អង់គ្លេសប្រកាសផ្ដល់ប្រាក់ឈ្នួលដល់ពលរដ្ឋដែលសុខចិត្តជួយទទួលជនភៀសខ្លួនអ៊ុយក្រែនឱ្យស្នាក់នៅ

ដោយៈ សុខុម

ទីក្រុងឡុងដ៍: អង់គ្លេស ប្រកាសផ្តល់ប្រាក់ឈ្នួល ដល់ពលរដ្ឋដែលសុខចិត្ត ជួយផ្ដល់កន្លែងជ្រកកោនដល់ប្រជាជនអ៊ុយក្រែន ដែលរត់ចេញពីសង្គ្រាមឈ្លានពានពីសំណាក់រុស្ស៊ី ខណៈរដ្ឋាភិបាលប្រទេសនេះ ព្យាយាមបង្វែងដានការខឹងសម្បារ ចំពោះការឆ្លើយតបរបស់ខ្លួន ទៅនឹងវិបត្តិជនភៀសខ្លួន ដែលរីករាលដាលលឿនបំផុតនៅអឺរ៉ុប ចាប់តាំងពីសង្គ្រាមលោកលើកទី២ នេះ។

រដ្ឋាភិបាលអង់គ្លេស និយាយកាលពីថ្ងៃអាទិត្យ ទី១៣ មីនា ថា គម្រោងថ្មី ដែលមានឈ្មោះថា Homes for Ukraine (ផ្ទះសម្រាប់ប្រជាជនអ៊ុយក្រែន) នេះនឹងអនុញ្ញាតឱ្យជនភៀសខ្លួន ពីសង្គ្រាមមកកាន់ប្រទេ​សអង់គ្លេស ទោះបីជាពួកគេមិនមានទំនាក់ទំនងគ្រួសារក៏ដោយ។

រដ្ឋាភិបាលអង់គ្លេស នឹងបង់ថ្លៃឈ្នួលប្រចាំខែចំនួន៤៥៦ដុល្លារអាមេរិក ប្រសិនបើផ្ទះណាអាចផ្តល់បន្ទប់ទំនេរមួយ ឬ អនុញ្ញាតឱ្យពួកគេស្នាក់នៅជាមួយបណ្ដោះអាសន្នបានយ៉ាងតិចរយៈពេល៦ខែ។

នាយករដ្ឋមន្ត្រីអង់គ្លេស លោក Boris Johnson បានព្យាយាមបង្ហា​ញថា ប្រទេសអង់គ្លេស ជាអ្នកជួយដឹកនាំការឆ្លើយតបជាសកល ចំពោះឈ្លានពានពីសំណាក់ប្រទេសរុស្ស៊ី ប៉ុន្តែរដ្ឋាភិបាលរបស់លោកបានប្រឈមនឹងការរិះគន់ ចំពោះការពន្យារពេលទទួលយកជនភៀសខ្លួន។

ក្រុមសមាជិកសភាមកពីគ្រប់គណបក្សនយោបាយធំៗ បានរិះគន់ការទទូចចង់បានរបស់រដ្ឋាភិបាល ដែលទាមទារឱ្យប្រជាជនអ៊ុយក្រែន ស្វះស្វែ​ងសុំទិដ្ឋាការ និងឆ្លងកាត់ការធ្វើតេស្តសុខភាព មុនពេលមកដល់ប្រទេសអង់គ្លេស។

សមាជិកសភាទាំងនោះបានលើកឡើងថា ការទាមទារបែបនេះគឺមានន័យថា រដ្ឋាភិបាលអង់គ្លេស យកបញ្ហាការិយាធិបតេយ្យ ធ្វើជាអាទិភាពសំខាន់ជាងការគិតគូ ពីសុខុមាលភាពរបស់អ្នក ដែលភៀសខ្លួនចេញពីសង្គ្រាម។
រដ្ឋាភិបាលនិយាយថា ក្រោមកម្មវិធីថ្មីនេះ សាធារណជន អង្គការសប្បុរសធម៌ អាជីវកម្ម និងក្រុមសហគមន៍នានា គួរតែមានលទ្ធភាពផ្តល់កន្លែងស្នាក់នៅ ដល់ជនភៀសខ្លួនអ៊ុយក្រែន តាមរយៈទំព័រវេប(Web page) មួយនៅត្រឹមដំណាច់សប្តាហ៍ក្រោយ៕ Reuters៕

លោកជុំ កុសលៈការអភិវឌ្ឍន៍ភ្ជាប់ជាមួយពាក្យ “ជានិរន្តរ”

ដោយៈគង់ ម៉ាលីន

ភ្នំពេញៈ ទីប្រឹក្សាផ្ទាល់សម្តេចតេជោហ៊ុន សែននាយករដ្ឋមន្រ្តីនៃកម្ពុជា និងជារដ្ឋលេខាធិការក្រសួងព៌តមាន លោកជុំ កុសលបានលើកឡើងថាការអភិវឌ្ឍន៍ភ្ជាប់ជាមួយពាក្យជា “និរន្តរ” គឺអភិវឌ្ឍឥតចន្លោះ ជានិច្ច ឥតស្រាក ឥតឈប់ ឥតល្ហែ។

លោកបានសរសេរលើបណ្តាញ ទំនាក់ទំនងសង្គមរបស់លោក កាលពីរាត្រីថ្ងៃទី១៣ មិនាកន្លងមកថា បើនិយាយពីពេលវេលា ដែលកម្ពុជាបាត់បង់ឱកាសគឺជិត៣០ឆ្នាំ និងចាប់ផ្តើមមានឱកាសពេញលេញ ក្រោយបញ្ចប់សង្គ្រាមទាំងស្រុងក្នុងឆ្នាំ១៩៩៨ ។

លោកបន្តថា “ដូច្នេះឱកាសអភិវឌ្ឍប្រទេស និងពេលវេលាបាត់បង់នៅមិនទាន់ស្មើគ្នានៅឡើយទេ ប៉ុន្តែដោយសារតែអំណោយផលល្អ ពីកត្តាសន្តិភាព និងស្ថិរភាពក្រោមការដឹកនាំដ៏ឈ្លាសវៃ របស់សម្តេចតេជោហ៊ុន សែន ទើបការអភិវឌ្ឍន៍ប្រទេស មានសន្ទុះលឿនហួសពីការស្មាន”។

លោក​បន្ថែមថា​ “នេះគឺជាសច្ចភាព ! មានតែមនុស្សប្រើវិចារណញ្ញាណប៉ុណ្ណោះ ដែលមានសុភនិច្ឆ័យទទួលស្គាល់ការពិត និយាយពិតពីភាពជាក់ស្តែងនៃកម្ពុជា”។

លោកជុំ កុសល ក៏បានផ្តល់កិត្តិយសដ៏ខ្ពស់ខ្ពស់ ធ្វើជាឧត្តមទីប្រឹក្សានៃគេហទំព័រ Propertyarea.asia ផងដែរ៕

លោកឧកញ៉ាលឹម ហេងៈអ្នកវិនិយោគចិនចាប់ផ្តើមវិលមកកម្ពុជាហើយ

ដោយៈគង់ សូរិយា

ភ្នំពេញៈ អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានមានប្រសាសន៍ឲ្យដឹងថា អ្នកវិនិយោគចិន បានចាប់ផ្តើមវិលមកកម្ពុជាឡើងវិញហើយ ស្របពេលស្ថានភាពសេដ្ឋកិច្ចកាន់តែប្រសើរ។

