ដោយៈ ជេស៊ីកា

ភ្នំពេញៈ តើស្ពានអាកាសខ្លីៗ រកេតរកូតប៉ុន្មានទៀត នឹងត្រូវសាងសង់លើមហាវិថីសហព័ន្ឋរុស្ស៊ី? ខណៈផ្លូវដ៏មមាញឹកនេះ មានស្ពានអាកាសចំនួនបីរួចហើយ បានបញ្ចប់ការសាងសង់ និងស្ពានថ្មីមួយទៀតត្រៀមសាងសង់នាពេលខាងមុខ។

ជាប្រចាំមហាវិថី ដែលតភ្ជាប់ព្រលានយន្តហោះអន្តរជាតិភ្នំពេញ ទៅកាន់ផ្លូវជាតិលេខ៣ លេខ៤ និងតភ្ជាប់មកកាន់កណ្តាល រាជធានីភ្នំពេញនេះ មានចរាចរណ៍យ៉ាងមមាញឹក ដែលទិដ្ឋភាពជាក់ស្តែង ពេលអ្នកធ្វើដំណើរចុះពីស្ពានអាកាសតិចណូ ពួកគេបានស្ថិតនៅក្នុងជំនន់ចរាចរណ៍ដ៏មមា​ញឹក ហើយស្ពានអាកាស៧មករា (ស្ពានពេទ្យ លោកសង្ឃ) និងស្ពានអាកាសទី៣ គឺស្ពានអាកាសផ្សារដីហុយ នៅតែមិនអាចដោះស្រាយបញ្ហាលំហូរចរាចរណ៍បានដដែល។

សំណួរនៅទីនេះ តើរដ្ឋបាលរាជធានីភ្នំពេញ សាងសង់ស្ពានតាមការនឹកឃើញ ឬបានពិចារណា ទៅលើផែនការមេអភិវឌ្ឍន៍ ទីក្រុងច្បាស់លាស់ ឬនៅបន្តអង្គុយបក់ផ្សែង ដែលមានន័យថា មានការកកស្ទះនៅទីណាសាងសង់ស្ពាននៅទីនោះ ជាជាងគិតពីចក្ខុវិស័យចំពោះមុខថា គួរតែរៀបចំផែនការជាមុន ជាជាងរង់ចាំដោះស្រាយបញ្ហានៅពេលក្រោយ។

ដើមឡើយរាជរដ្ឋាភិបាល គ្រោងសាងសង់ស្ពានអាកាស លើផ្លូវរថភ្លើងចាស់ ចាប់ពីរាជាយក្សស្ម័យយាន ទៅកាន់ព្រលានយន្តហោះអន្តរជាតិភ្នំពេញ ដើម្បីសម្រួលលំហូរចរាចរណ៍ និងកាត់បន្ថយការកកស្ទះចរាចរណ៍ លើមហាវិថីសហព័ន្ឋរុស្ស៊ី ប៉ុន្តែគំរោងនេះត្រូវបានប្រកាស បោះបង់ចោល ដោយសម្តេចតេជោហ៊ុន សែននាយករដ្ឋមន្រ្តីនៃកម្ពុជា ដ៏គួរឲ្យសោកស្តាយ ខណៈអ្នកជំនាញផ្នែកនគរូបនីយកម្មទីក្រុង ធ្លាប់បានកោតសរសើរ និងលើកទឹកចិត្តពីផែនការអភិវឌ្ឍនេះ។

ខណៈបច្ចុប្បន្នរាជធានីភ្នំពេញ មានប្រជាជនរស់នៅប្រមាណ៣លាននាក់ និងប្រជាជនប្រមាណ៣០០,០០០នាក់ បានហូរចូលមករស់នៅទីក្រុងនេះជារៀងរាល់ឆ្នាំ ការសិក្សារបស់ក្រុមហ៊ុន Urban Living Solution បានរកឃើញថា នៅឆ្នាំ២០៣០ ប្រជាជនរស់នៅរាជធានីភ្នំពេញ នឹងកើនដល់៤,៥ ទៅ៥លាននាក់ បញ្ហាចរាចរណ៍ នឹងក្លាយជាឧបសគ្គមួយរារាំងការអភិវឌ្ឍ និងបញ្ហាបំពុលបរិស្ថាន នឹងកើនឡើងកាន់តែអាក្រក់។

