នាំ២០២២នេះ ភ្ញៀវទេសចរសរុបចំនួនជាង៥លាននាក់ បានធ្វើដំណើរកំសាន្តនៅតាមតំបន់ទេសចរណ៍នានា នៅទូទាំងប្រទេសកម្ពុជា។

នេះជាចំនួនដ៏ច្រើនសន្ធឹកសន្ធាប់ មិនធ្លាប់មានកន្លងមកចាប់តាំងពីប្រទេសកម្ពុជាប្រឈមនឹងវិបត្តិជំងឺឆ្លង។ អ្នកជំនាញ អាជីករនានា និងប្រជាជនកម្ពុជា បានសម្តែងភាពរីករាយ និងបង្ហើបថា ការចំណាយនៅក្នុងកំឡុងរដូវកាលបុណ្យនេះ មានការកើនឡើងច្រើន ដែលជាសញ្ញាវិជ្ជមាន ដល់ដំណើរការនិងចរន្តសេដ្ឋកិច្ចក្នុងស្រុកយ៉ាងខ្លាំង។

លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា បានមានប្រសាសន៍តាមប្រព័ន្ធទូរស័ព្ទ នៅព្រឹកថ្ងៃទី១៨ ខែមេសានេះថា ដោយសាររដ្ឋាភិបាលបានបិទ មិនឲ្យមាន​ការរៀបចំសង្ក្រាន្តពីរឆ្នាំកន្លងមក ទើបនៅក្នុងឆ្នាំ២០២២ ប្រជាជនកម្ពុជាបានដើរកំសាន្តយ៉ាងគក្រឹកគគ្រេង ការចំណាយក៏មានការកើនឡើងខ្ពស់ នឹកស្មានមិនដល់ ជាពិសេសនៅតាមគោលដៅទេសចរណ៍ សំខាន់ៗរបស់កម្ពុជា មានកំណើនភ្ញៀវទៅលេងច្រើន ។

លោកបណ្ឌិត បានគូសបញ្ជាក់ថា “យើងមិននឹកស្មានដល់ថា ឆ្នាំនេះ ស្របពេលដែលសាំងឡើងថ្លៃ និងកូវីដ១៩ នៅបន្តក្តី បែរជាការចូលរួមកំសាន្តនិងសប្បាយរីករាយច្រើននឹកស្មានមិនដល់”។

លោកបណ្ឌិតថា “ដោយសារនេះ ជាប្រពៃណីរបស់ខ្មែរយើង ដែលបង្ហាញពីលទ្ធភាព នៃការចំណាយរបស់ប្រជាជនយើង នាំឱ្យចរន្តសេដ្ឋកិច្ចដំណើរការយ៉ាងរស់រវើកនៅក្នុងដើមត្រីមាសទី២ ឆ្នាំ២០២២នេះ”។

លោកបណ្ឌិតបន្តដោយសុទិដ្ឋិនិយមថា “ប្រសិនបើស្ថានភាពល្អប្រសើ​របែបនេះ នៅតែបន្តទៅមុខទៀតនោះ ខ្ញុំអាចនិយាយបានថា ពេញឆ្នាំ២០២២នេះ អាចនឹងមានចលនាសេដ្ឋកិច្ចសង្គម នឹងកម្រើកមួយជំហានធំទៀត”។ លោកបន្តថា “ប្រសិនបើមិនមានអ្វីកើតឡើងទេ នោះក្នុងឱកាសនៃបុណ្យភ្ជុំបិណ្ឌខាងមុខ សន្ទុះនៃការដើរកំសាន្តរបស់ប្រជាពលរដ្ឋ នឹងមានច្រើនដូចក្នុងកំឡុងពេលបុណ្យចូលឆ្នាំ ឬអាចមានការកើនឡើងផងដែរ”។