លោកបានមានប្រសាសន៍ឲ្យដឹងកាលពីចុងសប្តាហ៍មុនថា ដោយ​សា​រទំនាក់ទំនងល្អ រវាងប្រមុខរដ្ឋាភិបាលនៃប្រទេសទាំងពីរ ការចូលជាធរមាននៃកិច្ចព្រមព្រៀងពាណិជ្ជកម្មសេរីកម្ពុជា ចិន ការចូលជាធរមាននៃកិច្ចព្រមព្រៀងភាពជាដៃគូសេដ្ឋកិច្ច តំបន់គ្រប់ជ្រុងជ្រោយ (RCEP) និងការត្រៀមចុះ​កិច្ចព្រមព្រៀង ជាមួយបណ្តាប្រទេសដៃគូដទៃទៀត បានធ្វើឲ្យកម្ពុជាក្លាយជាប្រទេសមួយ ស្ថិតក្នុងក្រសែភ្នែកអ្នកវិនិយោគអន្តរជាតិ ពិសេសអ្នកវិនិយោគមកពីប្រទេសចិន។

លោកឧកញ៉ាបានបន្តថា “ទោះជាយ៉ាងណាសង្រ្គាមរវាងរុស្ស៊ី និងអ៊ុយក្រែន ក៏បានបង្អាក់ដំណើរត្រលប់របស់ចិនខ្លះៗផងដែរ ពិសេសបានបង្អាក់ដល់ខ្សច្រវ៉ាក់នៃសេដ្ឋកិច្ចពិភពលោក”។

ជាមួយគ្នានេះ លោកឃាង ភារម្យអ្នកនាំពាក្យរដ្ឋបាលខេត្តព្រះសីហនុ ទីក្រុងដែលមានការរីកចម្រើនដ៏លឿន ស្ទើរមិនគួរឲ្យជឿ ដោយសារកំនើននៃការវិនិយោគយ៉ាងគំហុករបស់ចិន បានមានប្រសាសន៍ឲ្យដឹងស្រដៀងគ្នាថា សេដ្ឋកិច្ចខេត្តព្រះសីហនុ បានចាប់ផ្តើមកំរើកឡើងវិញបណ្តើរៗ ដោយ​សារការវិលត្រលប់របស់ជនជាតិចិន និងអ្នកវិនិយោគចិនមួយចំនួន និងដោយសារការគ្រប់គ្រងជំងឺកូវីដបានល្អ ពិសេសការកើនឡើងនូវលំហូរទេស​ចរណ៍ក្នុងស្រុក បន្ទាប់ពីរាជរដ្ឋាភិបាលបានបើកដំណើរការ សេដ្ឋកិច្ចឡើងវិញ។

លោកបន្តថា “យ៉ាងណាចំនួននៃវិនិយោគិនចិនថ្មីៗ មិនសូវមានមកច្រើននៅឡើយទេ ភាគច្រើនជាអ្នកវិនិយោគចាស់ៗបានត្រលប់មកវិញ”។

ប្រជាពលរដ្ឋមួយរូបរស់នៅក្រុងព្រះសីហនុ បានលើកឡើងក្នុងលក្ខ ខ័ណ្ឌមិនបញ្ចេញឈ្មោះថា ទីផ្សារខេត្តព្រះសីហនុ ពិតជាមានកំណើនជនជាតិចិនឡើងវិញ ប៉ុន្តែមិនទាន់មានចំនួនច្រើននៅឡើយ បើធៀបនឹងមុនពេលបិទហ្គេមអនឡាញ ប៉ុន្តែការមករបស់ជនជាតិចិនលើកនេះ ពួកគេទំនងមិនបានស្ពាយលុយមកច្រើនដូចពីមុនឡើយ។

លោកបន្តថា “ចិនមកតែភាគច្រើនមកស្នាក់នៅតាមសណ្ឋាគារ និងកាស៊ីណូមួយចំនួន ពួកគេមិនសូវចេញក្រៅនោះទេ”៕

វិភាគៈហេតុអីចិនមិនថ្កោលទោសរុស្ស៊ី តើជំហរចិនស្ថិតនៅខាងណាពិតប្រាកដ?

ដោយៈសហសេវិក

អន្តរជាតិៈ បណ្ដាប្រទេសលោកខាងលិច ដឹកនាំដោយសហរដ្ឋអាមេរិក បានថ្កោលទោស និងកំពុងបង្កើនការដាក់ទណ្ឌកម្មសេដ្ឋកិច្ច ប្រឆាំងនឹង រុស្ស៊ី ជុំវិញសង្រ្គាមនៅអ៊ុយក្រែន ដែលលោក ពូទីន ហៅថាជា “ប្រតិបត្តិការយោធាពិសេស”។

អាមេរិក និងសម្ពន្ធមិត្តអឺរ៉ុប ក៏បានអំពាវនាវឱ្យចិនថ្កោលទោស សកម្ម​ភាពរបស់រុស្ស៊ី ដែលពួកគេចាត់ទុកថាជាទង្វើឈ្លានពានផងដែរ ប៉ុន្តែចាប់តាំងពីលោក ពូទីន បញ្ជាឱ្យកងទ័ពរុស្ស៊ីវាយលុកចូលអ៊ុយក្រែន កាលពីថ្ងៃទី២៤ ខែកុម្ភៈមក ចិនហាក់ប្រកាន់ជំហរមិនច្បាស់លាស់។

តាមរយៈសេចក្ដីថ្លែងការណ៍ ចេញផ្សាយជាបន្តបន្ទាប់ដោយក្រសួងការបរទេសចិន, ទីក្រុងប៉េកាំង មិនបានគាំទ្រសង្រ្គាមរបស់រុស្ស៊ី នៅអ៊ុយក្រែនទេ តែក៏មិនបានថ្កោលទោសរុស្ស៊ីនោះដែរ។ ម្លោះហើយសំណួរត្រូវបាន​បោទសួរថា តើចិនកំពុងគិតអ្វី ហើយចិនឈរនៅខាងណាឱ្យប្រាកដ?

*តើលោក ពូទីន ប្រាប់លោក ស៊ី ជិនពីង ជាមុនពីប្រតិបត្តិការយោធានៅអ៊ុយក្រែន ឬ?
យោងតាមកាសែតអាមេរិក New York Times ដោយផ្អែកលើប្រភពដែលខ្លួនទទួលបានពីក្រុមមន្ត្រីអាមេរិក បានឱ្យដឹងកាលពីដើមខែមីនា កន្លងទៅថា ចិនបានដឹងជាមុនទៅហើយ ពីប្រតិបត្តិការយោធារបស់លោក ពូទីន ដោយក្រុមមន្ត្រីជាន់ខ្ពស់ចិន បានស្នើទៅកាន់ក្រុមមន្ត្រីជាន់ខ្ពស់រុស្ស៊ី កាលពីដើមខែកុម្ភៈកន្លងទៅ ឱ្យពន្យារពេលបើកការវាយប្រហារ លើអ៊ុយក្រែន រហូតចាំដល់ព្រឹត្តិការណ៍កីឡាអូឡាំពិក រដូវរងាប្រចាំទីក្រុងប៉េកាំងបិទបញ្ចប់សិន ប៉ុន្តែចិនបានច្រានចោលសេចក្ដីរាយការណ៍បែបនេះ។