ហេតុនេះ តើរដ្ឋបាលរាជធានីភ្នំពេញ គួរមានចក្ខុវិស័យវែងឆ្ងាយជាងនេះ ដោយសាងសង់ស្ពានអាកាសវែងៗ ដើម្បីសម្រួលចរាចរណ៍ឬទេ? ឬបន្តសាងសង់ស្ពានអាកាស “កញ្ចឹប កញ្ចុបបែបនេះ” ដែលការវិនិយោគលើហេដ្ឋារចនាសម្ព័ន្ឋបែបនេះ មិនអាចដោះស្រាយបញ្ហាបានរយៈពេលវែង និងអាចប្រឈមមុខ នឹងការវាយកំទេចចោលនាពេលអនាគត?។

នៅឆ្នាំ២០៣០ លំហូរចរាចរណ៍ពីផ្លូវជាតិសំខាន់ៗ ចូលមកកាន់រាជធានីភ្នំពេញ នឹងមានសភាពកាន់តែអាក្រក់ ជាក់ស្តែងបច្ចុប្បន្នផ្លូវជាតិលេខ៣ ផ្លូវជាតិលេខ៤ និងផ្លូវជាតិលេខ១ បានរងភាពកកស្ទះបណ្តើរៗរួចទៅហើយនាពេលបច្ចុប្ប​ន្ននេះ។

ការសិក្សាលំហូរចរាចរណ៍ សោភ័ណភាពរាជធានីភ្នំពេញ និងផែនការអភិវឌ្ឍន៍រយៈពេលវែង គួរស្ថិតក្នុងការពិចារណា ជាជាងដោះស្រាយបញ្ហាបានត្រឹមរយៈពេលមួយអម្សមខ្លោច គួរតែជាអាទិភាព ខណៈការធ្វើដំណើរ​របស់ពលរដ្ឋ ការចតយានយន្តគ្មានសណ្តាប់ធ្នាប់ និងការមិនយល់ដឹងពីវិធី​សាស្រ្តប្រើប្រាស់ផ្លូវថ្នល់ នៅតែជាបញ្ហាប្រឈមធំមួយរបស់អជ្ញាធររាជធានីភ្នំពេញដែលត្រូវដោះស្រាយ។

ការសិក្សាពីកំនើនប្រជាសាស្រ្តក្នុងទីក្រុង ការសិក្សាពីផែនការហេដ្ឋារចនាសម្ព័ន្ឋច្បាស់​លាស់ ការសិក្សាពីផែនការអភិវឌ្ឍន៍បៃតង និងជាការអភិវឌ្ឍន៍ប្រកបដោយចីរភាព គួរស្ថិតក្នុងផែនការអាទិភាព ជាជាងបន្តអង្គុយបក់ផ្សែង គួរតែផែនការអាទិភាព និងពិចារណាឲ្យបានច្បាស់លាស់ និងគ្រប់ជ្រុងជ្រោយ៕

ដោយៈគង់ សូរិយា

ភ្នំពេញៈ ថ្នាក់ដឹកនាំជាន់ខ្ពស់ក្រុមហ៊ុនចិនធំមួយ បានបង្ហើបឲ្យដឹងថា ក្រុមហ៊ុនចិនជាច្រើនបាន និងកំពុងត្រៀមខ្លួនចូល ទៅវិនិយោគលើតំបន់ឧស្សាហកម្មនៅក្រុងបាវិត ក្នុងខេត្តស្វាយរៀង។

ថ្នាក់ដឹកនាំដដែលបានបង្ហើបថា រដ្ឋាភិបាលកម្ពុជាកំពុងលើកទឹកចិត្ត និងពង្រីកសក្តានុពល តំបន់ឧស្សាហកម្មនៅក្រុងបាវិត កាន់តែធំដោយសារទីក្រុងនេះ ស្ថិតនៅព្រំប្រទល់ប្រទេសវៀតណាម ងាយស្រួលដឹកជញ្ជូនទៅកាន់កំពង់ផែទឹកជ្រៅ និងតភ្ជាប់ជាមួយបណ្តាញផ្លូវអាស៊ានហាយវេ ដែលស្ថិតនៅច្រករបៀងភាគខាងត្បូងអាស៊ាន។
រដ្ឋាភិបាលបានដាក់ក្រុងចំនូនបី ដើម្បីអភិវឌ្ឍន៍វិស័យឧស្សាហកម្មឆ្នាំ​២០១៥ ២០២៥ រួមមានទីក្រុងបាវិត ទីក្រុងប៉ោយប៉ែត និងទីក្រុងព្រះសីហនុ ខេត្តព្រះសីហនុ។