បើតាមលោក ថោង ខុន រដ្ឋមន្ត្រីក្រសួងទេសចរណ៍ នាឱកាសពិធីបុណ្យចូលឆ្នាំប្រពៃណីជាតិខ្មែររយៈពេល៣ថ្ងៃ និងថ្ងៃអាទិត្យ១ថ្ងៃទៀត ចាប់ពីថ្ងៃទី១៤-១៧ ខែមេសា ឆ្នាំ២០២២ នៅទូទាំងប្រទេសកម្ពុជាទទួលបានភ្ញៀវទេសចរសរុបចំនួន៥.១៧៥.៧៥៤នាក់ ក្នុងនោះមានភ្ញៀវជាតិ៥.១៤០.៤៩៥នាក់ និងភ្ញៀវបរទេសផ្ទៃក្នុង៣៥.២៥៩នាក់។

លោករដ្ឋមន្ត្រីបានឱ្យដឹងថា ចំនួនភ្ញៀវទេសចរប្រមាណជាង៥លាន១៧ម៉ឺននាក់ក្នុងរយៈពេល៤ថ្ងៃនេះ គឺជាចំនួនមួយដ៏ច្រើនលើសពីការរំពឹងទុក និងជាចំនួនខ្ពស់មែនទែន ចាប់តាំងពីរាជរដ្ឋាភិបាលបានប្រកាសបិទបញ្ចប់ព្រឹត្តិការណ៍សហគមន៍នាអំឡុងខែធ្នូ ឆ្នាំ២០២១”។

លោក សារុន ម្ចាស់ភោជនីយដ្ឋានមួយកន្លែង មានទីតាំងនៅតាមបណ្តោយផ្លូវជាតិលេខ៦A បានមានប្រសាសន៍ថា “បើធៀបនឹងឆ្នាំមុនៗ ឆ្នាំនេះ មានប្រជាជនធ្វើដំណើរកំសាន្តច្រើនណាស់ គឺមកទាំងឡានៗ ជាលក្ខណៈគ្រួសារផង និងតាមរថយន្តទេសចរណ៍ដឹកអ្នកដំណើរផង”។

លោកបានបន្តថា ក្នុងម្នាក់ៗចំណាយយ៉ាងតិច ក៏ម្នាក់១ទៅ២ម៉ឺនរៀលដែរ លើការឈប់សម្រាកបរិភោគអាហារ ពេលឆ្លងកាត់ហាងរបស់លោក ដោយនៅមិនទាន់រាប់បញ្ចូល ការទិញរបស់របរផ្ញើរទៅកាន់ផ្ទះនៅឡើយ។

និយាយដោយទឹកមុខញញឹមតិចៗ លោកបានសម្តែងការរីករាយ ដោយសារការលក់ដាច់ច្រើន មិនធ្លាប់មានពីមុនមក ចាប់តាំងពីមានកូវីដ១៩មក ដោយលោកថា ”ខ្ញុំលក់ដាច់គ្រាន់បើឆ្នាំនេះ ហើយរវល់ស្ទើរដកដៃមិនរួច”។

អ្នកស្រី ហ៊ាង លក្ខិណា អាជីវករលក់សម្លៀកបំពាក់នៅក្នុងផ្សារមួយកន្លែងនៅក្នុងស្រុកក្រូចឆ្នារ ខេត្តត្បូងឃ្មុំ ក៏បានសម្តែងភាពរីករាយ ដោយ​សារតែអ្នកស្រី បានលក់សម្លៀកបំពាក់ដាច់ខ្លាំង នៅមុននិងក្នុងកំឡុងបុ  ណ្យចូលឆ្នាំខ្មែរ។

អ្នកស្រីបាននិយាយថា “ខ្ញុំទៅលក់ទាំងមុន និងក្នុងកំឡុងចូលឆ្នាំ ដោយមិនមានឈប់សម្រាកឡើយ ដោយសារតែមានភ្ញៀវដើរទិញមួយៗ ឥតដាច់ទេ”។