បើគេមើលទៅលើសកម្មភាពរបស់មន្ត្រីទូតចិន ប្រចាំអង្គការសហប្រជាជាតិ វាហាក់ដូចជាទីក្រុងប៉េកាំង ពិតជាមិនបានដឹងជាមុនឡើយ និងមានការភ្ញាក់ផ្អើលជាខ្លាំង នៅពេលបានឭដំណឹងថាលោក ពូទីន ប្រើកម្លាំងយោធាលើអ៊ុយក្រែន រហូតដល់មិនបានត្រៀមខ្លួនជម្លៀសពលរដ្ឋចិន ដែលរស់នៅក្នុងប្រទេសអ៊ុយក្រែនទៀតផង។

យ៉ាងណាក៏ដោយ អ្វីដែលគេអាចនិយាយបាន នោះគឺថាសង្រ្គាមនៅអ៊ុយក្រែន កើតមានឡើងនៅចំពេលទំនាក់ទំនង រវាងលោក ស៊ី ជិនពីង និងលោក ពូទីន កាន់តែជិតស្និទ្ធនឹងគ្នាខ្លាំង ជាងពេលណាៗទាំងអស់។ ម្លោះហើយ ចម្លើយជាក់លាក់មួយនៃសំណួរខាងលើ ប្រហែលជាគ្មាននរណាផ្សេង អាចឆ្លើយបានឡើយ ក្រៅតែពីលោក ស៊ី ជិនពីងដែលជាអ្នកមានសិទ្ធិសម្រេចរឿងគ្រប់យ៉ាង នៅក្នុងប្រទេសចិន។

*តើចិនឈរនៅខាងណាឱ្យប្រាកដ?
តាមរយៈសេចក្ដីថ្លែងការណ៍ជាច្រើន របស់ក្រសួងការបរទេសចិន ទីក្រុងប៉េកាំងបានបង្ហាញ “ជំហរអព្យាក្រឹត” ដិ្បតមូលដ្ឋានគ្រឹះមួយនៃនយោ​បាយ ការបរទេសចិន គឺមិនជ្រៀតជ្រែកកិច្ចការផ្ទៃក្នុង និងគោរពបូរណភាពទឹកដីនៃបណ្ដាប្រទេសដទៃ ក្នុងនោះរួមមានទាំងអ៊ុយក្រែនផងដែរ។

តែព្រមពេលជាមួយគ្នា ក្រុមមន្ត្រីចិនបានអះអាងថា ទំនាក់ទំនងរវាងចិន និងរុស្ស៊ី បានឈានដល់ដំណាក់កាល “គ្មានព្រំដែនកំណត់” ហើយក៏បានឆ្លៀតរិះគន់ផងដែរថា សង្រ្គាមនៅអ៊ុយក្រែន កើតឡើងដោយសារតែកំហុសរបស់សហរដ្ឋអាមេរិក និងNATO ដែលជាអ្នកយកសាំងទៅចាក់លើភ្លើងកំពុងឆេះ តាមរយៈការបង្កើនការដាក់ពង្រាយកងទ័ព នៅក្បែរតំបន់ព្រំដែនរុស្ស៊ី។

សម្រាប់ចិន អាមេរិក និង NATO គួរតែយកចិត្តទុកដាក់ចំពោះការស្នើពីការធានាសន្តិសុខរបស់រុស្ស៊ី ហើយថាការដាក់ទណ្ឌកម្មមិនមែនជាមធ្យោ​បាយល្អ ក្នុងការដោះស្រាយជម្លោះនោះទេ ដោយភាគីពាក់ព័ន្ធគួរតែរក្សាការអត់ធ្មត់ និងត្រឡប់មករកកិច្ចសន្ទនា។

*តើចិនអាចចំណេញពីសង្រ្គាមនៅអ៊ុយក្រែនឬទេ?
បើតាមក្រុមអ្នកជំនាញ ចិនមិនចង់ឃើញសង្រ្គាម នៅអ៊ុយក្រែនផ្ទុះឡើងឡើយ ព្រោះថារុស្ស៊ីជាមិត្តដ៏ជិតស្និទ្ធ រីឯអ៊ុយក្រែនជាដៃគូរកស៊ី ដែលបានចូលរួមក្នុងគំនិតផ្ដួចផ្ដើមខ្សែក្រវាត់ និងផ្លូវ (BRI) របស់លោក ស៊ី ជិនពីង តាំងពីឆ្នាំ២០១៧មកម្ល៉េះ។ មួយវិញទៀត ចិនក៏មិនចូលចិត្តភាពចលាចលដែរ ដ្បិតសេដ្ឋកិច្ចចិន និងសេដ្ឋកិច្ចសកល មានទំនាក់ទំនងនឹងគ្នា ហើយអ្វីដែលចិនចង់បាន នោះគឺស្ថិរភាពពាណិជ្ជកម្ម សម្រាប់កំណើនសេដ្ឋកិច្ចរបស់ខ្លួន។

ដូច្នេះថាតើចិនអាចចំណេញពីសង្រ្គាមនេះដែរឬទេ? បើតាមក្រុមបញ្ញ វន្ត និងប្រព័ន្ធផ្សព្វផ្សាយរដ្ឋចិន នៅក្នុងសង្រ្គាមអ៊ុយក្រែន យ៉ាងហោចណា​ស់វាធ្វើឱ្យអាមេរិក និងអឺរ៉ុប ជាប់ដៃជាមួយរុស្ស៊ី ជាពិសេសគឺវាអាចទាញចំណាប់អារម្មណ៍របស់អាមេរិក ចេញពីយុទ្ធសាស្ត្រឥណ្ឌូ-ប៉ាស៊ីហ្វិក ឬការតាមឃ្លាំមើល សកម្មភាពរបស់ចិនក្នុងតំបន់អាស៊ីបានមួយគ្រាដែរ ហើយកាន់តែប្រសើរទៅទៀត។ សង្រ្គាមនេះនឹងកាន់តែធ្វើឱ្យរុស្ស៊ី ពឹងផ្អែកលើចិនរឹតតែខ្លាំង។
*តើចិនអាចជួយឱ្យរុស្ស៊ីឈ្នះឬ?

ចិន ត្រូវបានគេស្គាល់ថាជាប្រទេសមួយ ដែលមានការប្រុងប្រយ័ត្នបំផុត និងជាកំពូលមហាអំណាចថ្មីមួយ ដែលកំពុងលេចមុខមាត់នៅលើឆាកអន្តរជាតិ រហូតដល់សហរដ្ឋអាមេរិក ចាត់ទុកថាជាគូប្រជែងភូមិសាស្ត្រនយោបាយធំបំផុតរបស់ខ្លួន ក្នុងស.វទី២១នេះ។

ទំនាក់ទំនងរវាងរុស្ស៊ី និងចិន បានរីកចម្រើនធំធាត់ពីឆ្នាំទៅមួយឆ្នាំ។ ប៉ុន្តែចិននឹងមិនផ្ដល់ជំនួយយោធា ឬដំណោះស្រាយតាមមធ្យោបាយយោ​ធាណាមួយដល់រុស្ស៊ីឡើយ។

