ការសិក្សាថ្មីៈការផ្គត់ផ្គង់លំនៅឋានជាន់ផ្ទាល់ដីមានចំនួនជាង៥០គម្រោងក្នុងឆ្នាំ២០២២

ដោយៈ វឌ្ឍនៈ

ភ្នំពេញៈ តាមការសិក្សារបស់ក្រុមហ៊ុនអន្តរជាតិមួយប្រចាំកម្ពុជា បានបង្ហាញថា ក្នុងឆ្នាំ២០២២នេះ ការផ្គត់ផ្គង់លំនៅឋានជាន់ផ្ទាល់ដី រំពឹងថានឹងមានចំនួនជាង៥០គម្រោងទៅកាន់ទីផ្សារ ខណៈអ្នកជំនាញក៏រំពឹងថាគម្រោងលំនៅឋាននៅកម្ពុជា នឹងមានសកម្មភាពឡើងវិញ ហើយតម្រូវការនឹងមានកាន់តែច្រើន។

តាមការសិក្សាស្រាវជ្រាវរបស់ក្រុមហ៊ុនCBRE Cambodia បានបង្ហា​ញថា ការផ្គត់ផ្គត់គម្រោងលំនៅឋានជាផ្ទះជាប់ដី មានកម្រិតខ្ពស់ចំនួន២គម្រោង គម្រោងមធ្យមមាន៣០គម្រោង និងគម្រោងតម្លៃសមរម្យមាន២០គម្រោង ។ ដើមឆ្នាំ២០២២ផងដែរបានរំពឹងថា ក្រុមហ៊ុន៤សំខាន់ៗនៅកម្ពុជានឹងបន្តផ្គត់ផ្គង់លំនៅឋាន ដើម្បីបំពេញតម្រូវការ រួមមាន បុរីប៉េងហួត នៅជ្រោយចង្វា បុរីជីបម៉ុងផាកលែនដ៍នៅមានជ័យ បុរីភ្នំពេញថ្មី អេលីតផាក នៅសែនសុខ និងបុរីវ៉ារីណា នៅសែនសុខ។

អ្នកនាងគឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodiaបានឱ្យដឹងថា គម្រោងលំនៅឋានភាគច្រើន នៅក្នុងប្រទេសកម្ពុជាឆ្នាំ២០២២នេះ នៅតែរំពឹងថា ក្រោមការវិនិយោគរបស់វិនិយោគិន ក្នុងស្រុក ហើយលំនៅឋានដែលមានការច្នៃប្រឌិតថ្មីៗ នៅតែទទួលបានការគាំទ្រខ្ពស់ពីអ្នកទិញក្នុងប្រទេសកម្ពុជា។

 

ជាមួយគ្នានេះ លោកអ៉ឹង ប៊ុនហួត ប្រធានផ្នែកលក់គម្រោងរបស់ក្រុមហ៊ុនPIXUI Property បានឱ្យដឹងថា ផ្ទះដែលមានការធ្វើបច្ចុប្បន្នភាពថ្មី នឹងនៅតែមានការគាំទ្រ ហើយជឿថាអតិថិជនជាច្រើន នឹងស្វែងរកលំនៅឋាន ដែលមានការរចនារូបរាងថ្មី ជាពិសេសទៅលើផ្ទះវីឡា។ ផ្ទះប្រភេទថ្មីៗ ទោះបីនៅតំបន់ជាយក្រុង ក៏នៅតែទទួលបានការគាំទ្រ និងមានការទិញលក់ជាបន្តបន្ទាប់។ ម្យ៉ាងទៀតលក្ខខណ្ឌបង់ប្រាក់របស់ម្ចាស់បុរី និងការគាំទ្ររបស់ធនាគារ ទៅលើកម្ចីសម្រាប់ទិញផ្ទះ ក៏បានធ្វើឱ្យប្រជាពលរដ្ឋមានបំណងទិញផ្ទះកាន់តែច្រើន អាចមានលទ្ធភាពក្នុងការទិញផ្ទះ សម្រាប់ស្នាក់នៅ។

តាមរបាយការណ៍របស់ធនាគារជាតិ ក៏បានបង្ហាញផងដែរថា ក្នុងឆ្នាំ២០២១កន្លងទៅនេះ វិស័យធនាគារនិងហិរញ្ញវត្ថុ នៅតែបន្តផ្ដល់កម្ចីសម្រា​ប់ទិញផ្ទះច្រើនផងដែរ ក្នុងគិតត្រឹមដំណាច់ឆ្នាំ២០២១កន្លងទៅ ការផ្ដល់កម្ចីសម្រាប់ទិញផ្ទះ មានជាង៥ពាន់លានដុល្លារអាមេរិក ខណៈកម្ចីទិញអចលនទ្រព្យទាំងមូល បានកើនឡើងដល់ជាង៦,៤ពាន់លានដុល្លារអាមេរិក ដែលតួលេខនេះបានបង្ហាញ ពីទំនុកចិត្តរបស់ធនាគារទៅលើវិស័យអច​លនទ្រព្យក្នុងប្រទេសកម្ពុជា៕

តើគម្រោងអភិវឌ្ឍន៍លំនៅឋានក្នុងខេត្តកំពតវិវិត្តដល់ណានៅដើមឆ្នាំ២០២២នេះ?

ដោយៈសុផារី

កំពតៈ ខេត្តកំពតបានស្គាល់ពីភាពរីកចម្រើន ក្នុងវិស័យអចលនទ្រព្យក្នុងរយៈពេលប៉ុន្មានឆ្នាំចុងក្រោយនេះ ស្របពេលដើមឆ្នាំ២០២២នេះ អ្នកជំនាញមើលឃើញថា សកម្មភាពសាងសង់លំនៅឋាន នៅក្នុងខេត្តមួយនេះភាគច្រើន នៅបន្តវិវត្តក្នុងល្បឿនយឺតៗ។