ធនាគារអភិវឌ្ឍន៍អាស៊ីកាលពីពេលថ្មីៗនេះ បានផ្តល់ជំនួយចំនួន១៨០លានដុល្លារអាមេរិក ដើម្បីលើកស្ទួយសុខមាលភាពសង្គម និងបរិស្ថានក្នុងក្រុងបាវិត ក្រុងប៉ោយប៉ែត និងក្រុងបាត់ដំបង ដើម្បីសម្រួលដល់ភស្តុភារកម្ម ប្រព័ន្ឋចម្រោះទឹកស្អាត និងហេដ្ឋារចនាសម្ព័ន្ឋជាច្រើនទៀត។

ថ្នាក់ដឹកនាំាំក្រុមហ៊ុនចិនដដែលបានឲ្យដឹងទៀតថា ផ្លូវល្បឿនលឿនភ្នំពេញ បាវិតបានសិក្សាបញ្ចប់ហើយ ដោយគ្រោយចំណាយទុនវិនិយោគ២០០០លានដុល្លារអាមេរិក។ បច្ចុប្បន្នគំរោងនេះ បានដាក់ទៅកាន់រដ្ឋាភិបាលចិន ដើម្បីពិភាក្សានិងផែនការរៀបចំឥណទាន ហិរញប្បទាននាពេលខាងមុខ។

ក្រុងបាវិតខេត្តស្វាយរៀង ស្ថិតនៅចំណចកណ្តាលរវាងទីក្រុងធំចំនួនពីរ គឺទីក្រុងភ្នំពេញ និងក្រុងហូ ជីម៉ិញ ប្រទេសវៀតណាម ដែលជាខ្សែប ណ្តាញនៃលំហូរពាណិជ្ជកម្ម ការរដឹកជញ្ជូន និងទេសចរណ៍ផងដែរ។

ទីប្រឹក្សាសមាគមអ្នកអភិវឌ្ឍន៍ដីឡូត៍កម្ពុជា លោកយិន លាងគង់បានមានប្រសាសន៍ថា ការរីករាលដាលមេរោគកូវីដ១៩ រយៈពេល២ឆ្នាំមកនេះ បានធ្វើឲ្យទីក្រុងបាវិត ក៏ដូចជាទីក្រុងប៉ោយប៉ែត បានរងភាពស្លោកស្រ​ពោនលើសកម្មភាពសេដ្ឋកិច្ច និងអចលនទ្រព្យ ប៉ុន្តែសម្រាប់ក្រុងបាវិតនឹងមានសន្ទុះ នៃការទិញ លក់អចលនទ្រព្យ នឹងមានសកម្មភាពបណ្តើរៗឡើងវិញនាពេលឆាប់ៗខាងមុខនេះ។

លោកបន្តថា “សកម្មភាពទិញលក់អចលនទ្រព្យ ក្នុងទីក្រុងនេះនឹងអាចចាប់ផ្តើមកំរើកសកម្មឡើងវិញ នៅអំឡុងត្រីមាសទី២ឆ្នាំនេះ ស្របពេលការប្រកាសពីគំរោងផ្លូវល្បឿនលឿន ជាផ្លូវការរបស់រដ្ឋាភិបាល អាចនឹងធ្វើឡើងនៅពេលផ្លូវល្បឿនលឿនភ្នំពេញ ព្រះសីហនុដាក់ឲ្យប្រើប្រាស់ដោយ​សម្តេចតេជោឆ្នាំនេះ”។

លោកបន្តថា “ជាទីក្រុងមួយស្ថិតក្នុងផែនការផ្លួវសូត្ររបស់ចិន ទីក្រុងបាវិតនឹងក្លាយជាមជ្ឈមណ្ឌលភស្តុភាកម្ម មជ្ឈមណ្ឌ​លពាណិជ្ជកម្ម និងល្បែងកំសាន្តដ៏មានសក្តានុពលនាពេលអនាគត”៕

