ដោយ៖ សុខុម

វិភាគ: ខណៈពលរដ្ឋអាមេរិកបន្តទទួលការចាក់វ៉ាក់សាំង សេដ្ឋកិច្ចអាមេរិកក៏កំពុងបន្តងើបឡើងវិញជាលំដាប់ដែរ ក្រោយដាំក្បាលចុះក្នុងអំឡុងដំណាក់កាលដ៏ធ្ងន់ធ្ងរបំផុត នៃការរីករាលដាលវីរុសកូវីដ-១៩។

ប៉ុន្តែទន្ទឹមនឹងវឌ្ឍនភាពគួរឱ្យសាទរនេះ ក៏នៅតែមានបញ្ហាប្រឈមមួយចំនួននៅឡើយ ដែលអាមេរិកចាំបាច់ត្រូវប្រុងប្រយ័ត្នជៀសវាងឱ្យបាន ដើម្បីជួយស្ដារសេដ្ឋកិច្ចឱ្យហក់ងើបឡើងពេញលេញតាមដែលអាចធ្វើទៅបាន។

វាពិតជាសំខាន់ណាស់ ដែលប្រធានាធិបតីអាមេរិក លោក ចូ បៃឌិន និងថ្នាក់ដឹកនាំផ្សេងៗទៀតនៅក្នុងរដ្ឋការរបស់លោកបន្តស្វែងរកមធ្យោបាយកម្ចាត់ចោលនូវសម្ពាធហួសហេតុដែលមានមកលើសេដ្ឋកិច្ច ហើយបង្កលក្ខណៈអំណោយផលបំផុត ដើម្បីជួយឱ្យសេដ្ឋកិច្ចងើបឡើងវិញយ៉ាងឆាប់រហ័ស និងរឹងមាំតាមដែលអាចធ្វើទៅបាន។ ចំណុចស្នូលដែលថ្នាក់ដឹកនាំអាមេរិក គួរចាប់ផ្ដើមនោះគឺ បញ្ហាសង្គ្រាមពាណិជ្ជកម្មដែលរដ្ឋការលោក ដូណាល់ ត្រាំ បានចាប់ផ្ដើមបញ្ឆេះឡើងកាលពីឆ្នាំ២០១៨។

ដោយព្យាយាមបញ្ចេញឥទ្ធិពលរបស់លោកនៅក្នុងការចរចាពាណិជ្ជកម្មជាមួយមហាយក្សចិន អតីតប្រធានាធិបតី ដូណាល់ ត្រាំ បានយកបញ្ហាដំឡើងពន្ធមកដាក់គំនាបលើប្រទេសចិន ហើយជាលទ្ធផលនាពេលបច្ចុប្បន្ន ទណ្ឌកម្មពន្ធនោះបានឈានដល់ទំហំជាង១០០ពាន់លានដុល្លារអាមេរិក លើទំនិញតម្លៃជាង៣៥០ពាន់លានដុល្លារអាមេរិក ដែលបណ្ដាក្រុមហ៊ុនអាមេរិកនាំចូលពីប្រទេសចិន។

លោក ដូណាល់ ត្រាំ បានអះអាងថា ពន្ធទាំងនេះនឹងជួយធ្វើឱ្យក្រុមហ៊ុនសហគ្រាសនានាវិលត្រលប់ចូលមកកាន់ទឹកដីសហរដ្ឋអាមេរិកវិញ ជួយបង្កើតការងារជូនពលរដ្ឋអាមេរិក ហើយនឹងធ្វើឱ្យសេដ្ឋកិច្ចអាមេរិកមានប្រៀបជាងសេដ្ឋកិច្ចប្រទេសចិន។

ប៉ុន្តែពន្ធទាំងនេះគឺមិនអាចជួយអ្វីបានឡើយ។ ការសិក្សាស្រាវជ្រាវថ្មីបានបញ្ជាក់ថា អ្វីដែលស្ដែងឱ្យឃើញច្បាស់រួចមកហើយគឺ៖ សង្គ្រាមពាណិជ្ជកម្មរបស់រដ្ឋការលោក ដូណាល់ ត្រាំ ជាមួយប្រទេសចិន មិនត្រឹមតែបរាជ័យនៅក្នុងការសម្រេចគោលដៅរបស់ខ្លួនប៉ុណ្ណោះទេ ប៉ុន្តែថែមទាំងបានជះផលអាក្រក់មកលើសេដ្ឋកិច្ចសហរដ្ឋអាមេរិក ទៀតផង។

