កម្ពុជាគ្រោងសាងសង់អគារសារមន្ទីររាងគ្រាប់មីនតោនធំជាងគេនៅលើពិភពលោក

ដោយៈ សុផារី

សៀមរាបៈ មជ្ឈមណ្ឌលសកម្មភាពកំចាត់មីនកម្ពុជា (CMAC) កំពុងសិក្សាទីតាំង តម្រូវការ និងរូបរាងអគារផេ្សងៗ ដែលនឹងត្រូវសាងសង់ជាអគារសារមន្ទីរនៅខេត្តសៀមរាប មានរាងគ្រាប់មីនធំជាងគេលើពិភពលោក។

តាមរយៈការចុះផ្សាយព័ត៌មាន របស់មជ្ឈមណ្ឌលសកម្មភាពកំចាត់មីនកម្ពុជា បានឱ្យដឹងថា អគារសារមន្ទីរដែលមានរាងគ្រាប់មីន ធំជាងគេលើពិភពលោកនេះ នឹងសាងសង់នៅក្នុងខេត្តសៀមរាប តែមិនបានបញ្ចេញជាក់អំពីទំហំទឹកប្រាក់ និងទីតាំងច្បាស់លាស់នៅឡើយទេ។

លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់ កាលពីថ្ងៃទី១០ ខែកុម្ភ: ឆ្នាំ២០២២ នៅវិទ្យាស្ថានបច្ចេកទេសសកម្ម​ភាពកំចាតមីនខេត្តកំពង់ឆ្នាំង បានជួបពិភាក្សាការងារជាមួយក្រុមប្រឹក្សាយោបល់ជប៉ុន JICA ក្នុងការចុះសិក្សាវាយតំលៃអំពីទីតាំងជាក់ស្តែង តម្រូវការ និងរូបរាងអគារផេ្សងៗ ដែលនឹងត្រូវសាងសង់នៅខេត្តកំពង់ឆ្នាំង និងខេត្តសៀមរាប។

លោកបានមានប្រសាសន៍ថា “អគារសារមន្ទីរនៅខេត្តសៀមរាប ដែ​លមានរាងគ្រាប់មីន ធំជាងគេលើពិភពលោក គឺសម្រាប់បង្ហាញពិភពលោកថា សម្តេចតេជោ ហ៊ុន សែន មគ្គុទេសក៍ឯកសន្តិភាព បានដឹកនាំកម្ពុជាពីប្រទេសមានគ្រាប់មីន ប្រឆាំងមនុស្សច្រើនជាងគេលើលោក មកជាប្រទេសគ្មានគ្រាប់មីនប្រឆាំងមនុស្ស”។ លោកបន្តថា “នៅត្រឹមចុងឆ្នាំ២០២៥ ខាងមុខនេះ ហើយតាមរយៈរូបរាងនៃអគារគ្រាប់មីន ប្រឆាំងមនុស្សដ៏ធំបំផុតនេះដែរ ក៏សម្រាប់បង្ហាញដល់យុវវ័យជំនាន់ក្រោយៗ មកសិក្សាស្វែងយល់អំពីមរតក និងផលវិបាកនៃសង្គ្រាមពីអតីតកាល ព្រមទាំងបញ្ជាក់ពីអត្ថន័យដ៏ចាំបាច់មិនអាចខ្វះបាននោះ គឺសន្តិភាពពេញលេញនៅកម្ពុជា”៕

រោងចក្រផលិតសំបកកង់យានយន្ត២វិនិយោគទឹកប្រាក់៦០០លានដុល្លារនឹងជំរុញទីផ្សារកៅស៊ូកម្ពុជា

ដោយៈលក្ខិណា

ភ្នំពេញៈ រោងចក្រផលិតសំបកកង់យានយន្តចំនួន២ ត្រូវបានរាជរដ្ឋាភិបាលអនុម័ត ឱ្យដំណើរការវិនិយោគក្នុងប្រទេសកម្ពុជា ដោយរោងចក្រមួយមានទីតាំងនៅខេត្តស្វាយរៀង និងមួយទៀតមានទីតាំងនៅខេត្តព្រះសីហនុ ដែលមានទុនវិនិយោគសរុបជាង៦០០លានដុល្លារអាមេរិក។

តាមរយៈរោងចក្រផលិតសំបកកង់យានយន្តទាំងពីរនេះ នឹងជំរុញទីផ្សារជ័រកៅស៊ូកម្ពុជា ឱ្យមានទីផ្សារល្អប្រសើរឡើងវិញ ជាពិសេសនឹងជួយដល់អ្នកដាំដុះកៅស៊ូនៅកម្ពុជាផងដែរ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានឱ្យដឹងថា វត្តមានរោងចក្រផលិតសំបកកង់យានយន្តទាំងពីរនេះ មានសារៈសំខាន់ណាស់សម្រាប់ទីផ្សារកៅស៊ូ ទាំងក្រុមហ៊ុន និងអ្នករកស៊ីបែបគ្រួសារក្នុងវិស័យដំណាំកៅស៊ូ ព្រោះវាបានបង្កើតឱ្យទីផ្សារក្នុងស្រុក។ កំណើនរោងចក្រផលិត សំបកកង់យានយន្តកើតឡើងជាបន្តបន្ទាប់ គឺជាក្តីសង្ឃឹមរបស់អ្នកដាំកៅស៊ូ ដែលយើងសង្ឃឹមថា ចាប់ពេលនេះតទៅ យើងមិនសូវជាបារម្ភ នៅពេលដែលជាប់គាំងកៅស៊ូ។