លោក Cooler Tan អគ្គនាយកក្រុមហ៊ុនភ្នាក់ងារអចលនទ្រព្យ Youngsia Real Estate និងជាអ្នកជំនាញអចលនទ្រព្យមួយរូបក្នុងខេត្តកំពត បានមានប្រសាសន៍ឲឲ្យដឹងតាមទូរស័ព្ទនៅថ្ងៃទី១១ កុម្ភៈនេះថា បុរីមួយចំនួនតូច នៅក្នុងខេត្តកំពតបានផ្អាកដំណើរការ ដោយសារផ្ទៃក្នុងរបស់ក្រុមហ៊ុន។ ចំណែកបុរីមួយចំនួនទៀត បានបន្ថយល្បឿន តែមិនបានផ្អាកដំណើរការឬបោះបង់ចោលនោះទេ ដោយសារបញ្ហាកូវីដ១៩បានរាំងស្ទះដំណើរការមួយចំនួនធំ។

លោកបន្តថា “មិនទាន់មានព័ត៌មានច្បាស់លាស់ណាមួយ អំពីការបោះបង់គម្រោងអភិវឌ្ឍន៍នោះទេ គ្រាន់តែមានគម្រោងមួយចំនួនបានផ្អាកដំណើរការបណ្តោះអាសន្ន មិនលឿនដូចផែនការដែលបានគ្រោងទុក”។

តម្រូវការលំនៅឋានរបស់ប្រជាពលរដ្ឋ នៅក្នុងខេត្តកំពត ភាគច្រើននិយមលំនៅឋាន ដែលអាចធ្វើអាជីវកម្មបាន។ ប្រសិនបើបុរីដែលសាងសង់នៅក្នុងក្រុងឬជុំវិញក្រុងកំពត ជាប្រភេទលំនៅឋាន ដែលអាចលក់បាន។

យ៉ាងណាក្តី ប្រសិនបើគម្រោងលំនៅឋានមានចម្ងាយឆ្ងាយ លើសពី៥ គីឡូម៉ែត្រ មិនសូវនិយមសម្រាប់ប្រជាជនក្នុងខេត្តកំពតនោះទេ។

លោកCooler Tanបានមានប្រសាសន៍ថា “សម្រាប់គម្រោង៥ទៅ១០គីឡូម៉ែត្រពីក្រុង ខ្ញុំគិតថាអ្នកកំពតទិញគឺតិចណាស់។ អ្នកដែលទិញភាគច្រើន គឺអតិថិជនមកពីក្រុងភ្នំពេញ។ គោលដៅរបស់គាត់គឺមិនមែនសម្រាប់ប្រកបអាជីវកម្មនោះទេ គ្រាន់តែចង់ស្នាក់នៅទេ ព្រោះខេត្តកំពតជាខេត្តទេសចរណ៍គោលដៅ”។

លោកសង្កេតឃើញថា ប្រជាពលរដ្ឋពីក្រុងភ្នំពេញខ្លះ ធ្វើដំណើរទៅកាន់ខេត្តកំពតញឹកញាប់ណាស់ អាចច្រើនជាង៣ដងក្នុងមួយខែ ឬច្រើនជាងនេះ។ លោកថា ប្រសិនបើ គាត់ចូលចិត្តខេត្តនេះ គាត់អាចទៅញឹកញាប់  ហើយស្នាក់នៅខាងក្រៅ នោះការចំណាយរបស់គាត់ច្រើន ពួកគាត់អាចមានចំណាប់អារម្មណ៍ក្នុងការទិញផ្ទះផ្ទាល់ខ្លួន។

ចំណែកលោកសុខ គែន ជាអគ្គនាយកក្រុមហ៊ុន Kampot Property បានឱ្យដឹងតាមបណ្តាញតេឡេក្រាម នៅថ្ងៃដដែលថា គម្រោងលំនៅឋានដែលមានស្រាប់នៅក្នុងខេត្តកំពត កំពុងបន្តដំណើរការ ដោយគម្រោងអភិវឌ្ឍន៍ខ្លះលឿន ខ្លះយឺត ភាគច្រើនមានភាពយឺតយ៉ាវ។

លោកមានប្រសាសន៍ថា “ការងារអភិវឌ្ឍន៍យឺតយ៉ាវ ដោយសារការសាងសង់ មិនត្រូវនឹងតម្រូវការជាក់លាក់។ ភាគច្រើន គម្រោងដែលអាចលក់ចេញបានជាគម្រោងលំនៅឋាន សម្រាប់ប្រជាជនមានចំណូលក្រោមមធ្យម មានតម្លៃក្រោម៥ម៉ឺនដុល្លារអាមេរិក”។

បច្ចុប្បន្ននេះ លោកសង្គេតឃើញថា គម្រោងលំនៅឋានដែលដើរយឺតជាគម្រោងដែលមានតម្លៃថ្លៃ ចាប់ពី៧ម៉ឺនដុល្លារអាមេរិកឡើងទៅ។ អញ្ចឹងតម្រូវការសម្រាប់អ្នកមានលទ្ធភាពបង់ ទោះបីរំលោះក្តី ទោះបីបង់ផ្តាច់ក្តី ក៏មានអតិថិជនចំនួនតិច។

យ៉ាងណាក្តីលោកសង្គេតឃើញថា នៅក្នុងដើមឆ្នាំ២០២២នេះ មិនមានកំណើនថ្មី នៃគម្រោងលំនៅឋាន នៅក្នុងខេត្តកំពតនោះទេ៕

កត្តាសំខាន់ចំនួន៣ជួយទាក់ទាញអតិថិជនក្នុងការទិញលំនៅដ្ឋាននៅកម្ពុជា

ដោយៈ ម៉ាលីស

ភ្នំពេញៈ ការអភិវឌ្ឍលំនៅឋាន នៅកម្ពុជានៅតែមានសក្តានុពល ហើយអ្នកទិញក៏មានជាហូរហែផងដែរ។ ក្នុងនោះអ្នកជំនាញមើលឃើញថាកត្តា៣សំខាន់ៗ ដែលជំរុញឱ្យមានការទិញលំនៅឋានក្នុងប្រទេសកម្ពុជា។

លោកអ៉ឹង ប៊ុនហួត ប្រធានផ្នែកទីផ្សារក្រុមហ៊ុនPIXUI Property បានធ្វើបទសំភាសន៍តាមទូរសព្ទ័ជាមួយ Property Area អោយដឹងនាព្រឹកថ្ងៃទី១១ កុម្ភៈនេះថា យើងមើលឃើញមានកត្តាសំខាន់ចំនួន៣ ដែលជំរុញឱ្យមានការទិញ លក់គម្រោងលំនៅឋាន ក៏ដូចជា អចលនទ្រព្យផ្សេងៗ ទោះបីជាស្ថិតនៅក្នុងវិបត្តិនៃជំងឺសកលក្ដី។