ដោយសារតែពន្ធគយគឺជាពន្ធ ដែលក្រុមហ៊ុននាំចូលអាមេរិកជាអ្នករ៉ាប់រងបង់ជូនរដ្ឋាភិបាលអាមេរិក សម្ភារៈ និងទំនិញផ្សេងៗដែលក្រុមហ៊ុនសហគ្រាសនានាត្រូវការដើម្បីធ្វើប្រតិបត្តិការបានហក់ឡើងថ្លៃជាលំដាប់ ហើយពួកគេត្រូវបង្ខំចិត្តបង់ពន្ធទាំងនេះដោយខ្លួនឯង ឬ ក៏ទម្លាក់បន្តទៅលើអតិថិជនដែលជាអ្នកប្រើប្រាស់។

ដូចនេះវាសរបង្ហាញឱ្យឃើញថា សង្គ្រាមពាណិជ្ជកម្មនេះបន្តកាន់តែយូរ ក្រុមហ៊ុនសហគ្រាសនានាកាន់តែពិបាកទ្រាំទ្រ។

រដ្ឋមន្ត្រីរតនាគារអាមេរិក លោកស្រី Janet Yellen បានលើកឡើងយ៉ាងត្រឹមត្រូវនៅឆ្នាំនេះថា ពន្ធគយ “ជះផលប៉ះពាល់ដល់ពលរដ្ឋអាមេរិក ដែលជាអ្នកប្រើប្រាស់” ហើយឥឡូវនេះរដ្ឋការលោក ចូ បៃឌិន មានឱកាសដោះស្រាយបញ្ហានេះដែលបាននិងកំពុងបំផ្លាញសេដ្ឋកិច្ចអាមេរិក ចាប់តាំងពីអតីតប្រធានាធិបតី ដូណាល់ ត្រាំ បានចាប់ផ្តើមបញ្ឆេះសង្រ្គាមពាណិជ្ជកម្មនេះកាលជាង៣ឆ្នាំមុន។

ជៀសវាងពិចារណាអនុវត្តការដំឡើងពន្ធបន្ថែមទៀត ដូចដែលសារព័ត៌មានបានចុះផ្សាយកាលពេលថ្មីៗនេះ រដ្ឋការលោក ចូ បៃឌិន គួរតែស្តាប់យោបល់របស់លោកស្រី Janet Yellen ហើយប្រញាប់បញ្ចប់សង្គ្រាមពាណិជ្ជកម្មនេះជាបន្ទាន់។

ពន្ធថ្មីនឹងមិនអាចជួយអ្វីបានឡើយ ពោលគឺវាមានតែបង្កផលប៉ះពាល់មកលើសេដ្ឋកិច្ចអាមេរិក កាន់តែធ្ងន់ធ្ងរប៉ុណ្ណោះ។ ពលរដ្ឋអាមេរិក ចង់ឱ្យសង្គ្រាមពាណិជ្ជកម្មនេះរលត់ ហើយពិតជាមិនត្រូវការឱ្យវាបន្តទៅមុខទៀតឡើយ៕

ដោយ៖ សុធារី

ភ្នំពេញ ៖ មានមនុស្សមិនតិចនាក់នោះទេ ដែលជាពិសេសអ្នកដែលប្រឡូកការងារជាភ្នាក់ងារលក់អចលនទ្រព្យតែងត្អូញត្អែរ ពីការធ្លាក់ចុះនៃការលក់របស់ខ្លួនដោយដាក់បន្ទុកទៅលើវិបត្តិជំងឺកូវីដជាសំខាន់ រហូតមានអ្នកខ្លះស្ទើរបោះបង់ចោលការងារហើយងាកទៅរកអាជីពថ្មីជំនួសក៏មាន។

លោក វិន ឈុនហ៊ាត ប្រធានក្រុមប្រឹក្សាភិបាលក្រុមហ៊ុនភ្នាក់ងារអចលនទ្រព្យ DEY THMEY Real Estate បានទទួលស្គាល់ថា នៅក្នុងបរិបទនេះ មិនមែនមានតែវិស័យអចលនទ្រព្យឬទីផ្សារទិញលក់អចលនវត្ថុនោះទេ ដែលទទួលរងនូវផលប៉ះពាល់ ពោលគឺស្ទើរតែគ្រប់វិស័យទាំងអស់ ដែលមានការធ្លាក់ចុះ ប៉ុន្តែសម្រាប់អ្នកដែលមានជំនាញ មានភាពឆ្លាតវៃនៅតែអាចលក់បានគ្រាន់តែមានចំនួនតិចជាងពេលមុនតែប៉ុណ្ណោះ។