ដោយ: ម៉ាលីស

ភ្នំពេញ: រដ្ឋបាលរាជធានីភ្នំពេញ បាន បើក កិច្ច ប្រជុំពិភាក្សាលើការសាងសង់ស្ពានអាកាស ស្ថិតនៅ ស្របតាម មហាវិថី សហព័ន្ធ រុស្ស៊ី និងវិថី សម្ដេច ចៅហ្វាវាំង គង់ សំអុល ( ផ្លូវ ២០០៤) ស្ថិតនៅ ខណ្ឌ ពោធិ៍ សែន ជ័យ រាជធានី ភ្នំពេញ ក្រោម អធិបតីភាព លោក ឃួង ស្រេង អភិបាល នៃ គណៈអភិបាល រាជធានី ភ្នំពេញ។

ដើម្បី បញ្ចៀស និងកាត់បន្ថយការកកស្ទះចរាចរណ៍ ត្រង់ចំនុចមហាវិថី សហព័ន្ធ រុស្ស៊ី និង វិថី សម្ដេច ចៅហ្វាវាំង គង់ សំអុល ( ផ្លូវ ២០០៤ ) រដ្ឋបាល រាជធានី ភ្នំពេញ កំពុង សិក្សា គម្រោង សាងសង់ ស្ពាន អាកាស មួយ ខ្សែ និង គ្រោងសិក្សាបន្ថែម ផ្លូវ ក្រោមដីមួយខ្សែទៀត ដើម្បីធ្វើឱ្យលំហូរ ចរាចរណ៍ មានភាព ងាយស្រួល ក្នុង ការ ធ្វើដំណើរ។

ស្ពានអាកាសថ្មីមួយ នេះគ្រោងនឹងបើកការដ្ឋានស្ថាបនា ក្រោយពីបើកសម្ពោធដាក់ឲ្យ ប្រើប្រាស់ ជាផ្លូវការនូវស្ពានអាកាស និងផ្លូវក្រោមដីនៃរង្វង់មូលចោមចៅ ។ នៅពេលការដោះស្រាយចរាចរណ៍នៅរង្វង់ មូលចោមចៅ បានល្អប្រសើរហើយវាបែរមកកកស្ទះ ចរាចរណ៍នៅចំណុចស្តុបផ្សារស៊ិនជូរីផ្លាហ្សា ( ផ្លូវ ២០០៤ កែងផ្លូវសហពន្ធរុស្ស៊ី) នេះតែម្ដង ដែលតម្រូវឲ្យរដ្ឋបាល រាជធានីភ្នំពេញត្រូវតែធ្វើការ សិក្សាដើម្បីសាងសង់ស្ពាន អាកា​សថ្មីមួយទៀតនៅតំបន់នេះ៕

ដោយៈ សុផារី

ភ្នំពេញៈ យោងតាមរបាយការណ៍និន្នាការសេដ្ឋកិច្ច-សង្គម នៃក្រសួងសេដ្ឋកិច្ច និងហិរញ្ញវត្ថុ ស្ថានភាពវិនិយោគ មិនទាន់មានភាពល្អប្រសើរនៅឡើយទេ។

ជាក់ស្ដែងក្នុងរយៈពេល១១ខែ ឆ្នាំ២០២១ គម្រោងវិនិយោគឯកជនសរុបមានចំនួន១០គម្រោង បានធ្លាក់ចុះដល់ទៅ៣៤គម្រោង។

តាមរយៈគម្រោងខាងលើនេះ លទ្ធភាពបង្កើតកម្លាំងពលកម្មថ្មីមានប្រមាណជា៨៩ពាន់នាក់ បានធ្លាក់ចុះ២០,៣%។ ទុនវិនិយោគសរុបមានតម្លៃ១៧១៦លានដុល្លារ បានធ្លាក់ចុះ៧២,៨% ធៀបនឹងរយៈពេលដូចគ្នាឆ្នាំមុន។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុ បានមានប្រសាសន៍ថា លំហូរនៃអ្នកវិនិយោគពីបរទេស ចូលមកកាន់ប្រទេសកម្ពុជា ក្នុងឆ្នាំ២០២១នេះមានការធ្លាក់ចុះ គឺជារឿងធម្មតា ដោយសារបញ្ហាប្រឈម នៃវិបត្តិជំងឺកូវីដ១៩ នៅលើពិភពលោកមិនទាន់មានលក្ខណៈធូរស្បើយនៅឡើយ។