លោកបញ្ជាក់ថា កត្តាទី១ គឺការធ្វើBranding ម៉ាកយីហោ ពីព្រោះថាអតិថិជន នឹងរកតែសេវាកម្មអចលនទ្រព្យប្រភេទលំនៅឋាន រឺដីឡូត៏ ពីក្រុមហ៊ុនណាដែលមានឈ្មោះល្បី មានទំនុកចិត្តក្នុងទីផ្សារ និងមានការគាំទ្រពីប្រជាពលរដ្ឋភាគច្រើន។

ទី២ ការធ្វើទីផ្សារ នៅពេលក្រុមហ៊ុនមួយ អភិវឌ្ឍន៍គម្រោងអ្វីមួយចាំបាច់ត្រូវតែខ្លាំង ខាងការធ្វើទីផ្សារទៅដល់អតិថិជន បើទីផ្សារខ្លាំងបូករួមជាមួយនឹងគម្រោងប្លង់មេច្បាស់លាស់ នឹងធ្វើឱ្យអតិថិជននៅតែបន្តទិញគម្រោងអចលនទ្រព្យនោះដដែល។

កត្តាទី៣ គឺលក្ខខណ្ឌបង់ប្រាក់របស់ក្រុមហ៊ុនអភិវឌ្ឍន៍ វាជាកត្តាមួយដែលទាក់ទាញផងដែរ ពីព្រោះអ្នកទិញខ្លះ មិនមានហិរញ្ញវត្ថុគ្រប់គ្រាន់ក្នុងការបង់ប្រាក់។ ប្រសិនបើក្រុមហ៊ុនអភិវឌ្ឍន៍ ផ្ដល់ភាពងាយស្រួលដល់អតិថិជន នោះអតិថិជននឹងទិញ គម្រោងនោះទាំងលំនៅឋាននិងដីឡូត៏។

លោកអ៉ឹង ប៊ុនហួត បន្ថែមដូចនេះទៀតថា “បើជាគម្រោងលំនៅឋានវិញ ម្ចាស់គម្រោងអភិវឌ្ឍន៍ ត្រូវមានគំនិតច្នៃប្រឌិតខ្ពស់ក្នុងការរចនាម៉ូដផ្ទះ ធ្វើយ៉ាងណា ឱ្យមានភាពទាក់ទាញដល់អតិថិជន ហើយជាលទ្ធផលឃើញថាគម្រោង ដែលមានភាពច្នៃប្រឌិតរចនាម៉ូដថ្មីៗ ច្រើនតែទទួលបានការគាំទ្រនិងទិញជាហូរហែពីសំណាក់អតិថិជន។ ក្រៅពីនោះ ការជ្រើសរើសទីតាំងសម្រាប់អភិវឌ្ឍន៍ ក៏ជាចំនុចសំខាន់និងទាក់ទាញផងដែរ”៕

អាមេរិកកំពុងជាប់ផុងក្នុងអតិផរណាខ្ពស់ ធ្វើឲ្យតម្លៃទំនិញប្រើប្រាស់ហក់ឡើងលឿនបំផុតក្នុងពេល៤០ឆ្នាំមកនេះ

ដោយៈសុខុម

ញូវយ៉ក: តម្លៃទំនិញប្រើប្រាស់នៅសហរដ្ឋអាមេរិក បានហក់ឡើងខ្ពស់ លើសពីការរំពឹងទុកកាលពីខែមករា ដើមឆ្នាំ២០២២ ដោយធ្វើឱ្យអតិផរណាប្រចាំឆ្នាំកើនឡើងរហូតដល់៧,៥% ដែលជាអត្រាខ្ពស់បំផុតចាប់តាំងពីឆ្នាំ១៩៨២មក។

យោងតាមសារព័ត៌មាន BBC ចុះផ្សាយនៅថ្ងៃសុក្រ ទី១១ កុម្ភៈ នេះឱ្យដឹងថា ទំនិញដែលឡើងថ្លៃជាងគេរួមមានចំណីអាហារ និងថាមពល។ ការឡើងថ្លៃទំនិញប្រើប្រាស់ទាំងនេះ កំពុងធ្វើឱ្យពលរដ្ឋអាមេរិកជួបវិបត្តិហិរញ្ញវត្ថុគ្រួសារកាន់តែធ្ងន់ ខណៈប្រាក់ឈ្នួលឡើងយឺត មិនទាន់ការឡើងថ្លៃទំនិញ។

រដ្ឋាភិបាលក្រុងវ៉ាស៊ីនតោន កំពុងទទួលរងសម្ពាធយ៉ាងខ្លាំង ឱ្យដោះស្រាយបញ្ហានេះ ដោយធនាគារកណ្តាលអាមេរិក (Federal Reserve) រំពឹងថានឹងដំឡើងអត្រាការប្រាក់ដើម្បីទប់ស្ថានការណ៍។

ដោយឡែកធនាគារកណ្តាលអង់គ្លេស (Bank of England) បានដំឡើងអត្រាការប្រាក់២ដងរួចមកហើយ ក្នុងរយៈពេល៣ខែចុងក្រោយនេះ ក្នុងគោលបំណង កាត់បន្ថយការចំណាយរបស់អ្នកប្រើប្រាស់ តាមរយៈការធ្វើឱ្យការខ្ចីប្រាក់កាន់តែថ្លៃ។

នៅសហរដ្ឋអាមេរិក ការចំណាយរបស់អ្នកប្រើប្រាស់ នៅតែខ្ពស់កាលពីឆ្នាំមុន ទោះបីជាថ្លៃទំនិញហក់ឡើង យ៉ាងឆាប់រហ័សយ៉ាងណាក្ដី ដែលអ្នកវិភាគលើកឡើងថា ដោយសារការកើនឡើងតម្រូវការ ការចំណាយរបស់រដ្ឋាភិបាល ការរាំងស្ទះដល់ខ្សែសង្វាក់ផ្គត់ផ្គង់ និងការឡើងប្រាក់បៀវត្សរ៍ បន្ទាប់ពីកង្វះកម្លាំងពលកម្ម។