អតិថិជនរបស់អ្នកស្រីភាគច្រើនជាស្រ្តី ដែលមានអាយុចាប់ពី១៨ឆ្នាំឡើងទៅ ដោយអ្នកស្រីបានបញ្ជាក់ថា ក្នុងម្នាក់ៗ យ៉ាងហោចណាស់ ទិញសម្លៀកបំពាក់២កំប្លេរ និងចំណាយជាមធ្យមប្រហែលជា៤ទៅ៦ម៉ឺនរៀល។

ចំណែក ប្រជាជននៅក្នុងក្រុងភ្នំពេញ ដែលបានធ្វើដំណើរត្រលប់ទៅកាន់ស្រុកកំណើតនៅក្នុងខេត្តត្បូងឃ្មុំ លោកបស់ លាងហេង បានមានប្រសាសន៍នៅថ្ងៃទី១៧ ខែមេសាថា លោកចំណាយច្រើនណាស់នៅក្នុងឆ្នាំនេះ ទាំងលើការធ្វើដំណើរ ការហូចចុក របស់របរផ្ញើរទៅកាន់ផ្ទះសម្បែង ។ល។

លោកថា “គ្រាន់តែមួយថ្ងៃដំបូង ខ្ញុំចាយអស់ជាង១០០ដុល្លារទៅហើយ នេះមិនទាន់គិតថ្លៃសាំង និងរបស់របរកំប៉ិចកំប៉ុកនៅឡើយទេ”។

យ៉ាងណាក្តី លោកបញ្ជាក់ថា “ការចំណាយបែបនេះ មិនជាថ្វីឡើយ ព្រោះត្រលប់ទៅផ្ទះយូរម្តងៗ ហើយនេះជារដូវកាលបុណ្យទាន អញ្ចឹងត្រូវតែចំណាយស្រាប់ហើយ”៕

ដោយៈ សុផារី

ភ្នំពេញៈ ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣(AMRO)) បានចេញផ្សាយរបាយការណ៍ប្រចាំឆ្នាំរបស់ខ្លួនស្តីពី ទស្សនវិស័យសេដ្ឋកិច្ចក្នុងតំបន់អាស៊ាន+៣ (AREO) សម្រាប់ឆ្នាំ២០២២។

AMRO បានព្យាករណ៍ថា កំណើនសេដ្ឋកិច្ចរបស់ប្រទេសកម្ពុជាគឺមានសញ្ញាល្អ ដោយផលទុនជាតិសរុបរបស់ប្រទេសនេះរំពឹងថា នឹងកើនឡើង៦,១ភាគរយនៅឆ្នាំ២០២៣ ដោយនៅពីក្រោយប្រទេសជិតខាងក្នុងតំបន់គឺហ្វីលីពីន ដែលមានកំណើន៦,៥ភាគរយ និងប្រទេសវៀតណាម ដែលមានកំណើន៧ភាគរយ។

របាយការណ៍ក៏បានព្យាករណ៍កំណើនសេដ្ឋកិច្ច ក្នុងប្រទេសអាស៊ាន+៣ ដោយបង្ហាញថា ស្ថិតនៅ៤,៧ភាគរយនៅឆ្នាំ២០២២នេះ និង៤,៦ភាគរយនៅឆ្នាំ២០២៣ ចំណែកបណ្តាប្រទេសជាសមាជិកអាស៊ាន ស្ថិតនៅ៥,១នៅក្នុងឆ្នាំ២០២២ និង៥,២ភាគរយនៅក្នុងឆ្នាំ២០២៣។

លោក Hoe Ee Khor ប្រធានសេដ្ឋវិទូនៃការិយាល័យ AMRO បានមានប្រសាសន៍ថា “នៅពេលឈានចូលឆ្នាំ២០២២ តំបន់អាស៊ាន ទទួលបានមូលដ្ឋានខ្លះៗហើយ នៅក្នុងការប្រយុទ្ធប្រឆាំងនឹងកូវីដ១៩ ហើយឥឡូវនេះ យើងនៅទន្ទឹងរង់ចាំការបើកចំហពេញលេញ និងការងើបឡើងវិញនៃសេដ្ឋកិច្ចដ៏រឹងមាំ”។