លោកបន្តថា ពីមុនទីផ្សារជ័រកៅស៊ូភាគច្រើន អាស្រ័យលើទីផ្សារបរទេស និងទីផ្សារប្រទេសជិតខាងយើងនេះឯង ហើយបើសិនមានការជាប់គាំង  ឬគេអត់ទិញផលិតផលយើង វាធ្វើឱ្យចរន្តកៅស៊ូ និងសាច់ប្រាក់ ដែលផ្គត់ផ្គង់ឱ្យក្រុមហ៊ុន និងគ្រួសារនេះ វាធ្វើឱ្យមានការរាំងស្ទះ”។លោកឧញ៉ាបានបន្តថា “នេះគឺជាចំណុចសំខាន់ដែលយើងចង់បាន។ ចាប់ពីពេលនេះតទៅ យើងមានអ្នកទិញកៅស៊ូក្នុងស្រុក ដែលធ្វើឱ្យវិស័យកៅស៊ូ និងសាច់ប្រាក់មានចរន្ត ទន្ទឹមនឹងច្បាប់វិនិយោគថ្មីរបស់យើង ដែលត្រូវបានដាក់ឱ្យប្រើប្រាស់នេះ គឺបានលើកលែងនូវពន្ធអាករបន្ថែម១០ភាគរយ ដែលផ្គត់ផ្គង់នៅក្នុងស្រុកដល់រោងចក្រ”។

សហគ្រាសផលិតសម្រាប់ការនាំចេញនេះ។ វាគឺជាការលើកទឹកចិត្តមួយទៀត ដែលទំនាក់ទំនងទំនិញ និងវត្ថុធាតុដើមអាចផ្គត់ផ្គង់ឱ្យរោងចក្រ សហគ្រាស ដែលផលិតសម្រាប់ការនាំចេញដោយរួចអាករបន្ថែម។

លោកខេង សៀវឡាំង ម្ចាស់ចំការកៅស៊ូនៅខេត្តរតនគីរី បានថ្លែងប្រាប់តាមទូរសព្ទឱ្យដឹងថា វាជារឿងល្អប្រសើរ សម្រាប់វត្តមានរោងចក្រផលិតសំបកកង់យានយន្តទាំងនេះនៅកម្ពុជា ដែលអាចធ្វើឱ្យតម្រូវការកៅស៊ូនៅកម្ពុជានឹងមានសន្ទុះ ហើយលោកសង្ឃឹមថារោងចក្រទាំងនេះ នឹងមានតម្រូវការ និងទិញកៅស៊ីពីកសិករដាំដុះ លក្ខណៈគ្រួសារកាន់តែច្រើនផងដែរ។

លោកបន្តថា “បច្ចុប្បន្ននេះទិន្នផលជ័រកៅស៊ូ ដែលកសិករផលិតបានគឺនាំចេញទៅវៀតណាមស្ទើរតែទាំងអស់ ពីព្រោះពួកយើងមិនមានការកែច្នៃសម្រាប់នាំចេញទៅប្រទេសធំៗនោះទេ ពោលគឺនាំចេញកៅស៊ូស្អុយឬកៅស៊ូឆៅតែម្ដង ដោយតម្លៃកៅស៊ូក្នុងឆ្នាំ២០២២នេះឃើញថា មានស្ថិរភាពល្អប្រសើរ ថ្លៃជាងកាលពីឆ្នាំមុន”៕

ក្នុងមួយតោនកៅស៊ូឆៅអាចលក់បានចន្លោះពីជិត២លាន៨សែនដល់ទៅជាង៣លានរៀល ហើយបច្ចុប្បន្ននេះ លោកក៏កំពុងស្វែងរកដីសម្រាប់ដាំដុះបន្ថែមទៀតផងដែរ ក្នុងពេលមានដំណឹងថា មានរោងចក្រផលិតសំបកកង់យានយន្តនៅក្នុងស្រុក៕

 

សម្តេចតេជោ៖ ពានរង្វាន់សន្តិភាពស៊ុនហាក់ឆ្នាំ២០២២ មិនមែនបានមកដោយសារតែខ្ញុំតែម្នាក់ឯងនោះទេ

ដោយ៖ សុផារី

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងថា ការទទួលបាន ពានរង្វាន់សន្តិភាពស៊ុនហាក់ឆ្នាំ២០២២ នាពេលនេះ មិនមែនបានមកដោយសារតែសម្តេចតែម្នាក់ឯងនោះទេ ហើយក៏មានមនុស្សជាច្រើនរូបផ្សេងទៀត ដែលសក្ដិសមនឹងទទួលបាននូវពានរង្វាន់សន្តិភាពនេះ។

ការលើកឡើងរបស់សម្តេចតេជោ ហ៊ុន សែន បានធ្វើឡើងអំឡុងពេលថ្លែងសុន្ទរកថា ក្នុងឱកាសទទួលពានរង្វាន់ “សន្តិភាពស៊ុនហាក់” ដែលត្រូវបានធ្វើឡើងយ៉ាងមហោឡារិក នៅមជ្ឈមណ្ឌលសិល្បៈសកល ស្ថិតក្នុងទីក្រុងសេអ៊ូល ប្រទេសកូរ៉េខាងត្បូង នាព្រឹកថ្ងៃទី១២ ខែកុម្ភៈ ឆ្នាំ២០២២នេះ។

សម្តេចតេជោ ហ៊ុន សែន បានបញ្ជាក់យ៉ាងដូច្នេះថា “សម្រាប់ខ្ញុំ ពានរង្វាន់សន្តិភាពស៊ុនហាក់ឆ្នាំ២០២២នេះ មិនមែនបានមកដោយសារតែខ្ញុំតែម្នាក់ឯងនោះទេ ហើយក៏មានមនុស្សជាច្រើនរូបផ្សេងទៀត ដែលសក្ដិសមនឹងទទួលបាននូវពានរង្វាន់សន្តិភាពនេះ ដោយសារពួកគេបានចូលរួមគាំទ្រយ៉ាងសកម្ម ដល់ការខិតខំប្រឹងប្រែងរបស់ខ្ញុំ នៅក្នុងកិច្ចដំណើរការនៃការកសាងសន្តិភាពនៅប្រទេសកម្ពុជា”។

ទី១ សម្តេចសម្តែងនូវការដឹងគុណដ៏ជ្រាលជ្រៅចំពោះអតីតព្រះមហាវីរក្សត្រ សម្តេចព្រះបាទនរោត្តម សីហនុ ព្រះវររាជមាតា និងសម្តេចព្រះបាទព្រះមហាក្សត្រនៃព្រះរាជាណាចក្រកម្ពុជា នាពេលបច្ចុប្បន្ន ដែលបានបំពេញតួនាទីក្នុងការលើកកម្ពស់នូវស្មារតីនៃសាមគ្គីភាពជាតិរវាងប្រជាជនកម្ពុជា ក្នុងឋានៈជាមហាគ្រួសារតែមួយ។