ក្រុមហ៊ុន Amazon ក្រុមហ៊ុនNetflix និងក្រុមហ៊ុន Procter & Gamble ព្រមទាំងក្រុមហ៊ុនជាច្រើន បានប្រកាសដំឡើងថ្លៃទំនិញ ក្នុងរយៈពេលប៉ុន្មានខែចុងក្រោយនេះ ដោយលើកឡើងថា ពួកគេគ្មានជម្រើសផ្សេងក្រៅពីដំឡើងថ្លៃឡើយ ដោយសារអ្វីៗសុទ្ធតែឡើងថ្លៃ៕ BBC៕

លោក បាន គីមូន គាំទ្រដំណើរទស្សនកិច្ចសម្តេចតេជោក្នុងការស្វែងរកដំណោះស្រាយ បញ្ចប់ជម្លោះនៅប្រទេសមីយ៉ាន់ម៉ា

ដោយ៖ សុផារី

កូរ៉េ៖ លោក បាន គីមូន អតីតអគ្គលេខាធិការអង្គការសហប្រជាជាតិ និងជាសហប្រធាននៃកិច្ចប្រជុំកំពូលសន្តិភាពពិភពលោកឆ្នាំ២០២២ បានសម្តែងការគាំទ្រដំណើរទស្សនកិច្ចរបស់សម្ដេចតេជោទៅកាន់ប្រទេសមីយ៉ាម៉ា ក្នុងការស្វែងរកដំណោះស្រាយ បញ្ចប់ជម្លោះនៅប្រទេសមីយ៉ាន់ម៉ានាពេលកន្លងទៅនេះ។

ក្នុងជំនួបពិភាក្សាការងារទ្វេភាគីជាមួយ នៅព្រឹកថ្ងៃទី១១ ខែកុម្ភៈ ឆ្នាំ២០២២នេះ លោកបានមានប្រសាសន៍ថា ដំណើរទស្សនកិច្ចរបស់សម្ដេចតេជោទៅកាន់ប្រទេសមីយ៉ាម៉ាកន្លងទៅនេះ គឺជារឿងដ៏សំខាន់ ក្នុងការស្វែងរកដំណោះស្រាយ បញ្ចប់ជម្លោះនៅប្រទេសមីយ៉ាន់ម៉ា ជាពិសេស លោកគាំទ្រចំពោះការបង្កើតឱ្យមានប្រេសិតពិសេសរបស់ប្រធានអាស៊ានក្នុងការរកដំណោះស្រាយនៅមីយ៉ាន់ម៉ានេះ។

លោកក៏សង្ឃឹមថាទំនាក់ទំនងទ្វេភាគីរវាងកម្ពុជា និងកូរ៉េ នឹងមានភាពល្អប្រសើរ និងរីកចម្រើន និងទំនាក់ទំនងកាន់តែល្អប្រសើរបន្ថែមទៀតរវាងកូរ៉េ និងអាស៊ានផងដែរ។

សម្ដេចតេជោបានសម្តែងនូវក្តីរីករាយដែលបានជួប លោក បាន គីមូន សារជាថ្មីម្ដងទៀត ក្រោយពីលោកបានចប់តួនាទីជាអគ្គលេខាធិកាអង្គការសហប្រជាជាតិ និងបានអរគុណចំពោះការលើកឡើងរបស់លោក បាន គីមូន និងពិតជារីករាយដែលបានធ្វើជាសហប្រធានជាមួយលោក នៅក្នុងកិច្ចប្រជុំកំពូលសន្តិភាពពិភពលោកឆ្នាំ២០២២ នេះ។

សម្ដេចតេជោបានមានប្រសាសន៍ថា អង្គការ UPF ពិតជាបានធ្វើការងារនេះដ៏ល្អ និងសំខាន់ ដែលជាយន្តការមួយសម្រាប់ការស្វែងរកសន្តិភាពនៅឧបទ្វីបកូរ៉េ។ អង្គការ UPF បានយកចិត្តទុកដាក់ ក្នុងការប្រមូលយកថ្នាក់ដឹកនាំពិភពលោក បច្ចុប្បន្ន និងអតីតមេដឹកនាំ មកជួបជុំនាពេលនេះគឺជារឿងដែលប្រសើរបំផុត៕

រដ្ឋាភិបាលកម្ពុជា ថៃនឹងបើកច្រកព្រំដែនអន្តរជាតិថ្មីមួយនាពេលឆាប់ៗខាងមុខនេះ

ដោយ: ម៉ាលីស

ភ្នំពេញ: លោកទេសរដ្ឋមន្ត្រី ស៊ុន ចាន់ថុល បានបើកកិច្ចប្រជុំក្រុមការងារបច្ចេកទេសក្រសួង ដើម្បីពិនិត្យគម្រោងសាងសង់ច្រកព្រំដែនអន្តរជាតិថ្មដា ដើម្បីបើកច្រកព្រំដែនអន្តរជាតិរវាងកម្ពុជា-ថៃ។

រាជរដ្ឋាភិបាលគ្រោងនឹងបើកច្រកនេះ តាមរយៈការសាងសង់ហេដ្ឋារចនាសម្ព័ន្ធនានា រួមមាន អគារអន្តោប្រវេសន៍ អគារគយ និងរដ្ឋាករសម្រាប់ត្រួតពិនិត្យរួម ចំណតសម្រាប់ផ្ទេរទំនិញឆ្លង កាត់ ‌‌ឃ្លាំងទីលានកុងទីន័រ និងអគាររដ្ឋបាល និងសំណង់អគារអន្តេវាសិកដ្ឋាន ដើម្បីបើកឱកាសឱ្យបានទូលំទូលាយ ដល់កិច្ចសហប្រតិបត្តិការអន្តរជាតិ ការវិនិយោគ ការធ្វើពាណិ​ជ្ជកម្មឆ្លងកាត់ដែន ការបង្កើតការងារធ្វើ និងការទាក់ទាញភ្ញៀវទេសចរសំដៅលើកកម្ពស់សេដ្ឋកិច្ចគ្រួសារ និងសង្គមជាតិនៃប្រជាជាតិទាំងពីរផងដែរ។