ខណៈកំពុងជាប់ទណ្ឌកម្ម ពីសំណាក់សហរដ្ឋអាមេរិក និងសម្ពន្ធមិត្តលោកខាងលិច អ្វីដែលរុស្ស៊ីអាចសង្ឃឹមបាននោះ គឺមិត្តចិននេះឯង ដែលអាចជួយ បង្កើនការទិញប្រេង ឧស្ម័ន និងថាមពលពីទីក្រុងម៉ូស្គូ។ តែទោះ​ជាយ៉ាងនេះក្ដី ប្រសិនបើរុស្ស៊ីគិតថា ចិនអាចនឹងដើររំលងទណ្ឌកម្មលោកខាងលិច ដើម្បីខ្លួននោះវាប្រហែលជារឿងមួយ ធ្វើឱ្យម៉ូស្គូខកចិត្តទៅវិញ ដោយហេតុថានៅចុងបញ្ចប់ ចិននឹងនៅតែ “ឈរនៅខាងខ្លួនឯង”។

បានន័យថា ចិននឹងមិនឈរពាំងទណ្ឌកម្មជំនួសរុស្ស៊ីទេ ហើយក៏មិនអាចឱ្យធនាគារ ឬក្រុមហ៊ុនចិន ត្រូវជាប់ទណ្ឌកម្មរបស់អាមេរិក និងអឺរ៉ុបដែលទីផ្សារធំបំផុតសម្រាប់ទំនិញរបស់ខ្លួនដែរ។

*តើចិននឹងធ្វើដូចម្ដេច បើសង្រ្គាមអ៊ុយក្រែនផ្ទុះជាជម្លោះរវាង NATO និងរុស្ស៊ី?
សហរដ្ឋអាមេរិក និង NATO មកទល់នឹងម៉ោងនេះ នៅតែប្រកាន់ជំហរថា ពួកគេនឹងមិនបញ្ជូនកងទ័ព ឱ្យទៅជួយអ៊ុយក្រែនប្រយុទ្ធជាមួយកងទ័ពរុស្ស៊ី នោះទេ តែបានព្រមានថា ពួកគេត្រៀមខ្លួនជាស្រេចក្នុងការចាត់វិធានការឆ្លើយតបភ្លាមៗ បើរុស្ស៊ីបង្កការគំរាមកំហែង ឬបើកការវាយប្រហារណាមួយ លើបណ្ដាប្រទេសជាសមាជិក NATO។

ជាការពិតណាស់ សង្រ្គាម ឬជម្លោះណាមួយ ដែលបង្កឱ្យសេដ្ឋកិច្ចអាមេរិក និងអឺរ៉ុបរង្គោះរង្គើរ ចង់ឬមិនចង់វាក៏ធ្វើឱ្យប៉ះពាល់ ដល់សេដ្ឋកិច្ចចិនដែរ ពីព្រោះថាអាមេរិក និងអឺរ៉ុប គឺជាទីផ្សារដ៏ធំសម្រាប់ទំនិញចិន។ ដូច្នេះនៅក្នុងករណី ដែលសង្រ្គាមអ៊ុយក្រែន ផ្ទុះទៅជាជម្លោះរវាង NATOនិងរុស្ស៊ី រឿងមុន គេដែលចិនអាចនឹងធ្វើ នោះគឺនៅឱ្យឆ្ងាយពីជម្លោះ ហើយឡើងទៅឈរនៅលើកំពូលភ្នំ ដើម្បីសម្លឹងរកផលប្រយោជន៍ ដែលចិនអាចប្រមូលបានពីជម្លោះ រវាង NATO និងរុស្ស៊ី។

*តើទំនាក់ទំនងរវាងចិន និងរុស្ស៊ី គឺជាប្រព័ន្ធសម្ពន្ធមិត្តឬ?
ចិនបានបញ្ជាក់ច្បាស់ៗថា ទំនាក់ទំនងរបស់ខ្លួនជាមួយរុស្ស៊ី គឺ “គ្មានព្រំដែនកំណត់” ហើយប្រទេសជាមិត្តទាំង២នេះ មានប្រព័ន្ធដឹកនាំរដ្ឋដោយអំណាច ស្ថិតនៅលើមនុស្សម្នាក់ដូចគ្នា និងមានសត្រូវរួម គឺអាមេរិក និងលោកខាងលិច។ មើលពីសំបកក្រៅទំនាក់ទំនងរវាងចិន និងរុស្ស៊ី ពិតជាស្អិតល្មួតនឹងគ្នាពិតមែន ប៉ុន្តែពួកគេមិនចង់បានប្រព័ន្ធសម្ពន្ធមិត្តឡើយ។

តើមកពីហេតុអ្វី? ហេតុផលគឺនៅត្រង់ថា ប្រព័ន្ធសម្ពន្ធមិត្ត គឺត្រូវបានចងភ្ជាប់ដោយពាក្យសន្យា។ មានន័យថា នៅពេលដែលនរណាម្នាក់ វាយប្រហារលើសម្ពន្ធមិត្តរបស់អ្នក អ្នកត្រូវតែចេញមុខការពារ និងលូកដៃចូលជួយពួកគេ។

សម្រាប់ចិន សង្រ្គាមរបស់លោក ពូទីន នៅអ៊ុយក្រែនអាចបង្ហាញយ៉ាងច្បាស់ថាចិនគិតត្រូវ ព្រោះថាបើទំនាក់ទំនងរវាងចិន និងរុស្ស៊ីសព្វថៃជាសម្ពន្ធមិត្ត ម្ល៉េះចិនត្រូវចេញមុខការពារ ឬចូលរួមក្នុងសង្រ្គាមជាមួយរុស្ស៊ីបាត់ទៅហើយ។ ការមិនចូលបក្សសម្ពន្ធ គឺជានយោបាយមួយរបស់ចិនជាយូរមកហើយ ដោយក្រុមបញ្ញវន្តចិនយល់ស្របដូចគ្នាថា នៅក្រៅបក្សសម្ពន្ធ ធ្វើឱ្យចិនមានសេរីភាព ក្នុងការអនុវត្តគោលនយោបាយការបរទេសរបស់ខ្លួន៕

បកប្រែសម្រួលដោយ Freshnews។
ប្រភព៖ The Economist (ថ្ងៃសុក្រ ទី១១ ខែមីនា ឆ្នាំ២០២២)៕

ផ្លូវជាតិលេខ៤១កាន់តែទាក់ទាញរោងចក្រ សហគ្រាសនិងគំរោងអភិវឌ្ឍន៍លំនៅដ្ឋានកាន់តែ​ច្រើន

ដោយៈគង់ សូរិយា

កណ្តាល/កំពង់ស្ពឺៈ តំបន់ស្ថិតនៅតាមបណ្តោយផ្លួវជាតិលេខ៤១ ដែ​លតភ្ជាប់ពីផ្លូវជាតិលេខ៤ ទៅកាន់ផ្លូវជាតិលេខ៣ បាននិងកំពុងទាក់ទាញគម្រោងបង្កើតរោចក្រ សហគ្រាសកាន់តែច្រើន ក្នុងរយៈពេលប៉ុន្មានខែចុងក្រោយនេះ។