លោកបានបន្តថា “សម្រាប់សេដ្ឋកិច្ចអាស៊ាន កង្វល់ដ៏ធំបំផុតនោះគឺថា ការប្រើប្រាស់ធនធានសារពើពន្ធយ៉ាងច្រើន ក្នុងការគាំទ្រជំងឺរាតត្បាត និងគាំទ្រការងើបឡើងវិញនៃសេដ្ឋកិច្ច ដែលមានន័យថា នៅពេលខាងមុខ រដ្ឋាភិបាលនានា នឹងមិនអាចមានធនធានគ្រប់គ្រាន់ សម្រាប់ការវិនិយោគសាធារណៈ ជាពិសេសផ្នែកអភិវឌ្ឍន៍ហេដ្ឋារចនាសម្ព័ន្ធនានា”។

របាយការណ៍បានឱ្យដឹងថា ប្រទេសដែលមានគម្លាតផ្នែកហេដ្ឋារចនាសម្ព័ន្ធខ្លាំងជាងគេ ត្រូវបានគេរំពឹងថា នឹងទទួលរងពីកង្វះខាតការវិនិយោគច្រើនបំផុត។ វេទិកាសេដ្ឋកិច្ចពិភពលោកចាត់ចំណាត់ថ្នាក់ ប្រទេសកម្ពុជាមានគម្លាត ផ្នែកហេដ្ឋារចនាសម្ព័ន្ធធំជាងគេទីបីនៅក្នុងតំបន់ ដោយតាមពីក្រោយប្រទេសមីយ៉ាន់ម៉ា និងឡាវប៉ុណ្ណោះ។

ទោះជាយ៉ាងណាក៏ដោយ នេះមិនចោទជាបញ្ហា សម្រាប់ហេដ្ឋារចនាសម្ព័ន្ធរបស់ប្រទេសកម្ពុជានោះទេ ដោយសារគម្រោងកំពង់ផែទឹកជ្រៅខេត្តព្រះសីហនុ ផ្លូវល្បឿនលឿន អាកាសយានដ្ឋាននានា ព្រមទាំងគម្រោងនានា បន្តដំណើរការទៅតាមការគ្រោងទុកជាធម្មតា។

លោក Khor បាននិយាយថា ការស្ទុះងើបឡើងវិញនៃវិស័យទេសចរណ៍ក្នុងតំបន់ នឹងជួយដល់ការវិលត្រឡប់របស់ភ្ញៀវទេសចរចិន ខណៈពេលការរាតត្បាតខ្លាំង នៅក្នុងប្រទេសចិននាពេលថ្មីៗនេះ បាននិងកំពុងរឹតបន្តឹងការគ្រប់គ្រងព្រំដែន អ្នកទេសចរចិនបានត្រៀមខ្លួនជាស្រេចក្នុងការធ្វើដំណើរកំសាន្តឡើងវិញ។

លោកបានមានប្រសាសន៍ថា “ការស្ទង់មតិបង្ហាញថា អ្នកទេសចរចិនចង់ធ្វើដំណើរម្តងទៀត ក្នុងរយៈពេលជាច្រើនខែ នៅពេលដែលប្រទេសចិនអាចបន្ធូរបន្ថយការរឹតបន្តឹងការធ្វើដំណើររបស់ខ្លួន” ។