ច្រកនេះមានទីតាំងស្ថិតនៅក្នុងឃុំថ្មដា ស្រុកវាលវែង ខេត្តពោធិ៍សាត់ជាប់ព្រំដែនជាមួយខេត្តត្រាត ប្រទេសថៃ។

ការបើកច្រកព្រំដែនអន្តរជាតិថ្មី រវាងកម្ពុជា-ថៃ មួយនេះ រំពឹងថានឹងបង្កើនកិច្ចសហប្រតិបត្តិការពាណិជ្ជកម្ម និងទេសចរណ៍រវាងប្រទេសទាំងពីរថែមមួយកំរិតទៀត៕

រដ្ឋាភិបាលចិនបន្ធូរបន្ថយលក្ខខ័ណ្ឌដើម្បីសង្រ្គោះវិស័យអចលនទ្រព្យរបស់ខ្លួនឡើងវិញ

ដោយៈសុខុម

ហុងកុង: រដ្ឋាភិបាលរបស់មហាយក្សចិន បានចេញចំណាត់ការបន្ធូរបន្ថយដោយអនុញ្ញាត ឱ្យបណ្ដាក្រុមហ៊ុនអចលនទ្រព្យ ប្រើប្រាស់លុយបានពីការលក់ Presale (លក់មុនគម្រោងបញ្ចប់) ពីគម្រោងលំនៅដ្ឋាននានាដើម្បីសម្រាលវិបត្តិសាច់ប្រាក់ក្នុងវិស័យអចលនទ្រព្យ។

ប្រព័ន្ធផ្សព្វផ្សាយក្នុងស្រុក Cailianshe បានចុះផ្សាយកាលពីថ្ងៃព្រហស្បតិ៍ ទី១០ កុម្ភៈ ថា បណ្ដាក្រុមហ៊ុនអភិវឌ្ឍន៍ចិន ត្រូវបានអនុញ្ញាត ឱ្យលក់គម្រោងមុនពេលគម្រោងបញ្ចប់ (Presale) ប៉ុន្តែត្រូវបានតម្រូវឱ្យទុកលុយទាំងនោះ ក្នុងគណនីរក្សាទុកដោយភាគីទី៣ (Escrow Account)។ ប្រាក់ដែលរក្សាទុកក្នុងគណនីបែបនេះ ត្រូវមានចំនួនស្មើនឹង៥០%ទៅ៧០នៃប្រាក់បានពី Presale របស់ក្រុមហ៊ុនអភិវឌ្ឍន៍។

ក្នុងឆ្នាំ២០២១ ចំពេលមានការភ័យខ្លាចថា បញ្ហាបំណុលរបស់ក្រុមហ៊ុនអភិវឌ្ឍន៍ខ្នាតយក្សរបស់ចិន China Evergrande Group នឹងរីករាលដាលពាសពេញ វិស័យអចលនទ្រព្យក្នុងប្រទេសចិន រដ្ឋបាលខេត្ត ក្រុងនានារបស់ចិនជាច្រើន បានចាត់វិធានការទប់ស្កាត់ មិនឱ្យមានការដកលុយចេញពីគណនី Escrow Account ឡើយ ហើយចំណុចនេះបានធ្វើ ឱ្យគម្រោងមួយចំនួនជាប់គាំងកណ្ដាលទី ហើយក្រុមហ៊ុនអភិវឌ្ឍន៍នានាក៏ខ្វះសាច់ប្រាក់។

គេហទំព័រព័ត៌មានហិរញ្ញវត្ថុ Cailianshe បានចុះផ្សាយថា ពេលនេះវិធានការទប់ស្កាត់ មិនឱ្យដកប្រាក់ពីគណនី Escrow Account ត្រូវបានបន្ធូរបន្ថយហើយ ដោយអនុញ្ញាតឱ្យក្រុមហ៊ុនអភិវឌ្ឍន៍នានា ដកប្រាក់បានច្រើន និងងាយស្រួលជាងមុន។

វិស័យអចលនទ្រព្យក្នុងប្រទេសចិន បានទទួលរងវិបត្តិធ្ងន់ធ្ងរ បន្ទាប់ពីក្រុមហ៊ុនអភិវឌ្ឍន៍អចលនទ្រព្យ China Evergrande Group ប៊ិះនឹងក្ស័យធន ដោយសារជួបវិបត្តិសាច់ប្រាក់ និងគ្មានលុយសងបំណុល។

ដោយធ្លាប់តែជាក្រុមហ៊ុនអភិវឌ្ឍន៍អចលនទ្រព្យ ដែលលក់គម្រោងដាច់ជាងគេនៅប្រទេសចិន ពេលនេះវាបានក្លាយជាក្រុមហ៊ុនអចលនទ្រព្យដែលជំពាក់បំណុលច្រើនជាងគេបំផុតក្នុងពិភពលោក ជាមួយនឹងបំណុលសរុបរហូតដល់ទៅ៣០០ពាន់លានដុល្លារអាមេរិក៕  Reuters៕

សម្តេចតេជោៈសហព័ន្ធសន្តិភាពពិភពលោក និងក្រុមប្រឹក្សាវប្បធម៌អាស៊ី កំពុងរៀបចំសួនសន្តិភាពមេគង្គនៅកម្ពុជា

ដោយៈ គង់ សូរិយា

ភ្នំពេញៈ ជាដំណឹងដ៏ល្អមួយ ដោយសម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងឲ្យដឹងថា សហព័ន្ធសន្តិភាពពិភពលោក និងក្រុមប្រឹក្សាវប្បធម៌អាស៊ី កំពុងរៀបចំសួនសន្តិភាពមេគង្គនៅកម្ពុជា។