ទី២ ក្រុមគ្រួសាររបស់សម្តេច ចំពោះការស្រឡាញ់ និងការគាំទ្រដល់ដំណើរស្វែងរកសន្តិភាព សម្រាប់ប្រទេសរបស់ខ្ញុំ។

ទី៣ មេដឹកនាំ និងសមាជិករបស់រាជរដ្ឋាភិបាលកម្ពុជាផ្សេងទៀត ព្រមទាំងកងកម្លាំងប្រដាប់អាវុធពីគ្រប់ភាគី ដែលបានដើរតួនាទីយ៉ាងសំខាន់នៅក្នុងកិច្ចខិតខំប្រឹងប្រែងរួមដើម្បីកសាង និងលើកកម្ពស់សន្តិភាព។

ទី៤ បណ្តាប្រទេសជាមិត្ត និងសហគមន៍អន្តរជាតិនានា ដែលបានផ្តល់ជំនួយនៅក្នុងដំណើរការនៃការស្វែងរកសន្តិភាពសម្រាប់កម្ពុជា និងការកសាងប្រទេសឡើងវិញ ក្រោយសង្គ្រាម។

សម្តេចតេជោ ក៏បានថ្លែងអំណរគុណចំពោះជនរួមជាតិ ដែលតែងតែបានគាំទ្រ និងសាទរចំពោះគោលនយោបាយឈ្នះ-ឈ្នះ របស់រាជរដ្ឋាភិបាលកម្ពុជា ដែលបានផ្តល់នូវបរិយាកាសអំណោយផលសម្រាប់ការជំរុញនូវប្រព័ន្ធអេកូឡូស៊ីសន្តិភាពដ៏រឹងមាំមួយនៅកម្ពុជា។

សម្តេចបានបន្តថា “សន្តិភាពមានតម្លៃជាងអ្វីៗទាំងអស់។ សន្តិភាព គឺជាអ្វីដែលស្រស់ស្អាតបំផុត។ សន្តិភាពផ្តល់នូវក្តីសង្ឃឹម និងស្នាមញញឹមដល់មនុស្សគ្រប់រូប។ អ្នកដែលមិនធ្លាប់បានឆ្លងកាត់នូវទុក្ខលំបាក និងការឈឺចាប់ដែលបង្កដោយសង្គ្រាម ប្រហែលជាមិនឱ្យតម្លៃលើសន្តិភាពនោះឡើយ។ ចំណែកឯអ្នកដែលធ្លាប់បានឆ្លងកាត់ជម្លោះហិង្សា ឬភ្លើងសង្គ្រាម ទើបដឹងថា សន្តិភាពមានតម្លៃដ៏ថ្លៃថ្លាប៉ុណ្ណានោះ”៕

សភាកូរ៉េនឹងផ្ដល់សច្ចាប័នកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ អំឡុងពាក់កណ្ដាលឆ្នាំនេះ

ដោយៈលក្ខិណា

ភ្នំពេញៈ ក្នុងជំនួបជាមួយសម្ដេចតេជោហ៊ុន សែននាយករដ្ឋមន្ត្រីកម្ពុជា លោក Park Byeong-Seung ប្រធានរដ្ឋសភាជាតិ នៃសាធារណរដ្ឋកូរ៉េបញ្ជាក់ថា សភាកូរ៉េនឹងផ្ដល់សច្ចាប័ន កិច្ចព្រម ព្រៀងពាណិជ្ជកម្មសេរីកម្ពុជា-កូរ៉េ អំឡុងពាក់កណ្ដាលឆ្នាំ២០២២។

សម្ដេចតេជោ ហ៊ុន សែននាយករដ្ឋមន្ត្រី បានសំដែងនូវការពេញចិត្តចំពោះកិច្ចសហប្រតិបត្តិការ រវាងវិស័យសេដ្ឋកិច្ច ពាណិជ្ជកម្មរវាងប្រទេសទាំងពីរ ជាពិសេសសម្ដេចពិតជាចង់ឃើញ កិច្ចព្រមព្រៀងពាណិជ្ជកម្មសេរីកម្ពុជា-កូរ៉េចូលជាធរមាន និងភាពជាដៃគូតំបន់សេដ្ឋកិច្ចគ្រប់ជ្រុងជ្រោយ ដែលនឹងចូលរួមចំណែកយ៉ាងសំខាន់ ក្នុងការជំរុញទំហំពាណិជ្ជកម្ម ទំហំវិនិយោគ និងកិច្ចសហប្រតិបត្តិការសេដ្ឋកិច្ច កាន់តែមានភាពល្អប្រសើរបន្ថែមទៀត។

សម្ដេចតេជោសង្ឃឹមថា ប្រធានរដ្ឋសភាកូរ៉េ នឹងជំរុញលើកទឹកចិត្តឱ្យអ្នកវិនិយោ គិនកូរ៉េ មកវិនិយោគនៅក្នុងប្រទេសកម្ពុជា កាន់តែច្រើនបន្ថែមទៀតវាពេលខាងមុខ។

លើសពីនេះទៅទៀត សម្តេចតេជោ បានស្នើសុំឱ្យកូរ៉េផ្ដល់នូវជំនួយឥត សំណង និងកម្ចីសម្បទាន ជាពិសេសក្នុងការធ្វើស្ពានមិត្តភាពកម្ពុជា-កូរ៉េ ឆ្លងទន្លេមេគង្គនេះ ដែលសម្ដេចគិតថាស្ពាននេះ គឺជាស្ពានមួយដ៏ល្អ សម្រាប់បម្រើ ដល់ការរស់នៅរបស់ប្រជាពលរដ្ឋនៅកម្ពុជា។