របាយការណ៍ឱ្យដឹងទៀតថា ប្រទេសកម្ពុជាអាចទទួលបានអត្ថប្រយោ​ជន៍ ពីកំណើននៃពាណិជ្ជកម្មអេឡិចត្រូនិក និងសេវាកម្មឌីជីថល ក៏ដូចជានិន្នាការកាន់តែខិតជិត ដែលនឹងពង្រឹងខ្សែសង្វាក់ផ្គត់ផ្គ ង់ក្នុងតំបន់អាស៊ាន ជាពិសេសតាមរយៈកិច្ចព្រមព្រៀង RCEP តាមរយៈការកាត់បន្ថយពន្ធគយ សេរីភាវូបនីយកម្ម ពាណិជ្ជកម្ម សេវាកម្ម ការចល័តកម្លាំងពលកម្ម និងការរីកចម្រើននៃពាណិជ្ជកម្មអេឡិចត្រូនិក និងពាណិជ្ជកម្មឌីជីថល៕

ដោយៈសុផារី

បាងកកៈ រដ្ឋបាលក្រុងបាងកក (BMA) ដែលជាប្រតិបត្តិកររថភ្លើងលើអាកាស BTS កំពុងតែរងបណ្តឹង ដោយសារបានជំពាក់ថ្លៃប្រតិបត្តិការ និងការថែទាំរបស់ក្រុមហ៊ុន Bangkok Mass Transit System Plc (BTSC) ចំនួនជិត៣៨ពាន់លានបាត (ប្រហែល១,១ពាន់លានដុល្លារអាមេរិក)។

នេះបើតាមការឱ្យដឹងរបស់នាយកប្រតិបត្តិក្រុមហ៊ុន BTSC លោក Surapong Laoha-Unya បាននៅចុងសប្តាហ៍នេះ។

ប្រភពពីសារព័ត៌មានបាងកកបុស្តិ៍បានឱ្យដឹងថា គិតត្រឹមខែមីនា ឆ្នាំ២០២២ បំណុល ដែលរដ្ឋបាលក្រុងបាងកកបានជំពាក់ សម្រាប់ប្រតិបត្តិការរថភ្លើងលើអាកាស BTS សម្រាប់ប្រតិបត្តិការ មានប្រមាណ៥៣៦លានដុល្លារអាមេរិក និងថែរទាំប្រមាណ៥៩៦លានដុល្លារអាមេរិក។

ក្រុមហ៊ុន BTSC ធ្លាប់បានដាក់បណ្តឹងសាលាក្រុងបាងកក និងក្រុមហ៊ុនបុត្រសម្ព័ន្ធ Krungthep Thanakhom (KT) ម្តងរួចហើយ ពាក់ព័ន្ធនឹងការដោះស្រាយបំណុល ចំនួន១២ពាន់លានបាត លើថ្លៃប្រតិបត្តិការបន្ថែមលើខ្សែបៃតង និងការចំណាយពាក់ព័ន្ធផ្សេងទៀតចាប់តាំងពីខែមេសា ឆ្នាំ២០១៧មកម្លេះ។

លោក Surapong បាននិយាយថា ក្រុមហ៊ុនរបស់លោកបានត្រៀមខ្លួន ក្នុងការដាក់ពាក្យបណ្តឹងមួយទៀត ដើម្បីដោះស្រាយបំណុលបន្ថែមចំនួនជាង២០ពាន់លានបាត។

រដ្ឋបាលក្រុងបាងកក (BMA) ក៏មិនទាន់បានទូទាត់ប្រាក់ចំនួន៥៥ពាន់លានបាត (ប្រហែល១,៦ពាន់លានដុល្លារអាមេរិក) ដែលដើមឡើយបានជំពាក់ក្រុមហ៊ុន Bangkok Mass Transit System Plc (BTSC) សម្រាប់ថ្លៃវិស្វកម្មសំណង់ស៊ីវិលនៃគម្រោងផ្លូវដែករដ្ឋ។ គ្រាន់តែការប្រាក់នៃបំណុលនេះ បានកើនឡើងដល់ប្រហែល១០ពាន់លានបាត (ប្រហែល២៩៨លានដុល្លារអាមេរិក)៕