តាមរយៈដំណើរចុះសិក្សា ពីសក្តានុពលតំបន់នេះ និងបណ្តាញផ្លួវតភ្ជាប់ពីផ្លូវជាតិលេខ៤១ ទៅកាន់បណ្តាញផ្លូវផ្សេងៗទៀត កាលពីថ្ងៃអាទិត្យ​ទី១៣ មិនា ឆ្នាំ២០២២ របស់សហស្ថាបនិក និងអគ្គនាយកគេហទំព័រ Propertyarea.asia លោកយិន លាងគង់ បានបង្ហាញថា បណ្តារោងចក្រថ្មីៗជាច្រើន បាននិងនិងកំពុងសាងសង់ ហើយគំរោងអភិវឌ្ឍន៍លំនៅដ្ឋានតូចធំមួយចំនួន បាននិងកំពុងចាប់ផ្តើមបណ្តើរៗផងដែរ។

លោក Thomas អគ្គនាយកក្រុមហ៊ុនស៊ីឌីលែន បានមានប្រសាសន៍ ឲ្យដឹងក្នុងថ្ងៃដដែលថា តំបន់នេះនឹងមានភាពរីកចម្រើនលឿន នាពេលអនាគត ខណៈតម្លៃដីនៅលើផ្លូវជាតិនេះ នៅតំបន់មួយចំនួនបានឡើងថ្លៃ និងតំបន់មួយចំនួនស្ថិតក្នុងសភាពទ្រឹង។

លោកបន្តថា “តម្លៃដីធ្លីទោះបីឡើងថ្លៃ ក៏ឡើងមានកម្រិតដែរ ដោយ​សារស្ថានភាពនៅដើមឆ្នាំនេះ មានសញ្ញាមិនល្អទាក់ទងនឹងជំងឺកូវីដ អូមីក្រុង និងសង្រ្គាមរវាងរុស្ស៊ី និងអ៊ុយក្រែន”។​ លោកបន្តថា “ការរីកចម្រើននៅតំបន់នេះ ក៏បានជះផលដល់តំបន់ ស្ថិតនៅតាមបណ្តាញផ្លួវជុំវិញផងដែរ ដូចជាតំបន់ផ្លួវចូល ទៅរមណីយដ្ឋានកំពូលពេជ្រ និងតំបន់ស្ថិតនៅក្បែរមណីយដ្ឋានត្រីមាស ក៏ដីបានឡើងថ្លៃផងដែរ ដែលកាលពីបីឆ្នាំមុនដីមានតម្លៃត្រឹម៤០០០ ទៅ៥០០០ដុល្លារក្នុងមួយហិកតា ប៉ុន្តែបច្ចុប្បន្នបានកើនឡើងដល់ចន្លោះពី៤ ទៅ៦ដុល្លារក្នុងមួយម៉ែត្រការ៉េ និងតំបន់ចុះពីផ្លូវជាតិទៅកាន់ជើងភ្នំដីមានតម្លៃចន្លោះ១៥ ទៅ២ដុល្លារ ក្នុងមួយម៉ែត្រការ៉េផងដែរ។

លោកយិន លាងគង់បានបន្តឲ្យដឹងផងដែរថា ដោយសារផ្លូវជាតិលេខ៤១ ជាផ្លូវដ៏សំខាន់ក្នុងការតភ្ជាប់រវាងផ្លួវជាតិសំខាន់ពីរ គឺផ្លួវជាតិលេខ៣ និងលេខ៤ បណ្តាញផ្លួវនេះមិនត្រឹមតែជួយសម្រួល ដល់ការដឹកជញ្ជូននោះទេ ប៉ុន្តែវាជាខ្សែផ្លូវតភ្ជាប់ នៃខ្សែច្រវ៉ាក់ទេសចរណ៍នៅតំបន់ឆ្នេរផងដែរ ពិសេ​សតំបន់ជាប់ផ្លូវសំខាន់ៗ ដែលតភ្ជាប់ចេញពីផ្លូវជាតិលេខ៤១ គឺជាតំបន់ ដែលមានសក្តានុពលផ្នែកធនធានធម្មជាតិ រមណីយដ្ឋានធម្មជាតិ និងអាចកែច្នៃជាដីឡូត៍ និងផ្ទះលំហែរយ៉ាងមនោរម្យទៀតផង។

លោកបន្តថា “ការរីកចម្រើននៃហេដ្ឋារចនាសម្ព័ន្ឋ របស់រដ្ឋាភិបាល បានក្លាយជាកំលាំងស្នូលដ៏សំខាន់ ក្នុងការលើកកំពស់សេដ្ឋកិច្ចជាតិ ពិសេ​សជម្រុញការរីកចម្រើន នៃវិស័យអចលនទ្រព្យផងដែរ”៕

អគារពាណិជ្ជកម្មបែបពហុបំណងសម្រាប់យុវវ័យសម័យថ្មីបានបើកដំណើរការ

ដោយ: សុផារី

ភ្នំពេញ: អគារ The Kampus ដែលជាអគារពហុបំណងសម្រាប់យុវវ័យសម័យថ្មី ត្រូវបានសម្ពោធដាក់ឱ្យដំណើរការជាផ្លូវការថ្ងៃទី១២ មីនា ២០២២នេះ។

ពិធីសម្ភោធអគារ ដែលបានធ្វើឡើងកាលពីចុងសប្តាហ៍មុន មានការចូលរួមជាអអធិតបីពីលោកហ៊ុន ម៉ានីប្រធានសហភាពសហព័ន្ឋយុវជនកម្ពុជា និងជាតំណាងរាស្រ្តខេត្តកំពង់ស្ពឺ លោកសាយ សំអាល់ រដ្ឋមន្រ្តីក្រសួងបរិស្ថាននិងថ្នាក់ដឹកនាំយុវជនជាច្រើនរូបទៀត។

អាគារ “Kampus” ដែលជាស្នាក់ការពហុបំណង របស់សហភាពសហព័ន្ធយុវជនកម្ពុជា នេះ ត្រូវបានសាងសង់ឡើង ក្នុងគោលបំណងបើកជូនយុវជនកម្ពុជាអាចធ្វើសកម្មភាព រៀបចំកិច្ចប្រជុំ ឬជួបជុំគ្នាបាន ដើម្បីបម្រើដល់អាជីវកម្ម អាជីព ឬបុព្វហេតុជាតិ និងប្រជាជន។

លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា នៅថ្ងៃទី១៣ខែមីនាកន្លងមកនេះ បានសរសេរលើបណ្ដាញ សង្គមហ្វេសប៊ុករបស់លោក ទាក់ទងនឹងការសម្ភោធដាក់ឱ្យប្រើប្រាស់អាគារនេះថា លោកមានការស្ញើចសរសើរ ចំពោះយុវជនជំនាន់មុន ដែលមានសមត្ថភាពក្នុងការដឹកនាំប្រទេសជាតិឲ្យមានការរីកចម្រើន ទោះបីជាមិនបានទទួលការអប់រំពេញលេញ ដោយសារការរំខានពីកត្តាសង្គ្រាមក្តី។

លោកសរសេរថា “បើទោះមិនបានរៀនសូត្រពេញលេញ តែយុវជនជំនាន់មុនបានដឹកនាំប្រទេសគួរឲ្យស្ងើចសរសើរ”។ លោកបន្តថា “ដោយសា​រកត្តាសង្គ្រាម ថ្នាក់ដឹកនាំបច្ចុប្បន្ន ដែលជាយុវជនជំនាន់មុន មិនទទួលបានការសិក្សារៀនសូត្រពេញលេញ នៅក្នុងសាលារៀននោះទេ ប៉ុន្តែអ្នកទាំងនោះបានខិតខំ ពុះពារ លះបង់គ្រប់យ៉ាង រហូតដល់ការនាំមកបាននូវដោយជោគជ័យ នូវសន្តិភាពពេញលេញ និងការអភិវឌ្ឍលើគ្រប់វិស័យសម្រាប់កម្ពុជា”។