ទាក់ទងទៅនឹងការផ្ដល់សច្ចាប័ន លើកិច្ចព្រមព្រៀងពាណិជ្ជកម្មសេរី កម្ពុជា-កូរ៉េ ប្រធានសភាជាតិកូរ៉េ បានមានប្រសាសន៍ថា កូរ៉េនឹងផ្ដល់ក្នុងពេលឆាប់ៗនេះ ជាពិសេសអំឡុងពាក់កណ្ដាលឆ្នាំ២០២២ នេះ ហើយឯកឧត្តម នឹងធ្វើការងារដោយផ្ទាល់ជាមួយការងារនេះ។

លោកមានប្រសាសន៍ថា ឆ្នាំនេះគឺជាខួប២៥ឆ្នាំ នៃទំនាក់ទំនងការទូតរវាងប្រទេ សទាំងពីរ។ ទំនាក់ទំនងរវាងប្រទេសទាំងពីរនេះ ពិតជាមានការរីកចម្រើន។ ដំណើរទស្សនកិច្ចរបស់សម្ដេចតេជោ មកកាន់ប្រទេសកូរ៉េលើកនេះ នឹងធ្វើឱ្យទំនាក់ទំនងនៃប្រទេសទាំងពីរ កាន់តែមានភាពល្អប្រសើរឡើងថែមទៀត។

តាមរយៈទំនាក់ទំនងនេះ សម្ដេចតេជោពិតជារួមចំណែកយ៉ាងសំខាន់ ប្រកបដោយឆន្ទៈខ្ពស់ និងមានការប្ដេជ្ញាចិត្តខ្លាំង ដែលធ្វើឱ្យទំនាក់ទំនងការទូតរវាងប្រទេសទាំងពីរមានភាពល្អប្រសើរនឹងគ្នា៕

ការព្យាករ: វៀតណាមនឹងទទួលបានកំណើនភ្ញៀវទេសចរអន្តរជាតិច្រើននៅឆ្នាំ២០២២នេះ

ដោយៈសុខុម

ហាណូយ: ចំនួនជនបរទេស ដែលឆែករកមើលព័ត៌មានស្ដីពីវិស័យទេសចរណ៍របស់វៀតណាម កំពុងកើនឡើង ហើយអ្នកជំនាញមើលឃើញថា នេះជាសញ្ញាវិជ្ជមានគួរឱ្យសាទរ សម្រាប់ឧស្សាហកម្មទេសចរណ៍របស់ប្រទេសនេះ។

យោងតាមសារព័ត៌មាន Vietnam News ចុះផ្សាយកាលពីថ្ងៃសុក្រ ទី១១ កុម្ភៈ ឱ្យដឹងថា ទិន្នន័យវិភាគបានពី Google Destination Insights បង្ហាញថា ការឆែករកមើលព័ត៌មានស្ដីពី វិស័យទេសចរណ៍របស់វៀតណាម បានចាប់ផ្តើមកើនឡើងចាប់ពីដើមខែធ្នូ ហើយបានកើនឡើងយ៉ាងគំហុកនៅចុងខែដដែល និងនៅដើមខែមករា ឆ្នាំ២០២២។

ចាប់ពីដើមខែមុនមក ចំនួនជនបរទេសឆែករកមើលព័ត៌មានស្ដីពីអាកាសចរណ៍របស់វៀតណាម នៅតែមានកម្រិតខ្ពស់។ ចំនួននេះបង្ហាញពីការកើនឡើង៤២៥% កាលពីថ្ងៃទី២១ មករា និងកើនឡើង៣៧៤%កាលពីថ្ងៃទី៣ កុម្ភៈ បើធៀបនឹងរយៈពេលដូចគ្នាក្នុងឆ្នាំ២០២១។

ចំនួនជនបរទេស ដែលឆែករកមើលព័ត៌មានស្ដីពី កន្លែងស្នាក់នៅ ក៏ចាប់ផ្តើមកើនឡើងចាប់ពីដើមខែធ្នូផងដែរ។

ទោះជាយ៉ាងណាប្រទេសនេះ កំពុងតែជួបភាពវឹកវរ ដែលបណ្តាលមកពីការឆ្លងមេរោគកូវីដថ្មី ប្រភេទអូមីក្រុងរាប់ម៉ឺននាក់់ជារៀងរាល់ថ្ងៃ។

ជនបរទេសដែលឆែករកមើលព័ត៌មានអំពី វិស័យទេសចរណ៍ក្នុងប្រទេសវៀតណាម ច្រើនបំផុតមកពីប្រទេស ដូចជា សហរដ្ឋអាមេរិក អូស្ត្រាលី រុស្ស៊ី បារាំង អាល្លឺម៉ង់ ជប៉ុន សិង្ហបុរី ឥណ្ឌា អង់គ្លេស និងកាណាដា។

គោលដៅទេសចរណ៍ ដ៏ពេញនិយមទាំង១០ ក្នុងប្រទេសវៀតណាម ដែលទាក់ទាញ ចំណាប់អារម្មណ៍ជនបរទេសច្រើនជាងគេមាន ដូចជា ក្រុងហាណូយ ក្រុងហូជីមិញ ក្រុងឆ្នេរ Nha Trang កោះត្រល់ Phan Thiết, Đà Nẵng, Hội An, Đà Lạt, Quy Nhơn និង Bà Rịa-Vũng Tàu។

អ្នកជំនាញសន្និដ្ឋានថា កំណើននេះ ទទួលបានដោយសារប្រទេសវៀតណាម បានដាក់ចេញកម្មវិធីលិខិតឆ្លងដែន វ៉ាក់សាំងសាកល្បងមួយ ដើម្បីស្វាគមន៍ភ្ញៀវទេសចរបរទេស ឱ្យត្រលប់មកកាន់ប្រទេសនេះវិញ។

ប្រទេសនេះ គ្រោងនឹងបើកទេសចរណ៍អន្តរជាតិឡើងវិញ ពេញលេញ បន្ទាប់ពីខែមីនា ឆ្នាំ២០២២ នៅពេលប្រទេសនេះ បញ្ចប់យុទ្ធនាការចាក់វ៉ាក់សាំងដូសជំរុញប្រឆាំងនឹងវីរុសកូវីដ-១៩ ពោលគឺប្រមាណ២ឆ្នាំក្រោយពីប្រទេសវៀតណាម បានបិទព្រំដែនរបស់ខ្លួនឈប់ ឱ្យភ្ញៀវទេសចរបរទេសចេញចូល៕ Vietnam News៕