លោកបានមានប្រសាសន៍បញ្ជាក់ថា “ភាគច្រើនភាពបរាជ័យរបស់ភ្នាក់ងារ គឺកើតចេញពីកត្តាសំខាន់ៗចំនួន៤គឺទី១ ខ្វះខាតផ្នែកចំណេះដឹងពីទីផ្សារដែលពាក់ព័ន្ធ ទី២ ខ្វះជំនាញផ្នែកទំនាក់ទំនងទី៣ ខ្វះស្មោះត្រង់ និងភាពអត់ធ្មត់ និងទី៤ ខ្វះភាពជំនាញក្នុងការប្រើប្រាស់បណ្តាញសង្គមដែលជាមធ្យោបាយមួយយ៉ាងសំខាន់និងចាំបាច់បំផុតសម្រាប់ជាជំនួយដល់ការលក់នៅពេលបច្ចុប្បន្ន”។

លោកបានបញ្ជាក់ថា នៅក្នុងទីផ្សារអចលនទ្រព្យមានក្រុមហ៊ុនចុះបញ្ជីនិងមិនចុះបញ្ជីសរុប មិនក្រោម៣០០ក្រុមហ៊ុននោះទេ ហើយមានភ្នាក់ងារលក់ រាយរាប់ពាន់នាក់ដែលកំពុងប្រតិបត្តិនៅក្នុងទីផ្សាររួម ដែលកំពុងជួបបញ្ហា ប៉ុន្តែជាលទ្ធផលក្នុងចំណោមអ្នកទាំងនោះនៅតែមានអ្នកខ្លះអាចទទួលបានផលប្រយោជន៍ប្រាក់ចំណេញពីការងារជាភ្នាក់ងាររបស់ពួកគេ ដែលកើតចេញពីភាពឆ្លាតវៃ ជំនាញនិងកិច្ចទំនាក់ទំនង។

លោកបានបញ្ជាក់ថា មិនថាចំពោះការផ្សព្វផ្សាយលក់គម្រោងខុនដូ គម្រោងលំនៅដ្ឋាន ឬជាគម្រោងដីឡូតិ៍នៅតាមតំបន់ជាយក្រុងនិងតាមបណ្តាខេត្តនោះទេ ប្រសិនបើខ្វះចំណុចណាមួយនៅក្នុងចំណោមទាំង៤ខាងលើនេះនោះភាពជោគជ័យទៅលើការលក់គម្រោងអាចនឹងពិបាកទទួលបានបន្តិច។ ដូច្នេះ សម្រាប់អ្នកដែលមានអាជីព និងកំពុងអនុវត្តនៅក្នុងទីផ្សារមួយនេះត្រូវបំពេញនូវចំណុចខ្វះខាតរបស់ខ្លួនបន្ថែម ដើម្បីអាចឈានទៅរកការសម្រេចគោលដៅបាន៕

ដោយ៖ វឌ្ឍនៈ

ភ្នំពេញ ៖ នៅក្នុងវិបត្តិកូវីដ១៩ ក្រុមហ៊ុនអចលទ្រព្យស្ទើរតែទាំងអស់បានរងផលប៉ះពាល់ គ្រាន់តែខ្លះតិចតួច ខ្លះទៀតធ្ងន់ធ្ងរ។ លោកឧកញ៉ាបណ្ឌិត គីម ហ៊ាង ដែលជាអ្នកអភិវឌ្ឍន៍អចលនទ្រព្យមួយរូបនៅកម្ពុជា ក៏បានបញ្ជាក់ថា បានទទួលរងផលប៉ះពាល់ដែរ ប៉ុន្តែក្រុមហ៊ុនរបស់លោកនៅតែអាចដំណើរការទៅមុខ ។ តើលោកមានយុទ្ធសាស្ត្របែបណានៅក្នុងការដោះស្រាយក្នុងកំឡុងវិបត្តិរយៈពេល២ឆ្នាំកន្លងទៅនេះ?