លោកហ៊ុន ម៉ានីបានបន្ថែមថា យុវជនជំនាន់ក្រោយពិតជាស្ងើចសរសើរចំពោះស្មារតី ការលះបង់ និងឆន្ទៈដែលកាត់ថ្លៃមិនបាននេះ។ យើងទាំងអស់គ្នាប្តេជ្ញាបន្តថែរក្សា នូវអ្វីដែលយុវជនជំនាន់មុន បានបន្សល់ទុក ហើយបន្តសិក្សា រៀនសូត្រ ហ្វឹកហាត់សមត្ថភាព ក៏ដូចជាពង្រឹងសតិអារម្ម​ណ៍ ស្មារតី ឆន្ទ: និងត្រៀមខ្លួនតស៊ូ លុតដំ លះបង់ នៅពេលដែលប្រទេសជាតិត្រូវការយើង៕

បទដ្ឋានច្បាប់គតិយុត្តិចំនួន៥ ដែលអ្នកត្រូវសិក្សាមុនសម្រេចចិត្តទិញផ្ទះក្នុងបុរី

ដោយៈ វិវឌ្ឈន៍

ភ្នំពេញៈ លំនៅដ្ឋានក្នុងបុរី គឺជាអចលនទ្រព្យដែលមានភាពពេញនិយមមួយសម្រាប់ប្រជាជនខ្មែរ ដោយសារតែផ្ទះនៅជាប់ដី មានទំហំធំទូលាយ។

មនុស្សភាគច្រើនមុនសម្រេចចិត្តទិញផ្ទះ ក្នុងបុរីគឺផ្ដោតលើទីតាំង តម្លៃ និងម៉ូតផ្ទះ ប៉ុន្តែពេលខ្លះពួកគេមិនបានស្វែងយល់ អំពីឯកសារច្បាប់សំខាន់ៗមួយចំនួន ពីសំណាក់អ្នកអភិវឌ្ឍន៍គម្រោងនោះទេ ដែលតាមពិតមូលដ្ឋានច្បាប់សំខាន់ៗចំនួន៥ ជាចំណេះដឹងដែលមិនអាចខ្វះបាន និងត្រូវ​សិក្សាស្វែងយល់ ដើម្បីបញ្ចៀសហានិភ័័យនៅពេលអនាគត។

ប័ណ្ណចុះបញ្ជីក្រុមហ៊ុន
មុនពេលចាប់ផ្តើមសាងសង់បុរី ក្រុមហ៊ុនអភិវឌ្ឍន៍មានកាតព្វកិច្ចត្រូវតែចុះបញ្ជីឱ្យរួចរាល់ ជាមួយក្រសួងពាក់ព័ន្ធជាមុនសិន ទើបអាចមានសិទ្ធិចាប់ផ្តើមសាងសង់គម្រោងបាន។ ការស្នើសុំពិនិត្យមើលប័ណ្ណចុះបញ្ជីក្រុមហ៊ុនស្របច្បាប់ ដើម្បីធានាបានថាគម្រោងនោះ អាចដំណើរការដោយស្របច្បាប់។

លិខិតអនុញ្ញាតសាងសង់
មុននឹងផ្តល់លិខិតអនុញ្ញាតសាងសង់ដល់ ក្រសួងរៀបចំដែនដី នគរូបនីយកម្ម និងសំណង់ បានត្រួតពិនិត្យលើគម្រោងនោះ យ៉ាងហ្មត់ចត់ ទាំងការរចនា និងគុណភាព រួមទាំងហេដ្ឋារចនាសម្ព័ន្ធផ្សេងៗទៀត ដូចជា ប្រព័ន្ធទឹក ភ្លើង និងលូជាដើម។ ដូច្នេះ ការដែលក្រុមហ៊ុនមានលិខិតអនុញ្ញាតសាងសង់ គឺជាចំណុចកក់ក្ដៅមួយទៀតសម្រាប់អ្នកទិញ។

អាជ្ញាប័ណ្ណបុរី
ក្រោយពីក្រុមហ៊ុនអភិវឌ្ឍន៍បុរី បានបំពេញគ្រប់នូវតម្រូវការទាំងអស់ទាក់ទងនឹងគុណភាពសំណង់ ការរចនាប្លង់ ផែនការលក់ និងឯកសារចាំបាច់ផ្សេងៗ ក្រសួងសេដ្ឋកិច្ច និងហិរញ្ញវត្ថុ នឹងផ្តល់អាជ្ញាប័ណ្ណបុរីដល់ពួកគេ។ ដូច្នេះអ្នកក៏ត្រូវសុំមើលឯកសារនេះផងដែរ។

ប្លង់មេ
ប្លង់មេមានសារៈសំខាន់បំផុត ចំពោះគម្រោងបុរីនីមួយៗ ដូច្នេះអ្នកត្រូវសុំឱ្យក្រុមហ៊ុនអភិវឌ្ឍន៍ បង្ហាញប្លង់មេនេះ។ ប្លង់នេះទៀតសោត គឺត្រូវបានអនុម័តដោយក្រសួងរៀបចំដែនដី នគរូបនីយកម្ម ជាមុនសិន មុននឹងបុរីណាមួយអាចសាងសង់បាន។

ប្លង់រ៉ឹង 
មុននឹងទិញលំនៅឋាន ក្នុងគម្រោងបុរីណាមួយ អ្នកគួរតែសួរអំពីប្លង់មេ និងប្លង់រឹងនីមួយៗ ពីអ្នកអភិវឌ្ឍន៍គម្រោងមួយនោះ។ ប្លង់មេគ្របដណ្តប់លើដីទាំងអស់ សម្រាប់ការអភិវឌ្ឍន៍បុរីទាំងមូល ខណៈដែលប្លង់កម្មសិទ្ធិនីមួយៗត្រូវបានបែងចែកជាយូនីតផ្សេងៗគ្នា។ ដូច្នេះ អ្នកត្រូវប្រាកដថាអ្នកអភិវឌ្ឍន៍គម្រោងនោះ មានឯកសារច្បាប់ផ្លូវការ ដើម្បីបញ្ជា ក់ពីប្លង់រឹងទាំងពីរប្រភេទនេះ៕

មានតែ៣ថ្ងៃប៉ុណ្ណោះ! បុរី ប៉េង ហួត បើកលក់វីឡា ឃីង ម៉ាជេស្ទីក ក្នុងគម្រោង ដឹស្តា ផ្លាទីនីម អេកូរ៉ូមែនស៍ បញ្ចុះតម្លៃរហូតដល់ 9% និង​ផ្ដល់ជូនឡានអាគុយដ៏ទំនើបភ្លាមៗ

ដោយសហការី

រាជធានីភ្នំពេញ៖ បុរី ប៉េង ហួត បានរៀបចំកម្មវិធីបើកលក់ជាផ្លូវការ វីឡាទោលបែបអភិជនដ៏ប្រណីតឈ្មោះថា វីឡា ឃីង ម៉ាជេស្ទីក ក្នុងគម្រោង ដឹស្តា ផ្លាទីនីម អេកូរ៉ូមែនស៍ នាព្រឹកថ្ងៃទី១១ ខែមីនា ឆ្នាំ២០២២ នៅការិយាល័យលក់ (បឹងស្នោ) ស្ថិតនៅតាមបណ្ដោយផ្លូវជាតិលេខ១ ដោយមានការចាប់អារម្មណ៍ និងចូលរួមយ៉ាងច្រើនពីសំណាក់អតិថិជន។