ប្រទេសឡាវ និងថៃ គ្រោងសាងសង់ស្ពានមិត្តភាពទី២តម្លៃរាប់ពាន់លានដុល្លារអាមេរិក

ដោយៈសុខុម

វៀងចន្ទន៍: ប្រទេសថៃ គ្រោងសាងសង់ស្ពានមួយ ដែលរួមបញ្ចូលគ្នានូវផ្លូវដែកផង និងផ្លូវថ្នល់ផងឆ្លងកាត់ទន្លេមេគង្គ ដើម្បីតភ្ជាប់ជាមួយប្រទេសឡាវ។

យោងតាមសារព័ត៌មាន Laotian Times ចុះផ្សាយកាលពីថ្ងៃទី១០ កុម្ភៈ ឱ្យដឹងថា គណៈរដ្ឋមន្ត្រីថៃ បានអនុម័តផែនសាងសង់ ស្ពានមិត្តភាពថៃ-ឡាវ ទី២ កាលពីខែមុនដែលតភ្ជាប់ខេត្តណងខៃ (Nong Khai) នៃប្រទេសថៃភាគឦសាន ជាមួយរដ្ឋធានីវៀងចន្ទន៍ ប្រទេសឡាវ។

រដ្ឋមន្ត្រីដឹកជញ្ជូនថៃ លោក Saksayam Chidchob បានថ្លែងថា ស្ពានដែលមានតម្លៃ ប្រមាណ១,២ពាន់លានដុល្លារអាមេរិកនេះ ទំនងជាទទួលបានហិរញ្ញប្បទានពីប្រទេសទាំង២។ នេះបើយោងតាមការចុះផ្សាយរបស់សារព័ត៌មានថៃ Thaiger។

លោកបានបន្ថែមថា “ការសិក្សាអំពីការឌីហ្សាញស្ពាននេះ ត្រូវបានរំពឹងថានឹងចំណាយអស់ប្រមាណ៤,២៥លានដុល្លារអាមេរិក ដែលជាថវិការបស់រដ្ឋាភិបាល ហើយនឹងត្រូវគ្រប់គ្រង ដោយនាយកដ្ឋានផ្លូវហាយវ៉េរបស់ប្រទេសថៃ”។

គម្រោងស្ពាននេះ ទំនងជាបញ្ចប់ទាន់ពេល នឹងដំណាក់កាលទី២ នៃគម្រោងផ្លូវដែកល្បឿនលឿនថៃ-ចិន ដែលនឹងតភ្ជាប់ទីក្រុងបាងកក ជាមួយទីក្រុងគុនមីង ប្រទេសចិន។

បច្ចុប្បន្នដំណាក់កាលទី១ នៃគម្រោងផ្លូវដែកថៃ-ចិន ដែលរត់ពីក្រុងបាងកក ឆ្ពោះទៅកាន់ខេត្តនគររាជសីមា កំពុងស្ថិតក្រោមការអភិវឌ្ឍ ហើយគ្រោងនឹងបើកដំណើរការនៅឆ្នាំ២០២៦។

យោងតាមរដ្ឋមន្ត្រីដឹកជញ្ជូនថៃ លោក Saksayam Chidchob ឱ្យដឹងថា ដំណាក់កាលទី២ នៃគម្រោងផ្លូវដែកល្បឿនលឿននេះ នឹងបើកឱ្យដំណើរការនៅឆ្នាំ២០២៨ ដោយតភ្ជាប់ខេត្តនគររាជសីមា ឆ្ពោះទៅខេត្តណងខៃ ប្រទេសថៃ៕ Laotian Times៕

វិភាគសង្គមៈ ការទទួលខុសត្រូវក្នុងការងារ និងក្រមសីលធ៌មវិជ្ជាជីវៈ

ដោយៈយិន លាងគង់ សហស្ថាបនិក និងជាអគ្គនាយកគេហទំព័រ Propertyarea.asia

ភ្នំពេញៈ “អ្នកមានសមត្ថភាពពិតប្រាកដ មិនឈ្នះអ្នកឡេមឡឺម”។ ពាក្យនេះ ត្រូវបានគេលើកឡើងជារឿយៗ ក្នុងទិដ្ឋភាពសង្គមការងារនៅកម្ពុជា ប៉ុន្តែសំណួរនៅទីនេះ តើ់វាជាពាក្យត្រឹមត្រូវឬទេ?។

តាមពិតពាក្យនេះ បើយើងវិភាគទៅលើអត្ថន័យ នៃពាក្យនិមួយៗ វាមានគុណសម្បត្តិ និងគុណវិបត្តិរៀងៗខ្លួន។

បុគ្គលមានសមត្ថភាព
ជាធម្មតា មនុស្សមានសមត្ថភាពខ្ពស់ មិនថានៅក្រុមហ៊ុនឬនៅបំពេ​ញការងារ តាមស្ថាប័នរបស់រដ្ឋាភិបាលនោះទេ ពួកគេភាគច្រើនគិតទៅលើគុណភាពការងារច្រើន និងចំណាយពេលច្រើនលើការងារ។ ហេតុនេះពួកគេ មិនសូវមានពេលយកចិត្តមេដឹកនាំ ឬបំពេញចំណង់ចំណូលចិត្តអ្នកដឹកនាំបានល្អឡើយ។

នេះជាចំណុចគ្រោះថ្នាក់មួយផងដែរ ព្រោះតាមស្ថាប័នឯកជន ឬរដ្ឋាភិបាលក្តី មេដឹកនាំតែងតែចង់ឲ្យបុគ្គលិក ឬកូនចៅរបស់ខ្លួនដឹងពីចំណង់ចំណូលចិត្ត ឬយល់ពីអ្វីដែលលើសពីការងារប្រចាំថ្ងៃ។ ឧទាហរណ៍ ពេលមានកម្មវិធីជប់លៀងក្រុមហ៊ុន កូនចៅដឹងថា មេត្រូវការអ្វី និយមអាហាររបៀបណា និងគ្រឿងស្រវឹងបែបណាជាដើម។