លោកឧកញ៉ាបណ្ឌិត គីម ហ៊ាង បានថ្លែងនៅក្នុងវេទិកាមួយកាលពីពេលថ្មីៗនេះឱ្យដឹងថា យុទ្ធសាស្ត្រដ៏សាមញ្ញបំផុតរបស់លោកក្នុងដំណើរការក្រុមហ៊ុនអចលនទ្រព្យ គឺលក់អ្វី ត្រូវលក់ទៅឱ្យមនុស្សដែលមានលុយទិញ ឬលក់ទៅឱ្យអ្នកណាដែលចង់ទិញ និងសាងសង់អ្វីដែលមានតម្រូវការទីផ្សារជាក់ស្ដែង។

លោកឧកញ៉ាបណ្ឌិតបន្តថា បើនិយាយពីក្រុមហ៊ុនអចលនទ្រព្យ អាចនិយាយបានក្រុមហ៊ុនរបស់លោកគឺជាក្រុមហ៊ុនដែលធ្វើការនៅក្នុងផ្នែកអចលនទ្រព្យពី A ដល់ Z ដែលមានន័យថា មានសេវាកម្មទាក់ទងនឹងអចលនទ្រព្យសឹងតែគ្រប់ផ្នែក។

នៅក្នុងវិបត្តិកូវីដ១៩ យើងអាចនិយាយថាវិស័យអចលនទ្រព្យមិនថាទិញលក់ជួល ផ្ទះ ខុនដូ និងដីធ្លីនោះទេ សុទ្ធតែទទួលផលប៉ះពាល់ ហើយបើសិនជាអ្នកណានិយាយមិនប៉ះពាល់គឺកុហក់ហើយ ជាក់ស្ដែងសម្រាប់ក្រុមហ៊ុនលោក ក្នុងឆ្នាំ២០២១កន្លងទៅ ការលក់ខុនដូតម្លៃខ្ពស់ៗ មិនទទួបានមួយគម្រោងសោះ ហើយលោកក៏ជឿថាក្រុមហ៊ុនដទៃទៀតក៏មានបញ្ហាដូចគ្នានេះដែរ។ អ្នកអភិវឌ្ឍន៍ដីឡូត៏ ផ្ទះដែលមិនសូវមានទុនច្រើនគឺនៅគាំងមួយកម្រិត ចំណែកអ្នកដែលមានទុនគេនៅបន្តសង់ពីព្រោះថាបើលក់មិនដាច់ក៏នៅតែជារបស់គេដដែល។

លោកឧកញ៉ាបណ្ឌិតបន្ថែមថា តាមពិតទៅកូវីដ១៩បានធ្វើឱ្យប៉ះពាល់ដល់អ្នកដែលមានចំណូលទាបនិងមធ្យម តែសម្រាប់អ្នកដែលមានលុយ គឺមិនបង្កផលប៉ះពាល់ច្រើននោះទេ គ្រាន់តែអ្នកមានមិនទាន់បញ្ចេញទុន មិនបញ្ចេញលុយរបស់គេក្នុងការវិនិយោគ តែនៅតែមានដំណើរការគ្រាន់តែមិនទូលំទូលាយដូចមុនតែប៉ុណ្ណោះ៕

ដោយ៖ ស្រីលិះ

ថៃ៖ បើយោងតាមការសិក្សាមួយរបស់ Terra Media and Consulting នៅក្នុងប្រទេសថៃ បានបញ្ជាក់ថា មនុស្សដែលស្ថិតក្នុងជំនាន់អាយុខុសគ្នាមានតម្រូវការនិងនិន្នាការនៃការទិញផ្ទះដែឡខុសគ្នា។

មនុស្សក្នុងជំនាន់ Gen Y (អាយុ ២៦-៤១ឆ្នាំ) និង Gen Z (១០-២៥ឆ្នាំ) ដែលភាគច្រើនអតិថិជនទិញផ្ទះ នៅតែមានការព្រួយបារម្ភលើស្ថិរភាពប្រាក់ចំណូល និងភាពមិនប្រាកដប្រជាក្នុងពេលអនាគត ខណៈពេលដែលម្ចាស់អចលនទ្រព្យដែលស្ថិតក្នុងជំនាន់អាយុ Gen X (៤២-៥៧ឆ្នាំ) ហាក់ដូចជាមិនសូវប៉ះពាល់ពីវិបត្តិជំងឺឆ្លងនេះ។

នាយកគ្រប់គ្រង Terra Media and Consulting លោកស្រី Sumitra Wongpakdee បានមានប្រសាសន៍ថា កូវីដ១៩ ប៉ះពាល់កាន់តែខ្លាំងលើអ្នកដែលមានអាយុក្រោម៤០ឆ្នាំ ដោយសារមនុស្សដែលមានអាយុចាប់ពី៤០ឆ្នាំឡើងទៅមានភាពចាស់ទុំជាង ហើយអាចសម្របទៅតាមស្ថានភាពបាន។