​ក្នុងឱកាសនៃការបើកលក់ជាផ្លូវការនេះ អតិថិជននឹងទទួលបានការបញ្ចុះតម្លៃ 9% ភ្លាមៗសម្រាប់ការកក់វីឡា ឃីង ម៉ាជេស្ទីក និងការបញ្ចុះតម្លៃជាច្រើនទៀតសម្រាប់ប្រភេទផ្ទះផ្សេងនៅគ្រប់គម្រោង។ មិនតែប៉ុណ្ណោះ អតិថិជននឹងទទួលបានកាដូឡានអាគុយដ៏ទំនើប (Golf Cart) មួយគ្រឿង ព្រមទាំងកាដូអនុស្សាវរីយ៍យ៉ាងច្រើនសន្ធឹកសន្ធាប់។ មិនតែប៉ុណ្ណោះ អតិថិជនក៏អាចមានជម្រើសបង់ប្រាក់ជាមួយធនាគារដៃគូ ដោយបង់រំលស់ជាមួយអត្រាការប្រាក់ចាប់ពី 4.39% ឡើងទៅ ចំណែកទំហំកម្ចីរហូតដល់ 100%។

វីឡា ឃីង ម៉ាជេស្ទីក ដែលជាវីឡាទោលដ៏ប្រណីតស្កឹមស្កៃម៉ូដចុងក្រោយរបស់បុរី ប៉េង ហួត មានលក្ខណៈពិសេសប្លែកពីវីឡាទោលមុនៗ ដោយគ្រប់មុខងារនៃគេហដ្ឋានត្រូវបានរចនាឡើងដោយគិតគូរពីភាពទាន់សម័យ ផាសុកភាពនៃការរស់នៅ និងគុណភាពសំណង់ជាប់លាប់គង់វង្សបានច្រើនជំនាន់។ នៅជាន់ផ្ទាល់ដី និងជាន់ទី១ សុទ្ធតែមានរៀបចំជាបន្ទប់ពហុមុខងារដែលអតិថិជនអាចកែច្នៃជាបន្ទប់ផ្សេងៗបានដូចជា បន្ទប់ហាត់កីឡា បន្ទប់សម្រាប់មនុស្សចាស់ បន្ទប់ធ្វើការដែលអាចប្រជុំបាន ឬបន្ទប់សម្រាប់កូនៗលោកអ្នកលេងកម្សាន្តបានយ៉ាងមានផាសុកភាព។

អ្វីដែលកាន់តែពិសេសនោះគឺ បន្ទប់មេគ្រួសារត្រូវបានប្ដូរទៅរៀបចំនៅជាន់ទី២ដែលជាជាន់ខ្ពស់ជាងគេនៃគេហដ្ឋាន ស័ក្ដិសមនឹងងារជាមេគ្រួសារនៃភូមិគ្រឹះដ៏ខ្ពង់ខ្ពស់នេះ ដោយប្រើផ្ទៃប្រមាណជា 55% នៃជាន់ទី២តែម្ដង។ មិនតែប៉ុណ្ណោះ បុរី ប៉េង ហួត បានគិតគូរដល់សុវត្ថិភាព និងភាពងាយស្រួលក្នុងការចុះឡើងនៃគេហដ្ឋាននេះដោយបំពាក់ជណ្ដើរយន្តរួចជាស្រេចដើម្បីផ្ដល់ភាពងាយស្រួលដល់សមាជិកគ្រួសារជាមនុស្សចាស់​ និងចំណេញពេលវេលាសម្រាប់សមាជិកគ្រប់គ្នាក្នុងផ្ទះតែម្ដង ព្រមទាំងបង្ហាញពីភាពស៊ីវិល័យនៃការរស់នៅសម័យថ្មីនេះ។

គួរបញ្ជាក់ផងដែរថា គម្រោង ដឹស្តា ផ្លាទីនីម អេកូរ៉ូមែនស៍ គឺជាគម្រោងលំនៅឋានទំនើបចម្រុះ​លក្ខណៈអេកូធម្មជាតិបែបរ៉ូមែនទិក ផ្សារភ្ជាប់ជាមួយការរចនាខ្លោងទ្វារដែលមានគំនិតច្នៃប្រឌិតខ្ពស់ សួនច្បារធំទូលាយ ស្ពាននៃក្ដីស្រលាញ់ដែលជាអត្តសញ្ញាណនៃគម្រោងផ្ទាល់ ព្រមជាមួយម៉ូដផ្ទះទាន់សម័យច្រើនជម្រើសស័ក្ដិសមសម្រាប់អ្នកដែលស្រលាញ់ការរស់នៅជាមួយបរិស្ថានធម្មជាតិ ស្ងប់ស្ងាត់តែពោរពេញដោយសេចក្ដីសុខរមនា។

គម្រោង ដឹស្តា ផ្លាទីនីម អេកូរ៉ូមែនស៍ មានប្រភេទផ្ទះច្រើនជម្រើសដូចជា វីឡាកូនកាត់ LV, វីឡាកូនកាត់ LA, វីឡាភ្លោះ, វីឡាព្រីន, វីឡាព្រីន ប៊ី, វីឡាចាស្មីនណា ម៉ូដឺន, វីឡាឃ្វីន, ព្រមទាំងវីឡា ឃីង ម៉ាជេស្ទីក ដែលទើបតែបញ្ចូលបន្ថែមដើម្បីបំពេញតម្រូវការអតិថិជនដែលត្រូវការឯកជនភាព កិត្តិយស និងកិត្យានុភាពក្នុងការរស់នៅបែបអភិជន។

គួរឱ្យចាប់អារម្មណ៍ណាស់មែនទេ? សូមកុំឱ្យឱកាសចំណេញនេះរំលងផុត ព្រោះការផ្ដល់ជូននេះមានត្រឹមតែថ្ងៃទី១៣ ខែមីនា ឆ្នាំ២០២២ នេះតែប៉ុណ្ណោះ។

ដើម្បីជ្រាបព័ត៌មានកាន់តែច្បាស់ សូមអញ្ជើញអតិថិជន ការិយាល័យលក់ហ្គ្រេនស្តាផ្លាទីនីម (បឹងស្នោ) ឬ ទាក់ទងតាមលេខទូរសព្ទ៖ 098 / 016 / 017 596 789 ៕

ប្រទេសកម្ពុជាប្ដេជ្ញាក្នុងការជំរុញការប្រើរថយន្តអគ្គិសនី និងរថយន្តក្រុងក្នុងទីក្រុងឱ្យបាន៤០ភាគរយ

ដោយ: ម៉ាលីស

ភ្នំពេញ: តាមយុទ្ធសាស្រ្តអភិវឌ្ឍន៍រយៈពេលវែងប្រកប ដោយអព្យា​ក្រឹតកាបូន ប្រទេសកម្ពុជាប្ដេជ្ញាក្នុងការជំរុញការប្រើរថយន្តអគ្គិសនី និងរថយន្តក្រុងក្នុងទីក្រុងឱ្យបាន៤០ភាគរយ និងទោចក្រយានយន្តឱ្យបាន៧០ភាគរយនៅឆ្នាំ២០៥០ខាងមុខ។