ផ្ទុយទៅវិញ បើយើងជាបុគ្គលិកបំពេញ ការងារបានល្អហើយ ពួកគេក៏ត្រូវតែយល់ពីការងារសង្គមមួយចំនួនដែរ ប៉ុន្តែអ្វីដែលជាសេចក្តីត្រូវការរប​ស់ស្ថាប័ន គឺបុគ្គលិកមាន “ចំណេះ ជំនាញ ការទទួលខុសត្រូវលើការងារ និងសីលធ៌មវិជ្ជាជីវៈ”។

ដូច្នេះ ការគិតតែបំពេញការងារ ដោយមិនខ្វល់ពីធ្វើឲ្យមានទំនាក់ទំនងល្អជាមួយមេដឹកនាំ ក៏មានលទ្ឋផលមិនសូវល្អផងដែរ ទាក់ទងនឹងការដំឡើងប្រាក់ខែ ការដំឡើងដំណែងជាដើម។

បុគ្គលឡេមឡឺម ជាទូទៅនិយោជិត ឬបុគ្គលិកប្រភេទនេះ មិនសូវមានសមត្ថភាពលើការងារ​ច្រើននោះទេ ប៉ុន្តែក៏អាចករណីខ្លះ បុគ្គលបែបនេះក៏មានសមត្ថភាពផងដែរ ហើយបន្ថែមពីនោះ ជាបុគ្គលដែលយល់ និងអាចដឹងចិត្តមេដឹកនាំរបស់ខ្លួនមានរសនិយមបែបណា នៅពេលម៉ោងបំពេញការងារ ពេលប្រជុំ ពេកសំរាក និងពេលមានកម្មវិធីសប្បាយៗ ដែលរៀបចំឡើងដោយក្រុមហ៊ុន ឬលក្ខណៈឯកជន។

បុគ្គលឡេមឡឺម ដែលមានបញ្ញា ទេពកោសល្យ ពូកែដឹងខាងផ្នែកចិត្តសាស្រ្តបែបនេះ ជាមនុស្សពូកែទំនាក់ទំនងល្អ ក្នុងសង្គមការងារ និងសង្គម​ខាងក្រៅ ដែលនេះជាចំណុចជោគជ័យមួយ ដែលអ្នកបំពេញការងារនៅតាមស្ថាប័នឯកជន ឬស្ថាប័នរដ្ឋាភិបាលគួរសិក្សាស្វែងយល់ផងដែរ។

បុគ្គលបែបនេះ ច្រើនតែទទូលបានការលើកទឹកចិត្ត ជាការដំឡើងប្រាក់ខែ ការដំឡើងឋានៈតួនាទី និងអាចទទួលបានភាគហ៊ុនរបស់ក្រុមហ៊ុន ដែលពួកគេ​បំពេញការងារផងដែរ។

យោជិតមានចំណេះ និងជំនាញ
នៅក្នុងស្ថាប័នការងារ ដូចលើកឡើងខាងលើ ការមានចំណេះដឹង ជំនាញ ទេពកោសល្យ ពិតជាមានសារៈសំខាន់ណាស់ ដើម្បីទទួលបាននូវក្រេឌីតការងារនៅស្ថាប័ន ដែលខ្លួនបំពេញការងារ ដើម្បីជួយជម្រុញឲ្យស្ថាប័ន ដែលខ្លួនបំពេញទទួលបានភាពរីកចម្រើន។

មហាសេដ្ឋី និងជាម្ចាស់ក្រុមហ៊ុន Alibaba ដ៏ល្បីល្បាញបាននិយាយថា “អ្នកគួរធ្វើការងារដំបូងជាមួយក្រុមហ៊ុនតូចៗ ប៉ុន្តែមានមេដឹកនាំដែលចេះជួយតំរង់ផ្លូវ និងបណ្តុះបណ្តាល និងត្រូវធ្វើការងារឲ្យបានល្អបំផុត មុនពេលអ្នកចាប់ផ្តើមការងារនៅក្រុមហ៊ុនធំៗ”។

ចំណុចនេះ នៅក្នុងទិដ្ឋភាពការងារ ពិតជាមានសារៈសំខាន់ណាស់ ដែលបុគ្គលិកនិមួយៗ ត្រូវបំពេញឲ្យបានល្អ នៅពេលក្រុមហ៊ុនរីកចម្រើន ធំធាត់ ពួកគេអាចទទួលបានការដំឡើងប្រាក់ខែ ទទួលបានការលើកសរសើរ ទទួលបានការដំឡើងដំណែង និងអាចទទួលបានចំណែកភាគហ៊ុនរបស់ក្រុមហ៊ុន ដែលខ្លួនធ្វើការផងដែរ បើសិនជាអ្នកជួបមេដឹកនាំល្អ និងមានសុភវវិនិច្ឆ័យ ដែលដឹងថា វត្តមានរបស់អ្នកនឹងជួយឲ្យ ក្រុមហ៊ុនទទួលបានជោគជ័យ និងរីកចម្រើនបន្ថែមទៀត។

ការទទួលខុសត្រូវនិងក្រមសីលធ៌ម
នៅក្នុងការបំពេញការងារ និយោជិត ឬបុគ្គលិក ដែលមានចំណេះដឹង ជំនាញ ប៉ុន្តែបើពួកគេខ្វះការទទួលខុសត្រូវ និងក្រមសីលធ៌ម ពួកគេនឹងអាចបំផ្លាញអនាគតរបស់ខ្លួន និងកាន់តែធ្ងន់ធ្ងរ ពួកគេអាចជាអ្នកបំផ្លាញក្រុមហ៊ុន និងអាចឈានទៅជាប់ទោសខណ្ឌ ដោយសារទង្វើរអសីលធ៌ម ឬការមិនទទួលខុសត្រូវរបស់ខ្លូនក្នុងការងារផងដែរ។