លោកស្រីថា “ក្រោយឆ្នាំ២០២០ ក្រុមអ្នកទិញផ្ទះ Gen X បានងើបឡើងវិញពីផលប៉ះពាល់ ហើយត្រលប់ទៅប្រើប្រាស់ជីវិតធម្មតារបស់ពួកគាត់វិញ។ អ្នកទិញផ្ទះ ដែលស្ថិតក្នុងជំនាន់អាយុនេះ បានរងផលប៉ះពាល់តិចតួចលើប្រាក់ចំណូលរបស់ពួកគេ។ ពួកគេនៅតែសម្លឹងមើលការបញ្ចុះតម្លៃ និងការផ្សព្វផ្សាយដែលផ្តល់ជូនដោយអ្នកអភិវឌ្ឍន៍។”

ទោះជាយ៉ាងណាក្តី លោកស្រី Sumitra បាននិយាយថា Gen Y និង Z នៅតែទទួលរងពីជំងឺរាតត្បាតដោយប្រឈមនឹងអត្រាប្រាក់ចំណូលទាបនិងភាពមិនច្បាស់លាស់នៃអាជីវកម្ម។ លោកស្រីថា “Gen Y និង Z មានការព្រួយបារម្ភក្នុងការធ្វើឱ្យមានតុល្យភាពតម្រូវការរបស់ពួកគេ។ ពួកគេបានចំណាយពេលយូរដើម្បីពិចារណាការទិញ ដោយពន្យារពេលការសម្រេចចិត្តទិញរហូតដល់មួយឆ្នាំ”។

Terra Media បានធ្វើបទសម្ភាសន៍ស្រាវជ្រាវទីផ្សារនៅថ្ងៃទី ២២-២៥ ខែវិច្ឆិកា ក្នុងចំណោមក្រុមផ្តោតសំខាន់ចំនួន៧ ដែលរួមមានសមាជិក Gen X, Y និង Z ដែលមានអាយុពី ២២-៥៣ ឆ្នាំ ដែលមានបំណងទិញខុនដូ ផ្ទះជួល ឬផ្ទះតែមួយក្នុងរយៈពេលពីរឆ្នាំ។ Gen X និង Y មានប្រាក់ចំណូលផ្ទាល់ខ្លួនច្រើនជាង ១,៥០០ដុល្លាអាមេរិក ក្នុងមួយខែ ខណៈ Gen Z មានយ៉ាងហោចណាស់១,០០០ ដុល្លាអាមេរិក ក្នុងមួយខែ។

យោងតាមការស្រាវជ្រាវនេះបានបង្ហាញថា ជំងឺរាតត្បាតកូវីដ១៩ មានផលប៉ះពាល់ដល់ការសម្រេចចិត្តក្នុងការទិញផ្ទះថ្មីរបស់ជំនាន់អាយុនីមួយៗ។

អ្នកទិញផ្ទះ Gen Z មានភាពមិនច្បាស់លាស់អំពីអនាគត ហើយពួកគេភាគច្រើនត្រូវការស្វែងរកការងារទីពីរ។ ទោះជាយ៉ាងណាក៏ដោយ ពួកគេនៅតែចង់ទិញផ្ទះមួយ ព្រោះវាត្រូវបានគេមើលឃើញថាជាកន្លែងសុវត្ថិភាពសម្រាប់ធ្វើការ និងសម្រេចបាននូវគោលដៅរបស់ពួកគេ។

Gen Y ដែលប្រាក់ចំណូលមានស្ថេរភាពជាង ប្រឈមនឹងប្រាក់ចំណូលទាប និងសុវត្ថិភាពការងារ ប៉ុន្តែវិបត្តិមិនបានផ្លាស់ប្តូរទស្សនៈរបស់ពួកគេលើការកាន់កាប់អចលនទ្រព្យទេ ដោយសារអចលនទ្រព្យត្រូវបានគេមើលឃើញថាជាសន្តិសុខរយៈពេលវែង។

ទន្ទឹមនឹងនេះដែរ Gen X ពិចារណាទិញផ្ទះ ដោយសារផ្តល់អត្រាការប្រាក់ ដែលមានតម្លៃថោក ហើយ នៅពេលជ្រើសរើសផ្ទះ Gen X បាននិយាយថាពួកគេត្រូវការកន្លែងមួយ ដើម្បីចំណាយពេលជាមួយគ្រួសារ និងធ្វើការពីផ្ទះបាន៕