សម្តេចតេជោហ៊ុន សែនបានថ្លែងក្នុងកិច្ចប្រជុំកំពពូលពិភពលោកបានមានប្រសាសន៍ក្នុងកិច្ចប្រជុំកំពូលពិភពលោក នៅសាធារណៈរដ្ឋកូរ៉េនាព្រឹកថ្ងៃទី១១ កុម្ភៈនេះ ដោយបានបង្ហាញនូវក្តីរីករាយ និងស្វាគមន៍យ៉ាងកក់ក្តៅ ចំពោះការរៀបចំឱ្យមានកិច្ចប្រជុំកំពូលសន្តិភាពពិភពលោក។ ស   ម្តេចតេជោបានបន្តថា មេដឹកនាំទាំងអស់ដែលមានវត្តមាន ក្នុងកិច្ចប្រជុំកំពូលសន្តិភាពឆ្នាំ២០២២ គឺជាវត្តមានដ៏សំខាន់ ក្នុងបុព្វហេតុស្វែងរកសុខសន្តិភាពសម្រាប់ឧបទ្វីបកូរ៉េ។

សម្តេចតេជោ ហ៊ុន សែន បានថ្លែងថា “ជាភាពចាំបាច់ណាស់សម្រាប់មេដឹកនាំពិភពលោក ក្នុងការចែករំលែកទស្សនៈ សម្រាប់ស្វែងរកសន្តិភាពឧបទ្វីបកូរ៉េ”។ សម្តេចតេជោក៏បានលើកពីបទពិសោធន៍  ពន្លត់ភ្លើងសង្គ្រាមនៅកម្ពុជាថា គេមិនអាចយកសង្គ្រាមទៅពន្លត់សង្គ្រាមបាននោះឡើយ។

សម្តេចតេជោ ហ៊ុន សែន បានថ្លែងថា “ក្នុងនាមជាមេដឹកនាំរបស់កម្ពុជា សម្តេចមិនដែលគិតថា យកសង្គ្រាម ទៅបញ្ចប់សង្គ្រាមបាននោះឡើយ”។

សម្តេចតេជោ ហ៊ុន សែនបានថ្លែងថា អង្គការសហប្រជាជាតិប្រើថវិកាជាង២ពាន់លានដុល្លារ តែមិនអាចបញ្ចប់សង្គ្រាមនៅកម្ពុជាបាននោះឡើយ ជាហេតុនាំឱ្យសម្តេចដាក់ចេញនយោបាយឈ្នះឈ្នះ។ សម្តេចតេជោបាន​បន្តថា សន្តិភាពដែលកម្ពុជារកបាននៅចុងឆ្នាំ១៩៩៨ ជាសន្តិភាព ជាការឯកភាពមួយរបស់កម្ពុជា ដែលមិនដែលមានឡើយ ក្នុងប្រវត្តិសាស្ត្រកម្ពុជាយ៉ាងហោចណាស់ ៥០០ឆ្នាំចុងក្រោយ។

សម្តេចតេជោ ហ៊ុន សែន បានថ្លែងថា ជម្លោះឧបទ្វីបកូរ៉េ គឺជារឿងដ៏ស្មុគស្មាញ ដែលទាមទារឱ្យមានការដាក់ចេញនូវទស្សនៈវិស័យ គំនិតនានា ដើម្បីបញ្ចប់ជម្លោះនេះ៕

វិភាគ: តើស្ថានភាពទីផ្សារអចលនទ្រព្យនៅតំបន់អាស៊ី-ប៉ាស៊ីហ្វិកនឹងវិវឌ្ឍន៍បែបណាក្នុងឆ្នាំ២០២២នេះ?

ដោយៈសុខុម

អន្តរជាតិៈ ឆ្នាំ២០២១ គឺជាឆ្នាំដែលនាំមកនូវការផ្លាស់ប្តូរយ៉ាងធំសម្បើម ខណៈបណ្ដារដ្ឋាភិបាល ម្ចាស់អាជីវកម្ម និងសហគមន៍អន្តរជាតិបន្តព្យាយាមដោះស្រាយបញ្ហាប្រឈមនានា ដែលបង្កើឡើងដោយវិបត្តិកូវីដ-១៩។

ការផ្លាស់ប្តូរនេះ ក៏កើតមានយ៉ាងប្រាកដផងដែរ នៅក្នុងវិស័យអចល​នទ្រព្យ ដែលអ្នកកាន់កាប់អចលនទ្រព្យ និងវិនិយោគិននៅអាស៊ី-ប៉ាស៊ីហ្វិក កំពុងប្រឹងប្រែងរិះរកវិធីសម្របខ្លួន ដើម្បីជំរុញកំណើនក្នុងឆ្នាំខាងមុខ។

ពេលនេះមជ្ឈដ្ឋានទូទៅ ជាពិសេសអ្នកនៅក្នុងវិស័យអចលនទ្រព្យកំពុងចោលក្រសែភ្នែកសម្លឹងមើលថា តើស្ថានភាពទីផ្សារនាថ្ងៃអនាគត នឹងវិវឌ្ឍន៍ ទៅជាបែបណាសម្រាប់ឆ្នាំ២០២២ និងហួសពីនេះ។

យោងតាមរបាយការណ៍មួយដែលមានឈ្មោះថា “ទស្សនវិស័យទីផ្សា​រអចលនទ្រព្យអាស៊ី-ប៉ាស៊ីហ្វិក ឆ្នាំ២០២២” (2022 Asia Pacific Real Estate Market Outlook) របស់ក្រុមហ៊ុនផ្ដល់សេវាអចលនទ្រព្យខ្នាតយក្សរបស់សហរដ្ឋអាមេរិក CBRE បានបង្ហាញថា ទស្សនវិស័យសម្រាប់ទីផ្សារអចលនទ្រព្យ ប្រភេទពាណិជ្ជកម្មនៅអាស៊ី-ប៉ាស៊ីហ្វិក បង្ហាញសញ្ញាវិជ្ជមានគួរឱ្យសាទរ។

របាយការណ៍នេះ បានធ្វើការវិភាគកាន់តែស៊ីជម្រៅ ទៅលើការព្យាករអំពីទស្សនវិស័យសេដ្ឋកិច្ចក្នុងតំបន់ ព្រមទាំងទស្សនវិស័យអំពីនិន្នាការសំខាន់​ៗ និងឱកាសទទួលបានកំណើន ក្នុងវិស័យការិយាល័យ វិស័យឧស្សាហកម្ម & ភ័ស្តុភារ វិស័យលក់រាយ និងវិស័យវិនិយោគផងដែរ។