គ្មានមេដឹកនាំណា មិនស្រលាញ់ មិនអោបក្រសោបបុគ្គលិករបស់ខ្លួន ដែលមានសមត្ថភាព មានជំនាញ ទេពកោសល្យ មានការទទួលខុសត្រូវលើការងារ និងក្រមសីមធ៌មឡើយ។

ប៉ុន្តែមានបុគ្គលិកមួយចំនួន ជាបុគ្គលមានអត្តចរិក ចរិយាសម្បត្តិមិនល្អ ពួកគេមិនត្រឹមមិនបំពេញការងារមិនល្អនោះទេ ជួនកាលពួកគេលូចមើលបំណាំ ឬនិយាយអាក្រក់ពីមេរបស់ខ្លួនថែមទៀត ដោយភ្លេចពួកគេជាអ្នកបំពេញការងារនៅទីណា និងត្រូវទទួលខុសត្រូវលើការងារបែបណា ព្រំដែនការងារនៅត្រឹមចំណុចនា និងគួរឆែកកម្រិតក្រមសីលធ៌មពួកគេបែបណា ។

ប្រសិនជាថ្នាក់ដឹកនាំក្រុមហ៊ុន ឬស្ថាប័័នសាធារណៈមួយរកឃើញបុគ្គលមិនមានទំនួលខុសត្រូវលើការងារ និងគ្មានក្រមសីលធ៌ម ការណែនាំគួរត្រូវបានធ្វើឡើង ប៉ុន្តែក្នុងករណីមិនកែប្រែ ពួកគេគួរត្រូវបណ្តេញចេញពីការងារជាបន្ទាន់ ដើម្បីកុំឲ្យបុគ្គលបែបនេះ បង្កបញ្ហាដល់ស្ថាប័នរបស់ខ្លួន ឬដល់អង្គភាពនៃស្ថាប័នជាតិណាមួយ។

គ្មានការទទួលខុសត្រូវ និងសីលធ៌ម ស្មើនឹងគ្រោះថ្នាក់
បុគ្គលគ្មានចរិយាធ៌ម និងសីលធ៌ម និងគ្មានការទទួលខុសត្រូវលើការ​ងារ ពួកគេអាចពូកែនិយាយ ប៉ុន្តែការនិយាយមិនបង្ហាញ ពីសីលធ៌មរបស់់ពួកគេឡើយ។

“លទ្ឋផល និងគុណភាពការងារ បង្ហាញពីគុណភាពចំណេះ​ដឹង។ ជំនា​ញ និងលទ្ឋផល នៃការគិតរបស់ពួកគេ។ ទង្វើមិនទទួលខុសត្រូវក្នុងការងារ បង្ហាញពីកម្រិតក្រមសីលធ៌មរបស់ពួកគេ ហើយកំហុសក្នុងការ​ងារដដែលៗមានន័យថា កម្រិតក្រមសីលធ៌ម និងការទទួលខុសត្រូវលើការងាររបស់ពួកគេ ក្រុមហ៊ុនឬស្ថាប័ននោះនឹងមានហានិភ័យ។

ដូច្នេះចំណេះ ជំនាញ ជាស្ពាន ការទទួលខុសត្រូវជាគោលដៅ ចក្ខុវិស័យ។ ចំណែកក្រមសីលធ៌ម ជាថាមពលមិនចេះរីកស្ងួត ក្នុងការជម្រុញការឈានឡើងរបស់ខ្លូនឯង និងស្ថាប័ន៕

សម្តេចតេជោស្នើភាគីកូរ៉េជួយផ្តល់ជំនួយឥតសំណង និងកម្ចីសម្បទានសាងសង់ស្ពានមិត្តភាពកម្ពុជា កូរ៉េ

ដោយៈវឌ្ឈនៈ

ភ្នំពេញៈ សម្តេចតេជោហ៊ុន សែនក្នុងជំនួបជាមួយប្រធានរដ្ឋសភាកូរ៉េ កាលពីថ្ងៃម្សិលម៉ិញ បានស្នើសមភាគីកូរ៉េ ជួយផ្តល់ជំនួយឥតសំណង និងកម្ចីសម្បទាន ដើម្បីសាងសង់ស្ពានមិត្តភាពកម្ពុជា កូរ៉េ ពីភ្នំពេញទៅកាន់តំបន់ស្វាយជ្រុំ។

ក្នុងជំនួបជាមួយ លោក Park Byeong-Seung ប្រធានរដ្ឋសភាជាតិ នៃសាធារណរដ្ឋកូរ៉េ សម្តេចតេជោ បានស្នើសុំឱ្យកូរ៉េផ្ដល់នូវជំនួយឥត សំណង និងកម្ចីសម្បទាន ជាពិសេសក្នុងការធ្វើស្ពានមិត្តភាពកម្ពុជា-កូរ៉េ ឆ្លងទន្លេមេគង្គនេះ ដោយសម្ដេចចាត់ទុកស្ពាននេះ គឺជាស្ពានមួយដ៏ល្អ សម្រាប់បម្រើដល់ការរស់នៅរបស់ប្រជាពលរដ្ឋនៅកម្ពុជា។

កាលពីដើមសប្តាហ៍នេះ លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានមានប្រសាសន៍ឲ្យដឹងថា គំរោងស្ពានឆ្លងពីតំបន់ជ្រោយចង្វារ ទៅកាន់តំបន់ស្វាយជ្រុំបានបញ្ចប់ការសិក្សា ១០០ភាគរយហើយ ដោយភាគីទាំងពីររង់ចាំជម្រើសស្ពាន ដែលនឹងត្រូវសាងសង់នាពេលខាងមុខ។

ជាមួយគ្នានេះ ឯកអគ្គរដ្ឋទូតសាធារណៈរដ្ឋកូរ៉េប្រចាំកម្ពុជាបានមានប្រសាសន៍ឲ្យដឹង កាលពីពេលថ្មីៗនេះថា ក្រុមហ៊ុនកូរ៉េមួយបានសិក្សាពី​ការសាងសង់ស្ពានមិត្តភាពកម្ពុជា កូរ៉េ ដែលស្ពាននេះមានជម្រើសមួយចំនួន ប៉ុន្តែទម្រង់ស្ពាន នឹងត្រូវសាងសង់ជាស្ពានយោងដោយខ្សែកាប ដែលនឹងជា​ Landmark ថ្មីមួយនៅរាជធានីភ្នំពេញ និងជានិម្មិតរូបនៃចំណងមិត្តភាពកូរ៉េកម្ពុជា។