លោកបន្តថា “ភាគច្រើននៃការប្រាក់ចុះនេះ បណ្ដាលមកពីការរឹតត្បិតនៃការធ្វើដំណើរ និងការបារម្ភអំពីសុវត្ថិភាពរបស់វិនិយោគិនបរទេស”។

យ៉ាងណាក្តី លោកថាការធ្លាក់ចុះនៃការវិនិយោគនេះ មិនបានធ្វើឱ្យវិស័យអចលនទ្រព្យរបស់កម្ពុជា ជួបនូវវិបត្តិទីផ្សារអចលនទ្រព្យនោះទេ។ លោកថា នេះគឺជាឱកាសអាចពង្រឹងសមត្ថភាព នៃវិនិយោគិនក្នុងស្រុក ព្រោះវិនិយោគិនក្នុងស្រុក នៅតែមានលទ្ធភាពនៃការវិនិយោគ និងជំរុញវិស័យអចលនទ្រព្យកម្ពុជាឱ្យកាន់តែរឹងមាំ។

លោកច្រឹក សុខនីមបានអះអាងថា វិនិយោគិនជាលក្ខណៈបុគ្គលនៅក្នុងស្រុក នៅក្នុងប្រទេសកម្ពុជា នៅតែមានជំនឿចិត្តមុតមាំ ទៅលើវិស័យអចលនទ្រព្យនៅក្នុងប្រទេសកម្ពុជា។ ជាក់ស្តែង ទោះបីស្ថិតក្នុងកំឡុងវិបត្តិក្តី បណ្ដាក្រុមហ៊ុន សមាគមជាសមាជិករបស់សមាគមអ្នកវាយតម្លៃ និងភ្នាក់ងារអចលនវត្ថុសរុប១៣០ក្រុមហ៊ុន ដែលជាក្រុមហ៊ុនអចលនទ្រព្យក្នុងប្រទេសកម្ពុជា នៅតែបន្តសកម្មភាពទិញ លក់ ជួលអចលនទ្រព្យ ប្រសិនបើចលនទ្រព្យទាំងនោះទទួលបានតម្លៃល្អ ព្រមជាមួយរបៀបទូរទាត់ល្អប្រសើរ។

លោកបន្តថា “សកម្មភាពទាំងនេះ សបញ្ជាក់ថាការរីកចម្រើននៃវិនិយោគិនក្នុងស្រុក គឺជាកត្តាសំខាន់ក្នុងការជំរុញឱ្យវិស័យអចលនទ្រព្យ នៅក្នុងប្រទេសកម្ពុជាកាន់តែមានភាពរឹងមាំ”។

ទោះយ៉ាងណាក្តី លោកនៅតែមានសុទិដ្ឋិនិយមថាក្នុងឆ្នាំ២០២២ និងឆ្នាំ២០២៣ ទ្រព្យនិងការវិនិយោគរបស់កម្ពុជា និងមានលក្ខណៈល្អប្រសើរឡើង។

ក្នុងរយៈពេល១១ខែ ឆ្នាំ២០២១ នេះ ក្រសួងរៀបចំដែនដី នគរូបនីយកម្ម និងសំណង់ បានផ្ដល់លិខិតអនុញ្ញាត ដល់គម្រោងសំណង់សរុប ៣៩២៥គម្រោង ដែលធ្លាក់ចុះ៤០៣ គម្រោង បើធៀបនឹងរយៈដូចគ្នាកាលពីឆ្នាំមុន។

របាយការណ៍ចេញដោយក្រសួងបញ្ជាក់ថា តម្លៃសរុបនៃគម្រោងទាំងនោះមាន៥៤៥៦លានដុល្លារ ដែលធ្លាក់ចុះ២២,១%។ ក្នុងនោះ ប្រភេទសំណង់លំនៅដ្ឋានមានចំនួន៣២៨៤ គម្រោង ស្មើនឹង៨៦,២% នៃសំណើរសុំសាងសង់សរុប ធ្លាក់ចុះ២៦៨គម្រោង បើធៀបនឹងរយៈពេលដូចគ្នាឆ្នាំមុន៕