*សេដ្ឋកិច្ចបន្តស្ទុះងើបឡើង
ទោះបីជាលេចឡើងនូវវីរុសកូវីដ-១៩ បំប្លែងខ្លួនថ្មីយ៉ាងណាក្ដី ក៏កំនើនសេដ្ឋកិច្ចសម្រាប់តំបន់អាស៊ី-ប៉ាស៊ីហ្វិក បានចាប់ផ្ដើមមានសភាពប្រក្រតី និងវិលទៅរកកម្រិតមុន ពេលផ្ទុះវិបត្តិកូវីដ-១៩ ជាបណ្ដើរៗហើយ ជាមួយក្ដីរំពឹងទទួលបានកំណើនសេដ្ឋកិច្ច ជាបន្តបន្ទាប់ពេញមួយឆ្នាំ ដែលនាំមុខដោយកំណើនយ៉ាងធំ នៅក្នុងប្រទេសឥណ្ឌា និងចិនដីគោក។

ក្ដីរំពឹងចំពោះអតិផរណា ក្នុងតំបន់អាស៊ី-ប៉ាស៊ីហ្វិក មានខុសៗគ្នា។ កម្រិតតម្លៃទំនិញ និងសេវាកម្មក្នុងតំបន់ គឺនៅថេរគួរឱ្យកត់សម្គាល់ក្នុងឆ្នាំ២០២១ ហើយអតិផរណាភាគច្រើន ស្ថិតក្នុងជួររដ្ឋាភិបាល។

ការបញ្ចុះអត្រាការប្រាក់ទូទាំងតំបន់ ទំនងជានឹងនៅតែបន្ត ពេលដែលរដ្ឋាភិបាលនានា ស្វះស្វែងផ្តល់លក្ខខណ្ឌគាំទ្រ សម្រាប់ការស្ទុះងើបនៃសេដ្ឋកិច្ចក្នុងឆ្នាំ២០២២។

ទន្ទឹមនឹងនេះ ការរាំងស្ទះដល់ខ្សែសង្វាក់ផ្គត់ផ្គង់ក្នុងតំបន់ និងពិភពលោកដោយសារវិបត្តិកូវីដ-១៩ បានបណ្តាលឱ្យថ្លៃដឹកជញ្ជូនហក់ឡើងកា​លពីឆ្នាំមុន។

យោងតាមការរំពឹងទុក ការរាំងស្ទះដល់ខ្សែសង្វាក់ផ្គត់ផ្គង់ ក្នុងតំបន់នឹងនៅតែបន្តកើតមានក្នុងឆមាសទី១ ដើមឆ្នាំ២០២២ ប៉ុន្តែវានឹងវិលទៅរកភាពប្រក្រតីឡើងវិញបន្តិចម្តងៗ ចាប់ពីឆមាសទី២ទៅ ហើយទន្ទឹមនេះតម្លៃដឹកជញ្ជូន ក៏ទំនងជាធ្លាក់ចុះផងដែរនៅក្នុងឆ្នាំនេះ។

*វិស័យបច្ចេកវិទ្យា និងសេវាកម្មហិរញ្ញវត្ថុ នឹងជំរុញតម្រូវការការិយាល័យ
តម្រូវការការិយាល័យនៅតំបន់អាស៊ី-ប៉ាស៊ីហ្វិក បានងើបឡើងគួរឱ្យកត់សម្គាល់ក្នុងឆ្នាំ២០២១។

យោងតាមការព្យាករបានបង្ហាញថា សកម្មភាពជួលនឹងកើនឡើងរហូតដល់១០%នៅឆ្នាំនេះ នៅពេលក្រុមហ៊ុននានា មានទំនុកចិត្តក្នុងការវិលចូលការិយាល័យវិញ និងការអនុវត្តការធ្វើការងារខ្លះវេនគ្នាពីផ្ទះខ្លះ និងនៅការិយាល័យខ្លះ។

ទោះជាយ៉ាងណា វានឹងមិនឈានដល់កម្រិត មុនពេលផ្ទុះវិបត្តិកូវីដ-១៩ ឡើយដោយសារថា ចិនដីគោក ទទួលបានកំណើនខ្ពស់ មិនធ្លាប់មានជាប្រវត្តិសាស្ត្ររួចទៅហើយ នៅក្នុងឆ្នាំ២០២១ ហើយសកម្មភាពក្នុងទីផ្សារចាស់ទុំជាច្រើនត្រូវបានរំពឹងថា នឹងមានសភាពស្ងប់ស្ងាត់ ដោយសារការផ្គត់ផ្គង់មានកម្រិត។

វិស័យបច្ចេកវិទ្យាបានវ៉ាដាច់ហិរញ្ញវត្ថុ ក្លាយជាកម្លាំងចលករដ៏សំខាន់ នៅក្នុងការជំរុញកំណើនតម្រូវការ ការិយាល័យក្នុងឆ្នាំ២០២១។ នៅឆ្នាំនេះ ក្រុមហ៊ុនបច្ចេកវិទ្យា ក្រុមហ៊ុនបណ្តាញទំនាក់ទំនងសង្គម និងក្រុមហ៊ុនអភិវឌ្ឍន៍សូហ្វវែរ នឹងពង្រីកអាជីវកម្មច្រើនជាងគេ។

ទន្ទឹមនេះតម្រូវការជួលការិយាល័យ ពីសំណាក់ក្រុមហ៊ុនវេជ្ជសាស្ត្រនានា ក៏នឹងកើនឡើងផងដែរ។ នៅក្នុងវិស័យសេវាកម្មហិរញ្ញវត្ថុ ក្រុមហ៊ុនគ្រប់គ្រងទ្រព្យសកម្ម ក្រុមហ៊ុនបច្ចេកវិទ្យាហិរញ្ញវត្ថុ និងក្រុមហ៊ុនធានារ៉ាប់​រងត្រូវបានរំពឹងថានឹងជំរុញតម្រូវការការិយាល័យ។

*តម្រូវការកន្លែងស្តុកអីវ៉ាន់ត្រជាក់កើនឡើងខ្ពស់
យោងតាមអ្នកជំនាញបានរំពឹងទុកថា ឆ្នាំ២០២២នឹងក្លាយជាឆ្នាំដ៏រឹងមាំមួយទៀត សម្រាប់វិស័យអចលនទ្រព្យ ប្រភេទឧស្សាហកម្មក្នុងតំបន់អាស៊ី-ប៉ាស៊ីហ្វិក។