លោកបានបន្តថា “ស្ពាននេះនឹងជួយលើកសម្រស់ក្រុងភ្នំពេញ និងចូលរួមទាក់ទាញភ្ញៀវទេសចរណ៍កូរ៉េ មកទស្សនាកម្ពុជាផងដែរ”៕

លោក Cooler Tan៖ អភិវឌ្ឍគម្រោងដីឡូតិ៍លំហែឱ្យទទួលបានភាពជោគជ័យគួរឈរលើគោលការណ៍ចំនួន៣

ដោយៈសុផារី

ភ្នំពេញៈ និន្នាការការទិញលក់ដីឡូតិ៍លំហែ មានកំណើនគួរឱ្យកត់សម្គាល់ ជាពិសេសនៅតាមបណ្តាខេត្ត ក្រុងជិតរាជធានីភ្នំពេញ ដូចជា កណ្តាល កំពត កំពង់ឆ្នាំងជាដើម។ ស្របពេលទីផ្សារដីឡូត៍លំហែរមានការកើនឡើង ការប្រកួតប្រជែងក៏កាន់តែខ្ពស់។

អគ្គនាយកក្រុមហ៊ុនភ្នាក់ងារអចលនទ្រព្យ Youngsia Real Estate និងជាម្ចាស់គម្រោងដីឡូតិ៍លំហែបូកគោលែន ក្នុងខេត្តកំពត លោក Cooler Tan បានមានប្រសាសន៍ឲ្យដឹង កាលពីថ្ងៃទី១១ កុម្ភៈកន្លងមកថា ចង់អភិវឌ្ឍគម្រោងដីឡូតិ៍លំហែ ឱ្យទទួលបានភាពជោគជ័យ អ្នកអភិវឌ្ឍន៍គួរឈរលើមូលដ្ឋានចំនួន៣ជាគោលការណ៍។

លោកបានព្យល់ថា “ធ្វើឱ្យល្អ មានន័យថា ពុះដីឡូត៍លំហែត្រូវតែប្រាកដថា អាចទៅរស់នៅ ឬទៅលេងកំសាន្តបាន។ គម្រោងដីឡូត៍លំហែ ត្រូវតែលំហែ មិនមែនដាក់ថា ដីឡូត៍លំហែ តែបែរជាមានអារម្មណ៍អួរអ័ព្ទ ទៅវិញនោះទេ”។



គោលការណ៍ទី១ ហេដ្ឋារចនាសម្ព័ន្ធធំៗ

គោលការណ៍ទី២ សួនបៃតង ត្រូវតែតុបតែងលំអឱ្យស្អាត

គោលការណ៍ទី៣ ប្រព័ន្ធលូបង្ហូរទឹកចេញចូល ប្រព័ន្ធទឹក ប្រព័ន្ធភ្លើង ត្រូវរៀបចំជូនអតិថិជនកុំឱ្យខ្វះខាត។

លោក Cooler Tan បានបន្តថា នៅពេលដែលប្រព័ន្ធទាំងនេះ រៀបចំចាត់ចែងរួចរាល់ មានន័យថា គម្រោងដីឡូត៍លំហែរបស់អ្នកអភិវឌ្ឍន៍គឺជាគម្រោងល្អ។ មនុស្សអាចចូលទៅធ្វើការសាងសង់ផ្ទះ ចូលទៅរស់នៅបាន និងចូលទៅលំហែនៅក្នុងហ្នឹងបាន។

ប្រសិនបើដីឡូត៍លំហែមិនមានចំណុច៣ ខាងលើនេះទេ ដីឡូត៍លំហែ ក៏មិនផ្តល់លក្ខណៈលំហែរដល់អតិថិជនដែរ។
លោកបានមានប្រសាសន៍ថា”ប្រសិនបើគ្មានកត្តាទាំង៣ ខាងលើនេះទេ កន្លែងលំហែក៏មិនលំហែរ។ ឈ្មោះថា “លម្ហែ” តែផលិតផលជាក់ស្តែងមិនមែន លម្ហែ”។

លោក Cooler Tan បានបន្តថា “កន្លែងលម្ហែមានន័យថា រស់នៅហើយស្រស់ស្រាយ លំហែអារម្មណ៍ បំបាត់ភាពស្ត្រេស និងទុក្ខកង្វល់។ បើអ្នកអភិវឌ្ឍន៍មិនរៀបចំចំណុចទាំងនេះ គ្រាន់តែចូលទៅដល់ អតិថិជនមួរម៉ៅបាត់ទៅហើយ”៕

China gives property firms easier access to escrow funds: Report


HONG KONG:
China has moved to give real estate firms easier access to presale proceeds from residential projects, local media outlet Cailianshe said on Thursday (Feb 10), as authorities seek to loosen a stifling liquidity squeeze in the property sector.

Chinese developers are allowed to sell projects before completing them but are required to put such proceeds into escrow accounts. Cash held in escrow typically equates to 50 per cent to 70 per cent of developers’ presale funds.

In 2021, amid fears of sector-wide contagion from bluechip China Evergrande Group’s debt problems, many local governments curbed withdrawals from escrow accounts, leaving some projects unfinished and developers short of cash.

Cailianshe, a financial news website, said on Thursday that a new regulatory framework – which Reuters first reported on Jan 19 that China was drafting would “correct over-tightening” of escrow accounts by city or county-level authorities.

Curbs on withdrawals would use different calculation methods based on construction costs, allowing developers to withdraw more funds than previously, Cailianshe said.

A bloated real estate sector has undergone a deleveraging crisis in the wake of Evergrande’s near-meltdown. Once China’s top-selling developer, it is now the world’s most indebted property firm with liabilities of around US$300 billion.

Source: Reuters