ការបង្ហាញពីយុទ្ធសាស្ត្រនេះបានបង្ហាញ នៅក្នុងសិក្ខាសាលាអន្តរក្រសួង ដើម្បីគាំទ្រដល់ការអភិវឌ្ឍគោលនយោបាយ ឆ្ពោះទៅរកការប្រើប្រាស់យានយន្តអគ្គិសនី ប្រកបដោយប្រសិទ្ធភាពនៅកម្ពុជា ដែលបានរៀបចំឡើង នារាជធានីភ្នំពេញថ្ងៃទី១០ ខែមីនា ឆ្នាំ២០២២។

សិក្ខាសាលានេះមានការចូលរួមពី លោក គង់ សុផល អគ្គនាយករង តំណាងលោក ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក ដែលរៀបចំដោយអង្គការ Energylab ក្រោមកិច្ចសហការជាមួយក្រសួងសាធារណការ និងដឹកជញ្ជូន ដែលប្រព្រឹត្តទៅនៅសណ្ឋាគារ Raffle Le Royal។

ក្រសួងសាធារណការ និងដឹកជញ្ជូន នៃប្រទេសកម្ពុជាបានឲ្យដឹងទៀតថា នៅក្នុងវគ្គសិក្ខាសាលារៀបចំឡើង មានការធ្វើបទបង្ហាញមួយចំនួន ដែលផ្ដោតសំខាន់ទៅលើការៀបចំផែនការ យុទ្ធសាស្រ្ត និងវិធានការផ្សេងៗ ដើម្បីជំរុញការប្រើប្រាស់យាយន្តអគ្គិសនីនៅកម្ពុជា ឱ្យច្រើនបំផុតតាមដែលអាចធ្វើទៅបាន ដើម្បីជួយកាត់បន្ថយការបំពុលបរិស្ថាន និងឧស្ម័នផ្ទះកញ្ចក់។ ស្របពេលនេះ យោងទៅតាមទៅតាមយុទ្ធសាស្រ្តអភិវឌ្ឍន៍   រយៈពេលវែង ប្រកបដោយអព្យាក្រឹតកាបូន ប្រទេសកម្ពុជាប្ដេជ្ញាក្នុងការជំរុញការប្រើរថយន្តអគ្គិសនី និងរថយន្តក្រុងក្នុងទីក្រុងឱ្យបាន៤០% និងទោចក្រយានយន្តឱ្យបាន ៧០% នៅឆ្នាំ២០៥០។

សិក្ខាសាលានេះ មានការចូលរួមពីតំណាងអគ្គនាយកដ្ឋានគយ និងរដ្ឋាករនៃកម្ពុជា តំណាងអគ្គិសនីកម្ពុជា (EDC) និងក្រសួងស្ថាប័នមួយចំនួនទៀតដែលពាក់ព័ន្ធ ព្រមទាំងតំណាងគម្រោងនានាដែរ៕

តើប្រទេសណាដែលប្រមូលពន្ធលើចំណេញមូលធនច្រើនបំផុត ក្នុងតំបន់អាស៊ី?

ដោយៈសុផារី

ភ្នំពេញៈ រាជរដ្ឋាភិបាលកម្ពុជា នៅក្នុងសប្តាហ៍នេះ បានសម្រេចឱ្យពន្យាកាលបរិចេ្ចទកំណត់ លើការដាក់ឱ្យអនុវត្តពន្ធលើចំណេញមូលធនរយៈពេល២ឆ្នាំទៀត ដោយកំណត់យកថ្ងៃទី១ ខែ មករា ឆ្នាំ២០២៤។

អគ្គនាយដ្ឋានពន្ធដារបានគូសបញ្ជាក់ថា ដោយផ្អែកលើការសិក្សាបទពិសោធន៍ពីបណ្តាប្រទេសនានា និងស្ថានភាពសេដ្ឋកិច្ចកម្ពុជា ពន្ធលើចំណេញមូលធន ត្រូវបានកំណត់យកអត្រា២០ភាគរយ ទៅលើផលចំណេ​ញសម្រេចបាន តែមិនមែន២០ភាគរយនៃតម្លៃលក់នោះទេ។

បើក្រលេកមកមើលបណ្តាប្រទេសផ្សេងៗ នៅក្នុងតំបន់ និងបណ្តាប្រទេសជាច្រើននៅជិតខាងកម្ពុជា ក៏បានអនុវត្តពន្ធលើចំណេញមូលធននេះដែរ ហើយប្រទេសខ្លះកំណត់អត្រាខ្ពស់ជាងកម្ពុជានិងខ្លះទាបជាង។

ប្រទេសមួយចំនួនក្នងតំបន់អាស៊ី ដូចជា សាធារណរដ្ឋកូរ៉េខាងត្បូងអនុវត្តពន្ធលើចំណេញមូលធន ក្នុងអត្រាខ្ពស់រហូតដល់ទៅ៤២ភាគរយ តៃវ៉ាន់ក្នុងអត្រា៣៥ភាគរយ ប្រទេសបង់ក្លាដេសក្នុងអត្រា៣០ភាគរយ និងប្រទេសឥណ្ឌាក្នុងអត្រា៣០ភាគរយ ប្រទេសចិនក្នុងអត្រា២០ភាគរយជាដើម។

ចំណែកប្រទេសអាស៊ានដូចជា ប្រទេសថៃក្នុងអត្រា៣៥ភាគរយ ប្រទេសហ្វីលីពីនក្នុងអត្រា៣២ភាគរយ ប្រទេសឡាវក្នុងអត្រា២៤ភាគរយ ប្រទេសមីយ៉ាន់ម៉ាក្នុងអត្រា១០ភាគរយ ប្រទេសម៉ាឡេស៊ីនិងប្រទេសឥណ្ឌូណេស៊ីក្នុងអត្រា៥ភាគរយ និងប្រទេសវៀតណាមក្នុងអត្រា០,១ភាគរយ។

សម្រាប់ប្រទេសមួយចំនួន មាននយោបាយមិនគិតពន្ធលើចំណេញមូលធន (ក្នុងអត្រាសូន្យភាគរយ) ដូចជា ប្រទេសសិង្ហបុរី ហុងកុង និងប្រទេសប៉ាគីស្ថានជាដើម។

សម្រាប់កម្ពុជា ពន្ធលើចំណេញមូលធន ត្រូវបានប្រកាសពន្យាពេលពីរដង ដោយដំបូងឡើយគ្រោងអនុវត្តចាប់ពីខែមករា ឆ្នាំ២០២១ ប៉ុន្តែត្រូវបានលើកពេលដល់ឆ្នាំ២០២២ ហើយនឹងកំណត់ការអនុវត្តឡើងវិញចាប់ពីឆ្នាំ២០២៤។

បើតាមអគ្គនាយកដ្ឋានពន្ធដារ មូលធនឬទ្រព្យដែលជាកម្មវត្ថុជាប់ពន្ធលើចំណេញមូលធនមាន៦ប្រភេទដូចជា អចលនទ្រព្យ ទ្រព្យវិនិយោគ កេរ្តរិ៍ឈ្មោះអាជីវកម្ម កម្មសិទ្ធបញ្ញា រូបិយវត្ថុបរទេស និងភតិសន្យា៕