អាជីវកម្ម E-Commerce នឹងបន្តជំរុញតម្រូវការ កន្លែងស្តុកអីវ៉ាន់ ប៉ុន្តែវិស័យដឹកជញ្ជូនគ្រឿងទេស វិស័យផលិតកម្មចំណីអាហារ និងវិស័យឱសថ នឹងជំរុញកំណើនខ្ពស់ជាងគេ។ ចំណុចនេះ នឹងធ្វើឱ្យតម្រូវការកន្លែងស្តុកអីវ៉ាន់ត្រជាក់ មានគុណភាពកើនឡើងខ្ពស់ ខណៈកន្លែងស្តុកអីវ៉ាន់បែបនេះ មិនទាន់ឈានដល់កម្រិតស្តង់ដារនៅឡើយ នៅប្រទេសជាច្រើនក្នុងតំបន់។

*ទីផ្សារលក់រាយកំពុងវិលទៅរកភាពប្រក្រតីឡើងវិញ
ខណៈការលេចឡើងនូវវីរុសកូវីដ-១៩ បំប្លែងខ្លួនថ្មី “អូមីក្រុង” កាលពីចុងឆ្នាំ២០២១ បានធ្វើឱ្យទស្សនវិស័យទីផ្សារលក់រាយ កាន់តែមានភាពស្រពិចស្រពិលបន្ថែមទៀត មានក្ដីរំពឹងថា តម្រូវការប្រើប្រាស់នឹងវិលទៅរកភាពប្រក្រតីឡើងវិញនៅឆ្នាំនេះ ជាពិសេសផ្នែកភេសជ្ជៈ & ចំណីអាហារ និងការកម្សាន្ត។

ទីតាំងល្អ នឹងក្លាយជាចំណុចផ្ដោតដ៏សំខាន់ សម្រាប់អ្នកលក់រាយ ដែលកំពុងសម្លឹងរកឱកាសពង្រីកអាជីវកម្ម ខណៈទីផ្សារផ្ដល់ការអនុគ្រោះដល់អ្នកជួលអំឡុងវិវត្តិកូវីដ-១៩។ អ្នកលក់រាយ នឹងព្យាយាមចរចាសុំបញ្ចុះថ្លៃឈ្នួលកាន់តែទាប និងរកទីតាំងកាន់តែល្អ។

ទោះជាយ៉ាងណា វិវត្តិកូវីដ-១៩ នឹងបន្តធ្វើឱ្យអ្នកលក់រាយអល់​អែកសម្រាប់រយៈពេលខ្លី ដោយពួកគេមួយចំនួនធំ ហាក់មានការប្រុងប្រយ័ត្នខ្ពស់ មុននឹងសម្រេចចិត្តពង្រីកអាជីវកម្មទ្រង់ទ្រាយធំ។

*ការវិនិយោគនឹងកើនឡើងខ្ពស់មិនធ្លាប់មានជាប្រវត្តិសាស្ត្រ
យោងតាមការព្យាករ ឆ្នាំ២០២២ នឹងក្លាយជាឆ្នាំបំបែកកំណត់ត្រាសម្រាប់ទំហំវិនិយោគ ក្នុងតំបន់អាស៊ី-ប៉ាស៊ីហ្វិក ពេលដែលទីផ្សារនៅតែមានសុទិដ្ឋិនិយម ដោយបណ្ដាវិនិយោគិន នៅមានដើមទុនគ្រប់គ្រាន់សម្រាប់ការវិនិយោគ។

ក្រុមហ៊ុនផ្ដល់សេវាអចលនទ្រព្យ CBRE បានព្យាករថា ទំហំវិនិយោគសរុបនឹងកើនឡើងពី៥% ទៅ១០% ដល់ប្រមាណ១៥០ពាន់លានដុល្លារអាមេរិកក្នុងឆ្នាំ២០២២ ដែលជាចំនួនប្រចាំឆ្នាំខ្ពស់បំផុត មិនធ្លាប់មានជាប្រវត្តិសាស្ត្រសម្រាប់តំបន់។

សរុបមក ទស្សនវិស័យសម្រាប់ទីផ្សារអចលនទ្រព្យ នៅតំបន់អាស៊ី-ប៉ាស៊ីហ្វិក ក្នុងឆ្នាំនេះគឺមានភាពល្អប្រសើរច្រើន ដោយគ្រប់វិស័យមានឱកាសទទួលបានកំណើនខ្ពស់៕ South China Morning Post៕

NagaCorp falls to US$147 million loss in 2021

NagaCorp, operator of NagaWorld in Phnom Penh, Cambodia, fell to a US$147 million loss in 2021, impacted by the lengthy closure of its integrated resort which limited casino operations to less than six months of the year.

The loss, down from a profit of US$102.3 million in 2020, followed a 74.3% decline in gross gaming revenue for the period. The group did, however, record positive Adjusted EBITDA of US$22.4 million for the year.

In publishing its FY21 results overnight, NagaCorp said it has continued to see reasonable traffic in the mass market segment – and particularly premium mass – due primarily to a “reasonably sized expatriate community and to some extent, visitors from East Asia (mainly from China, South Korea and Taiwan) patronising NagaWorld in search of entertainment.”
As a result, premium mass GGR declined by only 38.2% year-on-year to US$48.7 million compared with a 74.3% decline in Referral VIP to US$64.4 million. Mass table GGR fell 61.9% to US$66.5 million and EGM revenue by 46.6% to US$44.0 million.

NagaCorp also noted improving results through 4Q21 and into January 2022 following the reopening of casino operations on 15 September. NagaWorld was closed from 2 March 2021.

“Despite a significant drop in the Referral VIP business due to the travel restrictions in the region, our Net Gaming Revenue was not adversely impacted as a result of the stable demand from the Premium Mass and Mass Market segments,” the company said.

Preparatory works on NagaCorp’s US$3.5 billion Naga3 development are ongoing, with main building work due to begin in early 2023 following completion of the foundation, basements and ground floor.

Source: IAG